რომელი მოსამართლე განიხილავს „ბათუმის აქციის საქმეს“


„11-12 მარტის აქციის საქმეზე“ დღეს, 17 მაისს, არსებით განხილვას ბათუმის საქალაქო სასამართლოში მოსამართლე ირაკლი შავაძე დაიწყებს. საქმეში ამ დროისთვის ზუსტად 301 მოწმეა დასაკითხი. მოსამართლე თავდაპირველად ბრალდების მხარის მოწმეებს მოუსმენს.

ამ საქმეზე წინასასამართლო პროცესები მოსამართლეებმა ვიოლეტა ფორჩხიძემ და დავით მამისეიშვილმა გამართეს. ამ ეტაპზე სასამართლო მხოლოდ მტკიცებულებების დასაშვებობის საკითხს განიხილავს. ასევე იმას, უნდა გათავისუფლდეს თუ არა ბრალდებული პატიმრობიდან გირაოს სანაცვლოდ. არც ერთი ბრალდებულის მიმართ ამ მოსმართლეებმა ადვოკატების შუამდგომლობა არ გაითვალისწინეს და დღემდე დაკავებულები წინასწარ პატიმრობაში რჩებიან. სასამართლომ ასევე დასაშვებად მიიჩნია ის მტკიცებულებები, რაც პროკურატურამ 16 ტომის სახით წარმოადგინა.

მოწმეთა ჩვენებების გარდა, „ბათუმის აქციის საქმეში“ ტელევიზიების მიერ გადაღებული ვიდეოკადრებია, რომელთა ნამდვილობის ექსპერტიზის დასკვნა ჯერჯერობით არ მომზადებულა. ადვოკატების თქმით, კადრებში კონკრეტულად ბრალდებულები არ ჩანან.

„ბათუმის აქციის საქმეზე“ 21 პირია ბრალდებული. 19 მათგანს გამოძიება პოლიციელებზე თავდასხმას ედავება. ორი ბრალდებული არასრულწლოვანია და მათი საქმე დახურულ პროცესზე განიხილება. კიდევ ორ დაკავებულს, მერაბ ღოღობერიძესა და ირაკლი ჩხვირკიას კი, მასობრივი არეულობის მოწყობა ედება ბრალად.

shavadze

მოსამართლე ირაკლი შავაძე

 

ნეტგაზეთის მასალების სხვა გამოცემებში გადაბეჭდვის წესი
ავტორი