Batumelebi

დღეს, 19 მაისს, „დემოკრატიის ინსტიტუტში“ „შშმ პირთა ის ადვოკატირებისა და ლობირების“ პროექტის პრეზენტაცია გაიმართა.

პრეზენტაციას განათლების, განვითარებისა და დასაქმების ცენტრის პროგრამების დირექტორი ნათია ნამიჭეიშვილი უძღვებოდა.

პრეზენტაციაზე დაწვრილებით განიხილეს შშმ პირებთან დაკავშირებული საკითხები, მათ შორის შშმ პირებთან მიმართებაში არსებული სტიგმისა და დისკრიმინაციის შემთხვევები, პრობლემებური სიტუაციების აღმოფხვრის გზები, შშმ პირთა საზოგადოებაში ინტეგრაციის როლი და სხვა.

პროექტი  აჭარაში მეორე წელია რაც ხორციელდება. ბათუმში ამ ეტაპზე პროექტის ფარგლებში დასაქმებულთა რიცხვი 35 პირს შეადგენს, ხოლო ოქტომბრის ბოლომდე 60 ადამიანის დასაქმება იგეგმება, ამათგან 20 შშმ პირი ანაზღაურებად  სტაჟირებას გაივლის.

განათლების  განვითარებისა და და დასაქმების ცენტრის ბათუმის კონსულტანტის, ირმა ზოიძის თქმით, დამსაქმებელთა შორის არასამთავროებო ორგანიზაციები დომინირებს, ხოლო ის ორგანიზაციები, ვისაც უკვე აქვთ მიღებული თანამშრომლობის გამოცდილება, გახსნილნი არიან თანამშრომლობის გაგრძელებისთვის.

„დამსაქმებელს უნდა გამოადგეს დასაქმებული და პირიქით  – ურთიერთსასარგებლო უნდა იყოს ეს თანამშრომლობა. მაქსიმალურად ვცდილობთ დავეხმაროთ მათ, ვინც უკვე იცის რა პროფესიით იმუშავებს, დანარჩენებს კი სტაჟირების გავლის საშუალებას ვაძლევთ გამოცდილების მიღების მიზნით, რადგან თვითშეფასებისთვის ძალიან მნიშვნელოვანია სტაჟირების გავლა.

მაგალითად, სტაჟირების პროგრამის ფარგლებში, საზღვაო აკადემიის ერთ-ერთმა სტუდენტმა გადაწყვიტა ეცადა თავი ბუღალტერიაში და ახლა თვლის, რომ იპოვა ის პროფესია, რაც უნდა ესწავლა თავიდანვე.

შშმ პირებს ჩვენ ვუკავშირდებით ან არასამთავრობო ორგანიზაციებიდან გვიკავშირდებიან, ამ მხრივ, პროექტის აქტიური პარტნიორია ორგანიზაცია „ცვლილებები თანაბარი უფლებებისთვის“ – ამბობს ირმა ზოიძე.

მისივე თქმით, სტაჟირების გავლის შემდეგ დასაქმებულთა რაოდენობა მიახლოებით 60%-ს უდრის, რაც  ქვეყანაში უმუშევრობის მაღალი დონისა და შშმ პირთა მიმართ სტიგმების გათვალისწინებით, არ არის ცუდი მაჩვენებელი.

შეხვედრას დემოკრატიული ჩართულობის ცენტრის, ბათუმის მუნიციპალიტეტის საკრებულოს, ასევე სხვადასხვა კომერციული მომსახურების ობიექტების წარმომადგენლები ესწრებოდნენ.

შშმ პირთა განათლებისა და დასაქმების თანაბარი შესაძლებლობების ადვოკატირებისა და ლობირების პროგრამა საქართველოში ოთხ რეგიონში ხორციელდება: იმერეთში, კახეთში, თბილისსა და ბათუმში.

პროგრამის ფარგლებში ოთხი ძირითადი მიმართულება ფუნქციონირებს: ბავშვთა დაცვა, სამოქალაქო განვითარება, ბიზნესის და ეკონომიკის განვითარება, (რომლის ფარგლებში პროექტი ხშირად საგრანტო კონკურსები აცხადებს) და განათლება.

პროექტის ფარგლებში  იგეგმება 260 შშმ პირთა დასაქმება, 120 შშმ პირის ჩართვა ანაზღაურებადი სტაჟირების პროგრამაში და  დასაქმების ფორუმის ორგანიზება.

პროგრამა შშმ პირთა მიმართ საზოგადოების ცნობიერების ამაღლების მიმართულებითაც აწარმოებს საქმიანობას. ამ კუთხით იგეგმება 20 ჟურნალისტის გადამზადება და  ჟურნალისტთა კონკურსის ორგანიზება.

პროგრამას ქუთაისის განათლების, განვითარებისა და დასაქმების ცენტრი, თელავის განათლების, განვითარებისა და დასაქმების ცენტრი, ასევე, ქვეითსაწინააღმდეგო ნაღმების აკრძალვის საერთაშორისო კამპანიის საქართველოს კომიტეტი – „ოტავა 98“ ახორციელებს.

პროექტს ევროკავშირი აფინანსებს.

19 მაისს „დემოკრატიული სკოლის“ ბათუმის ოფისში, არასამთავრობო ორგანიზაციამ – „ნიდერლანდების ინსტიტუტი მრავალპარტიული დემოკრატიისთვის“ – პოლიტიკურ პარტიებში გენდერული თანასწორობის შეფასებაზე კვლევის პრეზენტაცია გაიმართა.

NIMD- ის პროგრამების ხელმძღვანელის  სალომე მუხურაძის თქმით, კვლევის კრიტერიუმების თანახმად,  პარტიას უნდა ჰქონოდა გადალახული ერთპროცენტიანი ბარიერი 2016 წლის არჩევნებზე, ასევე, უნდა ყოფილიყო დარეგისტრირებული 2015 წლამდე. ეს კრიტერიუმები მხოლოდ შვიდმა პარტიამ დააკმაყოფილა.

კვლევის შედეგებით, გენდერული თანასწორობის ნიშნით შვიდი პარტიიდან „რესპუბლიკური პარტია“ ლიდერობს,  ხოლო ბოლო ადგილზეა „ქართული ოცნება“.

„რესპუბლიკელების“  შემდეგ, პარტიულ სიებსა და არჩეულ დეპუტატებს შორის ქალების ხვედრითი წილის გათვალისწინებით, მეორე ადგილზეა „პატრიოტთა ალიანსი“, რომელსაც 52 პროცენტი  აქვს.

კვლევა შეეხებოდა შემდეგ პარტიებს:  „რესპუბლიკელები“, „ქართული ოცნება“, „პატრიოტთა ალიანსი“, „თავისუფალი დემოკრატები“, „გაერთიანებული დემოკრატები“, „ლეიბორისტები“ და  „ნაციონალური მოძრაობა“.

კვლევის ინსტიტუციური კომპონენტი ითვალისწინებდა ქალების ხვედრით წილს პარტიების მმართველ ორგანოებში, პარტიაში ქალთა უფლებების ან გენდერული თანასწორობის საკითხებზე მომუშავე ერთეულის არსებობას, ბიუჯეტში ამავე საკითხებისთვის გამოყოფილი თანხის ხვედრით წილს, საერთო  დანახარჯებთან მიმართებაში და გენდერულ თანასწორობასთან დაკავშირებულ აქტივობებს.

სალომე მუხურაძის თქმით, ამ მიმართებითაც საუკეთესო შედეგი „რესპუბლიკურმა პარტიამ“ აჩვენა, რომელსაც 54 პროცენტი ჰქონდა, „ქართულმა ოცნებას“ კი –  2.1 პროცენტი.

პროგრამული კომპონენტი აფასებდა ორ გარემოებას – გენდერულ თანასწორობის უზრუნველმყოფი მექანიზმების არსებობას პარტიაში და პარტიულ პროგრამაში ამავე საკითხებისადმი დაფიქსირებულ პრიორიტეტებს.  სალომე მუხურაძის თქმით,  „რესპუბლიკელებმა“ ამ მიმართულებითაც  საუკეთესო შედეგი აჩვენეს – 88 პროცენტი, ოთხმა პოლიტიკურმა პარტიამ კი ბოლო ადგილი გაიზიარა  – 12,5 პროცენტით.

საერთო ინდექსით, საუკეთესო მდგომარეობა „რესპუბლიკურ პარტიაში“ დაფიქსირდა – 44.6 პროცენტით, ხოლო „პატრიოტთა ალიანსმა“ და „ნაციონალურმა მოძრაობამ“ მეორე-მესამე ადგილები  გადაინაწილეს.  ბოლო ადგილზე აღმოჩნდა „ქართული ოცნება“ – 17 პროცენტით, ხოლო „ლეიბორისტებმა“, „გაერთიანებულმა დემოკრატებმა“ და „თავისუფალმა დემოკარტებმა“, მე-4, მე-5 და მე-6 ადგილები დაიკავეს.

NIMD-ის შეფასებით, კვლევამ აჩვენა, რომ პოლიტიკურ პარტიებში გენდერული თანასწორობის მისაღწევად ჯერ კიდევ ბევრია გასაკეთებელი.

პოლიტიკური პარტიების გენდერული რანგირების კვლევა NIMD-მა უკვე მეორეჯერ ჩაატარა, პირველი 2014 წელს, მეორე კვლევა კი 2015-2016 წლებს მოიცავს.

კომპანია „მეტროს“ ახალ სასტუმროს SKY TOWER-ი ჰქვია. ხიმშიაშვილის ქუჩაზე მდებარე სასტუმრო 21-სართულიანია და მასში 101  ნომერია, 94 – სტანდარტული და 7 ლუქსი. სასტუმროს აქვს სპა და გამაჯანსაღებელი ცენტრი. გარდა ამისა,  SKY TOWER-ში საპრეზიდენტო ნომერი, საკონფერენციო დარბაზი, რესტორანი, კაზინო, ღამის კლუბი და სხვა ობიექტებია განთავსებული.

აჭარის მთავრობის ინფორმაციის თანახმად, სასტუმროს მშენებლობით 20 მლნ აშშ დოლარის ინვესტიცია განხორციელდა. ამ ეტაპზე სასტუმროში 90 ადამიანია დასაქმებული.

სასტუმრო დღეს, 19 მაისს,  აჭარის მთავრობის თავმჯდომარემ ზურაბ პატარაძემ აჭარის ფინანსთა და ეკონომიკის მინისტრთან, რამაზ ბოლქვაძესთან და კომპანია „მეტროს“ დირექტორთან, რაულ კახიძესთან ერთად გახსნა.

აჭარის ფინანსთა და ეკონომიკის სამინისტრო დასასვენებელი-საპიკნიკე ადგილების მოსაწყობად საპროექტო-სახარჯთაღრიცხვო დოკუმენტაციას შეისყიდის. 6 ობიექტის დოკუმენტაციის შედგენაში კი, მაქსიმუმ 33 ათას 898 ლარს გადაიხდის.

[checklist]

• სოფელი ბუკნარი – სენაკი-ფოთი-სარფის საავტომობილო გზის ორივე მხარეს;
• ბათუმი, მახინჯაურის დასახლება – სარკინიგზო გადასასვლელი ხიდის მიმდებარედ;
• ქედის მუნიციპალიტეტის სოფელი დანდალო – დანდალოს ხიდის მიმდებარედ;
• ქედის მუნიციპალიტეტის სოფელი დოლოგანი;
• ქობულეთის მუნიციპალიტეტი, სოფელი სახალვაშო – ბელვედერი გადამფრენ ფრინველებზე დაკვირვების სადგური;
• ხელვაჩაურის მუნიციპალიტეტი, სოფელი ერგე – საავტომობილო გზის მიმდებარედ.

[/checklist]

სამინისტროს ინფორმაციით, სარეკრეაციო ადგილები უზრუნველყოფილი უნდა იყოს მცირე მოცულობის სავაჭრო ობიექტით, დასასვენებელი სივრცით [ღია და დახურული], კარვების განთავსების ადგილით [სამინისტროსთან შეთანხმებით], სველი წერტილებით, საშხაპე კაბინით, სანაგვე ურნებით, გარე განათებით, ავტო და ველოსიპედის პარკინგით, ტურისტულ-საინფორმაციო მარშრუტების სქემების განთავსებით, ელექტროხელსაწყოების დატენვის მოწყობილობებითა და ტერიტორიის ნორმალური ფუნქციონირებისათვის სხვა საჭირო მოწყობილობებით [რაც უნდა შეთანხმდეს წინასწარ სამინისტროსთან], თუ შესაძლებელია ასევე WIFI-ით.

ამასთან, სოფელ ბუკნარში, საავტომობილო გზის მარჯვენა მხარეს დასაგეგმარებელი დასასვენებელი-საპიკნიკე ადგილის პროექტირებისას გათვალისწინებული უნდა იქნას კემპინგის მოწყობის საკითხი.

საპიკნიკე ადგილების მოწყობის საპროექტო დოკუმენტაციის შედგენა 2017 წელს აჭარაში „ტურისტული ინფრასტრუქტურის განვითარების ხელშეწყობის“ მიზნით დაიგეგმა. თავდაპირველად საუბარი იყო, რომ 8 ობიექტის პროექტი მომზადებულიყო, თუმცა სამინისტრომ ტენდერი 6 ობიექტის საპროექტო დოკუმენტაციის შედგენაზე გამოაცხადა. ტენდერში წინადადებების მიღება 22 მაისს დაიწყება და 24 მაისს დასრულდება.

„გონიოს ციხის მიმდებარედ ვგეგმავდით ანალოგიური ადგილის მოწყობას, თუმცა იქ კულტურული მემკვიდრეობის დაცვის სააგენტოს აქვს თავისი პროექტი და ის მოაწყობს ასეთ ადგილს. ასევე გვინდოდა სარფში, მაგრამ მიწის ნაკვეთის გამოყოფის კუთხით შეიქმნა ტექნიკური პრობლემა და სარფის, ასევე შუახევის [ერთი ან ორი] საპიკნიკე ადგილის პროექტების შეძენა მეორე ეტაპზე მოხდება და ის მწვანე ტბის პროექტს მიებმება“ – გვითხრა ნუგზარ ძნელაძემ, ფინანსთა და ეკონომიკის სამინისტროს ქალაქმშენებლობის დეპარტამენტის უფროსმა.

საპროექტო-სახარჯთაღრიცხვო დოკუმენტების შესყიდვის შემდეგ გამოცხადდება ტენდერი სამშენებლო სამუშაოებზე. სამინისტროში ფიქრობენ, რომ კარკვეული ადგილების მოწყობა შესაძლოა შემოდგომისთვის დასრულდეს, ნაწილი კი მომავალ წელს. სამინისტრო აპირებს სამომავლოდ დასასვენებელი-საპიკნიკე ადგილები იჯარით გასცეს – პირობით, რომ ზოგიერთი სერვისი იქნება უფასო, ზოგიერთი კი – ფასიანი.

ბათუმში, ტაოს ქუჩაზე, მოსახლეობა „საქართველოს ელექტროსისტემის“ მიერ მაღალი ძაბვის გადამცემი ხაზების გაყვანას აპროტესტებს. ტაოს ქუჩაზე მცხოვრები რომან ზაქარაძის თქმით, მათი პროტესტის მიზეზი კომპანიის დამოკიდებულებაა, რომელსაც მათ საკუთრებაზე, მათთან შეთანხმების გარეშე გაჰყავს ელექტროგადამცემი ხაზები. მისივე თქმით, ადგილზე მობილიზებულია ხელვაჩაურის პოლიცია.

„მოსული არიან ქსელებიდან და ძალით გაყავთ. თანხაზე მოლაპარაკება არ არის, იხდიან ძალიან ცოტას და პოლიციის ძალით გაჰყავთ. კერძო საკუთრებებში არიან შემოსული. ექსპოპრიაციის წესით ჩამორთმეული არისო. ახლა შეკრებილი ვართ და არ ვუშვებთ. თუ მოლაპარაკება არ მოხდა, ცუდად წავა საქმე, იმიტომ, რომ ამაზე მეტი ჩვენ არაფერი დაგვრჩა, ეს არის ჩვენი ბოლო წვეთი. ტაოს ქუჩაზე 14-მდე ოჯახს ეხება ეს საკითხი“ – ამბობს რომან ზაქარაძე.

„საქართველოს ელექტროსისტემაში“ „ბათუმელებს“ უთხრეს, რომ ამჟამად მიმდინარეობს ხაზების   გაჭიმვა და კომპანია პარალელურ რეჟიმში მოლაპარაკებას აწარმოებას მოსახლეობასთან.

აჭარაში მაღალი ძაბვის ახალციხე-ბათუმის 220-კილოვოლტიან ელექტროგადამცემ სისტემას საქართველოს სახელმწიფოს დაკვეთით ინდური კომპანია KEC-ი აშენებს. ელექტროგადამცემი ხაზი ხელვაჩაურის, ქედის, შუახევისა და ხულოს მუნიციპალიტეტების ტერიტორიაზე გაივლის. პირველადი მონაცემებით, ბუფერულ ზონაში 50 ოჯახი მოხვდება. მშენებლობა 2018 წლის დასაწყისისთვის უნდა დასრულდეს. ამ ქსელით ახალაშენებული ჰესების მიერ გამომუშავებული ელექტროენერგიის ერთ სისტემაში მოქცევა და თურქეთისთვის მიწოდება იგეგმება.

ქსელის მშენებლობას საპროტესტო აქციები მოჰყვა მთელს აჭარაში. მოსახლეობის უკმაყოფილების მიზეზი ძირითადად კომპენსაციის თანხაა, მოსახლეობა მიიჩნევს, რომ „ელექტროსისტემა“ მათ მცირე თანხას უხდით მიწის დათმობის და გამოყენების შეზღუდვის სანაცვლოდ.

საქართველოს ეკონომიკისა და მდგრადი განვითარების სამინისტრომ „ელექტროსისტემას“ აჭარაში 15 მოსახლის კერძო საკუთრების ექსპროპრიაციის წესით [საკუთრების ჩამორთმევა სახელმწიფოს მიერ ანაზღაურებით ან მის გარეშე] გამოყენების უფლება მისცა.

ამავე თემაზე: 

ხიხანის ქუჩაზე მცხოვრები: რეალურად შეფასდეს მიწა, მოგებას არ ვითხოვ

აქციაზე დაკავებული მიიჩნევს, რომ სახელმწიფო საკუთრებაში არაადეკვატურ ფასს სთავაზობს

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, აჭარაში 20-23 მაისს არამდგრადი ამინდია მოსალოდნელი, დროგამოშვებით იწვიმებს.

„დღეს და მომდევნო ორი დღის განმავლობაში მოსალოდნელია წვიმა, ხვალ, 20 მაისს, დღის პირველ ნახევარში შესაძლებელია ზოგან ძლიერი წვიმა, ზღვაზე 2-4 ბალიანი შტორმი. ჰაერის ტემპერატურა: ღამით 8-13, დღისით 15-20 გრადუსი. მთაში – ღამით 3-8, დღისით 12-17 გრადუსი. 22 მაისს გამოიდარებს, მაგრამ 23 მაისს კვლავ არამდგრადი ამინდია მოსალოდნელი“ – განაცხადა „ბათუმელებთან“ გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის სინოპტიკოსმა მარინე ქათამაძემ.

საიათნოვას 4-ში მცხოვრებ 82 წლის ალექსანდრა ტორუნს [ბათუმში ჩაის სახლის შენობა] ბინის დაცლას აიძულებენ. ამბობს, რომ ბინის კანონიერმა მესაკუთრემ შესასვლელი კარის გასაღები წაართვა, ტუალეტის კარი აუჭედა და სახეშიც გაარტყა. გასულ წელს კანონში შესული ცვლილების შემდეგ, ნებისმიერ შემთხვევაში, საკუთრებიდან პირის გამოსახლებას სასამართლოს გადაწყვეტილება სჭირდება.

„აქ ვცხოვრობ 1983 წლიდან, მომიტანონ სასამართლოს გადაწყვეტილება და წავალ,“ – 82 წლის ალექსანდრა ხელიდან ნავთის ლამპას არ დებს, წმენდს და ისე მიყვება. – „სინათლეც გამითიშეს. ტელეფონიც… არადა, პირველად ამ ქუჩაზე ჩემს მამამთილს ჰქონდა ტელეფონი. ცნობილი ექიმი იყო, გეცოდინებათ, გრიშა ლორია… მას მისცეს ეს ბინა, აქ უყვარდა ყოფნა, ზღვას უყურებდა. როცა გარდაიცვალა, აქ გადმოვედი მეც. დედამთილს ვუვლიდი დიდხანს. 40 წელი ტრანსფორმატორების ქარხანაში ვმუშაობდი. ორი შვილი მყავს. ახლა არავინაა ჩემთან…“

ბინა მისმა შვილიშვილმა გაასხვისა 2003 წელს. ხანდაზმული ქალი ირწმუნება, რომ ეს თაღლითური გზით მოხდა: „ჩემი შვილიშვილი მეზღვაურია. წლების წინ, როცა სწავლა დაასრულა, ზღვაზე წასასვლელად თანხა სჭირდებოდა. როგორც ახლა გავიგე, ეს თანხა – 300 დოლარი მეზობლისგან სესხად აუღია, სანაცვლოდ კი ბინის განკარგვაზე მინდობილობა გაუცია მეზობლისთვის. არ ვიცოდი, თუ ჰქონდა ეს ფული აღებული, თორემ პენსიით გადავუხდიდი“.

სასამართლოს ეს საქმე ჯერ არ განუხილავს და რამდენიმე მესაკუთრის გამოცვლის შემდეგ, ერთოთახიანი ბინის მესაკუთრე ამჯერად ალექსანდრას მეზობელია. „ბავშვობიდან ვიცნობ გიორგის. ახლა სპეცრაზმელია და მხოლოდ კვადრატულობა აინტერსებს. ბინაზეა ჩაბღაუჭებული, მეტი არაფერი აინტერესებს“, – ამბობს ალექსანდრა.

საჯარო რეესტრის მონაცემებით, სადავო ბინა გიორგი გეგუჩაძის საკუთრებაა: „მე შევიძინე ეს ბინა გასული წლის ბოლოს. მთხოვა, ახალი წელი მოდის, მადროვე და მერე წავალო. ახლა აღარ მიდის და იგონებს, თითქოს რაღაცას ვუშავებ და ვავიწროვებ,“ – გვითხრა გიორგი გეგუჩაძემ, მას ტელეფონით დავუკავშირდით. გიორგი გეგუჩაძე ერთ-ერთი სპეცდანიშნულების სამსახურის თანამშრომელია. მან „ბათუმელებთან“ საუბრის დროს გამორიცხა ძალადობის ფაქტი. არ დაუმალავს, რომ სასამართლო პროცესი ბინის წინა მესაკუთრესთან უფლებამონაცვლეობის კუთხით ამ დრომდე აქვს.

რატომ არ მიმართა სასამართლოს გამოსახლების გადაწყვეტილების მისაღებად? – გიორგიმ გვიპასუხა, რომ სასამართლოს წინა მესაკუთრემ მიმართა და ოქტომბერში მიღებული გადაწყვეტილებაც არსებობს, მაგრამ აღსრულების ეროვნული ბიურო არ ასრულებს სასამართლოს გადაწყვეტილებას.

„კანონით დაცულია მესაკუთრე და ვერ გავიგე, რა ხდება. რატომ არ რეაგირებს აღსრულების ბიურო, არ ვიცი. მეუბნებიან, რომ ხელახლა უნდა მივმართო სასამართლოს. მიმართეთ აღსრულების ბიუროს და იქ გაჩვენებენ საბუთებს, ყველაფერი იქაა,“ – ამბობს გიორგი გეგუჩაძე. მან ვერ გვაჩვენა სასამართლოს გადაწყვეტილება, ან სააღსრულებო ფურცელი, რასაც სასამართლო მსგავს შემთხვევებში გასცემს და მას 10-წლიანი მოქმედების ვადა აქვს.

აღსრულების ეროვნულ ბიუროში გვითხრეს, რომ სხვა პირების შესახებ ინფორმაციას ვერ მოგვაწვდიან, ხოლო გასული წლის ოქტომბრიდან დღემდე შესაძლოა აღმასრულებელი ნებაყოფლობით ცდილობს პროცესის დასრულებას და ეს გონივრული ვადაა. ალექსანდრა ამბობს, რომ მასთან აღმასრულებლის შეტყობინება არ მისულა.

ალექსანდრა შვილებზეც გვიყვება. ერთმა გოგომ შვილი დამიტოვა და წავიდა, დღემდე არ ვიცი სად არის. „შვილიშვილი, ვის სახელზეც იყო ეს ბინა, მძიმედ ავადაა და ესპანეთშია. მეორე გოგო ბათუმში ცხოვრობს ოჯახთან ერთად…“.

ორსართულიან სახლში რამდენიმე ოჯახი ცხოვრობს. ალექსანდრას იმ ოჯახთან აქვს საზიარო სამზარეულო და ტუალეტი, ვისთანაც კონფლიქტი აქვს. ტუალეტის კარი აჭედილია.

„ავჭედეთ, იმიტომ, რომ საშინელი სუნი იდგა. არავინ უვლიდა, ბავშვები იზრდებიან აქ…“ – გვითხრა სოფო გეგუჩაძემ, ბინის მესაკუთრის დამ.

ალექსანდრას თქმით, ბინა 120 წლისაა და იგი იტალიელმა არქიტექტორებმა ააგეს. „ამიტომაცაა ეს ბუხარი ასეთი ლამაზი დღემდე… აქ ყველაფერი ლამაზი იყო, მაგრამ მოუვლელობით გაფუჭდა, ჭერიდან წყალი ჩამოდის, სადაცაა ჩამოიქცევა. ამ პარკებით ვამაგრებ წვიმას,“ – გვაჩვენებს ის და მერე ისევ ნავთის ლამპას უბრუნდება, – „არავინ არ მიცავს მე, პოლიციამ საქმეც კი არ აღძრა ცემის ფაქტზე. ლამპა უკვე მზადაა, დღეს ნარდის თამაშს ვაპირებ…“

აჭარის ფინანსთა და ეკონომიკის სამინისტროში საწარმოთა მართვის განყოფილების უფროსად პაატა ბერიძე დაინიშნა. ის აქამდე ამ განყოფილებაში სპეციალისტად მუშაობდა. განყოფილების უფროსის თანამდებობა თამაზ ხაბაძეს ეკავა, აჭარის მთავრობის ყოფილი თავმჯდომარის მამას. თამაზ ხაბაძემ თანამდებობა აპრილში დატოვა.

თამაზ ხაბაძეს სამსახურიდან წასვლის მიზეზზე არ უსაუბრია. არჩილ ხაბაძემ „ბათუმელებთან“ საკადრო ცვლილება სამინისტროში მიმდინარე რეორგანიზაციას დაუკავშირა, ხოლო სამინისტროს ინფორმაციით, თამაზ ხაბაძემ სამინისტრო თავისი სურვილით დატოვა. 

თამაზ ხაბაძესთან უშუალოდ იყო ანგარიშვალდებული სახელმწიფო შპს „ჰიგიენა 2009“-ის დირექტორი, რომელმაც სახელმწიფოს 5 მილიონი მიითვისა. ირაკლი ცეცხლაძეს ბათუმის საქალაქო სასამართლომ 8 წლით თავისუფლების აღკვეთა მიუსაჯა. ამ საქმეზე გამოძიებას სხვა თანამდებობის პირების პასუხისმგებლობის საკითხი არ დაუსვამს.

ამ წუთებში აჭარის სტიქიური მოვლენების შედეგად მიყენებული ზარალის სალიკვიდაციო შერეული სამთავრობო კომისია სტიქიის შედეგად დაზარალებული 32 ოჯახის საკითხს განიხილავს. აჭარის ჯანდაცვის სამინისტროს ინფორმაციით, სტიქიით დაზარალებული ოჯახების საცხოვრებელი ფართობით უზრუნველყოფისთვის აჭარის მთავრობის სარეზერვო ფონდიდან 800 000 ლარის გამოყოფა იგეგმება.

ამასთან დაკავშირებით კომისიის სარეკომენდაციო წერილი დასამტკიცებლად აჭარის მთავრობის თავმჯდომარეს უახლოეს დღეებში გადაეგზავნება. საკითხის დადებითად გადაწყვეტის შემთხვევაში, საერთო ჯამში, აჭარის მთავრობა ხულოს მუნიციპალიტეტის სოფელ თხილვანაში მუდმივად მცხოვრებ 59 ეკომიგრანტ ოჯახს 1 475 000 ლარით, ხოლო 2 ოჯახს ბინით დააკმაყოფილებს.

გარდა ამისა, თხილვანაში მცხოვრები 27 ეკომიგრანტი ოჯახის 25-25 000 ლარით უზრუნველყოფის საკითხი სამთავრობო კომისიამ მაისის დასაწყისში განიხილა (ამ ოჯახებისთვის თანხა უახლოეს დღეებში გამოიყოფა).

ორი ეკომიგრანტი ოჯახის ბინებით დაკმაყოფილების საკითხი ხულოს სოციალურ სახლში განიხილება.

სოფელ თხილვანაში მეწყრული პროცესები მიმდინარე წლის დასაწყისში გააქტიურდა. სტიქიამ საფრთხე ათობით ოჯახს შეუქმნა.

დღესვე კომისია იმსჯელებს ხულოს მუნიციპალიტეტში სტიქიის შედეგად დაზარალებული საცხოვრებელი სახლების აღდგენა-გამაგრებას დაქვემდებარებული სამი ოჯახისა და ადგილმონაცვლეობას დაქვემდებარებული სამი ოჯახის ფინანსური დახმარების საკითხს. კომისია განიხილავს ასევე ხელვაჩაურის მუნიციპალიტეტის გამგეობის შუამდგომლობას, სტიქიისა შედეგად დაზარალებული ორი და ხანძრის შედეგად დაზარალებული ერთი ოჯახის ფინანსური დახმარების თაობაზე.

ჯანდაცვის სამინისტროს ინფორმაციით, 2017 წელს უსაფრთხო საცხოვრისის შესაძენად თანადაფინანსება გაიცა 25 ოჯახზე, ხოლო ცხრა ოჯახს უსასყიდლოდ გადაეცა ბინა საკუთრებაში.

2017 წელს აჭარის მთავრობის სარეზერვო ფონდიდან სტიქიითა და ხანძრით დაზარალებულ 27 ოჯახზე 279 022 ლარი გაიცა; 2016 წელს საცხოვრებლით დაკმაყოფილდა 117 ეკომიგრანტი ოჯახი. 61 ოჯახზე გაიცა ფინანსური დახმარება – 698 050 ლარის ოდენობით.

ოფიციალური ინფორმაციით, 2017 წლის ტურისტულ სეზონზე აჭარაში სასტუმროებში 18 277 საწოლია რეგისტრირებული.

ტურიზმის დეპარტამენტის ინფორმაციით, წელს  ბათუმში დაბალბიუჯეტიანი და მაღალი კლასის სასტუმრო და განთავსების ობიექტი გაიზარდა 900-ზე მეტი საწოლი ადგილით. უკვე გახსნილია და მალე გაიხსნება ახალი სასტუმრო კომპლექსები:

სასტუმრო Sky Tower – 220 საწოლი ადგილი, რომელიც ხვალ, 19 მაისს გაიხსნება, სასტუმრო „ვინთემი“ – 335 საწოლი ადგილი, რომელიც უკვე გახსნილია, სასტუმრო „სემირამიდას ბაღები“ – 295 საწოლი ადგილი, სასტუმრო „ირე პალასი“ – 80 საწოლი ადგილი, უკვე გახსნილია.

რაც შეეხება ფასებს, tripadvisor.com-ზე განთავსებული ინფორმაციის მიხედვით, ბათუმში ჰოსტელების მიმდინარე ფასი 40 ლარიდან იწყება. ვებგვერდზე განთავსებული ინფორმაციის მიხედვით, ძველ ბათუმში, Surf-Hostel-ში ერთი ღამე 42 ლარი ღირს, Hostel Calypso-ში კი – 51 ლარი.

ჰოსტელ „გლობუსის“ მფლობელის, რუსუდან ჩიტიძის თქმით, მაისში ერთი საწოლი 20 ლარი ღირს, აგვისტოში კი შესაძლებელია ეს ფასები შეიცვალოს. „ალბათ 4-5 ლარით აიწევს. ფასები მერყეობს ოთახების კატეგორიების მიხედვით, 15-იდან 25 ლარამდეა. ამ ფასში შედის ღამის გათევა, სარეცხი მანქანით სარგებლობა, ჩაი და ყავა, უკაბელო ინტერნეტი და თეთრეული, ბარგის შენახვა“.

მაგალითად, აეროპორტის ტერიტორიაზე ჰოსტელში „ტიჯეი“, ერთი ღამის ღირებულება 30 ლარია. „არის საერთო ოთახებიც, სადაც ერთი ადგილი 10 ლარი ღირს. არის 21-ლარიანი ორადგილიანი იზოლირებული ოთახიც, ჰოსტელში არის 35 და 40-ლარიანი ოთახებიც“.

ჰოსტელების მფლობელები ამბობენ, რომ საწოლის ფასი დოლარის კურსის ცვალებადობაზეა დამოკიდებული. „20- ლარიანი აგვისტოში შესაძლებელია გახდეს 25 ლარი, თუმცა ამაზე მეტს ვერ დავამატებთ, კლიენტს დავკარგავთ“, – გვეუბნება თეონა ძნელაძე.

ჰოსტელში „ანრი“, ერთი ღამის გათევა 20 ლარი ღირს. ჰოსტელი ახალ ბულვართან მდებარეობს.

სახლის ტიპის სასტუმროებში, ერთი ღამის ღირებულება 90 ლარიდან იწყება, უფრო დიდ სასტუმროებში კი საწყისი ფასი 150 ლარია.

აჭარის ტურიზმის დეპარტამენტის განცხადებით, გასულ წელს აჭარაში 1 414 602 ტურისტი შემოვიდა, აქედან ბათუმში – 871 ათას 495. მიმდინარე წელს კი, როგორც ტურიზმის დეპარტამენტში ამბობენ, რეგისტრირებული ადგილების მიხედვით, ტურისტების 3-იდან 5 პროცენტამდე ზრდას ელიან.

დღეს, 18 მაისს, აჭარის სავაჭრო-სამრეწველო პალატაში მიკრო და მცირე მეწარმეობის ხელშეწყობის პროგრამის პრეზენტაცია გაიმართა. პრეზენტაცია აჭარის რეგიონალური პროექტების მენეჯერმა ლიკა კალატოზმა წარადგინა.

პროგრამა ეკონომიკისა და მდგრადი განვითარების სამინისტროს პროგრამის „აწარმოე საქართველოში“ ფარგლებში ხორციელდება. მასში მონაწილეობის მიღება ახალი ბიზნესის წამოწყების ან არსებულის გაფართოების ნებისმიერ მსურველს შეუძლია.

პროგრამა ორ ეტაპად ჩატარდება: პირველ ეტაპზე მონაწილეები თავიანთ ბიზნეს იდეებს წარადგენენ, რის შედეგადაც გამოვლინდება საუკეთესო ბიზნეს იდეის ავტორი. ამ ეტაპზე გამარჯვებულებს ჩაუტარდებათ ტრენინგი მეწარმეობის შესახებ, რომლის ფარგლებში მონაწილეები ბიზნეს გეგმის მომზადების საკითხებსაც შეისწავლიან.

მომდევნო ეტაპი ბიზნესგეგმის წარდგენას მოიცავს, განაცხადის შევსების შემდეგ გამოვლინდებიან საუკეთესო ბიზნესგეგმების ავტორებიც. მეორე ეტაპის გამარჯვებულები პროგრამით გათვალისწინებულ თანადაფინანსებას მიიღებენ, ასევე მათ ინდივიდუალური და ჯგუფური ტრენინგები ჩაუტარდებათ.

ბიზნესიდეათა თემატური მოცულობა, ლიკა კალატოზის თქმით, არ არის შეზღუდული, ისინი შეიძლება უკავშირდებოდეს ნებისმიერ სფეროს – სოფლის მეურნეობას, ჯანდაცვას, განათლებას თუ სხვას.

პროგრამა საქართველოს მასშტაბით მიმდინარეობს და მასში მონაწილეობა ნებისმიერ მსურველს შუძლია, თუ ის საქართველოს სრულწლოვანი მოქალაქეა, არ არის საჯარო მოხელე და არ გააჩნია ვადაგადაცილებული საგადასახადო ვალდებულება სახელმწიფოს წინაშე.

თანადაფინანსება შემდეგნაირად განხორციელდება: ერთი მეწარმისთვის თანადაფინანსების მაქსიმალური მოცულობა 5000 ლარი, ორი მეწარმისთვის – 10 000 ლარი, ხოლო სამი მეწარმისთვის 15 000 ლარი იქნება.

კონკურსში გამარჯვებული განახორციელებს მინიმუმ 20 %-იან თანხობრივ თანამონაწილეობას.

კონკურსში მონაწილეთა რეგისტრაცია 15 მაისს დაიწყო და 31 მაისამდე გაგრძელდება.

 საქართველოს ფინანსთა სამინისტროს საგამოძიებო სამსახურის ინფორმაციით, ყალბი ფულის გასაღების ფაქტზე, ერთი პირი დააკავეს.

დღეს, 18 მაისს, აჭარის მთავრობის სახლის წინ „ნაციონალური მოძრაობის“ წევრებმა აქცია გამართეს. მათ ციხისძირიდან და ბუკნარიდან ბიძინა ივანიშვილის მიერ ხეების გადარგვის პროცესი გააპროტესტეს და აჭარის მთავრობა ამ პროცესის თანამონაწილეობაში დაადანაშაულეს.

„იმ ფონზე, როდესაც რეგიონში უმძიმესი ეკონომიკური მდგომარეობაა, როდესაც ათასობით სტუდენტს სტატუსი აქვს შეჩერებული ფულის გადაუხდელობის გამო, როდესაც უამრავ ოჯახს, რომლებიც უკიდურესი გაჭირვების ზღვარზე იმყოფებიან, უკანონოდ მოუხსნენ შემწეობები, აი ამ ფონზე, ჩვენი რეგიონის ხელმძღვანელი ზურაბ პატარაძე, ნაცვლად იმისა, რომ ზრუნავდეს ამ პრობლემების მოგვარებაზე, ერთადერთი საქმით არის დაკავებული – ხეების გადარგვით, რომელსაც ბიძინა ივანიშვილი ავალებს.

ეს ყველაფერი არა მხოლოდ აგრესიას იწვევს, გაანადგურეს ეკოსისტემა, მწვანე საფარი ციხისძირში და სხვა ადგილებში. უნიათობასთან და მავნებლობასთან ერთად ანადგურებენ გარემოსაც. მოვითხოვთ, ან აკეთონ საქმე, ან დატოვონ დაკავებული თანამდებობები და გადადგნენ,“- ამბობს მამუკა ქობულაძე, აქციის ერთ-ერთი მონაწილე.

„ნაციონალური მოძრაობის“ წევრებმა ციხისძირიდან და ბუკნარიდან ხეების გადატანის ამსახველი ფოტოები მთავრობის სახლის წინ, ხეზე ჩამოკიდეს.

შეზლონგი სამი ლარი, ქოლგა ერთი ლარი მთელი დღით – „ბათუმის ბულვარმა“ აუქციონში მონაწილე პირებს ფასი წინასწარ განუსაზღვრა. ბულვარის ადმინისტრაციის ინფორმაციით, აუქციონები დასრულდა და გამარჯვებულები გამოვლენილია; ფასი კი დამსვენებლების პრეტენზიების გათვალისწინებით განისაზღვრა.

„რადგან  იყო შემთხვევები, როცა  გამქირავებლები ბევრად მაღალ ფასს ადებდნენ, რაც დამსვენებლების უკმაყოფილებას იწვევდა,“ – განაცხადეს ბულვარის ადმინისტრაციაში.

წელს, ტურისტულ სეზონზე, შეზლონგების გამქირავებლებს უნიფორმაც ეცმევათ.  „უნიფორმები თვითონ უნდა შეიძინონ, სასურველია, ერთი ფერის ეცვათ, ერთ სექტორში მაინც. გარდა ამისა, მოიჯარემ უნდა დაასუფთაოს ტერიტორია, წინააღმდეგ შემთხვევაში დაჯარიმდება. ასევე, ყველა სექტორში უნდა განთავსდეს მცირე ზომის ურნა,“-  გვეუბნება ბულვარის პრესსამსახურის ხელმძღვანელი მაგდა ჯაიანი.

ადმინისტრაციის ინფორმაციით, მოიჯარეებს უფლება არ აქვთ, მოქალაქეებს ზღვაზე გადასასვლელი ჩაუკეტონ. „შეზლონგები ზღვიდან ათი მეტრის დაშორებით იქნება განთავსებული, რადგან იყო პრეცედენტი, როცა მოქალაქეებს, რომლებიც არ ქირაობდნენ შეზლონგებს, პლაჟზე თავისუფლად გადაადგილება ეზღუდებოდათ.  მსგავს ფაქტებს ჩვენ გავაკონტროლებთ. გარდა ამისა, შეზლონგები მოწესრიგებული ან ახალი უნდა იყოს“ – ამბობს მაგდა ჯაიანი.

სიახლეა ის, რომ წელს პლაჟზე უფასო  20 ახალი საშხაპე და 20 გასახდელი დამონტაჟდება,  მოეწყობა გადასასვლელი ბილიკები. სულ 29 სექტორი იქნება. „საშხაპეებსა და გასახდელებს, რომ არ დაზიანდეს, მონიტორინგს ბულვარის ადმინისტრაცია გაუწევს“,  – აცხადებენ ბულვარის ადმინისტრაციაში.

აღნიშნული მომსახურების შესასყიდად „ბათუმის ბულვარი“ ხელშეკრულებას იმ პრეტენდენტთან გააფორმებს, რომელმაც ყველაზე მეტად შესთავაზა ბულვარს მომსახურება.

საპლაჟე ინფრასტრუქტურის [გასახდელები, საშხაპეები, ხის ბილიკი, სასმელი წყლის შადრევანი] მოწყობის სამუშაოებზე „ბათუმის ბულვარის“ მიერ გამოცხადებულ ტენდერში სამი პრეტენდენტი [ერთი ინდმეწარმე და ორი შპს] მონაწილეობდა. მომსახურება ბათუმის ბულვარს 94 066, 92 000 და 88 888  ლარად სთავაზობენ. საწყისი სატენდერო თანხა 126 740 ლარი იყო. შპს-ებს სატენდერო კომისიამ დისკვალიფიკაცია მისცა, ხელშეკრულების გასაფორმებლად კი ინდმეწარმე ბესიკ სოლომონიძეს მიიწვევენ, რომელიც სამუშაოს 94 066 ლარად შეასრულებს.

„ბათუმის ბულვარის“ მარკეტინგის სამსახურის უფროსის, დათო გამრეკელაშვილის ინფორმაციით, აუქციონის შედეგების მიხედვით, პლაჟს შეზლონგებით, ქოლგებით და ნაგვის ურნებით აუქციონში გამარჯვებული 29 პირი უზრუნველყოფს, ასევე, გამოვლენილია 14 გამარჯვებული, რომელიც სანაყინე ჯიხურებს განათავსებს ბულვარში, იქნება სამი სანაყინე კუთხე, სუვენირებისთვის კი 30 დახლი დაიდგმება.

„მთავარია, მიზნობრიობა იყოს დაცული, რადგან თუ პირი აუქციონს ნაყინის რეალიზაციაზე იგებს, სხვა პროდუქტს ვერ გაყიდის, თუ ასე მოხდება, მაშინ პირი დაჯარიმდება,“ – ამბობს გამრეკელაშვილი.