მთავარი,სიახლეები • •

მერვე დღე წყლის გარეშე ბათუმში – „ფაქტობრივად ვიხრჩობით“

27.10.2026
მერვე დღე წყლის გარეშე ბათუმში – „ფაქტობრივად ვიხრჩობით“

„მე-8 დღეა და წყალი ისევ არ გვაქვს. ფაქტობრივად, ვიხრჩობით. სასმელ წყალს ბოთლებით ვეზიდებით, მაგრამ ეს ხომ არ არის საკმარისი? ოჯახში ბოთლით მოტანილი წყალი არ გვეყოფა.

ხანდაზმული, ნაოპერაციევი ქალია მეზობლად და ეზოდან უწევს ბოთლებით წყლის ზიდვა, ასე რამდენ ხანს უნდა გაგრძელდეს? ხან მაღაზიიდან ამოგვაქვს, ხან სოფლიდან ვინც მოდის, იქიდან ეზიდება და ვართ ასეთ გაწამაწიაში“, – ამბობს „ბათუმელებთან“ ტაოს ქუჩაზე მცხოვრები მოქალაქე.

ბათუმის მერიის წინ, მოქალაქეების საპროტესტო აქციის შემდეგ, ბათუმის მერი გიორგი ცინცაძე ტაოს ქუჩაზე იმყოფებოდა და როგორც მერიამ თავად გაავრცელა ინფორმაცია, უწყლოდ დარჩენილ მოქალაქეებს წყლის მიწოდებას დაჰპირდა.

თუმცა, მოქალაქეების თქმით, უკვე 8 დღეა ისევ წყლის გარეშე უწევთ ყოფნა.

საპროტესტო აქციაზე მოქალაქეები მერიას სთხოვდნენ, სანამ სისტემა გაიმართება, მანამ მერიამ ცისტერნებით მოამარაგოს მოსახლეობა, თუმცა ასე არ მოხდა. მოქალაქეები დასალევ წყალს ყიდულობენ, საჭმლის მოსამზადებელი და გასარეცხი წყალი კი ისევ არ მიეწოდებათ.

„ტრაქტორები მოიყვანეს და დაიწყეს მუშაობა, მაგრამ რას თხრიან და საიდან მოჰყავთ წყალი, არ ვიცით.

როგორც გვითხრეს, რაღაც კონკრეტულ ლოკაციაზე მოიყვანენ წყალს და შემდეგ იქიდან, ჩვენი ხარჯებით უნდა მივიყვანოთ სახლებამდე წყალი.

წინა დღეებში უფრო აქტიურად მუშაობდნენ, ახლა ცოტა შეანელეს მუშაობა. იმედი გვაქვს კიდევ დიდხანს არ მოგვიწევს უწყლოდ ყოფნა და ისე მოიყვანენ წყალს, რომ მოსახლეობა დააკმაყოფილონ“, – გვეუბნება ტაოს ქუჩაზე მცხოვრები მოქალაქე.

მისი თქმით, მდინარე ჭოროხზე, საიდანაც მოსახლეობა აქამდე წყალს მოიპოვებდა [აქ მოსახლეობას ჭაბურღილები ჰქონდა მოწყობილი და ასე ქაცავდა წყალს. ამბობენ, რომ ახლა აჭარისწყალიდან ინერტული მასალების უსასრულოდ მოპოვების გამო წყალი დაიკარგა], დღემდე არ შეწყვეტილა ინერტული მასალების მოპოვება.

მოქალაქეების თქმით, სასმელი წყალიც სწორედ მას შემდეგ დაიკარგა, რაც ჭოროხზე ინერტული მასალების მოპოვება დაიწყეს.

გადაბეჭდვის წესი

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ. ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას. დღეს შენი მხარდაჭერა გვჭირდება _ ამისთვის შევქმენით მარტივი და უსაფრთხო პლატფორმა: შეგიძლია აირჩიო შენთვის მისაღები თანხა, რომლის გადახდასაც შეძლებ, თუნდაც თვეში 1 ლარი, და გახდე „ბათუმელებისა“ და „ნეტგაზეთის“ მხარდამჭერი. ჩვენ არ გვინდა დამატებით ფინანსურ ტვირთად ვიქცეთ ვინმესთვის. ჩვენთვის საზოგადოების მხარდაჭერა არა თანხის ოდენობით, არამედ ჩვენი მკითხველისა და გულშემატკივრის სიმრავლით იზომება.
უფრო მეტ ინფორმაციას, ასევე, წესებსა და პირობებს შეგიძლია გაეცნო მხარდაჭერის პლატფორმაზე.

ასევე: