„თუ დაზიანდება, ახალს ავაშენებთ“, – ასე გვიპასუხეს ბათუმში, ბესიკის ქუჩაზე, #75, 77 და 79 – ში მშენებლებმა, როცა მათ სამშენებლო ტერიტორიის მიჯნაზე მდებარე სახლების უსაფრთხოებაზე ვკითხეთ. „ბათუმელებს“ იგივე უთხრა მშენებელი კომპანიის, შპს „ჯეო 2020“-ის ერთ-ერთმა მფლობელმა და დირექტორმა, ბეგლარ ბოლქვაძემ ერთი თვის წინაც.
ამ ქუჩაზე მოქალაქეებმა საკუთარი უსაფრთხოების დასაცავად სასამართლოსაც მიმართეს, თუმცა მათი თხოვნა არც მოსამართლე მარინა ფომაევამ გაითვალისწინა – მოსამართლემ მშენებლობა არ შეაჩერა.
მშენებლობის ასეთ სტანდარტს ბათუმში მერია ამკვიდრებს იმით, რომ მსგავსი ფაქტების შემდეგ დღის წესრიგში არ დგება საკითხი – რატომ იწვევს მშენებლობა ხშირად მეზობლად არსებული სახლების დაზიანებას. ამას კანონი არ უშვებს. სხვა მსგავს შემთხვევაზე მოქალაქემ „ბათუმელებს“ აჩვენა ბათუმის მერიის ოფიციალური პასუხი, სადაც ქალაქმშენებლობისა და ურბანული პოლიტიკის სამსახური მოქალაქეს წერს, რომ თუ რაიმე ზიანი მიადგება, მშენებელი აანაზღაურებს.
არადა მოქალაქეს კითხვები ჰქონდა საცხოვრებლის უსაფრთხოებაზე, სადაც მცირეწლოვანი ბავშვები ცხოვრობენ.
ასე გამოიყენა შპს „ჯეო 2020“-ის დირექტორმაც მერიის დამკვიდრებული პრაქტიკა.
შპს „ჯეო 2020“ ბესიკის ქუჩაზე, #75, 77 და 79-ში 26-სართულიან კორპუსს აშენებს. ამ მასშტაბის შენობას შესაბამისი საძირკველიც სჭირდება, მისი მომზადებისთვის მიმდინარე სამუშაოების სიმძლავრემ და რყევებმა მეზობლად საცხოვრებელი გარემო – ეზო, სახლები დააზიანა. სამშენებლო მიწის ნაკვეთის ფართობი 1294 კვ.მეტრია და კომპანია სრულად იყენებს მას.
აქ მცხოვრებმა ადამიანებმა მშენებლობასთან დაკავშირებით ბოლო ერთი თვის განმავლობაში არაერთ უწყებას შეატყობინეს, რომ მათი სახლების და ეზოების უსაფრთხოება რისკის ქვეშაა. ადგილზე არაერთხელ მივიდნენ მუნიციპალური ინსპექციის წარმომადგენლები, პოლიციაც გამოიძახეს, თუმცა, როგორც თავად გვიყვებიან, არაფერი შეცვლილა და ისინი ახლა გაცილებით უფრო საშიშ გარემოში ცხოვრობენ:
„ბზარები კიდევ გაჩნდა, ზოგი უფრო გაღრმავდა, ეზო დაწეულია. კედელი ყანყალებს“, – გვიყვება თემურ ჯიჯავაძე, მოქალაქე, რომელიც აქ ცხოვრობს.
სამშენებლო დოკუმენტების მიხედვით, ნებართვა შპს „ჯეო 2020“-მა ბესიკის ქუჩაზე 2024 წლის ოქტომბერში ავარიული სახლების ჩანაცვლების პროგრამის ფარგლებში მიიღო.
პროექტის განმარტებითი ბარათის თანახმად, კომპანიას განაშენიანების ინტენსივობის კოეფიციენტი [კ2] 3,5 დან 14,2-მდე გაუზარდეს. საპროექტო შენობა 25-სართულიანია, დამატებით ერთ, ტექნიკურ მიწისქვეშა სართულზე კი პარკინგის მოწყობას გეგმავენ.
შენობის სიმაღლე 83,30 მეტრი უნდა იყოს.
პროექტის რენდერიმონიშნულია მშენებლობის ადგილი
„პოლიცია რომ მოვიდა, მოვიდა კომპანიის დირექტორიც. ისე ცინიკურად იქცეოდა, პოლიციელი ძალიან გაღიზიანდა ბოლოს, უთხრა, ბიჭო შენ რა გაცინებსო – გვიყვება ერთ-ერთი სახლის მფლობელი.
მუნიციპალურმა ინსპექციამ „ბათუმელების“ კითხვებს არ უპასუხა.ინფორმაცია გამოითხოვეთ და მოგაწვდითო – გვითხრეს ინსპექციაში. პასუხის მოწოდებას ეს უწყება მინიმუმ 10 სამუშაო დღეს ანდომებს.
თუმცა მოქალაქეებმა მოგვაწოდეს მუნიციპალური ინსპექციის მიერ ადგილზე დათვალიერების შემდეგ შედგენილი დოკუმენტი, ე.წ. მითითება, რომლითაც ვიგებთ, რომ კომპანიამ სანებართვო პირობები დაარღვია.
იმავე დოკუმენტის მიხედვით, შპს „ჯეო 2020“-ს პირობების გამოსასწორებლად გონივრული ვადა, 7 დღე მისცეს, თუმცა მომიჯნავედ მცხოვრებთა ინფორმაციით, კომპანიას სამუშაოები არ შეუჩერებია.
ამონარიდი მუნიციპალური ინსპექციის მითითებიდან
საძირკვლის მომზადების სამუშაოებს შპს „ჯეო 2020“ ახლაც აგრძელებს [13 ოქტომბერს]. ბზარები კი სამშენებლო ტერიტორიის მომიჯნავე მიწის ნაკვეთებსა და მასზე არსებულ შენობებზე „ბათუმელებს“ კიდევ უფრო გაღრმავებული დახვდა.
მოსახლეობა ითხოვს, სამხარაულის ექსპერტიზის ბიურომ შეისწავლოს ვითარება და მერია, როგორც ნებართვის გამცემი ორგანო, გახდეს იმის გარანტი, რომ მათ საკუთრებას ზიანი არ მიადგება.
სამშენებლო ტერიტორიის მომიჯნავედ მცხოვრები თემურ ჯიჯავაძის თქმით, კომპანიის მფლობელი სთხოვს დაუმტკიცოს, რომ ზიანი მის სახლსა და ეზოს სამშენებლო სამუშაოების დაწყების შემდეგ მიადგა.
ამავე დროს, მშენებელს ნებართვის მიღებამდე მომიჯნავე ტერიტორიებზე არსებული შენობების კონსტრუქციული მდგრადობის კვლევა ჩატარებული და მერიისთვის წარდგენილი აქვს და ნაკლებად სავარაუდოა კომპანიის დირექტორს არ ახსოვდეს რა წერია ამ დოკუმენტში.
ის, რომ ამ სახლებს ბზარები არ ჰქონდა, კარგად იციან მერიაშიც, რაც დოკუმენტითაც დადასტურებულია:
მერიაში წარდგენილ დოკუმენტში ვკითხულობთ, რომ 40-წლიანი გამოცდილების ექსპერტმა, ლევან იმედაძემ გამოიკვლია საპროექტო შენობიდან 20 მეტრამდე მანძილით დაშორებული შენობა-ნაგებობები და დაადგინა, რომ თითოეული მათგანი იყო ექსპლუატაციისათვის ვარგისი. არცერთ შემთხვევაში სპეციალისტს არ დაუწერია, რომ შენობას ჰქონდა ბზარები, არცერთ შემთხვევაში მას ამ შენობების მდგრადობის საკითხი კითხვის ნიშნის ქვეშ არ დაუყენებია, სხვაგვარად მერია აქ მშენებლობის ნებართვას ვერ გასცემდა.
ამონარიდი დოკუმენტიდან
მოქალაქეების თქმით, მათ მაინც მოუწიათ სამხარაულის ექსპერტიზის ბიუროსათვის მიმართვა შესაბამისი კვლევების ჩასატარებლად, მიუხედავად იმისა, რომ ეს დიდ ხარჯებთან არის დაკავშირებული. ექსპერტს შესწავლა ჯერ არ დაუწყია.
კიდევ ერთო საინტერესო დეტალი დოკუმენტებიდან:
სამშენებლო დოკუმენტებს შორის არის არქიტექტორის საექსპერტო დასკვნა, სადაც ექსპერტი ბესიკის ქუჩაზე დაგეგმილი კორპუსის პარამეტრებს მიმოიხილავს მთავრობის N41 დადგენილების მოთხოვნებთან შესაბამისობის დასადგენად. დასკვნაში კი წერს, რომ ლუკა ასათიანის ქუჩაზე დაგეგმილი პროექტი შესაბამისობაშია ტექნიკურ რეგლამენტთან, ანუ შენობის მისამართი არასწორადაა მითითებული.
ამონარიდი დოკუმენტიდან
ვისია „ჯეო 2020“ და რა გავლენებით სარგებლობენ მისი მფლობელები?
შპს „ჯეო 2020“ 2020 წელს დაფუძნებული კომპანიაა, მის 30 პროცენტს დავით შამილაძე ფლობს, 70 პროცენტს კი – შპს „აბ დეველოპმენტი“, რომლის 100 პროცენტს ბეგლარ ბოლქვაძე და ბეგლარ ქედელიძე თანაბრად ინაწილებენ. ისინი წილებს ფლობენ სხვა სამშენებლო კომპანიებშიც, მათი ბიზნეს პარტნიორია ასევე დავით ბედინაძე.
ბეგლარ ბოლქვაძე იყო ბათუმის საკრებულოს წევრის, მამუკა კაკაბაძის ბიზნესპარტნიორი. ისინი ერთობლივად ფლობდნენ შპს „ველ ბილდინგის“.
შპს „ველ ბილდინგი“ ბათუმის საკრებულოს წევრმა, მამუკა კაკაბაძემ 2023 წლის ივნისში დააფუძნა. მაშინ ის აჭარის უმაღლეს საბჭოში მუშაობდა.ძველ ბათუმში კორპუსის მშენებლობის ნებართვის პარალელურად ბათუმის საკრებულოს წევრის კომპანიამ 12-სართულიანი სასტუმროს მშენებლობის ნებართვა მიიღო გონიოს სანაპიროზე.
შპს „ველ ბილდინგის“ დაფუძნებიდან მალევე, 2 თვეში, აჭარის უმაღლესი საბჭოს მოხელემ კომპანიის 55 პროცენტი შპს „აბ დეველოპმენტს“ გადაუფორმა კონკრეტული ვალდებულებით, 45% კი საკუთრებაში დაიტოვა. მაშინ „აბ დეველოპმენტის“ წილებს ბეგლარ ბოლქვაძე და ირაკლი ანანიძე ფლობდნენ.
„ბათუმელებმა“ კომპანიის დირექტორთან დაკავშირება ამჯერად ვერ შეძლო. კომენტარის მიღების შემთხვევაში მასალა განახლდება.
სტაჟირების პროგრამის ფარგლებში, თიბისიში სტუდენტებთან შეხვედრა გაიმართა, რომელსაც 10 უნივერსიტეტის 200-მდე სტუდენტი დაესწრო.
შეხვედრის ფარგლებში სტუდენტებმა თიბისისა და სტაჟირებისპროგრამის შესახებ დაწვრილებითი ინფორმაცია მიიღეს, გაეცნენ კომპანიის მიდგომებს ახალგაზრდების განვითარებისა და პროფესიული ზრდის მიმართულებით და გაიგეს, რა შესაძლებლობებს სთავაზობს პროგრამა მათ, ვისაც კარიერის დაწყება თიბისიში სურს.
ღონისძიების ერთ-ერთი მთავარი ნაწილი პანელური დისკუსია იყო, რომლის ფარგლებშიც სტუდენტებს პროგრამის მონაწილე სტაჟიორებისა და მენტორების გამოცდილების გაზიარების შესაძლებლობა ჰქონდათ. მონაწილეებმა ისაუბრეს პროგრამის ყოველდღიურობაზე, სამუშაო პროცესსა და იმ გამოცდილებაზე, რომელსაც თიბისიში პროფესიული განვითარების პირველ ეტაპზე იღებენ. სტუდენტებმა მათთვის საინტერესო კითხვები დასვეს და პასუხები უშუალოდ იმ ადამიანებისგან მიიღეს, რომლებიც პროგრამის შიდა პროცესებს ყველაზე კარგად იცნობენ.
შეხვედრის განმავლობაში, სტუდენტებს შესაძლებლობა ჰქონდათ პირადად გასაუბრებოდნენ სტაჟირების პროგრამაში წარმოდგენილი ყველა მიმართულების წარმომადგენელს, მიეღოთ ინფორმაცია კონკრეტული სფეროების შესახებ და უშუალოდ გაეგოთ, როგორია მუშაობა თიბისის სხვადასხვა გუნდში. ახალგაზრდები ასევე შეხვდნენ ადამიანური რესურსების მიმართულების წარმომადგენლებს, რომლებმაც შერჩევის პროცესთან დაკავშირებით პრაქტიკული რჩევები გაუზიარეს.
თიბისისთვის ახალგაზრდებისმხარდაჭერა მათი პოტენციალის აღმოჩენისა და ახალი შესაძლებლობების შექმნის ხელშეწყობას ნიშნავს. სტაჟირებისპროგრამით თიბისი ახალგაზრდებს აძლევს შესაძლებლობას, ცოდნა პრაქტიკაში გამოიყენონ, გამოცადონ საკუთარი ძალები, ისწავლონ პროფესიონალებისგან და პირველი მნიშვნელოვანი ნაბიჯები გადადგან კარიერულ გზაზე.
თიბისისსტაჟირებისპროგრამაზეგანაცხადებისმიღებისბოლოვადაა 14 ოქტომბერი. გაეცანი მიმართულებებს, აირჩიე შენთვის საინტერესო სფერო და დღესვე დარეგისტრირდითიბისისსტაჟირებისპროგრამაზე.
მთავარია გჯეროდეს საკუთარი შესაძლებლობების, გაბედო და სცადო.
13 ოქტომბერს, შავ ზღვაში, ბულგარეთის ტერიტორიულ წყლებში დრონებმა ორ გემზე მიიტანეს შეტევა. ერთი გემი ჩაიძირა.
პირველადი ცნობებით, გემის ჩაძირვისას სულ მცირე 4 ადამიანი გადაარჩინეს. გემის ეკიპაჟის დანარჩენი წევრების შესახებ ინფორმაცია და სხვა დეტალები ჯერჯერობით არ ვრცელდება.
რაც შეეხება მეორე გემს, მედიის ცნობით, მალტის დროშის ქვეშ მცურავ, უკრაინელი მფლობელის გემ „Chelsea 3“-ს ბულგარეთის სანაპიროდან დაახლოებით 18 საზღვაო მილის (33 კმ) მოშორებით, ღამის 1:30 საათზე სამი დრონი მოხვდა და დააზიანა.
მაშველებმა შეძლეს გემის ეკიპაჟის გადარჩენა. ეკიპაჟის წევრები უკრაინის და აზერბაიჯანის მოქალაქეები არიან. დაშავებული მეზღვაურებიდან ხუთმა მსუბუქი დაზიანებები მიიღო, ხოლო ერთმა – დამწვრობა.
ეს ბულგარეთში ბოლო ერთი კვირის განმავლობაში მომხდარი მსგავსი ტიპის მეორე შემთხვევაა.
ბულგარეთის პრემიერ-მინისტრმა რუმენ რადევმა განაცხადა, რომ იგი აპირებს რუსეთის ელჩი დაიბაროს ამ „მიუღებელი“ თავდასხმების გამო.
ეს ის ფონდებია, რომლებიც ქართველ სტუდენტებს სამაგისტრო საფეხურზე სწავლას და კვლევების წარმოებას უფინანსებდნენ როგორც საქართველოში, ასევე ევროპის წამყვან უნივერსიტეტებში.
რა დაკარგეს ამ ფონდების ქვეყნიდან გასვლით ქართველმა სტუდენტებმა? – ამ თემაზე „ბათუმელები“ ისტორიკოს გიორგი ჯავახიშვილს ესაუბრა, ილიას უნივერსიტეტის მოწვეულ ლექტორს, რომელიც ადენაუერის ფონდის სტიპენდიატი იყო 2022-2024 წლებში.
ბატონო გიორგი, როგორც ვიცით, გერმანულმა ფონდებმა ქვეყნიდან გასვლის გადაწყვეტილება მიიღეს, რადგან „ოცნების“ კანონმდებლობა აღარ აძლევს მათ ქართველი ახალგაზრდების დაფინანსების საშუალებას. რა დაკარგეს ამით როგორც უნივერსიტეტებმა, ასევე მკვლევრებმა?
ყველაზე დიდი პრობლემა და შეიძლება ითქვას ტრაგედია ამ ფონდების გასვლის შემთხვევაში არის ის, რომ საქართველოში სამეცნიერო კვლევები ფაქტობრივად შეჩერდება.
განსაკუთრებით ადენაუერის ფონდის გასვლის შემთხვევაში გამოჩნდება ეს, რადგან ისინი ხუთზე მეტ მიმართულებას აფინანსებდნენ სამაგისტრო საფეხურზე, მათ შორის ორი ისეთი მიმართულება ჰქონდათ მონიშნული, როგორიცაა რელიგიის კვლევები და თანამედროვე საქართველოს ისტორიის პროგრამების დაფინანსება.
სტუდენტზე გაცემული სტიპენდია შეადგენდა დაახლოებით 300 ევროს, რაც, დამეთანხმებით, რომ საქართველოში მაგისტრატურის სტუდენტისთვის საკმაოდ დიდი თანხაა და ხშირად ის აღემატება ექთნის და ექიმის ხელფასსაც კი.
წარმოიდგინეთ, როცა არქივები ფასიანია საქართველოში და ნებისმიერი სხვა უწყებიდანაც ინფორმაციის გამოთხოვა უწევს მკვლევარს, იქნება ეს ეროვნული არქივი თუ სხვა, ეს სტიპენდია იყო გახსნილი ფანჯარა იმისათვის, რომ ისტორია გეკვლია და დაგემუშავებინა.
უამრავი სტუდენტი მხოლოდ იმიტომ გახდა წარმატებული, რომ ამ ფონდის დახმარებით დიდ დროს უთმობდა მეცადინეობას. შესაბამისად, თუ რამე დაზარალდა ამ ფონდების ქვეყნიდან გასვლით, პირველ რიგში დაზარალდა ქართული სოციალური მეცნიერებები. დაზარალდნენ დამოუკიდებელი მკვლევრები, რომლებიც საქართველოს ისტორიასა თუ კულტურაზე მუშაობდნენ.
გარდა ამისა, მკვლევრებსა და სტუდენტებს ადენაუერის ფონდის ეგიდით შესაძლებლობა ეძლეოდათ გაცვლით კონფერენციებში მიეღოთ მონაწილეობა დასავლეთ და ცენტრალურ ევროპის ქვეყნებში.
სტიპენდიის მფლობელები მიდიოდნენ პოლონეთში, გერმანიაში ან ჩეხეთში და ეცნობოდნენ თავიანთ თანატოლ, ახალგაზრდა მეცნიერებს, ისტორიკოსებს და გეოგრაფებს, რაც ხელს უწყობდა როგორც ცოდნისა და გამოცდილების გაზიარებას, ასევე საქართველოს ცნობადობის გაზრდას.
ხომ არ იყო ეს მიზანმიმართული ნაბიჯი იმისკენ, რომ სწორედ ისტორიის კვლევისთვის შეეშალათ ხელი და მეორე ის, რომ მოეწყვიტათ ჩვენი განათლების სისტემა ევროპულისგან?
წესით, ნორმალურ, დემოკრატიულ სამოქალაქო საზოგადოებაში მთავრობა თავად ზრუნავს ჰუმანიტარული და სოციალური მეცნიერებების დაფინანსებაზე და მხარს უჭერს ასეთი კვლევების განვითარებას, მაგრამ საქართველოში ისტორიის და თუნდაც ფოლკლორისტიკის, თეოლოგიის დაფინანსება არ ხდება. იმიტომ კი არა, რომ ფული არ არის, პოლიტიკური ნება არ არსებობს.
ნამდვილად გამოიძებნება ხუთი ქართველი ფილოსოფოსის დასაფინანსებელი 1200 ლარი ოთხი წელიწადში, ამის სურვილი რომ არსებობდეს, რადგან იციან, რა ალტერნატივები შეიძლება გამოაჩინოს საზოგადოებრივი ქსოვილის შესწავლამ და ბუნებრივია, ეს არ უნდათ ავტორიტარიზმისკენ მიდრეკილ ადამიანებს, რომლებიც დემოკრატიის უკუსვლით არიან დაკავებული.
ამიტომ, მეცნიერება უნდა მოსპონ, რადგან ის ხსნის სამყაროს და გვაჩვენებს უკეთეს ალტერნატივებს.
„მოგვმართონ და დავრთავთ დაფინანსების უფლებასო“ – ასე ამბობდა „ოცნების“ ხელისუფლება რუსული კანონების განხილვისას. თუმცა ფაქტია და ეს ჩანს ფონდების განცხადებებიდანაც, რომ მათ არ მისცეს უფლება დაეფინანსებინათ საქართველოში მეცნიერება. იქნებ კონკრეტული მაგალითებით ავუხსნათ მკითხველებს, რა დააკარგვინეს ქვეყანას და რატომ?
მარტივი მაგალითი შემიძლია მოვიყვანო. ყველამ ვიცით, რომ საქართველოს მთა არის ძალიან მძიმე მდგომარეობაში, როგორც დემოგრაფიულად, ასევე ლანდშაფტურად. ინგრევა და ნადგურდება ძველი ქართული ძეგლები.
ადენაუერის ფონდის ერთ-ერთი ბოლო პროექტი გახლდათ თრუსოს ხეობის კულტურული მემკვიდრეობის შესწავლა. არც კი უფიქრიათ კულტურის სამინისტროში, თუ როგორ შეიძლება ამ ხეობის პოპულარიზება, რომ უფრო მეტი ადამიანი ესტუმროს და აღმოაჩინოს თრუსოს ხეობის უამრავი ძეგლი, შესანიშნავი ჩანჩქერები, მთები, მდინარეები და წყაროების სისტემა და ამ ყველაფრის კვლევას აფინანსებდა ადენაუერის ფონდი.
გამოდის, რომ ახლა აღარც ხეობა იქნება შესწავლილი და საქართველოს მოსახლეობასაც არ ექნება სათანადო ცოდნა ამ მემკვიდრეობის შესახებ. საკუთარი ისტორიის, ლანდშაფტის, ბუნების და ძველი ციხე-კოშკების კვლევაზე გვჭირდება თურმე მთავრობის თანხმობა.
ეს არის ზეწოლა პირდაპირი გაგებით საქართველოს კულტურაზე, რადგან როგორ შეიძლება, რომ თრუსოს კოშკების გადარჩენის პროგრამა სანქცირდებოდეს ხელისუფლებისგან.
და ეს კანონიც, [გრანტების შესახებ] იმიტომ არის მართლა რუსული და სწორედ ამიტომაც დაერქვა ეს სახელი, რომ იმას აკეთებს, რაც რუსებმა გაუკეთეს ამ ქვეყნას და მის იტორიას – გადაშალეს და გადაღებეს.
ასე მარტივად გადაშლიან ესენიც, რომ აქეთა მხარეს აღარავინ დარჩეს პასუხის გამცემი და მოპასუხე, თუნდაც იმიტომ, რომ არ იქნება საკმარისი ცოდნა და არგუმენტი, აღარ იქნება კრიტიკული დამოკიდებულება.
არის ეს ქვეყნის ინტერესების წინააღმდეგ წასვლა, როგორ ფიქრობთ?
ნამდვილად ასეა, კი და აქ მხოლოდ ძეგლების ან არქიტექტურის დაფინანსებაზე არ იყო საუბარი, ჩვენ გვაქვს არამატერიალური კულტურის ძეგლებიც, ზეპირსიტყვიერების ნიმუშები და ფოლკლორისტების მუშაობასაც უწყობდა ხელს ადენაუერის ფონდი.
საბჭოთა კავშირის დროსაც კი არ აუკრძალავთ ეთნოგრაფიის დაფინანსება საქართველოში და ახლა ვიღებთ მოცემულობას, როცა სახელმწიფო, რომელსაც ფული არ ემეტება ფოლკლორისთვის, არც ჩვენს მეგობრებს აძლევს საშუალებას, რომ დაგვეხმაროს.
მერე უკვირთ, მოსახლეობა რატომ მცირდება, პატრიოტიზმი რატომ არ არის, რატომ სუსტდება სამოქალაქო ღირებულებები და იზრდება ნიჰილიზმი.
მეცნიერება არის ხიდი ცოდნას და სამოქალაქო საზოგადოებას შორის და ამ ხიდს, დემოკრატიულ ქვეყნებში სახელმწიფო აშენებს. აქ კი ამ ხიდებს გვინგრევენ და სამუდამოდ სწირავენ ქართველ ხალხს უპერსპექტივობისთვის.
ამავე დროს საუბრობენ პატრიოტიზმზე, რელიგიაზე, ოჯახზე…
ახლა მივიღეთ მოცემულობა, სადაც სამეცნიერო საქმიანობა, პროფესიული ეთიკა და უკეთეს მომავალზე ფიქრი ჩაანაცვლა ყალბმა რიტორიკამ, პოპულიზმმა და ისტორიის ინსტრუმენტალიზებამ. ისინი „ქართველობას“ იყენებენ როგორც ინსტრუმენტს, რომ განადგურონ უკეთესი მომავლის პერსპექტივაც და ქართველი ხალხის ცხოვრებაც.
ახლა მართლა ვცხოვრობთ რაღაც ტყუილში და ბოროტად გამოყენებული განწყობების კორიანტელში, რომელიც კარგს არაფერს მოიტანს არც მათთვის და არც ქართველი ხალხისთვის.
ახლა, როცა უამრავი სექტორი ნადგურდება და უამრავი ადამიანი ვეღარ აკეთებს საყვარელ საქმეს, ისინი იწყებენ ისტორიის ინსტრუმენტალიზებას და ძარცვას.
მას შემდეგ რაც რუსული კანონები მიიღეს, გახსენდებათ თუნდაც ერთი პროექტი, ერთი მკვლევარი, რომელიც „ოცნების“ ხელისუფლებამ დააფინანსა? არ ვგულისხმობ ისეთ პროექტებს, რომელიც პირდაპირ შედის პარტიულ ინტერესებში, დამოუკიდებელ მკვლევრებს ან პროექტებს ვგულისხმობ.
ადენაუერის ფონდი მაგალითად, თბილისის სახელმწიფო უნივერსიტეტში აფინანსებდა ევროპის კვლევების პროგრამას და ეს პროგრამა უკვე მძიმე დღეშია.
მივიღეთ მოცემულობა, რომ სტიპენდიები სამაგისტრო დონეზე ქვეყანაში აღარ არსებობს და თუ არსებობს, ეს არის რაღაც მიზერული და თან ერთჯერადი.
რატომ უნდა გაყვეს ადამიანი მეცნიერებას თუ იცის, რომ დაფინანსება და მხარდაჭერა არ აქვს ამ ქვეყანაში. გარდა ამისა, ევროპული ფონდების დახმარებით ხდებოდა ქართველი მეცნიერების ჩართვა საერთაშორისო ან რეგიონულ დისკუსიებში და ცალკე აღებული ამას ვერ ახერხებდნენ მანამდე ქართული უნივერსიტეტები.
ამ ფონდების ხელშეწყობით ხდებოდა უცხოელი სპეციალისტების ჩამოყვანა საქართველოში და ქართველი პროფესორებისა და სტუდენტების გაგზავნა ევროპაში ცოდნის გაცვლის და საერთაშორისო დისკუსიაში მონაწილეობისთვის.
ახლა ეს ყველაფერი შეჩერდა, მეცნიერება აღარ არის პრიორიტეტული, აღარ არის საინტერესო და თავგადასავლებით აღსავსე. ვერანაირად ვეღარ ხდება ახალგაზრდების დაინტერესება – რატომ უნდა გახდეს ის ეთნოგრაფი ან თუნდაც მუსიკის ისტორიკოსი.
ამ ფონდების საშუალებით კი გრძნობდი, რომ საინტერესო იყავი არა მხოლოდ უნივერსიტეტისათვის, არამედ გარე სამყაროსთვის. ახლა ეს დამოკიდებულება ქრება და ვიღებთ თაობას, რომელიც საკუთარ პროფესიულ ცოდნას მოკლავს და დათრგუნავს, იმიტომ, რომ მათ სახელმწიფო ვერ დაეხმარება და მეგობრები კიდევ მტრად არიან გამოცხადებულნი.
თუკი აქ აღარ იქნება დაფინანსების მიღების შესაძლებლობები, როგორ ფიქრობთ, ეს გამოიწვევს იმას, რომ ქართველმა სტუდენტებმა ისევ ევროპაში დაიწყონ მომავლის ძებნა და ქვეყანა დატოვონ?
ქართველი სტუდენტები რის გამოც ხვდებოდნენ სხვადასხვა ევროპული უნივერსიტეტების ყურადღების ცენტრში, იყო იმის დამსახურება, რომ სწორედ ეს გერმანული თუ სხვა ფონდები უჭერდნენ მხარს ამ სტუდენტებისთვის განვითარებას და ეს ხდებოდა იმის წინაპირობა, რომ შემდეგ მიეღოთ სხვადასხვა პრესტიჟული სტიპენდია ევროპის უნივერსიტეტებში. კონკურენტულები ვიყავით ქართველი სტუდენტები საერთაშორისო ბაზარზე.
მაგრამ ახლა, როცა აღარ ექნებათ ამ ფონდებისგან მსგავსი მხარდაჭერა სტუდენტებს და ვერც ისეთ გამოცდილებას ვეღარ მიიღებენ, როგორც აქამდე იღებდნენ საერთაშორისო პროექტებში მონაწილეობით, აღარავის მოუნდება მათში ფულის ჩადება.
რომც მოინდომონ ამის გამო ემიგრაციაში წასვლა, შანსები მაინც მცირდება, რადგან იმ კონკრეტულ მიმართულებებზე, რომლებსაც ისინი აირჩევენ, კონკურენტები ეყოლებათ სხვა პოსტ-საბჭოთა სივრცის ქვეყნებიდან, იქნება ეს სომხეთი, უკრაინა, მოლდოვა, ყაზახეთი, ბალტიისპირეთის ქვეყნები თუ სხვა, რომლებიც ასევე შესაძლოა მუშაობდნენ საბჭოთა წარსულის კვლევებზე და რატომ უნდა აიყვანოს, მაგალითად, კემბრიჯის ან ჰუმბოლდტის უნივერსიტეტებმა ქართველი ნაკლებად ძლიერი და უფრო მეტიც, ბევრად დასუსტებული სტუდენტი, მაშინ როცა ამ ქვეყნებიდან ბევრად ძლიერი კანდიდატები იქნებიან კონკურენციაში.
ამ შემთხვევაში ქართველი სტუდენტები დაიჩაგრებიან მხოლოდ იმიტომ, რომ არც სახელმწიფოს მხარდაჭერა ექნებათ და არც საერთაშორისო მეგობრების.
გამოდის, საქართველო ყველაფერს კარგავს, რაც ამ 30 წლის განმავლობაში ბრძოლით მოვიპოვეთ, თუნდაც განათლების სფეროში?
ამ მოცემულობით დავუბრუნდებით 1983 წლის ნიშნულს და ქართველ ბიოლოგებს, მათემატიკოსებს, ფილოსოფოსებს, ისტორიკოსებს გაუჭირდებათ დაეწიონ საერთაშორისო სტანდარტს და კიდევ 40 წელი იქნება საჭირო, რომ ისევ დავუბრუნდეთ არსებულ მდგომარეობას.
30-40 წელი ეს ნიშნავს ოთხ თაობას ბაკალავრების, მაგისტრანტების და დოქტორანტების და ნულიდან უნდა დავიწყოთ ყველაფერი.
რატომ შეიძლება უნდოდეს ხელისუფლებას ამის გაკეთება საკუთარი ქვეყნისთვის?
უბრალოდ არ სურთ კრიტიკული კითხვების დამსმელი, მომავალზე ორიენტირებული, უკეთეს ცხოვრებაზე მოფიქრალი ადამიანების არსებობა საქართველოში, რადგან ასეთი საზოგადოება წინაღობას უქმნის მათ განზრახვას.
ეს არ არის მხოლოდ რუსეთის სურვილი, უნივერსალური სახელმძღვანელოა ავტორიტარების და იქნება ეს რუსეთი, ჩინეთი, სინგაპური, ჩრდილოეთ კორეა თუ ვენესუელა, ყველა ერთ დაწერილ მოდელს იყენებს. ოდესღაც ჰიტლერმა და სტალინმა შექმნეს ეს მოდელები და ახლა გადმოაკოპირეს სხვადასხვა მასშტაბით ავტორიტარულმა სახელმწიფოებმა, რაც ჯერ კიდევ ვერ გადაიაზრა დემოკრატიულმა სამყარომ.
საბჭოთა კავშირის დანგრევის შემდეგ, იმის ნაცვლად, რომ ეფიქრათ რუსეთის და ავტორიტარიზმის აღმასვლაზე, ფიქრობდნენ კენგურუების დაცვაზე, რომელიც ჩემი აზრით გადასარევი ამბავია, მაგრამ კენგურუების რაოდენობა აშკარად მზარდია, დემოკრატიული სახელმწიფოების რაოდენობა კი მცირდება.
ამიტომ უნივერსალური მიდგომაა ავტორიტარებისთვის, რომ მათ უნდა გაანადგურონ კრიტიკული მედიები, მეცნიერება და კრიტიკული საზოგადოება.
წესიერ საზოგადოებაში ხომ ასე ხდება, რომ ჯერ ჟურნალისტი მიდის მეცნიერთან, საუბრობენ პრობლემაზე, შემდეგ მედიისგან იგებს მთელი საზოგადოება ამ პრობლემაზე და ამის შემდეგ მიდის საპარლამენტო მოსმენები და მიდის მსჯელობა პრობლემის მოგვარებაზე. ანუ დიდი ქსოვილია დემოკრატია.
ახლა კი მივიღეთ რა, რომ მედიაც რეპრესირებულია, აკადემიაც, ოპოზიციაც და სამოქალაქო საზოგადოებაც და დემოკრატიის განვითარების ნაცვლად გადავარდით მე-18 საუკუნეში ტირანიაში, სადაც ვიღაც ერთი მონარქი მართავს.
ერთადერთი გამოსავალი არის ის, რომ რაღაც პერიოდში რეჟიმები არსებობას წყვეტენ და მე იმედი მაქვს, რომ გლობალურ და ლოკალურ დონეზე რაღაცები აუცილებლად შეიცვლება.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 13 ოქტომბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 555 700 ადამიანი [გასულ დღე-ღამეში +1 390. ამ მონაცემებში შედის როგორც დაღუპულები, ასევე დაჭრილები]
ტანკი – 12 412 ერთეული [+2]
ჯავშანტექნიკა – 25 534 ერთეული [+7]
საარტილერიო სისტემა – 51 141 ერთეული [+51]
MLRS – 2 211 ერთეული [+2]
საზენიტო საბრძოლო სისტემა – 1 704 ერთეული [+1]
თვითმფრინავი – 443 ერთეული [+0]
ვერტმფრენი – 356 ერთეული [+0]
უპილოტო საფრენი აპარატის ოპერატიულ-ტაქტიკური დონე – 561 762 ერთეული [+1 889]
სახმელეთო რობოტიზებული კომპლექსი – 2 942 ერთეული [+15]
გემი/ნავი – 35 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 162 418 ერთეული [+362]
სპეცტექნიკა – 4 823 ერთეული [+3]
ფრთოსანი რაკეტა [ჩამოაგდეს] – 5 126 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
„არ დარჩება უკრაინა მარტო. ჩემი აზრით, სულ რომ არავინ დაუჭიროს მხარი უკრაინას და მთლიანად დაიკავოს უკრაინა, რუსეთი იქნება ევროპულ ავღანეთში. დამერწმუნეთ, უკრაინელები არ შეწყვეტენ ბრძოლას,“ – მიიჩნევს გადამდგარი გენერალი, ვახტანგ კაპანაძე, მას ტრამპის ბოლო განცხადებებზე ვესაუბრეთ: ხომ არ ნიშნავს ეს, რომ უკრაინას აშშ-ის მხარდაჭერა აღარ ექნება და თუ ასე მოხდა, რა რეალობის წინაშე აღმოჩნდება უკრაინა?
„აქ საუბარია, პირველ რიგში, ამერიკულ სადაზვერვო მონაცემებზე და სტარლინკზე, რაც მნიშვნელოვანი ფაქტორია უკრაინისთვის ამ ომში,“ – გვიყვება სამხედრო ანალიტიკოსი. ვახტანგ კაპანაძის აზრით, პუტინი ვერანაირ წარმატებას ვერ აღწევს ბრძოლის ველზე, ამიტომაც ცდილობს ცივი ზამთრით ისევ შეაშინოს უკრაინა, თუმცა:
„ზამთარი რუსეთშიც არის, თანაც არანაკლები, ვიდრე უკრაინაშია. დღეს უკრაინა ახერხებს და სარკისებურად პასუხობს რუსეთს: დაარტყეს უკრაინის ხიდებს? – უკრაინელებმა დაარტყეს ტაგანროგში მთავარ სარკინიგზო დამაკავშირებელ ხიდს… უკრაინა რუსეთს არ რჩება ვალში – უფრო და უფრო ავითარებს დარტყმების შესაძლებლობებს.
არც რუსებისთვის არ იქნება ეს ზამთარი შოკოლადი,“ – ამბობს ვახტანგ კაპანაძე. იგი მნიშვნელოვნად მიიჩნევს ერდოღანის ბოლო განცხადებებს, რომელიც მას შემდეგ გაკეთდა, როცა რუსებმა შავ ზღვაში თურქეთის გემს დაარტყეს.
„ბათუმელებმა“ ვახტანგ კაპანაძესთან ინტერვიუ ჩაწერა. ის სამხედრო მეცნიერებათა დოქტორია და საქართველოს გენერალური შტაბის უფროსი ორჯერ იყო. ვახტანგ კაპანაძე პოლიტიკური პარტიის – „ჯერ საქართველოს“ თანადამფუძნებელი და ერთ-ერთი ლიდერია.
ბატონო ვახტანგ, ტრამპის ახალმა განცხადებებმა, რომ უკრაინას ახალი პრეზიდენტი სჭირდება, აშშ რუსულ დიზელს შეიძენს და ასე შემდეგ, გააჩინა მოსაზრება, რომ უკრაინა აშშ-ის მხარდაჭერის გარეშე ვეღარ შეძლებს წარმატების მიღწევას ომში. თქვენი აზრით, რაზეა გათვლილი ტრამპის ეს გზავნილები?
შემიძლია გითხრათ ის, რომ შედეგი ამ შეთანხმებისა ნულოვანიც კი არაა ამერიკისთვის. ფაქტობრივად, ამერიკა არაფერს არ იღებს ამ მოლაპარაკებიდან. ნავთობის ეს რაოდენობა, რაც დაასახელა ტრამპმა, რომ უნდა მიიღოს რუსეთიდან ეტაპობრივად, ფაქტობრივად, არაფერია ამერიკისთვის.
რაც მთავარია, პუტინი სანაცვლოდ არაფერს აკეთებს: პუტინის ადმინისტრაციიდან აშშ-მ მიიღო მხოლოდ ის შეტყობინება, რომ რუსეთის ხელისუფლება იფიქრებს უკრაინასთან მოლაპარაკების დაწყებაზე.
არ ვიცი, რა გათვლით მოქმედებდა ტრამპი. ფაქტია, რომ ამერიკელების რეაქცია ძალიან მძაფრია. როგორც დემოკრატებმა განაცხადეს, ეს არის შეთანხმება სატანასთან, რომელიც ეხმარება ირანს, აწვდის იარაღს ამერიკელების დასახოცად.
მეორე მხრივ, გაურკვეველია, სად აქვს რუსეთს ამდენი დიზელი, რომ ამერიკას მიაწოდოს? ცნობილია, რომ რუსეთს თავად არ ჰყოფნის ნავთობი და აკრძალული იყო მისი ქვეყნიდან გატანა. იქეთ ყიდულობს რუსეთი დიზელს.
აშშ-ს, ბუნებრივია, გააჩნია უკრაინაზე ზემოქმედების ბერკეტები. შეიარაღების მიწოდებაზე აშშ ფულს იღებს და ეს არა მგონია შეწყვიტონ. აქ საუბარია, პირველ რიგში, ამერიკულ სადაზვერვო მონაცემებზე და სტარლინკზე, რაც მნიშვნელოვანი ფაქტორია უკრაინისთვის ამ ომში.
ტრამპის განცხადებებს გამოეხმაურა ამერიკელი მილიარდერი ილონ მასკიც: „დროა, უკრაინამ ახალი პრეზიდენტი აირჩიოს. ზელენსკი ძალიან შორს წავიდა“, – თქვა მან. ანალიტიკოსების ნაწილი მსჯელობს იმაზე, რომ პუტინს რადგანაც არავითარი წარმატება არ აქვს ბრძოლის ველზე, მას სურს უკრაინას აიძულოს კაპიტულაცია. მოწოდებები უკრაინის ახალ პრეზიდენტზე ამიტომ ხომ არ ისმის, რომ ზელენსკის შემცველი მარტივად დათანხმდეს პუტინის მოთხოვნებს?
პრეზიდენტის არჩევა არის ხალხის საქმე და ეს არის უკრაინის მოსახლეობის უფლება. ზელენსკიმ განაცხადა, რომ არაა არჩევნების ჩატარების წინააღმდეგი, მაგრამ ზელენსკი ითხოვს ორ თვეს, ზუსტად 60 დღეს, რომ ჩატარდეს არჩევნები. ამისთვის საჭიროა 2 თვე, ანუ 60 დღე მშვიდობა, რომ არ იყოს სროლა და ჩატარდეს არჩევნები. ამაზე არაა თანახმა რუსეთი.
სხვა საკითხია, რამდენად კორექტულია, როცა ზელენსკის სთხოვ გადადგომას და პუტინს არ ეუბნები იმავეს.
არსებობს ვერსია, რომ ეს სჭირდებათ იმისთვის, რომ ვინც ზელენსკის შეცვლის, ის შესაძლოა უფრო მარტივად დათანხმდეს პუტინის მოთხოვნებს. პუტინი კი ხედავს, რომ ბრძოლის ველზე არანაირი წარმატება არ აქვს და ცდილობს, უკრაინა აიძულოს კაპიტულაციას დათანხმდეს.
პუტინი აცხადებს, რომ არ დაჯდება ზელენსკისთან მოლაპარაკების მაგიდასთან. ზელენსკი მზადაა, დაჯდეს პუტინთან მოლაპარაკებაზე. პუტინი იძახის, რომ ზელენსკის თუ მოლაპარაკება სურს, ჩამოვიდეს მოსკოვში.
არადა ჩავიდა თავის დროზე მოსკოვში პოლონეთის მთელი დელეგაცია და ვერ ჩაფრინდა დანიშნულების ადგილზე.
ტრამპმა ხვალ შესაძლოა სულ სხვა რაღაც თქვას, ბოლომდე ვერ მიჰყვები მის განცხადებებს, მაგრამ ყოველ შემთხვევაში ამ განცხადებებით ჩანს, რომ ტრამპი ცდილობს პუტინის გათეთრებას. ამბობს, რომ პუტინთან თითქოს შეიძლება დალაპარაკება და ასე შემდეგ. არა მგონია, ამერიკის ინტერესებში იყო პუტინის გათეთრება.
სხვათა შორის, ამ დღეებში უნდა შევიდეს ჯორჯიის შტატში, ნავსადგურ სავანაში ბერძნული დროშის ქვეშ მცურავი ტანკერი, რომელმაც უნდა შეიტანა 37-38 ათასი ტონა დიზელი ამერიკაში. ეს არის მონაცემები, რომელმაც გამოჟონა მკვლევართა ჯგუფიდან. ეს გემი გამოსული სანკტ-პეტერბურგიდან 22 სექტემბერს და თავიდანვე გეზი ჰქონდა აღებული შტატებისკენ. ტრამპი ამ დროს 9 ოქტომბერს აცხადებს ხელშეკრულების შესახებ.
გამოდის, რომ ეს შეთანხმება მანამდე არსებობდა. ეს ნახევრად სიმართლე, ნახევრად იმედი, ნახევრად ოცნება ძალიან დამაზიანებელია. თვითონ ტრამპის პოლიტიკური წონა საკმაოდ დაზარალებულია.
ტრამპის ამ განცხადებამდე ზელენსკიმ თქვა: ნუ დახოცავენ ჩვენს ბავშვებს და ჩვენ არ დავარტყამთ რუსეთის დიზელის წარმოების ცენტრებს. მეორე დილით აცხადებს ტრამპი, რომ მიღწეულია რუსეთს და უკრაინას შორის ენერგეტიკული ზავიო.
ამას რა მოჰყვა? ტრამპის განცხადების შემდეგ რუსეთმა დაარტყა ხარკოვის თბოელექტროსადგურს. ანუ რა გამოდის: ტრამპმა 9-ში განაცხადა ენერგეტიკული ზავის შესახებ და 11-ში რუსეთმა უკრაინას ისევ დაარტყა. ზელენსკი ამბობს და ჩვენც ამას ყველა კარგად ვხედავთ, რომ ნებისმიერი დათმობა რუსეთისთვის არის აღქმული, როგორც აგრესიის გაგრძელების უფლება.
ნავთობის დეფიციტი ძირითადად მაინც გამოწვეულია ჰორმუზის სრუტის ამბით და არა რუსეთ-უკრაინის ომით. ამერიკას უკვე კარგა ხანია რუსეთიდან ნავთობის შესყიდვა შეწყვეტილი ჰქონდა. ამიტომაც, ვერ გეტყვით, რეალურად რა დგას ტრამპის ამ განცხადებების უკან.
თუ დავუშვებთ, რომ აშშ მართლაც შეწყვეტს უკრაინის მხარდაჭერას – თქვენ სტარლინკს გაუსვით ხაზი და ასევე ამერიკული დაზვერვის მნიშვნელობას უკრაინისთვის – რა რეალობის წინაშე შეიძლება აღმოჩნდეს უკრაინა?
უკრაინისთვის უფრო რთული გახდება საომარი მოქმედებების წარმოება, თუმცა გერმანიამ, პოლონეთმა, ბრიტანეთმა კიდევ ერთხელ მხარდაჭერა გამოუცხადეს უკრაინას ტრამპის ამ გადაწყვეტილების შემდეგ. ეს ნიშნავს, რომ უკრაინა მარტო არ დარჩება.
ფაქტია ისიც, რომ ევროპა საკმაოდ ინტენსიურად ემზადება საომარი მოქმედებებისთვის, მაგალითად, გერმანია-ჰოლანდიამ გააძლიერეს სადაზვერვო მონაცემების გაცვლის სისტემები. დრონების პოლკის ჩამოყალიბებას აპირებს გერმანია და ამისთვის უკრაინელი კონსულტანტები ჩაიყვანეს გერმანიაში. გადაიარაღება და მოდერნიზაცია მიმდინარეობს აქტიურად ევროპის ბევრ ქვეყანაში.
ჩემი ერთი ნაცნობი გერმანელი ექიმის განცხადებით, სწავლებები ჩაატარეს გერმანიის დიდ საავადმყოფოებში, სცენარით დღეში 1000 დაჭრილის მიღება როგორ უნდა შეძლოს საავადმყოფომ…
არ დარჩება უკრაინა მარტო. ჩემი აზრით, სულ რომ არავინ დაუჭიროს მხარი უკრაინას და მთლიანად დაიკავოს რუსეთმა, რუსეთი იქნება ევროპულ ავღანეთში. დამერწმუნეთ, უკრაინელები არ შეწყვეტენ ბრძოლას. ეს გამორიცხულია, რომ მოხდეს.
თავდაცვის ორგანიზება, რასაც ამ დრომდე წარმატებით ახერხებს უკრაინა ფრონტის ხაზზე, შესაძლებელი იქნება ამ ტენდენციის გაგრძელება ამერიკის ჩართულობის გარეშე?
ისეთივე წარმატებული ვერ იქნება, როგორც აქამდე. უკრაინას დასჭირდება მეტი რესურსი, მეტი ძალისხმევის გაღება. შეიძლება უკრაინამ დონბასი დაკარგოს, მაგრამ ის, რომ ეს იქნება რუსეთის საბოლოო გამარჯვება უკრაინაზე, ასე არ იქნება.
სამხედრო ანალიტიკოსების ნაწილს აქვს ასეთი მოლოდინი, რომ თუ პუტინმა უკრაინის დაყოლიება ვერ შეძლო, შესაძლოა, ბევრად უფრო გართულდეს მდგომარეობაში უკრაინაში მორიგი ზამთრის გადატანის კუთხით – პუტინმა გამოიყენოს ყინვა, როგორც მასობრივი განადგურების იარაღი.
ზამთარი რუსეთშიც არის, თანაც არანაკლები, ვიდრე უკრაინაშია. დღეს უკრაინა ახერხებს და სარკისებურად პასუხობს რუსეთს: დაარტყეს უკრაინის ხიდებს? – უკრაინელებმა დაარტყეს ტაგანროგში მთავარ დამაკავშირებელ ხიდს. დაარტყეს რუსებმა მონაცემთა დაცვის ცენტრს უკრაინაში? – უკრაინელებმა „იანდექსი“ აუფეთქეს რუსებს და ორი დიდი ცენტრი გაუთიშეს. „იანდექსი“ რუსეთისთვის ძალიან მნიშვნელოვანია, რადგან მანქანის გამოძახება იქნება, თუ ბანკში ანგარიშების ოპერირება, რუსეთში ეს ყველაფერი „იანდექსით“ ხდება.
ასე რომ, უკრაინა რუსეთს არ რჩება ვალში – უფრო და უფრო ავითარებს დარტყმების შესაძლებლობებს. შესაბამისად, არც რუსებისთვის არ იქნება ეს ზამთარი შოკოლადი.
პუტინს აწყობს კონფლიქტის ამჟამინდელი მოცემულობით გაყინვა და უკრაინის ნატოში გაწევრიანების მცდელობის შეჩერება, თუ იკვეთება სხვა ამოცანა, რომლის რესურსიც შეიძლება რუსეთს ჰქონდეს?
პუტინს ერთი ამოცანა აქვს ამ მოცემულობაში: როგორმე შეინარჩუნოს სტატუს-კვო და არსებული მიკრო-სამყარო. პუტინი ხვდება, რომ ვერც მსოფლიო გავლენა ექნება და არც უკრაინის აღება არ შეუძლია რეალურად. მოლაპარაკებაც ამიტომ არ აწყობს პუტინს, რადგან იქ რომ დაჯდეს, ვითარება უნდა შეიცვალოს. პუტინს უნდა, მოლაპარაკება დასრულდეს მისთვის მისაღები შედეგით, ამისთვის კი, უნდა გქონდეს უპირატესობა, რომ მოწინააღმდეგემ რაღაც დაგითმოს.
ასე რომ, მან დონბასი უნდა წაიღოს, რომ რაღაც მაინც უთხრას თავის მოსახლეობას. პუტინმა უნდა შექმნას რაღაც ტიპის წარმატების ილუზია, თორემ დაეშალა ქვეყანა თავზე.
ევროპელი ლიდერები საუბრობენ იმაზე, რომ რუსეთისგან ელოდებიან მასშტაბურ ჰიბრიდულ თავდასხმებს. ამის შესახებ ისაუბრა გერმანიის კანცლერმა ფრიდრიხ მერცმაც. რა სახის შეიძლება იყოს ეს თავდასხმები და რა განზრახვით?
ყველა მეთოდი შეიძლება იყოს გამოყენებული: მოსყიდვიდან დაწყებული, დრონების შეღწევით დასრულებული. დღეს გავრცელდა ინფორმაცია, რომ პოლონეთში იგეგმებოდა პრემიერ-მინისტრის და თავდაცვის მინისტრის ლიკვიდაცია და დააკავეს დაქირავებული კილერები.
რუსებმა თურქების გემს დაარტყეს შავ ზღვაში. კაპიტანი მოკლეს და ერთი მეზღვაური დაჭრილია. ამ გემს გადაჰქონდა სიმინდი და ნეიტრალურ წყლებში დაარტყეს. რამდენიმე დღის წინ ასევე დაარტყეს გემს, სადაც 22 კაცია დაკარგული. ეს გემი არც უკრაინაში მიდიოდა და არც უკრაინიდან არ მოდიოდა. ეს გემი ბულგარეთის წყლებში ჩაძირეს.
ამით რუსეთი მაქსიმალურად ცდილობს, რომ მოძრაობა შავ ზღვაზე პრობლემა გახადოს და უკრაინიდან ტვირთების გატანა შეაფერხოს.
არენაზე გამოდის უკვე ერდოღანი, რომელმაც უკრაინას გაუგზავნა ჰაერსაწინააღმდეგო საშუალებები, 25 მილიმეტრიანი საზენიტო ქვემეხები, რომელიც საკმაოდ ეფექტურია დრონების წინააღმდეგ, როგორც უკრაინელები იძახიან, თურქეთი შვეიცარიასთან ერთად ეცდება მოლაპარაკებების ორგანიზებას რუსეთს და უკრაინას შორის.
თურქეთი შავი ზღვის რეგიონში წამყვანი ქვეყანაა. ასე რომ, ეს მნიშვნელოვანი განაცხადია.
ერდოღანის გამოჩენამ შესაძლოა ითამაშოს მნიშვნელოვანი როლი?
შეიძლება ითამაშოს, მაგრამ უფრო მიმაჩნია, რომ ჩინეთი თუ ჩაერთვება, მაშინ უფრო სწრაფად იქნება ცვლილებები. ტრამპისგან განსხვავებით, ჩინეთს ნამდვილად შეუძლია პრინციპული პოზიციები დაიკავოს.
ახლა მთავარია, ჩინეთს რამდენად აწყობს ომის შეწყვეტა, რომ რუსები კიდევ უფრო აღარ დასუსტდნენ – ეს კიდევ ცალკე საუბრის თემაა.
თიბისი მომხმარებლებს გზავნილების განაღდების შესაძლებლობას განსაკუთრებული კონვერტაციის კურსით, 24/7-ზე სთავაზობს – სახლიდან გაუსვლელად, მობაილბანკისა და ინტერნეტბანკის საშუალებით, რაც კიდევ ერთხელ უსვამს ხაზს, რომ ბრენდი ზრუნავს მომხმარებლების ყოველდღიურობის გამარტივებასა და მათთვის დამატებითი სარგებლის შექმნაზე.
12 ოქტომბრიდან 27 დეკემბრის ჩათვლით, თიბისის მობაილბანკსა და ინტერნეტბანკში გზავნილების განაღდებისას მომხმარებლებს შესაძლებლობა ექნებათ, ჩაერთონ წამახალისებელ კამპანიაში და მოიგონ 1 000, 5 000 ან 10 000 ლარი.
კამპანიაში მონაწილეობისთვის მომხმარებელმა მინიმუმ 300 ლარის, დოლარის ან ევროს ოდენობის გზავნილი უნდა გაანაღდოს. გამარჯვებულები კი სამი საპრიზო კატეგორიის მიხედვით გამოვლინდებიან: ყოველკვირეული პრიზი – 1 000 ლარი, ყოველთვიური პრიზი -5 000 ლარი, სუპერპრიზი -10 000 ლარი.
კამპანიის დეტალური პირობების სანახავად ეწვიეთ ბმულს.
თიბისის მობაილბანკში, პირველად საქართველოში, შესაძლებელია გზავნილის ნაწილობრივი კონვერტაციაც – ეს ნიშნავს, რომ მომხმარებელს შეუძლია, დააკონვერტიროს ზუსტად ის თანხა, რომელიც იმ მომენტში სჭირდება, დარჩენილი თანხა კი მიღებულ ვალუტაში უსაფრთხოდ შეინახოს.
გაანაღდეთ გზავნილები მარტივად თიბისიში და ჩაერთეთ წამახალისებელ კამპანიაში. რაც უფრო მეტ გზავნილს გაანაღდებთ, მით მეტი შესაძლებლობა გექნებათ, მოიგოთ 1 000, 5 000 ან 10 000 ლარი.
„გურიასა და სამეგრელოში თხილი ხმება. საგანგაშო მდგომარეობაა. ჩართულნი არიან სპეციალისტები, მაგრამ კონკრეტული მიზეზი არ იციან, რა იწვევს ნარგავების ხმობას. ასე თუ გაგრძელდა, მაქსიმუმ 5 წელიწადში ბაღები აღარ გვექნება,“ – ფერმერი გიორგი თოდუა „ბათუმელებთან“ თხილის მასობრივი ხმობის შესახებ საუბრობს.
გიორგი თოდუა წლების განმავლობაში თხილის მწარმოებელთა ასოციაციას ხელმძღვანელობდა. ახლა თავად აქვს თხილის ბაღი და პრობლემა, რომელზეც საუბრობს, უშუალოდ მის ბაღსაც ეხება.
„დაახლოებით ბოლო 4 წელია, რაც დაიწყო თხილმა ხმობა. ნელ-ნელა მოიმატა გამხმარმა ნარგავმა. რომ წარმოიდგინოთ, ბუჩქზე რამდენიმე ტოტი ხმება – ხუთი, ათი, ზოგჯერ ოცი ტოტიც კი.
ამბობენ, რომ რაღაც ბაქტერიაა ხმობის გამომწვევი, რომელიც თხილს აქვს და სამუშაო იარაღებითაც კი გადადისო. როგორც ვიცი, ჩართული იყო სამინისტრო, ჩამოიყვანეს იტალიელი სპეციალისტები, შეისწავლეს, თუმცა კონკრეტული მიზეზი, რატომ ხმება თხილი, ჩემთვის, როგორც ფერმერისთვის, დღემდე უცნობია.
ერთი ვერსია იყო, სპილენძით უნდა შეიწამლოს თხილი, რომ გადარჩესო. შეწამლეს წელს ფერმერებმა თხილი, მაგრამ მაინც ხმება,“- ამბობს გიორგი თოდუა.
მისი თქმით, წელს გაუქმდა მეთხილე ფერმერების დახმარებაც, რამაც ზიანის მასშტაბი კიდევ უფრო გაზარდა. მანამდე წლების განმავლობაში ფერმერები 1 ჰექტარზე 500 ლარის ოდენობის დახმარებას იღებდნენ.
„ის 500 ლარი მნიშვნელოვანი დახმარება იყო ფერმერისთვის, ბაღის მოვლა-პატრონობაში ხარჯავდნენ. სამწუხაროდ, გაუქმდა ეს დახმარებაც. ამ თანხას ფერმერები მცენარეების მოვლას ახმარდნენ. სასუქი უნდა თხილს, შეწამვლა, რომ ჯანსაღი დარჩეს და კარგი მოსავალი მოგცეს.
წელს ეს პროგრამა აღარ იყო და ფერმერებს მარტოს მოუწიათ გამკლავება დაავადებასთან,“ – ამბობს გიორგი თოდუა „ბათუმელებთან“.
პროგრამის მიზანი საქართველოში თხილის მოვლა-მოყვანისთვის საჭირო საქონლის ღირებულების სუბსიდირების გზით თხილის პირველადი წარმოების ხელშეწყობა იყო.
საქართველოში თხილის ხმობის მიზეზს სოფლის მეურნეობის სამინისტროს სამეცნიერო კვლევითი ცენტრი 2021 წლიდან იკვლევს.
სწორედ ამ დროიდან ფიქსირდება გურიაში, აჭარასა და სამეგრელო-ზემო სვანეთში თხილის ხმობის შემთხვევები.
„სოფლის მეურნეობის სამეცნიერო-კვლევითი ცენტრის მიერ ჩატარებული კვლევების მიხედვით, დაავადება კომპლექსური ხასიათისაა.
მის განვითარებაში მნიშვნელოვან როლს ასრულებენ ბაქტერიული დაავადებები – ბაქტერიული კიბო (Pseudomonas avellanae) და ბაქტერიული სიდამწვრე (Xanthomonas arboricola), თუმცა დაავადების გავრცელებას ხელს უწყობს მცენარის დასუსტება, კლიმატური ცვლილებები, გვალვა, ჭარბტენიანობა, ნიადაგის მაღალი მჟავიანობა და სხვა ბიოტური თუ აბიოტური სტრესფაქტორები,“ – ნათქვამია სოფლის მეურნეობის სამეცნიერო-კვლევითი ცენტრის მიერ გაკეთებულ განმარტებაში, რა იწვევს თხილის ხმობას.
სამეცნიერო-კვლევითი ცენტრის ინფორმაციით, პირველადი კვლევების მიხედვით, დაავადების მიმართ განსაკუთრებით მიმღებიანია ტონდა ჯიფონის და ანაკლიურის ჯიშები, განსაკუთრებით – ტონდა ჯიფონის ჯიშის თხილი.
თხილის უეცარი ხმობის დამახასიათებელი სიმპტომებია: მცენარის ფოთლების გაყვითლება მუქი ნეკროზული ყავისფერი ლაქებით, ტოტებზე ვერტიკალური ნახეთქები, ჭკნობის და ხმობის ნიშნებით, ტოტის ჰორიზონტალურ გადანაჭერზე ღეროს გულის (ქსილემის) გამუქება, შტამბზე კორძებით შემოსაზღვრული ნახეთქები, სპეციფიკური ლაქები და სხვა.
ცენტრის ინფორმაციით, რეკომენდებულია თხილის პლანტაციის მექანიკური გათიბვა განათიბის ადგილზე დატოვებით, ხოლო საჭიროების შემთხვევაში, კონტაქტური ჰერბიციდების გამოყენება. გვალვის დროს რეკომენდებულია ბაღის მორწყვა.
საშემოდგომო-საგაზაფხულო გასხვლის დროს რეკომენდებულია ჯერ გაისხლას დაავადებული ბუჩქები, მოიჭრას დაზიანებული ტოტები, გაიტანონ ბაღიდან და დაწვან.
„საბაღე ინსტრუმენტები ყოველი დაზიანებული მცენარის შემდეგ უნდა დამუშავდეს 70%-იანი სპირტით, სხვა სადეზინფექციო ხსნარით ან სანთებელას ალზე გადატარებით. დეზინფექცია აუცილებელია ყოველ ახალ მცენარეზე გადასვლისას.
გასხვლის შემდეგ მცენარეები უნდა დამუშავდეს სპილენძის შემცველი პრეპარატებით, ეტიკეტზე მითითებული დოზირების შესაბამისად.
ფოთოლცვენის დაწყებისას (50–70%) აუცილებელია სპილენძის შემცველი ფუნგიციდების გამოყენება. რეკომენდებულია სპილენძის შემცველი პრეპარატების ორჯერადი შესხურება შემოდგომით და ორჯერადი შესხურება ადრე გაზაფხულზე, ეტიკეტზე მითითებული დოზირებით.
უნდა შეიზღუდოს რიგთაშორისებში ნიადაგის მოხვნა და კულტივაცია, რათა თავიდან იქნეს აცილებული დაავადების გავრცელება დაზიანებული ფესვების ნაწილებით.
იმ ბაღებში, სადაც დაავადების ძლიერი კერებია და ბუჩქები მთლიანად გამხმარია, ხოლო ახალი ამონაყრები აღარ ვითარდება, მცენარეები აუცილებელია მთლიანად ამოიძირკვოს და განადგურდეს.
აუცილებელია ამბროზიის ხოჭოს (Anisandrus dispar) და შავი ხარაბუზას (Oberea linearis) სისტემატური კონტროლი, რათა შემცირდეს ბაქტერიის გავრცელების ალბათობა.
სავეგეტაციო პერიოდში უნდა შეიზღუდოს სისტემური ჰერბიციდების (გლიფოსატი) გამოყენება,“ – ნათქვამია სამეცნიერო-კვლევითი ცენტრის მიერ ფერმერებისთვის გაცემულ რეკომენდაციებში.
თხილის უეცარი ხმობის ფაქტს პარალელურად თურქი მეცნიერებიც სწავლობენ.
მიმდინარე წლის ივლისის ბოლოს, გაეროს სურსათისა და სოფლის მეურნეობის ორგანიზაცია FAO-ს ხელშეწყობით, აჭარას, გურიასა და სამეგრელო-ზემო სვანეთს თურქ მეცნიერთა ჯგუფი ეწვია, რომელშიც ბაქტერიოლოგიის, მიკოლოგიისა და ვიროლოგიის სპეციალისტები შედიოდნენ.
მეცნიერებმა გამხმარი თხილის ნიმუშები აიღეს. ამის შემდეგ უკვე დაგეგმილია ლაბორატორიული ანალიზი და პათოგენების იდენტიფიკაცია თურქეთში.
კვლევის დასრულების შემდეგ მეცნიერები ქართველ ფერმერებს ურჩევენ, თუ რა რეკომენდაციები უნდა შეასრულონ და როგორ უნდა გადაარჩინონ ხმობას თხილის ბაღები.
FAO-ს ინფორმაციით საქართველოს თხილის სექტორი მოიცავს დაახლოებით 58,000 ჰექტარს და საარსებო წყაროს უზრუნველყოფას თითქმის 72000 ფერმერული შინამეურნეობისთვის ქვეყნის მასშტაბით.
ბათუმის საერთაშორისო აეროპორტში დღეს, 12 ოქტომბერს, თვითმფრინავი, რომელიც ასრულებს სტამბოლი-ბათუმის რეისს, რამდენიმე მცდელობის შემდეგ ბათუმის აეროპორტში ვერ დაჯდა.
როგორც „ბათუმელებმა“ გაარკვია, ეკიპაჟმა მიიჩნია, რომ სათანადო ხილვადობა არ იყო, ამიტომ ამ რეისის თვითმფრინავი ქუთაისში, კოპიტნარის აეროპორტში დაჯდება.
__
განახლება: თვითმფრინავი უკვე დაჯდა ქუთაისის აეროპორტში
The Wall Street Journal-ის ჟურნალისტმა ევან გერშკოვიჩმა რუსეთში უკანონო 16-თვიანი პატიმრობა, ორ ქვეყანას შორის პატიმრების ისტორიული გაცვლა და რამდენიმე დღის წინ გამოსული მისი წიგნის – This Cursed Beautiful Land („ეს დაწყევლილი ლამაზი ქვეყანა“) – დეტალები გამოცემა The New Yorker-ის პოდკასტის ეთერში განიხილა.
მოსკოვში მივლენილი ახალგაზრდა ამერიკელი კორესპონდენტი 2023 წლის 29 მარტს ეკატერინბურგში დააკავეს და საპატიმროში 16 წელი მიუსაჯეს ჯაშუშობის ბრალდებით. ის 2024 წლის 1-ელ აგვისტოს პატიმრების მასშტაბური, სხვადასხვა ქვეყნის ძალისხმევით ორგანიზებული გაცვლისას გაათავისუფლეს.
ინტერვიუს გავლენიანი მედიის მთავარი რედაქტორი დევიდ რემნიკი უძღვებოდა. გერშკოვიჩმა ასევე დაკავების პოლიტიკურ მოტივებზე, პატიმრობისას ფსიქოლოგიურ მდგომარეობასა და შინ დაბრუნების რთულ პროცესზე ისაუბრა.
შეკერილი საქმე და მძევალთა დიპლომატია
გერშკოვიჩის განმარტებით, ის დააკავეს არა შპიონაჟისთვის, არამედ იმიტომ, რომ მძევალთა დიპლომატიის მორიგ რაუნდში კრემლს სავაჭრო ბერკეტი ჰქონოდა.
2022 წლის მიწურულს ვლადიმირ პუტინმა უშიშროების ფედერალურ სამსახურს შპიონის დაკავება დაავალა. გერშკოვიჩის თქმით, ეს ნიშნავდა „ახალ ხორცს“ დასავლეთთან სავაჭროდ. რუსეთს უშიშროების დაქირავებული მკვლელის, ვადიმ კრასიკოვის დახსნა სურდა. ის გერმანიაში იხდიდა სასჯელს.
კრასიკოვი გერმანულმა სასამართლომ დამნაშავედ ცნო 2019 წელს ბერლინში საქართველოს მოქალაქის, ჩეჩნეთში რუსეთის წინააღმდეგ მებრძოლი ზელიმხან ხანგოშვილის მკვლელობაში და მიიჩნია, რომ მკვლელობის დამკვეთი რუსული სახელმწიფო იყო.
მოსკოვმა ვაშინგტონზე ზეწოლისათვის ამერიკელი პატიმრების შეგროვება დაიწყო. როდესაც გერშკოვიჩი ეკატერინბურგში დააკავეს, ის მაშინვე მიხვდა, რაც ხდებოდა. „მათ არ ვუწამებივარ, ჩემგან არც რაიმე ინფორმაციის მიღება უცდიათ. მხოლოდ ბრალი წამიყენეს. ძნელი მისახვედრი არ იყო, რომ ვიღაცაში გასაცვლელად ვჭირდებოდით“, – ამბობს გერშკოვიჩი.
როდესაც ის ლეფორტოვოს ციხეში გადაიყვანეს, იმავე საღამოს რუსეთის ტელევიზიამ ღიად თქვა, რომ „ტყვეთა ფონდში“ მატება იყო.
ლეფორტოვოს ციხეში
გერშკოვიჩს ისე ეპყრობოდნენ, როგორც დიდი ღირებულების პატიმარს. იმ დროს, როდესაც უკრაინელი ჟურნალისტი, ვიქტორია როშჩინა პატიმრობაში დაიღუპა, გერშკოვიჩთან სიფრთხილეს იჩენდნენ. „მიფრთხილდებოდნენ ისე, როგორც გასაყიდად გამზადებულ ახალთ-ახალ ამანათს“, – ამბობს გერშკოვიჩი.
ერთ დღეს, როდესაც მისი დაშავებული მუხლი შეამოწმეს, გერშკოვიჩი ციხის თანამშრომელს ეხუმრა: „ამანათი დაუზიანებელი უნდა იყოს, არა? თორემ მისი ფასი დაეცემა“. თანამშრომელმა მიუგო: „ეს მე არ მითქვამს, მაგრამ დიახ“.
უშიშროების ფედერალური სამსახურის გამომძიებელმა გერშკოვიჩს უთხრა: „ჩვენ საკმარისი მტკიცებულებები შევაგროვეთ თქვენ წინააღმდეგ, რომ პატიმრობაში გაგიშვათ. წინააღმდეგ შემთხვევაში – მოგწამლავდით“. იზოლაციის მიუხედავად, გერშკოვიჩს ბიბლიოთეკით სარგებლობის ნება დართეს. იმხანად ბიბლიოთეკაში ჯერ კიდევ ინახავდნენ დისიდენტების ნაშრომებს, უკრაინელი მწერლების წიგნებსა და მემუარებს, რომლებიც ცხრა თვის შემდეგ გააქრეს.
ნავალნის გარდაცვალება, როგორც განსაცდელი
ადვოკატებმა გერშკოვიჩს შეატყობინეს, რომ საერთაშორისო მედიის თანახმად, გასაცვლელთა შორის ის, პოლ ველანი და ალექსეი ნავალნი უნდა ყოფილიყვნენ. შორეული არქტიკის საპატიმროში ნავალნის გარდაცვალების ამბავმა გერშკოვიჩი ძლიერ დაამწუხრა: „ის ძალიან მამაცი იყო. ასეთი ადამიანები იშვიათია. მისმა სიკვდილმა შოკში ჩამაგდო. მომდევნო ოთხი დღე მთლიანად ბურუსით იყო მოცული“.
გათავისუფლების ტრავმა
16-თვიანი პატიმრობის შემდეგ საზოგადოებაში დაბრუნება რთული აღმოჩნდა. გერშკოვიჩი გათავისუფლებას აღწერს, როგორც საერთაშორისო კოსმოსური სადგურიდან შინ დაბრუნებას. ის ცხოვრობდა გარემოში, სადაც ყველაფერს აკონტროლებდნენ, სადაც მას ყველა უფლება ჩამორთმეული ჰქონდა. მისი სენსორული აპარატი გადატვირთული აღმოჩნდა.
გერშკოვიჩის თქმით, ყველაზე უცნაური ის იყო, რომ გონებით ისევ საპატიმროში ბრუნდებოდა. არა რუსეთში, არამედ კონკრეტულად საპატიმროში, იმიტომ, რომ იქაურობა ნაცნობი იყო და ნაცნობ გარემოში თითქოს კომფორტულადაც კი გრძნობდა თავს. მას საკუთარი თავის საპოვნელად თერაპია და თითქმის იმდენივე დრო, 16 თვე, დასჭირდა, რამდენიც პატიმრობაში გაატარა.
საკონსტიტუციო სასამართლომ არ დააკმაყოფილა მოსამართლე მანანა კობახიძის შუამდგომლობა – ეს მოსამართლე „ოპოზიციური პარტიების აკრძალვის საქმიდან“ თვითგანრიდებას ითხოვდა.
საკონსტიტუციო სასამართლომ განჩინება დღეს, 12 ოქტომბერს გამოაქვეყნა.
„საკონსტიტუციო სასამართლოს პლენუმის წევრი მანანა კობახიძე მიიჩნევს, რომ №1979 კონსტიტუციური სარჩელის და მასთან დაკავშირებული სამართლებრივი თუ პროცედურული საკითხების განხილვაში მისმა ჩართულობამ, შესაძლოა, საკონსტიტუციო სამართალწარმოების მონაწილეებსა და საზოგადოებაში გააჩინოს გონივრული ეჭვი ამ საქმის მიუკერძოებელ და ობიექტურ გადაწყვეტასთან მიმართებით, რაც №1979 კონსტიტუციური სარჩელის განხილვიდან მისი თვითგანრიდების საფუძველს წარმოადგენს.
მოსამართლის განცხადებით, საზოგადოებისათვის ცნობილია ის ფაქტი, რომ წარსულში იგი იყო მოქალაქეთა პოლიტიკური გაერთიანება „ქართული ოცნება – დემოკრატიული საქართველოს“ დამფუძნებელი წევრი და აგრეთვე იკავებდა აღნიშნული პოლიტიკური პარტიის თავმჯდომარის თანამდებობასაც. გარდა ამისა, მითითებული პოლიტიკური გაერთიანების წევრობის პერიოდში, ის აირჩიეს მერვე და მეცხრე მოწვევის პარლამენტის წევრად, სადაც ითავსებდა მნიშვნელოვან ფუნქციებს.
პოლიტიკური საქმიანობის დაწყებამდე, როგორც უფლებადამცველი ადვოკატი და შემდგომ, უკვე სადეპუტატო უფლებამოსილების განხორციელებისას, იგი სხვადასხვა ტრიბუნიდან, საჯაროდ, აქტიურად აკრიტიკებდა №1979 კონსტიტუციური სარჩელის მოპასუხე მხარეს და მთავარ ფიგურანტ პარტიას – „ერთიანობა – ნაციონალურ მოძრაობას“ და მის კონკრეტულ წევრებს (რომელთა ნაწილიც ამჟამად წინამდებარე კონსტიტუციურ სარჩელში დასახელებულ სხვადასხვა პოლიტიკურ პარტიას წარმოადგენს) მათი მმართველობის პერიოდთან დაკავშირებული სისტემური დანაშაულებისა და ადამიანის ფუნდამენტური უფლებების დარღვევების გამო.
პოლიტიკური დებატებისას, მათგან ღიად მოითხოვდა პასუხისმგებლობის აღებას სწორედ იმ ქმედებებზე, რომლებიც №1979 კონსტიტუციური სარჩელის მიხედვით, ამ პარტიების არაკონსტიტუციურად ცნობისა და აკრძალვის მთავარ არგუმენტებად არის მოხმობილი. მეტიც, პარლამენტის ერთ-ერთ პლენარულ სხდომაზე, რომელიც საჯაროდ გადაიცემოდა, „ერთიანობა – ნაციონალური მოძრაობის“ წევრებს მან პირდაპირ მოუწოდა პარტიის დაშლისა და პოლიტიკური ველიდან საერთოდ წასვლისაკენ,“ – აღნიშნულია განჩინებაში.
რა არგუმენტით არ დააკმაყოფილა საკონსტიტუციო სასამართლომ მოსამართლე მანანა კობახიძის შუამდგომლობა?
„მხედველობაშია მისაღები ის გარემოებაც, რომ ქვეყანაში კონსტიტუციური მართლმსაჯულების განხორციელების კონსტიტუციური კომპეტენცია მხოლოდ საქართველოს საკონსტიტუციო სასამართლოს გააჩნია. ეს უკანასკნელი კი შედგება კონსტიტუციითვე განსაზღვრული რაოდენობის მოსამართლეებისაგან, რომელთა აცილების შემთხვევაში, არ არსებობს სხვა მოსამართლით მათი ჩანაცვლების შესაძლებლობა.
ამდენად, მოსამართლის აცილების საფუძველი არ უნდა იყოს იმდენად ფართო, რომ საფრთხე შეუქმნას სასამართლოს ნორმალურ ფუნქციონირებას.
შესაბამისად, აცილების ინსტრუმენტის გამოყენება უნდა მოხდეს საკმარისი სიფრთხილით, რათა, ერთი მხრივ, საფრთხე არ შეექმნას სასამართლოს ფუნქციონირებას, ხოლო, მეორე მხრივ, სასამართლომ არ დაკარგოს საზოგადოების ის ნდობა, რომელსაც დემოკრატიულ საზოგადოებაში უსათუოდ უნდა ატარებდეს და მის არსებით მახასიათებელს წარმოადგენდეს,“ – ვკითხულობთ საკონსტიტუუციო სასამართლოს განჩინებაში.
———
სარჩელით „ოცნება“ ითხოვს პოლიტიკური პარტიების: №1979 კონსტიტუციურ სარჩელში დავის საგანს წარმოადგენს პოლიტიკური პარტიების: „ერთიანობა – ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „ძლიერი საქართველო – ლელო, ხალხისთვის, თავისუფლებისთვის!“, „ფედერალისტური პარტია“, „გახარია საქართველოსთვის“ საქმიანობის არაკონსტიტუციურად ცნობას და მათ აკრძალვას.
445 ხმით, 37-ის წინააღმდეგ, ევროპარლამენტმა მიიღო მორიგი კრიტიკული რეზოლუცია საქართველოს შესახებ. ამჯერად რეზოლუცია „ქართული ოცნების“ მიერ საქართველოში ოპოზიციური პარტიების აკრძალვის მცდელობების შესახებაა. რეზოლუცია მკაცრად გმობს საქართველოს ოპოზიციური პარტიების უკანონოდ გამოცხადების მცდელობას და მათ წინააღმდეგ შეტანილი საკონსტიტუციო სარჩელის დაუყოვნებლივ უკან გამოტანას მოითხოვს.
პოლიტიკური პარტიების აკრძალვაზე „ქართული ოცნების“ სარჩელი საკონსტიტუციო სასამართლოს პლენუმს 2026 წლის 6 ოქტომბერს გადაეცა.
უკრაინის პრეზიდენტის, ვოლოდიმირ ზელენსკის განცხადების საპასუხოდ, რომ უკრაინა არჩევნებს ჩაატარებს, თუ რუსეთი 60 დღის განმავლობაში სრულ ცეცხლის შეწყვეტას დათანხმდება, კრემლი აცხადებს, რომ პუტინი მზად იქნება გასცეს ბრძანება არ დაარტყან უკრაინას მხოლოდ ერთ, არჩევნების დღეს.
ამის შესახებ კრემლის პრესსპიკერმა, დიმიტრი პესკოვმა განაცხადა დღეს, 12 ოქტომბერს.
„…თუ მათ ნამდვილად სურთ კიევში არჩევნების ჩატარება, მაშინ რუსეთის ფედერაციის პრეზიდენტი, უმაღლესი მთავარსარდალი, მზად იქნება გასცეს ბრძანება უკრაინაზე არჩევნების დღეს არ განახორციელონ დარტყმები. კონკრეტულად არჩევნების დღეს“ – ხაზგასმით თქვა პესკოვმა.
ვოლოდიმირ ზელენსკის განცხადებაზე კომენტარისას, რომ მას არჩევნების ჩასატარებლად 60 დღე სჭირდება, პესკოვმა თქვა, რომ რუსეთს არ სჭირდება ცეცხლის შეწყვეტა, არამედ სჭირდება „მდგრადი მშვიდობა მომავალი თაობებისთვის“.
პესკოვმა ასევე აღნიშნა, რომ რუსეთი მზად იყო „სამშვიდობო მოლაპარაკებებისთვის“ დუმის არჩევნების შემდეგ, მაგრამ უკრაინამ საარჩევნო უბნები დაბომბა.
აღნიშნულ განცხადებებს წინ უძღოდა 10 ოქტომბერს აშშ-ის პრეზიდენტის, დონალდ ტრამპის განცხადება, რომ მან პუტინთან შეთანხმებას მიაღწია დიზელის მიწოდების თაობაზე და უკრაინაში ახალი პრეზიდენტის არჩევის დროა, რომელსაც რუსეთთან შეთანხმების მიღწევა შეეძლება.
სწორედ ამ განცხადების საპასუხოდ განაცხადა ზელენსკიმ, რომ უკრაინაში არჩევნები ჩატარდება, თუ კი რუსეთი 60 დღის განმავლობაში ცეცხლის შეწყვეტას დათანხმდება.
დღეს, 12 ოქტომბერს, ამ თემას რუსეთის საგარეო საქმეთა მინისტრი, სერგეი ლავროვიც გამოეხმაურა. მან განაცხადა, რომ რუსეთი „უკრაინას ბრძოლის ველზე მოსვენებას არ მისცემს“.
„არა მგონია, რომ მან (ზელენსკიმ) ამოსუნთქვის საშუალება დაიმსახურა“, – თქვა მან.
„,ეიპიემ ტერმინალს ფოთმა“ 2026 წლის პირველი ცხრა თვის ოპერაციული შედეგები გამოაქვეყნა.
ტერმინალის 2026 წლის იანვარი-სექტემბრის სტატისტიკის თანახმად, საკონტეინერო ტვირთბრუნვამ 525 211 TEU შეადგინა, რაც 2025 წლის ანალოგიურ პერიოდთან შედარებით 9%-ით მეტია.
„წლის ყველაზე მაღალი თვიური მაჩვენებელი ივლისში დაფიქსირდა, როდესაც ტერმინალმა 65 759 TEU დაამუშავა“ – წერს ტერმინალი.
ორგანიზაციის ცნობით, მნიშვნელოვნად გაიზარდა საკონტეინერო გემების შემოსვლის რაოდენობაც:
„წლის პირველ ცხრა თვეში „,ეიპიემ ტერმინალს ფოთმა“ 336 საკონტეინერო გემს უმასპინძლა, მაშინ როდესაც 2025 წლის ანალოგიურ პერიოდში ეს მაჩვენებელი 268 გემს შეადგენდა. მხოლოდ სექტემბერში ნავსადგური 45 საკონტეინერო გემს მოემსახურა“.
ფოთის ტერმინალის ცნობით, განსაკუთრებით მაღალი ზრდა გენერალურმა ტვირთებმა აჩვენა: მათმა მოცულობამ 324 656 ტონას მიაღწია, რაც წინა წლის ანალოგიურ პერიოდზე 61,7%-ით მეტია.
ზრდა დაფიქსირდა საბორნე ოპერაციების მიმართულებითაც. საანგარიშო პერიოდში საბორნე ტვირთების მოცულობამ 162 843 ტონა შეადგინა, მაშინ როდესაც 2025 წლის პირველი ცხრა თვის მაჩვენებელი 123 350 ტონა იყო.
ტერმინალი აღნიშნავს, რომ მზარდი ტვირთნაკადებისა და მომხმარებელთა მოთხოვნის საპასუხოდ ახალი, მრავალფუნქციური მობილური საპორტო ამწეს შეიძენენ, რომლის მიწოდება 2026 წლის ბოლომდეა დაგეგმილი და მისი ექსპლუატაციაში შესვლის შემდეგ პორტის საკონტეინერო გამტარუნარიანობა 650 000 TEU-ს გადააჭარბებს, ხოლო როგორც კონტეინერიზებული, ისე არაკონტეინერიზებული ტვირთების დამუშავების წლიური შესაძლებლობა დაახლოებით 500 000 ტონით გაიზრდება.
11 ოქტომბერს შვიდმა ამერიკელმა სენატორმა განცხადება გამოაქვეყნა აშშ-ის პრეზიდენტის, დონალდ ტრამპის მიერ რუსული დიზელის საწვავის იმპორტის დაშვების გადაწყვეტილებასთან დაკავშირებით.
ამერიკელ სენატორთა ჯგუფი აცხადებს, რომ აშშ-მ პუტინს მხარი არ უნდა დაუჭიროს ფინანსურად.
„2022 წელს კონგრესმა ცალსახად აკრძალა რუსული ენერგორესურსების იმპორტი, რათა ხელი შეეშალა ამერიკული დოლარით პუტინის სასტიკი ომის დაფინანსებაში უკრაინის წინააღმდეგ.
კონგრესმა ნათლად განაცხადა: შეერთებულმა შტატებმა არ უნდა განახორციელოს ნავთობის იმპორტი რუსეთიდან მანამ, სანამ რუსეთი არ შეწყვეტს აგრესიას უკრაინის წინააღმდეგ და ნატოს მოკავშირეების წინააღმდეგ მუქარას.
პრეზიდენტ ტრამპის გადაწყვეტილება, დაუშვას რუსული დიზელის საწვავის იმპორტი შეერთებულ შტატებში, პირდაპირ ეწინააღმდეგება ამ კანონს. ადმინისტრაციამ ასევე არ გაიარა კონსულტაცია კონგრესთან და არ წარმოადგინა რაიმე დასაბუთება თავისი გადაწყვეტილებისთვის, რასაც კანონი მოითხოვს.
შეერთებულმა შტატებმა არ უნდა მისცეს პუტინს ფინანსური მხარდაჭერა, სანამ რუსეთი აგრძელებს უკრაინელი მშვიდობიანი მოქალაქეების მკვლელობას. ადმინისტრაციამ დაუყოვნებლივ უნდა შეცვალოს კურსი“ – ნათქვამია განცხადებაში.
განცხადებას ხელს აწერენ სენატორები ორპარტიული კოალიციიდან: ჯინ შაგინი, სიუზან კოლინსი, რიჩარდ ბლუმენტალი, ლიზა მურკოვსკი, რონ უაიდენი, ტომ ტილისი და ჯონ კურტისი.
ამერიკელი კონგრესმენების განცხადებას წინ უძღოდა ტრამპის პუტინთან დიზელის მიწოდებაზე გადაწყვეტილების კრიტიკა აშშ-ის კონგრესის ორივე პალატაში.
ამერიკელმა კონგრესმენმა ბრაიან ფიცპატრიკმა წარადგინა ორპარტიული კანონპროექტი, რომელიც, მისი თქმით, ხელს შეუშლის ტრამპს სანქციების მოხსნაში, რომელსაც ეწოდება „რონალდ რეიგანის მშვიდობის აქტი ძლიერების გზით“.
9 ოქტომბერს აშშ-ის პრეზიდენტმა დონალდ ტრამპმა განაცხადა, რომ მიაღწია შეთანხმებას რუსეთის პრეზიდენტ ვლადიმერ პუტინთან ამერიკული და გლობალური ბაზრებისთვის რუსული დიზელის საწვავის მიწოდების შესახებ.
„თუ რუსეთს სურს, შევაჩეროთ ჩვენი გრძელვადიანი დარტყმები მის ნავთობგადამამუშავებელ ქარხნებსა და ნავთობის ექსპორტზე, მაშინ რუსეთმა უნდა შეწყვიტოს თავდასხმები ჩვენს ენერგეტიკულ სისტემასა და კრიტიკულ ინფრასტრუქტურაზე და შეწყვიტოს ჩვენი ხალხის მკვლელობა. ეს სამართლიანია“ – განაცხადა უკრაინის პრეზიდენტმა ვოლოდიმირ ზელენსკიმ დღეს, 12 ოქტომბერს, ვარშავის უსაფრთხოების ფორუმზე.
ზელენსკიმ აღნიშნა, რომ რუსეთმა უკრაინის ენერგეტიკაზე თავდასხმების კამპანია რამდენიმე წლის წინ დაიწყო და ყოველ ზამთარს, რუსეთი ცდილობს ამ მიმართულებით თავდასხმების გაძლიერებას.
„ჩვენთან ყოველდღიურად ხდება ელექტროენერგიის გათიშვა. რუსეთისთვის, რა თქმა უნდა, ბენზინის დეფიციტი და ნავთობგადამამუშავებელი ქარხნების დაწვა ჩვენი საპასუხო დარტყმების გამო მტკივნეულია. და ეს არ არის იგივე მოცულობის [ნავთობპროდუქტი], რაც შეიძლებოდა დაკარგულიყო ჰორმუზის კრიზისის გამო“ – თქვა მან.
მან ასევე განაცხადა, რომ უკრაინამ დასაწყისშივე დაუჭირა მხარი ვაშინგტონის იდეას რუსეთის ენერგოობიექტებზე თავდასხმის შეჩერების შესახებ, თუ რუსეთი შეწყვეტდა დარტყმებს უკრაინის ენერგოსექტორზე.
რა ხდება?
11 ოქტომბერს აშშ-ის პრეზიდენტმა დონალდ ტრამპმა თქვა, რომ რუსულ ნავთობგადამამუშავებელ ქარხნებზე მიტანილი დარტყმებით უკრაინამ ზიანი მიაყენა დიზელის საწვავის გლობალურ მომარაგებას.
„ვფიქრობ, უკრაინას ახალი პრეზიდენტი სჭირდება. მას სურს, პრობლემები შეუქმნას ჩვენს ფერმერებსა და მეცხოველეებს დიზელის საწვავთან დაკავშირებით, რადგან რუსეთი მსოფლიოს დიზელის საწვავის დიდ ნაწილს აწვდის“, — განაცხადა ტრამპმა.
საპასუხოდ ზელენსკიმ განაცხადა, რომ მზადაა, არჩევნები ჩაატაროს ორთვიანი სრულ ცეცხლის შეწყვეტის პირობებში.
„ვიცი, რომ პუტინს ძალიან სურს უკრაინის პრეზიდენტის შეცვლა. ეს მესმის. და თუ პრეზიდენტ ტრამპსაც სურს არჩევნებში რაიმე ცვლილების დანახვა, — მე ეს ასევე ვუთხარი მის გუნდს — გთხოვთ, უთხარით პუტინს, მოგვცეს ორთვიანი, 60 დღე სრული ცეცხლის შეწყვეტა და არჩევნებს ჩავატარებთ. რა თქმა უნდა, ჩვენ მზად ვიქნებით უკრაინელი ხალხის ნებისმიერი არჩევანისთვის“, — უთხრა ზელენსკიმ ABC News-ს.
დონალდ ტრამპმა, რომელიც ევროკავშირს აკრიტიკებდა და ინდოეთს ტარიფები დაუწესა რუსული საწვავის შეძენის გამო, 9 ოქტომბერს განაცხადა, რომ რუსული დიზელის ექსპორტზე სანქციებს 7 აპრილამდე აჩერებს. მისი თქმით, ვლადიმერ პუტინი დასთანხმდა 300 000 ტონა დიზელის დაუყოვნებლივ გამოშვებას „ამერიკულ და გლობალურ ბაზარზე“, 500 000 ტონის — ნოემბერში და კიდევ ერთი მილიონის ამის შემდეგ. ტრამპმა თავის Truth Social პლატფორმაზე დაწერა, რომ რუსული დიზელის კიდევ სამი მილიონი ტონის „მოკლე პერიოდში“ მიწოდება დამოკიდებული იქნება ნავთობგადამამუშავებელ ქარხნებზე, რომლებიც უკრაინის თავდასხმის ქვეშ არიან.
ორგანიზაცია „სამართლიანი არჩევნები“ [ISFED] წერს, რომ მონიტორინგის შედეგად გამოვლინდა კოორდინირებული არაავთენტური ქსელი, რომელიც სოციალურ მედიაში პარტია „ქართული ოცნების“ ლიდერების განცხადებებს ხელოვნურად ხდის პოპულარულს.
ორგანიზაციის განცხადებით, ქსელის ანგარიშები, მათ შორის InterPressNews-ის ფეისბუქგვერდზე, იწონებენ ირაკლი კობახიძის, შალვა პაპუაშვილის, კახა კალაძისა და ირაკლი კირცხალიას განცხადებებს.
„სამართლიანი არჩევნების“ ცნობით, მოწონებული პოსტების დიდი ნაწილი ე.წ. 4 ოქტომბრის საქმეს, ევროკავშირთან ურთიერთობასა და დასავლელი პარტნიორების კრიტიკას ეხება. მათ შორის, ამ არაავთენტური ქსელის ანგარიშებმა მოიწონეს:
ირაკლი კობახიძის განცხადება 4 ოქტომბრის საქმეზე დაკავებულების, მურთაზ ზოდელავასა და ლაშა ბერიძის, საპროცესო შეთანხმებაზე: „აღიარებაზე, სინანულზე, გვექნება შესაბამისი რეაგირება და რეაგირებაში იგულისხმება შესაბამისი პირების გათავისუფლება“
ირაკლი კობახიძისა და შალვა პაპუაშვილის კომენტარები მსჯავრდებულ პაატა ბურჭულაძის შვილის განცხადებაზე;
კახა კალაძის შეფასებები, რომ 4 ოქტომბრის „სახელმწიფო გადატრიალების მცდელობა“ ევროსტრუქტურებმა დააფინანსეს;
ირაკლი კირცხალიას გამოხმაურება გაფართოების საკითხებში ევროკომისრის, მარტა კოსის, განცხადებაზე, რომ საქართველო უკრაინასა და მოლდოვას „ჩამორჩება“;
შალვა პაპუაშვილის განცხადება საქართველოს ეროვნული ბანკის საბჭოს წევრის, ნანა ყეინიშვილის, წინააღმდეგ დაწყებულ გამოძიებაზე;
ISFED-ის ინფორმაციით, მონიტორინგის ფარგლებში იდენტიფიცირებულია ძირითადად ქართული სახელისა და გვარის მქონე 415 არაავთენტური ანგარიში. ანგარიშების უდიდესი ნაწილი სულ ორ დღეში, 2026 წლის 25-26 აგვისტოს შეიქმნა.
„მათი უმრავლესობა პროფილის ფოტოდ ხელოვნური ინტელექტით გენერირებულ გამოსახულებას იყენებს, ანგარიშების დიდი ნაწილი დახურულია და ერთსა და იმავე ფეისბუქგვერდებს იწერს“ – აღნიშნავს ორგანიზაცია.
„სამართლიანი არჩევნების“ ცნობით, ქსელში, ასევე, გამოვლინდა 2024 წელს შექმნილი რამდენიმე ანგარიში. მათი შექმნის თარიღები ემთხვევა იმ პერიოდებს, როდესაც შეიქმნა „ქართული ოცნების“ სასარგებლოდ მოქმედი კოორდინირებული არაავთენტური ქსელი, რომლის შესახებაც „სამართლიანი არჩევნები” ადრე წერდა და რომელი ქსელის დიდი ნაწილი Meta-მ საკუთარი პლატფორმებიდან წაშალა.
გამოვლენილი გარემოებები მიუთითებს, რომ ანგარიშები ერთი ცენტრიდან იმართება და მათი მიზანი მმართველი პარტიის პოპულარობისა და მხარდაჭერის შთაბეჭდილების ხელოვნურად შექმნაა.
გამოვლენილი ქსელის 424 ანგარიშიდან 303 შექმნილია 2026 წლის 25 აგვისტოს, ხოლო 109 – მომდევნო დღეს, 26 აგვისტოს. შესაბამისად, ქსელის 97% ორი დღის განმავლობაში ამოქმედდა.
ამ ანგარიშების ფეისბუქის საიდენტიფიკაციო ნომრები (ID) ერთმანეთთან ახლოს, ვიწრო დიაპაზონშია განთავსებული, რაც მათ მოკლე დროში მასობრივ რეგისტრაციაზე მიუთითებს“- წერს ISFED.
ასევე, ორგანიზაციის კვლევით, ქსელში გამოვლინდა 11 ანგარიში, რომლებიც 2024 წლის იანვარსა და აპრილში შეიქმნა. მათგან სამი 2024 წლის 22 იანვარს, ხოლო შვიდი 19-23 აპრილის პერიოდშია შექმნილი.
„სწორედ ამ თარიღებში შეიქმნა ასობით ყალბი ანგარიში იმ ქსელიდან, რომელიც „სამართლიანმა არჩევნებმა“ „იმედის“ პოსტზე ბიძინა ივანიშვილის გამოსახვის ხელოვნური გაპოპულარულების შესწავლისას გამოავლინა.
424 ყალბი ანგარიშიდან 295 პროფილის ფოტოდ ხელოვნური ინტელექტის (AI) მიერ გენერირებულ გამოსახულებას იყენებს.
აღსანიშნავია, რომ ქსელის ხელახლა შექმნილი ანგარიშები ძირითადად სწორედ ასეთ ფოტოებს ეყრდნობა, მაშინ, როდესაც ადრე გამოვლენილ ქსელებში რეალური ადამიანებისგან მოპარული სურათების გამოყენება უფრო ხშირი იყო.
გარდა ამისა, მონიტორინგის ფარგლებში გამოვლინდა 22 ანგარიში, რომლებიც პროფილის ფოტოდ ცნობილი სპორტსმენების, მსახიობებისა და რეჟისორების სურათებს იყენებდნენ.
ყალბი ანგარიშები ფეისბუქზე/ISFED-ის კვლევა.
„სამართლიანი არჩევნების“ კვლევით, გამოვლენილი ანგარიშების უმრავლესობა, 298 პროფილი, დახურულია, ხოლო – 92 ღია. დახურულ პროფილებზე მომხმარებლის პირადი ინფორმაცია, მეგობრების სია და გამოქვეყნებული პოსტები არ ჩანს, თუმცა ხელმისაწვდომია ანგარიშის შექმნის თარიღი და გამოწერილი გვერდები.
„ღია პროფილების შესწავლისას გამოვლინდა, რომ ანგარიშების აქტივობა რამდენიმე დღეს ფიქსირდება. კერძოდ, 108 ანგარიშიდან 43 აქტიური იყო (გამოაქვეყნა დამატებითი ფოტოები) 2026 წლის 6 სექტემბერს, 35 – 7 სექტემბერს, ხოლო 26 – 9 სექტემბერს.
ქსელის კოორდინირებულ მართვაზე მიუთითებს მომწონებელთა სიებში ანგარიშების თანმიმდევრობაც.
ფეისბუქი რეაქციების სიას დაახლოებით მოწონების დროის მიხედვით ალაგებს, ამიტომ რეალური მომხმარებლები სხვადასხვა პოსტზე სხვადასხვა რიგით ჩნდებიან. ქსელის შემთხვევაში კი ერთი და იგივე ანგარიშები ათ სხვადასხვა პოსტზე იდენტური თანმიმდევრობით გვხვდებიან.
მაგალითად, ცხრა ანგარიში ირაკლი კობახიძის, კახა კალაძისა და შალვა პაპუაშვილის განცხადებებზე, ასევე „Tbilisi news“-ის პოსტებზე ყოველთვის ერთნაირი რიგით დგას.
მომწონებელთა სიებში გამოვლინდა ქსელის ანგარიშების 10 ბლოკი, რომლებიც სულ მცირე ხუთ სხვადასხვა პოსტზე ზუსტად ერთი და იმავე თანმიმდევრობით, ზედიზედ მეორდება. ეს მიუთითებს, რომ ანგარიშები პოსტებს ჯგუფურად, ერთი სიიდან იწონებენ.
ამასთანავე, ყალბი ანგარიშების უდიდესი ნაწილი ერთსა და იმავე ფეისბუქგვერდს იწერს. მაგალითად, 235 ანგარიშს გამოწერილი აქვს გვერდი „Tbilisi news-ი“.
აღსანიშნავია, რომ პოსტის მომწონებელი ყალბი ანგარიშებიდან 333 „Tbilisi news“-ის ორ სხვა პოსტსაც იწონებს.
ამ ორ პოსტზე მომწონებლები თითქმის იდენტური თანმიმდევრობით გვხვდებიან: ერთ შემთხვევაში 51 ანგარიში ორივე პოსტის მომწონებელთა სიაში ზუსტად ერთი და იმავე რიგითობით მეორდება.
„Tbilisi news“-ის სახელით მოქმედი გვერდი (Tbilisinews.ge) 2026 წლის 3 სექტემბერს შეიქმნა და თბილისთან ან საქართველოსთან დაკავშირებულ სიახლეებს არ აქვეყნებს.
2026 წლის 8 სექტემბრიდან 9 ოქტომბრამდე გვერდზე 27 ინგლისურენოვანი პოსტი გამოქვეყნდა ბიზნესში ხელოვნური ინტელექტის დანერგვისა და სოციალური მედიის ავტომატიზაციის შესახებ.
პოსტების უმეტესობა ავტომატურად გენერირებულ კონტენტს ჰგავს: ერთი და იგივე ტექსტი რამდენჯერმეა გამოქვეყნებული, ერთ-ერთ პოსტში კი ბმულის ნაცვლად შაბლონის ჩანაწერი „[YourArticleLink]“ დარჩა.
25 პოსტს 0-1 რეაქცია აქვს, 7 და 9 ოქტომბრის ორ პოსტს კი, შესაბამისად, 352 და 349 მოწონება, კომენტარისა და გაზიარების გარეშე.
7 ოქტომბრის პოსტს 416 ნახვიდან 352-ს რეაქცია მოჰყვა, რაც ბუნებრივი აუდიტორიისთვის უჩვეულოდ მაღალი მაჩვენებელია. ამ ორი პოსტის მომწონებლების აბსოლუტური უმრავლესობა იმავე ქსელს მიეკუთვნება, რომელმაც „ქართული ოცნების“ ლიდერების განცხადებები მოიწონა“ – წერს ISFED.
ორგანიზაციის შეფასებით, „ქართული ოცნების“ მხარდამჭერ პოსტებზე ინტერაქციის ხელოვნური გაზრდა ერთჯერადი შემთხვევა არ არის. ბოლო თვეებში მსგავსი ქსელები რამდენჯერმე გამოვლინდა.
„2026 წლის 26 მაისს, დამოუკიდებლობის დღეს, „იმედის“ ფეისბუქგვერდზე გამოქვეყნდა ქარდი, რომელზეც მერაბ კოსტავასა და ზვიად გამსახურდიასთან ერთად ბიძინა ივანიშვილი იყო გამოსახული. პოსტს თავდაპირველად ძირითადად კრიტიკული კომენტარები და სიცილის რეაქციები მოჰყვა, რის შემდეგაც მოწონებების რიცხვი მკვეთრად გაიზარდა.
„სამართლიანმა არჩევნებმა“ ამ პოსტზე 1551 არაავთენტური ანგარიში გამოავლინა, რომლების უდიდესი ნაწილი სინქრონულად იყო შექმნილი – მაგალითად, 99 ანგარიში 2024 წლის 22 იანვარს, ხოლო 250 – იმავე წლის 19-23 აპრილს. ქსელი მოპარულ და AI-ით გენერირებულ ფოტოებს იყენებდა და „ქართული ოცნებისთვის“ სასურველ გვერდებს იწერდა.
გამოძიების გამოქვეყნების შემდეგ გამოვლენილი ანგარიშებიდან 1343 ფეისბუქზე აღარ იძებნებოდა.
მიმდინარე საქმეში გამოვლენილი 2024 წლის ანგარიშები სწორედ ამ თარიღებშია შექმნილი. გარდა ამისა, „მითების დეტექტორმა“ 2026 წლის განმავლობაში „ქართულ ოცნებასთან“ დაკავშირებული 400-ზე მეტი არაავთენტური პროფილი გამოავლინა, რომლებიც ხელოვნური ინტელექტით გენერირებულ ფოტოებს იყენებდნენ“- წერს „სამართლიანი არჩევნები“.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 12 ოქტომბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 554 310 ადამიანი [გასულ დღე-ღამეში +1 470. ამ მონაცემებში შედის როგორც დაღუპულები, ასევე დაჭრილები]
ტანკი – 12 410 ერთეული [+2]
ჯავშანტექნიკა – 25 527 ერთეული [+6]
საარტილერიო სისტემა – 51 090 ერთეული [+51]
MLRS – 2 209 ერთეული [+4]
საზენიტო საბრძოლო სისტემა – 1 703 ერთეული [+2]
თვითმფრინავი – 443 ერთეული [+0]
ვერტმფრენი – 356 ერთეული [+0]
უპილოტო საფრენი აპარატის ოპერატიულ-ტაქტიკური დონე – 559 873 ერთეული [+1 416]
სახმელეთო რობოტიზებული კომპლექსი – 2 927 ერთეული [+3]
გემი/ნავი – 35 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 162 056 ერთეული [+553]
სპეცტექნიკა – 4 818 ერთეული [+3]
ფრთოსანი რაკეტა [ჩამოაგდეს] – 5 126 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
ეროვნული ბანკის საბჭოს წევრ ნანა ყეინიშვილს, რომელიც „რადიო თავისუფლების“ ჟურნალისტური გამოძიების თანახმად კომპანია „ბიტექსჩეინჯის“ მფლობელს მფარველობის სანაცვლოდ კომპანიის წილებს სთხოვდა, 2025 წელს 165 964 ათასი ლარი აქვს აღებული ხელფასის სახით. ანუ თვეში 13 800 ლარი ხელზე.
ამ დეკლარაციაში არაფერი წერია იმ კომპანიის შესახებ, რომელსაც 300-მილიონიანი ბრუნვა აქვს ფარული ჩანაწერების მიხედვით, რომელიც „რადიო თავისუფლებამ“ გამოაქვეყნა და რომელშიც ნანა ყეინიშვილი საუბრობს.
რა ქონებას აჩვენებს ნანა ყეინიშვილი 2025 წლის დეკლარაციაში? [2026 წლის ქონებრივი დეკლარაცია ჯერ შევსებული არ აქვს].
მიწები და ბინები:
2025 წლის ქონებრივი დეკლარაციის მიხედვით, ნანა ყეინიშვილის სახელზე ფიქსირდება 2 მიწის ნაკვეთი. 14 760 კვ.მეტრი მიწა ახმეტაში, სოფელ ვეძებში, რომელიც 1500 ლარად შეუძენია 2023 წელს და 1500 კვ. მეტრი, კოჯორში, სოფელ ბეთანიაში, რომელიც 2000 ლარად აქვს ნაყიდი 2018 წელს. მიწას ჰყავს მეწილე თათია ლოლაძე, რომელიც ნანა ყეინიშვილის ქალიშვილია და ასევე ფიგურირებს „რადიო თავისუფლების“ ჟურნალისტურ გამოძიებაში. თავის მხრივ თათია ლოლაძე საქართველოში წითელი ჯვრის პრეზიდენტია.
ნანა ყეინიშვილს ბინა აქვს თბილისში, დიღომში, რომლის კვადრატულობა და ფასი დეკლარაციაში მითითებული არ აქვს. ამ ბინაშიც მეწილედ თათია ლოლაძე ჰყავს.
მეორე ბინა – 212 კვ.მეტრი თბილისში, ცურტაველის ქუჩაზე აქვს, რომელიც 30 000 ლარად შეუსყიდია 2022 წელს და ჰყავს 2 მეწილე – დავით გოგლიჩიძე და ვიტალი ქიარიმოვი.
2025 წლის დეკლარაციის მიხედვით, ყეინიშვილი საბანკო ანგარიშებზე 42 842 ლარს, 2887 დოლარსა და 4 889 ევროს ინახავს.
2025 წლის ქონებრივ დეკლარაციაში ნანა ყეინიშვილი ასევე წერს, რომ 137 225 დოლარი მას მძღოლებმა ანგარიშზე ჩაურიცხეს.
„კონვერტაციის შედეგად ჩემი კუთვნილი თანხები ჩემს ანგარიშზე ჩარიცხული აქვთ ჩემს მძღოლებს“, თუმცა მხოლოდ ერთი პირის – ზურაბ აბხაზოვის სახელი აქვს მითითებული. როგორც ყეინიშვილი აღნიშნავს, მძღოლები მას თანხის გადახურდავებაში ეხმარებოდნენ. არსად არ არის მითითებული თანხის წარმომავლობა.
წილები კომპანიებში:
შპს „დანიელი 2022“ – 100%
შპს „იუნაითიდ ფაუერ ენერჯი“ – 30%
შპს „ნათმეტალ საქართველო“, რომელსაც ყეინიშვილის თქმით, არასდროს უმუშავია.
შპს „სადმელი ჰესი“ – 100%
შპს „მწვანე ენერგიის ჯგუფი“, რომელიც 2023 წელს დაურეგისტრირებია.
ნანა ყეინიშვილი დეკლარაციაში უთითებს, რომ ამ კომპანიებიდან მოგება არ მიუღია. მოგების გრაფაში ყველგან წერია – 0.
აქვს სასტუმროს ბიზნესი [შპს დავინანა], სადაც 50% წილს ფლობს. არც ამ სასტუმროს მოგება არ აქვს მითითებული დეკლარაციაში.
სესხები:
ნანა ყეინიშვილს 2023 წელს 600 000 დოლარი აქვს აღებული სესხად და აქედან 235 000 დოლარი გასავალში აქვს მითითებული.
ამავე წელს მის კომპანიებში ყეინიშვილის წილების მმართველად ნათია ლოლაძე ინიშნება. დეკლარაციაში არსად არ არის მითითებული ამ კომპანიებიდან იღებს თუ არა რაიმე შემოსავალს ნანა ყეინიშვილი.
2024-2025 წელს, ზეპირი ხელშეკრულების საფუძველზე, ნანა ყეინიშვილს 50 000 დოლარი გაუცია სესხიდან.
მიმდინრე წლის 10 ოქტომბერს რადიო „თავისუფლებამ“ გამოაქვეყნა ჟურნალისტური გამოძიება, სადაც კრიპტოკომპანიის – „ბიტექსჩეინჯის“ დამფუძნებლები საუბრობენ იმაზე, თუ როგორ სთხოვს ნანა ყეინიშვილი მათ მიერ დაარსებული კომპანიის 49%-ის დათმობას.
არსებობს მათი საუბრის აუდიოჩანაწერიც, რომელიც „ბიტექსჩეინჯის“ დამფუძნებლებმა სუს-ის თანხმობით გააკეთეს.
ჩანაწერში ნანა ყეინიშვილი ამბობს, რომ აქვს კომპანია „ვიპ ფეი“, რომლის წლიური ბრუნვა 300 მილიონ ლარს აღწევს.
როგორც „თავისუფლება“ წერს, შპს „ვიპ ფეი“ 2022 წლის ივლისშია დაფუძნებული და კომპანიის იურიდიულ მისამართად ნიაბის ქუჩის #50 აქვს მითითებული, ანუ ის სახლი, სადაც ნანა ყეინიშვილი ცხოვრობს.
თუმცა ყეინიშვილს 2025 წელს შევსებულ ქონებრივ დეკლარაციაში არც ეს სახლი აქვს ნახსენები, არც აღნიშნული კომპანია და შემოსავლები.
სქრინი „თავისუფლების“ ჟურნალისტური გამოძიებიდან.
ჩანაწერის მიხედვით, 2022 წლის ნოემბერში ამ კომპანიამ ეროვნული ბანკისგან საგადახდო პროვაიდერის – PSP (Payment Service Provider) სტატუსი მიიღო, იმ პერიოდში მისი დირექტორი და 100%-იანი წილის მფლობელი თავად ნანა ყეინიშვილი იყო.
ფარულ აუდიოჩანაწერში ყეინიშვილი ჰყვება, რომ ეროვნულ ბანკში „ვიპ ფეის“ PSP -ს (Payment Service Provider) რეგისტრაციაში ბანკის ერთ-ერთი მაღალჩინოსანი დაეხმარა, რომელსაც დეპუტატობის დროს პარლამენტის კომიტეტში საქმიანობიდან იცნობდა.
ნანა ყეინიშვილი ეროვნული ბანკის საბჭოს წევრად 2023 წლის 21 სექტემბერს აირჩიეს. ეს იმას ნიშნავდა, რომ მას ეკრძალებოდა კომერციული საქმიანობა და ბანკის რეგულირებულ სფეროში ბიზნესის ფლობა.
ჩანაწერის მიხედვით, ყეინიშვილი კომპანია “ვიპ ფეის” ფორმალურ გასხვისებას იწყებს.
ამავე ჩანაწერში ყეინიშვილი კიდევ ერთ ახალ კომპანიას – „მულტიპრაიმს” ახსენებს, რომელსაც მისი თქმით, დაახლოებით 2 კვირაში ეროვნული ბანკი დაარეგისტრირებს, როგორც საგადახდო პროვაიდერს – PSP-ს.
ყეინიშვილი ახალგაზრდა ბიზნესმენებს თანამშრომლობის სანაცვლოდ ამ ახალშექმნილ კომპანიაში წილებსაც სთავაზობს.
ჟურნალისტური გამოძიების მიხედვით, ნანა ყეინიშვილს 2024 წელს ასევე დაურეგისტრირებია კომპანიები. მაგალითად „მანი იქსჩეინჯ პლიუსი”, რომელიც ვალუტის გადამცვლელია.
რადიო „თავისუფლება“ ასევე საუბრობს ყეინიშვილის შესაძლო კავშირზე შპს “კრიპტო ექსჩეინჯთან”, რადგან გამოძიების მიხედვით, ამ კომპანიამ ეროვნულ ბანკში ვასპის რეგისტრაცია 2024 წლის სექტემბერში გაიარა, 10 თვეში კი მისი დირექტორი გახდა გელა მუნჯიაშვილი, რომლის გვარი ყეინიშვილთან დაკავშირებულ რამდენიმე კომპანიაშიც ჩანს.
მუნჯიაშვილი „ვიპ ფეის” დირექტორიცაა და ასევე, ყეინიშვილის ყოფილი ქმრის იმ კომპანიის, რომელიც ვერცხლის ქუჩის #1-ში ბიზნესცენტრს ფლობს.
ჩანაწერში ნანა ყეინიშვილი ახსენებს ბიძინა ივანიშვილსაც, რომელზეც ამბობს, რომ ივანიშვილი მისთვის „ძალიან საპატივსაცემლო ადამიანია“.
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 11 ოქტომბრის 21:00 საათიდან 12 ოქტომბრის 21:00 საათამდე აჭარაში მოსალოდნელია ცვალებადი მოღრუბლულობა, უნალექოდ.
იქროლებს ცვალებადი მიმართულების ქარი 8-13 მეტრი წამში.
ჰაერის ტემპერატურა სანაპირო ზოლსა და მთიან მუნიციპალიტეტებში:
დღისით: 23 – 28 გრადუსი სითბო
ღამით: 8 – 13 გრადუსი სითბო
მაღალმთიან ზონაში:
დღისით: 12 – 17 გრადუსი სითბო
ღამით: 2 – 7 გრადუსი სითბო
ზღვის ღელვა 2-3 ბალი იქნება. ზღვის წყლის ტემპერატურა +21 გრადუსია.
მომდევნო 2 დღეს მოსალოდნელია უმეტესად უნალექო ამინდი.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 11 ოქტომბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 552 840 ადამიანი [გასულ დღე-ღამეში +1 930. ამ მონაცემებში შედის როგორც დაღუპულები, ასევე დაჭრილები]
ტანკი – 12 408 ერთეული [+2]
ჯავშანტექნიკა – 25 521 ერთეული [+6]
საარტილერიო სისტემა – 51 039 ერთეული [+39]
MLRS – 2 205 ერთეული [+4]
საზენიტო საბრძოლო სისტემა – 1 701 ერთეული [+2]
თვითმფრინავი – 443 ერთეული [+0]
ვერტმფრენი – 356 ერთეული [+0]
უპილოტო საფრენი აპარატის ოპერატიულ-ტაქტიკური დონე – 558 457 ერთეული [+1 531]
სახმელეთო რობოტიზებული კომპლექსი – 2 924 ერთეული [+7]
გემი/ნავი – 35 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 161 503 ერთეული [+557]
სპეცტექნიკა – 4 815 ერთეული [+3]
ფრთოსანი რაკეტა [ჩამოაგდეს] – 5 126 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
ირაკლი ღარიბაშვილიც დიპ სტეიტის აგენტი აღმოჩნდა? „ოცნების“ უკვე მერამდენე პრემიერზე ამბობენ ამას?
თუ დიპ სტეიტი ბიძინა ივანიშვილის და „ქართულ ოცნებას“ ებრძვის, როგორც ამას მმართველი პარტია გვიმტკიცებს, მაშინ როგორ მოხვდნენ მისი აგენტები „ოცნების“ ხელისუფლებაში? ეს „ეჭვიანი პოდკასტია“ და პირველ ეპიზოდში გიყვებით: როგორ აღმოჩნდა თავად „ოცნების“ მთავრობა მის მიერვე შეთხზული „დიპ სტეიტის“ აგენტი.
„ეჭვიანი პოდკასტი“ „ბათუმელებისა“ და „ნეტგაზეთის“ ახალი პროდუქტია, რომელშიც ორი ჟურნალისტი ერთ მნიშვნელოვან ამბავს, განცხადებას ან ნარატივს იღებს და მას დეტალურად, კრიტიკული თვალით განიხილავს.
4 ოქტომბრის საქმეზე დაკავებული მანუჩარ მიქელაძე, გლდანის ციხიდან წერილს ავრცელებს, სადაც საზოგადოებას აქტიურობისკენ მოუწოდებს.
„მივმართავ გამარჯვების მოლოდინით დაღლილ ჩვენს საზოგადოებას.
როდესაც ჩვენს ქვეყანას ჰყავს ძალაუფლება მიტაცებული ხალხის მძარცველი, მჩაგვრელი, კორუმპირებული, ქვეყნის მტერთან კოლაბორანტი, დასანქცირებული, არალეგიტიმური ხელისუფლება, რომელიც კლავს ქართველი ხალხის ევროპულ მომავალს, ქვეყნიდან გარბიან ჩვენი თანამოქალაქეები და მათ ადგილს უკონტროლოდ შემოსული უცხოელები ანაცვლებენ, საზოგადოება კი დაყოფილი და გახლეჩილია, ამ დროს ჩვენი დუმილი და უმოქმედობა ღალატის ტოლფასია ქვეყნის წინაშე.
სამშობლოს სიყვარული მხოლოდ სადღეგრძელოებით არ გამოიხატება, მას ბრძოლა, თავგანწირვა, შრომა და მოვლა-პატრონობა სჭირდება.
წინაპრების თავგანწირვით მოვედით დღემდე, ჩვენ კი საკუთარი ქვეყნის, ჩვენი შვილების ევროპული მომავლის განადგურებას ვუყურებთ და არ ვრეაგირებთ. ეს არ არის პასუხისმგებლიანი დამოკიდებულება.
როდემდე შეიძლება ითმინო პოლიტიკური უმსგავსობა ქვეყანაში და ეს დამამცირებელი დამოკიდებულება ჩვენს მიმართ. მოგმართავთ, რომ კარგად გაიზროთ შექმნილი პოლიტიკური მდგომარეობა, გაიაზროთ თქვენი პასუხისმგებლობა შვილების წინაშე. გამოფხიზლდი, გაბრაზდი და გააპროტესტე ეს დანაშაულებრივი ქმედებები ჩვენი საზოგადოების წინააღმდეგ.
გააპროტესტე ოპოზიციის უმოქმედობა და მოუწოდე დაუყოვნებლივ მოქმედებისკენ. გამოსავალი ისევ ჩვენშია.
გამოდი ჩვენი ქვეყნის, ჩვენი შვილების მომავლის დასაცავად და დადექი გამარჯვებამდე. ეს ჩვენი მოქალაქეობრივი ვალია. ჩვენ ერთად ყველაფერს შევძლებთ, გჯეროდეს გამარჯვების“-წერს მანუჩარ მიქელაძე ციხიდან.
მანუჩარ მიქელაძე პარტია „ახლების“ წევრია და ის 4 ოქტომბრის საპროტესტო აქციაში მონაწილეობის გამო დააკავეს.
დღეს, 10 ოქტომბერს, ევროპის დღეზე კახეთში, საქართველოში ევროკავშირის ელჩი პაველ ჰერჩინსკიც იმყოფებოდა, სადაც საქართველოსა და ევროკავშირის ურთიერთობაზე ისაუბრა. მისი თქმით, ევროკავშირი ქართულ მრავალხმიანობას ჰგავს, სადაც თითოეული ხმა, ერთიან მელოდიას ქმნის. „ჩვენ გვსურს, ევროპის მრავალხმიანობაში, ქართული ხმა მკაფიოდ ისმოდეს“-ამბობს ევროკავშირის ელჩი.
„წელს პირველად ავღნიშნავთ ევროპის დღეს კახეთში. აქ ხომ განსაკუთრებულად იგრძნობა თავისუფალი ქართული სული, კულტურა და ტრადიციები. ის სიმდიდრე, რომელსაც საქართველო ევროპას სძენს.
გამოწვევებით სავსე მსოფლიოში, უკვე თითქმის 80 წელია ვრჩებით მშვიდობის, დემოკრატიული განვითარებისა და ეკონომიკური კეთილდღეობის კუნძულად. ის რაც გვაქვს, დიდი შრომით, მონდომებით და საერთო პრინციპებისადმი ერთგულებით შევქმენით, ამიტომაც, არის ჩვენთვის ასეთი ძვირფასი. ამიტომაც გვინდა, ეს სიკეთე გავუზიაროთ მათ, ვინც პატივს სცემს ჩვენს საერთო წესებს.
ევროკავშირი ქართულ მრავალხმიანობას გავს. 27 დამოუკიდებელი სახელმწიფო, ძლიერ ერთობას ქმნის. ისევე როგორც, თითოეული ხმა ქმნის ერთიან მელოდიას. ჩვენ გვსურს, რომ ევროპის მრავალხმიანობაში, ქართული ხმა მკაფიოდ ისმოდეს.
ევროკავშირისა და საქართველოს მეგობრობა, საქართველოს დამოუკიდებლობიდან იწყება. მართალია ამ მჭიდრო კავშირს ბოლო პერიოდის ანტიევროპული რიტორიკა ძალიან აზიანებს, თუმცა ვერ შეცვლის, წარმოუდგენელია მრავალწლიანი ისტორიის გადაწერა. მით უფრო დავიწყება, რამდენიმე წელში. ჩვენ გავაგრძელებთ, საქართველოს დემოკრატიული და ევროპული მომავლის მხარდაჭერას.
თქვენ არ გჭირდებათ არჩევანის გაკეთება, ქართველობასა და ევროპელობას შორის. თქვენ შეგიძლიათ იყოთ ორივე. თქვენ ხართ ორივე! და რადგან დღეს, კახეთში ვართ ნება მომეცით, ჩემი გამოსვლა ამ სიტყვებით დავასრულო, – „წუთისოფელი ასეა, დღეს ღამე უთენებია, რაც მტრობას დაუნგრევია, სიყვარულს უშენებია“-განაცხადა პაველ ჰერჩინსკიმ კახეთში, სადაც ევროპის დღეები წელს პირველად იმართება.
„მასწავლებლის ეროვნული დღის ფარგლებში, საზოგადოებისა და განათლების სისტემის განვითარებაში შეტანილი განსაკუთრებული წვლილისთვის, ღვაწლმოსილ პედაგოგებს გადაეცემა მასწავლებლის ეროვნული პრემია – სპეციალურად შექმნილი სამკერდე ნიშანი და ფულადი ჯილდო 10 000 ლარის ოდენობით“-წერია განცხადებაში, რომლითაც „ოცნების“ განათლების მინისტრის მოადგილე ლევან ღირსიაშვილი, სახელმწიფო შესყიდვების სააგენტოს მიმართავს და ცერემონიისთვის საჭირო თანხების, გამარტივებული წესით დახარჯვას ითხოვს.
სამინისტრომ, რომელმაც ჯერ კიდევ წლის დასაწყისში იცის, რომ მსგავსი ღონისძიება უნდა გამართოს ოქტომბერში, გამარტივებული შესყიდვის მიზეზად ისევ „შემჭიდროებულ ვადებს“ ასახელებს.
სამინისტროს განცხადებით, წელს, წინა წლებისგან განსხვავებით, მასწავლებლების დაჯილდოების ცერემონია თბილისის ნაცვლად ქუთაისში გაიმართება, „რომლის მიზანია, საგანმანათლებლო და სახელმწიფო მნიშვნელობის ღონისძიებების დედაქალაქში კონცენტრაციის შემცირება და ამ მიმართულებით, რეგიონების დატვირთვა“.
„მიუხედავად იმისა, რომ ღონისძიება ყოველწლიურად ტარდება, შესყიდვის ობიექტის საბოლოო მოცულობის და ტექნიკური მოთხოვნების ჩამოყალიბება საჭიროებდა საკითხის დამატებით შესწავლას და ახალი ლოკაციის სპეციფიკის გათვალისწინებას, ტექნიკური დავალების საბოლოო ფორმირებისთვის“-წერს ღირსიაშვილი.
ამ „შემჭიდროებულ ვადებში“, სამინისტროს ბაზრის კვლევაც მოუსწრია.
„ელექტრონული ფოსტის საშუალებით მოწვევა გაეგზავნა ამ მიმართულებით მომსახურე რვა კომპანიას.
თანამშრომლობის სურვილი გამოხატეს კომპანიებმა: შპს “კოლექტიკამ”, შპს “კონსიერჟ თბილისმა” და შპს “ლუმა დეველოპმენტმა”. შპს “კოლექტიკას” მოწოდებული კონცეფცია და ბიუჯეტი (უმცირესი ფასი) სრულად აკმაყოფილებს სამინისტროს მიერ შემუშავებული ტექნიკური დავალების მოთხოვნებსა და ღონისძიების საჭიროებებს“-აცხადებს სამინისტრო.
ეს „უმცირესი ფასი“ კი მთლიანობაში 866 231 ლარია, რომელიც სახელმწიფო ბიუჯეტიდან უნდა დაიხარჯოს.
მასწავლებლის ეროვნული პრემია 10 მასწავლებელს გადაეცემა, რომლებიც ასევე ბიუჯეტიდან, 10-10 ათასი ლარით დასაჩუქრდებიან.
საქართველოს პროკურატურა აცხადებს, რომ მსჯავრდებული გიორგი დავითაძის მიმართ განხორციელებული შესაძლო სექსუალური ძალადობის ფაქტზე მიმდინარე დაწყებული გამოძიება უკვე დაასრულა.
„მოპოვებული მტკიცებულებები ცხადყოფს, რომ დაწესებულების დეესკალაციის ოთახში გიორგი დავითაძის შემოწმების პროცესში, მის მიმართ რაიმე სახის ძალადობას და დანაშაულებრივ ქმედებას ადგილი არ ჰქონია. შესაბამისად, მიღებულია გადაწყვეტილება სისხლის სამართლის საქმეზე გამოძიების შეწყვეტის შესახებ.
საზოგადოების ინფორმირების მიზნით განვმარტავთ, რომ 2025 წლის 29 დეკემბერს ქვემო ქართლის საოლქო პროკურატურის საგამოძიებო სამმართველოში დაიწყო გამოძიება სისხლის სამართლის საქმეზე, გიორგი დავითაძის მიმართ განხორციელებული სამსახურებრივი უფლებამოსილების ძალადობით გადამეტების სავარაუდო ფაქტზე, საქართველოს სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით გათვალისწინებული დანაშაულის ნიშნებით.
გამოძიების მსვლელობისას საქმეზე გამოიკითხა ათეულობით მოწმე, მათ შორის ამავე დაწესებულებაში მყოფი მსჯავრდებულები; ჩატარებული იქნა საექსპერტო კვლევები; დამუშავდა და გაანალიზდა ათეულობით საათის ვიდეოჩანაწერი; ჩატარდა არაერთი საგამოძიებო და საპროცესო მოქმედება.
საქმეზე ჩატარებული გამოძიებით დადგინდა, რომ თბილისის საქალაქო სასამართლოს 2025 წლის 6 ოქტომბრის განაჩენით გიორგი დავითაძე ცნობილი იქნა დამნაშავედ საქართველოს სისხლის სამართლის კოდექსის 19.109-ე მუხლის „ბ“ ქვეპუნქტით და 236-ე მუხლის მე-3, 4 ნაწილებით გათვალისწინებული დანაშაულების ჩადენისთვის (დამამძიმებელ გარემოებაში განხორციელებული მკვლელობის მცდელობა და ცეცხლსასროლი იარაღის მართლსაწინააღმდეგო შეძენა, შენახვა და ტარება). მას სასჯელის სახით განესაზღვრა 17 წლით და 6 თვით თავისუფლების აღკვეთა.
გამამტყუნებელი განაჩენის გამოტანის შემდეგ, იგი 2025 წლის 10 ოქტომბერს პენიტენციური სამსახურის №8 დაწესებულებიდან გადაყვანილი იქნა პატიმრობისა და განსაკუთრებული რისკის თავისუფლების აღკვეთის №6 დაწესებულებაში. 2025 წლის 21 დეკემბერს, დაახლოებით 10:30 საათზე, გიორგი დავითაძის საკნის გეგმიური შემოწმების დროს, მან სიტყვიერი შეურაცხყოფა მიაყენა დაწესებულების თანამშრომლებს, ამავე დროს იმუქრებოდა თვითდაზიანებითა და მორიგე განწესის წევრების ფიზიკური შეურაცხყოფით. აღნიშნულის გამო, იგი გადაყვანილი იქნა №6 დეესკალაციის ოთახში, სადაც კვლავ აგრძელებდა პენიტენციური დაწესებულების თანამშრომლების სიტყვიერ შეურაცხყოფას და იყო აგრესიული. დეესკალაციის ოთახში გადაყვანის შემდეგ, გიორგი დავითაძის პირადი შემოწმების მიზნით, კანონის მოთხოვნების დაცვით მის მიმართ გამოყენებული იქნა იძულების პროპორციული ზომა.
კერძოდ, დაწესებულების სამმა თანამშრომელმა განახორციელა მსჯავრდებულის გაკავება, რა დროსაც ერთ-ერთმა მათგანმა გ.ვ.-მ გიორგი დავითაძეს ჩაუტარა პირადი შემოწმება, სხეულზე გარედან ზედაპირული შეხების გზით. შემოწმების პროცესში, ასევე გამოყენებული იქნა მეტალო-დეტექტორიც. შემოწმების პროცესში, გიორგი დავითაძის მიმართ რაიმე სახის ძალადობას და დანაშაულებრივ ქმედებას ადგილი არ ჰქონია.
2025 წლის 26 დეკემბერს, გიორგი დავითაძის დეესკალაციის ოთახში გადაყვანისა და მისი პირადი შემოწმებიდან 5 დღის შემდეგ, №6 პენიტენციურ დაწესებულებაში შესულ სახალხო დამცველის აპარატის წარმომადგენელთან გასაუბრებისას გიორგი დავითაძეს მისი გაუპატიურების ფაქტი არ უხსენებია, განმარტა, რომ დაწესებულების ერთ-ერთი თანამშრომელი, ვინმე ,,კვარა” მას გაუპატიურებით დაემუქრა და სამედიცინო ხელთათმანით ხელი შარვალში ჩაუცურა. ასევე განმარტა, რომ დაწესებულების თანამშრომლები სისტემატიურად აყენებდნენ სიტყვიერ შეურაცხყოფას.
სახალხო დამცველის აპარატიდან პროკურატურაში გადმოგზავნილი ინფორმაციის საფუძველზე, გიორგი დავითაძემ, მასთან შესულ გამომძიებელს, უარი განუცხადა ადვოკატის გარეშე რაიმე სახის ინფორმაციის მიწოდებაზე. თავის მხრივ გიორგი დავითაძის ადვოკატმა, 2025 წლის 29 დეკემბერს გამომძიებელთან კომუნიკაციის დროს, ჯანმრთელობის მდგომარეობის მიზეზით, უარი განაცხადა საპატიმრო დაწესებულებაში შესვლაზე. ასევე, 2026 წლის 9 იანვრის კომუნიკაციის დროს განმარტა, რომ ჯანმრთელობის მდგომარეობის გამო კვლავ ვერ შეძლებდა პენიტენციურ დაწესებულებაში გამოცხადებას და მსჯავრდებულის ოჯახის წევრებთან შეთანხმებით, გიორგი დავითაძის ინტერესებს დაიცავდა სხვა ადვოკატი.
გიორგი დავითაძე გამოიკითხვა 2026 წლის 12 იანვარს ადვოკატის მონაწილეობით. მხოლოდ გამოძიების ამ ეტაპზე დააფიქსირა მან, მის მიმართ სავარაუდო სექსუალური ხასიათის ძალადობრივი ქმედების განხორციელების შესახებ. ამავე დროს, გიორგი დავითაძემ ადვოკატის თანდასწრებით უარი განაცხადა სამედიცინო ექსპერტიზის ჩატარებაზე და მიუთითა, რომ მომხდარი ფაქტის დროს არანაირი ფიზიკური დაზიანება არ მიუღია. აქვე აღსანიშნავია ის ფაქტიც, რომ გიორგი დავითაძის მიერ გამოკითხვისას დასახელებული თითქოსდა მასზე მოძალადე ვინმე ,,კვარა”, როგორც შემდეგ განმარტეს – გიორგი კვარაცხელია საერთოდ არ მუშაობს აღნიშნულ პენიტენციურ დაწესებულებაში.
2026 წლის 3 ივლისს გიორგი დავითაძის ადვოკატმა, პროკურატურას მომართა შუამდგომლობით გიორგი დავითაძის დაზარალებულად ცნობის შესახებ. პროკურორის მიერ იმავე დღეს გამოტანილი იქნა დასაბუთებული დადგენილება შუამდგომლობის დაკმაყოფილებაზე უარის თქმის თაობაზე. აღნიშნული გადაწყვეტილება გიორგი დავითაძის მხარეს არ გაუსაჩივრებია, არც ზემდგომ პროკურორთან და არც სასამართლოში, როგორც ამას ითვალისწინებს მოქმედი სისხლის სამართლის საპროცესო კოდექსი.
გამოძიების ფარგლებში ასევე ჩატარდა ფონოვიდეოსკოპური და ჰაბიტოსკოპური ექსპერტიზა, რა დროსაც ექსპერტმა წამობრივი სიზუსტით გაშიფრა დეესკალაციის №6 საკანში არსებული ვიდეოკამერების ჩანაწერები და სრულად აღადგინა გიორგი დავითაძის პირადი შემოწმების პროცესში განხორციელებული მოქმედებები.
ექსპერტიზის დასკვნის თანახმად, ექსპერტიზაზე წარდგენილ ვიდეოჩანაწერებზე გიორგი დავითაძის ძალადობისკენ მიმართული ქმედება არ ფიქსირდება. ამასთან, ამავე ვიდეოჩანაწერებს მონტაჟის კვალი არ აღენიშნება. შესაბამისად, განსახილველი დასკვნით ცალსახად გამოირიცხა გიორგი დავითაძის მიმართ დანაშაულებრივი ქმედებების განხორციელების ფაქტი.
ამდენად, საქმეზე მოპოვებული და განხილული მტკიცებულებებით უტყუარად დადასტურდა, რომ გიორგი დავითაძის მიერ გამოძიებისთვის მიწოდებული ინფორმაცია არ შეესაბამება სიმართლეს. იგი არსებით წინააღმდეგობაში მოდის საქმეზე შეკრებილ უტყუარ მტკიცებულებებთან. რის გამოც, 2026 წლის 9 ოქტომბერს, დანაშაულის არ არსებობის გამო მოცემულ საქმეზე შეწყდა გამოძიება“- ცხადებს პროკურატურა.
უკრაინის შეიარაღებული ძალების გენერალური შტაბის დღევანდელი მონაცემებით, ომის დაწყებიდან 2026 წლის 10 ოქტომბრამდე პერიოდში, რუსეთის არმიის საბრძოლო დანაკარგი არის:
ცოცხალი ძალა – დაახლოებით 1 550 910 ადამიანი [გასულ დღე-ღამეში +1 420. ამ მონაცემებში შედის როგორც დაღუპულები, ასევე დაჭრილები]
ტანკი – 12 406 ერთეული [+4]
ჯავშანტექნიკა – 25 515 ერთეული [+6]
საარტილერიო სისტემა – 51 000 ერთეული [+50]
MLRS – 2 201 ერთეული [+2]
საზენიტო საბრძოლო სისტემა – 1 699 ერთეული [+6]
თვითმფრინავი – 443 ერთეული [+0]
ვერტმფრენი – 356 ერთეული [+0]
უპილოტო საფრენი აპარატის ოპერატიულ-ტაქტიკური დონე – 556 926 ერთეული [+1 591]
სახმელეთო რობოტიზებული კომპლექსი – 2 917 ერთეული [+9]
გემი/ნავი – 35 ერთეული [+0]
წყალქვეშა ნავი – 2 ერთეული [+0]
მანქანები და საწვავის ავზები – 160 946 ერთეული [+534]
სპეცტექნიკა – 4 812 ერთეული [+2]
ფრთოსანი რაკეტა [ჩამოაგდეს] – 5 126 ერთეული [+0]
უკრაინის გენერალური შტაბის განცხადებით, საომარი მოქმედებების მაღალი ინტენსივობის გამო მონაცემები იცვლება.
უკრაინის სამხედრო დანაკარგებზე სტატისტიკური ინფორმაცია 2026 წლის 25 თებერვლის შემდეგ აღარ განუახლებია რუსეთს.
რუსეთის თავდაცვის სამინისტროს მიერ ტელეგრამ არხზე ბოლოს გავრცელებული მონაცემებით, ომის დაწყებიდან 2026 წლის 25 თებერვლამდე პერიოდში სულ განადგურებულია უკრაინის:
670 თვითმფრინავი
283 ვერტმფრენი
117 299 უპილოტო საფრენი აპარატი
651 საზენიტო სარაკეტო სისტემა
27 873 ტანკი და სხვა ჯავშანტექნიკა
1 674 მრავალჯერადი სარაკეტო გამშვები
33 474 საველე არტილერია და ნაღმმტყორცნი
55 252 სპეციალური სამხედრო მანქანა
ეს ის მონაცემებია, რომელსაც უკრაინა და რუსეთი ოფიციალურად ავრცელებენ, თუმცა ომის პირობებში შეუძლებელია ზუსტად გადამოწმება, რამდენად შეესაბამება მხარეების მიერ გავრცელებული ინფორმაცია დანაკარგების შესახებ რეალურ რიცხვებს.
ამასთან, აღნიშნულ მონაცემებთან ერთად რუსეთის თავდაცვა, უკრაინის და რუსეთის არმიის ცოცხალი ძალის საერთო დანაკარგების შესახებ სტატისტიკას არ აქვეყნებს. უკრაინის არმიის ცოცხალი ძალის დანაკარგების შესახებ მონაცემებს არ აქვეყნებს არც უკრაინა.
„დღეს მეზობელმა გამოგვიტანა სამი კარტოფილი და ნახევარი პური. კარტოფილი მოვხარშეთ და ის ვაჭამეთ ბავშვებს. მე და ჩემი მეუღლეს ლუკმა არ ჩაგვიდია პირში“- ამბობს 32 წლის ლევან ოზაშვილი, რომელიც მეუღლესთან, ლიკა გუგავასთან და სამ მცირეწლოვან შვილთან ერთად, ლანჩხუთში, სოფელ გვიმბალაურში სხვის სახლში ცხოვრობს.
ოჯახს სამი თვეა სოციალური დახმარებაც შეწყვეტილი აქვს, რის გამოც, როგორც მშობლები ამბობენ, მცირეწლოვანი ბავშვები საკვების და წამლის გარეშე არიან დარჩენილი.
„ხან ვის ვთხოვ 20 ლარის ჩარიცხვას და ხან ვის. სახელმწიფოდან არავინ გვეხმარება. ერთხელ მოგვიტანეს მერიიდან მაკარონი და რაღაცები და მას შემდეგ არავის მოვუკითხივართ. არც სოციალური მუშაკი მოსულა. რადგან კახეთიდან გურიაში გადმოვედით და მისამართი შევიცვალეთ, დახმარება შეგვიწყვიტეს“ – გვეუბნება ლევან ოზაშვილი.
„კარაქიანი პური მინდა“ – ამბობს 4 წლის ბიჭი, რომელიც დერეფნის ბოლოდან გამორბის. დედა ამბობს, რომ ცოტა კარაქი აქვთ სახლში, მაგრამ არ აქვთ პური.
ლევან ოზაშვილი შვილთან ერთად.
„პური არ მაქვსო შვილს რომ ეტყვი, წარმოიდგინონ აბა თავიანთი თავი ჩემს ადგილას. რა გავაკეთო არ ვიცი. ორი წელი იქნება ბავშვებს ხორცი არ უჭამიათ და ნატრობენ ძალიან. დღესაც მომთხოვა ბიჭმა, მაგრამ ხორცი კი არა, პურიც კი არ გვაქვს სახლში.
სოციალურს რომ ვიღებდი, მაშინაც მაკარონს, ზეთს და ასეთ რამეს ვყიდულობდი და ხორცის ფული აღარ მრჩებოდა. არც არავინ გვეხმარება სახელმწიფო უწყებებიდან, მარტო იმის თქმა იციან – „თუ ვერ უვლით, მინდობით გავიყვანთ“. დედას შვილი როგორ უნდა დააშორო, ეს როგორ შეიძლება. თვითონ მშობლები არ არიან? შვილები არ ჰყავთ?“- ამბობს ლიკა გუგავა.
უმცროსი ბავშვი ერთი წლისაა. გაღვიძების შემდეგ სულ ტირის. დედა ამბობს, რომ „ჰუმანაზე“ ჰყავს, მაგრამ დიდი ხანია საკვებს ვერ ყიდულობს.
„რაღაც სხვა ფაფა მოგვიტანეს, მაგრამ ბავშვმა არ მიიღო. მუცელი ქვასავით აქვს, ვერ იძინებს. თბილ წყალში ვსვამ და ეს ცოტა შვებას აძლევს. სულ იღებს წამალს, რომელიც 15 ლარი ღირს და ვერ ვიყიდე, ამიტომ უჭირს მონელება და ტირის“- გვეუბნება ლიკა.
მშობლები თავიანთ მძიმე ამბებსაც გვიზიარებენ.
„დედოფლისწყაროში, სოფელ ოზაანში გავიზარდე, იქ ვცხოვრობდი, მაგრამ მძიმე ცხოვრება მქონდა. უთანხმოება მქონდა მშობლებთან და სახლიდანაც არაერთხელ გავქცეულვარ. დაიჯერებთ? შუა ზამთარში თბილისში ნახევრად აშენებულ კარკასებში მეძინა ხოლმე, როცა სახლიდან გამოვრბოდი.
21 წლის ასაკში ლიკა გავიცანი და შემიყვარდა. ლიკასაც მძიმე ცხოვრება აქვს გამოვლილი, 9-შვილიან ოჯახში გაიზარდა და ისიც კი ვერ მოახერხა რომ სკოლა დაესრულებინა“ – ამბობს ლევანი.
„არ მქონდა ხელშეწყობა ოჯახში. მერე ბებიასთან გადავედი ცოტა ხნით და მე-8 კლასამდე მოვახერხე სკოლაში სიარული, თუმცა ატესტატი ვეღარ ავიღე“- გვეუბნება ლიკა.
საუბარში ისევ ლევანი ერთვება, რომელიც ამბობს, რომ მშობლები მათი ურთიერთობის წინააღმდეგი იყვნენ.
„რადგან ლიკა ღარიბი ოჯახიდან იყო, არ უნდოდათ. ჩვენ მდიდარი გოგო გვინდოდაო. არაერთხელ სცადეს ჩვენი დაშორება, მაგრამ ვინც გიყვარს, იმასთან უნდა იცხოვრო, მე ასე მიმაჩნია“-ამბობს ლევან ოზაშვილი.
ოზაშვილები 3 შვილთან ერთად, სხვის სახლში ცხოვრობენ ლანჩხუთის მუნიციპალიტეტში
უსახლკარო ოჯახი რეგიონიდან რეგიონში გადადის უკეთესი ცხოვრების მოლოდინში, თუმცა ამბობენ, რომ სახელმწიფოს მხრიდან უყურადღებობის და გულგრილობის გამო, ფეხი ვერსად მოიკიდეს.
„ეს სახლიც ერთმა კარგმა ოჯახმა დაგვითმო. წესით ქირა უნდა გადაგვეხადა, მაგრამ როცა სოციალური შეგვიჩერეს, ვეღარ გადავიხადეთ. სახლის მეპატრონეები კარგი ადამიანები არიან და აქ დარჩენის უფლება მოგვცეს. რაც შეუძლიათ, აქეთ გვეხმარებიან.
წინა მდგმურებს დენის ფული არ გადაუხდიათ და ვიღაც გოგომ დაგვიფარა ნაწილი, გაზის ფული სახლის მეპატრონემ გადაიხადა, მაგრამ თუ დახმარება არ გვექნება, შეიძლება შუქიც გაგვითიშონ და ბავშვებს სიბნელეში მოუწიოთ ყოფნა.
ლანჩხუთის მერიაში რომ მივდივართ და სამუშაოს ვთხოვთ, იქნებ სადმე დაგვასაქმოთ მეთქი, აქაურები არ ხართ და ვერ დაგასაქმებთო. სოფელ კოდაში რომ ვცხოვრობდით, არც იქ დაგვასაქმა ვინმემ “- წუხს ლიკა.
ვიდეო:
ოჯახი გასულ არჩევნებსაც იხსენებს:
„არჩევნების დღეს გამგებელმა წაგვიყვანა თავისი მანქანით, ოღონდ ჩვენ მოგვეცით ხმა და სახლსაც მოგცემთ და სამუშაოსაცო, მაგრამ დანაპირები არ შეასრულა. თვითონ კია თანამდებობაზე. ცოტა ხნის წინ მივწერე, შვილები მშიერი მყავს და 20 ლარი მაინც დამირიცხე მეთქი და მე სად მაქვს ფულიო – ასე მიპასუხა.
ჩემ შვილებს „დვარეცები“ არ უნდათ, ერთი ოთახი მისცენ, რომ იმედით ვიყო, სახლის პატრონი არ მოვა და არ მეტყვის, – „დაცალე ბინა“.
მე მინდა მუშაობა. ფეისბუქზე გვერდები აჭრელებული მაქვს, ვეძებ სამუშაოს, მუშადაც ვიმუშავებ, მაგრამ არავინ მეხმიანება. ძალიან მინდა ხეზე მუშაობა ვისწავლო და ვიმუშაო.ერთი 900 ლარი გვქონდა დახმარება და ისიც შეგვიჩერეს“ – ამბობს ლევანი.
„მაგასაც კი იძახიან, თუ უჭირს რაღას აჩენსო. ღმერთი გვაძლევს და რა ვქნათ, აღარ უნდა გვყავდეს?“ – ამბობს ლიკა გუგავა.
___________________
ლიკას და ლევანის ოჯახის დახმარების მსურველებს შეუძლიათ თანხა ჩარიცხონ საბანკო ანგარიშებზე:
„ირანის ელჩის ექსცენტრული და თავხედურ ქცევაზეც არ მახსოვს შალვა პაპუაშვილის რეაქცია. მისი რისხვა ექსკლუზიურად არის მიმართული იმ ევროპელი პოლიტიკოსების მიმართ, რომლებიც ამდენი წლის განმავლობაში ზრუნავდნენ საქართველოს დემოკრატიულ განვითარებაზე…
პაპუაშვილს აქვს ცენტრფორვარდის ფუნქცია მინიჭებული დასავლეთის მიმართ შეურაცხყოფების და თავდასხმების ფრონტზე,“ – მიიჩნევს დიპლომატი გიორგი ბადრიძე, მას „ოცნების“ ინტერესზე ვესაუბრეთ: ეუთოს თავმჯდომარე ქვეყნის სტატუსი 2027 წელს.
მაშინ, როცა „ოცნება“ აქტიურად ეწევა ანტიდასავლურ კამპანიას, რა გათვლით შეიძლება მოქმედებდეს ბიძინა ივანიშვილი?
„თეორიულად შესაძლებელია, რომ მიზანი ზუსტად ეს იყოს: მიიღოს უარი სხვადასხვა ქვეყნიდან, მაგრამ, ჩემი აზრით, „ოცნებას“ საბაბების ძებნა დასავლეთთან ურთიერთობების გასაფუჭებლად უკვე აღარ სჭირდება.
ივანიშვილი რეალობად აქცევს თავის ძალიან ადრეულ იდეას, რომელიც ჰქონდა ჩამოყალიბებული, რომ საქართველო არის პატარა სოფელი, მას არ უნდა ჰქონდეს საერთაშორისო მნიშვნელობა და ეს არ უნდა იყოს დავის საგანი დასავლეთსა და რუსეთს შორის. საქართველო უკვე არის თვითიზოლაციაში…
ივანიშვილის ხელისუფლების ქცევა იძლევა დამატებით სტიმულს, რომ ამ ქვეყნებმა ეძიონ, მათ შორის, ცენტრალურმა აზიამ, ეძიოს საქართველოს ალტერნატიული მარშრუტი,“ – გვითხრა გიორგი ბადრიძემ.
„ბათუმელებმა“ დიპლომატთან, გიორგი ბადრიძესთან ინტერვიუ ჩაწერა. გიორგი ბადრიძე საქართველოს საგანგებო და სრულუფლებიანი ელჩი იყო დიდ ბრიტანეთსა და ჩრდილოეთ ირლანდიის გაერთიანებულ სამეფოში.
ბატონო გიორგი, მკვეთრი, ანტიევროპული პოლიტიკის გათვალისწინებით, „ოცნების“ სურვილია, 2027 წელს ეუთოს თავმჯდომარე ქვეყანა საქართველო გახდეს – ეს ივანიშვილს სჭირდება იმის წარმოსაჩენად, რომ თითქოს ევროკავშირი თავად ამბობს უარს საქართველოზე?
დავიწყებ იმით, რომ არ ვიცი შორს მიმავალი რა გეგმა შეიძლება არსებობდეს, მაგრამ აბსოლუტურად არარეალისტურია 2027 წლისთვის ეუთოს თავმჯდომარეობის საკითხში საქართველოს მხარდაჭერის მოპოვება ეუთოს წევრი ქვეყნებისგან. ეს ივანიშვილის ხელისუფლებას ალბათ ძალიან კარგად მოეხსენება. მე აქ პირდაპირ ევროკავშირთან ურთიერთობის საკითხს ვერ ვხედავ, რადგან ეუთო წარმოადგენს 57 ქვეყნის ერთობას. რა თქმა უნდა, დიდი ნაწილი ამ ქვეყნებისა არის ევროკავშირის წევრი.
ევროკავშირის წევრი არცერთი ქვეყანა არ დაუჭერს მხარს ამ საკითხს, მაგრამ არიან სხვა ქვეყნები, მათ შორის, აშშ, კანადა, ევრაზიის ქვეყნები. არა მგონია, ივანიშვილის ხელისუფლებას ევროკავშირის გარეთაც ჰქონდეს მხარდაჭერა.
გიორგი ბადრიძე
აქ მნიშვნელოვანი ის, რომ ეუთო წარმოადგენს ზუსტად იმგვარ ორგანიზაციას, რომელიც არ ჩამოუვარდება ევროკავშირს იმ პრინციპებში, რომლებსაც საქართველოს ხელისუფლება, უფრო სწორად, ივანიშვილის ხელისუფლება დღენიადაგ აქტიურად არღვევს.
ეუთო გასული საუკუნის 70-იანი წლებიდან აღმოსავლეთ და დასავლეთის ბლოკებს შორის ურთიერთობების დასარეგულირებლად შედგებოდა სამი ნაწილისგან: პირველი, ეს იყო ერთგვარი თანხმობის მიღწევა უსაფრთხოების, პოლიტიკის სფეროში და გულისხმობდა სტაბილური საზღვრების აღიარებას. ეს უკვე დასავლეთის ინიციატივა იყო, სამაგიეროდ კომუნისტური ბლოკის ქვეყნებს, ანუ საბჭოთა კავშირს, უნდა ეღიარებინა ადამიანის უფლებების მინიმალური სტანდარტები საკუთარ ქვეყანაში და იმ ქვეყნებში, რომელსაც საბჭოთა კავშირი აკონტროლებდა.
ამით იმის თქმა მინდა, რომ თავიდანვე ეუთო იყო ფასეულობითი ორგანიზაცია, რომელსაც სურდა დასავლეთის ინიციატივით ადამიანის უფლებების სტანდარტების დამკვიდრება იმ ქვეყნებში, სადაც ეს უფლებები აქტიურად ილახებოდა. სანაცვლოდ ის სთავაზობდა ქვეყნებს საზღვრების აღიარებისა და განიარაღების საკითხებს, რომელიც ასევე იყო საბჭოთა ბლოკის ინტერესებში.
დღეს საქართველო, რომელიც ყველაზე თვალში საცემად და სწრაფად გარდაიქმნება ამ სფეროში, ანუ ადამიანის უფლებებს ყველაზე აქტიურად არღვევს, მისი მხრიდან ეუთოს თავმჯდომარეობაზე პრეტენზია, ცხადია, არარეალისტურად უნდა მივიჩნიოთ.
2025 წლის არჩევნებზე, მაგალითად, ეუთო „ოცნებამ“ არ მოიწვია – კენჭისყრის დღემდე რამდენიმე დღით ადრე მოიწვია, რაც შეუძლებელს ხდიდა არჩევნებზე დაკვირვებას. ეუთოს საკითხის გააქტიურება ივანიშვილს დასჭირდა შიდა აუდიტორიისთვის, თუ დასავლეთს ევაჭრება?
ეუთოს დამკვირვებლები აბსოლუტურად ყველა არჩევნებს ესწრებიან წევრ ქვეყნებში, ორი გამონაკლისით – ეს არის რუსეთი და ბელარუსი. ახლა ტრამპის ადმინისტრაციამ გამოაცხადა, რომ შუალედურ არჩევნებზე ისინი ალბათ არ მოიწვევენ ეუთოს დამკვირვებლებს. ყველა შემთხვევაში, რუსეთისა და ბელარუსის კამპანიაში ყოფნა მაინცდამაინც სახარბიელო არ უნდა იყოს არავისთვის. ამ სფეროში ივანიშვილის ხელისუფლებას სრულიად ჩამოყალიბებული რეპუტაცია აქვს. შესაბამისად, მე ვერ ვივარაუდებ, ამ განცხადების მიზანი რა არის.
თეორიულად შესაძლებელია, რომ მიზანი ზუსტად ეს იყოს, მიიღოს უარი სხვადასხვა ქვეყნისგან, მაგრამ, ჩემი აზრით, „ოცნებას“ საბაბების ძებნა დასავლეთთან ურთიერთობების გასაფუჭებლად უკვე აღარ სჭირდება.
ევროკავშირი, შეერთებული შტატები, გაერთიანებული სამეფო ყველაფერს აკეთებდნენ იმისთვის, რომ ურთიერთობები საქართველოსთან კრიზისულ მდგომარეობაში არ შესულიყო. ძალიან დიდხანს – საჭიროზე მეტხანს – ჩვენი პარტნიორები არ იმჩნევდნენ რეალურ უკუსვლას საქართველოს დემოკრატიულ სტანდარტებში, მაშინ როცა საქართველო თავისი შინაარსით, პოლიტიკური სისტემის შინაარსით რუსეთს და ბელარუსს უფრო უახლოვდებოდა, ვიდრე მის მიერ გაცხადებულ მიზანს – ევროკავშირში გაწევრიანებას.
ამიტომაც, მგონია, რომ საბაბების ძებნა „ოცნებისთვის“ მაინცდამაინც არ არის საჭირო. ამ ყველაფერს ეს ხელისუფლება აკეთებს ღიად და გამომწვევად. ეს დაპირისპირება არის თვალნათელი, იმ ფონზე, როდესაც ჩვენ გვასაღებენ რუსეთის მიმართ დათმობებს, კაპიტულაციას, როგორც პრაგმატიზმის გამოხატულებას და ამის პარალელურად, სრულიად ხელოვნურად და ცალმხრივად ხდება კონფრონტაცია დასავლეთთან.
თუმცა „ოცნება“ ამ დრომდე არ ამბობს, რომ ქვეყანა აღარ მიდის ევროპისკენ. ვისმენთ განცხადებებს, რომ ევროპულ ინტეგრაციას ვცდილობთ, მაგრამ ჩვენი პირობები გვაქვს… ევროკომისარმა მარტა კოსმა აღნიშნა საქართველოს შესახებ ევროპარლამენტში გამართული დისკუსიაზე: „საქართველოში ყველაზე მეტად მისი ხალხის შთამაგონებს საკუთარ ევროპულ გზაზე მტკიცედ მდგარი…“
რუსული კანონების შემოღება – გარდა იმისა, რომ რეალურად ისედაც აქტიურად ებრძოდნენ სამოქალაქო საზოგადოებას – იყო პირდაპირი განაცხადი იმისა, რომ ევროკავშირის დემოკრატიული სტანდარტების საწინააღმდეგო მიმართულებით მივდივართ. ახლა, მაგალითად, იგივე პარტიების აკრძალვის შესახებ სარჩელი სხვა არაფერია, თუ არა განაცხადი, რომ ჩვენ ვმოძრაობთ რუსეთის მიმართულებით და ევროკავშირის საწინააღმდეგოდ, იმის მიუხედავად, რომ ეს პარტიები პრაქტიკულად ისედაც აკრძალულია: მათი ხელმძღვანელები უმეტესად ციხეებში სხედან და რეალურად მათი გავლენა პოლიტიკაზე ნულთან ძალიან ახლოს არის.
ივანიშვილის ხელისუფლება არის ინიციატორი ევროკავშირთან დაპირისპირების. ეს იმდენად ნათელია, არ ვიცი, ვინ დაიჯერებს, რომ აი, ივანიშვილის ხელისუფლებას სინამდვილეში უნდოდა ევროკავშირში გაწევრიანება. თუმცა ევროკავშირმა გააკეთა ისე, რომ ეს შეუძლებელი გახდა.
იგივე პარტიების აკრძალვაზე არსებული სარჩელით ხომ არ ცდილობს ივანიშვილი ევაჭროს ევროკავშირს? ვიდრე ივანიშვილმა არ იცის, როგორ შეიძლება დასრულდეს რუსეთ-უკრაინის ომი, შესაძლებელია, ის იტოვებს გარკვეულ საკითხებს ევროკავშირთან მისაბრუნებლად?
არ ვიცი, რის გამოვაჭრება შეუძლია ივანიშვილს. ყველაზე მეტი, რასაც შეიძლება ივანიშვილმა მიაღწიოს, არის ის, რომ ევროკავშირმა საბოლოოდ ჩახსნას საქართველო თავისი დღის წესრიგიდან, როგორც ეს თქვეს, რომ მხოლოდ ქაღალდზეა კანდიდატი ქვეყანა. ამაზე პასუხი იყო აბსოლუტურად ცინიკური და მე ვიტყოდი, აღმაშფოთებელი, რომ ქაღალდზე კანდიდატობა სჯობია ქაღალდზე სახელმწიფოდ ყოფნასო, ანუ თითქოს ევროკავშირში გაწევრიანება სახელმწიფოებრიობას ართმევს ქვეყნებს და არ ამტკიცებს ამ სახელმწიფოებრიობას, არ ზრდის მის კეთილდღეობას, სოციალურ, ეკონომიკურ და სხვა ნებისმიერ სფეროში.
ბრმა უნდა იყო და ცხოვრობდე გამოქვაბულში, რომ არ იცოდე – ევროკავშირის წევრი ქვეყნები არიან მსოფლიოში ყველაზე სტაბილური და მაღალი კეთილდღეობის სახელმწიფოები, რომელთა სუვერენიტეტი არის გარანტირებული ცალკე ევროკავშირის მხრიდან, ცალკე – ნატოს მხრიდან.
როცა დასავლეთს აქვს ინტერესი იგივე შუა დერეფნის მიმართ, არ უშვებთ, რომ შესაძლოა ივანიშვილს აქვს იმედი, რომ ევროპასთან მაინც შეძლებს ურთიერთობის დალაგებას?
მთელი ჩემი დიპლომატიური კარიერა, ჩემი სამუშაო წარმოადგენდა იმის მტკიცებას ჩვენი პარტნიორებისთვის, თუ რამდენად მნიშვნელოვანია საქართველო მათი ინტერესებისთვის და ამის ერთ-ერთი საბუთი იყო საქართველოს უნარი – დააკავშიროს ცენტრალური აზია და ევროპა ერთმანეთს, უფრო ადგილობრივ დონეზე თურქეთი, აზერბაიჯანი და კასპიის რეგიონი, მაგრამ საქართველოს მხოლოდ მაშინ აქვს ამგვარი ფუნქციის შესრულების უნარი და სანდოობა, როგორც ევროპელი, ისე ჩვენი ცენტრალური აზიის მეზობლებისთვის, თუ ის არის სუვერენული და დასავლეთში ინტეგრირებული სახელმწიფო.
როგორც კი საქართველო ხდება – სხვების თვალში უკვე ასეა – რუსეთის გავლენის სფეროში მყოფ სახელმწიფო, მაშინ იკარგება ეს ფასეულობა და უნარი, რომ სანდო პარტნიორად იქნეს განხილული ამ უზარმაზარ სისტემაში. შესაბამისად, წარმოიქმნება ისეთი ალტერნატიული პროექტები, რომლებიც ახლა უკვე აქტიურად განვითარების სტადიაში, მაგალითად, აზერბაიჯანის, სომხეთის და თურქეთის მონაწილეობით.
ივანიშვილი აქცევს რეალობად თავის ძალიან ადრეულ იდეას, რომელიც ჰქონდა ჩამოყალიბებული, რომ საქართველო არის პატარა სოფელი, მას არ უნდა ჰქონდეს საერთაშორისო მნიშვნელობა და ეს არ უნდა იყოს დავის საგანი დასავლეთსა და რუსეთს შორის. საქართველო უკვე არის თვითიზოლაციაში. ინერციით, დიპლომატიურ დონეზე მხოლოდ და არა პოლიტიკურ დონეზე, რაღაც კონტაქტები პერიოდულად არსებობს, მაგრამ ძალიან დაბალ დონეზე.
რეალური თანამშრომლობა და პარტნიორობა, რომელიც ადრე ძალიან აქტიურად ვითარდებოდა საქართველოსთან, აღარ განიხილავენ, არა მარტო ევროკავშირი, არამედ ჩვენი უშუალო მეზობლებთანაც. გასაგებია, რომ აზერბაიჯანს თავისი ინტერესები ყოველთვის ჰქონდა ამ დერეფნის მიმართ, რომელიც სამხრეთზე უნდა გავიდეს და დააკავშიროს ის ნახიჭევანთან და აქედან გამომდინარე თურქეთთან, მაგრამ დღეს ივანიშვილის ხელისუფლების ქცევა იძლევა დამატებით სტიმულს, რომ ამ ქვეყნებმა ეძიონ, მათ შორის, ცენტრალურმა აზიამ, ეძიოს საქართველოს ალტერნატიული მარშრუტი.
შესაბამისად, ეს არის არამხოლოდ პოლიტიკური თვითიზოლაცია, რაც უკვე რეალობაა, არამედ იზოლაცია და დაკარგვა საკუთარი როლი იმ საერთაშორისო სატრანსპორტო პროექტებში, რომელზედაც მუდმივად ხდება ხოლმე აპელირება, რომ აი, ჩვენ ვართ ასეთი მნიშვნელოვანი მოთამაშე თურმე საერთაშორისო ინფრასტრუქტურაში.
სინამდვილეში, მნიშვნელოვანი ვიყავით, პოტენციურად კვლავაც ვართ, მაგრამ ასეთი პოლიტიკა ამ როლს და ამ ფუნქციას საქართველოს სრულად უკარგავს.
რას უნდა ველოდეთ ევროკავშირისგან, რა რესურსი არსებობს, რომ საქართველოში დემოკრატია გადარჩეს? მაგალითად, რა შეიცვლება, თუ ივანიშვილი საფრანგეთის მოქალაქე აღარ იქნება, ან მისი დასანქცირებით?
არ ვიცი, არის თუ არა ან როგორ შეიძლება იყოს საქართველოში დემოკრატიის გადარჩენა ევროკავშირისთვის დიდი პრიორიტეტი. ევროკავშირი აძლევდა საქართველოს შესაძლებლობებს, რომ გამხდარიყო ევროპული ოჯახის სრულფასოვანი, თანასწორუფლებიანი წევრი. თუ საქართველო ამ შესაძლებლობას არ გამოიყენებს, ევროკავშირის ცალკეული ქვეყნების ხელისუფლებები, ვერ აუხსნიან თავიანთ მოქალაქეებს, რატომ უნდა ხარჯონ რაღაც რესურსი რომელიღაც ქვეყანაში დემოკრატიის დასახმარებლად?
ისინი ეხმარებოდნენ საქართველოს მრავალი ათწლეულის განმავლობაში და მილიარდობით ევროს ხარჯავდნენ ჩვენ დასახმარებლად. ეს ხდებოდა იმიტომ, რომ ქართველი ხალხი ცდილობდა დემოკრატიის გამყარებას და ევროკავშირში ინტეგრაციას. ქვეყანა, რომელიც ამ ყველაფერზე უარს ამბობს – გარედან ეს ასე გამოიყურება, არავინ დაიწყებს ამ ქვეყნის ძალით შეყვანას ევროკავშირში. უამრავი საკითხი აქვთ მოსაგვარებელი ამ ქვეყნებს.
ამიტომაც, ჩვენ არ უნდა ვიყოთ იმ იმედით, რომ ევროკავშირში სანქციებით, ან რაღაც სხვა ზომებით შეეცდებიან დემოკრატიის გადარჩენას. ჩვენი ქვეყნის ბედი ჩვენ უნდა გადავწყვიტოთ. ვიცით, რომ არის უზარმაზარი აპათია საზოგადოებაში, ერთ-ერთი მიზეზი არის ის მდგომარეობა, რაც არსებობს ოპოზიციურ ფლანგზე, სრულიად დასუსტებულზე, მათ შორის, ურთიერთბრძოლით. მე არ ვარ პოლიტიკის ექსპერტი და ვერ გეტყვით, რა შეიძლება გაკეთდეს. მე ვიცი, რომ ის, რაც კეთდება, უკეთეს შემთხვევაში, არაა საკმარისი იმისთვის, რომ საზოგადოებამ, ხალხმა დაინახოს მოქმედი რეჟიმის დამაჯერებელი ალტერნატივა.
როცა „ოცნება“ აცხადებს, რომ ეუთოს თავმჯდომარე ქვეყანა უნდა რომ გახდეს, პაპუაშვილმა იკითხა: „რა თანხებით“ და „ვისი დაფინანსებით“ მონაწილეობდნენ ვარშავაში მიმდინარე ეუთოს კონფერენციაში „საფარის“ ხელმძღვანელი ბაია პატარაია და საიას ხელმძღვანელი თამარ ონიანი? ამ განცხადებას გამოეხმაურე ეუთოს თავმჯდომარე ქვეყნის, შვეიცარიის წარმომადგენელი. ანტიდასავლური განცხადებებით განსაკუთრებით შალვა პაპუაშვილი გამოირჩევა ივანიშვილის დაჯგუფებაში. ეს რაზე მიუთითებს?
პაპუაშვილზე შემიძლია ერთი რამ გითხრათ: ის ალბათ ყველაზე გამოკვეთილი ფიგურაა ანტიდასავლური გამოხტომებით. მე არ მახსენდება და თუ ვცდები, მადლობელი ვიქნები, ვინმე თუ შემახსენებს, შალვა პაპუაშვილის ერთ ანტირუსულ განცხადებას, რომელიც მიმართულია რუსეთის მიერ საქართველოს ტერიტორიის ოკუპაციასთან დაკავშირებით, ან რუსეთის ოკუპაციის შედეგად იქიდან გამოყრილი ჩვენი თანამოქალაქეების უფლებების დასაცავად.
სულ ბოლოს ირანის ელჩის ექსცენტრული და თავხედურ ქცევაზეც არ მახსოვს შალვა პაპუაშვილის რაიმე რეაქცია. მისი რისხვა ექსკლუზიურად არის მიმართული იმ ევროპელი პოლიტიკოსების მიმართ, რომლებიც ამდენი წლის განმავლობაში აქტიურად ზრუნავდნენ საქართველოს დემოკრატიულ განვითარებაზე, მის ინტეგრაციაზე ევროპულ სტრუქტურებში. ეს სრულიად აშკარაა. ფაქტია, რომ პაპუაშვილს აქვს ცენტრფორვარდის ფუნქცია მინიჭებული დასავლეთის მიმართ შეურაცხყოფების და თავდასხმების ფრონტზე.
თავის დროზე, „ქართულმა ოცნებამ“ საკუთარი რიგებიდან გამოყო ჯერ ფრაქცია, რომელიც მერე ცალკე პარტიად ჩამოყალიბდა იმ მიზნით, რომ მათი პირით ელაპარაკა „ოცნებას“ დასავლეთთან აგრესიულად. დღეს ყველა ფსევდო დამოუკიდებელმა პარტიამ დაკარგა თავისი ფუნქცია – „ქართული ოცნების“ ოფიციალური ხელმძღვანელობა ყველაზე რადიკალურ, კონფრონტაციულ პოლიტიკას ატარებს და რიტორიკას იყენებს დასავლეთის საწინააღმდეგოდ.
ეს იგივე ხალხია, რომელიც გვიმტკიცებს, რომ რუსეთის მიმართ დათმობა არის პრაგმატიზმი და ომიდან თავის არიდების საშუალება.
მაგრამ მოსახლეობის უმრავლესობა ამბობს, რომ ირჩევს ევროპას. ამ საკითხს როგორ უყურებს ივანიშვილი, თქვენი აზრით?
ისე აქტიურად მუშაობენ საშინაო პროპაგანდისტულ ფრონტზე, რომ ალბათ თვლიან, რომ გარკვეულ წარმატებას უკვე მიაღწიეს. მაგალითად, აღმოჩნდა, რომ მარტო ტროლები არ მუშაობენ ანტიდასავლური კამპანიისთვის. იგივე ირანის ელჩის პოსტზე ცოცხალი ადამიანები წერდნენ: კარგია, თუ გადავხედავთ ქეთევან წამებულის, წმინდა დედოფლის ამბის ისტორიას და აღმოვაჩინოთ, რომ ირანი კი არ არის ამაში დამნაშავე, არამედ ვიღაც სხვა.
ცოტა ხნის წინ გვითხრეს, რომ რუსეთმა კი არ უღალატა ერეკლე მეორეს, არამედ თურმე გერმანელებმა უღალატეს…
არ ვიცი, რეალურად რამდენია ასეთი ადამიანი, ვინც ამგვარ პროპაგანდას იჯერებს. ნუ, ვიღაცები აშკარად არიან და ალბათ გათვლა იმაზეა, რომ მათ რიცხვი იმდენად დიდია უკვე, რომ ის, რასაც აქამდე აკეთებდნენ შეფარვით, შეუძლიათ ახლა გააკეთონ ღიად და პირდაპირ თქვან, რომ ჩვენ არასდროს არ გვინდოდა ევროკავშირში, როგორც სინამდვილეშია და ეს იყო ტაქტიკური მოსაზრებებით გაკეთებული.
იტყვიან, რომ ახლა ჩვენ ვართ გათავისუფლებული ევროკავშირის დიქტატისგან და ჩვენი სუვერენიტეტი და დამოუკიდებლობა გამოიხატება რუსეთის მიმართ დანებებასა და კაპიტულაციაში.
ერთი პრობლემა აქვთ: თაობა, რომლებსაც გვახსოვს, რას ნიშნავს რუსეთისადმი დანებება, ჯერ კიდევ არც ისე ხანდაზმულები ვართ, რომ სკლეროზი გვქონდეს. გვახსოვს ისიც, რაც შევარდნაძემ 90-იან წლებში სცადა: ზუსტად რუსეთის მიმართ კაპიტულაცია, დსთ-ში შეიყვანა საქართველო, რუსული სამხედრო ბაზები დააკანონა, რამაც რუსულ საოკუპაციო ძალებს აფხაზეთსა და ცხინვალის რეგიონში მისცა მშვიდობისმყოფელის სტატუსი და სამაგიეროდ მიიღო ტერაქტი 1995 წელს.
შევარდნაძისთვისაც კი, ნათელი გახდა, რომ თურმე არ მუშაობს და მიზანს არ აღწევს რუსეთის მიმართ ყველაფრის დათმობა და, პირველ რიგში, თავისუფლების.
აინშტაინს აქვს ნათქვამი, რომ იმავეს მცდელობა სხვა შედეგის მოლოდინით არის გონებრივი აშლილობის გამოვლინება.
დღეს, 9 ოქტომბერს, რადიო „თავისუფლებამ“ გამოაქვეყნა აუდიოჩანაწერი, რომელიც, გამოცემის ცნობით, ჩაწერილია 2024 წელს და რომელშიც ისმინება, როგორ სთხოვს ეროვნული ბანკის საბჭოს წევრი, ნანა ყენიშვილი კომპანია „ბიტექსჩეინჯის“ წარმომადგენელს, დავით ორჯონიკიძეს ბიზნესის წილს. „ 51 პროცენტი რომ თქვენა გქონდეთ და 49% რომ ჩვენა გვქონდეს? ხომ მაქვს 300 მილიონი [ბრუნვა], ძალიან კარგად მილიარდიცა მქონდეს ბრუნვა. ანუ, მარტივი არი, ჩვენთვის არი მარტივი იმიტომ, რომ უკვე ვიცით“, – ისმის ჩანაწერში.
„რადიო თავისუფლების“ ცნობით, ფარული ჩანაწერი სუსთან შეთანხმებით 2024 წელსაა გაკეთებული, ბიტექსჩეინჯმა“ ჩანაწერი სუსს გადასცა, რასაც სამართლებრივი შედეგი არ მოჰყოლია. კომპანიაში კი ეროვნული ბანკი შემოწმებაზე შევიდა და პირიქით – „ბიტექსჩეინჯი“ ნახევარი მილიარდი ლარით დააჯარიმა.
ასევე, რადიო „თავისუფლება“ წერს, რომ მოიპოვა დოკუმენტები, რომელთა მიხედვით, ყეინიშვილის შესაძლო კანონდარღვევების შესახებ ინფორმაცია, სულ მცირე, რამდენიმე თვეა იციან ეროვნულმა ბანკმა და სახელმწიფო უსაფრთხოების სამსახურმა.
„ამ უწყებებს რადიო თავისუფლებამ შეკითხვები 6 ოქტომბერს გაუგზავნა. შეკითხვების გაგზავნიდან 3 დღის შემდეგ პასუხები არ მიგვიღია“, – წერს „თავისუფლება“.
დღეს, 9 ოქტომბერს კი საქართველოს გენერალურმა პროკურატურამ განაცხადა, რომ ეროვნული ბანკის საბჭოს წევრის, ნანა ყეინიშვილის მიმართ სისხლის სამართლის კოდექსის 337-ე მუხლით გამოძიება დაიწყო, რაც მოხელის ან მასთან გათანაბრებული პირის სამეწარმეო საქმიანობაში უკანონო მონაწილეობას გულისხმობს.
„თავისუფლების“ მიერ გამოქვეყნებულ მოკლე ხმოვან ჩანაწერში ისმის დიალოგი, რომელიც, გამოცემისვე ცნობით, ნანა ყენიშვილსა და კომპანიის წარმომადგენელს, დავით ორჯონიკიძეს შორის შედგა:
ნანა ყენიშვილი: ჩვენსაში შემოვიდეს თქვენი 50 პროცენტით თქვენი კომპანია…
დავით ორჯონიკიძე: დიახ…
ნანა ყენიშვილი: ვითო წილი იყიდა ჩვენს კომპანიაში. 51 პროცენტი რომ თქვენა გქონდეთ და 49% რომ ჩვენა გვქონდეს? ხომ მაქვს 300 მილიონი [ბრუნვა], ძალიან კარგად მილიარდიცა მქონდეს ბრუნვა. ანუ, მარტივი არი, ჩვენთვის არი მარტივი იმიტომ, რომ უკვე ვიცით.
დავით ორჯონიკიძე: დიახ.
ნანა ყენიშვილი: შენ უბრალოდ არ იცი პსპ-ეს რა კაი შემოსავალი აქვს…
დავით ორჯონიკიძე: ეგ თქვენს პსპ-ს აქვს კარგი შემოსავალი და ყველას არა აქვს…
ნანა ყენიშვილი: არა. ნებისმიერს აქვს, თუ ააწყობ. მე ძალიან კარგად ვიცი მოძრაობის წესები. ძალიან კარგად ვიცი, წითელზე როდის უნდა გავჩერდე, მწვანეზე როდის უნდა გავიარო…
დავით ორჯონიკიძე: გაქვთ კიდევ ურთიერთობა ბატონ ბიძინასთან?
ნანა ყენიშვილი: აბა! ჩემთვის ძალიან საპატივცემულო ადამიანია.
დავით ორჯონიკიძე: ჩვენთვისაც, ნამდვილად.
ნანა ყენიშვილი: ახლა ვის რა აზრი აქვს არ ვიცი, მაგრამ მაგას არასდროს არ შევეხები.
„რადიო თავისუფლება“ დღეს, 9 ოქტომბერს, ჟურნალისტური გამოძიების გამოქვეყნებას აანონსებს ამ თემაზე.
ამავე დროს, პროკურატურის განცხადების შემდეგ განცხადება გაავრცელა ეროვნულმა ბანკმაც. ბანკის განცხადებით, „გამოძიების მიმდინარეობის პერიოდში, ვიდრე საკითხის გარშემო არ დადგება სრული სიცხადე, ეროვნული ბანკის საბჭო უახლოეს სხდომაზე განიხილავს ნანა ყეინიშვილის დროებით აცილების საკითხს ეროვნული ბანკის საბჭოს სხდომებიდან“.
ნანა ყეინიშვილი ეროვნული ბანკის საბჭოს წევრად პარლამენტმა 2023 წლის 21 სექტემბერს დანიშნა. ყეინიშვილამდე საკანონმდებლო ორგანომ იმავე თანამდებობაზე გიორგი ბაქრაძისა და დიმიტრი ჯაფარიძის კანდიდატურები დაიწუნა.
თბილისის საქალაქო სასამართლომ წვევამდელების მიერ სამხედრო სამსახურისთვის თავის არიდებაში, დოკუმენტების გაყალბების და გამოყენებაში დახმარების, წინასწარი შეთანხმებით ჯგუფის მიერ ჩადენილი თაღლითობის, რამაც მნიშვნელოვანი ზიანი გამოიწვია და საბრძოლო მასალის უკანონო შეძენა, შენახვის ფაქტებზე ერთი პირი დამნაშავედ ცნო.
პროკურატურის ინფორმაციით, სასამართლო პროცესზე მტკიცებულებებით დადასტურდა, რომ 2024 – 2026 წლებში, ბრალდებული წინასწარი შეთანხმებით ჯგუფთან ერთად, წვევამდელებს და მათი ოჯახის წევრებს სავალდებულო სამხედრო სამსახურისთვის თავის არიდებაში დახმარებას ჰპირდებოდა, რის სანაცვლოდაც მათგან მოტყუებით მიიღო ჯამში 24 200 ლარი.
„სასამართლოში გამოკვლეული მტკიცებულებებით ასევე დადგინდა, რომ 2024-2026 წლებში ბრალდებული თანამზრახველებთან ერთად ყალბი სამედიცინო ისტორიის შექმნით დოკუმენტებს აყალბებდა. შედეგად, ავადმყოფობის სიმულაციის და ყალბი სამედიცინო დოკუმენტაციის წარდგენით, სსიპ „გ. აბრამიშვილის სახელობის თავდაცვის სამინისტროს სამხედრო ჰოსპიტალის“ მუდმივმოქმედ სამედიცინო საექსპერტო კომისია წვევამდელს სამხედრო სავალდებულო სამსახურიდან ათავისუფლებდა.
ასევე, ბრალდებულმა უკანონოდ შეიძინა საბრძოლო მასალა, რასაც მის საცხოვრებელ სახლში უკანონოდ ინახავდა“ – წერს პროკურატურა.
სასამართლომ ბრალდებული დამნაშავედ ცნო საქართველოს სისხლის სამართლის კოდექსის 180-ე მუხლის მე-2 ნაწილის “ბ” ქვეპუნქტით (თაღლითობა, რამაც მნიშვნელოვანი ზიანი გამოიწვია – 6 ეპიზოდი), 180-ე მუხლის მე-2 ნაწილის “ა” და “ბ” ქვეპუნქტით (თაღლითობა, რამაც მნიშვნელოვანი ზიანი გამოიწვია ჩადენილი წინასწარი შეთანხმებით ჯგუფის მიერ), 19.180-ე მუხლის მე-2 ნაწილის “ა” და “ბ” ქვეპუნქტით (თაღლითობის მცდელობა, რამაც მნიშვნელოვანი ზიანი გამოიწვია ჩადენილი წინასწარი შეთანხმებით ჯგუფის მიერ), 19.180-ე მუხლის მე-2 ნაწილის “ბ” ქვეპუნქტით (თაღლითობის მცდელობა, რამაც მნიშვნელოვანი ზიანი გამოიწვია), 25.356-ე მუხლის 1-ლი ნაწილით (ყალბი დოკუმენტის გამოყენებით, წვევამდელის მიერ სამხედრო სამსახურისთვის თავის არიდებაში დახმარება), 25.362-ე მუხლის 1-ლი ნაწილით (ყალბი დოკუმენტის დამზადებაში და გამოყენებაში დახმარება), 236-ე მუხლის მე-3 ნაწილით (საბრძოლო მასალის უკანონო შეძენა და შენახვა) და სასჯელის ზომად 4 წლით თავისუფლების აღკვეთა განუსაზღვრა.
გარემოსდაცვითი ზედამხედველობის დეპარტამენტის ცნობით, 2026 წლის 1 სექტემბრიდან 30 სექტემბრის ჩათვლით პერიოდში, ოთხ ქალაქში, ავტოსატრანსპორტო საშუალებების გამონაბოლქვის დადგენილ ნორმასთან შეუსაბამობის 751 ფაქტი გამოავლინეს.
430 სამართალდარღვევა გამოვლენილია თბილისში, 173 – ქუთაისში, 87 – ბათუმში, 61 კი – რუსთავში.
დეპარტამენტის ცნობით, 649 სამართალდარღვევა ფიზიკური პირის მიერაა ჩადენილი, 102 შემთხვევაში კი დააჯარიმეს იურიდიული პირები.
„425 სამართალდარღვევა მსუბუქი ავტომობილების, 306 – მიკროავტობუსების, 18 სატვირთო ავტომობილის, 2 კი ავტობუსის მძღოლების/მფლობელების მიერაა ჩადენილი“ – წერს უწყება.
ჯამში, 2026 წელს, პირველ ცხრა თვეში, გამოვლენილია ავტოტრანსპორტის გამონაბოლქვის დადგენილ ნორმებთან შეუსაბამობის 6856 ფაქტი.
სატრანსპორტო საშუალების გამონაბოლქვში მავნე ნივთიერებათა შემადგენლობის დადგენილი ნორმის გადამეტებისთვის ჯარიმა ფიზიკური პირის შემთხვევაში პირველ ჯერზე 100 ლარია, მეორე ჯერზე – 300 ლარი, მესამე ჯერზე კი – 600 ლარი. იურიდიული პირის შემთხვევაში კი ჯარიმა 500, 1500 და 3000 ლარია.
თიბისი FoxPrep.ai-ის გენერალური პარტნიორი გახდა. ხელოვნურ ინტელექტზე დაფუძნებული პლატფორმა აბიტურიენტებს ერთიანი ეროვნული გამოცდებისთვის მომზადების პროცესს უმარტივებს და თითოეულ მოსწავლეს საკუთარ მიზანზე მორგებულ სასწავლო გეგმას სთავაზობს. FoxPrep.ai ცალკე მიმართულებით სამაგისტრო გამოცდებისთვის მომზადებასაც მოიცავს.
პლატფორმაზე მოსწავლე ირჩევს სასურველ უნივერსიტეტს, პროგრამასა და საჭირო ქულას. შემდეგ FoxPrep.ai მის მიმდინარე ცოდნას აფასებს, საპროგნოზო ქულას ითვლის და აჩვენებს, რომელ თემებზე უნდა იმუშაოს შედეგის გასაუმჯობესებლად.
სასწავლო პროცესი სრულად პერსონალიზებულია. მოსწავლე მიმდინარე დონიდან სასურველ შედეგამდე მისასვლელ, თემების მიხედვით გაწერილ გეგმას იღებს. სავარჯიშოები ეროვნული გამოცდებისთვის საჭირო მასალას ეფუძნება და კითხვების სხვადასხვა ფორმატს მოიცავს. პლატფორმაზე ასევე ხელმისაწვდომია ხელსაწყოები, რომლებიც აბიტურიენტს ეხმარება, გაიგოს, სად შეიძლება მოხვდეს მიღებული ქულით.
ამასთან, თიბისიმ განსაკუთრებული შეთავაზება მოუმზადა მათ, ვინც FoxPrep.ai-ს წლიური პაკეტის შეძენას გადაწყვეტს – მოსწავლის ბარათით შეძენის შემთხვევაში, 40%-იანი მომენტალური ქეშბექი გექნებათ.
ახალი თაობისა და განათლების მხარდაჭერა თიბისის გრძელვადიანი ხედვის ნაწილია. განსაკუთრებით მნიშვნელოვანია აბიტურიენტების მხარდაჭერა, რადგან უნივერსიტეტისთვის მომზადება ახალგაზრდების ცხოვრებაში ერთ-ერთი ყველაზე მნიშვნელოვანი ეტაპია.
თიბისი, როგორც ინოვაციებზე ორიენტირებული კომპანია, ტექნოლოგიურ შესაძლებლობებს ადამიანებისთვის ყოველდღიური პროცესების გასამარტივებლად და ახალი შესაძლებლობების შესაქმნელად იყენებს. FoxPrep.ai კი, სწორედ ასეთი პროდუქტია – ხელოვნური ინტელექტის დახმარებით ის სწავლას უფრო პერსონალურს ხდის და აბიტურიენტებს საკუთარი მიზნისკენ ნაბიჯ-ნაბიჯ სვლაში ეხმარება.
„საერთაშორისო გამჭვირვალობა-საქართველოს“ შეფასებით, კომუნიკაციების კომისია ცენზორის როლის შესრულებას განაგრძობს.
„1 ოქტომბერს გამართულ სხდომაზე კომისიამ კრიტიკული ტელევიზია „ფორმულა“ „ქართული ოცნებისთვის“ მიუღებელი სიტყვებისა და ფრაზების გამოყენებისთვის უკვე მესამედ – ამჯერად 10 000 ლარით დააჯარიმა.
საერთო ჯამში, ბოლო 6 თვეში, კომისიამ კრიტიკულ ტელევიზიებს – „ტელეკომპანია პირველსა“ და „ფორმულას“ ამ მიზეზით მოხსენებითი ბარათები უკვე 7-ჯერ (4-ჯერ „ფორმულას“, 3-ჯერ „ტელეკომპანია პირველს“) შეუდგინა და მათ საფუძველზე, ისინი პირველად ჯერ სიტყვიერად გააფრთხილა, შემდეგ – თითოეული ჯერ 2500 ლარით, მომდევნო ჯერზე კი – 5000 ლარით დააჯარიმა (დეტალებისთვის მიჰყევით ბმულს).
უკვე 1 ოქტომბერს კი – ფორმულა დამატებით 10 000 ლარით დააჯარიმა. დიდი ალბათობით, კომისია მავნე პრაქტიკას კვლავაც გააგრძელებს და უახლოეს მომავალში, იმავე მიზეზით ახლა უკვე „ტელეკომპანია პირველსაც“ დააჯარიმებს, რადგანაც, როგორც წესი, კომისია ერთ შეკრულ წრეზე მოძრაობს და მაუწყებლებს რიგრიგობით აჯარიმებს“ – წერს „გამჭვირვალობა-საქართველო“.
ორგანიზაციის შეფასებით, აშკარაა, რომ კომუნიკაციების კომისია ამ გზით, ისედაც მძიმე ფინანსურ პირობებში მყოფი ტელევიზიების პარალიზებას ცდილობს.
„კომისიას მათთვის მაუწყებლობის ლიცენზიის შეჩერების უფლებამოსილებაც აქვს, რაც განსაკუთრებით საგანგაშოა.
მართალია, კომისიამ პარალელურად მონიტორინგის რეჟიმში პროსამთავრობო არხებიც – „იმედი“, „პოსტვ“, „რუსთავი 2“ – მოაქცია, თუმცა პროცესებზე დაკვირვება ტოვებს განცდას, რომ აღნიშნულს მხოლოდ ფორმალური ხასიათი აქვს და დაინტერესებული მხარეებისთვის ობიექტური დამკვირვებლისა და არბიტრის როლის ჩვენებას ემსახურება.
იმთავითვე ნათელი იყო, რომ კომისიის მიზანი მხოლოდ კრიტიკული მედიების დასჯა და ფინანსური ჯარიმების გზით მათი დასუსტება ან/და დახურვა იყო“- წერს გამჭვირვალობა-საქართველო.
ორგანიზაციის შეფასებით, კომუნიკაციების კომისია კრიტიკულ მაუწყებლებს შინაარსობრივი მონიტორინგის დაწყებით მას შემდეგ დაემუქრა, რაც 2026 წლის 24 თებერვალს, დიდმა ბრიტანეთმა პროსამთავრობო პროპაგანდისტული ტელევიზიები – „იმედი“ და „პოსტ ტვ“ უკრაინაში რუსეთის მიერ დაწყებული ომის შესახებ განზრახ მცდარი ინფორმაციის გავრცელებისა და რუსული დეზინფორმაციის მხარდაჭერისთვის დაასანქცირა.
„საერთაშორისო გამჭვირვალობა-საქართველოს“ შეფასებით, კომუნიკაციების კომისია მაუწყებლებს, როგორც წესი, მიუკერძოებლობის პრინციპის დარღვევას, ასევე ამბების პირადი დამოკიდებულებისა და მოსაზრების საფუძველზე გაშუქებას ედავება.
კომისიის მიერ კრიტიკული ტელევიზიებისთვის აკრძალულ სიტყვებსა და ფრაზებს შორისაა: „რეჟიმი“, „სინდისის პატიმრები“, „ოლიგარქი“, „ცრუ მოწმე პოლიციელები“, „პოლიტიკური პატიმრები“, „პოლიტიკური ტყვეები“, „რეპრესიული პოლიტიკა“, „ივანიშვილის პრემიერი“, „ე.წ. განათლების რეფორმა“, „ქართული ოცნების პოლიცია“, „უკანონო პატიმრობა“, „სქროლვა-სქრინვის სამმართველო“, „ოცნების ხელისუფლება“, „რეპრესიული კანონები“, „რეჟიმის სასამართლო“, „ივანიშვილის პრეზიდენტი“, „ოცნების სუსი“, „სასამართლო კლანი“ და ა.შ.
გარდა კონკრეტული სიტყვებისა და ფრაზების აკრძალვისა, კომუნიკაციების კომისია კრიტიკულ მაუწყებლებს ამბების მშრალად, შეფასებისა და ანალიზისგან სრულად დაცლილად გაშუქებას სთხოვს. მაგალითად, მოხსენებითი ბარათების მიხედვით, კომისია დაუშვებლად მიიჩნევს ჟურნალისტებისა და წამყვანების შემდეგ ტექსტებსაც:
„სიტყვის თავისუფლების შეზღუდვის ახალი ეტაპი და კანონის ჩანაცვლება ქუჩის წესრიგით. ქართული ოცნება ეგრეთწოდებული მორალის პოლიციის ჩამოყალიბებას იწყებს. არაფორმალურ დანაყოფს MMA-ის მებრძოლი გიორგი ქართველიშვილი უხელმძღვანელებს. ჩეჩნური ტიპის რაზმი მყისიერი რეაგირებით ემუქრება ყველას, ვინც მათი შეფასებით სიწმინდეებს, რელიგიას წინაპრებს და ისტორიას შეურაცხყოფს“.
„არაფორმალური დანაყოფის ხელმძღვანელმა პრაქტიკულად ძალადობა კამერების წინ დააანონსა.
ხელისუფლების მიერ მხარდაჭერილი ჯგუფის სიწმინდეების რელიგიის და ისტორიის შეურაცხყოფაზე მყისიერ რეაგირებას გეგმავს. ეს იდეა კი თურმე ნოდარ დუმბაძის შეურაცხყოფის შემდეგ გაუჩნდა. რეალურად ოცნებამ ჩეჩნური მოდელი დააკოპირა, სადაც სპორტსმენებს ოფიციალურ მანდატს ანიჭებენ და ძალადობის ნებას რთავენ. მმართველი გუნდი და მისი მხარდაჭერილი ძალები თავად გადაწყვეტენ, ვინ, რა ფორმით დასაჯონ და როგორ ჩაახშონ კრიტიკული ხმა“.
„პოლიციამ აქტივისტებზე ნადირობა გვიან ღამით დაიწყო. ჯერ დააკავეს თორნიკე თოშხუა. კაცი, რომელმაც ციხე რამდენიმე კვირის წინ დატოვა, ქუჩის გამოკითხვას ატარებდა, თუმცა, პოლიციას ნერვებმა უმტყუნა და რამდენიმე წამში დააკავეს, რამაც დიდი სოლიდარობა გამოიწვია და რამდენიმე წუთში საკრებულოსთან ათობით ახალგაზრდა გაჩნდა“.
„ოცნებას ვაშინგტონშიც პრორუსი პოლიტიკოსი ეიმედება. პროპაგანდა ტრამპის ადმინისტრაციასთან ურთიერთობის აღდგენად ასაღებს ოლიგარქის დეპუტატების ვაშინგტონში ვიზიტს. რეალურად კი მათი მასპინძელი კონსპიროლოგი უკრაინის წინააღმდეგ მოქმედი პოლიტიკოსია, კრემლთან მჭიდრო კავშირებით“.
„ივანიშვილის ხელისუფლება ქვეყანას ევროკავშირში გაწევრიანების გზას უხშობს და დეზინფორმაციას კიდევ უფრო აძლიერებს, რომ საკუთარი დანაშაული ისევ ევროპას გადააბრალოს. ქართული ოცნების წარმომადგენლები ცდილობენ წარმოაჩინონ, რომ ეს შედეგი ევროპის ორმაგი მიდგომების გამო დადგა და არა მათი პოლიტიკის გამო, რაც ცხადად ფასდება, როგორც დემოკრატიისგან და ევროპული ღირებულებებისგან გადახვევა. ამ დეზინფორმაციისთვის რეჟიმს ძალისხმევის გაძლიერება კიდევ უფრო სჭირდება იმ ფონზე, როცა უკრაინისა და მოლდოვისთვის ევროკავშირში გაწევრიანების მოლაპარაკებები უკვე რეალურად იხსნება… “.
„… ამ შეძახილებსაც კი ირანის პარლამენტში ირაკლი კობახიძე უპრობლემოდ ისმენდა და ტერორისტების გვერდითაც იდგა“ და სხვა.
კომუნიკაციების კომისია მიიჩნევს, რომ ჟურნალისტების მხრიდან ამ სიტყვებისა და ფრაზების გამოყენება „ორგანოების/ინსტიტუციების საქმიანობის მიმართ მაუწყებლის მოსაზრებისა და პირადი დამოკიდებულების გამოხატვას წარმოადგენს. ამდენად, სახეზეა, მაუწყებლის პირადი დამოკიდებულების ან მოსაზრების საფუძველზე საჯარო პოლიტიკის მიმდინარე საკითხების გაშუქება, რითაც ადგილი აქვს „მაუწყებლობის შესახებ“ საქართველოს კანონის 54-ე მუხლის მე-5 პუნქტის დარღვევას“.
„საერთაშორისო გამჭვირვალობა-საქართველო“ ხაზგასმით აღნიშნავს, რომ საგანგაშოა კომუნიკაციების კომისიის ხელში მაუწყებლების შინაარსობრივი რეგულირების ბერკეტის არსებობა და აღნიშნულის საფუძველზე, მათთვის ფინანსური სანქციების დაწესებისა და ლიცენზიის შეჩერების უფლების მინიჭება.
„მით უფრო, როდესაც საქართველოში მყარად დამკვიდრებული და აშკარად გამოკვეთილი სახელმწიფოს მიტაცების ფონზე, წლებია, კომისია „ქართული ოცნებისადმი“ ლოიალური და მასთან დაკავშირებული კომისიონერებით არის დაკომპლექტებული (კომუნიკაციების კომისიის წევრების შესახებ დეტალებისთვის მიჰყევით ბმულს) და მის მიერ მიღებულ გადაწყვეტილებებთან დაკავშირებით არაერთი კითხვის ნიშანი არსებობს მმართველი გუნდის ინტერესების გატარებისა და მიკერძოების თვალსაზრისით.
კომუნიკაციების კომისია არ უნდა ოპერირებდეს ცენზორის პოზიციიდან და ის არ უნდა იყოს გამოყენებული კრიტიკული მაუწყებლების დასჯის მექანიზმად. ხოლო საერთაშორისო პრაქტიკის გათვალისწინებით, სადავო საკითხები თვითრეგულირების მექანიზმების ფარგლებში უნდა იხილებოდეს.
სწორედ ამ უკანასკნელის წახალისება და ხელშეწყობა უნდა იყოს კომუნიკაციების კომისიის მთავარი მიზანიც და არა „ქართული ოცნების“ ინტერესების სამსახურში ჩადგომა და მაუწყებლების დასჯა მმართველი პარტიის წარმომადგენლების კრიტიკისა და მხილებისთვის“ – წერს ორგანიზაცია.
გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის ინფორმაციით, 9 ოქტომბრის 21 საათიდან 10 ოქტომბრის 21 საათამდე აჭარაში მოსალოდნელია ცვალებადი მოღრუბლულობა, უნალექოდ.
იქროლებს ცვალებადი მიმართულების ქარი 10-15 მეტრი წამში.
ჰაერის ტემპერატურა სანაპირო ზოლსა და მთიან მუნიციპალიტეტებში:
შს სამინისტრო ბებიის დაკავების შესახებ ინფორმაციას ავრცელებს. უწყების თანახმად, ბებია მოზარდ გოგოს თანასოფლელ კაცზე გათხოვებას აიძულებდა.
„შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს თანამშრომლებმა, ოჯახის არასრულწლოვანი წევრის ქორწინების იძულების ბრალდებით, ერთი პირი დააკავეს.
გამოძიებით დადგინდა, რომ ბრალდებულმა მისი არასრულწლოვანი შვილიშვილი გენდერული დისკრიმინაციის ნიშნით, შეუწყნარებლობის მოტივით, მისი ნების საწინააღმდეგოდ, აიძულა ცოლად გაჰყოლოდა თანასოფლელ მამაკაცს.
სამართალდამცველებმა ჩატარებული საგამოძიებო მოქმედებების შედეგად დამნაშავე ქალი ბრალდებულის სახით დააკავეს.
გამოძიება სისხლის სამართლის კოდექსის 11 პრიმა 150-ე პრიმა მუხლით მიმდინარეობს, რაც 4 წლამდე ვადით თავისუფლების აღკვეთას ითვალისწინებს“, – წერია შს სამინისტროს მიერ გავრცელებულ განცხადებაში.
ბებიის დაკავებაზე ანალოგიური ბრალდებით და უცვლელი ტექსტით შს სამინისტრო ინფორმაცია 28 სექტემბერსაც გაავრცელა.
