Batumelebi

„რაში დასჭირდა და ყველა დაიპყროს… ახლა პირდაპირ ჯარიმა, თუ ციხეში უნდა გამიშვან?“ „თავისუფლება თუა და დემოკრატია, გაკონტროლება რად უნდა ფეისბუქს?“ – ნახეთ კიდევ რა გვიპასუხეს ბათუმის ქუჩებში მოქალაქეებმა, რომლებსაც ფეისბუქის გაკონტროლებაზე ვესაუბრეთ.

რატომ დასჭირდა ივანიშვილს ფეისბუქის გაკონტროლება? – ნახეთ „ბათუმელების“ გამოკითხვა

ჟურნალისტური ეთიკის ქარტია ჟურნალისტ ირაკლი ჩიხლაძის საქმისთვის გრიფის მოხსნას და მის სასამართლო პროცესზე მედიის დაშვებას მოითხოვს.

ქარტიამ ამასთან დაკავშირებით განცხადება დღეს, 2 ივნისს გაავრცელა.

„30 მაისს სუს-მა უცხო ქვეყნის სასარგებლოდ ჯაშუშობის ბრალდებით დააკავა ირაკლი ჩიხლაძე, რომელიც წლებია, ჟურნალისტურ საქმიანობას ეწევა და თავისი პროექტებით ხელს უწყობს დიალოგს ქართველ, აფხაზ და ოს ჟურნალისტებს და სამოქალაქო საზოგადოების წარმომადგენლებს შორის.

1 ივნისს დახურულ სხდომაზე მოსამართლე ეკა ბარბაქაძემ ირაკლი ჩიხლაძეს აღკვეთის ღონისძიების სახით პატიმრობა შეუფარდა.

ირაკლი ჩიხლაძე 2008 წლის აგვისტოს ომში რუსული ძალების მიერ ცხინვალში მოკლული ჟურნალისტის გიგა ჩიხლაძის ძმაა. ის არის არასამთავრობო ორგანიზაციის „სამოქალაქო მოსმენების კავკასიური ცენტრის“ დამფუძნებელი და ხელმძღვანელი და ასევე მედიაგამოცემა „კავკაზნიუსის“ ერთ-ერთი ხელმძღვანელი.

კოლეგებისა და ოჯახის ინფორმაციით, ირაკლი ჩიხლაძის პროფესიული საქმიანობის ფოკუსი სტერეოტიპების დამსხვრევა, ომითა და ოკუპაციით გახლეჩილი საზოგადოების წევრების დაახლოება იყო.

ჟურნალისტს ბრალი სისხლის სამართლის კოდექსის 314 მუხლის პირველი ნაწილით წარუდგინეს, რაც ნიშნავს, რომ მას, ბრალის დამტკიცების შემთხვევაში, 8-დან 12 წლამდე პატიმრობა ელის.

პროკურატურამ, რომელიც ირაკლი ჩიხლაძეს უცხო ქვეყნის სპეცსამსახურის დავალებით ინფორმაციის შეგროვებასა და გადაცემას ედავება, საქმეს გრიფი  „საიდუმლო“ დაადო, ხოლო ირაკლი ჩიხლაძის ადვოკატს, გიორგი გელხაურს, „გაუთქმელობაზე“ მოაწერინა ხელი და საქმის მასალებზე საუბარი აუკრძალა. თავად ირაკლი ჩიხლაძე ამ ეტაპზე დუმილის უფლებით სარგებლობს.

შედეგად, მაღალი საჯარო ინტერესის მიუხედავად, საქმის დეტალების შესახებ არც საზოგადოება და არც ჟურნალისტური თემი ინფორმირებული არ არის.

„ქართული ოცნების“ წარმომადგენლებმა გააკეთეს მინიშნება, რომ ირაკლი ჩიხლაძე ერთ-ერთი ევროპული ქვეყნის სასარგებლოდ ჯაშუშობდა.

ადვოკატი გადაწყვეტილებას უკანონოდ და დაუსაბუთებლად მიიჩნევს. ის მიანიშნებს, რომ საქმეში არსებული მტკიცებულებები ირაკლი ჩიხლაძისთვის წარდგენილ ბრალს არ ადასტურებს და რომ მსგავსი მტკიცებულებების საფუძველზე ნებისმიერი იმ ადამიანის დაკავება შეიძლება, ვინც კი ანალიტიკურ საქმიანობას ეწევა ან საერთაშორისო ორგანიზაციებთან თანამშრომლობს.

ისეთი სერიოზული ბრალდების შემთხვევაში, როგორიც ჯაშუშობაა, მტკიცების მაღალი სტანდარტის დაცვაა საჭირო. დახურული და გასაიდუმლოებული პროცესი საზოგადოების ინტერესში ცალსახად არ შედის.

ქარტია უერთდება ოჯახის და თავად ბრალდებულის მოთხოვნას, საქმე გამჭვირვალედ და მაღალი საჯაროობის პირობებში წარიმართოს, რათა საზოგადოებას მიეცეს საშუალება, წარმოდგენილი მტკიცებულებების საფუძველზე, თავად შეაფასოს, თუ რამდენად ობიექტური და სამართლიანია ირაკლი ჩიხლაძის მიმართ წარდგენილი ბრალი“- ნათქვამია ქარტიის განცხადებაში.

____________

ამავე თემაზე:

დღეს, 2 ივნისს, ელექტრომოპედებისა და კვადროციკლების გამქირავებელმა მოქალაქეებმა საპროტესტო აქცია გამართეს ბათუმის ბულვარის ადმინისტრაციასთან.

აღნიშნული პირები ბათუმის ბულვარში წლების განმავლობაში მუშაობდნენ და ტურისტულ სეზონზე ელექტრომოპედებსა და კვადროციკლებს აქირავებდნენ დამსვენებლებზე, თუმცა წელს ბათუმის მერიამ მათ ბულვარში მუშაობის ნებართვა აღარ მისცა

ბათუმში ელექტრომოპედებისა და სკუტერების გამქირავებლები, ასევე, სუვენირებითა და წვენებით მოვაჭრეები, 4 თვეა, რაც მერიის გადაწყვეტილებას აპროტესტებენ. ისინი ამ დროის განმავლობაში აქციებს მართავენ როგორც მერიის, ასევე აჭარის მთავრობის ადმინისტრაციულ შენობასთან და ითხოვენ გადაწყვეტილების მიმღებ პირებთან შეხვედრას.

როგორც გამქირავებლები ამბობენ „ბათუმელებთან“ საუბრისას, მერია მათ ახალი ბულვარის ტერიტორიაზე სთავაზობს გარკვეულ მონაკვეთზე მუშაობას, თუმცა თვითდასაქმებულებისთვის ეს შემოთავაზება მიუღებელია, რადგან მერია ხშირად ცვლის პირობებს და არც შემოთავაზებული მონაკვეთია ყველა თვითდასაქმებული ჯგუფისთვის საკმარისი.

„აკვაპარკის ბოლოში განთავსდით 71 ადამიანიო, ამას გვეუბნებიან. საკრებულოს მოგვცა უფლება, რომ როგორც იყავით გასულ წლებში, ისევ ისე იმუშავეთ. ახლა გვაძლევენ 30 ლოკაციას და მანძილს გვიმცირებენ. უნდათ, რომ ერთმანეთში გვაჩხუბონ, ერთმანეთს გადაგვკიდონ. ეს ვისი ინიციატივაა, ვინ გადაწყვიტა, რა უნდა ბულვარის დირექტორს ჩვენგან, ვერ ვხვდებით.

ჩვენ გვინდა ერთადერთი რამ, მოგვცენ იმის უფლება, რომ როგორც ადრე ვიყავით ისე დავდგეთ და ვიმუშაოთ“ – ამბობს პაატა საგინაძე.

მისი თქმით, 2 თვეა გადაწყვეტილებას ელოდებიან ხელისუფლებისგან და ვერ მიაღწიეს საბოლოო შეთანხმებას.

„ამ ხნის განმავლობაში, ვინ მშიერია, ვინ მწყურვალი, ვის აქვს ბანკის ვალი ვინმე გვეკითხება? მათ ხელფასი აქვთ, ჭამს და სვამ, ჩვენ რა ვქნათ, ხალხმა“ – ამბობს პაატა საგინაძე.

თვითდასაქმებულების თქმით, ბულვარის ტერიტორიაზე 300-მდე ელექტრომობილი მუშაობდა.

„პირველ რიგში პრობლემაა ის, რომ დანარჩენი ხალხი, ვინც უმუშევარი რჩება, ეს 40-41 ადამიანი, ცოდვაა. პატარა ლოკაციაზე 30 კაცი 5 ელექტრომობილით, 5 მოპედით რომ დადგება, ძალიან ახლოს იქნებიან ერთმანეთთან და მუშაობა გაგვიჭირდება.

ბულვარის ადმინისტრაციამ უნდა დაგვალაგოს იმ ადგილებზე სადაც ადრე ვიდექით, მაგრამ უარს გვეუბნება“ – ამბობს ნიკა მამულაძე.

კიდევ ერთ თვითდასაქმებული „ბათუმელებთან“ ამბობს, რომ იმ მონაკვეთში, სადაც ბულვარის ადმინისტრაციას უნდა, რომ ელექტრომობილები განთავსდეს, ფიზიკურად ვერ დაეტევა ამდენი ტექნიკა.

„მე მაქვს ინტერესი, რომ პურის ფული მივიტანო ოჯახში. სეზონურად სამი თვე ვმუშაობთ, 9 თვე ვართ უმუშევარი. საკრებულომ მხარი დაგვიჭირა, მაგრამ ბულვარის ადმინისტრაციას არ სურს ისე ვიმუშაოთ, როგორც ადრე.

რეგულაციები რა თქმა უნდა საჭიროა, რაღაცების შეცვლა აუცილებელია, მაგრამ ეს არ ნიშნავს იმას, რომ შეგვავიწროონ“- ამბობს ვაჟა დავითაძე.

ამავე თემაზე:

ჟურნალისტური ეთიკის ქარტია აჭარის საზოგადოებრივი მაუწყებლის გადაწყვეტილებას რეორგანიზაციის საბაბით ჟურნალისტების გათავისუფლების შესახებ უსამართლოდ და დაუსაბუთებლად მიიჩნევს.

ქარტიის განცხადებაში ვკითხულობთ:

„2 ივნისს აჭარის საზოგადოებრივი მაუწყებლის 14 თანამშრომელს დირექციამ ელექტრონული ფოსტით შეატყობინა შრომითი ხელშეკრულების შეწყვეტის შესახებ. მათ შორის არიან გადაცემა „სათქმელის“ წამყვანი ირინა ყურუა, რადიოს საინფორმაციო გამოშვების რედაქტორი მაია მერკვილაძე და ჟურნალისტები თეონა ხარაბაძე, ლევან ურიდია და სალომე გეგეშიძე.

აჭარის საზოგადოებრივი მაუწყებლის ახლად დანიშნულმა დირექტორმა ირაკლი კიკვაძემ გამოცემა „ბათუმელებთან“ კომუნიკაციაში გათავისუფლებები მაუწყებელში მიმდინარე რეორგანიზაციას დაუკავშირა. მან განმარტა, რომ მის გუნდს ინფრასტრუქტურული გამოწვევებისა და სხვა მიზეზების გამო ბევრი გადაცემის გაუქმება მოუწია.

ქარტიას ეჭვებს უჩენს ის გარემოება, რომ გათავისუფლებული ჟურნალისტები დამოუკიდებლობის მაღალი ხარისხითა და პროფესიონალიზმით გამოირჩევიან და რომ ისინი ყოველთვის პატივისცემას იჩენენ განსხვავებული აზრის მიმართ და სვამენ კრიტიკულ შეკითხვებს.

გათავისუფლებული ჟურნალისტების ნაწილი, ვისი პოზიციაც ამ დროისთვის ცნობილია, თავადაც ასე მიიჩნევს, რომ კრიტიკული აზრის გამო იდევნება.

ეს ქარტიას აფიქრებინებს, რომ გათავისუფლებები სხვა არაფერია, თუ არა აჭარის საზოგადოებრივი მაუწყებლის კრიტიკული აზრისგან დაცლის მცდელობა და ეს შერჩევითი, მიკერძოებული დამოკიდებულება ჟურნალისტების მიმართ აჭარაში საინფორმაციო ველის საბოლოოდ მოსუფთავებას ემსახურება.

კვლევები აჩვენებს, რომ მას შემდეგ რაც ნათია კაპანაძემ აჭარის მაუწყებელი იმპიჩმენტის შედეგად დატოვა, მაუწყებლის სარედაქციო პოლიტიკა რადიკალურად შეიცვალა და პარტიულ დღის წესრიგს დაემორჩილა. ტელევიზია სხვადასხვა ხელმძღვანელობის პირობებში ეტაპობრივად  გათავისუფლდა კრიტიკულად მოაზროვნე ჟურნალისტებისგან. ახლა, სავარაუდოდ, ამ სისტემური პროცესის ბოლო ტალღის მოწმე ვხდებით.

ქარტია სოლიდარობას უცხადებს აჭარის საზოგადოებრივი მაუწყებლიდან გათავისუფლებულ კოლეგებს და მაუწყებლის მენეჯმენტს სამართლიანობისკენ, რეორგანიზაციის პროცესში კი გათავისუფლებებთან დაკავშირებით მეტი გამჭვირვალობისა და სიცხადისკენ მოუწოდებს“.

ბათუმის მერიის მუნიციპალური ინსპექცია ქალაქის ტერიტორიაზე „უსახური სავაჭრო ჯიხურების დემონტაჟს“ აგრძელებს, თუმცა „უნებართვო და უსახური შენობა ნაგებობების დემონტაჟისთვის“ რესურსი არ გააჩნია. აქედან გამომდინარე, შესაბამისი მომსახურების შესყიდვაზე ინსპექციამ 53 500 ლარით ტენდერი გამოაცხადა.

2026 წლის მაისის დასაწყისში ინსპექცია აცხადებდა, რომ „უნებართვო და უსახური შენობა ნაგებობების დემონტაჟი“ 24 საათის განმავლობაში უნდა გაეგრძელებინა, რისთვისაც 15 ივნისამდე, ჯამში, 50 625 ლარის დახარჯვას ტენდერის გარეშე აპირებდა.

„დღეის მდგომარეობით შემსყიდველი ორგანიზაციის ხელთ არსებული რესურსით შეუძლებელია უკანონო ნაგებობების დემონტაჟის განხორციელება. შესასრულებელი სამუშაოების სპეციფიკიდან გამომდინარე, სავალდებულოა დემონტაჟის უსაფრთხოების წესების დაცვით მოთხოვნილი სამუშაოების სრულყოფილი შესრულება. ინსპექციას არ აქვს ტექნიკა [ამწე მექანიზმი, მძიმე სამშენებლო ტექნიკა, და ა.შ.] და არ ჰყავს შესაბამისი პერსონალი დემონტაჟის ღონისძიებების განსახორციელებლად“ – წერდა მაშინ ინსპექცია შესყიდვების სააგენტოს.

ვრცლად ამ თემაზე: რა დარჩა ბათუმის მერიას დასანგრევი – „უნებართვო კაფე-ბარების“ დემონტაჟისთვის 170 ათასი ლარი იხარჯება

გამარტივებულ შესყიდვაზე თანხმობის მიღების ეტაპზე სააგენტომ მუნიციპალურ ინსპექციას გარკვეული დეტალების დაზუსტება-დასაბუთება მოსთხოვა.

„გთხოვთ, ერთი სამუშაო დღის ვადაში დააკონკრეტოთ, თუ როდის დადგა გადაუდებელი აუცილებლობის ვითარება. ამასთან, განმარტეთ, თუ რატომ არის შეუძლებელი გადაუდებელი აუცილებლობით გამოწვეული პრობლემის აღმოფხვრა ელექტრონული ტენდერის საშუალებით და რატომ უნდა დასრულდეს წინამდებარე მომართვით განსაზღვრული სამუშაოები 2026 წლის 15 ივნისამდე.

ასევე, [კითხვარის სხვადასხვა ველში მითითებული] ინფორმაცია მოიყვანეთ ერთმანეთთან შესაბამისობაში. ასევე განმარტეთ, თუ რის საფუძველზე დადგინდა შესყიდვის ობიექტის ღირებულება…“ – მიწერეს შესყიდვების სააგენტოდან მუნიციპალურ ინსპექციას.

დეტალების დაზუსტების ნაცვლად კი, მუნიციპალურმა ინსპექციამ თავისი განაცხადი სააგენტოდან უკან გაიხმო და მოგვიანებით ტენდერი გამოაცხადა.

აღნიშნულ ტენდერში წინადადებების მიღება 6 ივნისს დაიწყება და 9 ივნისს დასრულდება. შესყიდვის სავარაუდო ღირებულება კი, როგორც ზემოთ აღვნიშნეთ, ამჯერად 53 500 ლარია.

„სამუშაოები უნდა განხორციელდეს ეტაპობრივად: ხელშეკრულების გაფორმებიდან 2026 წლის 31 დეკემბრის ჩათვლით.

მიმწოდებელს წერილობით გადაეცემა სამშენებლო ობიექტის კონკრეტული მისამართი.“ – აღნიშნულია ტენდერის პირობებში.

ბათუმის მუნიციპალურ ინსპექციას, პარალელურად, ჯამში 1 მილიონზე მეტი ლარის ტენდერები აქვს გამოცხადებული საკუთარი კომფორტისთვის.

ინსპექციამ სამი ერთეული მე-III კლასის მსუბუქი ჰიბრიდული ავტომობილის შესაძენად ელექტრონული ტენდერი 223 ათას 200 ლარით გამოაცხადა. შპს „სენა ავტო“ ინსპექციას ავტომობილებს 187 ათას 800 ლარად სთავაზობს. ეს ტენდერი შერჩევა-შეფასების ეტაპზეა.

ბათუმში, საცხოვრებელი კორპუსის I სართულის სივრცეში სამსახურის ახალი ოფისის მოსაწყობად კი, მუნიციპალურ ინსპექციას ტენდერი 949 ათას 865 ლარით აქვს გამოცხადებული.

ამ თემაზე ვრცლად:

მთავარი ფოტო: ბათუმის მუნიციპალური ინსპექცია

აჭარის საზოგადოებრივი მაუწყებლიდან ჟურნალისტები გაათავისუფლეს.

დღეს, 2 ივნისს, ტელევიზიისა და რადიოს 5-მა თანამშრომელმა ელექტრონული ფოსტის მეშვეობით გაიგო, რომ სამსახურიდან გაათავისუფლეს. მოტივი, ტელევიზიაში გამოცხადებული რეორგანიზაციაა.

სამსახურიდან დაითხოვეს გადაცემა „სათქმელის“ წამყვანი ირინა ყურუა, რადიოს საინფორმაციო გამოშვების რედაქტორი მაია მერკვილაძე, ასევე სხვა ჟურნალისტები – თეონა ხარაბაძე, ლევან ურიდი და სალომე გეგეშიძე.

„ბათუმელები“ ესაუბრა ირინა ყურუას და მაია მერკვილაძეს.

„რეორგანიზაცია სამი თვეა უკვე მიმდინარეობს და ამის შესახებ გვქონდა ინფორმაცია, თუმცა დღეს მივიღე მეილი, სადაც მადლობას მიხდიან ჟურნალისტიკაში შეტანილი წვლილისთვის და მატყობინებენ, რომ შრომითი ხელშეკრულება შემიწყვიტეს.

„მოხარული ვიქნებით, თუ მიიღებთ მონაწილეობას კონკურსში“, – ესეც მომწერეს. სექტემბერში ყოფილა კონკურსი დაგეგმილი“, – ამბობს ირინა ყურუა „ბათუმელებთან“.

ირინა ყურუა მიიჩნევს, რომ მისი სამსახურიდან გათავისუფლება, ტელევიზიაში კრიტიკული აზრის ჩახშობას უკავშირდება.

„ოფიციალურად რაც გამოგვიცხადეს, არის ის, რომ სტრუქტურა უნდა შეცვალონ და რომ ტელევიზიაში ყველაფერი გასამართია. მოგვთხოვეს თითო გადაცემის გადაგზავნა შესაფასებლად და მეც გადავუგზავნე ჩემი ერთი გადაცემა.

არ ვიცი ამ ერთი გადაცემიდან რა დასკვნა გამოიტანეს და რა კომპეტენციით შეფასდა ეს ცალკე მსჯელობის საგანია. თუმცა ვფიქრობ, რომ ეს ერთი გადაცემაც ძალიან ღირსეული იყო და არ მგონია, რომ ჟურნალისტურ სტანდარტებთან ან რაიმე კანონთან შეუსაბამო იყო.

არანაირი არგუმენტი არ მომისმენია, თუ რატომ შემიწყვიტეს გადაცემა. უბრალოდ, მეილში ეწერა, რომ ოპტიმიზაციის შედეგად შემუშავებულ ახალ ბადეში გადაცემა – „სათქმელის“ ადგილი ვერ მოიძებნა.

მე ასე ვფიქრობ, რომ არ უნდათ კრიტიკული აზრი ისმოდეს ტელევიზიიდან, რადგან ამ გადაცემიდან მაყურებელი ისმენდა განსხვავებულ და კრიტიკულ აზრებს. ისმოდა კრიტიკული კითხვები, რაც აუდიტორიისთვის საინტერესო იყო.

ჟურნალისტიკა მე ასეთი მგონია და ჩემს სტუდენტებსაც ასე ვასწავლი, რომ უპირველესია კრიტიკული კითხვის დასმა. თუ შენ მრავალფეროვნებას და განსხვავებულ აზრებს ვერ სთავაზობ მაყურებელს, მაშინ არ მგონია ღირებული იყოს მსგავსი გადაცემა.

ვფიქრობ, ამიტომ უშლიდა ნერვებს ზოგიერთს, რომ სწორედაც კრიტიკული აზრი, კრიტიკული მოსაზრებები და განსხვავებული აზრი ისმოდა ამ გადაცემაში“, – ამბობს ირინა ყურუა.

ის ამბობს, რომ აპირებს სამართლებრივ ბრძოლას მისი უფლებების დასაცავად.

„არა მგონია კონკურსამდე ასე გავჩერდე, მაინც ვიბრძოლებ საკუთარი უფლებებისთვის, იმიტომ, რომ არ არის ეს სამართლიანი გადაწყვეტილება“, – ამბობს ირინა ყურუა.

მაია მერკვილაძეც მიიჩნევს, რომ ტელევიზიის ხელმძღვანელობის გადაწყვეტილება სამართლიანი არ არის.

„სადღაც სამი თვის წინ მოგვივიდა ბრძანება რეორგანიზაციის შესახებ და ყველას მოგვაწერინეს ხელი. იმ დღეებში შევხვდით დირექტორს, რადგან მაინტერესებდა, რას გულისხმობდა ეს რეორგანიზაცია.

მითხრა, რომ ეს ძირითადად ეხებოდა შემოქმედებით გადაცემებს და ასევე ისეთ საკითხებს, სადაც ერთი ადამიანი იკავებდა რამდენი პოზიციას.

მე ვარ რადიოს საინფორმაციოს რედაქტორი, პოზიციების დუბლირება ჩემთან არ იყო და არც შემოქმედებით გადაცემებს წარმოადგენდა ჩემი სამსახური. ამიტომ რაღაც მაინც დარჩა აუხსნელი. ელემენტარულ ლოგიკაშიც არ ჯდება ეს გადაწყვეტილება, ამიტომ მაინტერესებს რატომ გადაწყვიტეს ასე.

ახალი დირექტორი სამი თვეა დაინიშნა. როგორ გაერკვა ყველა თანამშრომლის კომპეტენციაში და ფუნქციებში ასე სწრაფად არ ვიცი“, – ამბობს მაია მერკვილაძე.

მისი თქმით, მიღებულ მეილში არც იმაზე იყო საუბარი, რომ შეეძლო კონკურსში მონაწილეობა.

„მსგავსი არაფერი წერია მეილში. მოკლედ, ასე პირდაპირ წერია, რომ შეწყდა ჩემთან ხელშეკრულება.

მე დირექტორის არგუმენტები მაინტერესებს თორემ, მე მაქვს ჩემი არგუმენტები და ვიცი, რატომ შეიძლება შეეწყვიტათ ჩემთან თანამშრომლობა. მიუხედავად იმისა, რომ ჩემი ჯანმრთელობის მდგომარეობიდან გამომდინარე ბოლო დროს არ ვიყავი საკმარისად აქტიური, მაინც ვფიქრობ, რომ ეს ყველაფერი უკავშირდება ჩემს კრიტიკულ დამოკიდებულებას ხელისუფლების მიმართ“, – ამბობს მაია მერკვილაძე.

„ბათუმელები“ ასევე დაუკავშირდა ტელევიზიის დირექტორს ირაკლი კიკვაძეს, რომელმაც სატელეფონო ზარებს არ უპასუხა, თუმცა მოგვიანებით მოგვწერა, რომ ჟურნალისტები სამართლებრივი ნორმების დაცვით გაათავისუფლეს.

„მაუწყებელში რეორგანიზაცია იყო დაგეგმილი და დაანონსებული, ჩვენმა გუნდმა მოსვლისთანავე დაიწყო ტელევიზიისა და რადიოს შიგნით არსებული გამოწვევების შესწავლა.

პროცესი მიმდინარეობს ყველა სამართლებრივი პროცედურის დაცვით. გვაქვს კიდევ არაერთი გამოწვევა და ამ გამოწვევებთან გამკლავების გეგმებიც. სამწუხაროდ, ამ ეტაპზე მოგვიწია რამდენიმე თანამშრომელთან დამშვიდობება.

ამ ეტაპზე  ინფრასტრუქტურული და არამხოლოდ მიზეზების გამო, ბევრი გადაცემის გაუქმება მოგვიწია. ამ მიმართულებითაც გვაქვს სამომავლო გეგმები და ადამიანებს მიეცემათ საშუალება საეთერო დროის გამოყენების, როცა ამის პირობები იქნება“, – მოგვწერა ირაკლი კიკვაძემ.

თუმცა არ დაგვიზუსტა, 5 პირის გარდა, კიდევ რამდენმა დასაქმებულმა მიიღო გათავისუფლების შესახებ შეტყობინება და რამდენი დასაქმებულის გათავისუფლება იგეგმება მთლიანობაში.

„საქართველოს ოთხმა მოქალაქემ დანაშაულებრივი ორგანიზებული ჯგუფი ჩამოაყალიბა. წინასწარ შემუშავებული გეგმის შესაბამისად ისინი ამერიკაში თავშესაფრის მსურველ საქართველოს მოქალაქეებს მოიძიებდნენ და მათ თავშესაფრის მისაღებად საჭირო ისტორიის, ე.წ. „ქეისის“ შექმნას, მტკიცებულებების შეგროვებასა და სასამართლოში მხარდაჭერას ჰპირდებოდნენ.

საქართველოს პროკურატურის მიერ ჩატარებული გამოძიებით დადგენილია საქართველოს 366 მოქალაქის ვინაობა, რომლებმაც ამერიკის შეერთებულ შტატებში თავშესაფრის მისაღებად ორგანიზებული დანაშაულებრივი ჯგუფის წევრებს მიმართეს,“ – აღნიშნულია საქართველოს პროკურატურის მიერ დღეს, 2 ივნისს გავრცელებულ ინფორმაციაში.

პროკურატურამ წინასწარი შეთანხმებით ჯგუფის მიერ მოქალაქეთა კუთვნილი დიდი ოდენობით თანხის მოტყუებით დაუფლების, საქართველოს მოქალაქის უცხო ქვეყანაში უკანონოდ დარჩენისთვის ხელშეწყობის, საქართველოს მოქალაქისთვის უცხო ქვეყანაში თავშესაფრის მისაღებად მცდარი ინფორმაციის წარდგენის ხელშეწყობის და ორგანიზების, ასევე ყალბი ოფიციალური დოკუმენტის დამზადება-გასაღების ფაქტებზე 3 პირი დააკავა და 6 პირის მიმართ სისხლისსამართლებრივი დევნა დაიწყო.

თბილისის პროკურორი გიორგი მიქაია აღნიშნავს, რომ საქართველოს პროკურატურის და ამერიკის შეერთებული შტატების საელჩოს რეგიონული უსაფრთხოების სამსახურის მიერ ერთობლივად ჩატარებული ღონისძიების შედეგად გამოვლენილია ორი ორგანიზებული დანაშაულებრივი ჯგუფი.

„ორგანიზებული დანაშაულებრივი ჯგუფის წევრები, ე.წ. ქეისებში არარსებულ ისტორიებს წერდნენ, თუ როგორ დევნიდნენ საქართველოს მოქალაქეებს საქართველოს ტერიტორიაზე სხვადასხვა მიზეზით, მათ შორის, პოლიტიკური შეხედულების თუ სექსუალური ორიენტაციის გამო.

აღნიშნული ისტორიების გამყარების მიზნით ორგანიზებული დანაშაულებრივი ჯგუფის წევრები ამზადებდნენ ყალბ დოკუმენტებს და სანაცვლოდ დიდი ოდენობით თანხებს ითხოვდნენ. კერძოდ: ყალბი ე.წ. „ქეისის“ შედგენის სანაცვლოდ 1 000 – 1 500 აშშ დოლარამდე თანხას, ხოლო ყალბი დოკუმენტების დამზადებისთვის 3 000 აშშ დოლარს.

გარდა მითითებული თანხებისა, თავშესაფრის მაძიებლის საქმის წარმოებისა და წარმატებით დასრულებისთვის, თითოეული მოქალაქისგან ითხოვდნენ და იღებდნენ დამატებით 6 000-8 000 აშშ დოლარამდე თანხას.

ასევე, ორგანიზებული დანაშაულებრივი ჯგუფის ორი წევრი ამერიკის შეერთებულ შტატებში ჩასულ და საემიგრაციო პატიმრობაში მყოფ ქართველებს დახმარებას ჰპირდებოდა, სანაცვლოდ კი, დიდი ოდენობით თანხას ითხოვდნენ. ბრალდებულები 4 მოქალაქის კუთვნილ 10 000 აშშ დოლარს დაეუფლნენ, თუმცა მათ საქართველოს მოქალაქეებს დახმარება არ გაუწიეს.

გარდა ამისა, ორგანიზებული დანაშაულებრივი ჯგუფის წევრები საქართველოს მოქალაქეებს კანადის ვიზის მიღებაში დახმარებასაც ჰპირდებოდნენ. თბილისის პროკურატურის საგამოძიებო სამმართველოს მიერ ჩატარებული ოპერატიულ-სამძებრო ღონისძიების ფარგლებში, ერთ-ერთმა ბრალდებულმა, კანადის ვიზის მიღებაში დახმარების მიზნით, 800 აშშ დოლარის სანაცვლოდ, პროკურატურის ოპერატიულ თანამშრომელს დაუმზადა ყალბი საბანკო ამონაწერი, ცნობა სამსახურის თაობაზე, თითქოსდა, ეს უკანასკნელი დასაქმებული იყო ამერიკის შეერთებულ შტატებში და სხვა ყალბი დოკუმენტაცია.

საქართველოს პროკურატურის და აშშ-ს საელჩოს რეგიონული უსაფრთხოების სამსახურის მიერ ერთობლივად ჩატარებული ღონისძიების ფარგლებში, ასევე გამოვლენილია კიდევ ერთი ორგანიზებული დანაშაულებრივი ჯგუფი, რომელიც ყალბი დოკუმენტების გამოყენებით მოქალაქეებს ამერიკის ვიზის მიღებაში ეხმარებოდა. ორგანიზებული დანაშაულებრივი ჯგუფის წევრებმა სოციალური ქსელის სხვადასხვა პლატფორმაზე განათავსეს განცხადებები, რომლითაც ამერიკის შეერთებულ შტატებში გამგზავრების მსურველ პირებს ვიზის მიღებაში დახმარებას სთავაზობდნენ. დანაშაულებრივი ჯგუფის წევრები მოქალაქეებს ეუბნებოდნენ, რომ აპლიკაციის შევსებისთვის საჭირო თანხის გარდა, ვიზის მიღებამდე თანხის გადახდა არ მოუწევდათ. ვიზის მიღების შემთხვევაში კი 10 000-დან 15 000 აშშ დოლარამდე უნდა გადაეხადათ.

ჯგუფის წევრებმა საქართველოს 65 მოქალაქეს ამერიკის საელჩოში წარსადგენად, დაუმზადეს და გადასცეს ყალბი ოფიციალური დოკუმენტები, რომელთა გამოყენებითაც მოქალაქეთა ნაწილმა შეძლო ვიზის მიღება. ვიზის მიღების შემდეგ მათ 112 000 აშშ დოლარი ხელზე გადასცეს ორგანიზებული დანაშაულებრივი ჯგუფის წევრებს.

მას შემდეგ, რაც წარმოშობილი ეჭვების საფუძველზე საელჩომ დოკუმენტების ნაწილი გადაამოწმა, გამოვლინდა დანაშაულებრივი ჯგუფის სიყალბე, რის გამოც ყველა მოქალაქეს, ვისაც დანაშაულებრივი ჯგუფის წევრები ეხმარებოდნენ, ვიზა გაუუქმდა. მიუხედავად აღნიშნულისა, 2025 წლის იანვრიდან 2026 წლის თებერვლის ჩათვლით პერიოდში, ორგანიზებული დანაშაულებრივი ჯგუფის წევრებმა, ყალბი დოკუმენტების გამოყენებით, ფინანსური სარგებლის სახით მოქალაქეებისგან მიიღეს 142 786.43 აშშ დოლარი, 15 095 ლარი და 1 560 ევრო,“ – აღნიშნა თბილისის პროკურორმა, გიორგი მიქაიამ დღეს, 2 ივნისს მოწყობილ ბრიფინგზე.

______________________

მთავარ ფოტოზე: თბილისის პროკურორი გიორგი მიქაია

ახალგაზრდა იურისტთა ასოციაციამ 2026 წლის 27 მაისს მოქალაქე დიმიტრი ჯამბურიას სახელით საჩივარი გაგზავნა ადამიანის უფლებათა ევროპულ სასამართლოში.

საქმე ეხება 2025 წლის 17 დეკემბერს, პარლამენტის წინ, ტროტუარზე მშვიდობიანი პროტესტის გამო პირის ადმინისტრაციულ სამართალდამრღვევად ცნობას და მისთვის 4-დღიანი პატიმრობის შეფარდებას.

„აღნიშნულ საქმესთან დაკავშირებით საია დავობს ადამიანის უფლებათა ევროპული კონვენციის შემდეგი მუხლების დარღვევაზე: 6 (1) (საქმის სამართლიანი განხილვის უფლება); 11 (შეკრებისა და გაერთიანების თავისუფლება); 14 (დისკრიმინაციის აკრძალვა) მე-6(1) და მე-11 მუხლებთან ერთობლიობაში; 17 (უფლებათა ბოროტად გამოყენების აკრძალვა)“ – წერს საია და დეტალურად განმარტავს თითოეულ მუხლთან დაკავშირებით:

„შეკრებისა და გაერთიანების თავისუფლება – არ არსებობს არანაირი მითითება, რომ აქციის ორგანიზატორებს ან თავად მომჩივანს რაიმე ძალადობრივი განზრახვა ჰქონდათ.

ეროვნულმა სასამართლოებმა სრულად უგულებელყვეს ის ფაქტი, რომ კანონში მითითებული ტერმინის – „ხელის შეშლის“, უკიდურესად ბუნდოვანი და ფართო ფორმულირება სამართალდამცავებს კანონმდებლობის ბოროტად გამოყენების საშუალებას აძლევს.

თბილისის საქალაქო სასამართლომ განუხილველად თავისთავშივე დამტკიცებულად მიიჩნია შსს-ის ის მტკიცება ფაქტად, რომ მათი თქმით, ამ აქციასთან მიმართებით გაკეთებული გაფრთხილებები არ იყო სათანადო ფორმით წარმოდგენილი, რის საფუძველზეც აქცია შსს-მ ჩათვალა არაკანონიერად.

აქედან გამომდინარე, სასამართლომ მომჩივანი დამნაშავედ ცნო მხოლოდ იმიტომ, რომ, მისი მტკიცებით, მცირერიცხოვანმა აქციამ ფეხით მოსიარულეთა ნაწილი დროებით შეაფერხა.

თუმცა მოსამართლეს საერთოდ არ შეუფასებია არც ის ფაქტი, რომ მომჩივანს რეალურად ჰქონდა გაგონილი შსს-ის გაფრთხილების შესახებ, რომ აქცია დაშლილიყო, არც დაბრკოლების სიმძიმე, არც ალტერნატიული ადგილმდებარეობების შეთავაზების გაკეთების არსებობა და, რაც მთავარია, არც მომიტინგეთა მხრიდან გადაადგილების შეზღუდვის წინასწარი განზრახვა.

იმის გათვალისწინებით, რომ პროტესტი, თავისი ბუნებით, გარკვეულ ფიზიკურ სივრცეს იკავებს და ყოველთვის იწვევს ჩვეული ცხოვრების რიტმის გარკვეულ, გარდაუვალ შეფერხებას, კანონის ამგვარი უკიდურესად ფართო და თვითნებური განმარტება პრაქტიკულად კრძალავს ნებისმიერი სახის მშვიდობიან შეკრებას და სრულად აქრობს კონვენციით გარანტირებული უფლების არსს.

საქმის სამართლიანი განხილვის უფლება – ეროვნულმა სასამართლოებმა არ შეაფასეს მტკიცებულებები ობიექტურად, მხედველობაში არ მიიღეს დაცვის მხარის მნიშვნელოვანი შუამდგომლობები, მიიღეს შაბლონური გადაწყვეტილებები, არასწორად გამოიყენეს საერთაშორისო სამართლებრივი სტანდარტები და პრეცედენტები, რითაც დაარღვიეს დასაბუთებული გადაწყვეტილების მიღების პრინციპი.

ამასთანავე, სასამართლოებმა უგულებელყვეს ის ფაქტი, რომ შსს-მ ვერ დაამტკიცა მომჩივნის მიერ ტროტუარის განზრახ ბლოკირება და „საზოგადოებრივი საჭიროების“ არსებობა.

უფლებათა ბოროტად გამოყენების აკრძალვა – მომჩივნის საქმე არ არის ერთადერთი ინციდენტი, არამედ წარმოადგენს სახელმწიფოს მხრიდან ძალაუფლების სისტემური, წინასწარ დაგეგმილი ბოროტად გამოყენების ნათელ მაგალითს, რაც ქვეყანაში 2024 წლიდან მიმდინარე დემოკრატიული უკუსვლისა და მზარდი ავტორიტარიზმის პირდაპირი შედეგია.

ხელისუფლებამ პროევროპული აქციების ჩასახშობად მიზანმიმართულად მიიღო რეპრესიული კანონები, ტროტუარზე დგომა ტრანსპორტის სავალ ნაწილზე შეკრებას გაუთანაბრა და ამ ქმედებისთვის ერთადერთ სასჯელად პატიმრობა დააწესა, ხოლო შინაგან საქმეთა სამინისტრო და სასამართლო თავისუფალი პროტესტის წინააღმდეგ მიმართულ სადამსჯელო ინსტრუმენტებად აქცია.

ამასთანავე, აღნიშნული ქმედების ხელახლა ჩადენა („ტროტუარზე დგომა“) გამოიწვევს სისხლისსამართლებრივ პასუხისმგებლობას.

აქციის მონაწილეების იდენტიფიცირების მიზნით სახის ამომცნობი ტექნოლოგიების გამოყენება, ეროვნული სასამართლოების დაუსაბუთებელი გადაწყვეტილებები, დაცვის მხარის არგუმენტების სრული უგულებელყოფა, აქციის მონაწილეებისა და ჟურნალისტების წამება/არასათანადო მოპყრობა, დემონსტრანტებისა და აქტივისტების მიმართ სისხლის სამართლის საქმეების აღძრვრა, ათასობით მშვიდობიანი აქციის მონაწილის დასჯა ადმინისტრაციულ სამართალდარღვევათა კოდექსის საფუძველზე ემსახურება არა საზოგადოებრივი წესრიგის დაცვას, არამედ საზოგადოებაში „მსუსხავი ეფექტის“ (chilling effect) შექმნას, რათა სრულიად განადგურდეს ევროპული კონვენციით დაცული შეკრების თავისუფლება, ჩაიხშოს განსხვავებული აზრი და მოისპოს დემოკრატიული საზოგადოების საფუძვლები.

დისკრიმინაციის აკრძალვა საქმის სამართლიანი განხილვის უფლებასთან და შეკრებისა და გაერთიანების თავისუფლებასთან ერთად – მომჩივნის უფლებების დარღვევა დაკავშირებულია მის პოლიტიკურ შეხედულებებთან, რადგანაც მომჩივანი არის პროევროპული აქციების მონაწილე.

2024 წლის დეკემბრიდან დღემდე, ხელისუფლებამ მიზანმიმართულად მიიღო კანონები, რომლებსაც შსს და სასამართლო ექსკლუზიურად პროევროპული აქციების მონაწილეების დასასჯელად იყენებს.

ის ფაქტი, რომ უბრალოდ ტროტუარზე დგომისთვის მოქალაქეებს ფაქტობრივად ყოველდღიურად უფარდებენ ადმინისტრაციულ პატიმრობას, ნათლად ადასტურებს, რომ მომჩივნის საქმე რიგითი სამართალწარმოება კი არა, პროევროპული აქციების მონაწილეების წინააღმდეგ მიმართული ფართომასშტაბიანი და სისტემური დისკრიმინაციის ნაწილია“ – ნათქვამია საიას განცხადებაში.

დიმიტრი ჯამბურია და სანდრო მეგრელიშვილი პირველები იყვნენ, რომლებსაც პატიმრობა შეუფარდეს ტროტუარზე დგომის გამო, გზის გადაკეტვის საბაბით. მეგრელიშვილი და ჯამბურია მონაწილეობდნენ 2025 წლის დეკემბერში, თბილისში, პარლამენტის მიმდებარედ გამართულ საპროტესტო აქციაში, რომელიც ტროტუარზე გაიმართა.

______________________

ფოტოზე: დიმიტრი ჯამბურია

სუს-მა, ე.წ. ჯაშუშობის ბრალდებით ერთ დღეში საქართველოს ორი მოქალაქე დააკავა. მანამდე იყო კიდევ ორი პირის დაკავების შემთხვევა იმავე ბრალდებით. ვის იჭერს და ვის ემუქრება „ოცნების“ ხელისუფლება? – ამ თემაზე ვესაუბრეთ საქართველოს პარლამენტის ყოფილ წევრსა და უშიშროების საბჭოს ყოფილ მრჩეველს, თეონა აქუბარდიას.

• ქალბატონო თეონა, დღეს მამუკა მდინარაძემ ჟურნალისტებთან განაცხადა, რომ „რეალური ჯაშუშები“ დავაკავეთ ჩვენ, მანამდე მსგავსი შემთხვევა არ ყოფილაო. თქვენი შეფასებით, რაზე მეტყველებს ჯაშუშობის ბრალდებით ადამიანების დაკავება ასე მოკლე დროში?

დავიწყებ იმით, რომ ჯაშუშების დაკავება აბსოლუტურად პოლიტიკური პროცესია. მიუხედავად იმისა, რომ საქართველო, რა თქმა უნდა, არის უცხო ქვეყნის სპეცსამსახურების პოლიგონი, განსაკუთრებით კი ოკუპანტი რუსეთის. რუსეთს ქსელიც ექნება, სავარაუდოდ, პრორუსული ნარატივებისთვის – ესეც არ არის ახალი.

ის, რომ „ქართული ოცნების“ მმართველობის პერიოდში მხოლოდ და მხოლოდ ერთი-ორი საქმე ვიცით, ასე ვთქვათ, ჯაშუშობის გამოვლენის და გაძევების, ამაზე თავად გრიგოლ ლილუაშვილი საუბრობდა, როდესაც საპარლამენტო ანგარიში წარმოადგინა და თქვა, რომ მხოლოდ ერთი შემთხვევა გამოავლინეს და გააძევეს. სხვა დანარჩენზე არაფერი ვიცოდით.

თუმცა, პოლიტიკური ხასიათის ჭრილში „პანდორას ყუთი“ გახსნა მამუკა მდინარაძემ, როცა ის კოორდინატორად გადაიყვანეს [სუს-ის უფროსობის მიუხედავად] და გვითხრეს, რომ დააკავეს ახალგორელი მოქალაქე ჯაშუშობის ბრალდებით და ორი გაექცათ.

შემდეგ, სპეციალური ბრიფინგი მიუძღვნა თანაგუნდელი უძილაურის დაკავებას, როდესაც თითი უქნიეს დასავლეთის სპეცსამსახურებს და თქვეს, რომ იცოდნენ რას აკეთებს აქ დასავლეთი და რომ გაიყვანონ თავიანთი ჯაშუშები. ეს მაშინ, როცა კანონში გვიწერია, რომ რუსეთია ოკუპანტი და არა დასავლეთი. ოკუპაციის და ფაქტობრივი ანექსიის პირობებშია საქართველო რუსეთის მხრიდან და ამაზე დუმილს არჩევენ.

• ბრიფინგზე, პროპაგანდისტულმა მედიამ დაასახელა ქვეყნები – რუსეთი, ირანი, საფრანგეთი და პოლონეთი, რომ თითქოს ამ ქვეყნების ჯაშუშები დააკავა სუსმა, თუმცა მდინარაძემ პოლონეთი გამორიცხა. გამოდის, საფრანგეთი ჰყავდა მხედველობაში? 

დავიწყოთ იქიდან, საერთოდ რა ხელწერაა ეს, როდესაც სუს-ი აკავებს საქართველოს მოქალაქეებს და რუსეთის არცერთი მოქალაქე არ დაუკავებიათ, მიუხედავად იმისა, რომ რუსეთის მოქალაქეები, დარწმუნებული ვარ, გვარიანად მუშაობენ აქ, საქართველოს წინააღმდეგ.

მაგრამ ისინი აკავებენ საქართველოს მოქალაქეებს და შემდეგ ჟონავს ხოლმე ინფორმაცია, თუ რომელი ქვეყნის „ჯაშუშია“ დაკავებული. გავიხსენოთ პირველი შემთხვევა, როცა „რუსთავი 2“-ს გააჟღერებინეს, რომ დაკავებული იყო რუსეთის ჯაშუში, შემდეგ დასავლეთის ჯაშუში [უძილაურზე თქვეს]. შესაბამისად, ინფორმაციის გაცემის ქსელი აწყობილი აქვთ ასე, რომ ჯერ სუს-მა უნდა თქვას, რომ რომელიღაც ქვეყნის ჯაშუში დააკავეს, შემდეგ მათი ტელევიზიები ასახელებენ, რომელი ქვეყნის ჯაშუში იყო.

შესაბამისად, ეს კიდევ ერთხელ აჩვენებს პოლიტიკურ პროცესს და არა სპეცსამსახურების კლასიკურ მუშაობას სახელმწიფო ინტერესების დასაცავად.

მე რასაც ვუყურებ, ეს არის პარტიული ინტერესების დაცვა და არა რეალური ჯაშუშების გამოვლენა. მით უფრო მაშინ, როდესაც დასავლეთზეა განსაკუთრებული აქცენტი და მამუკა მდინარაძის დღევანდელი მუქარა, რომ იცის ვინ რას აკეთებს და მათაც მიწვდებიან. ეს აღიქმება უფრო პოლიტიკურ მუქარად და არა ის, რომ ისეთი ძლიერია ჩვენი სპეცსამსახური, რომ უკან ჩამოვიტოვებთ ბრიტანეთს და ისრაელს.

• „უამრავ ადამიანზე გვაქვს ინფორმაცია“ – თქვა მდინარაძემ. რას ნიშნავს ეს „უამრავი“?

მაშინ, როდესაც მთელ ამ საქმეებს ადევს გრიფით საიდუმლო, ადვოკატი შეზღუდულია გაუთქმელობის გამო და არ შეუძლია საქმესთან დაკავშირებით რაიმე თქვას, ასე შეუძლიათ ყველა ის ადამიანი დააკავონ, ვინც ინგლისურად ლაპარაკობს, ვინც უცხოელს ელაპარაკება, ან დადის უცხოეთში. ასი წელი ვერაფერს გაიგებ, რატომ არის ეს თუ ის ადამიანი დაკავებული თუ არა პოლიტიკური სარჩული.

როდესაც მთელი დასავლეთი რუსეთის ჯაშუშებს აძევებს ქვეყნიდან და რუსეთს აღიარებენ მთავარ საფრთხედ, ამ ვითარებაში ოკუპირებული ქვეყნის კოორდინატორი და ყოფილი სუს-ის უფროსი, რომელიც სუს-ის ანგარიშში ღიად წერდა, რომ (ჯერ კიდევ პარლამენტშია შესული და არაფრით განიხილა პარლამენტმა) რუსეთს ყველაფერი აქვს მზად საქართველოს ოკუპირებული რეგიონების ანექსიისთვის, ახლა „დასავლეთის ჯაშუშებს“ ადებს ხელს.

• ძალიან მტრული განცხადება გააკეთა საფრანგეთმაო – ასე თქვა მდინარაძემ. რა იგულისხმა „მტრულში“?

სიმართლე გითხრათ, ცოტა არეულად ლაპარაკობდა და დიდი შინაარსი ვერც გამოვიტანე მისი ლაპარაკიდან, მიუხედავად იმისა, რომ სერიოზულად უნდოდა წარმოჩენილიყო კოორდინატორის პოზიციიდან.

მაგრამ რუსეთის, ირანის და საფრანგეთის გათანაბრება აჩვენებს, რომ პოლიტიკური შინაარსი, პოლიტიკური მდგენელი აქვს ამ დაკავებებს და არაფერ კავშირში არ უნდა იყოს სახელმწიფო ინტერესებთან. მით უფრო მაშინ, როცა ფარცხალაძე ჰყავს აშშ-ს დასანქცირებული და მხილებული რუსეთის სასარგებლოდ ჯაშუშობაში – ესენი ამბრაზურასავით გადაეფარნენ და გაატანეს ქვეყნიდან სანქცირებული ფული და ქონება.

მოქალაქეობაც კი დაგვიანებით ჩამოართვეს და დადიოდა ეს რომანოვ-ფარცხალაძე საქართველოში ისე, რომ პრობლემა არ შეჰქმნია, სანამ ჯანგველაძის მკვლელობის საქმე არ წამოვიდა. ესეც ისევ და ისევ პარტიის ინტერესით და არა სამართლით.

შესაბამისად, მე ვერ ვხედავ რეალურ საფუძველს, რომ „ქართული ოცნება“ რუსეთის ჯაშუშებს დასდევს – არა. ეს არის პოლიტიკურად მოტივირებული პროცესი.

• იმ პირებზე რას ფიქრობთ, ვინც დააკავეს ჯაშუშობის ბრალდებით?

გულბაათ რცხილაძეს – ყველამ იცოდა, რომ ეს კაცი რუსეთის ინტერესებს ატარებდა საქართველოში და პრორუსულ საქმიანობას ახორციელებდა. არც ის იქნებოდა საიდუმლო, რომ, სავარაუდოდ, ჩემოდნით დაჰქონდა ფული, მაგრამ რატომ ჩასვეს ის დღეს და არა ორი წლის წინ ვთქვათ – რცხილაძემ გააკეთა განცხადება, რომ აპირებდა რუსოფობიის შესწავლას საქართველოში და მერე მოსთხოვდა მდინარაძეს რეაგირება მოეხდინა ამაზე.

არ უნდა დაგვავიწყდეს, პუტინს აქვს შესაბამისი აქტი მიღებული, რომ რუსოფობიული გამოთქმების გამო მათ შეუძლიათ ჯარიც კი გამოიყვანონ ოპონენტი ქვეყნის წინააღმდეგ. აქ ძალიან გაიჭედა ალბათ „ქართული ოცნება“, რადგან ის არ არის იმ დონეზე ძლიერი, რომ ასეთი ნაბიჯი გადადგას თუნდაც იმ ათასობით მოქალაქის წინააღმდეგ, რომლებიც ამბობენ, რომ რუსეთი ოკუპანტია.

• სხვა ადამიანებიც ვიცით, რომლებიც პირდაპირ აცხადებენ, რომ პრორუსები არიან, კრემლის წინ იღებენ ფოტოებს და პუტინს გულშემატკივრობენ. პრიმაკოვის რუსულ ფონდთან დაკავშირებით არაერთი კითხვა დაგვისვამს, თუმცა არ გაუციათ პასუხი ამ კითხვებისთვის. რას აჩვენებს ეს?

მათი ინტერესი არ არის აქ რუსეთის გავლენის ინფრასტრუქტურის ამოძირკვა, მათი ინტერესია რეჟიმის დაცვა. შესაბამისად, რასაც ვუყურებთ, მიუხედავად იმისა, რომ სააკაშვილის დროსაც პოლიტიზებულად იყო ხოლმე ეს ინსტრუმენტი გამოყენებული, ეს მასშტაბი და ხარისხი ნამდვილად არ ყოფილა.

რაც მთავარია, მდინარაძემ თითი დაუქნია დასავლეთს და უთხრა, რომ შენი სპეცსამსახურების მუშაობა საქართველოში შეაჩერე, თორემ ნახე რას გიზამთ. იგივე არ გააკეთა რუსეთზე მაშინ, როდესაც მან შეგნებულად, თავისი სახელისუფლებო არხების მეშვეობით თქვა, რომ რუსეთი, ირანი და საფრანგეთი თურმე ერთად გვებრძვიან.

ბოლო რეზოლუცია, რომელიც იყო საფრანგეთის ივანიშვილის სანქცირებასთან დაკავშირებით, სავარაუდოდ ესეც უნდა იყოს პოლიტიკური მოტივი. ეს მუქარაც, რომელიც დღეს მოვისმინეთ მდინარაძისგან, მიტოვებს ეჭვებს, რომ ალბათ დაიჭერენ ყველა იმ ადამიანს, ვინც შესაძლოა საფრთხე იყოს რეჟიმისთვის და დააბრალებენ დასავლეთის ჯაშუშობას.

კომპეტენცია და სახელმწიფო ინტერესები ნამდვილად არ ჩანს ამ ბრიფინგების სერიაში, რაც ჯაშუშობას უკავშირდება. თუმცა ვხედავთ, რომ ერთგვარი გათანაბრება ხდება დასავლეთის და რუსეთის, თუმცა თითის ქნევით საუბრობენ დასავლეთზე არა რუსეთზე. ეს, მგონი, ძალიან მკაფიოდ ჩანდა მდინარაძის ამ ბოლო ბრიფინგების სერიაში.

• მდინარაძე ივანიშვილის გარეშე ვერ დაუქნევს თითს დასავლეთს. ეს ნიშნავს, რომ დასავლეთთან ვერ გამონახა ივანიშვილმა საერთო ენა ვერცერთ საკითხში?

ისინი არ ცდილობენ დასავლეთთან ენის გამონახვას. ისინი ცდილობენ ტრანზაქციულ ურთიერთობას შეერთებულ შტატებთან. ეს, ცხადია, არ გამოსდით. ისინი ცდილობენ დასავლეთს უთხრან, რომ მიიღონ ისეთები, როგორებიც არიან.

დასავლეთისგან არც კრიტიკა წყდება და არც ქართველი ხალხის მხარდაჭერა. შესაბამისად, ორი წელია ისინი ფსონს დებენ მოსკოვზე, მაგრამ იმასაც ვხედავთ, როგორ სუსტდება მოსკოვი რეგიონში. ამასობაში, ამ არასწორი ფსონის გამო, თუ რამე სტრატეგიული პარტნიორობა გვქონდა დასავლეთისგან, ყველაფერი გადავიდა სომხეთსა და აზერბაიჯანში და საქართველო მართლა ბედის ანაბარა დატოვებული.

• ამ დღეებში ზახაროვა აქებდა „ოცნებას“, მრავალპოლუსიან პოლიტიკას ინარჩუნებენო, ამის ჩვენება უნდათ ამ დაკავებებით, რომ თითქოს არც რუსეთის „აგენტებს“ ინდობენ და არც დასავლეთის – ამის გაგრძელებაა ეს?

ის „სუვერენიტეტი“, რასაც „ქართული ოცნება“ აწვება, რუსული კონცეფციის გაგრძელებაა, სურკოვის „სუვერენული დემოკრატიაა“. როდესაც ისინი ამ გზით იცავენ თავს დასავლეთის კრიტიკისგან, დემოკრატიის უკუსვლასა და ხელყოფასთან დაკავშირებით. რეგიონში გრძელვადიანი მშვიდობის და კეთილდღეობის რეალური პერსპექტივა, ამერიკისა და დასავლეთის მტკიცე გარანტიებით, სწორედ დღეს იქმნება, მაგრამ ამ პროცესიდან სრულიად ამოვარდნილია საქართველო ივანიშვილის პოლიტიკის წყალობით.

მაშინ გვითხრას მამუკა მდინარაძემ, როგორ აქვთ „სუვერენული საქართველო“, როცა მის ხელმოწერილ სუს-ის ანგარიშში წერია, რომ რუსეთს ყველაფერი მზად აქვს ანექსიისთვის და უბრალოდ ხელსაყრელ დროს ელოდება. ამაზე არც მაკა ბოჭორიშვილი იღებს ხმას და არც არავინ მათი ხელისუფლებიდან.

ეს კიდევ ერთხელ მეტყველებს იმ სიყალბეზე, რასაც ისინი სუვერენიტეტის სახელით ფუთავენ იმისთვის, რომ საქართველო დააშორონ ცივილიზაციურ არჩევანს. არავითარი მრავალვექტორულობა აქ არ გვაქვს. ერთი ვექტორია მხოლოდ – ეს არის რუსეთი.

ზახაროვა იმავე ვრცელ ინტერვიუში ცალკე სახელმწიფოებად მოიხსენიებს ოკუპირებულ ცხინვალს და აფხაზეთს, მათ ინტეგრაციაზე საუბრობს. ეს ძალიან კარგად იცის მამუკა მდინარაძემ, მაგრამ ამას უყურებს უჩუმრად და ეს ყველაფერი ნათელს ხდის მთელ ამ საქმეს.

ჩემი აზრით, მთელი ეს ციკლი, გარკვეულწილად მუქარა და გაფრთხილება არა ნამდვილი სპეცსამსახურების წინააღმდეგ, არამედ უბრალო მოქალაქეების წინააღმდეგ იმისთვის, რომ დაიცვან რეჟიმი.

• „სიძულვილის ენის“ კონტექსტშიც ახსენეს დღეს „გარე ძალები“ – თითქოს იქიდან არის თავსმოხვეული აგრესია.

მით უფრო გაუგებარი იყო მდინარაძის ნათქვამი, რომ გააფრთხილა თურმე გულბაათ რცხილაძე, რომ მოშვებულიყო ამ საქმეს. ანუ იცის, რომ კაცი ჯაშუშია, იცის, რომ ქვეყანას ღალატობს და გააფრთხილა გაჩერდიო. არ გაჩერდა და მერე დაიჭირა.

უბრალოდ, რეჟიმმა დაინახა ის საფრთხე, რომ რცხილაძის საქმიანობიდან გამომდინარე ფეისბუქზე ანტირუსულ გამონათქვამებზე მოუწევდათ რეაგირება და ამას მოჰყვებოდა დაჭერები, რასაც ამას ვეღარ გაუძლებდა „ოცნება“.

სავარაუდოდ, ეს უნდა ყოფილიყო რცხილაძის დაკავების ერთ-ერთი მიზეზი, თორემ რცხილაძეს გუშინ კი არ დაუწყია რუსეთზე მუშაობა – ეს ეწერა კიდეც არაერთი არასამთავრობო ორგანიზაციის ანგარიშებში.

კიდევ ერთხელ ვამბობ, რომ რუსეთი აქ გვარიანად მუშაობს თავისი ქსელით და „ოცნების“ მოქმედება ნამდვილად არ ჯდება იმ პოლიტიკაში, რომელიც ნამდვილი სუვერენიტეტის დამცველია. ეს გულისხმობს მხოლოდ იმას, რომ რეჟიმი აქ დამკვიდრდეს სამარადჟამოდ.

დღეს, პირველ ივნისს, შინაგან საქმეთა სამინისტროს ადამიანის უფლებათა დაცვის დეპარტამენტში ამოქმედდა „სიძულვილის ენის წინააღმდეგ“ სამმართველო.

სამმართველოს თამთა ქიმბარიშვილი უხელმძღვანელებს, რომელიც აქამდე შსს-ს იურისტი იყო. მის მიმართ გაკეთებული ფეისბუქის კომენტარის გამო ერთი მოქალაქე დააჯარიმეს კიდეც.

თამთა ქიმბარიშვილის განცხადებით, ახალი სამმართველოს ფუნქციაა, „სოციალურ ქსელსა თუ მედიაში, საჯაროდ გავრცელებული, შეურაცხმყოფელი, ადამიანის ღირსების შემლახველი სიძულვილის ენის შემცველი განცხადებების მონიტორინგი და პროაქტიული გამოვლენა“.

მისი თქმით, „პროაქტიულად გამოვლენილი“ კომენტარების შემდეგ, შედგება სამართალდარღვევის ოქმი, რომელიც გადაიგზავნება სასამართლოებში.

დღეს, პირველ ივნისს, ამ სამმართველოსთან დაკავშირებით განცხადებები გააკეთა მამუკა მდინარაძემაც. მას ბრიფინგზე ჰკითხეს, ფიქრობს თუ არა, რომ ახალი სამმართველოს შექმნა ემსახურება სიტყვისა და გამოხატვის თავისუფლების შეზღუდვას. მდინარაძის თქმით, ახალი სამმართველო „ბევრ კეთილ საქმეებს“ ემსახურება.

მას გაუხსენეს შემთხვევები, როცა „ქართული ოცნების“ პარლამენტის წევრები თავს ესხმოდნენ ოპოზიციის ქალ დეპუტატებს, სიტყვიერ შეურაცხყოფას აყენებდნენ და აგინებდნენ კიდეც და ჰკითხეს, იქნება თუ არა ასეთ შემთხვევებზე რეაგირება.

მდინარაძე ამბობს, რომ ამაზე მაშინ უნდა ისაუბროს საზოგადოებამ, თუ მხოლოდ ერთი მხარის დასჯის შემთხვევა იქნება და მეორე მხარის – არა.

____________________

ფოტოზე: თამთა ქიმბარიშვილი

გასულ კვირას კვარიათში ზღვამ კიდევ ერთი მკვდარი დელფინი გამორიყა. სანაპიროზე დელფინების გამორიყვაზე სოციალურ ქსელში დღეს, პირველ ივნისსაც წერენ.

ძირითადი შემთხვევების აღრიცხვას იქთიოლოგი, ბიოლოგიის დოქტორი არჩილ გუჩმანიძე აწარმოებს. მისი ინფორმაციით, პირველი მარტიდან პირველ მაისამდე პერიოდში, მხოლოდ სარფი-ანაკლიის მონაკვეთზე, ზღვამ 40-მდე დელფინი გამორიყა და ეს ყველაზე მაღალი მაჩვენებელია ბოლო ათი წლის განმავლობაში.

არჩილ გუჩმანიძე შავი ზღვის სანაპიროზე დელფინების გამორიყვის მონიტორინგს წლებია აწარმოებს და მას ანალიზისთვის 17 წლის მონაცემები აქვს შეგროვებული.

ამ შემთხვევების შემდეგ გარემოს ეროვნულმა სააგენტომ განაცხადა, რომ შემთხვევების შესწავლა დაიწყო და ინფორმაციას გაგვიზიარებდნენ, როგორც კი მოხერხდებოდა დადგენა, თუ რასთან გვაქვს საქმე.

გასულ კვირას კვარიათში კიდევ ერთი დელფინის გამორიყვის შემდეგ გარემოს ეროვნულ სააგენტოს ვკითხეთ, რა გამოარკვიეს ამ კონკრეტულ შემთხვევაზე და ზოგადად რა დადგინდა დელფინების გამორიყვის სტატისტიკის გაზრდასთან დაკავშირებით.

რამდენიმე დღის შემდეგ გარემოს დაცვის სააგენტოდან მოგვწერეს, რომ შავ ზღვის სანაპიროზე დელფინების გამორიყვის ფაქტთან დაკავშირებით კომპლექსური კვლევა ჩაატარეს და დელფინების დაავადების ფაქტი არ დაფიქსირდა.

„შავი ზღვის წყლის ჰიდრო ბიოლოგიური და ქიმიური სინჯებში განისაზღვრა 27 კომპონენტი. განსაზღვრული კომპონენტების შემცველობა სინჯებში ნორმის ფარგლებში დაფიქსირდა.

ასევე, გარემოს ეროვნული სააგენტო ახორციელებს შავი ზღვის საქართველოს სანაპირო ზოლისა და კონტინენტური შელფის მონიტორინგს, მათ შორის მიკრობიოლოგიურ მონიტორინგს ყოველთვიურად, სარფი–ანაკლიის მონაკვეთის 10 სადგურზე, ხოლო ჰიდრობიოლოგიურ მონიტორინგს სეზონურად, სარფი–ანაკლიის აკვატორიის 20-ზე მეტ სადგურზე.
სააგენტოს მიერ ჩატარებული მიკრობიოლოგიური მონიტორინგის შედეგებით, საქართველოს შავი ზღვის სანაპირო წყლებში ძირითადი მიკრობიოლოგიური პარამეტრები სანიტარიული ნორმების ფარგლებშია.

ამასთანავე, არ დაფიქსირებულა წყალმცენარეების „ყვავილობის“ შემთხვევები. აქვე აღსანიშნავია, რომ სურსათის ეროვნული სააგენტოს მიერ განახორციელდა გამორიყული ცხოველების ლაბორატორიული კვლევა. ჩატარებული ლაბორატორიული კვლევებით, დელფინების დაავადების ფაქტი არ დაფიქსირდა“ – მოგვწერეს სააგენტოდან.

ამავე დროს, კვლევასთან დაკავშირებული დოკუმენტები ჩვენთვის არ მოუწოდებიათ და არც საჯარო გაცნობისთვის გამოუქვეყნებიათ. „ბათუმელები“ კვლევის შედეგებს სააგენტოდან ოფიციალურად გამოითხოვს.

სააგენტო ასევე გვწერს, რომ გარემოს ეროვნული სააგენტო უწყვეტ რეჟიმში ახორციელებს შავი ზღვის წყლის ხარისხის მონიტორინგს.

„ჰიდრობიოლოგიური და ქიმიური პარამეტრები ყოველთვიურად 14 წერტილში ისაზღვრება, მათ შორის, 13 მძიმე მეტალი, ნავთობის ჯამური ნახშირწყალბადები, 16 პოლიარომატული ნახშირწყალბადისა და სხვა ფიზიკურ-ქიმიური პარამეტრის კონცენტრაცია“ – აცხადებს სააგენტო.

ამავე თემაზე:

საავტომობილო გზების დეპარტამენტის განცხადებით გრიგოლეთი-ქობულეთის შემოვლითი გზის 3 კილომეტრიან მონაკვეთზე სამშენებლო სამუშაოები 2026 წელს დასრულდება.

ეს მონაკვეთი ხიდმაღალა-წყალწმინდის ტერიტორიაზე შენდება. მთლიანი მაგისტრალი ხიდმაღალასა და ქობულეთის შემოვლით გზას შორის კი მინიმუმ 2023 წელს მაინც უნდა დასრულებულიყო.

გრიგოლეთი-ქობულეთის შემოვლითი გზის 4-ზოლიანი მონაკვეთი აღმოსავლეთ-დასავლეთის ჩქაროსნული ავტომაგისტრალის [E60-ის] შემადგენელი ნაწილია. ამ გზის სიგრძე 14.4 კილომეტრია, საიდანაც მხოლოდ 11 კილომეტრია გახსნილი [ჯერ 5-კილომეტრიანი მონაკვეთი გახსნეს, შემდეგ 6 კილომეტრი].

მშენებარე 3-კილომეტრიანი მონაკვეთი კი, რომელიც დეპარტამენტის განცხადებით წელს უნდა დასრულდეს, სუფსის წრიულთან იწყება და წყალწმინდის წრიულის მიმდებარედ მთავრდება.

საქართველოს საავტომობილო გზების დეპარტამენტის მიერ „ბათუმელებისთვის“ 2022 წლის აგვისტოში მოწოდებული ინფორმაციით, გრიგოლეთი-ქობულეთის გზის სამშენებლო სამუშაოები ეტაპობრივად 2022-2023 წლებში უნდა დასრულებულიყო. სახელშეკრულებო ღირებულება 228 721 622 ლარია. პროექტი დაფინანსებულია ევროპის საინვესტიციო ბანკის [EIB] მიერ.

გრიგოლეთი-ქობულეთის გზის მშენებლობასთან დაკავშირებით 2025 წლის ივლისში ინფრასტრუქტურის სამინისტროში განაცხადეს, რომ მშენებელ კომპანიასთან ხელშეკრულება შეწყდა.

გრიგოლეთი-ქობულეთის შემოვლითი გზა, როცა აღნიშნული 3-კილომეტრიანი მონაკვეთიც დასრულდება, ერთმანეთთან უკვე ქობულეთის შემოვლით და სამტრედია-გრიგოლეთის ჩქაროსნულ მაგისტრალს დააკავშირებს.

სამტრედია-გრიგოლეთის მაგისტრალის ხაჯალია-სუფსის მონაკვეთი კი ამ დროისთვის მთლიანად ჩაკეტილია. საქართველოს საავტომობილო გზების დეპარტამენტის განცხადებით, შეზღუდვა 2026 წლის 30 ივნისის ჩათვლით გაგრძელდება. 

ამ თემაზე ვრცლად: ხაჯალია-სუფსის გზა ჩაკეტილია – ავტობანზე, რომელიც 3 წლის წინ გაიხსნა, 8 მილიონამდე ლარი იხარჯება

რაც შეეხება უშუალოდ სამტრედია-გრიგოლეთის მაგისტრალს, ის 4 მონაკვეთად[ლოტად] შენდებოდა და პრობლემები აქაცაა. ეს მაგისტრალიც მაქსიმუმ 2020 წელს მთლიანად უნდა დასრულებულიყო.

მთავარ ფოტოზე: ავტობანის ხიდმაღალა-წყალწმინდის მშენებარე მონაკვეთი [ხიდი მდინარე სუფსაზე]. გზების დეპარტამენტის ფოტო

„არ მომწონდა კომუნისტები. დამოუკიდებლობა მომწონს. სხვანაირად არ გამიგოთ და არასდროს არ მიყვარდა რუსეთი. 26 მაისი არის საქართველოს დამოუკიდებლობის დღე,“ – ამბობს 103 წლის ქეთევან ლორია.

ქეთევან ლორია ბათუმში ცხოვრობს. 103 წლის 14 მაისს გახდა.

„მშვიდად ვცხოვრობ ჩემს ძვირფას ოჯახთან ერთადო,“ – გვეუბნება და საკუთარი ცხოვრების ისტორიას გვიყვება.

ქეთევან ლორია 1924 წლის 14 მაისს სამტრედიაში, სოფელ მეორე ნიგორზღვაში დაიბადა. მამა ადრეულ ასაკში გარდაეცვალა. ქეთევანი და მისი და დედამ მარტომ გაზარდა.

სკოლა სოფელ საჯავახოში დაამთავრა, შემდეგ კი სწავლა თბილისის სახელმწიფო უნივერსიტეტში განაგრძო. თუმცა მალევე შეწყვიტა და ბათუმის პედაგოგიურ ინსტიტუტში გადმოიტანა საბუთები.

პროფესიით ფილოლოგია.

„56 წელი ვიმუშავე სოფელ მეჯინისწყლის საჯარო სკოლაში. ქართულს ვასწავლიდი. ძალიან ბევრი ბავშვი მყავს აღზრდილი. თავის ქებაში არ ჩამომართვათ, მაგრამ ძალიან ვუყვარდი ჩემს მოსწავლეებს.

ერთხელ ერთმა ჩემმა მოსწავლემ მითხრა: „ქეთო მასწავლებელო, თქვენი გაკვეთილებისთვის თუ მოვალ სკოლაში, თორემ ისე რა მინდა აქო“.

ყველას ვუყვარდი,“ – იხსენებს 103 წლის მასწავლებელი „ბათუმელებთან“.

ქეთევან ლორიას ერთი შვილი, რძალი და ორი შვილიშვილი ჰყავს. მათთან ერთად ცხოვრობს.

„ჩემი ხანგრძლივი ცხოვრების საიდუმლო რა არის იცით? კაი რძალი მყავს. გადასარევი გოგოა, მივლის. კარგად ვარ, მშვიდად ვცხოვრობ მასთან.

ყოველთვის მშვიდი ცხოვრება მქონდა. ამ ოჯახში „გამიშვი-გაგიშობ“ არ არის. ყველა ტკბილად, თბილად და ერთმანეთის პატივისცემით ვცხოვრობთ. ყველაზე ძვირფასი ჩემთვის ჩემი ოჯახია,“ – ამბობს ქეთევან ლორია.

თავისი ხანგრძლივი ცხოვრების განმავლობაში, მოესწრო ბევრ გარდამტეხ ცვლილებას, რამაც ქვეყნის ბედი შეცვალა.

ამბობს, რომ არ უყვარდა კომუნისტები, განსაკუთრებით უყვარს 26 მაისი, საქართველოს დამოუკიდებლობის დღე.

„არ მომწონდა კომუნისტები. დამოუკიდებლობა მომწონს. გამოვეყავით რუსეთს. 26 მაისი ეს არის საქართველოს დამოუკიდებლობის დღე. რუსეთს არ ვემორჩილებით, გვაქვს ჩვენი რესურსები და ვცხოვრობთ დამოუკიდებლად.

ჩემს ქვეყანას ვუსურვებ სიკეთეს. ერთმანეთის გატანას.

„კლდემ მხოლოდ ერთხელ სთქვა: გიყვარდეთ კაცნო ერთმანეთი“. ეს არის ჩემი სათქმელი მომავალი თაობისთვის,“ – ამბობს ქეთევან ლორია.

აჭარაში 100 წელს გადაცილებული 25 ადამიანი ცხოვრობს. მათგან ყველაზე უხუცესი 111 წლის ნაქიფე დავითაძეა.

„ზურაბ მენთეშაშვილი პირველი პოლიტიკური პატიმარია, რომელსაც შეკრების დროს გზის გადაკეტვის კრიმინალიზების გამო მსჯავრი დაედო… მშვიდობიან პროტესტში მონაწილეობისთვის პირის სისხლის სამართლის წესით მსჯავრდება უხეშად არღვევს საქართველოს კონსტიტუციას და წარმოადგენს ადამიანის უფლებების საბაზისო პრინციპების იმგვარ უგულებელყოფას, რომელიც აუცილებლად უნდა გახდეს საქმეში მონაწილე პირების სამომავლო პასუხისმგებლობის საფუძველი,“ – სამართლებრივ შეფასებას „სოციალური სამართლიანობის ცენტრი“ დღეს, 30 მაისს აქვეყნებს.

• 2026 წლის 29 მაისს, თბილისის საქალაქო სასამართლოში მოსამართლე ნინო გალუსტაშვილმა 61 წლის ზურა მენთეშაშვილს 9 თვით დააპატიმრა. პროტესტის აქტიურ მონაწილეს ედავებოდნენ საპროტესტო აქციის დროს გადაკეტილ გზაზე განმეორებით დგომას, რაც „ოცნების“ მზარდად რეპრესიული რეგულაციებით, უკვე სისხლის სამართლის დანაშაულია. ზურა მენთეშაშვილი შვიდი თვეა, რაც პატიმრობაშია. ის 31 ოქტომბერს ღამით დააკავეს. შესაბამისად, ციხეს 2 თვეში დატოვებს.

„საქართველოს საკონსტიტუციო და ევროპულ სასამართლოების პოზიციით, მოძრაობის შეფერხების გამო ამგვარი შეზღუდვები შეკრების თავისუფლების არსს ეწინააღმდეგება. საქართველოს საკონსტიტუციო სასამართლოს განმარტებით, თუ შეკრება სხვათა გადაადგილების შეზღუდვის გარეშე შეუძლებელია, მაშინ უპირატესობა მას უნდა მიენიჭოს.

სასამართლო ასაბუთებს ამ სტანდარტის ლოგიკასაც. კერძოდ, თუ შეკრების კონკრეტულ დროსა და ადგილის ჩატარების შეუძლებლობამ მას სრულად შეიძლება დააკარგვინოს მნიშვნელობა, გადაადგილების თავისუფლების შეზღუდვა დროებითია, და მათ შორის, გადაუდებელი სერვისების შემთხვევაშიც კი, მათი მიწოდება ალტერნატიული სავალი გზის საშუალებითაც არის შესაძლებელი.[1] ამასთან, საკონსტიტუციო სასამართლო შეკრების თავისუფლებით დაცულ სფეროში აქცევს შეკრების მონაწილეების მცდელობას „მიიპყრონ რაც შეიძლება მეტი ადამიანის ყურადღება“, რისთვისაც ირჩევენ ხალხმრავალ ადგილებს, ქალაქის მთავარ ქუჩებსა თუ მოედნებს, კონკრეტული ორგანოებისა თუ დაწესებულებების ახლომდებარე ტერიტორიებს.

რაც მთავარია, ზომები, როგორიცაა დაკავების ან/და პატიმრობის ზომები, მათი მსუსხავი ეფექტიდან გამომდინარე, არ უნდა იქნეს გამოყენებული არაძალადობრივი ქმედების პასუხად, როგორიცაა გზის გადაკეტვით მოძრაობის შეფერხება იმ შემთხვევაშიც თუ ის შეკრების წესებს არღვევს, ასეთი ზომების გამოყენებისას კი აუცილებელია საზოგადოებრივი უსაფრთხოებისთვის უფრო სერიოზული რისკების დასაბუთება.

ევროპული სასამართლოს სიტყვებით, „სისხლის სამართლებრივი ღონისძიებების [რაც ევროპული კონვენციის მიზნებისთვის მოიცავს ადმინისტრაციულ სამართლებრივ პასუხისმგებლობას, მათ შორის, ჯარიმებსაც] პროტესტის მონაწილეების წინააღმდეგ გამოყენება ყოველთვის განსაკუთრებულ დასაბუთებას საჭიროებს და მშვიდობიანი პროტესტი, პრინციპის დონეზე, არ უნდა იწვევდეს სისხლისსამართლებრივი პასუხისმგებლობის დაკისრების რისკებს”.

შეკრების თავისუფლებასთან დაკავშირებული ქმედებებისთვის პასუხისმგებლობის დამძიმების რამდენიმე ტალღა მკაცრად გააკრიტიკა ვენეციის კომისიამ და ეუთო-ოდირმა, რომლებმაც ისინი „შეკრების მშვიდობიან მონაწილეებზე“ სისტემური რეპრესიების ჭრილში განიხილა და ადამიანის უფლებების სტანდარტებთან, ისევე, როგორც სამართლის უზენაესობის პრინციპებთან შეუსაბამოდ მიიჩნია.

[4] ეუთო-ოდირის ბოლო დასკვნაში ბუნდოვნად ფორმულირებული სამართალდარღვევებისთვის დამძიმებული სანქციები ბრალის გარეშე პასუხისმგებლობის [strict liability] ფორმად და პრევენციულ შეზღუდვად [prior restraint], უალტერნატივო/ავტომატური თავისუფლების აღკვეთის ზომები კი, განსაკუთრებით სახის ამომცნობ ტექნოლოგიებთან კომბინაციაში რუტინული გამოყენების გამო, სერიოზულ „მსუსხავ ეფექტის“ მატარებლად იქნა შეფასებული.

მეტიც, ეუთო-ოდირმა პირდაპირ მიუთითა სახელმწიფოს მიერ დასახელებული ლეგიტიმური მიზნების არაავთენტურობაზე და რეალური მიზნებისა და აღსრულების პრაქტიკების უფლებრივ სტანდარტებთან შეუსაბამობაზეც.[5]

საკანონმდებლო ცვლილებები, რომელთა საფუძველზეც ზურაბ მენთეშაშვილს 9-თვიანი პატიმრობა მიესაჯა, საკონსტიტუციო სასამართლოში გაასაჩივრა საქართველოს სახალხო დამცველმაც. კერძოდ, კონსტიტუციური სარჩელით, მათ შორის, სადავოდ არის გამხდარი საქართველოს სისხლის სამართლის კოდექსით დაწესებული სისხლისსამართლებრივი პასუხისმგებლობა, რომელიც ადმინისტრაციულ სახდელდადებული პირის მიერ იმავე ქმედების განმეორებით ჩადენისათვის შეკრების ან მანიფესტაციის მონაწილის, მათ შორის, არასრულწლოვანისა და ორგანიზატორის მიმართ დაწესებული თავისუფლების აღკვეთას ითვალისწინებს.

ამდენად, მშვიდობიან შეკრებაში მონაწილეობის გამო ზურა მენთეშაშვილისთვის სისხსისსამართლებრივი პასუხისმგებლობის დაკისრება ქვეყანაში არსებული ადამიანის უფლებების უმწვავესი კრიზისის და სამართლის უზენაესობის პრინციპის რღვევის გამოვლინებაა.

სისხლისსამართლებრივი ზომების გამოყენება ისეთი ქმედებაზე პასუხად, რომელიც საქართველოს საკონსტიტუციო სასამართლოსა და ადამიანის უფლებათა ევროპული სასამართლოს პრაქტიკის მიხედვით შეკრების თავისუფლებით დაცულ სფეროში ექცევა, თავისუფლების თვითნებურ აღკვეთად უნდა მივიჩნიოთ,“ – აღნიშნულია სოციალური სამართლიანობის ცენტრის მიერ გავრცელებულ შეფასებაში.

ამ თემაზე:

გიდები ვალდებული არიან დარეგისტრირდნენ ტურიზმის ეროვნული ადმინისტრაციის ბაზაში. კანონში „ტურიზმის შესახებ“ ცვლილებები შევიდა, რაც პარლამენტმა 28 მაისს მიიღო და პრეზიდენტისგან უკვე ხელმოწერილია.

„ტურისტული საქმიანობის სუბიექტები − ტურისტული გიდი, ტუროპერატორი, ტურისტული სააგენტო [ტურაგენტი] − ვალდებული არიან ტურისტული საქმიანობის შესახებ მონაცემების აღრიცხვის უზრუნველსაყოფად დარეგისტრირდნენ საჯარო სამართლის იურიდიული პირის − საქართველოს ტურიზმის ეროვნული ადმინისტრაციის ტურისტული საქმიანობის სუბიექტების ბაზაში…

ტურისტული საქმიანობის სუბიექტი ვალდებულია შესაბამისი საქმიანობის დაწყების ან შეწყვეტის ან/და ამ საქმიანობასთან დაკავშირებული ნებისმიერი მონაცემის ცვლილების შემთხვევაში წერილობით მიაწოდოს საჯარო სამართლის იურიდიულ პირს − საქართველოს ტურიზმის ეროვნულ ადმინისტრაციას სათანადო ინფორმაცია.“ – აღნიშნულია კანონში.

• კანონში „ტურიზმის შესახებ“ ცვლილებები შევიდა ასევე რისკის შემცველ ტურისტულ მომსახურეობებზეც:

„საქართველოს მთავრობა დადგენილებით ადგენს საქართველოს ტერიტორიაზე რისკის შემცველი ტურისტული მომსახურებების ნუსხას და მათი განხორციელების წესს, აგრეთვე განსაზღვრავს რისკის შემცველ ტურისტულ მომსახურებებს, რომელთა მიმწოდებლებს ევალებათ, ჰქონდეთ პროფესიული პასუხისმგებლობის ან/და სამოქალაქო პასუხისმგებლობის სადაზღვევო მოწმობა [პოლისი], ასევე ადგენს დაზღვევის პირობებს და მისი განხორციელების წესს.

საქართველოს მთავრობის დადგენილებით განისაზღვრება რისკის შემცველი ტურისტული მომსახურებები, რომელთა განმახორციელებელ პირთა [პერსონალის] სერტიფიცირებას უზრუნველყოფს საჯარო სამართლის იურიდიული პირი − საქართველოს ტურიზმის ეროვნული ადმინისტრაცია. საქართველოს მთავრობის დადგენილებით ასევე განისაზღვრება რისკის შემცველი ტურისტული მომსახურებები, რომელთა მიმწოდებლებს მათი განხორციელების უფლებას მიანიჭებს საჯარო სამართლის იურიდიული პირი − საქართველოს ტურიზმის ეროვნული ადმინისტრაცია ან საქართველოს მთავრობის დადგენილებით გათვალისწინებული შესაბამისი სუბიექტი.

საჯარო სამართლის იურიდიული პირი − საქართველოს ტურიზმის ეროვნული ადმინისტრაცია აწარმოებს რისკის შემცველი ტურისტული მომსახურების მიმწოდებელთა რეესტრს,“- აღნიშნულია კანონში.

ამავე კანონის მიხედვით, რისკის შემცველის ტურისტული მომსახურების გაწევა შესაბამისი სერთიფიკატის გარეშე დაჯარიმდება 3 ათასი ლარით.

ბათუმის სახელმწიფო უნივერსიტეტის პროფესორს – ი.მ.-ს სტუდენტების ელექტრონულ სისტემაში უკანონოდ შეღწევასა და სხვა ლექტორების დისკრედიტაციაში ადანაშაულებენ.

ამბავი ბსუ-ში 2024 წელს მოხდა: რამდენიმე პროფესორის შეფასების პლატფორმაზე სტუდენტების სახელით დაწერილი ნეგატიური და შეურაცხმყოფელი კომენტარები ერთდროულად გაჩნდა. მოგვიანებით გაირკვა, რომ კომენტარები სტუდენტებს კი არ დაუწერიათ, არამედ პროფესორმა ი.მ.-მ დაუწერა კოლეგებს და სტუდენტების სახელი გამოიყენა.

ბსუ-ში სტუდენტების ელექტრონულ სისტემაში უკანონო შეღწევის ფაქტზე შსს-მ გამოძიება დაიწყო სისხლის სამართლის კოდექსის 284-ე მუხლის საფუძველზე. ეს ინფორმაცია დაგვიდასტურეს უნივერსიტეტის ადმინისტრაციაში, თუმცა ამ ეტაპზე პასუხი არავის უგია.

უნივერსიტეტში მომხდარი სავარაუდო დანაშაულის შესახებ ბსუ-ს რექტორის მოვალეობის შემსრულებელს, მერაბ ხალვაშს [ის დღეს აღარ წარმოადგენს ადმინისტრაციას, პროფესორია] ინფორმაცია 2024 წლის თებერვალში ჰქონდა, თუმცა მან პროკურატურას 10-თვიანი პაუზის შემდეგ – 2024 წლის დეკემბერში მიმართა. 2024 წლის ნოემბერში კი, პროფესორ ი. მ.-ს მერაბ ხალვაშისთვის მიუწერია წერილი, რომ მას დევნიან პოლიტიკური შეხედულებების გამო და ის „მოქმედი ხელისუფლების აქტიური მხარდამჭერია“.

ახლა უკვე ბსუ-ს რექტორი ტიტე აროშიძეა – უმაღლესი საბჭოს ყოფილი დეპუტატი „ქართული ოცნებიდან“. უნივერსიტეტის ადმინისტრაციაში „ბათუმელებს“ 2026 წლის 6 მაისს უთხრეს, რომ გამოძიების შედეგს ელოდებიან, რომელიც უკვე 2 წელია გრძელდება. უნივერსიტეტის პრესცენტრში ასევე განმარტეს, რომ წესდების მიხედვით, პროფესორს სამსახურიდან ვერ გაუშვებენ საგამოძიებო ორგანოს შესაბამისი დასკვნის გარეშე.

• რა მოხდა? 

ეს ამბავი 2024 წლის 19 იანვარს იწყება – ნათლისღების უქმე დღეს, ბსუ-ს პორტალზე პროფესორ ლაშა ბაჟუნაიშვილს, ასოცირებულ პროფესორს – ლაშა ხოზრევანიძეს და, ასევე, მოწვეულ სპეციალისტებს: გელა ირემაძის და ზეინაბ ასანიძეს სტუდენტებმა შეფასებები დაუწერეს. მაგალითად, ლაშა ბაჟუნაიშვილს დაუკომენტარეს: „ეს ლექციები არის თუ პოლიტიკური პროპაგანდა?“

„უკაცრავად და ლექტორმა თუ იცის ეს საგანი საერთოდ?“ [სტილი დაცულია] – ეს ზეინაბ ასანიძეს დაუწერეს. ლაშა ხოზრევანიძეს დაუკომენტარეს: „ასწავლეთ ამ კაცს ჯერ პოლიტიკა და მერე ჩვენ გვასწავლოს. ელემენტარულ ტერმინებში ვერ ერკვევა“, გელა ირემაძეს კი ასეთი შეფასება დაუწერეს: „ვერ გავიგე ვერაფერი“, „ირემაძემ იცის რამე, დემოგრაფიის აზრზე არაა“.

ლექტორებმა იეჭვეს, რომ ეს ორგანიზებული იყო, უნივერსიტეტის ადმინისტრაცია მიმართეს და დასვეს შეკითხვა: რამდენად არის ეს შეფასებები სტუდენტების მიერ გაკეთებული და ადგილი ხომ არ ჰქონდა ამ შეფასებების გაკეთების მიზნით სტუდენტების პორტალის ავტორიზაციის მონაცემების არამართლზომიერ გამოყენებას?

პროფესორი ლაშა ბაჟუნაიშვილი ამბობს, რომ უშუალოდ მაშინდელი რექტორისგან, მერაბ ხალვაშისგან გაიგეს, რომ შეურაცხმყოფელი კომენტარების ავტორი ამავე უნივერსიტეტის პროფესორი და მათი კოლეგა, ი. მ. იყო. მერაბ ხალვაშმა პროფესორები ი. მ.-ს შეახვედრა, სადაც ი. მ.-ს ბოდიში მოუხდია.

ეს შეხვედრა ბათუმის სახელმწიფო უნივერსიტეტში 2024 წლის 21 თებერვალს შედგა და „ბათუმელებს“ ამ შეხვედრის ამსახველი ტრანსკრიპტი მიაწოდეს, რომლის თანახმადაც შეხვედრაზე პროფესორებს კონკრეტული მოთხოვნები ჰქონდათ – ი. მ. უნდა გათავისუფლდეს ან სხვა დეპარტამენტში განაგრძოს საქმიანობა.

ტრანსკრიპტის თანახმად, საჯარო მმართველობის დეპარტამენტის პროფესორი ი. მ. შეხვედრის დასაწყისში ამბობს:

„…მე ვითხოვ პატიებას მომხდარი ფაქტის გამო, ძალიან ვწუხვართ. პირველ რიგში თქვენთან, როგორც რექტორთან და თქვენი სახით უნივერსიტეტის წინაშე ვიხდი ბოდიშს და ასევე მინდა განსაკუთრებული ბოდიში მოვუხადო ჩემს კოლეგებს ამ ფაქტის გამო, ძალიან ვწუხვართ, არ უნდა მომხდარიყო ვაღიარებ, ვაცნობიერებ და ჩემი მხრიდან გამოვხატავ მზაობას, რა ვიცი, სამომავლო თანამშრომლობისთვის, კოლეგიალური თანამშრომლობისთვის“.

ამ შეხვედრის ამსახველ ტრანსკრიპტში, სადაც ი. მ.-ს ეს სიტყვებია დაფიქსირებული, არ ჩანს, როგორ დადასტურდა მისი კავშირი ელ. სისტემაში შეღწევასთან; ვინ გამოარკვია, რომ სტუდენტების პლატფორმაზე ლექტორების მისამართით კონკრეტული კომენტარები ი. მ.-მ დაწერა? ასევე, არ ირკვევა, რა იყო მისი მოტივაცია.

ეს შეხვედრა რომ რეალურად შედგა, ამას ადასტურებს პროფესორი ლაშა ბაჟუნაიშვილიც.

ჩვენ ამ შეხვედრის დეტალებზე გვინდოდა პროფესორ ი. მ.-სთვისაც გვეკითხა, თუმცა მან „ბათუმელების“ შეკითხვებს არ უპასუხა.

საქმეში ი.მ. რომ არის მთავარი ფიგურანტი, ამას უნივერსიტეტში დაწყებული დისციპლინური საქმისწარმოების მასალებიც ცხადყოფს – საინტერესოა ისიც, რომ საქმისწარმოება უნივერსიტეტში 2024 წლის ნოემბერში დაიწყო, მაშინ, როცა ი. მ.-მ მომხდარის გამო ბოდიში მოიხადა 2024 წლის თებერვალში.

• რა ჩანს დოკუმენტებით? 

ამ საქმეშია იურიდიული ფაკულტეტის ხარისხის უზრუნველყოფის სამსახურის უფროსის ბსუ-ს რექტორისთვის მიწერილი წერილი. 2024 წლის თებერვლის შეხვედრის შემდეგ – როცა მაშინდელი რექტორი მერაბ ხალვაში ი. მ.-ს და 4 ლექტორს შეხვდა, ბსუ-ს ხარისხის სამსახურს უცდია იმის გარკვევა, ვინ დაუწერა შეურაცხმყოფელი კომენტარები კონკრეტულ ლექტორებს.

„ასოცირებულ პროფესორ ლაშა ბაჟუნაიშვილის მიერ განხორციელებული სასწავლო კურსის ცივი ომი – ბიპოლარული მსოფლიო შეფასებაში მონაწილეობა მიიღო 44-დან 12 სტუდენტმა… საგულისხმოა, რომ სტუდენტებმა ცალსახად აღნიშნეს პედაგოგის მაღალი აკადემიურობა და მასწავლებლით, ასევე, საგნის შინაარსით კმაყოფილება. რაც შეეხება ასოცირებულ პროფესორს, ლაშა ბაჟუნაიშვილს, მას ზეპირი ფორმით ეცნობა დამატებითი ინტერვიუს შედეგი, რამაც გამოკითხვის სანდოობა [პორტალზე დაწერილი უარყოფითი შეფასებები – რედაქციის განმარტება] მისთვის კიდევ უფრო საეჭვო გახადა,“ – წერდა 2024 წლის მარტში ხარისხის უზრუნველყოფის სამსახურის უფროსი ირაკლი გორგილაძე რექტორს.

საკითხმა სასწავლო პროცესის დეპარტამენტში გადაინაცვლა – აქ გამოკითხვაში მონაწილე სტუდენტების IP მისამართებით დაინტერესდნენ, სადაც შეუსაბამობები იპოვეს. აღმოჩნდა, რომ ერთი და იმავე IP მისამართი ფიქსირდება ოთხივე [გამოკითხვის თარიღისთვის 4 სტუდენტი, ჯამში კი 13 სტუდენტი] სტუდენტის ავტორიზაციის ლოგში, უფრო მეტიც, გამოკითხვაში კომენტარის დაფიქსირების თარიღი და ზემოხსენებული სტუდენტების ავტორიზაციის თარიღი ემთხვევა ერთმანეთს [ცდომილება 1-6 წუთი]…“ – წერს წერილში უნივერსიტეტის სასწავლო პროცესის დეპარტამენტის უფროსი, ამირან შარაძე.

ამავე წერილში ხაზგასმულია, რომ უნდა დადგინდეს, ვის მიერ მოხდა „სხვისი პერსონალური მონაცემების გამოყენებით სტუდენტურ პორტალში არამართლზომიერი შეღწევა“.

მერაბ ხალვაში, ბსუ-ს მაშინდელი რექტორი, პროფესორებს 2024 წლის 25 ივნისის წერილში უდასტურებს, რომ 2024 წლის 10 იანვრიდან 22 იანვრამდე პერიოდში ადგილი ჰქონდა „ბსუ-ს სტუდენტთა – სულ 4 სტუდენტი – პერსონალური მონაცემების უნებართვო და არამართლზომიერ გამოყენებას“.

„უნივერსიტეტმა მიიჩნია, რომ ზემოაღნიშნული ინციდენტის შედეგად დაირღვა კონფიდენციალურობა [ინციდენტის სახე], რაც ,,პერსონალურ მონაცემთა დაცვის შესახებ“ საქართველოს კანონის თანახმად, გულისხმობს: ა) ელექტრონული ფორმით არსებულ მონაცემებზე უნებართვო წვდომას; ბ) ონლაინ პორტალზე არსებულ მომხმარებლის ანგარიშზე უნებართვო წვდომა/მასში არსებული მონაცემების უკანონო გამჟღავნებას,“ – აღნიშნულია უნივერსიტეტის რექტორის წერილში.

2024 წლის 30 სექტემბერს ბსუ-ს მაშინდელ რექტორს, მერაბ ხალვაშს პერსონალურ მონაცემთა დაცვის სამსახურის პასუხი მიუღია, IP მისამართის მფლობელის ვინაობის დადგენა სცილდება სამსახურის კომპეტენციასო.

უნივერსიტეტმა დისციპლინური საქმის წარმოება 2024 წლის 28 ნოემბერს დაიწყო, 29 ნოემბერს კი ი.მ.-მ მერაბ ხალვაშს წერილი მისწერა, სადაც აღნიშნულია: „ვარ მოქმედი ხელისუფლების აქტიური მხარდამჭერი“.

• რა გაარკვია დისციპლინურმა კომისიამ?

„ცხადია, რომ მნიშვნელოვანია დისციპლინური კომისიისათვის პროფესორ ი. მ.-ს განმარტების, მოსაზრების, დასაბუთების წარმოდგენა, ბსუ-ს პორტალზე 19.01.2024 წ. ინციდენტთან დაკავშირებით, ვინაიდან თქვენი [ბსუ-ს ოთხი დასაქმებულის] განმარტებით – არაეთიკური შეფასებების, სტუდენტთა პერსონალური მონაცემების გამოყენებით, სტუდენტთა სახელით განმახორციელებელ პირად დასახელდა.

ერთობლივი შეხვედრის ყველა მონაწილემ დაადასტურა პროფესორ ი.მ.-ს მიერ თქვენს წინაშე ბოდიშის მოხდის ფაქტი.

…პროფესორ ი. მ.-ს კომისიამ წერილით განუმარტა, რომ მნიშვნელოვანია მისგან განმარტების მიღება [ახსნის საჭიროება] იმ ფაქტთან დაკავშირებით, რომ იმავე IP მისამართით, რომლითაც სტუდენტების უარყოფითი შეფასებებია დაფიქსირებული 2024 წლის 19 იანვარს, ფიქსირდება მისი მომხმარებლის [როგორც ბსუ-ს თანამშრომლის] აქტივობა ბსუ-ს პორტალზე.

მივმართეთ რა ამ კითხვაზე განმარტების მიღების თხოვნით, კიდევ ერთხელ შევთავაზეთ გამოცხადდეს მიმდინარე წლის 26 დეკემბერს გასამართ დისციპლინური კომისიის სხდომაზე 15:00 საათზე, ასევე, ვაცნობებთ, რომ 26 დეკემბერს, დისციპლინური კომისია გეგმავს დაასრულოს მუშაობა და დასკვნა წარუდგინოს ბსუ-ს რექტორს,“ – აღნიშნულია დისციპლინური კომისიის წერილში.

2024 წლის 27 დეკემბერს ბსუ-ს რექტორის მოვალეობის შემსრულებელმა, მერაბ ხალვაშმა, პროფესორ ი. მ.-ს საყვედური გამოუცხადა. ამავე ბრძანებაში აღნიშნულია, რომ შესაძლოა უფრო მკაცრი დისციპლინური სახდელი დაუწესდეს პროფესორს, თუ მის ბრალეულობას პროკურატურა დაადასტურებს.

პროფესორ ი. მ.-ს საყვედური სასამართლოში გაუსაჩივრებია, თუმცა არც სასამართლო დავა დასრულებულა ამ ადმინისტრაციულ საქმეზე.

კანონის თანახმად, კომპიუტერულ სისტემაში უკანონო შეღწევა [სსკ-ის 284-ე მუხლი] ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით იმავე ვადით.