საპენსიო სააგენტოს დირექტორი დაგროვილი პენსიის დაკარგვის რისკზე: ბანკების მიმართ არსებობს ნდობა

„რა გარანტია გვაქვს მოქალაქეებს, რომ ეს დაგროვებული ფული არ დაიკარგება?“ – იკითხა საპენსიო სააგენტოს მიერ გამართულ შეხვედრაზე ნანა კალანდაძემ, არასამთავრობო ორგანიზაცია „ღირსეული სიბერის“ ხელმძღვანელმა. საპენსიო სააგენტოს ხელმძღვანელი პირები ბათუმის დემოკრატიული ჩართულობის ცენტრში მესამე სექტორის წარმომადგენლებსა და მუნიციპალიტეტების პირველ პირებს შეხვდნენ.

„ეს სისტემა ისეთი სტანდარტით არის შექმნილი, რომ ვერავინ ხელს ვერ მოკიდებს ამ ფულს. ფული იქნება პირდაპირ საბანკო ანგარიშზე. ბანკს აქვს ნდობა და ყველაზე მოწესრიგებულია საბანკო სისტემა. ახლო მომავალში ეს სისტემა 1 მილიონ ადამიანს მოემსახურება და ვინ შეიძლება ამხელა რისკზე წავიდეს?“ – კითხვა დაუბრუნა აუდიტორიას ლევან სურგულაძემ, საპენსიო სააგენტოს დირექტორმა. ნანა კალანდაძემ მას ევროპის რამდენიმე ქვეყნის მაგალითიც მოუყვანა, სადაც დაგროვებითი პენსიის სისტემამ ვერ იმუშავა.

„იქ ცოტა სხვანაირად იყო საქმე… ჩვენს შემთხვევაში თქვენ ყოველდღე შეგეძლებათ ნახოთ თქვენი ანგარიში. ის არც ყადაღას, არც დაქვითვას ან ინკასოს არ ექვემდებარება და მემკვიდრეობით გადაეცემა. არა მგონია, ვინმემ გარისკოს ეს,“ – დასძინა ლევან სურგულაძემ.

კითხვები საბანკო სისტემის სანდოობის კუთხითაც დაისვა. ერთ-ერთმა მოქალაქემ შეხვედრაზე ბანკის იმ მიდგომაზე გაამახვილა ყურადღება, რომლის მიხედვითაც, ბანკს ერთპიროვნულად შეუძლია შეცვალოს სასესხო ხელშეკრულების პირობები.

„ბანკებთან ჩვენ გვექნება ნომინალური ანგარიში, ამაზე მიმდინარეობს მოლაპარაკება. ბანკი უხეშად დაარღვევს ყველა კანონს, თუ ის ამ ფულს შეეხება რამენაირად. ჩვენ ელექტრონული წვდომა გვექნება ბანკებთან, ვერ იქნება ასე, რომ ბანკმა რაღაც ფული წაიღოს. ბანკები არაფერს მართავენ, ჩვენ ვიყენებთ მათ მომსახურებას, აბა, სახლში ხომ არ წავიღებთ ამ ფულს,“ – უპასუხა შეკითხვა საპენსიო სააგენტოს დირექტორმა.

რა იქნება ბანკის სარგებელი? – სააგენტოს წარმომადგენლების თქმით, ამ ეტაპზე ეს დაზუსტებული არ არის. „თუმცა ჩვენ ბანკებთან ვაწარმოებთ მოლაპარაკებებს, რომ ამ ფულს რაღაც გარკვეული პროცენტი დაერიცხოს სარგებლის სახით,“ – დასძინა ლევან სურგულაძემ.

საქართველოს პარლამენტმა “დაგროვებითი პენსიის შესახებ” კანონი 2018 წლის 21 ივლისს მესამე მოსმენით მიიღო. 

“დაგროვებითი პენსიების შესახებ” კანონის მიხედვით, საპენსიო რეფორმაში ჩართვა სავალდებულო იქნება 40 წლამდე დასაქმებული ადამიანებისთვის. დასაქმებული გადაიხდის დაუბეგრავი ხელფასის 2%-ს. 2-2%-ს გადაიხდიან დამსაქმებელი და სახელმწიფო.

ვრცლად აღნიშნული საკითხის შესახებ შეგიძლიათ წაიკითხოთ აქ.