სოციალური შემწეობის შეწყვეტის გამო ბათუმში მცხოვრებმა ნანა მგელაძემ სოციალური მომსახურების სააგენტოს სასამართლოში უჩივლა. საქმეს მოსამართლე ჯუმბერ ბეჟანიძე განიხილავს.
დღევანდელ პროცესზე მოქალაქე არ გამოცხადდა – ნანა მგელაძემ მოსამართლეს წერილი გამოუგზავნა და აცნობა, რომ თავის ადვოკატს ვეღარ უკავშირდება. „ვერ ვუკავშირდები, არაა ბათუმში და მოვითხოვ საქმის გადადებას“, – ამოიკითხა მოსამართლემ წერილიდან და დასძინა, რომ ეს დასაბუთება არ არის.
სოციალური მომსახურების სააგენტოს იურისტმა, გულო დილავერიძემ მოსარჩელის გარეშე პროცესის გაგრძელება მოითხოვა. „არაერთი საჩივრით მოგვმართა, მას დამოუკიდებელად შეეძლო თავის დაცვა, საჩივრები თავად დაწერა და ადვოკატი ბოლო ეტაპზე აიყვანა“, – უთხრა მან მოსამართლეს.
სოციალური მომსახურების სააგენტოს იურისტის ინფორმაციით, ნანა მგელაძეს მას შემდეგ შეუწყვიტეს სოციალური დახმარება, როცა მისი ძმა ბოტანიკურ ბაღში დასაქმდა, ხოლო ოჯახმა ამის შესახებ სოცმუშაკებს არ შეატყობინა.
„ბოლო შემოწმებით ამ ოჯახს შემოსავლები გაეზარდა, 90 ათასი ქულა ჰქონდა,“ – ამბობს გულო დილავერიძე.
„შეიძლება თქვენ მოწყენილი გაქვთ კიდეც, მაგრამ მიზანშეწონილად მიგვაჩნია გადადება… მერე საქმე რომ წააგოს, იტყვის, მოსამართლემაც არ მომისმინაო,“ – მიმართა სააგენტოს იურისტს მოსამართლემ და სხდომის გადადების შესახებ გადაწყვეტილება გამოაცხადა.
