ბათუმის დრამატული თეატრის რეაბილიტაცია დასასრულს უახლოვდა. შეცვლილია თეატრის მთავარი სცენის ინტერიერი, რესტავრაცია ჩაუტარდა სკამებს, შეიცვალა იატაკი და გათბობის სისტემა. შენობა მთლიანად ადაპტირებულია შეზღუდული შესაძლებლობის მქონე პირებისთვის. თეთრის ნაცვლად ღია ნაცრისფერით შეცვლილია იარუსების ფერიც.
“გადაიღება ეს [იარუსები] და დავიდა საპროექტო ფერზე. ის თეთრი ფერი იყო ისეთი [ბრჭყვიალა] და ის არ შეესაბამებოდა თეატრს. არეკვლა ხდებოდა ფერის. ბრჭყვიალა საღებავი არ შეიძლება. შუქის არეკვლა ხდებოდა და მიუღებელი იყო,” – უთხრა “ბათუმელებს” ბათუმის დრამატული თეატრის დირექტორმა, ოთარ კალანდაძემ.

საორკესტრო ორმოს ხარჯზე გაზრდილია ავანსცენა. როგორც ბათუმის დრამატული თეატრის დირექტორი ამბობს, სცენა იხსნება და საჭიროების შემთხვევაში შესაძლებელია საორკესტრო ორმოს გამოყენება.
თეატრის რეაბილიტაცია ფონდმა “ქართუმ” 2015 წელს დაიწყო. წინასწარი ინფორმაციით, მისი გახსნა დეკემბრის ბოლოს იგეგმება.















