„თუ დადგინდება, რომ ეს ჩანაწერები ნამდვილია, მაშინ კანონის დარღვევასთან გვაქვს საქმე, კონკრეტულად ადმინისტრაციული რესურსის გამოყენებასთან,“ – მიიჩნევს ანნა მდინარაძე, „ახალგაზრდა იურისტთა ასოციაციის“ აჭარის ფილიალის ხელმძღვანელი. ბათუმში სამი საბავშვო ბაღის დირექტორთან ფარული სატელეფონო ჩანაწერი „ნაციონალურმა მოძრაობამ“ დღეს, 24 ოქტომბერს, გამოაქვეყნა. ჩანაწერების მიხედვით, ბაღების დირექტორები „ოცნების“ მხარდამჭერებს აგროვებენ.
ანნა მდინარაძის განმარტებით, თუკი ჩანაწერი ავთენტურია, ირღვევა საარჩევნო კოდექსის 49-ე მუხლი, რომლის მიხედვითაც „წინასაარჩევნო აგიტაციაში მონაწილეობის პერიოდში სამსახურებრივად დაქვემდებარებული ან სხვაგვარად დაქვემდებარებული პირის ჩაბმა საქმიანობაში, რომელიც ხელს უწყობს კანდიდატის წარდგენას, ან არჩევას, არის აკრძალული“. თუკი დარღვევა დადგინდება, საბავშვო ბაღების დირექტორებს 2-2 ათასი ლარით დააჯარიმებენ.
ვინ უნდა მოახდინოს რეაგირება ადმინისტრაციული რესურსის გამოყენებაზე?
„სამართალდარღვევის ოქმი უნდა შეადგინოს საოლქო კომისიამ, ხოლო შემდეგ ოქმის კანონიერებას ადგენს სასამართლო. ავთენტურობას რაც შეეხება, ჩანაწერს ექსპერტიზა უნდა ჩაუტაროს იმ მხარემ, რომელიც სადავოდ მიიჩნევს მის ნამდვილობას,“ – გვითხრა ანნა მდინარაძემ.
„თუკი საჩივარი შემოვა, განვიხილავთ,“ – ამბობს ბათუმის საოლქო კომისიის თავმჯდომარე, ციალა შავაძე.
რატომ სჭირდება საჩივარი უკვე გახმაურებულ შემთხვევას? – ციალა შავაძემ გვიპასუხა, რომ მოკვლევის პროცესშია და ჯერ არ იცის, რა გადაწყვეტილებას მიიღებს კომისია.
„ნაციონალური მოძრაობა“ საჩივრის შეტანას ბათუმის საოლქო კომისიაში დღის ბოლომდე აპირებს.
საბავშვო ბაღების დირექტორების ჩაწერაზე კომენტარი ამ დრომდე არ გაუკეთებია ბათუმის მერიას, რომლის დაქვემდებარებაშიცაა საბავშვო ბაღების გაერთიანება. საია-ში განმარტავენ, რომ მერიამ დისციპლინური სამართალწარმოება უნდა დაიწყოს.
