Batumelebi

2019 წლიდან აჭარის ჯანდაცვის სამინისტროს ავთვისებიანი სიმსივნით დაავადებულ პაციენტთა სამედიცინო მომსახურების პროგრამაში ცვლილებები შედის. მართალია, ჯერჯერობით პროგრამის ბიუჯეტი არ იცვლება და კვლავ 2 მილიონი ლარია, მაგრამ იზრდება მედიკამენტების დაფინანსების წლიური ლიმიტი. პროგრამაში ცვლილებების შესახებ „ბათუმელები“ აჭარის ჯანდაცვის სამინისტროს ჯანმრთელობის დაცვის დეპარტამენტის უფროსს, მანანა ფაღავას ესაუბრა.

• ქალბატონო მანანა, კონკრეტულად რა შეიცვლება 2019 წლიდან ამ პროგრამაში?  

არ აქვს მნიშვნელობა. ბენეფიციარს საქართველოს ტერიტორიაზე აკრედიტებულ ნებისმიერ სამკურნალო დაწესებულებაში შეუძლია მკურნალობა, ეს პაციენტის ნებაა. ძირითადად მაინც ირჩევენ ბათუმს.

• ბოლო წლებში პაციენტები თურქეთში არჩევს მკურნალობას. ასეთ შემთხვევაში პაციენტი შეძლებს გახდეს პროგრამით მოსარგებლე?

ამ პროგრამით ვერ ისარგებლებს. არის სხვა, პაციენტთა საზღვარგარეთ  მკურნალობის თანადაფინანსების პროგრამა და იმ პროგრამაში თუ მოხვდება, მაშინ შესაძლებელია. იმ პროგრამას თავისი პირობები აქვს. საზღვარგარეთ მკურნალობის თანადაფინანსების პროგრამას ჰყავს ექსპერტები, რომლებიც შეისწავლიან შემთხვევას და თუ კი ის სამედიცინო მომსახურება, რაც ესაჭიროება პაციენტს, საქართველოს ტერიტორიაზე არ ტარდება, მაშინ საქართველოს ჯანდაცვის სამინისტრო მას უფინანსებს ნაწილს, დარჩენილს ვაფინანსებთ ჩვენ, აქამდე იყო ეს თანხა 15 ათასი ლარის ფარგლებში, მომავალ წელს კი იქნება 25 ათასი ლარის ფარგლებში.

საბერძნეთის ორი მოქალაქე პარლამენტის წინააღმდეგ საკონსტიტუციო სასამართლოში დავობს – მათ საქართველოში მიწის დარეგისტრირებაზე უარი უთხრეს. პროკოპი სავვიდი და დიანა შამანიდი საქართველოში გაიზარდნენ, თუმცა საბერძნეთის მოქალაქეობის მიღების შემდეგ მათ საქართველოს მოქალაქეობა დაკარგეს. ორივე მათგანი მშობლებისგან მემკვიდრეობით მიღებული სასოფლო-სამეურნეო მიწების საკუთრებად აღიარებას ითხოვს.

დავის საგანი პარლამენტის მიერ მიღებული კანონის – „სასოფლო-სამეურნეო დანიშნულების მიწის საკუთრების შესახებ“ 22-ე მუხლი გახდა, რომლის მიხედვითაც, ვიდრე საქართველოს ახალი პრეზიდენტი ფიცს არ დადებს და კონსტიტუციის ახალი რედაქცია ძალაში არ შევა, უცხოელებს სასოფლო-სამეურნეო მიწის საკუთრების უფლება შეჩერებული აქვთ.

კონსტიტუციის ახალი რედაქციის მიხედვით კი, უცხო ქვეყნის მოქალაქეები არ არიან ჩამონათვალში, ვინც შეიძლება საქართველოში მიწის მესაკუთრე გახდეს. კონსტიტუციით გათვალისწინებულია გამონაკლისი, რაც ახალი რედაქციის ამოქმედების შემდეგ ორგანული კანონით უნდა მოწესრიგდეს.

დასაქმება ყოფილი პატიმრებისთვის დიდი პრობლემაა, რასაც ბევრი რამ განაპირობებს: ბევრგან ინგლისური ენის ცოდნაა საჭირო, ელემენტარულ დონეზე მაინც და ხშირად ეს ამ ჯგუფისთვის დაბრკოლებას ქმნის.

„ყოფილი პატიმრების გაძლიერების პროექტის“ ფარგლებში „დემოკრატიის ინსტიტუტმა“ ყოფილ პატიმრებს, პრობაციონერებსა და პატიმართა ოჯახის წევრებს საშუალება მისცა, ინგლისური ენის შესწავლა დაეწყოთ და მათ ენის საბაზისო კურსები შესთავაზა.

პროგრამის ბენეფიციარები ახლა ენის სამთვიან კურსს გადიან. კურსი მოიცავს ენის, როგორც თეორიულ, ასევე, პრაქტიკულ სწავლებას.

გ. თ. ერთ-ერთი ყოფილი პატიმარია, რომელიც ამ კურსს გადის. ის სხვადასხვა დიზაინის ვებგვერდს ამზადებს და ინგლისური ენის შესწავლას მისთვის დიდი მნიშვნელობა აქვს. გ.თ. ინტერნეტტექნოლოგიებითაა გატაცებული და უკვე რამდენიმე კომპანიას დაუმზადა ვებგვერდი.

როგორც გ.თ. ამბობს, ვებგვერდების დამზადება საქართველოში მაღალანაზღაურებადი საქმე არ არის, ამიტომ  გეგმავს სერვისი უცხოურ კომპანიებს შესთავაზოს, რომლებიც უკეთ გადაუხდიან. ამისთვის კი მას ინგლისური ენის კარგი ცოდნა სჭირდება.

ინგლისურ ენას ბენეფიციარებს დალილა მხატვარი ასწავლის, პროცესში აქტიურადაა ჩართული მშვიდობის კორპუსის მოხალისე ლეიშა სომერსი, ასე ბენეფიციარებს საშუალება აქვთ, ინგლისურენოვან მოხალისესთან ერთად გაიარონ ენის პრაქტიკული კურსი.

კლუბში სხვადასხვა ასაკის მსმენელი სწავლობს ინგლისურს.

პროექტი ევროკავშირის მხარდაჭერით დასავლეთ საქართველოს ოთხ რეგიონში ხორციელდება. რესოციალიზაციის პროექტს ახორციელებენ: „დემოკრატიის ინსტიტუტი“, „გურიის ახალგაზრდული რესურსცენტრი“, „თანაზიარი“ და ფონდი „აფხაზინტერკონტი“.

პროექტის ფინანსური მხარდამჭერი ევროკავშირია.

„ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“ მიზნად ისახავს:

• ყოფილ პატიმართა ჯანმრთელობის მდგომარეობის გაუმჯობესების ხელშეწყობას; 
  • იურიდიულ დახმარებას;
• ბენეფიციართა გადამისამართებას შესაბამისი პროფილის სამედიცინო დაწესებულებაში;
  • ბენეფიციართა დახმარებას (ადვოკატირებას), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით.
• ყოფილი პატიმრების, პრობაციონერებისა და მათი ოჯახის წევრების მცირე სამეწარმეო ინიციატივების წახალისებას.
• სამიზნე ჯგუფების დასაქმების ხელშეწყობას.

ზემოთ ჩამოთვლილი სერვისებით სარგებლობა შეუძლიათ ყოფილ პატიმრებს, პატიმართა ოჯახის წევრებს და პრობაციონერებს. ამისთვის მათ უნდა მიმართონ:

აჭარაში – დემოკრატიის ინსტიტუტს – ქ.ბათუმი ჭავჭავაძის ქ. №107, ტელ: (0422) 27 57 44

იმერეთში – აფხაზინტერკონტს / ქ.ქუთაისი ნინოშვილის ქ. №27, ტელ: (0431) 26 48 61

გურიაში – გურიის ახალგაზრდულ რესურსცენტრს /ოზურგეთი რუსთაველის ქ. №4, ტელ: (0496) 27 41 26

თანაზიარი – რუსთაველის ქ. №88 /ტელ: (0415) 22 10 78

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

საქართველოს რეგიონებში ქალთა უფლებადამცველი ორგანიზაციები არ არიან ისე მრავალფეროვნად წარმოდგენილი, როგორც დედაქალაქში. აჭარაში ორგანიზაცია, რომელიც მხოლოდ ქალთა უფლებების დაცვაზე  იქნებოდა ორიენტირებული, ფაქტობრივად არ არსებობს, თუ არ გავითვალისწინებთ ცალკეულ პროექტებს, რომლებიც სხვადასხვა აქტივობის ფარგლებში ხორციელდება. ქალთა უფლებების დამცველი ორგანიზაციები დედაქალაქში აცხადებენ, რომ არსებობისთვის ყოველდღიურად უწევთ ბრძოლა.

ორგანიზაცია „ქალები საერთო მომავლისთვის (WECF) საქართველო“ წარმომადგენელი იდა ბახტურიძე, რეგიონებში ქალთა ორგანიზაციების ნაკლებობის მიზეზს სწორედ ფინანსურ არასტაბილურობაში ხედავს. მისი თქმით, ქალთა უფლებადამცველი ორგანიზაციების მწირი დაფინანსება არა მარტო ქართული პრობლემაა:

„ზოგადად, ტენდენციაა მსოფლიოში ასეთი და კვლევებიც აჩვენებს, რომ ყველაზე მწირი რესურსები სწორედ ქალთა და ფემინისტურ ორგანიზაციებზეა გამოყოფილი. კიდევ უფრო მწირია ეს რესურსები რეგიონების დონეზე, სწორედ ამიტომ აქვთ სტაბილურობის პრობლემა“.

იდა ბახტურიძის თქმით, სწორედ ეს არის მიზეზი იმის, რომ ქალთა უფლებების დაცვის მიმართულებით, ტექნიკურ ნაწილზე უფრო მეტი რესურსი იხარჯება, ვიდრე იმ სამუშაოზე, რაც ველზე უნდა შესრულდეს.

„გადარჩენის, ფინანსური სტაბილურობის პრობლემა უდგას ცენტრში მყოფ ორგანიზაციებსაც კი. ეს არის ძალიან რთული – როცა ძალადობის მსხვერპლებთან მუშაობ, ამ დროს კი არ იცი, ხვალ გეყოლება თუ არა იურისტი, რომელიც დაიცავს ამ ადამიანების უფლებებს, ან ფსიქოლოგი, რომელიც მათთან იმუშავებს, უკვე პრობლემაა,“ – ამბობს იდა.

იდას აზრით, დღესაც კი, მთელ მსოფლიოში ქალთა უფლებადამცველი ორგანიზაციები არიან ნაკლებად პრიორიტეტულ მდგომარეობაში: „მათ შორის დიდ სახელმწიფოებშიც, დონორებშიც არის ეს დამოკიდებულება, რომ ქალთა ეკონომიკური თუ პოლიტიკური გაძლიერება ან სექსუალური შევიწროების საკითხი ვერ იქნება იმაზე პრიორიტეტული, ვიდრე ვთქვათ, არჩევნები, თავდაცვის თუ სხვა პოლიტიკური საკითხები. შესაბამისად, ფინანსური რესურსებიც ამ პრიორიტეტების მიხედვით ნაწილდება“.

ქალთა ადგილობრივი ორგანიზაციების გაძლიერება მნიშვნელოვანია იმ თვალსაზრისით, რომ ქალების უფლებები ადგილზე რეგიონის, სოფლის დონეზე, უკეთ იყოს გააზრებული და დაცული.

„ოზურგეთელ ან დვაბზუელ ქალს თბილისიდან ვერავინ ვერ გაუკეთებს იმდენს, რამდენსაც ადგილობრივი ქალები გააკეთებენ ერთმანეთისთვის. პირისპირ კომუნიკაცია ძალიან მნიშვნელოვანია, რომ არსებობდეს ნდობა ქალების მხრიდან. უცნობებთან ერთად მძიმე ბრძოლაში ვერ შევლენ ქალები,“ – გვეუბნება იდა.

ის საუბრობს, ასევე, სამოქალაქო აქტივიზმზე, რაზეც ხშირად ამბობენ, რომ ფინანსური რესურსები არ სჭირდება. ამ მოსაზრებას ბახტურიძე ნაწილობრივ ეთანხმება. მისი აზრით, სამოქალაქო აქტივიზმი ღირებულებებიდან გამომდინარე შეიძლება იყოს ძლიერი, თუმცა იმისთვის, რომ ქალთა უფლებრივი მდგომარეობა იყოს უფრო სტაბილური, გაიზარდოს ცნობიერება და ქალთა ეკონომიკური დამოუკიდებლობა გახდეს პრიორიტეტული, აუცილებელია სტაბილური მუშაობა, რომელიც აუცილებლად დაკავშირებულია ფინანსებთან. „ვფიქრობ, რომ იურისტს უნდა გადაუხადო ფული, მით უმეტეს ქალებს, რადგან ადამიანებს მუდმივად ვერ მოვთხოვთ უხელფასოდ შრომას. მათ ისედაც მწირი ანაზღაურების პირობებში უწევთ შრომა. დიდი ემოცია იხარჯება ამ სამუშაოზე, რომელიც ადამიანის უფლებებს ეხება“.

იდას აზრით, ძლიერმა საერთაშორისო ორგანიზაციებმა დაფინანსების დროს უნდა გადახედონ პრიორიტეტებს.

საქართველოში ერთ-ერთი ყველაზე აქტიური ორგანიზაციის – „ქალთა ფონდის“ ხელმძღვანელი ნანა ფანცულაია კი მიიჩნევს, რომ ქალთა უფლებების დამცველი ორგანიზაციები საკმაოდ აქტიურობენ რეგიონებშიც. „რასაც ვერ ვიტყვით აჭარის შემთხვევაში. ამ მხრივ ყოველთვის პასიური იყო და ნაკლებად მოდიოდა ინიციატივები ჩვენამდე, რომ, ვთქვათ, დაგვეფინანსებინა ცალკეული პროექტი,“- გვეუბნება ის.

ნანა ფანცულაიას აზრით, ამას აჭარის, როგორც ტურიზმზე ორიენტირებული რეგიონის პოლიტიკა განაპირობებს. „თუმცა წელს გამოჩნდა ქობულეთში ახალგაზრდული ორგანიზაცია, რომელიც მუშაობს ქალთა საკითხებზე და ჩვენ დავაფინანსეთ. უფრო ადრე, მაღალმთიან აჭარაზეც გვქონდა დაფინანსება გამოყოფილი, ადრეული ქორწინების პრობლემებზე სამუშაოდ. ზოგადად, აჭარის რეგიონი ამ მხრივ პასიურია“.

მისი თქმით, შედარებით აქტიური რეგიონებია: სამცხე-ჯავახეთი, შიდა ქართლი, სამეგრელო და კახეთი. „ამ რეგიონების მიმართ დონორების ყურადღება განაპირობა იმან, რომ უფრო მეტი დევნილი მოსახლეობა ცხოვრობს აქ.“

ნანა ფანცულაიას აზრით, რეგიონებში ოფისების ფუნქციონირების საჭიროება არ არსებობს, რადგან საგრანტო ბიუჯეტი განსაზღვრულია კონკრეტულ აქტივობაზე. „მთავარია, იყოს ამ სამუშაოს შესასრულებლად თანხა“.

როგორც ნანა ფანცულაია ამბობს, „ქალთა ფონდმა“ დონორის დახმარებით კახეთში შეიძინა მიწის ნაკვეთი, სადაც ქალებისთვის გაკეთდება ეკოსახლი. ეს ქალთა ორგანიზაციებს ერთმანეთთან თანამშრომლობის, ახლოს გაცნობისა და ერთად მუშაობის შესაძლებლობებს მისცემს:

„ეს იქნება მწვანე,  პერმაკულტურული შენობა, სადაც შეხვდებიან ადამიანები ერთმანეთს, გავმართავთ კონფერენციებსაც. როცა ვამბობთ, რომ დღეს ნაკლებია სოლიდარობის განცდა, სწორედ ასეთი შეხვედრები დაეხმარება ქალებს, რომ იცნობდნენ ერთმანეთს უფრო ახლოს. მხოლოდ ფეისბუკი არ არის ცხოვრება, საჭიროა უფრო მეტი სივრცე რეალური აქტივიზმისთვის“.

ქალთა უფლებების დაცვაზე ორიენტირებული კიდევ ერთი აქტიური ორგანიზაციის – „პარტნიორობა ადამიანის უფლებებისთვის“ ხელმძღვანელი ანა აბაშიძე მიიჩნევს, რომ აუცილებელია ქალთა უფლებების დამცველი ორგანიზაციები თანაბრად იყვნენ წარმოდგენილი რეგიონებშიც. მისი თქმით, დედაქალაქში მუშაობას თავისი დანიშნულება აქვს, რადგან „ცვლილებების იმპულსს დიდი ქალაქები ქმნიან და ეს კარგ მაგალითს აძლევს რეგიონებს, სოფლებს და ა.შ. მაგრამ ეს პროცესი არ უნდა წარმოვიდგინოთ რეგიონების გარეშე“.

ანას აზრით, რეგიონებში ქალებს უფრო მეტი გამოწვევები აქვთ, ამიტომ უფლებადამცველი ორგანიზაციების არსებობა მნიშვნელოვანია.

ანა, ისევე როგორც სხვა ორგანიზაციის წარმომადგენლები, ხაზს უსვამს იმას, რომ ფინანსური სტაბილურობა არ აქვთ არც ცენტრში მომუშავე ორგანიზაციებს: „გადარჩენისთვის ბრძოლის წინაშე არიან ორგანიზაციები მუდმივად და ზოგიერთი მათგანი გაქრება კიდეც, რაღაც კონკრეტული პროექტის შემდგომ“.

ანას აზრით, რეგიონებში ქალებისთვის ორმაგად რთულია მუშაობა, რადგან უფრო ძლიერია გენდერული სტერეოტიპები და ქალები უფრო მეტ ბარიერს აწყდებიან .

„ჩვენს ორგანიზაციასაც აქვს ფინანსური მდგრადობის პრობლემა, შედარებით მყარად არიან ის ორგანიზაციები, რომლებსაც საერთაშორისო სტატუსი აქვთ. სოციალური ცვლილებები მუდმივად ვერ განხორციელდება დონორი ორგანიზაციების მხარდაჭერით. დონორები იმედოვნებდნენ,  რომ სახელმწიფო აიღებდა გარკვეულ ვალდებულებას და შეწყვიტეს დახმარება. თუმცა, ეს ასე არ მოხდა, რის გამოც მიღწეული ცვლილებებიც კი წყალში ჩაიყარა“.

ანა აბაშიძის აზრით, თვითმმართველობებში არსებული გენდერული საბჭოებიც კი, სწორედ სამოქალაქო აქტივიზმის მხარდაჭერით შეიქმნა, თუმცა მას ფორმალური დატვირთვა  აქვს. მისი აზრით, სახელმწიფოს მხრიდან საჭირო იყო კეთილსინდისიერი, გულწრფელი მუშაობის დაწყება, „თუმცა სახელმწიფო არ არის მოტივირებული იმისთვის, რომ საკუთარ თავზე აიღოს სოციალური ცვლილებები“ – ამბობს ის.

ანას აზრით, სახელმწიფო შესაძლებელია იყოს სოციალური აქტივობების მხარდამჭერი და ამის მაგალითია განვითარებული ქვეყნები, თუმცა ამ ქვეყნებში ხელისუფლება არ ერევა არასამთავრობო ორგანიზაციების საქმიანობაში და მათი თავისუფლების ხარისხი მაღალია – „საქართველოში კი, ხელისუფლებისგან დაფინანსების შემთხვევაში, დაზღვეული არ ხარ, რომ ხელისუფლება შენს საქმიანობაში არ ჩაერევა“.

ანა აბაშიძე მიიჩნევს, რომ ქალთა უფლებების დამცველი ორგანიზაციები უნდა გაძლიერდნენ კერძო ბიზნესის მხარდაჭერით, ისევე როგორც სხვა ბევრ ქვეყანაში.

„ძალიან ბევრი ცნობილი და წარმატებული ორგანიზაცია, თუნდაც ისეთი, როგორიც არის „ამნესტი ინტერნეშენელი“, დგას სწორედ კერძო შემოწირულობებზე. ჩვენ ვხედავთ, როგორია მისი დამოუკიდებლობისა და მუშაობის ხარისხი. სწორედ ასეთ მხარდაჭერაში ვხედავ სამოქალაქო აქტივიზმის განვითარებას და მდგრადობის საფუძველს“.

აჭარაში  ერთ-ერთი ყველაზე ფინანსურად მდგრადი ორგანიზაცია, რომელიც ძალადობის მსხვერპლი ქალების უფლებების დაცვაზე მუშაობას, ახალგაზრდა იურისტთა ასოციაციაა. აჭარის ოფისის ხელმძღვანელის, ანნა მდინარაძის თქმით,  ორგანიზაცია მუშაობს როგორც მსხვერპლი ქალების სამართლებრივ დაცვაზე, ასევე ცნობიერების ამაღლებაზე – კონკრეტული დაფინანსების ფარგლებში.

ანნა მდინარაძის თქმით, კარგი იქნება, თუ ე.წ. გენდერული საბჭოების კომპეტენციები და ნდობა გაიზრდება ქალთა უფლებების დაცვის მხრივაც: „დღეს მნიშვნელოვანია, არა მარტო ქალების სამართლებრივი დაცვა, არამედ მათი ეკონომიკური გაძლიერება, რომ ისინი კვლავ არ მოხვდნენ იმ გარემოში, სადაც მათზე ძალადობდნენ“.

_________________________

მთავარი ფოტო:  აქცია ქალთა შრომითი უფლებების დაცვის მოთხოვნით. ფოტო – ნეტგაზეთი/ქეთი მაჭავარიანი. 08.03.2016

„რა გარანტია გვაქვს მოქალაქეებს, რომ ეს დაგროვებული ფული არ დაიკარგება?“ – იკითხა საპენსიო სააგენტოს მიერ გამართულ შეხვედრაზე ნანა კალანდაძემ, არასამთავრობო ორგანიზაცია „ღირსეული სიბერის“ ხელმძღვანელმა. საპენსიო სააგენტოს ხელმძღვანელი პირები ბათუმის დემოკრატიული ჩართულობის ცენტრში მესამე სექტორის წარმომადგენლებსა და მუნიციპალიტეტების პირველ პირებს შეხვდნენ.

„ეს სისტემა ისეთი სტანდარტით არის შექმნილი, რომ ვერავინ ხელს ვერ მოკიდებს ამ ფულს. ფული იქნება პირდაპირ საბანკო ანგარიშზე. ბანკს აქვს ნდობა და ყველაზე მოწესრიგებულია საბანკო სისტემა. ახლო მომავალში ეს სისტემა 1 მილიონ ადამიანს მოემსახურება და ვინ შეიძლება ამხელა რისკზე წავიდეს?“ – კითხვა დაუბრუნა აუდიტორიას ლევან სურგულაძემ, საპენსიო სააგენტოს დირექტორმა. ნანა კალანდაძემ მას ევროპის რამდენიმე ქვეყნის მაგალითიც მოუყვანა, სადაც დაგროვებითი პენსიის სისტემამ ვერ იმუშავა.

„იქ ცოტა სხვანაირად იყო საქმე… ჩვენს შემთხვევაში თქვენ ყოველდღე შეგეძლებათ ნახოთ თქვენი ანგარიში. ის არც ყადაღას, არც დაქვითვას ან ინკასოს არ ექვემდებარება და მემკვიდრეობით გადაეცემა. არა მგონია, ვინმემ გარისკოს ეს,“ – დასძინა ლევან სურგულაძემ.

კითხვები საბანკო სისტემის სანდოობის კუთხითაც დაისვა. ერთ-ერთმა მოქალაქემ შეხვედრაზე ბანკის იმ მიდგომაზე გაამახვილა ყურადღება, რომლის მიხედვითაც, ბანკს ერთპიროვნულად შეუძლია შეცვალოს სასესხო ხელშეკრულების პირობები.

„ბანკებთან ჩვენ გვექნება ნომინალური ანგარიში, ამაზე მიმდინარეობს მოლაპარაკება. ბანკი უხეშად დაარღვევს ყველა კანონს, თუ ის ამ ფულს შეეხება რამენაირად. ჩვენ ელექტრონული წვდომა გვექნება ბანკებთან, ვერ იქნება ასე, რომ ბანკმა რაღაც ფული წაიღოს. ბანკები არაფერს მართავენ, ჩვენ ვიყენებთ მათ მომსახურებას, აბა, სახლში ხომ არ წავიღებთ ამ ფულს,“ – უპასუხა შეკითხვა საპენსიო სააგენტოს დირექტორმა.

რა იქნება ბანკის სარგებელი? – სააგენტოს წარმომადგენლების თქმით, ამ ეტაპზე ეს დაზუსტებული არ არის. „თუმცა ჩვენ ბანკებთან ვაწარმოებთ მოლაპარაკებებს, რომ ამ ფულს რაღაც გარკვეული პროცენტი დაერიცხოს სარგებლის სახით,“ – დასძინა ლევან სურგულაძემ.

საქართველოს პარლამენტმა “დაგროვებითი პენსიის შესახებ” კანონი 2018 წლის 21 ივლისს მესამე მოსმენით მიიღო. 

“დაგროვებითი პენსიების შესახებ” კანონის მიხედვით, საპენსიო რეფორმაში ჩართვა სავალდებულო იქნება 40 წლამდე დასაქმებული ადამიანებისთვის. დასაქმებული გადაიხდის დაუბეგრავი ხელფასის 2%-ს. 2-2%-ს გადაიხდიან დამსაქმებელი და სახელმწიფო.

ვრცლად აღნიშნული საკითხის შესახებ შეგიძლიათ წაიკითხოთ აქ.

„რატომ უნდა იყოს საპენსიო სააგენტოს დირექტორის ხელფასი 15 ათასი ლარი, როცა პენსია საქართველოში ჯერ კიდევ 180 ლარია?“ – ეს შეკითხვა „ბათუმელებმა“ დღეს ლევან სურგულაძეს დაუსვა. ის ახლად შექმნილი უწყების – საპენსიო სააგენტოს პირველი დირექტორია. საპენსიო სააგენტოს ხელმძღვანელმა პირებმა დღეს, 5 დეკემბერს, ბათუმის დემოკრატიული ჩართულობის ცენტრში შეხვედრა გამართეს და საპენსიო რეფორმის შესახებ ისაუბრეს.

„არსებული პენსია, თქვენ გულისხმობთ სოციალურ დახმარებას, რომელსაც პენსიას ვეძახით, ასეთი დახმარებები არის ყველა ქვეყანაში, მათ შორის, ამერიკის შეერთებულ შტატებში. იქაც არის, დახმარება ჰქვია ამას და 300 დოლარია, ამერიკაში ეს ისეთივე დაბალია და კიდევ უფრო დაბალია, ვიდრე ჩვენთან 180 ლარი. ეს არ უშლის ხელს იმას, რომ ამერიკაში ვიღაცას ჰქონდეს გაცილებით მაღალი შემოსავალი და ხელფასი. ეს შედარება არ მიმაჩნია სწორად. სხვა კომენტარის გაკეთება არ შემიძლია,“ – გვითხრა ლევან სურგულაძემ, საპენსიო სააგენტოს დირექტორმა.

2019 წლის ბიუჯეტის პროექტით, საპენსიო სააგენტოს დაფინანსება 3.8 მილიონი ლარით განისაზღვრება. აქედან 2 მილიონი ლარი თანამშრომელთა შრომის ანაზღაურებაზე დაიხარჯება. უწყებაში სულ 50 ადამიანი დასაქმდება.

ამ თემაზე:

https://netgazeti.ge/news/297666/

7 დეკემბერს, 12:00 საათზე, ბათუმის დემოკრატიული ჩართულობის ცენტრში სექსუალური შევიწროების შესახებ კანონპროექტის განხილვაა დაგეგმილი. დისკუსიის ორგანიზატორი „დემოკრატიული ჩართულობის ცენტრია“, მომხსენებელი კი -ახალგაზრდა იურისტთა ასოციაციის აჭარის ფილიალი.

საქართველოს სტატისტიკის ეროვნული სამსახურისა და გაეროს ქალთა ფონდის ბოლო კვლევის მიხედვით, საქართველოში ყოველ მეხუთე ქალს სექსუალური შევიწროება ცხოვრებაში ერთხელ მაინც გამოუცდია. დაზარალებულებს შორის 70 პროცენტი სექსუალური შევიწროების მსხვერპლი გახდა საჯარო სივრცეში, ხოლო 10 პროცენტი – სამუშაო ადგილზე. მიუხედავად ამისა, ქართული კანონმდებლობა ტერმინს -„სექსუალური შევიწროება“ დღემდე არ ცნობს.

სექსუალური შევიწროების საკანონმდებლო ჩარჩოში მოქცევის მიზნით საქართველოს პარლამენტის გენდერული თანასწორობის საბჭო საკანონმდებლო პაკეტზე მუშაობს.

თუმცა აღნიშნული საკანონმდებლო ინიციატივა სექსუალური შევიწროებისთვის დისკრიმინაციის სტატუსის მინიჭების პირველი მცდელობა არ არის.

არასტანდარტულ მანდარინზე სუბსიდირება წელსაც მიმდინარეობს – სამეწარმო გადამუშავებისთვის განკუთვნილი მანდარინის ფასი 20 თეთრი იქნება, აქედან სახელმწიფოს თანადაფინანსება 10 თეთრი იქნება, 10 თეთრს კი – საწარმო გადაიხდის.

აჭარის სოფლის მეურნეობის სამინისტროს ცნობით, შპს TCF GEORGIA მიმდინარე წლის სეზონზე 3000 ტონა არასტანდარტული მანდარინის მიღებას გეგმავს. რაც შეეხება არასტანდარტული ციტრუსის საკონსერვო ქარხანა შპს Georgian industrial Asset Management Group-ს, სამინისტროს ცნობით, ქობულეთის საკონსერვო ქარხანა შეუზღუდავი რაოდენობით მიიღებს არასტანდარტულ მანდარინს და წარმოებული იქნება ციტრუსის კონცენტრატი, საიდანაც დამზადდება წვენი.

აჭარის სოფლის მეურნეობის სამინისტროს ინფორმაციით, დღეის მდგომარეობით, აღნიშნულ ქარხნებს მიღებული და გადამუშავებული აქვთ 700-მდე ტონა არასტანდარტული მანდარინი.

ქართული ციტრუსის რეალიზაციის ძირითად ბაზრებად კვლავ რჩება რუსეთი, სომხეთი, უკრაინა და ყაზახეთი.

აჭარის მთავრობის ცნობით, მიმდინარე წელს ციტრუსის მოსალოდნელი მოსავალი სავარაუდოდ 55-60 ათას ტონას შეადგენს.

აჭარაში მოქმედებს ციტრუსის რეალიზაციის საკოორდინაციო შტაბი, სადაც ინფორმაციის მიღება შეგიძლიათ ცხელ ხაზზე: 1501

ამავე თემაზე: 

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტმა ბენზინში ტყვიის შემცველობის დადგენის მიზნით ბენზინგასამართი სადგურების შემოწმება დაიწყო. ოფიციალური ინფორმაციით, ქვეყნის მასშტაბით 240 სინჯი უნდა აიღონ.

ზედამხედველობის დეპარტამენტის ინფორმაციით, შემოწმება კომპანიების წარმომადგენლების გაფრთხილების გარეშე განხორციელდება, „ხოლო სინჯების ლაბორატორიულ კვლევას საერთაშორისო აკრედიტაციის მქონე ლაბორატორია უზრუნველყოფს“.
კვლევის შედეგად დადგინდება ბენზინში ტყვიის შემადგენლობის შესაბამისობა მოქმედ კანონმდებლობასთან მიმართებაში.

ადმინისტრაციულ სამართალდარღვევათა კოდექსის შესაბამისად, საქართველოს ტერიტორიაზე ისეთი საავტომობილო ბენზინის ან/და დიზელის საწვავის მიწოდება, რომლის ხარისხიც ვერ აკმაყოფილებს საქართველოს მთავრობის დადგენილებით განსაზღვრულ საავტომობილო ბენზინის ხარისხობრივ ნორმებს ან/და დიზელის საწვავის შემადგენლობის ნორმებს, გამოიწვევს დაჯარიმებას 8 000 ლარის ოდენობით.

საქართველოს წყლებში თევზის ზუსტი მარაგის დასადგენად მალე თურქული სამეცნიერო გემი შემოვა. ამის შესახებ “ბათუმელებს” გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტის ხელმძღვანელი, არჩილ გუჩმანიძე ესაუბრა,  “პირველად საქართველოს ისტორიაში, საქართველოს შავი ზღვის სანაპიროს სარეწაო რესურსების ექოსაუნდინგს ანუ დასხივებას ჩაატარებს  ასეთი მასშტაბის სამეცნიერო გემი”, ამბობს ის.

აკუსტიკური კვლევის შედეგად მინიმალური ცდომილებით განსაზღვრავენ საქართველოს შავი ზღვის სანაპიროზე არსებულ თევზის რაოდენობას: ექოსაუნდერი ანუ სპეციალიზებული, ძვირადღირებული სამეცნიერო გემისა და ტექნიკის საშუალებით მოხდება მთელი სანაპიროს დასხივება“.

არჩილ გუჩმანიძის განმარტებით, აქამდე საქართველოს სანაპიროზე თევზის მარაგებს მატემატიკურ მოდელირებაზე დაყრდნობით ითვლიდნენ. „მარაგების შეფასება ხდებოდა მატემატიკური მოდელირებით და ეს  უკვე არის  მარაგების შეფასება პირდაპირი მეთოდით. მოდელირებას კი არ ვაკეთებთ, პირდაპირ ვითვლით  რამდენი ცალია, ვაანალიზებთ უკვე პოპულაციურ სტატუსს და  შეგვიძლია  მაღალი სიზუსტით,  ყოველგვარი ცდომილებების გამორიცხვით,  პირდაპირ ვთქვათ, რა მდგომარეობაშია ჩვენთან სარეწაო  რესურსები, რისი პოტენციალი გვაქვს,” – განმარტავს არჩილ გუჩმანიძე.

1995 წლიდან 2001 წლამდე საქართველოში აკუსტიკურ კვლევას უკრაინული სამეცნიერო გემი “პოისკოვიკი” ატარებდა, თუმცა როგორც დეპარტამენტში განმარტავენ, ამ გემზე გამოყენებულ დაკვირვებას ბევრად უფრო დაბალი ხარისხის სიზუსტე ჰქონდა.

გემი საქართველოს შავი ზღვის სანაპიროზე 17 დეკემბერს შემოვა. მასზე უცხოელ მეცნიერებთან ერთად გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტის სამი მეცნიერი, მათ შორის, არჩილ გუჩმანიძეც იმუშავებს.

კვლევა საქართველოში ხმელთაშუაზღვის თევზჭერის გენერალური კომისიის (GFCM)  პროექტის Black Sea For Fish-ის ფარგლებში უფასოდ ხორციელდება.

თევზის მარაგის სწორი განსაზღვრა  ხელს შეუწყობს კვოტირებას, სწორ სარეწაო პროგნოზირებას და ზოგადად, მეთევზეობის გეგმარებასა და მენეჯმენტს.

მთავარი ფოტოს: ecomagazine.com

საავტომობილო გზების დეპარტამენტის ცნობით, ჩქაროსნული ავტომაგისტრალის, გრიგოლეთი-ქობულეთის შემოვლითი გზის მშენებლობისთვის ტენდერში გამარჯვებულ კომპანიასთან ხელშეკრულება გაფორმდა. გრიგოლეთი-ქობულეთის შემოვლითი გზის 14  კმ-იან მონაკვეთს ერთობლივი საწარმო „პოლატიოლი და მაპა“ ააშენებს.

გრიგოლეთი-ქობულეთის შემოვლითი გზის საშუალებით სამტრედია–გრიგოლეთის გზა ქობულეთის შემოვლით გზას დაუკავშირდება და სატრანსპორტო ნაკადი გრიგოლეთიდან ქობულეთის მიმართულებით ჩქაროსნული ავტომაგისტრალით იმოძრავებს. აშენდება 4-ზოლიანი ასფალტ–ბეტონის გზა, 22 სახიდე გადასასვლელი, 4 სატრანსპორტო კვანძი, წყალგამტარი მილები და მიწისქვეშა გასასვლელები

დეპარტამენტის ცნობით, პროექტი გააერთიანებს მიმდინარე და დასრულებულ პროექტებს შავი ზღვის საკურორტო ზონაში და 2020 წლისთვის, სამტრედიიდან-ჭოროხამდე, ჯამში 110 კმ-დე ახალი გზა, საშუალებას მისცემს მგზავრებს საკურორტო ზონების გვერდის ავლით, ჩქაროსნული გზით გადაადგილდნენ.

გრიგოლეთი-ქობულეთის შემოვლითი გზის მშენებლობას ევროპის საინვესტიციო ბანკი აფინანსებს და მისი ღირებულება 228 მილიონი ლარია.

27 წლის თორნიკე აბესაძე ავეჯის თვითნასწავლი რესტავრატორია. ოთხი წლის წინ, მეგობრის სახლში ძველი კარადა ნახა, იყიდა, სახლში მიიტანა და საბჭოთა კარადა ახალ ნივთად აქცია. მერე ფოტო ფეისბუქზე დადო. სწორედ ასე მიიღო პირველი შეკვეთა. რესტავრაციას უტარებს ყველაფერს, რაზეც ფიქრობს, რომ რესტავრაცია სჭირდება. ყველაფერი, რაც ამ სფეროში იცის, იუთუბის და სხვადასხვა სპეციალური ვებგვერდის დახმარებით ისწავლა.

სანამ ავეჯის რესტავრაცია გაიტაცებდა, ორი წელი ლონდონში ბიზნესის ადმინისტრირებას და მენეჯმენტს სწავლობდა. საქართველოში დაბრუნების შემდეგ სურდა სწავლა სამხატვროზე გაეგრძელებინა, თუმცა ვერ შეძლო. ახლა ინტერიერის დიზაინსა და მენეჯმენტს ონლაინ სწავლობს.

„არასოდეს არ ვიცოდი რა მინდოდა გამოვსულიყავი. ყოველ ორ-სამ თვეში ვიცვლიდი აზრს – რომ გავიზრდები გავხდები იურისტი, გავხდები მასწავლებელი და ა.შ. რაც არ შეცვლილა ჩემს ცხოვრებაში, ბავშვობიდან მიყვარდა ხატვა, მიყვარდა ჩხირკედელაობა და აქედან გამომდინარე ჩემთან უფრო ახლოს არის ეს საქმიანობა. ალბათ ინტერიერის დიზაინი იქნება ჩემი ბოლო გაჩერება. მომწონს, როდესაც ადამიანს ვუქმნი სივრცეს, სადაც ის ბედნიერად გრძნობს თავს,“ – ამბობს თორნიკე.

დროებით შეკვეთებს აღარ იღებს – ორი მიზეზია, სწავლა, რომელსაც დიდი დრო მიაქვს და მეორე მიზეზი ბოლო შვიდი თვე პიცის ღუმელს აშენებდა.

ისევე როგორც სხვა ყველაფერი, ღუმელის შენებაც იუთუბზე ისწავლა.

„მამაჩემს უნდოდა პიცის ღუმელის გაკეთება. ერთი წლის წინ გარდაიცვალა. მაგის შემდეგ გადავწყვიტე, რომ მე თვითონ ამეშენებინა. ჯერ ჩემით დავიწყე. მეზობლად ცხოვრობს ადამიანი, რომელიც ბუხრებს აშენებს, მასთან კონსულტაციას გავდიოდი. შენებამ დიდი დრო წაიღო, რადგან ყველაფერის კეთება მე მიწევდა, რაღაცების სწავლა მჭირდებოდა. თან არ ვიცოდი, გამომივიდოდა თუ არა – არ ვიყავი ჩემს თავში დარწმუნებული. საბოლოოდ კარგი გამოვიდა,“ – ამბობს თორნიკე.

მისი თქმით, დღეს, როცა ნებისმიერ ინფორმაციაზე წვდომა შეუზღუდავია, მისი თაობა ახალი გამოწვევების წინაშე დგას.

„მილენიალებისთვის ეს საუკუნე არის საკუთარი თავის ძიების ეპოქა. უზარმაზარი ინფორმაციაა. ყველაფრის სწავლა შეგიძლია, რასაც მოინდომებ,“ – ამბობს თორნიკე.

ქართული თაფლი ევროკავშირის ქვეყნებში გასაყიდად გატანა მხოლოდ იმ შემთხვევაში იქნება შესაძლებელი, თუ ქართველი მეფუტკრეები ფუტკრის სამკურნალოდ ანტიბიოტიკებს აღარ გამოიყენებენ.  ამ დროისთვის როგორც სურსათის ეროვნული სააგენტოს, ისე კერძო კომპანიების მიერ გაკეთებულ თაფლის ლაბორატორიულ სინჯების დიდ ნაწილში ევროკავშირში აკრძალული ანტიბიოტიკების მაღალი შემცველობა ფიქსირდება.

მეფუტკრე ასლან შაქარაძე ქედიდან ამბობს, რომ საქართველოში ანტიბიოტიკების შემცველ პრეპარატებს მეფუტკრეობაში მასიურად იყენებენ, ქართულ თაფლში ანტიბიოტიკები უმეტესად შესაწამლი საშუალებებიდან ხვდება: „არის პრეპარატები, რომლებიც შეიცავენ ანტიბიოტიკებს, მათ ფუტკრის სამკურნალოდ იყენებენ. ამავდროულად არის ეკოლოგიურად სუფთა პრეპარატებიც, რომლებიც ცოტათი ძვირია და სწორედ ამის გამო ერიდებიან მათ შეძენას მეფუტკრეები,“ – ამბობს ის.

მეფუტკრე ამბობს, რომ ოთხ ლარად ანტიბიოტიკების შემცველი პრეპარატით ფუტკრის 50 ოჯახის დამუშავებაა შესაძლებელი. იმავე ფასად შეძენილი ეკოლოგიურად სუფთა პრეპარატი კი, ფუტკრის მხოლოდ ერთ ოჯახს ეყოფა. შესაბამისად საწყის ეტაპზე მეფუტკრეებისთვის ახალი დადგენილება ხარჯებს გაზრდის, თუმცა ასლან შაქარაძე ამბობს, რომ საბოლოოდ ეს რეგულაცია ყველასთვის სასარგებლო შედეგს მოიტანს.

სურსათის ეროვნული სააგენტოს ინფორმაციით, ეს არ გამოიწვევს ფუტკრების მკურნალობის შეფერხებას, რადგან ბოლო პერიოდში საქართველოში უკვე დარეგისტრირდა სამკურნალო ვეტერინარული პრეპარატები, რომლებიც ბუნებრივ ინგრედიენტებს შეიცავენ.

იმის გამო, რომ თაფლში არსებული ვეტერინარული პრეპარატებისა და სხვა დამაბინძურებლების ნარჩენების არსებობა ერთ-ერთი ხელშემშლელი პირობაა ევროკავშირში თაფლის ექსპორტის შეზღუდვის მხრივ, 2018 წლის 6 ნოემბერს საქართველოს მთავრობამ მიიღო დადგენილება #526, რომლითაც იკრძალება სურსათში, მათ შორის თაფლში, კონკრეტული ფარმაკოლოგიურად აქტიური ნივთიერებების შემცველობა, როგორიცაა: მეტრონიდაზოლი, ქლორამფენიკოლი, ნიტროფურანი და ა.შ. რომელიც მავნებელია ადამიანის ჯანმრთელობისათვის. გარდა ამისა, მთავრობამ მიიღო კიდევ ერთი დადგენილება (#525), რომლითაც იკრძალება ისეთი ვეტერინარული პრეპარატების რეგისტრაცია, რომლებიც შეიცავენ აკრძალულ ფარმაკოლოგიურად აქტიურ ნივთიერებებს („ნოზემატი“ და „ნოზემაციდი“, რომლებიც განკუთვნილია ფუტკრის ნოზემატოზის სამკურნალოდ). შესაბამისად, ბიზნესოპერატორებს ამ ნივთიერებების შემცველი რეგისტრირებული ვეტერინარული პრეპარატების შემოტანა და ბაზარზე განთავსება ეკრძალებათ.

აკრძალვა ძალაში ერთ თვეში შედის. გარდა ამისა, უკვე შემოტანილი და ქსელში გაშვებული პრეპარატების გაყიდვა ვეტაფთიაქებს შეეძლებათ მათი ამოყიდვამდე ან ვადის გასვლამდე, ეს იმას ნიშნავს, რომ მხოლოდ მეფუტკრეების ნებაზე და კეთილსინდისიერებაზეა დამოკიდებული, გამოიყენებენ თუ არა ისინი აკრძალულ ანტიბიოტიკებს და იქნება თუ არა მათი თაფლი ანტიბიოტიკებით დაბინძურებული.

ასევე, არსებობს რისკები, რომ აკრძალული ნივთიერებების შემცველი პრეპარატები მოხვდეს ბაზარზე გარკვეული არაოფიციალური გზებით, ან მეფუტკრემ შეიძლება მიმართოს აფთიაქს და შეიძინოს ადამიანისთვის განკუთვნილი ანტიბიოტიკი ფუტკრის სამკურნალოდ, რაც დაუშვებელია და დიდ ზიანს მიაყენებს როგორც მომხმარებლის ჯანმრთელობას, ასევე, ქართული თაფლის საექსპორტო პოტენციალსა და იმიჯს.

 სულ ახლახან ჯანდაცვის მსოფლიო ორგანიზაციამ [WHO] განაცხადა, რომ ანტიბიოტიკებისადმი  მდგრადობა სახიფათოდ მაღალ დონეს აღწევს მთელს მსოფლიოში. 

ადამიანებისა და ცხოველების ჯანმრთელობის დასაცავად ანტიბიოტიკების სისტემატური ირაციონალური და არასწორი გამოყენება გახდა მიზეზი ანტიბიოტიკებისადმი მდგრადობის განვითარებისა. ეს ხდება მაშინ, როცა მიკროორგანიზმები, მაგალითად, ბაქტერიები ხდებიან გამძლე იმ სამკურნალო საშუალებების მოქმედების მიმართ, რომლებსაც მკურნალობისთვის გამოიყენებენ.

ყოველ წელს ანტიბიოტიკური მედიკამენტების მიმართ გამძლე ბაქტერიებით დაავადების გამო, მსოფლიოში დაახლოებით 700 000 ადამიანი კვდება. WHO

ამავე თემაზე:

https://netgazeti.ge/slideshow/262630/?fbclid=IwAR1A03tQlFw06JmqcEJll3NtGunlxZQBhO8yJbyBzNTMxygvMmfH35Z1OoA

7 დეკემბერს, 16:00 საათზე, ბათუმის შოთა რუსთაველის სახელმწიფო უნივერსიტეტში ილიას სახელმწიფო უნივერსიტეტის პროფესორის, ფილოსოფოს ლაშა ბაქრაძის საჯარო ლექცია გაიმართება თემაზე: „ტოტალიტარიზმი და ხელოვნება“.

ლექცია გაიმართება უნივერსიტეტის 32-ე აუდიტორიაში და მასზე დასწრება ყველა მსურველს შეუძლია.

ლექცია აჭარის განათლების, კულტურისა და სპორტის სამინისტროს უმაღლესი განათლების ხელშეწყობის ქვეპროგრამის ფარგლებში იმართება.

4 დეკემბრიდან 7 დეკემბრის ჩათვლით აჭარაში გრიპის ვაქცინაცია უფასო იქნება. აჭარის საზოგადოებრივი ჯანდაცვის ცენტრში ამბობენ, რომ უკვე გადასცეს გრიპის ვაქცინა იმ სამედიცინო დაწესებულებებს, სადაც ამაზე იყო მოთხოვნა.

გრიპის უფასო ვაქცინის გაკეთება აჭარაში შესაძლებელია შემდეგ სამედიცინო დაწესებულებებში:

• N4 პოლიკლინიკა, მის: ტაბიძის ქ. N 7
• N1 პოლიკლინიკა, მის: ტბელ აბუსერიძის ქ. N2
• საზღვაო ჰოსპიტალი, მის: მელიქიშვილის ქ.N102
• საოჯახო მედიცინის ცენტრი, მის: ბარათაშვილის ქ.N30
• ხელვაჩაურის სამედიცინო ცენტრი ქ. ბათუმი, ფრიდონ ხალვაშის გამზირი ქ.#7
• შპს „ბათუმის ინფექციური პათოლოგიის, შიდსის და ტუბერკულოზის რეგიონალური ცენტრი“, მის: ქათამაძის ქ. N11
• ქობულეთის სამედიცინო ცენტრი, ქ. ქობულეთი, თბილისის ქ. N31
• ქედის, ხულოს, შუახევის პირველადი ჯანდაცვის ცენტრები

„ჩვენ ჩამოვიტანეთ 1000 დოზა და გადავეცით პოლიკლინიკებს. მოსახლეობას კვირის ბოლომდე [7 დეკემბრის ჩათვლით] შეუძლია მივიდეს ამ პოლიკლინიკებში და გაიკეთოს ვაქცინა უფასოდ,“ – ამბობენ აჭარის საზოგადოებრივი ჯანდაცვის ცენტრში.

ბათუმში გრიპის უფასო ვაქცინაციის ერთდღიანი აქცია 22 ნოემბერსაც გაიმართა. მაშინ აქციისთვის გათვალისწინებული 1200 ვაქცინა აჭარაში სრულად იქნა გამოყენებული. 

გრიპის ვაქცინის გაკეთება ბავშვებისათვის 6 თვის ასაკიდან შეიძლება. ვაქცინის გაკეთება რეკომენდებულია, ასევე, ხანდაზმულებისთვის.

ამავე თემაზე: 

აჭარის ტურიზმისა და კურორტების დეპარტამენტი ბრენდირებული საწვიმარი ლაბადებისა და  ფეხსაცმლის დამცავის შესაძენად ტენდერს აცხადებს. 

დეპარტამენტი 1500 ცალ ლაბადას და 1200  დამცავ, საწვიმარ ფეხსაცმელს შეიძენს. შესყიდვის სავარაუდო ღირებულება 30 000 ლარია. საწვიმარ ლაბადაზე, ზურგზე დატანილი უნდა იყოს დეპარტამენტის ვებგვერდის მისამართი, მკერდზე კი -დეპარტამენტის ლოგო.

ლაბადები უნდა იყოს ინდივიდუალური შეფუთვით, ესკიზის შესაბამისად.

ტენდერში წინადადებების მიღება 10 დეკემბერს დაიწყება და 12 დეკემბერს დასრულდება.

__________

მთავარ ფოტოზე: საწვიმარი ლაბადისა და ფეხსაცმლის ესკიზი