დღეს, 22 იანვარს, გამართულ ბრიფინგზე „ნაციონალური მოძრაობის“ წარმომადგენლებმა აჭარის კონსტიტუციაში დაგეგმილ ცვლილებებზე ისაუბრეს. მათი განცხადებით, ამ ცვლილებებით აჭარის კონსტიტუცია კიდევ უფრო დასუსტებულია, ცვლილებების განხილვა კი – ფორმალური.
„რეალურად, აჭარის უფლებამოსილებები დასუსტდა. კერძოდ, მანამდე მოქმედ აჭარის სტატუსის შესახებ კონსტიტუციურ კანონში ეწერა, რომ განათლება, სოფლის მეურნეობა, სპორტი, კულტურა, კულტურული მემკვიდრეობა – მიეკუთვნებოდა აჭარის გამგებლობას, ხოლო ახალი, უკვე მოქმედი კონსტიტუციური კანონით ამ უფლებამოსილების განხორციელება შესაძლებელია მას შემდგომ, თუ ეს უფლებები დელეგირებული იქნება კანონებით.
თუკი აქამდე ეს უფლებები იყო გარანტირებული კონსტიტუციით, დღეს ამ უფლებამოსილების განხორციელება დამოკიდებულია „ქართული ოცნების“ ხელისუფლებაზე და პარლამენტის უმრავლესობაზე,“-აცხადებს გია აბულაძე.
„ნაციონალური მოძრაობის“ წევრების განცხადებით, კონსტიტუციური კანონი უნდა მიღებულიყო ფართო კონსესუსის საფუძველზე.
„ცვლილებები შეეხება საარჩევნო სისტემასაც. „ქართული ოცნება“ სანამ ხელისუფლებაში მოვიდოდა, აცხადებდა, რომ მაჟორიტარული სისტემა იყო არასწორი და რეალურად, ეს სისტემა მართლაც არასწორია, რადგან ბოლო კვლევებმაც აჩვენა, რომ მოსახლეობის დიდი ნაწილი ვერ იცნობს თავისი უბნის მაჟორიტარს. ამიტომ, ჩვენ ვითხოვდით, რომ მაჟორიტარული სისტემა აღარ ყოფილიყო, თუმცა არც ეს იქნა გათვალისწინებული,“-აცხადებს გია აბულაძე.
ბრიფინგზე ენმ-ს წარმომადგენლებმა განაცხადეს, რომ რეალურად აჭარის კონსტიტუციის განხილვა ფორმალურად ხდება. „სხვა პარტიების წარმოდგენით კი, ხელისუფლებას სურს აჩვენოს, რომ თითქოს ეს არის დემოკრატიული პროცესი. მათ არ აქვთ სურვილი, ისაუბრონ რეალურ ცვლილებებზე, შესაბამისად ამ ფორმალურ განხილვებში ჩვენ მონაწილეობას არ მივიღებთ.“
ენმ-ს წევრების თქმით, მათ შეიმუშავეს რეკომენდაციები, რომლებიც საარჩევნო სისტემის რეალურ ცვლილებებს შეეხება და მათ მოსახლეობას გააცნობენ.
