Batumelebi

57 წლის ციცინო ქადაგიძე 11 წელია ყოველ დილით საქართველო-თურქეთის საზღვარს კვეთს. ციცინო ხელვაჩაურში, სოფელ თხილნარში ცხოვრობს. ამიტომ სამსახურში მისასვლელად სამი სამარშრუტო ტაქსი უნდა გამოიცვალოს – ორი სარფში ჩასასვლელად, მესამე კი სარფიდან ქემალფაშამდე. ტანსაცმლის მაღაზია, სადაც ის გამყიდველად მუშაობს, ქემალფაშაში მდებარეობს.

ციცინო ერთ-ერთია იმ ასობით ქალს შორის, ყოველდღიურად რომ კვეთს საქართველო-თურქეთის საზღვარს სამსახურში წასასვლელად.

საზღვარზე უმეტესწილად რიგებია. თუ მოქალაქეები ქართულ მხარეს რიგში 5-10 წუთი დგანან, თურქულ მხარეს საბაჟო პროცედურების გავლას ხშირად 1 საათი ან მეტი დრო სჭირდება.

„ჩვენი ქვეყანა ასე მგონია ამ ქალების მხრებზე დგას. აქ და სხვა ქვეყნებში მომუშავე ქალების მხრებზე. ახლა გოგოებს გვქონდა საუბარი, რომ რამე ფართომასშტაბიანი აქცია გაგვეკეთებინა. მაგრამ ამ ჩვენს მთავრობამდე არცერთნაირი გაჭირვების ამბავი არ აღწევს. არავის არ აქვს იმედი და იმიტომაც არის ასე განუკითხაობის პროცესში ჩვენი მდგომარეობა,“ – გვეუბნება ქემალფაშაში მომუშავე მანანა პაპიძე.

მას სურს, რომ ხელისუფლებამ ქემალფაშაში დასაქმებულებს მეზობელ ქვეყანასთან უშუამდგომლოს და საბაჟოზე დაუსრულებელი რიგების საკითხი მოაგვაროს.

ქემალფაშა პატარა, სასაზღვრო ქალაქია, რომელიც ორი ქვეყნის სამეზობლო-სავაჭრო ურთიერთობებში უდიდეს როლს ასრულებს. საქართველოს მოქალაქეები ქემალლფაშაში ადრე თუ მხოლოდ ტანსაცმლის საყიდლად გადადიოდნენ, ახლა პროდუქტებისთვისაც მიდიან.

კვერცხი, შაქარი, ზეთი, თევზი, ტკბილეული, სარეცხი საშუალებები – ყველაფერს თურქეთში ყიდულობენ და საქართველოში გადმოაქვთ.

საზღვარზე გაზრდილი მგზავრთნაკადი, ცუდად აისახება იმ ქალების ყოველდღიურობაზე, ვისაც სამსახურში მისასვლელად საზღვრის კვეთა უწევს.

„რიგი თუ არაა მალე ვკვეთ საზღვარს, თუ რიგი იქნა შეიძლება ერთი საათი მომიწიოს დგომა“, – გვეუბნება ციცინო ქადაგიძე.

„იმდენად ვიღლებით რიგში, ისეთი დაღლილი ვართ, აქ ჩამოსულს შრომის გაგრძელების სურვილი აღარ გაქვს ადამიანს. მაგრამ სხვა გზა რომ არაა, აგრძელებ,“ – გვეუბნება მანანა პაპიძე. ის ქემალფაშაში, სარეცხი საშუალებების მაღაზიაში მუშაობს გამყიდველად.

რიგების გამო ხშირია შემთხვევა, როცა სამსახურში აგვიანდება.

„მეც და სხვა დასაქმებულ ქალებსაც პრობლემები გვექმნება სამსახურში, რადგან ვაგვიანებთ. ჩემ დამსაქმებელს ბევრჯერ ვიდეოც მოვუტანე საბაჟოზე გადაღებული, რომ ენახა, როგორი რიგი იყო. მაგრამ მან იცი რა თქვა? ვინც მოვა, იმუშაოს იმან, ვინც არ დააგვიანებსო. ასეთ გაუსაძლის მდგომარეობაში ვართ,“ – ამბობს მანანა პაპიძე.

მანანა ამბობს, რომ დამღლელი სამუშაო დღის შემდეგ, ორმაგად იღლებიან, როცა საღამოს უკან, საქართველოში ბრუნდებიან: საბაჟოზე ისევ რიგში უწევთ დგომა. რიგი ხშირად ერთ საათზე მეტ ხანსაც კი გრძელდება.

„ჩვენ, ქემალფაშაში დასაქმებულ ქალებს, გვჭირდება რამე ოფიციალური საბუთი, რის საფუძველზეც საზღვრის კვეთას რიგში დგომის გარეშე შევძლებთ. ეს იქნება ყველაზე დიდი შეღავათი ჩვენთვის, თუ ამას ვინმე გაგვიკეთებს,” – ამბობს მანანა პაპიძე.

გზა, რომელსაც სამსახურში მისასვლელად გადიან ქალები, ყველას ერთულება.

„ხელვაჩაურიდან დავდივარ ყოველდღე. დილას ექვსის ნახევარზე, ექვსზე გამოვდივარ სახლიდან. რვის ნახევარზე ქემალფაშაში ვარ.

ადამიანი იღლება. ძნელად გასავლელი გზაა. რომ არ მიჭირდეს და საქართველოში სამსახური ვნახო, აქ არ გადმოვალ. ჩემი ქმარი მუშაობს, შვილებიც, მაგრამ მაინც არ ყოფნის ოჯახს,“ – თავის ამბავს გვიყვება ნინო ირემაძე.

ნინომ 15 წელი იმუშავა სტამბულში, ანაკარასა და მერსინში ოჯახში დამხმარედ. ერთი წლის წინ საქართველოში მეუღლის ავადმყოფობის გამო დაბრუნდა. შვიდი თვეა, რაც ქემალფაშაში დაიწყო მუშაობა.

„საქართველოში ვცადე მუშაობა, მაგრამ ყველა ითხოვს ახალგაზრდას. მე კი ამ ასაკში ვერ გავხდები 30 წლის,“ – ამბობს ნინო.

„საქართველოში სადაც მივედი, ყველგან დამხვდა ის სიტუაცია, რომ 40 წელს გადაცილებული არავის უნდოდა. ჩემი ასაკის სამუშაო სამრეცხაოში ვნახე და ასეთ ადგილას მუშაობაში ჩემი ჯანმრთელობა ხელს არ მიწყობს. ბრონქების პრობლემა მაქვს და დახუთულ სივრცეში ვერ ვიმუშავე. აქ, თურქეთში შრომის დაფასება იციან, გენდობიან, შეიძლება ჩვენი უფროსი მოსული არ იყოს და ჩვენ გავხსნათ მაღაზია,“ – თავის ისტორიას გვიყვება ციცინო ქადაგიძე.

ქემალფაშაში დღიური ანაზღაურება მინიმუმ 40 ლარია. ხელფასი იზრდება იმის მიხედვით, თუ რა დატვირთვით უწევთ ქალებს მუშაობა. ზოგ მაღაზიაში ხელფასი დღიურად 60 ლარსაც ცდება. თუმცა მზარდი ინფლაციის გამო, ეს ხელფასი მაინც არაა საკმარისი ოჯახებისთვის.

„ადრე ხელფასი დაბალი იყო, მაგრამ პროდუქტსა და ტანსაცმელზე ფასებიც იაფი იყო. გზის ხარჯიც ნაკლები მქონდა. ახლა სამსახურში მისვლა-მოსვლა 12-13 ლარი მაინც მიჯდება. ჩემი ოჯახისთვის ჩემი ხელფასი რომ არ იყოს მნიშვნელოვანი, აქ არ წამოვალ სამუშაოდ. მეუღლეც მუშაობს, მეც ვმუშაობ, ცოტა ერთმანეთს ვეხიდებით, ყველაფერს ერთი ხელფასი ვერ გააკეთებს,“ – გვეუბნება ციცინო.

15 წელი იმუშავა სტამბულსა და მერსინში ირმა დოლიძემ. ოცნების ასრულებას, შეეძინა ბინა, ათი წელი მოუნდა.

საქართველოში 2022 წელს დაბრუნდა.

„რაც თურქეთში ვიშრომე, ის რომ საქართველოში მეშრომა, მაინც ვერ ვიყიდდი ბათუმში ბინას. იმხელა ანაზღაურება არაა, რომ აქ ნაშრომით ბინა იყიდო. საქართველოში რომ დავრჩენილიყავი, მშიერი არ ვიქნებოდი, მაგრამ ბინას ვერ ვიყიდდი. რომ ჩამოვედი ისეთი დათრგუნული ვიყავი, არც მიცდია სადმე მუშაობა დამეწყო. მინდოდა ჩემ ოჯახში, ჩემს შვილთან ვყოფილიყავი. ერთი-ორი თვის შემდეგ ვცადე, დავიწყე მუშაობა, მაგრამ სულ სხვანაირად არის შეცვლილი საქართველო. ვერ შევეგუე და ისევ თურქეთს დავუბრუნდი. ყოველდღიურად გადავდივარ – გადმოვდივარ. საზღვრის ყოველდღიური კვეთა – თუ რიგები არაა, რთული არაფერია. თუ რიგებია, ცოტა ძნელია,“ – ამბობს ირმა დოლიძე.

ქემალფაშაში მომუშავე ქალები ამბობენ, რომ მათი შრომა ადეკვატურად ფასდება, მაგრამ მძიმეა გზა, რომლის გავლაც სამსახურამდე უწევთ.

ამიტომ ხელისუფლებას სთხოვენ, რომ მათი პრობლემებით დაინტერესდეს და სამეზობლო პოლიტიკის ფარგლებში, მეზობელ თურქეთთან მათი საკითხი დადებითად გადაწყვიტოს.

ერაყის სახელმწიფო საინფორმაციო სააგენტოს ცნობით, ჩრდილოეთ ერაყში ქორწილში გაჩენილ ხანძარს 100 ადამიანი ემსხვერპლა, 150 კი დაშავდა.

ხანძარი ერაყში ბაღდადიდან 335 კილომეტრში მდებარე პროვინციაში გაჩნდა.

მედიის ინფორმაციით, ქრისტიანული ქორწილში ხანძარი ფეიერვერკმა გამოიწვია, დარბაზი სტუმრებით იყო სავსე. ხელისუფლება აცხადებს, რომ დაღუპულთა რიცხვი შესაძლოა გაიზარდოს. გამოძიების ფარგლებში დაკავებული არიან საქორწილო დარბაზის თანამშრომლები.

Rudaw-მა გაავრცელა კადრები, სადაც ჩანს, რომ ქორწილში პიროტექნიკა იყო გამოყენებული, ერაყის სამოქალაქო თავდაცვის სამინისტროს ცნობით კი, საქორწილო დარბაზი, სადაც ხანძარი გაჩნდა, იოლად აალებადი მასალით იყო მოპირკეთებული.

ერაყის მთავრობამ ხანძრის გამო სამდღიანი გლოვა გამოაცხადა ქვეყანაში.

_____________

ფოტოზე: საქორწილო დარბაზი ხანძრის შემდეგ. ფოტო: EPA-EFE/MOHAMAD SAIF

ორი ავტოსაგზაო შემთხვევა მოხდა ბათუმში დღეს, 27 სექტემბერს, ფრიდონ ხალვაშის გამზირზე.

ორივე შემთხვევაში ერთმანეთს ორი მსუბუქი ავტომანქანა შეეჯახა.

ავარიის შედეგად, რომელიც დილით, დაახლოებით 8 საათზე მოხდა, ერთი დაშავებული კლინიკაში გადაიყვანეს. შსს-ს ინფორმაციით დაწყებულია გამოძიება.

მეორე ავარიის შედეგად კი, თვითმხილველის თქმით, არავინ დაშავებულა.

ადგილზე იმყოფება საპატრულო პოლიცია.

ავტოსაგზაო შემთხვევის გამო ხალვაშის გამზირზე ტრანსპორტის მოძრაობა შეფერხებული იყო.

სურსათის ეროვნული სააგენტო შინაური და მიკედლებული ცხოველების [ძაღლი, კატა] უფასო ვაქცინაციას ცოფზე, მთელი ქვეყნის მასშტაბით, სპეციალურად გამოყოფილ სივრცეებსა და სააგენტოს რეგიონულ ოფისებთან გამართავს.

ძაღლისა და კატის ვაქცინაცია 28 სექტემბერს, 11:00-16:00 საათებში გაიმართება.

ცხოველთა უფასო ვაქცინაცია აჭარაში შესაძლებელია შემდეგ ადგილებში:

ბათუმი – 6 მაისის პარკი;
ხულო – სტალინის №2 [აჭარის რეგიონული სამმართველოს შენობა];
შუახევი – სელიმ ხიმშიაშვილის №1 [აჭარის რეგიონული სამმართველოს შენობა];
ქედა – 26 მაისის № 2 [აჭარის რეგიონული სამმართველოს შენობა];
ხელვაჩაური – დიდაჭარის 23 [აჭარის რეგიონული სამმართველოს შენობა];
ქობულეთი – აღმაშენებლის №44 [აჭარის რეგიონული სამმართველოს შენობა].

28 სექტემბერი ცოფთან ბრძოლის მსოფლიო დღეა.

აღნიშნული დღე ცოფის კონტროლის გლობალური ალიანსის ინიციატივითა და მსოფლიო ჯანდაცვის ორგანიზაციების მხარდაჭერით 2007 წელს დაწესდა. საქართველო აღნიშვნას 2013 წლიდან ყოველწლიურად უერთდება.

სურსათის ეროვნული სააგენტოს განცხადებით, წლევანდელი ღონისძიების მთავარი გზავნილია – „ყველა ერთისთვის, ერთის ჯანმრთელობა ყველასთვის! ჩვენი ოთხფეხა მეგობრების ვაქცინაციით ვიცავთ როგორც მათ, ასევე ჩვენი და გარშემომყოფების სიცოცხლესა და ჯანმრთელობას.“

ცოფი ადამიანისა და ცხოველის საშიში ინფექციური დაავადებაა, თუმცა მისი პრევენცია შესაძლებელია.

[toggle title=”თბილისსა და ქვეყნის სხვა ადგილებში ვაქცინაციის ჩატარების მისამართების სანახავად დააწკაპუნეთ აქ“]

უფასო ვაქცინაცია ჩატარდება 28 სექტემბერს 11:00-16:00 საათებში შემდეგ მისამართებზე:

მრგვალი ბაღი, ვაკე;
დედაენის ბაღი, მარჯვენა სანაპირო;
ანბანის სკვერი, დიდი დიღომი (,,გუდვილის“ მიმდებარედ).

[/toggle]

ბერძნული რეგიონული მედია thenewspaper.gr-ი წერს, რომ თესალიაში, ქალაქ ალმიროსთან ახლოს, ცხვრის ფარა შეიჭრა სათბურში, სადაც სამკურნალო კანაფი მოჰყავდათ და 100 კილოგრამზე მეტი მცენარე შეჭამა.

მედიის ცნობით, ცხვრები თესალიაში წყალდიდობის შემდეგ საძოვარ ბალახს ეძებდნენ.

„არ ვიცი, ვიტირო თუ ვიცინო. გვალვისა და წყალდიდობის დროს დიდ და კარგ მოსავალს ვკარგავთ, ამ ყველაფრის შემდეგ კი შემოვიდა ცხვრის ფარა და დარჩენილი მოსავალი შეჭამა. არ ვიცი, რა გითხრათ“, – უთხრა გამოცემას კანაფის ლიცენზირებული ქარხნის მფლობელმა.

2017 წელს საბერძნეთის პარლამენტმა დაამტკიცა კანონი, რომლის თანახმადაც საბერძნეთში სამედიცინო კანაფის მოშენება და წარმოება დაშვებულია. ბერძნული კანონმდებლობით, კულტივაცია შეზღუდულია პირადი სარგებლობისთვის.

შემოსავლების სამსახურის ინფორმაციით, სარფის საბაჟო გამშვებ პუნქტზე ნარკოტიკული ნივთიერების შემცველი მედიკამენტების ქვეყნის საზღვარზე უკანონოდ შემოტანის ფაქტი აღკვეთეს.

„ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, საქართველოს მოქალაქის ზ.ჩ.-ს ფიზიკური და კუთვნილი ბარგის დეტალური დათვალიერების შედეგად, ნარკოტიკული ნივთიერების შემცველი სხვადასხვა მედიკამენტები [106 აბი და 14 კაფსულა] აღმოაჩინეს“ – აცხადებს შემოსავლების სამსახური.

საქმის მასალები შემდგომი რეაგირების მიზნით, საქართველოს შინაგან საქმეთა სამინისტროს შესაბამის სამსახურს გადაეცა.

ჩეჩნეთის ლიდერმა, რამზან კადიროვმა ტელეგრამზე 25 სექტემბერს ვიდეო გამოაქვეყნა, სადაც, როგორც თავად აცხადებს, მისი 15 წლის შვილი ადამ კადიროვი ყურანის დაწვაში ბრალდებულ ნიკიტა ჟურაველს სასტიკად სცემს.

რამზან კადიროვი წერს, რომ ამაყობს საკუთარი შვილით, რომელიც, ვიდეოს თანახმად, გამეტებით ურტყამს სავარაუდოდ იზოლატორში მყოფ დაკავებულს.

რუსეთის მოქალაქე, ვოლგოგრადელი ნიკიტა ჟურაველი ყურანის დაწვისა და „რელიგიური გრძნობების შეურაცხყოფისთვის“ მაისში დააკავეს და გადაიყვანეს ჩეჩნეთში, გროზნოს წინასწარი დაკავების იზოლატორში. მედიის თანახმად, მისი ჩეჩნეთში გადაყვანის ინიციატორი, რუსეთის იუსტიციის მინისტრი იყო.

ადამ კადიროვის მიერ ნიკიტა ჟურაველის ცემის ფაქტის შესახებ აგვისტოს შუა რიცხვებში გახდა ცნობილი, ფაქტი რუსეთის ადამიანის უფლებათა კომისარმა ტატიანა მოსკალკოვამ გაასაჯაროვა.

რუსული მედიის თანახმად, დუმის დეპუტატმა ჩეჩნეთიდან, ადამ დელიმხანოვმა ორჯერ დაადასტურა კადიროვის 15 წლის შვილის თავდასხმა დაკავებულზე და განაცხადა, რომ ადამ კადიროვმა აჩვენა „პატრიოტიზმის მაგალითი“.

„ლენტა.რუ“ წერს, რომ ვიდეოს რუსეთის პრეზიდენტთან არსებულმა ადამიანის უფლებათა საბჭოს წევრმა, ევა მერკაჩევამ „დანაშაულის ვიდეო მტკიცებულება“ უწოდა და ადამ კადიროვი, კანონის თანახმად, უნდა დააკავონ.

„ბიბისის“ რუსული რედაქციის ცნობით, ვიდეოს თანახმად, დარღვეულია რუსული კანონმდებლობის სულ მცირე 8 მუხლი.

დღეს, 26 სექტემბერს, 12:00 საათიდან ხელვაჩაურის მუნიციპალიტეტში მდებარე სოფელ მახვილაურს გაზის მიწოდება შეუწყდება.

კომპანია „სოკარის“ ცნობით, გაზის შეწყვეტის მიზეზი გაზსადენზე დაგეგმილი სარემონტო საექსპლუატაციო სამუშაოებია.

გაზის მიწოდება დაიწყება 26 სექტემბერს 14:00 სთ-დან და სრულად აღდგება 26 სექტემბრის დღის ბოლომდე.

„სოკარ ჯორჯია გაზი” აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.

„აიფონ 14 პრო, რაშიც 4200 ლარი გადავიხადე, 4 საათში ჯდება… რამდენჯერმე მივმართეთ „აიპლუსს“, რომ პრობლემა მოეგვარებინა, საგარანტიო ვადა გასული არ არის, მაგრამ მხოლოდ წინ და უკან დავდივართ, არაფერი იცვლება,“ – ამბობს ელზა ლემსაძე. იგი ბათუმში ცხოვრობს და მეუღლესთან ერთად აიფონ 14 პრო 2022 წლის ოქტომბერში შეიძინა. მობილური ტელეფონი უკვე ცუდად მუშაობს.

მოქალაქის თქმით, ძვირადღირებული აიფონი შეძენიდან დაახლოებით 8 თვის შემდეგ 3-4 საათში ჯდებოდა, თუმცა სერვისცენტრი ირწმუნება, რომ „აპარატს ხარვეზი არ უფიქსირდება“. მოქალაქემ კონკურენციის სააგენტოს მიმართა, სადაც მომხმარებელთა უფლებების დაცვის დეპარტამენტი თითქმის ერთი წელია მსგავს საკითხებზე მუშაობს, თუმცა იმისთვის, რომ მოქალაქემ თავისი სიმართლე დაამტკიცოს, ექსპერტიზის დასკვნაა საჭირო.

„ბათუმელებმა“ სცადა გაეგო, მსგავს სიტუაციაში როგორ მოქმედებს კონკურენციის სააგენტოს მომხმარებელთა უფლებების დაცვის დეპარტამენტი და რეალურად რა მექანიზმი არსებობს მომხმარებლის სასარგებლოდ?

„2022 წლის 4 ოქტომბერს კონკრეტულად კარფურის შენობაში, iPlus-ის ერთ-ერთ ფილიალში მე და ჩემმა მეუღლემ შევიძინეთ Iphone 14 pro. მისი შეძენა იმიტომ გადავწყვიტეთ, რომ ჩვენს პატარა ბიზნესში სოციალური ქსელების მართვისას ძალიან დაგვეხმარებოდა: რეკლამების, პოსტერებისა და სხვა საინფორმაციო საშუალებების მომზადებისთვის,“ – გვიყვება ელზა ლემსაძე. მომხმარებელმა საგარანტიო ფურცელთან ერთად კომპანია „აიპლუსს“ მიმართა, რომელიც Apple პროდუქციის ავტორიზებული გადამყიდველია საქართველოში.

კომპანიის სერვისცენტრში მომხმარებელს, ნივთის რამდენჯერმე შემოწმების შემდეგ, ერთსა და იმავეს უმეორებენ: „აპარატს ხარვეზი არ უფიქსირდება“, თუმცა ძვირადღირებული მობილური ტელეფონი ისევ 4 საათში ჯდება.

„2023 წლის ივნისის თვეში კომპანიას  პირველად მივმართეთ პროდუქტის საგარანტიო ფურცელთან ერთად და ვთხოვეთ დახმარება,“ – მომხმარებელი დეტალურად აღწერს, როგორ გაუჭირდა საკუთარი უფლების დაცვა იმის მიუხედავად, რომ საგარანტიო ფურცელი ხელში ჰქონდა, – „როგორც აღმოჩნდა, ბათუმში ადგილზე სერვისი არ აქვთ, ამიტომ აპარატი თბილისში უნდა გაეგზავნათ. ავუხსენით, რომ დაკარგული დრო დისკომფორტს ქმნიდა, გამომდინარე იქიდან, რომ მის გამოყენებას ყოველდღიურ საქმიანობაში ვეღარ შევძლებდით.

მაშინ პირველად აგვიხსნეს, რომ თურმე მობილურის შემოწმება და დიაგნოსტირება არა „აიპლუსს“, არამედ „აისაფორთს“ ევალება და სწორედ ისინი არიან ამაზე პასუხისმგებელნი. პირველი შოკიც სწორედ მაშინ მივიღე. ავიღე საგარანტიო ფურცელი და მენეჯერს მაგიდაზე დავუდე. ვთხოვე ფურცელში ეჩვენებინა, სად ეწერა „აისაფორთი“. რა თქმა უნდა, „აისაფორთის“ სახელი ფურცელზე ვერ იპოვა. მიგვითითა იქვე არსებულ კოდზე და გვითხრა, რომ თუ ამ კოდით გადავამოწმებდით, მივხვდებოდით, რომ „აისაფორთის“ ვალდებულებაა მისი შემოწმება.

პირველად მაშინ ვიგრძენი თავი მოტყუებულად, როცა აღმოვაჩინე, რომ საგარანტიო ფურცელზე კონკრეტული დეტალები მომხმარებლისთვის გასაგები არ არის… სხვა გზა არ გვქონდა, დავთანხმდით და გადავეცით მობილური იმ იმედით, რომ სათანადოდ შემოწმდებოდა და მოხდებოდა დიაგნოსტირება,“ – ამბობს ელზა ლემსაძე.

მოქალაქე „აისაფორთიდან“ მიღებულ დასკვნას გვაცნობს, რომელიც მას მობილურ ტელეფონთან ერთად დაუბრუნეს. „მოწყობილობაზე ჩაიწერა სისტემა, აპარატს ხარვეზი არ უფიქსირდება, აკმაყოფილებს ქარხნულ პარამეტრებს“, – წერია დასკვნაში.

„ტელეფონს დაახლოებით ორი კვირა პრობლემა არ შეჰქმნია, შემდეგ ისევ ანალოგიური პრობლემა გამოუვლინდა. 14 ივლისს ისევ მივმართეთ ცენტრს…“ – განაგრძობს თხრობას ელზა ლემსაძე. ამჯერად მომხმარებლისთვის მობილური ტელეფონი 20 ივლისს დაუბრუნებიათ იმავე შინაარსის დასკვნით, რომ მობილურ ტელეფონს პრობლემა არ აქვს.

„20 ივლისს დაგვიბრუნდა მობილური, მომდევნო 4 დღე არ ჰქონდა პრობლემა და 4 დღის შემდეგ ისევ პრობლემა გამოუვლინდა. მიუხედავად იმისა, რომ გავითვალისწინეთ მათი რეკომენდაცია გაგვეთიშა ბექაფი, შეგვეცვალა დამმუხტველი და წაგვეშალა ზედმეტი აპლიკაციები, რაც არ ყოფილა საერთოდ მობილურში, მაინც იმავე პრობლემის წინაშე აღმოვჩნდით.

10 აგვისტოს კიდევ მივეცით შანსი, რომ მობილურის პრობლემა მოეგვარებინათ და მესამედ გავუგზავნეთ თბილისში.  დღემდე ვრეკავთ და იმავეს გვიმეორებენ, რომ მობილურს არ აქვს ხარვეზი და რატომღაც თბილისში კარგად მუშაობს. როცა ისევ ვკითხე, როგორ ახდენდნენ პრობლემის იდენტიფიცირებას, პასუხმა ძალიან გამაღიზიანა. მეთოდი არ შეცვლილა: ისევ ხსნიან სოციალურ ქსელებს და იუთუბს.  „მაქსიმალურად“  ტესტავენ, მალე დაჯდება მობილური თუ არა, რაც არ მაკმაყოფილებს, რადგან ამის შემდეგ ისტორიის იმავე ფურცელზე ვბრუნდები,“ – უთხრა ელზა ლემსაძემ „ბათუმელებს“.

მოქალაქემ უკვე მიმართა კონკურენციის სააგენტოს, სადაც ეს საქმე უნდა შეისწავლონ. ექსპერტიზის ჩატარების შემთხვევაში, რითაც დადასტურდება, რომ ნივთს ნამდვილად ტექნიკური პრობლემა აქვს, მოქალაქე არ გამორიცხავს სასამართლოსაც მიმართოს.

სამხარაულის ექსპერტიზის ეროვნული ბიუროს პრესცენტრში „ბათუმელებს“ უთხრეს, რომ შესაძლებელია იმის დადგენა, ტექნიკურად გამართულად მუშაობს თუ არა მობილური, თუმცა ვერ დადგინდება, რა მიზეზმა გამოიწვია პრობლემა.

რა მეთოდით დადგინდა, რომ მობილურ ტელეფონს ხარვეზი არ აქვს? – კომპანია „აიპლუსიდან“, სადაც მოქალაქემ 4200 ლარად იყიდა აიფონი, მხოლოდ ეს მოგვწერეს: „დეტალების დასაზუსტებლად და სრული ინფორმაციის მისაღებად უნდა დაუკავშირდეთ უშუალოდ სერვისცენტრს iSUPPORT -ს“.

კომპანია „აისაფორთის“ საქალაქო ტელეფონზე კი, ოპერატორმა მარტივად გაიხსენა ეს კონკრეტული შემთხვევა და გვითხრა, რომ აიფონს ტექნიკური ხარვეზი არ აქვს და ელემენტის მალე დაჯდომა სავარაუდოდ ბექაფს უკავშირდება, რასაც მომხმარებელი მაინც ააქტიურებს.

კომპანიას ვთხოვეთ ეჩვენებინა კონკრეტული დოკუმენტი, სადაც ჩანს, რომ ნივთი ტექნიკურად შემოწმდა და დაიდო დასკვნა მის უხარვეზოდ მუშაობაზე – კომპანიაში ინფორმაციის მოწოდებას წერილობით დაგვპირდნენ, თუმცა ის არ მოგვაწოდეს.

„როცა ნივთის შეძენიდან გასულია 6 თვე, მტკიცების ტვირთი არის მოქალაქეზე, მან უნდა წარმოადგინოს მტკიცებულებები,“ – გვითხრეს მომხმარებელთა უფლებების დაცვის ცხელ ხაზზე. სააგენტოს სპეციალისტმა, ვისაც ტელეფონით ვესაუბრეთ, ვერ თქვა, როგორ უნდა მოიქცეს მოქალაქე და რა იცავს მას, თუ ექსპერტი სადავო ნივთის შესახებ დასკვნას ვერ დადებს?

„გააჩნია საქმის დეტალებს, წინასწარ ვერ გეტყვით… პრაქტიკაში ასეთი შემთხვევა არ გვქონია. განმცხადებელს მტკიცებულებები რომც არ ჰქონდეს წარმოდგენილი, ჩვენ მაინც შევისწავლით მას,“ – აღნიშნეს კონკურენციის სააგენტოს ცხელ ხაზზე, თუმცა დასძინეს, რომ მტკიცებულებით უნდა დადგინდეს ზიანი, რაც მომხმარებელს მიადგა.

მომხმარებელთა უფლებების დაცვის დეპარტამენტში ასევე განმარტეს, რომ მნიშვნელოვანია, რა დროა გასული კონკრეტული ნივთის შეძენიდან: შეძენიდან პირველ 6 თვეში ე.წ. მტკიცების ტვირთი  მოვაჭრეს ეკისრება საგარანტიო ვალდებულებაზე იმ შემთხვევაშიც კი, როცა საგარანტიო მოწმობა კომპანიას არ გაუცია, 6 თვის გასვლის შემდეგ კი, ქარხნულ წუნსა და სხვა ტექნიკურ პრობლემაზე მტკიცება მომხმარებელს თავად მოუწევს.

მომხმარებელთა უფლებების დაცვის დეპარტამენტში აღგვიწერეს, რა დრო სჭირდება ნებისმიერი განცხადების განხილვას, რაც მომხმარებელთა უფლებების დარღვევას უკავშირდება:

„განაცხადის შემოტანიდან პირველი სამი დღე სააგენტო ამოწმებს, განცხადებას აქვს თუ არა ტექნიკური ხასიათის ხარვეზი, მაგალითად, მოვაჭრის შესახებ მონაცემები მითითებული არის თუ არა, განაცხადის მიღებიდან 10 სამუშაო დღეში, ვიდრე სააგენტო მიიღებს გადაწყვეტილებას საქმისწარმოების დაწყების შესახებ, შესაძლოა მივმართოთ მოვაჭრეს, დააფიქსიროს თავისი პოზიცია განცხადებაში მითითებულ გარემოებებთან დაკავშირებით, ასევე სავაჭრო პოლიტიკის კანონთან შესაბამისობის კუთხით. მოვაჭრემ ჩვენი მიმართვიდან 5 სამუშაო დღეში უნდა გაგვცეს პასუხი.

ერთ თვეში სააგენტომ უნდა გამოიტანოს გადაწყვეტილება დარღვევის დადასტურების ან არ დადასტურების შესახებ. მესამეა მოვაჭრის მოთხოვნის საქმისწარმოების შეწყვეტა, როცა ის განხილვის გარეშე იღებს ვალდებულებებს მომხმარებლის წინაშე. ამ დროს სააგენტო აღარ შედის საქმის განხილვაში.

საქმის სირთულეზეა დამოკიდებული, რა დრო შეიძლება დასჭირდეს ამ პროცესს. შესაძლოა, სააგენტომ მიმართოს მოვაჭრეს დამატებითი პოზიციის წარმოსადგენად და ეს მიმართვა მოვაჭრემ არ ჩაიბაროს. ამ შემთხვევაში ხელახლა ეგზავნება მოპასუხეს წერილი, თუ ისევ არ ჩაიბარა, შემდეგ საჯაროდ უნდა გამოქვეყნდეს… ამ დროს ეს ერთთვიანი ვადა ჩერდება.

დარღვევა თუ დადგინდა, გამოიცემა ბრძანება, რომლითაც მოვაჭრეს დაეკისრება კონკრეტული ვალდებულებების შესრულება. თუ მან ეს არ შეასრულა, სააგენტო აჯარიმებს მოვაჭრეს და თუ ჯარიმაც არ გადაიხადა, საქმე გადაეცემა აღსრულებას. ჯარიმის ოდენობას სააგენტო განსაზღვრავს,“ – განმარტეს კონკურენციის სააგენტოს ცხელ ხაზზე.

კიდევ ერთი დეტალი – თუ სააგენტო მოვაჭრის მხრიდან დარღვევას დაადგენს, კომპანიამ ექსპერტიზის და სხვა ხარჯებიც უნდა აუნაზღაუროს მომხმარებელს, რაც ამ დავას უკავშირდება.

„ჩანთიდან 300 ლარი ამომაცალეს“, – ამბობს ქალი, რომელიც ბათუმში ცხოვრობს და, სავარაუდოდ, #16 ავტობუსში ფული მოჰპარეს.

შემთხვევა 22 სექტემბერს მოხდა.

„ავტობუსით ვიმგზავრე. სხვაგან არსად ვყოფილვარ. სახლში რომ მივედი, მერე ვნახე, რომ ჩანთაში ფული აღარ მქონდა… ჩანთაში მედო პატარა საფულე, ელვა შესაკრავით ჩაკეტილი ჩანთა გაუხსნია ვიღაცას და პატარა საფულე ამოუღია. ავტობუსში ბევრი ხალხი იყო, არაფერი მიგრძნია საეჭვო.

არ ვაპირებ პოლიციისთვის მიმართვას, რა აზრი აქვს? ჩემს მულსაც ავტობუსში ამოაცალეს 500 ლარი დაახლოებით 6 თვის წინ, ის #12 ავტობუსით მგზავრობდა, მიმართა პოლიციას, მერე დაიბარეს, გამოჰკითხეს, არაფერია შედეგი…“ – გვითხრა მოქალაქემ.

რუსული ავიაკომპანია „აზიმუტი“ მოსკოვი-ბათუმის მიმართულებით პირდაპირ ავიარეისებს იწყებს. კომპანიის ვებგვერდის მიხედვით, პირველი რეისი 9 ოქტომბერს შესრულდება.

კომპანიის ინფორმაციით ავიარეისი მოსკოვი-ბათუმი  კვირაში ორჯერ შესრულდება.

ამავე დროს, „აზიმუტი“ შეასრულებს პირდაპირ ავიარეისებს თბილისი-სოჭის მიმართულებით, ასევე კვირაში ორჯერ.

რუსული ავიაკომპანია „აზიმუტი“, რომელიც 17 მაისიდან მოსკოვი-თბილისი-მოსკოვის რეისს კვირაში 7-ჯერ ასრულებს, უკრაინის სანქციების სიაშია ჯერ კიდევ 2022 წლის 19 ოქტომბრიდან.

კომპანია ავიარეისებს, ძირითადად, რუსეთის ტერიტორიაზე, ასევე, პოსტსაბჭოთა ქვეყნებში, სტამბოლისა და თელ-ვივის მიმართულებით ახორციელებს. ავიაკომპანია არ დაფრინავს ევროპის მიმართულებით. მის ბალანსზე რუსული წარმოების, 19 ერთეული სამგზავრო თვითმფრინავი Sukhoi Superjet-ია.

რუსეთის ფედერაციამ 2023 წლის 10 მაისს გააუქმა სავიზო რეჟიმი საქართველოს მოქალაქეებისთვის და მოხსნა შეზღუდვა პირდაპირ ფრენებზე.

რუსეთთან პირდაპირი ფრენების აღდგენას საქართველოში საპროტესტო აქციები მოჰყვა.