მთავარი,სიახლეები

„სტადიონის“ დირექტორი უმაღლესი საბჭოს თავმჯდომარის კაბინეტის უფროსი გახდა

19.10.2018 • 6152
„სტადიონის“ დირექტორი უმაღლესი საბჭოს თავმჯდომარის კაბინეტის უფროსი გახდა

შპს „სტადიონის“ ყოფილი დირექტორი, ზურაბ ჭურკვეიძე, აჭარის უმაღლესი საბჭოს თავმჯდომარის, დავით გაბაიძის კაბინეტის უფროსად დაინიშნა.

„შემოთავაზება მქონდა ბატონ დავითისგან… ეს ჩემთვის ახალი გამოწვევა იყო და აქედან გამომდინარე მივიღე გადაწყვეტილება“, – გვითხრა ზურაბ ჭურკვეიძემ.

ზურაბ ჭურკვეიძე შპს „სტადიონის“ დირექტორად მიმდინარე წლის მაისში დაინიშნა. მანამდე ის შპს „Goderdzi Resorts“-ის დირექტორად მუშაობდა.

შპს „სტადიონის “დირექტორად ამჯერადაც კურორტ გოდერძის დირექტორი დანიშნეს – მალხაზ მახარაძე.

აჭარის ფინანსთა და ეკონომიკის სამინისტროს პრესსამსახურის ინფორმაციით, ამ ეტაპზე მალხაზ მახარაძე ორივე კომპანიის დირექტორია – „სტადიონისა“ და „Goderdzi Resorts“-ის.

ამ ორივე კომპანიაში 100% წილს აჭარის ავტონომიური რესპუბლიკა ფლობს, შესაბამისად, ხელმძღვანელებსაც აჭარის მთავრობა ნიშნავს და ათავისუფლებს.

ზურაბ ჭურკვეიძემდე აჭარის უმაღლესი საბჭოს თავმჯდომარის, დავით გაბაიძის კაბინეტს ზაურ ახვლედიანი ხელმძღვანელობდა. ზაურ ახვლედიანი 2018 წლის 21 აგვისტოდან აჭარის კულტურული მემკვიდრეობის სააგენტოს ხელმძღვანელად გადაიყვანეს.

 

გადაბეჭდვის წესი


ასევე: