Batumelebi

50-წლამდე კაცი დანით წუხელ დაჭრეს. მას ოთხი ჭრილობა აქვს მიყენებული. წუხელ დაჭრილი კლინიკა „მედინას“ რეანიმაციულ განყოფილებაში მოათავსეს. ბრალდებული მიმალვაშია. საქმეს ხელვაჩაურის პოლიცია იძიებს.

„ბათუმელების“ ინფორმაციით, დაზარალებული თავდამსხმელის სიმამრის ძმა არის. დაზარალებული და ბრალდებული ერთად მუშაობდნენ ხელვაჩაურში – ელექტროგადამცემი ბოძების მონტაჟისთვის გარემოს აწესრიგებდნენ.

„ბათუმელების“ ინფორმაციით, კონფლიქტი მხარეებს შორის გასული წლის სექტემბერში დაიწყო – უთანხმოების მიზეზი გახდა ანაზღაურება. მაშინ ცეცხლსასროლი იარაღიდან ისროლა ბრალდებულმა, რის შედეგადაც დაზარალებულის მანქანას ცეცხლი გაუჩნდა და დაიწვა.

თავის დროზე გამოძიება ამ ფაქტთან დაკავშირებითაც დაიწყო, თუმცა რაიმე სამართლებრივი შედეგი არ დამდგარა.

შს სამინისტროში აცხადებენ, რომ კაცის დაჭრასთან დაკავშირებით ამჯერად გამოძიება დაიწყო სისხლის სამართლის კოდექსის 117-ე მუხლით, რაც ნიშნავს სხეულის განზრახ მძიმე დაზიანებას.

ბრალდებულის მიმართ საქმის გამოძიება კიდევ ორი – 236-ე და 187-ე მუხლებით რომ მიმდინარეობს, შს სამინისტროში ამ ინფორმაციასაც ადასტურებენ. უწყებაში გვითხრეს, რომ ცეცხლსასროლი იარაღის მართლსაწინააღმდეგო შეძენა-შენახვასა და სხვის ნივთის დაზიანება-განადგურების ფაქტზე გამოძიება გასული წლის სექტემბერში დაიწყო.

უწყების ინფორმაციით, „უკვე დადგენილია ბრალდებულის ვინაობა და მიმდინარეობს სამძებრო სამუშაოები“.

ავტომანქანების ტექნიკური ინსპექტირების ორწლიანი რეფორმა პირველი იანვრიდან დაიწყო. თავდაპირველად ინსპექტირება სატვირთო ავტომანქანებმა უნდა გაიარონ, ასევე მუნიციპალურმა ავტობუსებმა და მიკროავტობუსებმა. მსუბუქი ავტომანქანებისთვის ინსპექტირება სავალდებულო პირველი ივლისიდან იქნება.

ტექნიკური რეგლამენტის მიხედვით, ავტომანქანა, ძირითადად, შვიდი კრიტერიუმის შესაბამისად მოწმდება: მუხრუჭი, საჭის მექანიზმი, სავალი ნაწილი, ხილვადობა, მაშუქები ანუ ფარები, გამონაბოლქვი და საბურავები. მძღოლები, რომლებმაც ინსპექტირება გაიარეს, ამბობენ, რომ ძირითადი პრობლემა გამონაბოლქვის შემოწმების დროს იქმნება, რადგან საწვავი უხარისხოა. მძღოლების ნაწილს უკვე სქემაც აქვს შემუშავებული – როგორ მიიღონ დადებითი ქულა ელექტრონული სისტემისგან, როცა გამონაბოლქვის შემოწმების დრო დგება.

„გავდივართ ეტაპობრივად ინსპექტირებას, თითქმის ყველამ გაიარა,“ – გვიყვება ნუგზარ ფარტენაძე, შპს „ჯორჯია ტრანსის“ დირექტორი. ამ კომპანიის მიკროავტობუსებს ბათუმში რამდენიმე მიმართულებით გადაჰყავს მოქალაქეები.

„ვერ გეტყვით, რამდენმა ვერ გაიარა ინსპექტირება, რადგან ხელმეორე ცდაზე ყველა ხარვეზი გამოსწორდა. ძირითადი პრობლემა იყო გამონაბოლქვი, რაც საწვავის ხარისხს უკავშირდება. ვერ გაიგებ, რომელი კომპანიის საწვავს უნდა ენდო. შეიძლება ერთხელ ჩაასხა და კარგი იყოს, მეორე შემთხვევაში – არ ვარგოდეს. ჩვენ, პირადად, თურქეთიდან გადმოვიტანეთ კარგი ხარისხის საწვავი და ხელახლა ინსპექტირება წარმატებით ჩავაბარეთ,“ – ამბობს ის.

გამონაბოლქვი რომ მთავარი პრობლემაა ინსპექტირების პროცესში, ადასტურებს ნოდარ ჭაღალიძეც. იგი ბათუმში მდებარე ერთ-ერთი ინსპექტირების ცენტრის „დიაგნოსტიკა აჭარას“ ხელმძღვანელია.

„ჩვენი ცენტრი მუშაობდა წინა წლებშიც. ახლა, უბრალოდ, მომართვამ იმატა, რადგან გამკაცრდა ჯარიმები. თუკი აქამდე ინსპექტირების გაუვლელობა 10 ლარით ჯარიმდებოდა, ახლა ჯარიმა 50 ლარია, იურიდიული პირებისთვის – 200 ლარი. ახლა პატრული პირდაპირ მიერთებულია ჩვენს ბაზებს და ქუჩაში რომ მიდის მანქანა, მაშინვე ხვდებიან, ინსპექტირება აქვს თუ არა გავლილი, ევროპული სტანდარტითაა ყველაფერი… რიგები არ გვაქვს, პერსონალი 10 კაცისგან შედგება და ყოველდღიურად ვმუშაობთ. ცენტრში სულ ორი ხაზი მაქვს და დღეში 60 მანქანის შემოწმება შემიძლია. იანვრიდან დღეში დაახლოებით 20 მანქანა მოდის შემოწმებაზე. ზუსტ ციფრს ვერ გეტყვით, მაგრამ დაახლოებით 30 პროცენტი ვერ იღებს დადებით შეფასებას. ძირითადი პრობლემა გამონაბოლქვია, ასევე სამუხრუჭე სისტემა…“ – გვიყვება ნოდარ ჭაღალიძე.

რა უნდა გააკეთოს მძღოლმა, თუკი გამონაბოლქვის პრობლემა საწვავს უკავშირდება? – ნოდარ ჭაღალიძე გვარწმუნებს, რომ ხელახალი ინსპექტირების შემთხვევაში ყველა ავტომანქანა წარმატებით გადის ინსპექტირებას, რომელსაც გამონაბოქლვის პრობლემა დაუდგინდება.

„გამონაბოლქვი არ უკავშირდება მხოლოდ საწვავს. ყოველ შემთხვევაში, ჩვენ ამას ვერ ვადგენთ, საწვავის გამოა თუ არა. ფაქტია, რომ მეორე ჯერზე ინსპექტირებას ისინი აბარებენ,“ – დასძენს „აჭარა დიაგნოსტიკის“ ხელმძღვანელი.

გაიარეს თუ არა ინსპექტირება მუნიციპალურმა ავტოსბუსებმა? – „ვემზადებით ამისთვის და პირველი თებერვლიდან გავივლით. ავტობუსები აქამდეც გადიოდნენ ტექნიკურ დათვალიერებას წელიწადში ორჯერ. როგორც ვიცი, მთავარი პრობლემა არის გამონაბოლქვი. ვცდილობთ, რომ ეს პრობლემა აღმოვხვრათ და ისე გავიაროთ ინსპექტირება,“ – გვითხრა მუნიციპალური შპს „ბათუმის ავტოტრანსპორტის“ ხელმძღვანელმა, ბადრი ფარტენაძემ.

ქვეყნის მასშტაბით სატვირთო ავტომანქანების ტექნიკური ინსპექტირებას 25 ცენტრში 35 ხაზზე ხორციელდება. ტექნიკურ ინსპექტირებას ბათუმში ორი კომპანია ატარებს. ერთი ადლიის დასახლებაშია, მეორე – აეროპორტის გზატკეცილზე. ინსპექტირების ცენტრები ეკონომიკის სამინისტროს ტენდერის გზით არ შეურჩევია. დაინტერესებულმა კომპანიებმა აკრედიტაციის ეროვნულ ცენტრს მიმართეს და თანხმობა მიიღეს.

„შემოწმება ხდება ევროდირექტივის შესაბამისად, მძიმეწონიან მანქანებზე შეღავათი არ გვაქვს. მსუბუქზე გარდამავალი დებულება გავაკეთეთ, თუმცა იქაც შემოწმება იქნება საკმაოდ მკაცრი. ცენტრში მისვლის დროს მეპატრონე რჩება შესასვლელში და მანქანა ელექტრონულად მოწმდება, ასევე არსებობს ვიდეო გადაღება და მაკონტროლებელ ორგანოს შეუძლია ეს დაინახოს. კორუფცია გამორიცხულია იმითაც, რომ ხელზე ფულის გადახდა შეუძლებელია,“ – განმარტავს მიხეილ ხმალაძე, ეკონომიკის და მდგრადი განვითარების სამინისტროს სახმელეთო ტრანსპორტის სააგენტოს ხელმძღვანელი.

ავტომობილების ისნპექტირების ორგანოების ასოციაციის ხელმძღვანელი, ვაჟა იორდანიშვილი ამბობს, რომ ელექტრონული მოწყობილობა მხოლოდ სამუხრუჭე სისტემას და გამონაბოლქვს ამოწმებს, დანარჩენს – ტექნიკური პერსონალი. მას ვკითხეთ, რა შეიძლება გააკეთოს მოქალაქემ, თუკი იგი ცენტრის შეფასებას არ ეთანხმება.

„ეს ჯერ ზუსტად გაწერილი არ არის… მესაკუთრე შესასვლელში მონიტორიდან აკვირდება ინსპექტირების პროცესს. თუ უკმაყოფილოა, შეუძლია ადგილზეც გამოხატოს პრეტენზია… ვიდეოჩანაწერის ამოღების უფლება აქვს თუ არა, ეს არ ვიცი,“ – გვითხრა ვაჟა იორდანიშვილმა.

„ვიდეოჩანაწერის ამოღების უფლება ექნება მხოლოდ შესაბამის ორგანოს. რომელია ასეთი ორგანო, არ ვიცი ზუსტად ეს სამართლებრივი რეგულაციები. დანამდვილებით ვიცი ის, რომ ჩანაწერს ნებისმიერი დაინტერესებული პირი ვერ გაეცნობა, რადგან ეს პირადი ინფორმაციაა,“ – ამბობს „სახმელეთო ტრანსპორტის სააგენტოს“ უფროსი, მიხეილ ხმალაძე.

ამ სააგენტოს პირველადი მონაცემებით, დღეისათვის ავტომანქანების დაახლოებით 15-მა პროცენტმა ვერ გაიარა ინსპექტირება. სააგენტო ამ ეტაპზე არ ასაჯაროვებს მონაცემს მუნიციპალური ტრანსპორტის შემთხვევაზე.

„ვინც ვერ გაიარა ინსპექტირება, მას ერთვიანი ვადა აქვს, რომ აღმოფხვრას ხარვეზი. ერთი თვის შიგნით შესაძლებელია ინსპექტირების ხელახლა გავლა უფასოდ. ჯერ ერთი თვეც არ გასულა ამ ცენტრების ამოქმედებიდან და ციფრები არ დაგვითვლია,“ – გვითხრა მიხეილ ხმალაძემ.

„იყო რამდენიმე შემთხვევა, როცა პოლიციამ დააჯარიმა ინსპექტირებაგავლილი სატვირთო ავტომანქანა. შემდეგ გვითხრეს, რომ ყველა მსგავს შემთხვევაზე ჯარიმა მესაკუთრეებს უკან დაუბრუნდებათ,“ – გვიყვება ვაჟა იორდანიშვილი, ავტომობილების ინსპექტირების ორგანოების ასოციაციის ხელმძღვანელი. მისი თქმით, პოლიციას ჰქონდა შეფერხება მონაცემთა ბაზის წვდომასთან, თუმცა ახლა ეს ხარვეზი აღმოფხვრილია.

ფონდის „პარტნიორობა საგზაო უსაფრთხოებისთვის“ ხელმძღვანელი გელა კვაშილავა ყურადღებას ამახვილებს იმაზე, რომ ინფრასტრუქტურა ინსპექტირებისთვის არ არის საკმარისი, ასევე პრობლემაა პერსონალი.

„2004 წლიდან ინსპექტირება გაუქმებულია, შესაბამისად, ამ კუთხით გვაქვს რთული მდგომარეობა – ცენტრები არ შენდებოდა და პერსონალი არ მზადდებოდა, ამ სერვისი მიწოდებით ბაზარზე არავინ იყო დაინტერესებული. დღეს არის გამოწვევა, რომ რეალურად მოხდეს ადმინისტრირება და ისევ არ გაჩნდეს ეჭვები ამ პროცესის მიმართ. ჩვენ ვამბობდით, რომ მინიმუმ 90 ცენტრია საჭიროა, გვაქვს – 25. სამინისტრო არ აცხადებს ტენდერს, რომ კერძო სექტორი ამისთვის მოემზადოს. გარდა ამისა, პრობლემაა საწვავის ხარისხიც, რომელიც ისევ კონტროლის გარეშე რჩება,“ – აღნიშნავს გელა კვაშილავა.

რატომ არ აცხადებს ტენდერს სახელმწიფო ისნპექტირების კუთხით მომსახურების შესყიდვაზე? – სახმელეთო ტრანსპორტის სააგენტოს უფროსი განმარტავს, რომ ეს სერვისი სპეციფიკურია და ექვემდებარება აკრედიტაციას.

„შვეიცარულმა კომპანიამაც – SGS ჩვენ მოგვცა რეკომენდაცია, რომ 100-110 ინსპექტირების ხაზია საჭირო ქვეყანაში. ჩვენ ახლა გვაქვს 35, მაგრამ შენდება რამდენიმე ახალი ცენტრი. ზუსტად რამდენი შენდება, ამ მონაცემს ახლა ვერ გეტყვით… სადაც იქნება პრობლემა, იქ შევისყიდით ამ მომსახურებას. ეს არის ორწლიანი რეფორმა. კანონი ეტაპობრივად სთხოვს ავტომანქანის მესაკუთრეებს ინსპექტირების გავლას სწორედ იმიტომ, რომ მანამდე შესაბამისი ინფრასტრუქტურა მოეწყოს,“ – გვითხრა მიხეილ ხმალაძემ.

ტექნიკური ინსპექტირება საქართველოში 2004 წლიდან შეწყდა, თუმცა იგი სავალდებულო დარჩა სატვირთო მანქანებისთვის.

შეფასებისა და გამოცდების ეროვნულ ცენტრში „ბათუმელებთან“ აცხადებენ, რომ მუშაობენ სკოლის გამოსაშვებ გამოცდებთან დაკავშირებულ ყველა შესაძლო საკითხზე. თუმცა ამ დროისთვის ცენტრში ვერ აზუსტებენ, შეიცვლება თუ არა გამოსაშვები გამოცდების ბარიერი.

აიწევა თუ არა საგამოცდო ბარიერი, რაზეც განათლების ყოფილი მინისტრი, ალექსანდრე ჯეჯელავა საუბრობდა? – „ბათუმელების“ ამ კითხვაზე ცენტრის საზოგადოებასთან ურთიერთობის სამსახურის ხელმძღვანელი, თეიკო ანჯაფარიძე ამბობს, რომ დაზუსტებულ ინფორმაციას მხოლოდ კონკრეტული ცვლილების შემთხვევაში გვეტყვიან.

„ამ ეტაპზე ჩვენ განათლების სამინისტროსთან ერთად ვმუშაობთ შესაძლო ცვლილებებზე. განიხილება ყველა საკითხი, რაც გამოსაშვებ გამოცდებს უკავშირდება, მათ შორის საგამოცდო ბარიერის საკითხიც. დეტალური ინფორმაცია გამოქვეყნდება ცვლილების შემთხვევაში,“ – გვითხრა თეიკო ანჯაფარიძემ.

საატესტატო გამოცდების ბარიერი, ჯერჯერობით, 5,5-ია.

 

 

ხვალ 24 იანვარს, ბათუმში, „დემოკრატიული ჩართულობის ცენტრში“,  საქართველოს პრეზიდენტის საპარალამენტო მდივანი ანა ნაცვლიშვილი შეხვედრას გამართავს.

დისკუსიის თემაა „საზოგადოებრივი მაუწყებლის შესახებ კანონპროექტი“, რომელიც საქართველოს პრეზიდენტმა პარლამენტს მოტივირებული შენიშვნებით გაუგზავნა. „ანა ნაცვლიშვილი შეხვედრის მონაწილეებს ვეტოს არგუმენტებს გააცნობს და დამსწრეთა კითხვებს უპასუხებს“, – ნათქვამია განცხადებაში.

შეხვედრა 15:00 საათზე გაიმართება. შეხვედრაზე დასწრება თავისუფალია.

დაავადებათა კონტროლისა და საზოგადოებრივი ჯანმრთელობის ეროვნული ცენტრის მონაცემებით, წელს საქართველოში A ტიპის გრიპის ვირუსები გავრცელებული არ არის. სწორედ ამ ტიპის ვირუსებს მიეკუთვნება H1N1 [ე.წ. ღორის გრიპი], რომელიც გასულ წლებში აჭარაშიც იყო გავრცელებული. რა ტიპის ვირუსია გავრცელებული წელს, როგორია ეპიდსიტუაცია აჭარაში და როდის დგება სეზონური გრიპის პიკი? – ამის შესახებ „ბათუმელები“ აჭარის საზოგადოებრივი ჯანდაცვის ცენტრის ხელმძღვანელს, ნინო ნიჟარაძეს ბლიც-ინტერვიუში ესაუბრა.

ქალბატონო ნინო, რა ტიპის ვირუსია ამჟამად გავრცელებული და რა გართულებები ახასიათებს?

ამჟამად გავრცელებულია B ტიპის ვირუსი, რომელსაც გართულების სახით, ძირითადად, ახასიათებს პნევმონია. ეს არ არის ისეთი საშიში ვირუსი, როგორც A ტიპის ვირუსებია, მაგრამ საყურადღებოა და პაციენტმა ექიმს აუცილებლად უნდა მიმართოს, რადგან ნებისმიერი ვირუსის, თუნდაც რესპირატორული და არა გრიპის ვირუსის შემთხვევაში, თუ კი რისკის ჯგუფს წარმოადგენს მოქალაქე და რაღაც წინაპირობები არსებობს, სიტუაცია მაინც ხშირად რთულდება პნევმონიით.

ვინ მოიაზრება რისკის ჯგუფში?

ესენი არიან 0-დან ხუთ წლამდე ასაკის ბავშვები, 60 წელს გადაცილებული პირები, ბავშვთა და მოხუცებულთა სახლებში მცხოვრებნი, ქრონიკულად მოავადე, ასევე, შაქრიანი დიაბეტის მქონე პირები, დიალიზზე მყოფი პირები და ასე შემდეგ.

ბოლო მონაცემებით, როგორია გრიპის ეპიდსიტუაცია აჭარაში?

მდომარეობა სტაბილურია. 100 000 მოსახლეზე გრიპისა და გრიპისმაგვარი დაავადებებით მომართვიანობა შეადგენს 115-ს, ეს არის გაცილებით ნაკლები გასული წლის ამავე პერიოდთან შედარებით.  თუმცა, აქვე უნდა აღვნიშნოთ, რომ ველოდებით შემთხვევების მატებას, ეს ახასიათებს სეზონურ გრიპს, მაგრამ მნიშვნელოვანია, რომ პაციენტები და ის რისკის ჯგუფები, რაც ზემოთ ჩამოვთავლეთ, ყურადღებას აქცევდნენ საეჭვო ნიშნების გამოვლენას.

იყო თუ არა გართულებული, ჰოსპიტალიზაციის შემთხვევები?

ასეთ დაავადებებზე ჰოსპიტალიზაციის დაახლოებით 8 პროცენტი მოდის. ზოგადად, ლაბორატორიულად დადასტურება და დიაგნოსტირება გრიპზე არ ხდება, თუ კი კლინიცისტი მიიჩნევს, რომ პაციენტს გრიპი უვითარდება, მას ლაბორატორიული დიაგნოსტიკა არ სჭირდება. შესაბამისად, გრიპითა და ვირუსული პნევმონიით ხდება ჰოსპიტალიზაცია, მაგრამ ყველა შემთხვევა ლაბორატორიულად ვერ იქნება დადასტურებული.

ასაკობრივი ჯგუფი თუ არის გამოკვეთილი გართულებულ, ჰოსპიტალიზაციის შემთხვევებში?

დიდი წილი მაინც არის ბავშვების და 60 წელს გადაცილებული პირების. მაგრამ ეს არ არის მძიმე შემთხვევები.

როდის აღწევს სეზონური გრიპის გავრცელება პიკს, როცა შემთხვევათა რაოდენობა იზრდება?

ჯერ ვერ გეტყვით, თუმცა, სავარაუდოდ, ეს იქნება თებერვლის მეორე ნახევარი. ზოგადად, გრიპის სეზონად მიიჩნევა ყოველი წლის მეორმოცე კვირიდან მეორე წლის მეოცე კვირამდე პერიოდი, ანუ ეს პერიოდი მაისის დასაწყისამდე გრძელდება. პიკი ხშირ შემთხვევაში არის იანვარი-თებერვალი, თუმცა, ჯერჯერობით, შემთხვევათა მატება არ ფიქსირდება.

მუშაობთ თუ არა საბავშვო ბაღებთან, სკოლებთან, სადაც გრიპის ვირუსის გავრცელების დიდი ალბათობა არსებობს?

ბავშვთა ორგანიზებულ დაწესებულებებთან, რესურსცენტრებთან და სკოლებთან აქტიურად ვმუშაობთ სანიტარულ-ჰიგიენური წესების დაცვაზე, გაცდენების მიზეზის დადგენაზე და იმაზე, რომ თუ კი რაიმე საეჭვო შემთხვევა გვექნება [იგივე წითელას შემთხვევაში], გვაცნობონ. მათთან ყოველდღიური კონტაქტი გვაქვს.

სეზონური გრიპის თავიდან ასარიდებლად არის შემდეგი რეკომენდაციები: ეს არის ხელების ხშირი დაბანა, სანიტარულ-ჰიგიენური წესების დაცვა, სველი წესით დალაგება, ვენტილაცია, საეჭვო ნიშნების გამოვლენისთანავე დროულად ვიზიტი ექიმთან, ქრონიკულად მოავადეთა და რისკჯგუფებისათვის გრიპის წინააღმდეგ ვაქცინაციის დროულად ჩატარება.

_____________________________

ცოტა რამ სეზონური გრიპის შესახებ: ცნობილია სეზონური გრიპის ვირუსის სამი ტიპი: A, B, C. გადაცემა ადამიანიდან ადამიანზე ხდება ხველით, ვირუსით კონტამინირებულ ნივთებთან ან ზედაპირებთან შეხებისას. სეზონური გრიპი ხასიათდება როგორც მსუბუქი, ისე მძიმე სიმპტომატიკით, შესაძლოა მოყვეს ლეტალური გამოსავალიც განსაკუთრებით მაღალი რისკის ჯგუფებში. 

წყარო: დაავადებათა კონტროლისა და საზოგადოებრივი ჯანმრთელობის ეროვნული ცენტრი

იანვარში აჭარაში წითელას 35-ზე მეტი შემთხვევა დაფიქსირდა, რაც გასულ წლის მთლიან მაჩვენებლზე მეტია – ასეთია აჭარის საზოგადოებრივი ჯანდაცვის ცენტრის ინფორმაცია. ცენტრის ხელმძღვანელის, ნინო ნიჟარაძის ინფორმაციით, ბოლო წლების განმავლობაში, 2013 წლის შემდეგ, როცა აჭარაში წითელათი დაავადებულთა რაოდენობამ 196-ს მიაღწია, ასეთი ეპიდსიტუაცია არ ყოფილა.

„მოსახლეობას, განსაკუთრებით მშობლებს, მოვუწოდებთ: წითელას აცრა კეთდება ერთი და ხუთი წლის ასაკში. მიიყვანეთ ბავშვი ოჯახის ექიმთან წითელას ვაქცინაციისთვის, დანაკლისი დოზის შესავსებად, რადგან წითელა 100-პროცენტიანი გადამდებობით ხასიათდება და დაავადების თავიდან აცილების ერთადერთი გზა არის სწორედ ვაქცინაცია. დაავადებულები არიან ის ბავშვები, ვისაც აცრა გამოტოვებული აქვს ან მოზრდილი მოსახლეობა, რომელიც ამბობს, რომ თავის დროზე აცრა არ ჩაუტარებია, ან კიდევ 0-დან ერთ წლამდე ბავშვები, ვინც ჯერ ვერ მოასწრო წითელას საწინააღმდეგო აცრის ჩატარება და კონტაქტის გამო მოხდა დაავადების გადადება.

შეიძლება ითქვას, რომ 2013 წლის შემდეგ ეს არის ეპიდდაძაბული სიტუაცია. თუმცა ინფექციური დაავადებების შემთხვევაში ეს კანონზომიერება არსებობს –  3-5 წელიწადში ერთხელ არაიმუნურ მოსახლეობაში ყოველთვის ხდება შემთხვევების მატება,“ – ამბობს ნინო ნიჟარაძე.

საზოგადოებრივი ჯანდაცვის ცენტრის ინფორმაციით, წითელას გართულებული შემთხვევები აჭარაში წელს არ ყოფილა.

დაავადებათა კონტროლისა და საზოგადოებრივი ჯანდაცვის ცენტრის ინფორმაციით, წითელას ვირუსი სახიფათოა ყველა ასაკში, მაგრამ 5 წლამდე ასაკის და 20 წელს გადაცილებულ პირთათვის შესაძლებელია გახდეს სერიოზული გართულებების მიზეზი.

პნევმონია  (20  შემთხვევიდან ერთი) ყველაზე ხშირია მცირეწლოვან ბავშვებში, ენცეფალიტი/ ტვინის შეშუპება (1000 შემთხვევიდან ერთი)  მთავრდება  სმენის  დაკარგვით და ასევე ყურის ინფექციები (10  შემთხვევიდან ერთი)  მთავრდება სმენის  დაკარგვით, ორსულობის  პერიოდში კი  წითელა შესაძლებელია გახდეს  ნაადრევი მშობიარობის ან ახალშობილის მცირე წონის მიზეზი.

წითელას სიმპტომებია: მაღალი ტემპერატურა, ხველება, ცემინება, კონიუნქტივიტი, ყელის ტკივილი. სიმპტომების განვითარებიდან მესამე-მეხუთე დღეს ჩნდება წითელი ლაქისებრი ბრტყელი გამონაყარი სახეზე, თმის საფარველის გასწვრივ კისერზე, მხრებსა და მთელ სხეულზე.

წითელა ჰაერ-წვეთოვანი გზით, დაინფიცირებული პირისგან ცემინებისა და ხველების დროს ვრცელდება. ვირუსი ორი საათის განმავლობაში ცოცხლობს ჰაერში და იწვევს გარშემომყოფი პირების დაინფიცირებას ჰაერის ან დაბინძურებულ საგნებთან შეხების საშუალებით.

დაინფიცირებული პირი სიპტომების გამოვლენამდე ოთხი დღის და გამოვლენის შემდეგ კიდევ ოთხი დღის განმავლობაში შესაძლებელია იყოს ვირუსის გამავრცელებელი.

2017 წლის სექტემბერში „მეტრობეტონის“ მშენებლობიდან 30 წლამდე ორი მამაკაცი ჩამოვარდა. დაღუპული ახალგაზრდების ოჯახის წევრები სადაზღვევო კომპანია „უნისონისგან“ კომპენსაციას ითხოვენ. დაღუპულების ოჯახის წევრებმა და ახლობლებმა დღეს, 23 იანვარს, „უნისონის“ ოფისის წინ საპროტესტო აქცია გამართეს. მათი თქმით, დაღუპულებს ჰქონდათ სიცოცხლის დაზღვევა, მაგრამ, ამის მიუხედავად, სადაზღვევო კომპანია თანხის – 100 ათასი დოლარის გადახდაზე უარს აცხადებს.

სააქციო საზოგადოება „მეტრობეტონსა“ და სადაზღვევო კომპანია „უნისონს“ შორის სადაზღვევო ხელშეკრულება 2017 წლის 17 აგვისტოს გაფორმდა. ხელშეკრულების მიხედვით, დაზღვეული იყო მუშების სიცოცხლე და მათი გარდაცვალების შემთხვევაში ოჯახი ასი ათას დოლარს მიიღებდა. ახალგაზრდა მუშები ხელშეკრულების გაფორმებიდან 23 დღეში დაიღუპნენ.

როგორც დაღუპული მუშების ოჯახის წევრები აცხადებენ,  ოჯახებისთვის კომპენსაცია არც „მეტრობეტონს“ გადაუხდია.

„ჩემს შვილს ორი პატარა შვილი დარჩა, მისი სიცოცხლე შეუფასებელია და მას ვერავინ დაგვიბრუნებს, მაგრამ ვითხოვთ, რომ ამ პატარა ბავშვების გამო მაინც გადაიხადონ კომპენსაცია,“ – გვეუბნება დაღუპული რეზო თურმანიძის დედა, ნაზი თურმანიძე.

მეორე დაღუპული მუშის, მამუკა თურმანიძის მეუღლე ფეხმძიმედაა. მისი თქმით, კომპანია ვალდებულია მის ოჯახს კომპენსაცია გადაუხადოს, დაღუპული მუშის შვილი სოციალურად დაცული რომ იყოს.

„ჩვენ ვითხოვთ, სიცოცხლის დაზღვევის პუნქტით გადაიხადონ კომპენსაცია, თუმცა სადაზღვევო კომპანია უარს გვეუბნება. ვფიქრობთ, მივმართავთ სასამართლოს ჩვენი შვილების უფლებების დასაცავად,“ -ამბობს მარიამ სირაბიძე.

„ბათუმელები“ სადაზღვევო კომპანია „უნისონის“ რეგიონული ოფისის ხელმძღვანელს, მზია რომანაძეს ესაუბრა, რომელიც აცხადებს, რომ „მეტრობეტონმა“ ხელშეკრულებით გათვალისწინებული პირობები დაარღვია, რის გამოც „უნისონი“ ვალდებულებისგან თავისუფლდება.

„პირველ რიგში, მწუხარებას გამოვხატავთ დაღუპული მუშების გამო და განვმარტავთ, რომ  2017 წლის 17 აგვისტოს სადაზღვევო კომპანია „უნისონსა“ და სააქციო საზოგადოება „მეტრობეტონს“  შორის გაფორმდა ხელშეკრულება და დაზღვეულ იქნა დამქირავებლის პასუხისმგებლობა.

პოლისის თანახმად, დამზღვევი ვალდებული იყო 2017 წლის პირველ სექტემბრამდე  გადაეხადა პირველადი ან ერთჯერადი სადაზღვევო შენატანი, რაც არ მომხდარა. „მეტრობეტონმა“ სადაზღვევო თანხა გადაიხადა მას შემდეგ, რაც მუშები დაიღუპნენ.

ხელშეკრულების მიხედვით, დამზღვეველმა დაარღვია ხელშეკრულების პირობები, რის გამოც „უნისონი“ თავისუფლდება პასუხისმგებლობისგან,“ – აცხადებს „უნისონის“ წარმომადგენელი.

მისი თქმით, „მეტრობეტონი“ ცდილობს, მთელი პასუხისმგებლობა „უნისონს“ დააკისროს, რითაც ის ლახავს სადაზღვევო კომპანიის იმიჯს.

„უნისონის“ წარმომადგენლის თქმით, სადავო საქმე სასამართლოს გზით უნდა მოგვარდეს.

კომპანია „მეტრო“ კი კომპენსაციის საკითხთან დაკავშირებით შემდეგ კომენტარს ავრცელებს: „უნისონთან“ საკმაოდ დიდი ხანია ვთანამშრომლობთ, ახლანდელი ფაქტი სადაზღვევო შემთხვევას უკავშირდება. „უნისონს“ აქვს გარკვეული პრეტენზიები, რასაც კატეგორიულად არ ვეთანხმებით.  თუ შეთანხმება ვერ შედგა, საქმეს გაგრძელება მოჰყვება სასამართლოში“.

ბათუმში იანვრის თბილი დღეების შემდეგ ამინდი ხვალიდან შეიცვლება.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, ხვალ ბათუმსა და აჭარის სანაპირო რაიონებში იწვიმებს, გაძლიერდება დასავლეთის მიმართულების ქარი, ჰაერის ტემპერატურა დღისით 5-10 გრადუსი, ღამით კი 1-6 გრადუსი იქნება.

მომდევნო ორი დღის განმავლობაში ბათუმში ნალექიანი ამინდი შენარჩუნდება, მოსალოდნელია თოვლ-ჭყაპი.

უახლოეს დღეებში აჭარის მთიანეთში თოვაა მოსალოდნელი, დღისით – ზოგან ძლიერი. ჰაერის ტემპერატურა დღისით 2 გრადუსი სითბო – სამი გრადუსი ყინვაა მოსალოდნელი, ღამით კი -1-2 გრადუსი ყინვა.

მთავარი ფოტო: „ბათუმელები“/მანანა ქველიაშვილი 

 

ბათუმის არჩეული მერი ლაშა კომახიძე სოციალურ ქსელ ფეისბუქში საზოგადოება „ბათომს“ პასუხობს. „ბათომმა“ დღეს ღია წერილი გაავრცელა და ლაშა კომახიძეს მოუწოდა გაიღოს ძალისხმევა ისტორიული თუ კულტურული მემკვიდრეობის გადასარჩენად. ბათუმის მერი სოციალურ ქსელში სწორედ ამ მიმართვას გამოეხმაურა. მერის მიერ გავრცელებულ პოსტს უცვლელად გთავაზობთ:

„მინდა გამოვეხმაურო ორგანიზაცია „ბათომის“ და მისი ცალკეული წევრების მიერ სოციალურ ქსელში წარმოებულ კამპანიას ბათუმის კულტურული და ისტორიული მემკვიდრეობის შენარჩუნების მიზნით. რამდენადაც სამწუხარო არ უნდა იყოს, პირადად ჩემი არაერთი მცდელობის მიუხედავად გადავსულიყავით კონსტრუქციულ, სამუშაო რეჟიმში და ერთად გვეფიქრა კონკრეტული, ქმედითი ნაბიჯების გადაგმაზე ამ მიმართულებით ჩემმა ინიციატივამ ვერ ჰპოვა თქვენში მხარდაჭერა… ან არ ჰპოვა. დაუჯერებელია მაგრამ სიტყვითაც კი, სურვილის დონეზეც კი არსად არ გაგიჟღერებიათ მზადყოფნა! ეს ბევრ რამეზე მაფიქრებს…

მიუხედავად შემოთავაზებისა კომპლექსურად შეგვეხედა პრობლემაზე როგორც ქალაქის ისტორიულ ნაწილში მაცხოვრებელი ადამიანების პოზიციიდან ასევე სახელმწიფო ბიუჯეტის პოზიციიდან, მიგვეგნო პრობლემის არსისთვის და ერთად გვეფიქრა ქმედით, შინაარსიან და სასარგებლო ნაბიჯების გადადგმაზე… პასუხად მივიღე ბრმა აგრესია რომ თურმე ჩემი საუბარი „კულტურული მემკვიდრეობის კონვერტაციაა“, რომ ასეთ კალაპოტში საუბარი „არგუმენტებია ქალაქის ნგრევის გასაგრძელებლად“…

მიუხედავად მოწოდებისა დაკავებულიყავით ნამდვილად სასარგებლო საქმით და მიუხედავად უპრეცედენტო შემოთავაზებისა კონკრეტული ფინანსური სახსრების გამოყოფაზე ყოველ მოზიდულ გრანტზე კულტურული და ისტორიული ძეგლების აღდგენა რეაბილიტაციისა თუ სხვა პროგრამების კუთხით, ერთ-ერთი თქვენგანისგან პასუხად მივიღე რომ არაფრის მომზიდველი არ არის (ეჰ…) და ეს ფაქტი არ ნიშნავს რომ „ლაყე კვერცხის ჭამაზე უნდა დათანხმდეს“…

მეგობრებო, რატომ იქცევით ასე? ყოველ ახალ ჯერზე რატომ ცდილობთ შექმნათ აგრესიული ფონი? რატომ ცდილობთ საზოგადოების გრძნობებზე მანიპულირებით (მანიპულაცია და სხვა არაფერია როდესაც პოზიციას აწვდით ცალსახად, თქვენთვის სასურველი ინტერპრეტაციით) დაამკვიდროთ მტრის ხატი? ეგებ იმიტომ რომ მტრის გარეშე დარჩით და დაიბენით?! ახალს ეძებთ?! არ იცით როგორ იცხოვროთ ასეთ რეალობაში და თანამშრომლობისთვის გამოწვდილ ხელს კბენთ და ღრნით?! რა არის ეს? საკუთარი უუნარობის გამოვლენა თუ იმის წამოცდენა რომ არა ხართ მოწოდებული პრობლემის მოგვარებაზე? დაფიქრდით ამაზე… კითხეთ სხვასაც, გვერდიდან უკეთესად ჩანს როგორ გამოიყურებით. კარგი, გადავდოთ გვერდზე ეს საკითხი…

მოკლედ, კეთილისმსურველებო, ზოგიერთისგან განსხვავებით მე ვიცი როგორ შეიძლება გრანტების მოზიდვა… ამიტომ უკვე ვსაუბრობ ერთ-ერთ მსხვილ დონორ ორგანიზაციასთან რამოდენიმე მილიონიანი გრანტის (დადასტურებულის და არა პერსპექტივაში!) ბათუმის ისტორიული უბნის რეაბილიტაციაზე დახარჯვის თაობაზე. ღმერთის დახმარებით მივიყვან ბოლომდე ამ საქმეს (ეს არ არის ადვილი და მოითხოვს დროს) და გულწრფელად მჯერა (რატომღაც ერთი კაცის სიტყვები გამახსენდა „არ გაბლაყვდე, არ დეიჯერო ჯოოო!“ ?), რომ იგივე მონდომებით დაწერთ სტატუსს „ლაშა კომახიძის მერობის დროს რეაბილიტირებული კულტურული მემკვიდრეობის ძეგლები!“

ეს იყოს პროლოგი ჩვენი მომავალი შეხვედრისთვის რომელსაც ამ პოსტით ვაანონსებ შემდეგ კვირაში (მოგვიანებით დაგიზუსტებთ თარიღს და დროს). შეხვედრისა, რომელზეც მოვიწვევთ მედიისა და არასამთავრობო ორგანიზაციის წარმომადგენლებს, ასევე სხვადასხვა თემატური ორგანიზაციისა და მთავრობის წევრებს. ეს იქნება შეხვედრა პრეზენტაცია მერიის მიდგომებისა ქალაქის კულტურული და ისტორიული განაშენიანების დაცვისა და განვითარების მთავარ ასპექტებზე შემდეგი 4 წლის განმავლობაში. პრეზენტაცია კონკრეტული გადაწყვეტილებებისა და პროექტების რომელზეც მუშაობა დაწყებულია ჩემი უფლებამოსილების პირველივე დღიდან და რომელიც იმედი მაქვს მნიშვნელოვან გარდატეხას შეიტანს თქვენს ცნობიერებაში – მე თქვენზე ჯერ ხელი არ ჩამიქნევია ?“

ბოლო კვირის განმავლობაში ბათუმში რამდენიმე ისტორიული, ფონური ნაგებობის დანგრევა დაიწყო, მათ შორის მე-19 საუკუნეში აგებული ბელეტაჟის დემონტაჟი ფარნავაზ მეფის ქუჩაზე. ამ ადგილას შვიდსართულიანი სახლის აშენება იგეგმება. ასევე, ანგრევენ მე-19 საუკუნეში აგებულ, ერთსართულიან, ფონურ შენობას ზვიად გამსახურდიას ქუჩაზე, სადაც ხუთსართულიანი სახლის აგება იგეგმება.

ორგანიზაცია „ბათომი“ წლებია ბათუმში კულტურული მემკვიდრეობის დაცვის საკითხებზე მუშაობს.

______________________________

ამავე თემაზე:

ისტორიულ ქალაქს მხოლოდ ძეგლის სტატუსის მქონე შენობები არ ქმნიან – „ბათომის“ ღია წერილი მერს

ხანძარია ბათუმთან ახლოს მდებარე სოფელ განთიადთან, მთაზე. შემთხვევის ადგილისკენ წავიდნენ სახანძრო-სამაშველო სამსახურის ჯგუფები. სახანძროს ინფორმაციით, მათთან შეტყობინება შევიდა, რომ მთაზე ეკალ-ბარდი იწვის. ემუქრება თუ არა ხანძარი საცხოვრებელ სახლებს, სახანძროში ამის შესახებ ჯერ არ იციან.

ფოტოზე: ხანძარი მთაზე. შალვა თავდგირიძის ფოტო 

 

2014 წელს ძველ ბათუმში, 16 ქუჩაზე, ჭიშკრები და სადარბაზო კარები გამოცვალეს, ზოგი შეაკეთეს, რესტავრაცია გაუკეთეს, ზოგიც მთლიანად შეცვალეს ახლით.

ბათუმის განვითარების ფონდის მიერ განხორციელებული პროექტისთვის მაშინ 500 000 ლარი იყო გამოყოფილი. დავათვალიეროთ ძველი ბათუმის რამდენიმე კარი, რომლებთანაც აუცილებლად უნდა შეჩერდეთ, თუნდაც ცოტა ხნით.

            1.კონსტანტინე გამსახურდიას 29 

 

            2. ფარნავაზ მეფის ქუჩა

                3. მერაბ კოსტავას 13

                4. ფარნავაზ მეფის 39

                   5. ირაკლი აბაშიძის 3

                  6. გორგილაძის 24

               7. კონსტანტინე გამსახურდიას 36

                   8. რევაზ კომახიძის 1

                9. ახმედ მელაშვილის 23

                10. მემედ აბაშიძის ქუჩა

                  11. მერაბ კოსტავას 26

         12. რუსთაველის 39 – სამშობიარო სახლი

ამავე თემაზე:    26 ახალი სადარბაზო კარი ძველ ბათუმში

 

საავტომობილო გზების დეპარტამენტის აჭარის დირექციის უფროსის თანამდებობა ვაკანტურია. ეს თანამდებობა ზურაბ სიხარულიძემ დატოვა და სამუშაოდ იმ კომპანიაში გადავიდა, რომელიც „ბათუმის შემოვლითი გზის“ პროექტს  ზედამხედველობს.

„ჩემი სურვილით დავტოვე თანამდებობა, ბევრი ვიშრომე და ასე გადავწყვიტე… ისევ ბათუმის შემოვლითი გზის პროექტზე განვაგრძობ მუშაობას. დავსაქმდი კომპანია „სნეკში“, რომელიც ტენდერში გამარჯვებული კომპანიაა და საზედამხედველო საქმიანობას ახორციელებს შემოვლითი გზის პროექტზე, ახლა ზედამხედველობის ინჟინერი ვარ,“ – გვითხრა ზურაბ სიხარულიძემ.

„ბათუმის შემოვლითი გზის“ პროექტით გათალისწინებულ სამუშაოებზე ზედამხედველობას კომპანია „სნეკი“ 2017 წლის 16 სექტმებრიდან ახორციელებს. ტენდერი საზედამხედველო სამუშაოს შესყიდვაზე საავტომობილო გზების დეპარტამენტს ჰქონდა გამოცხადებული. დეპარტამენტის პრესსამსახურში ასევე გვითხრეს, რომ გადაწყვეტილება დეპარტამენტის აჭარის დირექციის ახალი უფროსის დანიშვნის შესახებ ინფრატრუქტურის მინისტრმა უნდა მიიღოს. ამ ეტაპზე კი კანდიდატურა არ განიხილება.

არის თუ არა პრობლემა, როცა თანამდებობის პირი გადადის იმ კომპანიაში სამუშაოდ, რომელმაც ზედამხედველობა უნდა გაუწიოს თანამდებობის ყოფილი პირის მიერ ჩატარებულ საქმესაც? – „საერთაშორისო გამჭვირვალობა საქართველოში“ მიიჩნევენ, რომ ეს პრობლემაა.

ერეკლე ურუშაძე, „საერთაშორისო გამჭვირვალობა საქართველოს“ პროგრამის მენეჯერი: „ნებისმიერი ასეთი გადასვლა, როცა მიდის სახელმწიფო მოხელე იმავე სფეროში მოღვაწე კომპანიაში, არის პრობლემური. კანონი დაირღვა თუ არა კონკრეტულად, ეს მეორე საკითხია და ამას სჭირდება დეტალების შესწავლა. რადგან ტენდერი ჰქონდა გამოცხადებული გზების დეპარტამენტს და არა ბათუმის დირექციას, აქ შესაძლოა არ იყოს პირდაპირი დარღვევა. აღსანიშნავია, რომ კანონი ინტერესთა შეუთავსებლობის შესახებ დასახვეწია ამ კუთხით, რადგან იგი ბევრნაირი ინტერპრეტაციის საშუალებას იძლევა“.

საქართველოს საავტომობილო გზების დეპარტამენტი ახორციელებს ბათუმის შემოვლითი გზის პროექტს. პროექტის ფარგლებში აშენდება 2-ზოლიანი ასფალტის გზა, 19 სახიდე გადასასვლელი, 4 სატრანსპორტო კვანძი, 5 გვირაბი და 57 წყალგამტარი მილი. საქართველოს რეგიონული განვითარებისა და ინფრასტრუქტურის სამინისტროს ინფორმაციით, პროექტი ფინანსდება აზიის განვითარების ბანკისა (ADB) და აზიის ინფრასტრუქტურის საინვესტიციო ბანკთან (AIIB) გაფორმებული სასესხო ხელშეკრულებების ფარგლებში. ხელშეკრულების ღირებულება 329 მილიონი ლარია.

ბათუმის ბულვარში ახალი ველობილიკის მოწყობის შესახებ გადაწყვეტილება ბულვარის ადმინისტრაციამ მიიღო. საუბარია არსებული ველობილიკების შეცვლაზე პანორამული ბორბლიდან ახალ ბულვარში მდებარე ხიდამდე. ველობილიკზე ფილების ნაცვლად ბეტონის ნარევის სხმული დაიგება [ახალი ბულვარის ტერიტორიაზე ველობილიკი ბეტონის ნარევის სხმულითაა მოწყობილი].

ბათუმის ბულვარის ადმინისტრაციის პრესსამსახურში განმარტავენ, რომ ბილიკი ამორტიზებულია და მის ხელახლა მოწყობაზე ტენდერი უახლოეს ორ კვირაში გამოცხადდება. ჯამში 19 424 კვადრატული მეტრის ველობილიკის მოსაწყობად, სავარაუდოდ, 1 მილიონ 763 ათას 113 ლარი დაიხარჯება.

უახლოეს დღეებში ბულვარის ადმინისტრაცია კიდევ ერთ ტენდერს გამოაცხადებს ახალი ბულვარის ტერიტორიაზე. ტენდერში გამარჯვებულმა კომპანიამ აქ დაზიანებული ფილები უნდა გამოცვალოს და ბორდიურები მოაწყოს. შესყიდვის სავარაუდო ღირებულება 2 მილიონ 83 ათას 556 ლარია. სამუშაოები სულ 30 143 კვადრატულ მეტრზე უნდა ჩატარდეს.

საქართველოს განათლებისა და მეცნიერების სამინისტროში მუშაობენ სკოლებში არჩევით საგნად რელიგიის ისტორიის სწავლების დანერგვაზე. „ბათუმელებს“ ამის შესახებ უწყებაში დაუდასტურეს. სამინისტროში მიაჩნიათ, რომ სკოლებში ამ საგნის სწავლება ძალადობის პრევენციას შეუწყობს ხელს. შეამცირებს თუ არა რელიგიის ისტორიის სწავლება ძალადობას მოზარდებში და რამდენად თანმიმდევრულია სამინისტროს პოლიტიკა ამ მიმართულებით? – საკითხს „ბათუმელებთან“ განათლების სპეციალისტი, სიმონ ჯანაშია აფასებს.

„ჩემთვის არ არის ცნობილი რაიმე კვლევა, როდესაც რელიგიის სწავლებით ძალადობა შემცირებულა, გარდა იმ შემთხვევებისა, როცა ძალადობას ჰქონდა რელიგიური საფუძველი.

რელიგიების ისტორია ახლაც ისწავლება სკოლებში, ისტორიის კურსშია ეს საკითხები შესული, ამიტომ სხვა საკითხია რა ფორმა ექნება ამას. სწავლებაში კი არ არის პრობლემა, არამედ იმაში, რომ სახელმწიფოს არც ნება აქვს და არც ფინანსური შესაძლებლობა, ამ საგნის სწავლება სწორად რომ დანერგოს.

სახელმწიფომ ერთხელ სცადა ამ საგნის დანერგვა – 90-იანი წლების ბოლოს და ეს დამთავრდა იმით, რომ იყო არა რელიგიების ისტორიის, არამედ ერთი კონკრეტული რელიგიის სწავლება და ხდებოდა რელიგიური პროზელიტიზმი. გარდა ამისა, ნებისმიერი საგანი სერტიფიცირებულმა პედაგოგმა უნდა ასწავლოს, მათ შორის რელიგიის ისტორიაც,“ – ამბობს სიმონ ჯანაშია.

მის თქმით, არჩევითი საგნები, ძირითადად, მე-11-12  კლასებშია დანერგილი, თუმცა ახლა საუბარია იმაზე, რომ დაბალ კლასებშიც დაინერგოს არჩევითი საგანი. „ეს რაიმე კონკრეტული პრობლემის გადასაჭრელად არ კეთდება და ეს არის პრობლემა,“ – ამბობს სიმონ ჯანაშია.

მისი შეფასებით, ძალადობის შემცირებასა და პრევენციაზე საუბრის დროს, განათლების მინისტრი ისევ ძველ ინსტრუმენტებზე დაყრდნობით საუბრობს და რაიმე ახალ კომპლექსურ მეთოდზე საუბარი არ ყოფილა.

სამინისტროში „ბათუმელებს“ უთხრეს, რომ ამ ეტაპზე მუშაობენ სახელმძღვანელოს სტანდარტზე, რის შემდეგაც განისაზღვრება პროგრამები. „ამის შემდეგ, ცხადია, შეიქმნება სახელმძღვანელოები და განისაზღვრებიან  პედაგოგები.“

დღეს, 22 იანვარს, გამართულ ბრიფინგზე „ნაციონალური მოძრაობის“ წარმომადგენლებმა აჭარის კონსტიტუციაში დაგეგმილ ცვლილებებზე ისაუბრეს. მათი განცხადებით, ამ ცვლილებებით აჭარის კონსტიტუცია კიდევ უფრო დასუსტებულია, ცვლილებების განხილვა კი – ფორმალური.

„რეალურად,  აჭარის უფლებამოსილებები დასუსტდა. კერძოდ, მანამდე მოქმედ აჭარის სტატუსის შესახებ კონსტიტუციურ კანონში ეწერა, რომ განათლება, სოფლის მეურნეობა, სპორტი, კულტურა, კულტურული მემკვიდრეობა – მიეკუთვნებოდა აჭარის გამგებლობას, ხოლო ახალი, უკვე მოქმედი კონსტიტუციური კანონით ამ უფლებამოსილების განხორციელება შესაძლებელია მას შემდგომ, თუ ეს უფლებები დელეგირებული იქნება კანონებით.

თუკი აქამდე ეს უფლებები იყო გარანტირებული კონსტიტუციით, დღეს ამ უფლებამოსილების განხორციელება დამოკიდებულია „ქართული ოცნების“ ხელისუფლებაზე და პარლამენტის უმრავლესობაზე,“-აცხადებს გია აბულაძე.

„ნაციონალური მოძრაობის“ წევრების განცხადებით, კონსტიტუციური კანონი უნდა მიღებულიყო ფართო კონსესუსის საფუძველზე.

„ცვლილებები შეეხება საარჩევნო სისტემასაც. „ქართული ოცნება“ სანამ ხელისუფლებაში მოვიდოდა, აცხადებდა, რომ მაჟორიტარული სისტემა იყო არასწორი და რეალურად, ეს სისტემა მართლაც არასწორია, რადგან ბოლო კვლევებმაც აჩვენა, რომ  მოსახლეობის დიდი ნაწილი ვერ იცნობს თავისი უბნის მაჟორიტარს. ამიტომ, ჩვენ ვითხოვდით, რომ  მაჟორიტარული სისტემა აღარ ყოფილიყო, თუმცა არც ეს იქნა გათვალისწინებული,“-აცხადებს გია აბულაძე.

ბრიფინგზე ენმ-ს წარმომადგენლებმა განაცხადეს, რომ რეალურად აჭარის კონსტიტუციის განხილვა  ფორმალურად ხდება. „სხვა პარტიების წარმოდგენით კი, ხელისუფლებას სურს აჩვენოს, რომ თითქოს ეს არის დემოკრატიული პროცესი. მათ არ აქვთ სურვილი, ისაუბრონ რეალურ ცვლილებებზე, შესაბამისად ამ ფორმალურ განხილვებში ჩვენ მონაწილეობას არ მივიღებთ.“

ენმ-ს წევრების თქმით, მათ შეიმუშავეს რეკომენდაციები,  რომლებიც საარჩევნო სისტემის რეალურ ცვლილებებს შეეხება და მათ მოსახლეობას გააცნობენ.

 

2018 წლიდან საბავშვო ბაღებში კვების რაციონი შეიცვალა. ცვლილებები შევიდა ბათუმის საბავშვო ბაღების მენიუშიც. ზოგიერთი მშობელი ცვლილებებს კრიტიკულად შეხვდა, ისინი უკმაყოფილებას სოციალურ ქსელებში გამოხატავდნენ.  რა შეიცვალა მენიუში კონკრეტულად და ვისი რეკომენდაციით?

ბათუმის საბავშვო ბაღების გაერთიანების ხელმძღვანელის, მამაუკა შამილიშვილის თქმით, ახალი მენიუ ჯანდაცვის სამინისტროს რეკომენდაციით, საერთაშორისო სტანდარტების შესაბამისად შედგა.

„ეს არის მთავრობის თავმჯდომარის მიერ დამტკიცებული რაციონი.  შემცირდა ნახშირწყლების ცხიმების  რაოდენობა და გაიზარდა ხილი და ბოსტნეული. ეს არის თანამედროვე მიდგომებით შემუშავებული რაციონი. ევროპაში 7 წლამდე შაქარს და მარილს საერთოდ არ აძლევენ ბავშვს,“-ამბობს მამუკა შამილიშვილი.

მისი თქმით, გაიზარდა ხილისა და ბისტნეულის რაოდენობა. რაციონს დაემატა ბანანი და იოგურტი. „ხორცი, თევზი და ქათამი ისევ რჩება მენიუში. ვისაც არ მოსწონს, ვფიქრობ, არაპროფესიონალები არიან, რადგან ბავშვის ორგანიზმისთვის ეს მენიუ გაცილებით სასარგებლოა,“-ამბობს შამილიშვილი.

მისი აზრით, კერძი უგემური არ იქნება, რადგან შაქარი და მარილი მთლიანად არ არის ამოღებული მენიუდან, „უბრალოდ, შემცირებულია რაოდენობა. ასე, რომ უფრო პროგრესული მენიუ გვაქვს.“

ბაღების გაერთიანების ხელმძღვანელის თქმით, ხილისა და ბოსტნეულის შემთხვევაშიც მკაცრად კონტროლდება მისი ხარისხი: „პესტიციდების რაოდენობასთან დაკავშირებით ძალიან მკაცრად მოწმდება ეს პროდუქტები, ყველა პარტიას ახლავს ლაბორატორიული შემოწმების სერტიფიკატი.“

მამუკა შამილიშვილის თქმით, რაციონის ცვლილებას არ გამოუწვევია ბიუჯეტის ცვლილება.  მამუკა შამილიშვილი ამბობს, რომ ახალი კვების რაციონის შესახებ ინფორმაციას მშობლებსაც გააცნობენ.

 

 

სხალთის მთავარეპისკოპოს სპირიდონზე საუბრისას სოფელ ხიჭაურში ხმას იდაბლებენ ან პირზე ხელს იფარებენ – არავინ გაიგოს და ამბავი არ მიუტანოსო. ამბობენ, რომ მას ამბის მიმტანი ბევრი ჰყავს.

მანამ, სანამ ხელისუფლება ბობოყვათის სამთავრობო რეზიდენციას ეკლესიას გადასცემდა, სხალთის მთავარეპისკოპოსი ყველაზე მეტ დროს ხიჭაურში ატარებდა. ახლა, ძირითადად, ბობოყვათში ათევს ღამეს. ის ხიჭაურში საპატრიარქოს მიერ დაარსებული უნივერსიტეტის რექტორია დაარსების დღიდან. მას შემდეგ კი, რაც სასწავლებელი სასულიერო გიმნაზიის დირექტორმა, ნუგზარ ზოსიძემ სკანდალურად დატოვა, გიმნაზიასაც თავად მართავს.

ოფიციალური მონაცემებით, ხიჭაურის უნივერსიტეტში ჩაბარების მსურველთა რაოდენობამ წელს მკვეთრად იკლო. თუ უნივერსიტეტი 2008-2013 წლებში ყოველწლიურად 200-მდე სტუდენტს იღებდა და ამას ემატებოდა მოსამზადებელ ჯგუფში მიღებული აბიტურიენტებიც, წელს უნივერსიტეტს მხოლოდ 37 სტუდენტი მიუღია. შეფასებისა და გამოცდების ეროვნული ცენტრის ვებგვერდზე გამოქვეყნებული ინფორმაციით, 2016 წელს ეროვნულ გამოცდებზე სასურველი სასწავლებლების ჩამონათვალში საპატრიარქოს ტბელ აბუსერიძის სახელობის უნივერსიტეტი მხოლოდ 51-მა აბიტურიენტმა მიუთითა. 2014-2017 წლებში ხიჭაურის უნივერსიტეტიდან მობილობით ბათუმის რუსთაველის სახელმწიფო უნივერსიტეტში 47 სტუდენტი გადავიდა.

შუახევში მსგავს ცვლილებას თავად მთავარეპისკოპოსს უკავშირებენ. აქ ამბობენ, რომ 2008 წლის შემდეგ, რაც უნივერსიტეტი გაიხსნა, მთავარეპისკოპოს სპირიდონს ხიჭაურში პოლიციის დახმარება ბევრჯერ დასჭირდა. ადგილობრივების თქმით, „მას დიდი ძალა აქვს“. სხალთის ეპარქიაში საკუთარი პოლიტიკის გატარებაში მთავარეპისკოპოსს პოლიცია ეხმარება, ხოლო იმისთვის, რომ მისი ხმა ქვეყანას გააგონოს – „იუთუბის“ არხი.

• „აქ ხალხს მისი ეშინია“ – ხმაურიანი ამბების მდუმარე გმირები

საკუთარ ამბებზე, ძირითადად, არ საუბრობენ ამბის „გმირები“, ისინი, ვისაც სხალთის მთავარეპისკოპოსთან დაპირისპირება ჰქონდა ან აქვს. მკაცრი გაფრთხილებისა და კონფიდენციალურობის დაცვის პირობის შემდეგ საუბარს მხოლოდ „ამბის მაყურებლები“, მთავარი გმირების მეზობლები ბედავენ. ამიტომაც მონაყოლი ერთსა და იმავე ამბავზე რამდენიმე სხვადასხვა წყაროსთან გადავამოწმეთ.

თავიდან ყველაფერი სულ სხვანაირად, პოზიტიურად დაწყებულა:

„მეუფე სპირიდონს ხიჭაურში თბილად შეხვდნენ, უნივერსიტეტის გახსნამდე ამოდიოდა, სოფელში ყველას ტკბილად ელაპარაკებოდა და ეფერებოდა. შეხვედრებს უწყობდნენ, ფოტოებიც გვაქვს გადაღებული, საყოველთაო ნათლობები იმართებოდა, მაგრამ შემდეგ ყველაფერი შეიცვალა.

ახლა აქ ხალხს მისი ეშინია.

დაზუსტებით გეტყვით, რომ პოლიციაც მას ემორჩილება და ვერც გამგებელი გაუბედავს ზედმეტს, თუნდაც რაიმე კანონთან შეუსაბამო გააკეთოს. ადგილობრივებთან დაპირისპირების შემდეგ, როცა საქმეში პოლიცია ერთვება, ყველაფერი ისე მთავრდება, როგორც სპირიდონს უნდა“, – ეს არის ზოგადი ამბავი, რასაც მთავარეპისკოპოს სპირიდონთან დაკავშირებით მოისმენთ, როგორც შუახევის მინიციპალიტეტის სოფელ ხიჭაურში, ისე ზემო აჭარაში.

ერთ-ერთი ხიჭაურელის თქმით, მთავარეპისკოპოსმა საკუთრება წაართვა აქაურ ოჯახებს და ამაში მას პოლიციაც დაეხმარა – ხიჭაურში დაპირისპირების ერთ-ერთი თემა ის ქონება გახდა, რომელიც მეპატრონეებს ყოფილი საბჭოთა სამხედრო ნაწილის ტერიტორიაზე ჰქონდათ, სადაც ტბელ აბუსერიძის სახელობის უნივერსიტეტი და სასულიერო გიმნაზია გაიხსნა. სამხედრო ნაწილი თავისი შენობებიანად სახელმწიფომ საპატრიარქოს ჯერ უზურფრუქტის წესით, შემდეგ კი სიმბოლურ ფასად – 1 ლარად საკუთრებაში 2007 წელს გადასცა, უნივერსიტეტი სწორედ ამ ტერიტორიაზე გაიხსნა.

„მეზობელს, ძია მიშას, სამხედრო ნაწილის ტერიტორიაზე მაღაზია ჰქონდა, ძველი კაჩიგარიის შენობა გაარემონტა და ფართობი მიაშენა, ახალი „ჟეშტითაც“ გადახურა. თავისი სახსრებით გააკეთა ეს ყველაფერი.

მაღაზიის წინ სამი მაგიდა ედგა, სადაც კლიენტებს უმასპინძლდებოდა. ერთ საღამოს აქ მთავრობის ხალხმა შეიარა, ხულოდან მოდიოდნენ, ჩამოსხდნენ ძია მიშას მაღაზიაში და თითო ჭიქა არაყი დალიეს. მეუფემ ძია მიშა იმ საღამოსვე დაიბარა რეზიდენციაში და არყის გაყიდვა აუკრძალა, უთხრა აქ დალევა არ შეიძლებაო. არ გაჭრა ახსნა-განმარტებამ, რომ სტუმრები მთავრობიდან იყვნენ და უარის თქმა უხერხული იქნებოდა.

ასე დაიწყო შევიწროება.

ერთ მშვენიერ დღეს კი, მიშას არ ყოფნის დროს, დაკეტილ მაღაზიას რაღაც ქაღალდი მიაწებეს წარწერით – „შენობა დალუქულია“. ამის შემდეგ ძია მიშა რამდენიმე დღე არ გამოჩენილა, სოფელში ამბობდნენ სპირიდონი უთვლის, თავისი საქონელი გაიტანოს, შენობა ჩემიაო. ტომრებში ჩაუყარეს ნივთები. მანამდე პოლიცია მივიდა ძია მიშასთან და უთხრა, ხომ იცი მაგასთან არ გაგივა და სჯობს დანებდეო. ამის შემდეგ ძია მიშა სპირიდონს უთვლიდა, ჩემს დამონტაჟებულ რკინის ღობეს მაინც წავიღებო, არც ეს დაანება.“

მეზობლების თქმით, ეს ამბავი შეემთხვა მიშა ქარცივაძეს, რომელმაც ამ თემაზე „ბათუმელებთან“ საუბარი არ ისურვა. მას ახლაც აქვს მაღაზია იმ კორპუსებიდან ერთ-ერთის პირველ სართულზე, სადაც ყოფილი სამხედროები ცხოვრობენ. ამბობს, რომ ფართობი იჯარით აიღო.

აქ ამბობენ, რომ მთავარეპისკოპოსი უნივერსიტეტის მიმდებარე მცხოვრებლებს, კურთხევის გარეშე, ისეთ წვრილმან საკითხებსაც კი უკრძალავს, როგორიც „ეზოში შეშის დაყრა“ თუ „ბოსტანში მწვანილის მოკრეფაა“.

გახმაურებული ამბების გმირებს შორის გამონაკლისია მურად ქარცივაძე, ის მთავარეპისკოპოს სპირიდონთან დაპირისპირებაზე თავად მოგვიყვა:

„ყოფილი სამხედრო ბაზის ტერიტორიაზე რკინის კონტეინერი მქონდა, ჩემი საკუთრება. მეუფემ ბოქლომი გამოცვალა, კონტეინერიც დაიტოვა და ნივთებიც, რაც იქ მქონდა. სულ ვცდილობ გავიტანო ჩემი კონტეინერი ყოფილი სამხედრო ნაწილის ტერიტორიიდან, მაგრამ უშედეგოდ. ახლოსაც არ მიშვებენ, არც მეუფესთან მიშვებენ, რომ ვთხოვო. ვერც გამგებელი მივუგზავნე – ყველამ უარი მითხრა.“

კიდევ ერთი ადგილობრივი, რომელიც „ბათუმელებს“ ასევე ვინაობის დაფარვის პირობით ესაუბრა, მოგვიყვა, რომ მთავარეპისკოპოსი სპირიდონი ითხოვდა იმ კორპუსების დაცლას, რომლებშიც ყოფილი სამხედრო პირები და მათი ოჯახები დღემდე ცხოვრობენ.

ამ ფაქტს ადასტურებს შუახევის ყოფილი გამგებელი ომარ მეგრელიძეც, რომელიც ამბობს, რომ მთავარეპისკოპოსი ოთხი კორპუსიდან 108 ოჯახს უპირებდა გამოსახლებას:

„ისინი სამხედრო ნაწილში იყვნენ დასაქმებულები და ამ კორპუსში ბინები ჰქონდათ. რუსის ჯარი რომ გავიდა და შენობები დაცარიელდა, აქ გააგრძელეს ცხოვრება ისე, რომ ბინები საკუთრებაში არ დაუკანონებიათ. სპირიდონი ამტკიცებდა, რომ ყოფილი სამხედრო შენობები მთლიანობაში უნივერსიტეტს გადასცა მთავრობამ, ამიტომ ის კორპუსიც, სადაც ხალხი ცხოვრობს, მისთვის უნდა დაეთმოთ“, – ადასტურებს ადგილობრივების ინფორმაციას ომარ მეგრელიძე.

„საპარლამენტო არჩევნების წინ თათბირი იყო მთავრობაში. ამ თათბირს ესწრებოდა ადეიშვილი, მერაბიშვილი, ტყეშელაშვილი, უგალავა, სააკაშვილის გარდა ყველა. გამოცხადდა, რომ ხიჭაურის სამხედრო ნაწილი საპატრიარქოს გადაეცემა 1 ლარად უნივერსიტეტის გასახსნელად… თავად ასე მეუბნებოდა, ეს არის ეკლესიის ქონება და ჩემს სახლში ცხოვრობენ ესენიო. ერთ დღესაც, წინააღმდეგობის შემდეგ, მეუფე სპირიდონი ჩავიდა პატრიარქთან, იქედან ჩამოსულმა კი, ღამის ორ საათზე გამოიყვანა ხალხი კორპუსებიდან და უთხრა, რომ პატრიარქმა და მე გამოვიჩინეთ დიდი სიკეთე და ამ სახლებს თქვენ გიტოვებთო. ამის შემდეგ დავიწყეთ ბინების ოჯახებზე დაკანონების პროცესი. რამდენადაც ვიცი, კიდევ 16 ოჯახია დარჩენილი, ვისაც ისევ დასაკანონებელი აქვს იქ ბინა.“

საჯარო რეესტრის ინფორმაციით, სადავო კორპუსები, სხვა შენობებთან ერთად, მართლაც შედიოდა იმ შენობების ჩამონათვალში, რომლებიც მთავრობამ საპატრიარქოს გადასცა. მაშინ არავინ გაითვალისწინა, რომ გადაცემულ კურპუსებში ოჯახები ცხოვრობდნენ და წასასვლელი არსად ჰქონდათ.

სადავო შენობებს შორის იყო კიდევ ერთი – ბაგა-ბაღის შენობა, რომელიც ასევე საბჭოთა სამხედრო ნაწილს ეკუთვნოდა, თუმცა მთელი სოფელი სარგებლობდა. შარშან, როცა მთავრობამ სოფელში ბაღის მშენებლობა დაგეგმა, ადგილობრივებისა და ყოფილი გამგებლის, ტარიელ ებრალიძის ინიციატივა იყო, რომ ახალი ბაღი ამ შენობის ბაზაზე გაემართათ, თუმცა მთავარეპისკოპოს სპირიდონს შეუშლია ხელი. ბაღი სხვაგან აშენდა, ყოფილი ბაღის შენობა კი, ცარიელია და ინგრევა.

• დაპირისპირება ეკლესიის აშენებისთვის

მთავარეპისკოპოს სპირიდონთან კიდევ ერთი დაპირისპირების ამბავი ჩირუხისწყლისა და აჭარისწყლის შესართავთან, სოფელ ოქროპილაურში ეკლესიის მშენებლობას უკავშირდება. სხალთის ეპისკოპოსმა ინიციატორებს უარი უთხრა იმ მიზეზით, რომ ამ ადგილზე მშენებლობა გეოლოგიური დასკვნების შესაბამისად დაუშვებელი იყო. მშენებლობის ინიციატორები კი მიიჩნევენ, რომ უარის მიზეზი მთავარეპისკოპოსის განაწყენებაა, რაც იმან გამოიწვია, რომ მშენებლობის ადგილი არა სხალთის ეპისკოპოსს, არამედ ბათუმისა და ლაზეთის მიტროპოლიტს, დიმიტრის აკურთხებინეს.

დოკუმენტების მიხედვით, რომელიც საინიციატივო ჯგუფმა „ბათუმელებს“ მოაწოდა, გეოლოგიური დასკვნა ორივე მხარემ მოამზადა. საქართველოს საპატრიარქოს ხუროთმოძღვრების, ხელოვნებისა და რესტავრაციის ცენტრის მიერ მომზადებულ დასკვნაში წერია, რომ საინიციატივო ჯგუფის მიერ მითითებულ ადგილზე ეკლესიის მშენებლობა მიზანშეწონილი არ არის და ეს საპატრიარქოს სამეცნიერო საბჭოს წევრმა, არქიტექტორმა რევაზ ჯანაშიამ ვიზუალური დათვალიერების შედეგად გამოარკვია.

საინიციატივო ჯგუფისთვის კი დასკვნა საქართველოს ტექნიკური უნივერსიტეტის წყალთა მეურნეობის ინსტიტუტს მოუმზადებია, რომელსაც ხელს აწერს ინსტიტუტის დირექტორი და გარემოს დაცვის სამინისტროს ექსპერტი გივი გავარდაშვილი. მეორე დასკვნის მიხედვით, სოფელ ოქროპილაურში საინიციატივო ჯგუფის მიერ მითითებულ ადგილზე ეკლესიის მშენებლობა შესაძლებელია და ამ ადგილს დატბორვის საფრთხე არ ემუქრება. დასკვნა 2017 წლის 22 მარტით თარიღდება. მიუხედავად ამისა, საინიციატივო ჯგუფი ეკლესიის მშენებლობას მაინც ვერ იწყებს.

სოფელ ოქროპილაურში დარწმუნებულები არიან, რომ სხალთის ეპისკოპოსმა თავდაპირველად სოფელში ჩასული სპეციალისტები შეცდომაში შეიყვანა და სხვა ადგილი აჩვენა. ამის შესახებ წერია იმ დასკვნაშიც, რომელიც საინიციატივო ჯგუფის დაკვეთით მომზადდა.

„ჩვენ გავეცანით სააგენტოს წერილს, გავესაუბრეთ მათ ავტორებს, რომლებმაც შეისწავლეს მიწის ნაკვეთის ადგილმდებარეობა და აღმოჩნდა, რომ მათ საკვლევი ადგილი შეცდომით მიუთითეს“, – ნათქვამია ტექნიკური უნივერსიტეტის წყალთა მეურნეობის ინსტიტუტის დასკვნაში.

სოფელ ოქროპილაურში ამბობენ, რომ ეკლესიის მშენებლობას სხვა ინიციატორებთან ერთად შუახევის საკრებულოს ყოფილი თავმჯდომარე, ვაჟა დავითაძე გეგმავდა: „მანამდე ისინი მეგობრობდნენ, ვაჟა დავითაძე ხშირად დადიოდა მასთან სტუმრად და თავის მარანში დაწურულ ღვინოსაც ხშირად ჩუქნიდა ეპისკოპოსს“.

საინიციატივო ჯგუფი ღია დაპირისპირებაში შევიდა მთავარეპისკოპოსთან. მათ მთავარეპისკოპოს სპირიდონს გაუგზავნეს წერილი, რომელსაც ხელს აწერს 111 ადამიანი. ხელმომწერების პირველ ათეულში შედიან: ვაჟა დავითაძე, რომელიც ახლა უკვე ბიზნესმენია და ერთ-ერთია მათ შორის, ვინც ამ ეკლესიის მშენებლობის დაფინანსებას აპირებდა, მწერალი რამაზ სურმანიძე, ბსუ-ს პროფესორი ბიჭიკო დიასამიძე, ვახტანგ მაკარაძე, ალიოშა ბაკურიძე – ბსუ-ს ყოფილი რექტორი და სხვები. თავად ვაჟა დავითაძემ „ბათუმელებთან“ ამ თემაზე საუბარი არ ისურვა.

სხალთის ეპისკოპოსზე განაწყენებულებს ამბავი პატრიარქთანაც ჩაუტანიათ. ამბობენ, რომ პატრიარქთან ამ თემაზე სასაუბროდ რამაზ სურმანიძე ჩავიდა. „ამის შემდეგ ხიჭაურის უნივერსიტეტში კომისია მიავლინეს, მათ შორის იყო გიორგი მამალაძეც, რომელიც ახლა ციანიდის საქმეზეა დაკავებული. თუმცა არ გაგვიგია რა დასკვნა დადო ამ კომისიამ. კომისიის წევრები ხიჭაურში ხალხს არ გასაუბრებიან“, – ამბობენ საინიციატივო ჯგუფში.

ადგილობრივებს მიაჩნიათ, რომ ნებისმიერი კონფლიქტისას მთავარეპისკოპოსი სპირიდონი რეალურ მიზეზებს არასოდეს განიხილავს. ის ყოველთვის ერთ განმარტებას იშველიებს – „ადგილობრივები მუსლიმები არიან და რელიგიური ნიშნით ებრძვიან, ამიტომაც ის ყოველთვის ახერხებს თავი გაიმართლოს“.

• შაუხევის ყოფილი გამგებელი გავლენის მასშტაბებზე

ომარ მეგრელიძე – შუახევის ყოფილი გამგებელი ერთ-ერთია მათ შორის, რომელიც მიიჩნევს, რომ ეპისკოპოს სპირიდონთან დაკავშირებით ღიად საუბარი მას პრობლემებს არ შეუქმნის. ამ ორი ადამიანის გზები შუახევის მუნიციპალიტეტში არაერთხელ გადაკვეთილა:

„საეკლესიო პირებს იმ ხელისუფლებაშიც ჰქონდათ და ამ ხელისუფლებაშიც აქვთ დიდი გავლენები. მეუფე სპირიდონის შემთხვევაში კი, სიტუაცია ყველაზე უფრო მაშინ დაიძაბა, როდესაც სხალთის მთავარეპისკოპოსმა პრობლემები შეუქმნა საპატრიარქოსთვის გადაცემულ შენობებში მცხოვრებ ოჯახებს.

მივხვდი, რომ მეუფე უკან არ დაიხევდა. წავედი მასთან შესახვედრად და პირდაპირ ვუთხარი, რომ ბინები, რომლებშიც ცხოვრობენ, ამ ოჯახებს უნდა დაუკანონდეს.

მეუფე გაოცდა, გაგიჟდა, გადაირია. გადმოაღებინა რაღაც წიგნი და წამიკითხა ციტატა, რომ ეკლესიაზე გადაცემული ქონების სხვაზე გადაცემის უფლება არ აქვს პატრიარქსაც კი და ვინც ამას გააკეთებს, დაიწყევლება უკუნითი უკუნისამდე. მაგრამ ბოლოს მაინც თქვა, რომ ამ ხალხს არ გაყრის ქუჩაში და იცხოვრონ, სანამ არ მოიძიებენ ახალ საცხოვრებელ ადგილებს. საუბარი იყო 108 ოჯახზე.

მეუფეს ყველაფერზე შეუძლია გაბრაზება. მახსოვს, ეზოში შეშის დაყრის გამო დაურეკა მაშინდელ პროკურორ კლდიაშვილს, პოლიციას, უშიშროების სამსახურს და დამირეკა მეც, რომ მისი კურთხევის გარეშე შეშა შეიტანეს ეზოში. მერე გამივრცელეს ხმები, რომ შუახევის გამგებელი ზემო აჭარაში ქრისტიანობას ებრძვისო. მაშინ ძალიან გამიჭირდა მთავრობის დარწმუნება – მირეკავდნენ, მეუფესთან ითანამშრომლე, კარგი კაცია და ასე შემდეგ. ერთადერთი, ვინც მაშინ მხარი დამიჭირა, უმაღლესი საბჭოს წევრი, მიშა მჟავანაძე იყო.

სანამ ხიჭაურში დამკვიდრდებოდა, ყველას ეფერებოდა, ბავშვებთან კანფეტები მოჰქონდა. როგორც კი ყველაფერი მიიღო, შექმნა უზარმაზარი კედელი. თანამედროვე სამყაროში რა საჭირო ქვის უზარმაზარი კედელი? – კედელს რომ აკეთებდა, ზედამხედველობას გავაჩერებინე, რადგან მაგ ადგილას გზის გაფართოება იგეგმებოდა, მაგრამ დამირეკეს უშიშროების მინისტრის მოადგილეებმა, სოსო თოფურიძემ (კუდ-ის ყოფილი მაღალჩინოსანი), – ვინ არ მირეკავდა, მეუფეს როგორ ეწინააღმდეგებიო.

200-200 ათას ლარს რიცხავდა საქართველოს პრეზიდენტის ადმინისტრაცია შუახევის გამგეობის ანგარიშზე ხიჭაურის უნივერსიტეტის მშენებლობისთვის. წესით, უნდა ჩაგვეტარებინა ტენდერი, მაგრამ ამ გადმორიცხულ ფულს მოყვებოდა ათასი ზარი, რომ პირდაპირ გადაურიცხეთო. ამ თანხას ვრიცხავდით მეუფის რაღაც ანგარიშზე, რისი უფლებაც არ გვქონდა. რას ხარჯავდა, როგორ ხარჯავდა არავინ იცის“.

მთავარეპისკოპოს სპირიდონს „ბათუმელები“ რამდენიმე მცდელობის მიუხედავად ვერ დაუკავშირდა.

• უნივერსიტეტი და გიმნაზია

გარდა იმისა, რომ ყოფილი სამხედრო ნაწილის არსებობის კვალი ისევ ეტყობა და მისი რექტორი სასულიერო პირია, რომელიც ყოველ კვირას ამავე უნივერსიტეტის ეზოში, ეკლესიაში წირვას ატარებს, ხიჭაურის უნივერსიტეტი სხვა უნივერსიტეტებისგან იმითაც განსხვავდება, რომ აქ სტუდენტებს უფასოდ კვებავენ, უნივერსიტეტს კი გარესამყაროსგან ბეტონის გალავანი იცავს, რომლის შესასვლელთან დაცვა დგას.

აქ ამბობენ, რომ უნივერსიტეტში ხელფასის გაცემის წესიც განსხვავებულია – ხიჭაურის უნივერსიტეტისა და სასულიერო გიმნაზიის ლექტორები, ასევე ადმინისტრაციული პერსონალი ხელფასს თვეობით ვერ იღებს, ხელფასებს ახლაც საახალწლოდ ელოდებიან. ამის მიუხედავად, აქ დასაქმებულები მაინც კმაყოფილები არიან, რადგან როცა იღებენ, დანაკლისის გარეშე ერიცხებათ თანხა. ამ ინფორმაციას ისინიც კი ადასტურებენ, რომლებიც მთავარეპისკოპოსს დიდად ემადლიერებიან. თუმცა ღიად საუბარი, თუნდაც მადლიერების გამოხატვა, არც მათ ისურვეს.

ის, რომ „უნივერსიტეტის საქმე არც ისე კარგად მიდის“, ადგილობრივებზე ისევე უარყოფითად აისახა, როგორც 2008 წელს უნივერსიტეტის გახსნა – დადებითად. გარდა იმისა, რომ სტუდენტებზე ოთახები გააქირავეს, უნივერსიტეტის გახსნის შემდეგ ბევრი ადგილობრივი ხიჭაურის უნივერსიტეტში, ბევრიც გიმნაზიაში დასაქმდა. ამბობენ, რომ უპირატესობა მათ მიანიჭეს, ვინც მოინათლა. ახლა გასაქირავებლად გამზადებული ბინები ცარიელია.

• მთავარეპისკოპოსი სპირიდონი „იუთუბში“

მთავარეპისკოპოს სპირიდონის მარდამჭერთა ჯგუფი სოციალურ ქსელ „ფეისბუქში“ მას შემდეგ გამოჩნდა, რაც აჭარიდან პატრიარქთან ჩავიდნენ მთავარეპისკოპოსზე სასაუბროდ. ამ გვერდზე ხშირად წერენ მთავარეპისკოპოს სპირიდონის საქმიანობის შესახებ. აქვე აზიარებენ მის ქადაგებებსაც, რომლებსაც ჯერ „იუთუბის“ არხზე ტვირთავენ.

ქადაგებისას მთავარეპისკოპოსი სასტიკად აკრიტიკებს მათ, ვინც არ მოსწონს, ბოლოს მისი კრიტიკის ობიექტი გახდა თბილისის ახალარჩეული მერი კახა კალაძე. მთავარეპისკოპოსმა კალაძე ფეხბურთელ გურამ კაშიას მხარდამჭერი განცხადების გამო გააკრიტიკა.

მთავარეპისკოპოსმა სპირიდონმა ერთ-ერთი წირვის დროს გენდერული თანასწორობა ასე განმარტა: „გენდერი იცით რა არის? – გენდერი არის უსქესო არსება. ისინი ამბობენ, რომ ადამიანი არის გენდერი, ანუ უსქესო არსება. და რომ გაიზრდება, სრულწლოვანი, რომ გახდება თვითონ აირჩევს, რომელი სქესის იქნება“.

მთავარეპისკოპოსის აზრით, სატანურია კანონი დისკრიმინაციის შესახებ, მედია კი „ეშმაკის საყვირია“.

სხალთის მთავარეპისკოპოსისთვის დასავლეთი მტერია, რუსეთი კი – მეგობარი, რადგან ამერიკა და ევროპა „გათახსირებით“ გვებრძვის. მიუხედვად მისი ასეთი მოსაზრებისა, სოციალურ ქსელში გამოქვეყნებული ფოტოების მიხედვით, ევროპაში ხშირად მოგზაურობს სხალთის ეპისკოპოსის შვილი ელისაბედ აბულაძე, ის საპატრიარქოს ტელევიზიაში წამყვანად მუშაობს.

• გზა მთავარეპისკოპოსობამდე

მთავარეპისკოპოს სპირიდონის საერო სახელი და გვარი გოჩა აბულაძეა, დაიბადა 1950 წლის 14 ივნისს ზესტაფონში. 1967-1972 წლებში სწავლობდა თბილისის სახელმწიფო უნივერსიტეტის კიბერნეტიკის ფაკულტეტზე, ხოლო 1972-1976 წლებში – უნივერსიტეტის ასპირანტურაში კიბერნეტიკის სპეციალობით. 1975 წლიდან მუშაობდა მეცნიერ-მუშაკად თბილისის სახელმწიფო უნივერსიტეტის სხვადასხვა კათედრაზე, 1976 წლიდან – საქართველოს პოლიტექნიკური ინსტიტუტის მართვის ავტომატიზებული სისტემების კათედრაზე. 1978-1979 წლებში გოჩა აბულაძე ქირურგიის ინსტიტუტის, ხოლო 1979 წლიდან სახალხო მეურნეობის მართვის კვალიფიკაციის ამაღლების ინსტიტუტის უფროსი მეცნიერ-მუშაკი იყო. საპატრიარქოს ინფორმაციით, აქ იგი ლექციებს უკითხავდა საქართველოს მთავრობის კაბინეტის თანამშრომლებს მართვის სისტემების მიმართულებით.

1990 წლის 21 სექტემბერს მიტროპოლიტმა კონსტანტინემ (მელიქიძე), ბათუმის ღვთისმშობლის შობის საკათედრო ტაძარში გოჩა აბულაძე აკურთხა დიაკვნად და სახელად უწოდა გრიგოლი. იგი განწესებულ იქნა ბათუმის საკათედრო ტაძარში. 1990 წლის 4 დეკემბერს მიტროპოლიტმა კონსტანტინემ დიაკონი გრიგოლი ჯიხეთის მონასტერში მღვდლად აკურთხა და სხალთის მონასტრის წინამძღვრად დაადგინა. 1991 წლის დასაწყისში ხულოში გაიხსნა სასულიერო სასწავლებელი, რომლის ხელმძღვანელობა პატრიარქ ილია II-ის ლოცვა-კურთხევით დაევალა მამა გრიგოლ აბულაძეს. 2006 წელს ის ეპისკოპოსად, 2013 წელს კი მთავარეპისკოპოსად აკურთხეს.