ბათუმში, ჭავჭავაძის #111-ში, ქუჩაში კარადა დგას, რომელშიც ტანსაცმელი ალაგია. კარადაზე წარწერაა: „ვისაც გაქვთ გაიღეთ, ვისაც არ გაქვთ აიღეთ“. ეს ე.წ. სოციალური კარადაა, რომელიც კამპანიის ფარგლებში – „გააზიარე სითბო“ საქართველოს ქალაქებში რამდენიმე დღეა გამოჩნდა.
კამპანია საქველმოქმედოა და მისი მიზანია იმ ადამიანებს მიაწოდოს თბილი ტანსაცმელი და აუცილებელი ნივთები, რომლებსაც ამის საჭიროება აქვთ.
ბათუმში სოციალური კარადა გუშინ, 2 დეკემბერს, დადგეს და გუშინვე ფეისბუქზე გავრცელდა ფოტოები, რომელზეც ჩანს, რომ კარადასთან მოქალაქეებს ტანსაცმელი მიაქვთ და ტოვებენ.
დღეს, 3 დეკემბერს, კარადაში ისევ ალაგია თბილი ტანსაცმელი.
სოციალური კარადა ბათუმში
გულნაზ თებიძე ჭავჭავაძის ქუჩაზე, ზუსტად კარადის მოპირდაპირე მხარეს ვაჭრობს სოფლის პროდუქტებით და ორი დღეა აკვირდება, ვინ სარგებლობს სოციალური კარადით. იგი ამბობს, რომ აქ ტანსაცმელი ბევრ ადამიანს მოაქვს:
„გუშინ დაიდგა ეს ყუთი. ვიფიქრე, ვინ აიღებს აქედან რამეს-მეთქი, მაგრამ ისეთი ხალხი მოვიდა…. ჯერ მოვიდნენ და მოიტანეს ბევრი ტანსაცმელი, აწყვეს და აწყვეს, არც ეტეოდა კარადაში, ქუჩაში ელაგა. სამეზობლოც მოდის და ალაგებენ ტანსაცმელს. ფეხსაცმელებიც იყო, ჩექმები, ვალინკები, შარვლები, კოფთები… ძალიან უხარია ხალხს, რომ ეს მოიფიქრეს. ყველანაირი ხალხი მოდის წასაღებად, ახალგაზრდებიც მოდიან და ასაკოვნებიც და იღებენ ტანსაცმელს. არჩევენ, თუ არის მათი ზომა, მიაქვთ, თუ არა – ტოვებენ. გუშინ ბევრი ტანსაცმელი დაგროვდა და ქედაში წაიღეს, ვინც დადგა, იმ ბიჭმა თქვა, რომ ოცნების ქალაქშიც უნდა გავგზავნოთო.
რომ ამბობენ, მეორადების გამყიდველებს მიაქვთო, არ არის მასე. აქ გარემოვაჭრეებმა აიღეს რამდენიმე და ჩაიცვეს“, – გვითხრა გულნაზ თებიძემ.
კამპანია – „გააზიარე სითბო“ საქართველოს სულ უფრო მეტ ქალაქში ხდება პოპულარული. შეიქმნა ფეისბუქგვერდიც, რომელზეც მოქალაქეთა აქტივობები იყრის თავს. ამ დროისათვის, საქველმოქმედო კარადები შემდეგ წერტილებშია განთავსებული:
- თბილისი – ბერი გაბრიელ სალოსის 52
- თბილისი – ბერი გაბრიელ სალოსის 145
- თბილისი – ბერი გაბრიელ სალოსის 155
- თბილისი – აფრიკის დასახლება – ენგურჰესის 4
- თბილისი – გლდანის პარკის მიმდებარე ტერიტორია
- თბილისი – კოსტავას 75გ
- თბილისი – პეტრიწის 5
- თბილისი – დადიანის 152
- რუსთავი – მეგობრობის ქუჩა
- ფოთი – რუსთაველის რკალი, “ელიტ ელექტრონიქსის” გვერდით.
- ბათუმი – ჭავჭავაძის ქუჩა
- კასპი – ავტოვაგზლის ტერიტორია
- ქუთაისი – წერეთლის 81
ამავე თემაზე:
https://netgazeti.ge/news/325659/
