ბათუმის დრამატული თეატრის მცირე სცენა შობა-ახალი წლის წინ მაყურებელს ასტრიდ ლინდგრენის „პეპი გრძელიწინდას“ მიხედვით დადგმულ სპექტაკლს სთავაზობს.
ინსცენირების ავტორი და რეჟისორი მანანა კვირკველიაა, პეპის როლს კი 24 წლის მსახიობი, ხატია ფოფხაძე ასრულებს. ხატიასთვის პეპი პირველი როლია ბათუმის დრამატული თეატრის მცირე სცენაზე.
სპექტაკლის პრემიერა ბათუმში 23 ნოემბერს შედგა. მსახიობებმა ბავშვების საყვარელი მწერლის ნაწარმოების მიხედვით დადგმული სპექტაკლი ბათუმის დრამატული თეატრის მცირე სცენაზე უკვე რამდენჯერმე ითამაშეს.
ძლიერი, დამოუკიდებელი და მხიარული პეპი ამსხვრევს დიდების სამყაროს მიერ დაწესებულ კანონებს, ებრძვის გაბატონებულ სტერეოტიპებს და მისი სრული თავისუფლების წყალობით დიდებიც ბევრს სწავლობენ გმირისგან, ან უბრალოდ, საკუთარ ბავშვობას უბრუნდებიან.
„პეპი მაღალიწინდას“ ყველა სპექტაკლზე ანშლაგია, სპექტაკლის მსვლელობისას ბავშვებიც ერთვებიან გმირების ირგვლივ დატრიალებულ ამბებში და პატარებს ეს განსაკუთრებით მოსწონთ. თითქმის საათნახევრიანი სპექტაკლი ისე გადის, რომ არავინაა მოწყენილი და როცა ყველაფერი მთავრდება ბავშვები მაინც არ ტოვებენ დარბაზს.
„პეპი მაღალიწინდა“ ბათუმის დრამატული თეატრის მცირე სცენაზე 4, 15 და 25 დეკემბერს, 7 საათზე იქნება ნაჩვენები.
„ამ გენიალური ტექსტის დიდად შეცვლა ინსცენირებისას არ დაგვჭირვებია, უბრალოდ აქცენტები გადავაადგილეთ. პეპი ძლიერი და კეთილი გოგოა, რომელსაც საკუთარი, დიდი ტკივილი და განსაცდელი აქვს: დედა არ ჰყავს და მარტოა. ამაზე არავის უამბობს და მხოლოდ მაშინ ესაუბრება დედას, როცა მარტო რჩება. ყოველთვის მზადაა დაჩაგრულებს დაეხმაროს.
ბავშვებს ძალიან სწორი რეაქცია ჰქონდათ სპექტაკლზე, რაც ძალიან გასახარია“-ამბობს რეჟისორი, მანანა კვირკველია.
მისი თქმით რეპეტიციები ძალიან სახალისო და საინტერესო იყო. როგორც რეჟისორი ამბობს, მშობლებს სპექტაკლებზე მოჰყავთ ბავშვები, დარბაზში ტოვებენ და მიდიან, რაც ალბათ დროის სიმცირის ბრალია.
„ერთ რამეს ვთხოვდი მშობლებს კარგი იქნებოდა მათაც ნახონ რა აღელვებთ შვილებს, როცა ყველაფერი მთავრდება, ბავშვებს შთაბეჭდილებების, ემოციების გაზიარება სჭირდებათ და მშობელს ამ სპექტაკლით საშუალება ეძლევათ კიდევ უფრო დაუახლოვდნენ შვილებს, გაიხსნენ ერთმანეთთან და მეტი კომუნიკაცია შედგეს, რაც დღეს ასეთი დეფიციტია“.
