2018 წლის 23-24 ოქტომბერს საზღვაო ტრანსპორტის სააგენტოში, შავი და კასპიის ზღვის პროექტის ფარგლებში, საზღვაო ნაოსნობაში შრომის შესახებ კონვენციის (MLC 2006) ტრენინგი ჩატარდა.
ტრენინგი, რომელსაც საზღვაო ტრანსპორტის სააგენტოს თანამშროლები და მეზღვაურთა პროფკავშირების წარმომადგენლები ესწრებოდნენ, ჩაატარეს ევროპის საზღვაო უსაფრთხოების სააგენტოს ექსპერტებმა. ტრენინგზე განხილულ იქნა საზღვაო ნაოსნობაში შრომის შესახებ კონვენცია, როგორც მეზღვაურთა უფლებების დაცვის ინსტრუმენტი.
ტრენინგს ესწრებოდნენ საზღვაო ტრანსპორტის სააგენტოს თანამშროლები და მეზღვაურთა პროფკავშირების წარმომადგენლები
კერძოდ: კონვენციის სტრუქტურა, მინიმალური მოთხოვნები მეზღვაურებისთვის, მეზღვაურთა დასაქმების პირობები, კვება, ჯანმრთელობის დაცვა, სამედიცინო დახმარება, სოციალური დაცვა და MLC 2006 კონვენციის შესაბამისად ინსპექტირებასთან დაკავშირებული ყველა საკითხი.
„MLC 2006 კონვენცია მიღებულ იქნა 2006 წლის თებერვალში, 94-ე შრომის საერთაშორისო კონფერენციის მიერ მე-10 საზღვაო სესიაზე. ამ კონვენციით გადასინჯული და კონსოლიდირებულია 37 არსებული კონვენცია და მათთან დაკავშირებული რეკომენდაციები.
ეს კონვენცია თავს უყრის საზღვაო სანაოსნოში შრომის შესახებ არსებულ თითქმის ყველა ნორმატიულ დოკუმენტს ერთი ახალი კონვენციის სახით, რომელიც შედგენილია ახალი ფორმატით და, საჭიროებისამებრ, მოიცავს ცალკეულ განახლებებს თანამედროვე რეალიების ასახვისა და დებულებების თანამედროვე ენით ჩამოყალიბებისათვის. იგი მსოფლიოს 1.2 მლნ-ზე მეტ მეზღვაურს უზრუნველყოფს ფართო უფლებებითა და სამუშაო ადგილზე დაცვის გარანტიებით.“
