19 – 20 მაისს, განახლებულ „თავისუფალ სივრცეში“ ინკლუზიური სპექტაკლის „ვაკანსიის“ პრემიერა გაიმართება. პროფესიონალ მსახიობთან, იაგო მორთულაძესთან ერთად სპექტაკლში მონაწილეობას ჟესტური ენის თარჯიმანი მზია მელაძე და ეტლით მოსარგებლე ლალი მენაღარიშვილი მიიღებენ. პიესის ავტორი და რეჟისორი ოთარ ქათამაძეა.
ლალისთვის ეს არ არის პირველი სამსახიობო გამოცდილება. მისი მონაწილეობით პერფორმანსი „დამოუკიდებელი ცხოვრების მნიშვნელობა“, გასული წლის დეკემბერში, ბათუმის დრამატულ თეატრში ჩატარდა.
ლალი მენაღარიშვილი სპექტაკლის რეჟისორთან, ოთარ ქათამაძესთან ერთად
ფოტო:გულნარა კაკაბაძე
„ვაკანსია“ ახალგაზრდული ორგანიზაცია „ცვლილებები თანაბარი უფლებებისთვის“ ინიციატივით დაიდგა და მიზნად შშმ პირებისთვის თეატრალური კულტურის ხელმისაწვდომობას ისახავს.
„ხელოვნება არის ის საშუალება, რომელიც ყველაზე მარტივად გასაგებს ხდის ყველაფერს, ერთ-ერთი ყველაზე გამართლებული მეთოდი კი სპექტაკლია, რომლის შემდეგ მნახველი სხვანაირად აღიქვამს არსებულ რეალობას, ასევე სხვა ტიპის ინტერესს იწვევს შშმ პირების თემაც, რომელიც თავისუფლდება ყოველგვარი სტერეოტიპული აღქმისგან“ – ამბობს “თავისუფალი სივრცის” მენეჯერი ნინო ჩხაიძე.
“ვაკანსიის” რეპეტიცია ფოტო: გულნარა კაკაბაძე
განახლებულ „თავისუფალი სივრცეში“, ნინოს თქმით, შშმ პირთა საკითხებთან დაკავშირებით სხვადასხვა სახის ტრენინგები, საინფორმაციო შეხვედრები და კულტურულ-შემეცნებითი ღონისძიებები იგეგმება. ასევე დაგეგმილია ჟესტური ენის სკოლის ჩამოყალიბებაც.
პროექტი ბათუმის მერიის ახალგაზრდული განყოფილების თავისუფალი ინიციატივების პროგრამის ფარგლებში ხორციელდება.
ახალგაზრდულ ორგანიზაციას „ცვლილებები თანაბარი უფლებებისთვის“ შშმ პირების მიმართ საზოგადოების ცნობიერების ამაღლების მიზნით რამდენიმე პროექტი აქვს განხორციელებული, მათ შორის: „საზოგადოებაში შშმ პირების ინტეგრაციის პირველი ნაბიჯი“, “ცვლილებების დრო”, “თანამედროვე ხედვა” და სხვა.
