სპეციალური საგამოძიებო სამსახური იძიებს 31 ივლისს ბათუმში, ნავსადგურთან გამართული საპროტესტო აქციის დროს საქართველოს შინაგან საქმეთა სამინისტროს ცალკეული თანამშრომლის მხრიდან აქციის მონაწილეების მიმართ განხორციელებული სამსახურებრივი უფლებამოსილების ძალადობით შესაძლო გადამეტების ფაქტებს – ინფორმაციას ამის შესახებ სპეციალური საგამოძიებო სამსახური თავად ავრცელებს.
საგამოძიებოს ცნობით, გამოძიება საქართველოს სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით გათვალისწინებული დანაშაულის ნიშნებით დაიწყო.
„გამოძიების დაწყებას საფუძვლად სპეციალურ საგამოძიებო სამსახურში სახალხო დამცველის აპარატიდან და შინაგან საქმეთა სამინისტროს დროებითი მოთავსების იზოლატორებიდან შემოსული შეტყობინებები დაედო“ – აღნიშნულია განცხადებაში.
31 ივლისს ბათუმში გამართულ აქციაზე რუსეთიდან შემოსული საკრუიზო ლაინერის წინააღმდეგ პოლიციამ 23 პირი დააკავა. დაკავებულებს შორის არის ბექა გრიგორიადისი, ლაზარე გრიგორიადისის მამა. ასევე „ალტერნატივას“ ხელმძღვანელი, ხათუნა ბერიძე, „დროას“ ხელმძღვანელი აჭარაში – გენრი დოლიძე, დეპუტატ ლევან ანთაძის შვილი – ილია ანთაძე, გიორგი გველესიანი, ირაკლი ხარჩილავა, ირაკლი მეტრეველი, ლუკა წულაძე, მიშა აბზიანიძე, რევაზ მიქელაძე, გიგა შალიკაძე და სხვები. ასევე, დაკავებულია უკრაინის ერთი მოქალაქე.
დაკავებულთა ინტერესებს იცავენ: ახალგაზრდა იურისტთა ასოციაცია, „გამჭვირვალობა საქართველო“ და „საფარი“.
ამავე თემაზე:
რამდენიმე დაკავებულს აქვს დაზიანებები – საია აქციის მონაწილეებზე
