მეწარმეებს ბიზნესომბუდსმენი დღეს, 5 დეკემბერს, შემოსავლების სამსახურში შეხვდა. ბიზნესომბუდსმენის, ირაკლი ლექვინაძის თქმით, ყველაზე ხშირად მშენებელ კომპანიებს ექმნებათ ბიუროკრატიული პრობლემები.
„ბიზნესისთვის დამაზიანებელია გაჭიანურებული სასამართლო პროცესი, ასევე, მშენებლობის ნებართვების გაცემის პროცესი,“ – აღნიშნა ირაკლი ლექვინაძემ. მისივე თქმით, მუნიციპალიტეტებში სტრუქტურული ერთეული უნდა შეიქმნას, სადაც ბიზნესკომპანიას ადმინისტრაციული ორგანოს მიერ მიღებული გადაწყვეტილების გასაჩივრება შეეძლება. ბიზნესომბუდსმენი მიიჩნევს, რომ ამ გზით მეწარმეები სასამართლო დავებისთვის დამატებით დროს და ენერგიას აღარ დახარჯავენ.
წლის განმავლობაში ბიზნესომბუდსმენისთვის, ქვეყნის მასშტაბით, 250 მეწარმეს მიუმართავს, აჭარაში – ოცდაათს. აჭარის რეგიონში ბიზნესომბუდსმენის წარმომადგენელობა მიმდინარე წლის სექტემბერში გაიხსნა.
„თავდაპირველად მხოლოდ უცხოური კომპანიები მოგვმართავდნენ. როგორც ჩანს, უცხოელებმა უფრო იციან ბიზნესომბუდსმენის გემო,“ – თქვა შეხვედრაზე ტარიელ გიორგაძემ, ბიზნესომბუდსმენის წარმომადგენელმა აჭარაში.
ტარიელ გიორგაძემ ჟურნალისტებთან არ დააკონკრეტა, რომელმა კომპანიებმა მიმართეს ბიზნესომბუდსმენს. ტარიელ გიორგაძემ გვითხრა, რომ აჭარაში ბიზნესმენებს ყველაზე მეტად საგადასახადო დავალიანების კუთხით არსებული პრობლემა აწუხებთ, მეორე ადგილზე კი, ბიუროკრატია და სამშენებლო ნებართვების გაცემაა.
„ხუთ შემთხვევაში პრობლემა დადებითად გადაწყდა… ჩვენ როცა ვერთვებით პროცესში, უფრო მობილიზებულად ხდება გადაწყვეტილების მიღება. ჩვენ ვაძლევთ ბიზნესმენს მხოლოდ რეკომენდაციას და ყოველდღიური კომუნიკაცია გვაქვს იმ ორგანოსთან, სადაც პრობლემა ექმნება ბიზნესმენს. ხშირ შემთხვევაში, პრობლემა არის დაკავშირებული, მაგალითად, ზონალურობასთან…“, – ამბობს ტარიელ გიორგაძე.
რა ბერკეტი აქვს ბიზნესომბუდსმენს, როცა ქალაქის ზონებად დაყოფის გამო მშენებელი სამშენებლო ნებართვას ვერ იღებს?
„უარყოფითი პასუხიც პასუხია… ხშირად მეწარმეებს პასუხის მიღება უჭირთ,“ – გვიპასუხა ტარიელ გიორგაძემ, ბიზნესომბუდსმენის წარმომადგენელმა აჭარაში.
ბიზნესმენებს დღეს თორნიკე რიჟვაძეც შეხვდა. შეხვედრის დასაწყისში აჭარის მთავრობის თავმჯდომარემ ბიზნესმენებს მოკლედ უთხრა, რომ ის მორატორიუმის წინააღმდეგია და მშენებლებს ხელი არ უნდა შეეშალოთ.
მორატორიუმს ძველ ბათუმში საზოგადოება „ბათომი“ და საზოგადოების ნაწილი ითხოვს მანამ, ვიდრე ქალაქს განაშენიანების გენერალური გეგმა არ ექნება. ეს ორგანიზაცია ქალაქში უსისტემო და ქაოტური მშენებლობების შეჩერებას, ასევე, ისტორიული ქალაქის გადარჩებას ცდილობს.
ბიზნესმენებმა შეხვედრაზე კითხვებიც დასვეს, თუმცა ეს ნაწილი მედიისთვის დაიხურა. „ბათუმელებმა“ მხოლოდ ერთ-ერთი ბიზნესმენის მოსმენა მოასწრო. სამკერვალო კომპანია „ტექსტილის“ წარმომადგენელმა იკითხა, რატომ არ განიხილავენ ამ კომპანიის საკითხს ეკონომიკის სამინისტროს დავების განხილვის საბჭოში, ერთი წლის გასვლის მიუხედავად.
„ჩვენ მივუბრუნდებით ამ საკითხს, რომ ეს პირველი პირის დონეზე იყოს,“ – უთხრა ბიზნესომბუდსმენმა ირაკლი ლექვინაძემ ბიზნესმენს.
