მთავარი,სიახლეები,სპორტი

ეროვნულ ლიგაში დაბრუნებული „დინამო ბათუმის“ გეგმები 2019 წლის ჩემპიონატისთვის

05.12.2018 • 4667
ეროვნულ ლიგაში დაბრუნებული „დინამო ბათუმის“ გეგმები 2019 წლის ჩემპიონატისთვის

7 დეკემბერს საფეხბურთო კლუბი „დინამო ბათუმი“ მარტვილის „მერანთან“ სეზონის ბოლო თამაშს გამართავს. ეს, ასევე, იქნება ბოლო მატჩი, რომელსაც „დინამო ბათუმი“ ეროვნულ ლიგა 2-ში ითამაშებს. ჩემპიონატის დასრულებამდე სამი ტურით ადრე საფეხბურთო კლუბმა ეროვნულ ლიგაში დაბრუნება შეძლო.

„7 დეკემბრის მატჩი პრინციპული თამაში არ არის, მაგრამ ჩვენ ყველა თამაშს ვთამაშობთ ბოლომდე. მაქსიმუმს გავაკეთებთ, რომ ბოლო თამაშიც გამარჯვებით დავამთავროთ. მინდა, რომ კარგ ნოტაზე დამთავრდეს ეს ჩემპიონატი,“ – ამბობს ასლან ბალაძე „დინამო ბათუმის“ სპორტული დირექტორი.

მიმდინარე ჩემპიონატში ბათუმის „დინამომ“ 35 თამაშიდან 22 მატჩი მოიგო, 7 – ფრედ დაამთავრა, 6 თამაში კი – წააგო. გუნდს ჯამში 73 ქულა აქვს და აქტიურ მომზადებას აპირებს 2019 წლის ჩემპიონატისთვის.

„დინამო ბათუმი“ ფიქრობს უმაღლეს ლიგაში სერიოზული მიზნების მიღწევას და თავის სათქმელს აუცილებლად იტყვის,“ – ამბობს ასლან ბალაძე.

„დინამო ბათუმის“ სპორტული დირექტორის თქმით, მომავალ წელს გუნდის შემადგენლობას მინიმუმ ოთხი ახალი ფეხბურთელი შეემატება, რაც გუნდს კიდევ უფრო გააძლიერებს.

„ვმუშაობთ. უკვე დავიწყეთ გუნდის დაკომპლექტება. შეკრება 2019 წლის 10 იანვარს გვექნება. იანვრის ბოლომდე ბათუმში ვიქნებით, 7 თებერვალს კი,  სრულფასოვანი მომზადებისთვის გავემგზავრებით თურქეთში, ანტალიაში. სწორედ ანტალიაში ჩამოყალიბდება გუნდის ის შემადგენლობა, რომელიც მონაწილეობას მიიღებს ჩემპიონატში,“ – ამბობს ასლან ბალაძე.

„დინამო ბათუმი“ ეროვნული ლიგიდან მეორე ლიგაში 2017 წელს გადავიდა. შარშან საფეხბურთო კლუბმა 36 თამაშიდან მხოლოდ 10 თამაშის მოგება შეძლო, 3 ფრედ დაამთავრა, 23 მატჩი კი – წააგო.

გადაბეჭდვის წესი


ასევე: