ბათუმში ატრაქციონებს და ატრაქციონთან მისასვლელ გზას ითხოვენ

ბათუმში, გოგებაშვილის ქუჩაზე, უკვე რამდენიმე თვეა ბათუმის მერიის მიერ განთავსებულ ატრაქციონს კერძო კომპანიამ რკინის ღობე შემოავლო და ბავშვებს ამ ატრაქციონებით სარგებლობა არ შეუძლიათ. ამის შესახებ მოქალაქემ საკრებულოს ღია კარის სხდომაზე ისაუბრა და საკრებულოს ამ საკითხის მოსაგვარებლად მერიასთან შუამდგომლობა სთხოვა:

„ან იქ შეუშვან ბავშვები, ან ახალი ატრაქციონები დაგვიდგან.“

კათოლიკური ეკლესიის მიმდებარედ გამწვანებული ტერიტორია კერძო კომპანიამ შემოღობა. 2018 წლის იანვარში ბათუმის მერიაში განმარტეს, რომ ტერიტორია კომპანიამ უნებართვოდ შემოღობა და მერიამ უკვე გააფრთხილა კომპანია ღობის მოშლასთან დაკავშირებით:

„მერია მიიჩნევს, რომ ეს არის საზოგადოებრივი სივრცე და შესაბამისად, იქ განთავსებული ატრაქციონების გადატანა არ იგეგმება, დარჩება ადგილზე და როგორც სარგებლობდა ირგვლივ მცხოვრები მოსახლეობა და ბავშვები ამ ატრაქციონებით, ისევ ისე ისარგებლებენ,“ – ამბობდნენ მერიაში. თუმცა ასე არ მოხდა. ტერიტორია დღემდე შემოღობილია და იქ განთავსებული ატრაქციონებით ბავშვები ვერ სარგებლობენ.

შემოღობილი ატრაქციონი გოგებაშვილის ქუჩაზე

ბათუმის მერიაში ადასტურებდნენ იმასაც, რომ ტერიტორია კერძო კომპანიის საკუთრებაა. რატომ განათავსეს მაშინ თავის დროზე ატრაქციონები კერძო კომპანიის საკუთრებაში არსებულ ტერიტორიაზე? – ამ კითხვაზე პასუხი მერიას არც მაშინ ჰქონდა და არც ახლა აქვს.

ბათუმის საქალაქო ინფრასტრუქტურისა და კეთილმოწყობის სამმართველოს უფროსის სულხან ევგენიძის თქმით, ეს ატრაქციონი მწყობრიდანაა გამოსული და ბავშვებისთვის „ისედაც უსარგებლოა“. კომპანიის მეპატრონე კი მზადაა ბავშვებს ახალი ატრაქციონი დაუდგას სხვა ადგილზე:

„ბაქოს 74-ში არის სტადიონი, რომელიც ბათუმის მერიის ბალანსზეა, მიმდებარე ტერიტორია კი გაუფორმებელია. ამ ადგილზე ვაპირებთ არამხოლოდ ატრაქციონის, სკვერის გაკეთებასაც, რასაც ასვე ითხოვს მოსახლეობა. ასევე გვინდა ეს სკვერი შემოვღობოთ, რომ ბავშვებისთვის უსაფრთხო იყოს.“

ატრაქციონების ნაკლებობაზე სხვა უბნებშიც ჩივიან. ბათუმის საკრებულოს ღია კარის სხდომაზე დამსწრე მოქალაქეების უმრავლესობამ სხვა პრობლემებთან ერთად ერთ-ერთ მთავარ საკითხად დღის წესრიგში ატრაქციონების დამატებისა და ძველის ახლით შეცვლის საკითხი დააყენა. რამდენიმე უბნის წარმომადგენლებმა ისაუბრეს იმაზე, რომ ბავშვები ატრაქციონებზე სათამაშოდ სხვა ეზოებში მიდიან, რა დროსაც ხშირად მარტო გადაადგილდებიან, რაც მათთვის უსაფრთხო არ არის. რამდენიმე უბნის წარმომადგენლებმა კი  მერიას მიმართეს და დაზიანებული ატრაქციონების გამოცვლა სთხოვეს.

სულხან ევგენიძის თქმით, მერია მომავალ წელს რამდენიმე ათეული ახალი ატრაქციონის განთავსებას, ხოლო რამდენიმეს გამოცვლას გეგმავს, თუმცა ციფრები ჯერ დაზუსტებული არ არის. ახალი ატრაქციონებისთვის თანხას მერია მომავალი წლის ბიუჯეტში გაითვალისწინებს.

ამ თემაზე:

მერიამ შპს საკუთრების შემოღობვისთვის დააჯარიმა – კომპანიის საჩივარი

ნეტგაზეთის მასალების სხვა გამოცემებში გადაბეჭდვის წესი
ავტორი