Batumelebi | რატომ დაანგრიეს მშენებარე ეკლესიის ეზოს საზიარო კედელი რატომ დაანგრიეს მშენებარე ეკლესიის ეზოს საზიარო კედელი – Batumelebi

რატომ დაანგრიეს მშენებარე ეკლესიის ეზოს საზიარო კედელი

ანგისას დასახლებაში  ევდემოზ კათალიკოსის სახელობის მშენებარე ტაძრის ერთ მხარეს ქვის ის ღობე დაინგრა, რომელიც მეზობელთან საზიაროა. ეკლესიის მეზობელი საქართველოს მოქალაქე, ეთნიკურად აზეირბაიჯანელი ნარგიზა ბაირამ კიზია [ჰასთაოღლუ]. მან „ბათუმელებს“ უთხრა, რომ ქვის ღობე პროტესტის ნიშნად რამდენიმე დღის წინ დაანგრია, რადგან კონკრეტული პასუხი ვერც მერიისგან მიიღო და ვერც – საპატრიარქოსგან.

ნარგიზა ბაირამ კიზი ამბობს, რომ მის მიერ კანონიერად შეძენილი მიწის ნაკვეთის ნაწილი ეკლესიამ მიისაკუთრა. გარდა ამისა, მის ოჯახს ეკლესიის მშენებლობის ხელმძღვანელი, მამია კომახიძე ემუქრებოდა, რომელიც ეკლესიის მშენებლობაზე მორჩენილი, ასევე შეწირული მასალის შესყიდვას აიძულებდა.

მშენებარე ტაძარში „ბათუმელებს“ მხოლოდ მეჩუქურთმე დახვდა. გვითხრა, რომ კურთხევა არ აქვს ჟურნალისტებთან ისაუბროს. მშენებარე ტაძრის შენობაზე გამოკრულ ტელეფონის ნომერზე კი, მამუკა კომახიძემ გვიპასუხა. „კვირას გვექნება პარაკლისი, რომელსაც დაესწრება ორივე მხარე და სხვა სასულიერო პირებიც. თქვენც შეგიძლიათ დაესწროთ. იქ გაჟღერდება ჩვენი პოზიცია და გაირკვევა ყველაფერი, მანამდე ვერაფერს გეტყვით“, – გვითხრა მამუკა კომახიძემ და დასძინა, რომ მისი სტატუსი ასეთია – ეკლესიის აღმშენებელი.

ნარგიზ ბაირამ კიზის ინფორმაციით, ამ შეხვედრის თაობაზე მას არავინ დაკავშირებია.

DSCN8671ეკლესიის მეზობლად მცხოვრებლებმა აღნიშნულ ფაქტზე კომენტარი „ბათუმელებთან“ არ გააკეთეს. პირად საუბრებში კი დაგვიდასტურეს, რომ საზიარო კედლები ნამდვილად ეკლესიამ ააგო, მათ შორის, ისიც, რომელიც ეკლესიას არ ესაზღვრება და ამაში ფული ნარგიზა ბაირამ კიზიმ გადაიხადა. ორივე კედელი დანგრეულია. ბაირამ კიზის ოჯახი რეესტრში მიწის ხელახლა დაზუსტებას და შემდეგ სახლის პროექტის შეცვლას აპირებს. სადავო, საზიარო კედელთან დაკავშირებით, „ბათუმელებთან“ ნარგიზა ბაირამ კიზი  ამბობს:

„მიწის ნაკვეთი 2010 წელს შევიძინე დალი დიასამიძისგან. ერთ დღეს მივედით და ჩემს მიწაზე თხილის ნარგავები აღარ დაგვხდა. მოსწორებული იყო ირგვლივ ყველაფერი. მაშინ გავიცანი მამუკა კომახიძე. მითხრა, რომ ეკლესიის მშენებლობა იწყებოდა, თვითონ ხელმძღვანელი იყო და აღარ მითქვამს არაფერი. პირიქით, მამუკას დავუმეგობრდი, მიხაროდა, გვერდით ეკლესია რომ აშენდება, სიწყნარე და წესრიგი იქნება-მეთქი. მერე მამუკამ შეხვედრა მთხოვა და მითხრა, საზიარო ღობე იქნებ ავაშენოთ, ჩვენ-ჩვენი ვიცოდეთო [ბაირამ კიზის და ეკლესიას მხოლოდ ერთი მხარე აქვთ საზიარო]. შემომთავაზა, ჩვენ ავაშენებთ ბეტონის კედლებს თუ ფულს გადაიხდით, ტაძრის მშენებლები მაინც აქ არიანო. იმისთვის, რომ ეკლესიის შესასვლელი ფართო გამოსულიყო, დავთანხმდი, 30 სანტიმეტრი შემოიწიეთ ჩემს მიწაზე-მეთქი. მამუკამ მითხრა სახლის მეორე მხარესაც ჩვენ გაგიკეთებთ ღობესო [საუბარია ქვის კედელზე, რომელიც მშენებარე ეკლესიის ტერიტორიას არ ესაზღვრება. ეს ღობე იყო გამყოფი ბაირამ კიზისა და იქვე მცხოვრები, მერაბ აბაშიძის საკუთრებას შორის]. შევთანხმდით და ამ ორ კედელში ჯამში 6500 ლარი გადავიხადე.“

DSCN8667

ბაირამ კიზიმ დაშალა ის კედელიც, რომელიც ეკლესიასთან საზიარო არ არის.

ნარგიზა ბაირამ კიზის თქმით, პირველი კონფლიქტი მაშინ მოხდა, როცა აღმოაჩინა, რომ ეკლესიას ღობის მშენებლობლობის დროს, 30 სანტიმეტრის ნაცვლად,  დაახლოებით 1,5 მეტრით გაუფართოვებია ტაძრის შესასვლელი. „წავიკამათეთ, მაგრამ მაინც კეთილმეზობლობა ვარჩიე. ჩემი სახლის მშენებლობის პროექტი უკვე დამტკიცებული იყო და ის მიწის შევიწროვებულ ნაკვეთში აღარ ეტეოდა.  მოპირდაპირედ ლადო ფუტკარაძის მიწაა, მისგან ვიყიდე დამტებით 30 კვადრატული მეტრი ნაკვეთი.“

ბაირამ კიზის მონაყოლით, ვიდრე სახლის საძირკვლის ჩაყრას დაიწყებდა, მამუკა კომახიძემ სამშენებლო მასალის შეძენა შესთავაზა: „დამირეკა და მითხრა, კარგი მასალა გვაქვს და დაგჭირდება მშენებლობაზეო. ვუთხარი, სად წავიღო ახლა, ჯერ ფუნდამენტი არ ჩამისხამს-მეთქი. მითხრა, მაგაზე არ ინერვიულო, ეკლესიის შენობაში იქნებაო. 7 კუბურ მეტრ ხის მასალაში 3850 ლარი გადავიხადე. მერე მითხრეს, ხის მასალის შეძენას ნებართვა სჭირდებოდაო, მამუკას ვთხოვე, მოეცა. მითხრა, რომ ასეთი დოკუმენტი არ აქვს, შენაწირიაო. მერე ისევ დამირეკა, მივედით ცოლ-ქმარი და გვითხრა, ეს ღობეც ასაშენებელიაო და დაახლოებით 6 ათასი ესეც დაგვიჯდებაო. [საუბარია ღობეზე, რომელიც მშენებარე ეკლესიის ეზოსა და სხვა პირის ნაკვეთს შორის უნდა გაკეთდეს. იგი ბაირამ კიზის მიწის ნაკვეთის მოსაზღვრე არ არის] ვუთხარი, სხვისი ღობე რატომ უნდა გავაკეთო-მეთქი. მამუკამ მითხრა, თუ სახლის აშენება გინდა, ასეა საჭიროო. ჩემს უკან მთელი საქართველო დგასო, ზემოდან მითხრეს ასეო, ამას ხშირად იმეორებდა. ღობის მშენებლობის დაფინანსებაზე უარი ვუთხარი. დამემუქრა, მაშინ სახლს ვერ ააშენებთო“.

DSCN8660

საზღვრის დარღვევა ამ კუთხეში დააფიქსირა მერიის ზედამხედველობის სამსახურმა

„დაუყონებლივ შეაჩერეთ სამუშაოები და 10 დღის ვადაში მშენებლობა მოიყვანეთ სამშენებლო დოკუმენტაციასთან (პროექტთან) შესაბამისობაში“, – ეს ბათუმის მერიის ზედამხედველობის სამსახურის მითითება #26-ში წერია. მითითება 2016 წლის 10 მარტითაა დათარიღებული. ბაირამ კიზის თქმით, ზედამხედველობის სამსახური საცხოვრებელი სახლის საძირკვლის ჩაყრისთანავე მივიდა მათთან: „საძირკველს როცა ვყრიდით, ჩვენს დასანახად დაურეკა მამუკა კომახიძემ მერიას, მოდითო. მართლაც მოვიდნენ და გვითხრეს, 30 სანტიმეტრით გადასულია საძირკვლის ერთი სვეტი მეზობლის ნაკვეთშიო, კიდევ არასასოფლოა თქვენი ნაკვეთი და სასოფლოა ის მიწა, რომელიც დამატებით შეიძინეთ, ესეც უკანონოაო. მაშინ მამა ევდემოზიც მოვიდა და გვითხრა, ჩვენი მამა-პაპური მიწაა, თქვენ ჩამოსული ხართ, ეს იცოდეთო. ეს მოძღვარი ტაძრის მშენებლობას ხშირად ესწრება, მაგრამ მასთან ურთიერთობა მანამდე არ გვქონდა“.

migeba-chabareba

ნარგიზ ბაირამ კიზის მიერ წარმოდგენილი დოკუმენტები მის მიერ საპატრიარქოში წერილის გაგზავნისა და ჩაბარების შესახებ

20 მარტს ბაირამ კიზიმ წერილით საქართველოს საპატრიარქოს მიმართა დახმარებისთვის. „თქვენი შეწუხება გადავწყვიტე. ვიმედოვნებ, რომ ჩვენი მეზობლური ურთიერთობა, როგორც მამუკას სურს, ისე არ იქნება და ვიმოქმედებთ, როგორც კანონი მოგვიწოდებს და როგორც კადასტრში არის ასახული ჩემი საკუთრებაა და დღეის მდგომარეობით არსებული კედელი უნდა მოვანგრიო და უნდა მოვიყვანო პირვანდელ მდგომაროებაში“,  – აღნიშნულია საპატრიარქოსთვის გაგზავნილ წერილში [წერილი საპატრიარქოს მიმდინარე წლის 23 მარტს ჩაბარდა].

ნარგიზას თქმით, საპატრიარქოში წერილის მიწერამდე, ის ეპისკოპოს დიმიტრისთან მივიდა. „მითხრეს, არ სცალია, ვერ მიგიღებთო, ჩემი ტელეფონი ჩაიწერეს, მაგრამ არ დაურეკავთ. პასუხი ვერც მერიისგან მივიღეთ, რა გამოსავალი არსებობს. მესმის, რომ კედლის დანგრევა გამოსავალი არ არის, მაგრამ ეს იმიტომ გავაკეთე, რომ ყურადღება მომაქციონ“,- უთხრა ნარგიზა ბაირამ კიზიმ „ბათუმელებს“. მან ის წერილიც გვაჩვენა, რომლითაც პოლიციას მიმართა და პრობლემის შესწავლა სთხოვა.

წერილი

ნარგიზა ჰასთაოღლუს მიერ გაგზავნილი წერილი ბათუმის მერიაში

გაცემულია თუ არა ნებართვა ეკლესიის მშენებლობაზე? – ამ კითხვით ნარგიზა ბაირამ კიზიმ ბათუმის მერიას წერილობით ორჯერ მიმართა. პასუხი, როგორც თავად ამბობს, არ მიუღია.

ანალოგიური კითხვით – გაცემულია თუ არა ნებართვა ეკლესიის მშენებლობაზე? –  ბათუმის მერიას „ბათუმელებიც“ დაუკავშირდა. პასუხი ამ დრომდე ვერც “ბათუმელებმა” მიიღო.

“ბათუმელების” ზარებს  ბათუმისა და ლაზეთის ეპარქიაში და არც საპატრიარქოში არ უპასუხეს.

„ბათუმელების“ ინფორმაციით, მერიაში, ბათუმის მერის, გიორგი ერმაკოვის სახელზე შევიდა წერილი „აეროპორტის გზატკეცილის მიმდებარედ მცხოვრები მოქალაქეებისგან“, სადაც აღნიშნულია, რომ „…თურქმა მოქალაქემ შეიძინა მიწის ნაკვეთი, აშენებს სახლს და მშენებლობის პროცესში დაანგრია ტაძრის გალავანი… მიუღებელია ჩვენთვის ასეთი საქციელი და გთხოვთ მიიღოთ სათანადო ზომები, რათა მოსახლეობასა და მშენებარე სახლის მეპატრონეთა შორის დაპირისპირება ავიცილოთ“. ჩვენივე ინფორმაციით, წერილს ხელს 257 ადამიანი აწერს.

„ბათუმელები“ შინაგან საქმეთა სამინისტროსაც დაუკავშირდა. სამინისტროს პრესსამსახურის ინფორმაციით: „მიმდინარეობს საქმეზე მოკვლევა და საქმე აღიძვრება თუ არა, ვერ გეტყვით“.

DSCN8673

დანგრეული საზირო კედელი [ტაძრის მხრიდან გადაღებული ფოტო]

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი