შს სამინისტრო სასამართლოს კანონიერ ძალაში შესულ გადაწყვეტილებას არ ასრულებს – საქმე ეხება „გაზეთ ბათუმელების“ საჩივარს შს სამინისტროს წინააღმდეგ, რომელიც ამ უწყების პრემიების გასაჯაროებას უკავშირდებოდა. სამინისტროს მიერ სასამართლოს გადაწყვეტილების აღუსრულებლობასთან დაკავშირებით საქართველოს ახალგაზრდა იურისტთა ასოციცია განცხადებას ავრცელებს, რომელსაც უცვლელად გთავაზობთ:
საქართველოს შინაგან საქმეთა სამინისტრო გაზეთ „ბათუმელებს“ არ აძლევს საჯარო ინფორმაციას სამინისტროს თანამდებობის პირებისთვის გაცემული პრემიების ოდენობის შესახებ, რომლის გაცემაც სამინისტროს დაევალა სასამართლოს კანონიერ ძალაში შესული გადაწყვეტილებით. საქართველოს შინაგან საქმეთა სამინისტრო არ უზრუნველყოფს სასამართლოს გადაწყვეტილების ნებაყოფლობით აღსრულებას.
საჯარო ინფორმაცია, რომლის გაცემაც სასამართლოს გადაწყვეტილებით შინაგან საქმეთა სამინისტროს დაევალა, შეეხება შინაგან საქმეთა სამინისტროს თანამდებობის პირთა მიერ 2013 წლის 1 იანვრიდან 1 ნოემბრამდე მიღებული პრემიის თანხის ოდენობას, პრემიის მიმღები თანამდებობის პირის სახელის, გვარისა და თანხის ოდენობის მითითებით.
ეჭვის საფუძველს ქმნის ის გარემოება, რომ საქართველოს შინაგან საქმეთა სამინისტროს არ სურს საჯარო გახდეს ინფორმაცია იმის თაობაზე, თუ როგორია სამინისტროში თანამდებობის პირებისთვის პრემიების გაცემის პრაქტიკა. კერძოდ, სამინისტრო გაცემული პრემიების ოდენობის შესახებ ინფორმაციას გასცემს ჯამურად, მაგრამ არ გასცემს ინფორმაციას იმის თაობაზე თუ ცალკეულმა თანამდებობის პირებმა (მინისტრი, მინისტრის მოადგილე, დეპარტამენტის უფროსი, დეპარტამენტის უფროსის მოადგილე, სამმართველოს უფროსი და ა.შ.) რა ოდენობის პრემია მიიღეს 2013 წელს.
აღნიშნულს ადასტურებს გაზეთ „ბათუმელების“ საქმეზე განვითარებული მოვლენები. კერძოდ, გაზეთმა „ბათუმელებმა“ საჯარო ინფორმაციის მოთხოვნით შინაგან საქმეთა სამინისტროს მიმართა ჯერ კიდევ 2013 წლის 25 ნოემბერს. მას შემდეგ რაც შინაგან საქმეთა სამინისტრომ სრულიად უკანონოდ არ გასცა საჯარო ინფორმაცია, გაზეთმა „ბათუმელებმა“ საიას დახმარებით მიმართა სასამართლოს.
მხოლოდ სასამართლოსთვის მიმართვის შემდეგ, სამინისტრომ სასამართლო პროცესზე წარადგინა 2014 წლის 15 იანვრის წერილი, რომლითაც გასცა პრემიების შესახებ ინფორმაცია ჯამურად და არა თანამდებობის პირების მითითებით, ცალ-ცალკე.
სასამართლოს 2015 წლის 6 იანვრის გადაწყვეტილებით, შინაგან საქმეთა სამინისტროს დაეკისრა მოთხოვნილი საჯარო ინფორმაციის გაცემა. სასამართლოს აღნიშნული გადაწყვეტილება შინაგან საქმეთა სამინისტრომ გაასაჩივრა როგორც თბილისის სააპელაციო ისე საქართველოს უზენაეს სასამართლოში. შედეგად, სასამართლოს გადაწყვეტილება კანონიერ ძალაში შევიდა 2015 წლის 29 სექტემბერს და შინაგან საქმეთა სამინისტროს, სასამართლო გადაწყვეტილების ძალით, დაევალა გასცეს ზემოაღნიშნული საჯარო ინფორმაცია.
მიუხედავად სასამართლოს კანონიერ ძალაში შესული გადაწყვეტილებისა, საქართველოს შინაგან საქმეთა სამინისტრო არათუ არ გასცემს საჯარო ინფორმაციას, 2015 წლის 29 სექტემბრიდან დღემდე არ უზრუნველყოფს სასამართლოს გადაწყვეტილების ნებაყოფლობით აღსრულებას.
აღნიშნულის გამო გაზეთი „ბათუმელები“ და საია გამოიყენებენ სასამართლოს გადაწყვეტილების იძულებითი აღსრულების მექანიზმს და ამისათვის მიმართავენ სააღსრულებო ბიუროს, რაც სამწუხაროდ, კიდევ უფრო გააჭიანურებს მედიასაშუალების მიერ იმ საჯარო ინფორმაციის მიღებას, რომელიც კანონის თანახმად, შინაგან საქმეთა სამინისტროს 2013 წლის 5 დეკემბრამდე უნდა გაეცა“.
