კორუფციულ გარიგებად „ნაციონალურ მოძრაობაში“ ბათუმის მერიის მიმდინარე ტენდერს მიიჩნევენ, რომელიც ბათუმში მინისტადიონების შესაკეთებლად არის გამოცხადებული. სამუშაოების ღირებულება მილიონ 400 ათასი ლარია.
„ტენდერი მხოლოდ სამშენებლო მასალის შესყიდვაზე უნდა გამოცხადებულიყო, რადგან ა(ა)იპ „ბათუმის კორპუსს“ 25 კვალიფიციური თანამშრომელი დაემატა შესაბამისი სახელფასო ფონდით. ეს მუშახელი მუშაობს სტადიონების შეკეთებაზე და ისმის კითხვა: თუ „ბათუმის კორპუსის“ ფუნქციებს განახორციელებს მერია, მაშინ რა საჭირო იყო შტატებისა და სახელფასო ფონდის გაზრდა, ან ორგანიზაციის ამ სახით შენახვა?“ – აცხადებს „ნაციონალური მოძრაობის“ წევრი გელა დეკანაძე.
მიუხედავად იმისა, რომ ტენდერში გამარჯვებული ჯერ არ გამოვლენილა, გელა დეკანაძე მიიჩნევს, რომ საქმე კორუფციასთან გვაქვს და გიორგი ერმაკოვმა სატენდერო პირობები კონკრეტულ კომპანიებს მოარგო.
სად ჩანს „პირობების მორგება?“ – დეკანაძეს კოკნკრეტული პასუხი არ აქვს: „ეჭვები მაქვს, რომელიც დადასურდება ტენდერის დასრულების შემდეგ“.
25 მუშახელის დასაქმების შესახებ ინფორმაციას აბსურდს უწოდებს ა(ა)იპ „ბათუმის კორპუსის“ ხელმძღვანელი ზურაბ ნაკაიძე. მისი თქმით, სტადიონის შეკეთებაზე სულ 4 ადამიანი მუშაობს „ისინი მიმდინარე შეკეთებაზე მუშაობენ. იმ სტადიონებზე გამოცხადდა ტენდერი, რომლებსაც კაპიტალური რემონტი სჭირდება. ქალაქში სულ 92 მინისტადიონია. თუ სწორად მახსოვს, ტენდერი 37 სტადიონის კაპიტალურ შეკეთებაზეა გამოცხადებული,“ – გვითხრა ზურაბ ნაკაიძემ.
