Batumelebi

მზია ამაღლობელი რუსთავის ქალთა კოლონიაში 23-ე დღეა შიმშილობს უსამართლობაზე პროტესტის ნიშნად.

ადვოკატმა მაია მწარიაშვილმა, რომელიც მზია ამაღლობლის ინტერესების ერთ-ერთი დამცველია, ტელეკომპანია „პირველზე“  განმარტა ის გარემოებები, თუ რატომ არ უნდა განიხილებოდეს მზია ამაღლობლის საქმე სისხლის სამართლის მუხლით და რატომ არ უნდა იძიებდეს ამ საქმეს აჭარის პროკურატურა.

„მზია არის უკანონო პატიმარი, არა მხოლოდ იმიტომ, რომ პატიმრობა არის ბარბაროსულად დაუსაბუთებელი, არამედ იმიტომ, რომ აქ დანაშაულის შემადგენლობა საერთოდ არ არის.

ორი კადრი არსებობს სულ მზიასთან დაკავშირებით, – სტიკერის გაკვრა და მეორე და ორივე კადრი დაცვის პოზიციას ამყარებს და არა პირიქით.

პირველ კადრზე რაც ხდება, ეს არის უკანონო დაკავება და ჩვენ ამ დღეებში ვიშუამდგომლებთ პროკურატურასთან ბესელიას [აჭარის პოლიციის უფროსი, რომელმაც სტიკერის გაკვრის გამო დააკავა მზია ამაღლობელი] პასუხისმგებლობაზე იმსჯელოს გენერალურმა პროკურორმა.

რატომ არის უკანონო პირველი დაკავება? ყველა ხედავს კადრში, რომ მზიამ გააკრა სტიკერი. კობახიძემ თვითონ დაადასტურა თავის ოფიციალურ განცხადებაში, რომ სტიკერის გაკვრის გამო დააკავეს, თუმცა მან დაამახინჯა ფაქტი და თქვა, რომ სტიკერი მიაკრა პოლიციელსო, რაც ტყუილია, თუმცა რა მნიშვნელობა აქვს. ბოლო საკანონმდებლო ცვლილებითაც კი არ იკრძალება სტიკერის გაკვრა,“ – ამბობს მაია მწარიაშვილი.

ადვოკატის თქმით, ბოლო საკანონმდებლო ცვლილება კრძალავს ნახატის შესრულებას კედელზე, იერ-სახის დამახინჯებას და არა სტიკერის გაკვრას.

„ამიტომ ეს არ არის სამართალდარღვევა [სტიკერის გაკვრა კედელზე]. ამიტომ იყო მზიას პირველი დაკავება უკანონო,“ – განმარტავს მაია მწარიაშვილი.

„იმ შემთხვევაშიც კი, რომ მზიას კედელზე დაეხატა და ჩაედინა ეს სამართალდარღვევა, ესეც კი არ არის პოლიციის ქვემდებარე, პოლიციას არ შეეძლო ამაზე რეაგირება, რადგან ეს არის მერიის სამსახურების ქვემდებარე და ის სანქციის სახით მხოლოდ ჯარიმას ითვალისწინებს. ვინაიდან ითვალისწინებს მხოლოდ ჯარიმას, ამაზე მზიას დაკავების უფლება საერთოდ არ არსებობდა.

დააკავეს და შეიყვანეს პოლიციის განყოფილებაში და იქედან როგორი გამოუშვეს მერე? შეადგინეს ადმინისტრაციულ სამართალდარღვევათა ოქმი. შემდეგ ალბათ ვიღაცამ უთხრა, რომ ეს არ იყო დაკავების საფუძველი, ვერ დააკავებდნენ სტიკერზე, ამიტომ მის დაკავების ოქმში ჩაწერეს, რომ ის იდგა, პოლიციას აგინებდა, აფურთხებდა, ეძახდა “ღორებო, ძაღლებო” – პირველი დაკავების ოქმში ასე წერია და ამიტომ დააკავეს თურმე 173-ე მუხლით, მაშინ, როცა თვალნათლივ ვხედავთ, რის გამო დააკავეს მზია.

ესაა მთელი ამბავი. დააკავეს ამ კადრით და დაკავების ოქმი შეუდგინეს სრულიად სხვა რამეზე. მაჩვენოს ბრალდებამ ან პოლიციამ ერთი კადრი, სადაც მზიას პირიდან ისმის „ძაღლებო, ღორებო“ ან რაც წერია ოქმში. ასეთი ტერმინოლოგიაა იქ. სწორედ ამიტომაა ეს უკანონო დაკავება და ჩვენ მოვითხოვთ ამაზე პროკურატურის შეფასებას,“ – ამბობს მაია მწარიაშვილი.

ნახეთ მზია ამაღლობელის პირველი დაკავების კადრები: 

ადვოკატმა ისაუბრა მზია ამაღლობლის მეორე დაკავების კადრებზეც.

„მგონი, ვიღაცას ჰგონია, რომ მზია იტყვის: „სახე ჩემია, ხელი ჩემი არ არის…” ასეთი პოზიცია არ იქნება, ცხადია. მან თავშივე თქვა, რომ არაფერს არ შევალამაზებთ, ჩემი დაცვის ხაზი იქნება ღირსეული. დაცვის ხაზი იქნება ზუსტად ისეთი, რაც მოხდა სინამდვილეში.

რა მოხდა სინამდვილეში, მოდი ვთქვათ და მერე სამართლებრივად შევაფასოთ. აი, ამ კადრში ვხედავთ, როგორც გინდათ ისე დავარქვათ – ალიყური, შემოულაწუნა, გაარტყა, სილა გააწნა, სთხლიშა (უფრო დავამძიმოთ) როგორც გინდათ… მაგრამ სინამდვილეში კადრში ვხედავთ, რაც ხდება, ეს არის მარცხენა ხელით, გაშლილი ხელიც ვერ ხვდება, სამი თითით ხდება მის [ირაკლი დგებუაძის] სახეზე კონტაქტი.

ახლა, რა არის ეს სამართლებრივად? სამართლებრივად მზიას ბრალდების კვალიფიკაცია გახლავთ პოლიციელზე თავდასხმა. კარგი იქნებოდა ვიზუალიზაციისთვის, თუ აჩვენებდით, რა არის თავდასხმა. თავდასხმა არის, როცა ჟურნალისტ მაკა ჩიხლაძეს თავს დაესხა მოძალადეების ჯგუფი. აი, ათი კაცი რომ დაესხა თავს და სულ ერთი იყო მათთვის გადარჩებოდა თუ მოკვდებოდა. კინაღამ მოტეხეს კისერი და ვნახეთ ეს კადრებში.

თავდასხმა სამართლებრივად არის მძიმე, აგრესიული ქმედება და თავდასხმის ობიექტია ჯანმრთელობა, სიცოცხლე და შესაძლებელია, ქონებაც.

ანუ თავდასხმა უნდა იყოს მიმართული იქეთკენ, რომ დავაზიანო შენი ჯანმრთელობა, სიცოცხლე ან ქონება. ამიტომ ხელის გარტყმა ვერცერთ შემთხვევაში ვერ იქნება ჯანმრთელობის წინააღმდეგ მიმართული დანაშაული, იმიტომ, რომ ჯანმრთელობა ამით ვერ დაზიანდება.

რაც არ უნდა ძალით დაერტყა მზიას მისთვის, ობიექტი აქ არ არის ჯანმრთელობა.

ეს ქმედება ვერ აზიანებს ჯანმრთელობას, სიცოცხლეს და ქონებას და ეს რომ თავდასხმა არ არის, ორჯერ ორი ოთხია.

სისხლის სამართლის კოდექსში ჩვენ გვაქვს ასევე 126-ე მუხლი, რომელიც არის ცემა და „სხვაგვარი ძალადობა“ და ერთი შემოლაწუნება ცემის კვალიფიკაციისთვისაც კი არ ვარგა.

რატომ არ დაიწყეს ამ მუხლით? – იმიტომ, რომ აქ სასჯელი არის 1 წლამდე და რომ დაეწყოთ გამოძიება, პატიმრობას ვერ მოითხოვდნენ და ვერ მიიღებდნენ. იმიტომ იყო ეს მანიპულირებული, რომ ამ მუხლით დაეწყოთ გამოძიება და პატიმრობა მიეღოთ,“ – ამბობს ადვოკატი მაია მწარიაშვილი.

მისი თქმით, „სხვაგვარი ძალადობაც“ არის ისეთი ძალადობა, რომელიც სისხლის სამართლებრივად შეიძლება იყოს დასჯადი, თუმცა „ტკივილი“ ვერ იქნება სუბიექტურ აღქმებზე დამოკიდებული.

„მეტკინაო“, რომ ამბობს ეგრეთ წოდებული დაზარალებული, მის სუბიექტურ აღქმებზე ვერ იქნება დამოკიდებული ქმედების ინკრიმინირება დანაშაული ჩავიდინე თუ არა. ეს ობიექტურადაც აღქმადი უნდა იყოს.

ტკივილი კიდევ სამედიცინო დეფინიციაა. ტკივილი არაა, „მეტკინა და რაღაც შეწითლება მქონდა თურმე“, ეს ანეკდოტური კვალიფიკაციაა აი, ამ „სხვაგვარი ძალადობისთვის“.

ჩამოვედით კიდევ უფრო დაბლა. სისხლის სამართლის საპროცესო კოდექსის არცერთი მუხლი არ გვაქვს. ეს არ არის ძალადობის სფერო.

აქ შეიძლება ილაპარაკო, რომ ეს არის შეურაცხყოფის სფერო პოლიციელისთვის, იმიტომ, რომ ეს არ არის ძალადობა. მიაქციეთ ყურადღება, რომ სახელისუფლებო სპიკერებიც კი აღქმაშიც შეურაცხყოფად აღიქვამენ, რადგან იმეორებენ, რომ „პოლიციელს მიაყენა შეურაცხყოფა“.

ჩვენ ადმინისტრაციულ სამართალდარღვევათა კოდექსში გვაქვს 173-ე მუხლი, რომელიც მზიას პირველ შემთხვევაში ყალბად წარუდგინეს. ეს არის პოლიციელის სიტყვიერი შეურაცხყოფა და მისი „სხვაგვარი ქმედებით“ შეურაცხყოფა და ესეც არ ისჯება სისხლისსამართლებრივად.

თუ მაინც და მაინც უნდა ეძებო, უნდა ეძებო ადმინისტრაციულ სამართალდარღვევათა კოდექსში, რომელიც ითვალისწინებს ჯარიმას და არა ადმინისტრაციულ პატიმრობას.

თუ ასეთ შემთხვევაში დაზარალებული ჩათვლის, რომ მისი პატივი, ღირსება შეილახა და მიიღო მორალური ზიანი, მას შეუძლია იდავოს სამოქალაქო სამართლის წესით და მოითხოვოს მორალური ზიანის კომპენსაცია.  აი, ეს არის ამ საქმის ალია-ბალია და ამიტომ იმყოფება მზია ამაღლობელი აი, ამ ბარბაროსულ პატიმრობაში,“ – ამბობს მაია მწარიაშვილი.

ადვოკატის თქმით, წარმოუდგენელი დაუსაბუთებლობის გარდა, მზიას ქმედებას არაფერი აქვს საერთო სისხლის სამართლებრივ კვალიფიკაციასთან – თავდასხმასთან ან ძალადობასთან.

„ერთი კადრია და რაც არ უნდა გაწიო და გამოწიო, პირველი არის მისი უკანონო, ადმინისტრაციული დაკავება და მეორე, სისხლის სამართლის კვალიფიკაციით დაკავება. სისხლის სამართლის დანაშაული არ ჩაუდენია და მისი სისხლის წესით დაკავების საფუძველი არ არსებობდა. ამიტომ არის ორივე დაკავება უკანონო.

აუცილებლად უნდა ვთქვა კიდევ ერთი რამ, რაც ძალიან მნიშვნელოვანია.

მზიას წინააღმდეგ სისხლის სამართლის საქმეს იძიებს აჭარის პოლიციის დეპარტამენტი, საქმეში დაზარალებულად ცნობილია ქალაქის პოლიციის უფროსი და საგამოძიებო სამსახურის უფროსი, ამ საქმეზე არის ბრალდების ერთ-ერთი მთავარი მოწმე, ყველა სხვა მოწმე, ასევე არიან ამავე პოლიციის თანამშრომლები.

მთელი ეს რგოლი არის ბესელიას დაქვემდებარებაში, საგამოძიებო სამსახურის უფროსი თვითონ არის მოწმე, თავისი გამომძიებელი კითხავს. ანუ „დაზარალებული“ ბესელია, მოწმეები, – ესენი ერთ შენობაში არიან მოთავსებული. უფრო მეტიც, სხედან გვერდიგვერდ სამუშაო ოთახებში. მოკლედ, მხარე არის აჭარის პოლიცია მთლიანად.

მზიას სანიმუშოდ დასჯის ინტერესი ვის აქვს?! აჭარის პოლიციას, ხომ?! თუ იმასაც მხედველობაში მივიღებთ, რომ მისი (ამაღლობლის) გამოცემები მუდმივად ამზადებდნენ სხვადასხვა სიუჟეტებს პოლიციის ხელმძღვანელ პირებზე…

საქმეს იძიებს აჭარის პოლიციაში, ასე ვთქვათ, ყველაზე დაბალი საპოლიციო ჩინი და თურმე ამან უნდა იმსჯელოს ყველაზე მაღალი საპოლიციო ჩინების ქმედებაზე და თან საკუთარი უფროსი და ყველა თავისი თანამშრომელი მოწმეებად უნდა ჰყავდეთ.

წარმოუდგენელია აჭარის პოლიცია იძიებდეს ამ საქმეს, ჩვენ ვიშუამდგომლეთ გენერალურ პროკურორთან ამ გარემოებების გამო, რადგან მან უნდა შეისწავლოს საქმე და მისცეს დავალება აჭარის პროკურატურას, რომ ეს საქმე შეწყვიტოს. თუ არა, უნდა წამოიღოს საკუთარ დანაყოფში და შემდეგ შეწყვიტოს მისი დანაყოფის მეშვეობით, იმიტომ, რომ შეუძლებელია ამას იძიებდეს აჭარა, იმ მინიმალური სტანდარტით მაინც, რისი მოლოდინიც შეიძლება ჰქონდეს ადამიანს“ – ამბობს ადვოკატი მაია მწარიაშვილი.

მის თქმით, მზია ამაღლობელს წარმოუდგენელი პროტესტი აქვს ამ უკანონობაზე, მის მიმართ ჩადენილი თუ სხვების მიმართ ჩადენილი უსამართლობის გამო და აქვს განცდა, რომ მას სისტემა დაუპირისპირდა. „აქვს საშინელი დაუცველობის განცდა და შიმშილობა ჩათვალა პროტესტის ერთადერთ ფორმად“.

„თუ ამ პროცესის გააზრების უნარი აქვს სახალხო დამცველს, სწორედ მას აქვს იმის საშუალება, რომ იშუამდგომლოს გენერალურ პროკურორთან, ვინაიდან, პროკურატურას ნებისმიერ ეტაპზე შეუძლია ეს უკანონო, დაუსაბუთებელი, აღკვეთი ღონისძიების შეცვლა მოითხოვოს.

თუ ეს პოლიციელის შეურაცხყოფაა, მაშინ ეს არის ადმინისტრაციულ სამართალდარღვევათა კოდექსის 173-ე მუხლი და არავითარი თავდასხმა.

ახლა რაც შეეხება ამ სახელისუფლებო კომენტარებს, რომლებიც პრინციპში შეიცავს სრულიად სხვა რამეს და ეს არის პირდაპირი ზეწოლა, მე თუ მკითხავთ, იმიტომ, რომ კობახიძის კომენტარი, რასაც მე გავეცანი ამბობს, რომ „მთელი სიმკაცრით დაისაჯოს პოლიციელის შეურაცხყოფა“, მაგრამ მზიას გადმოსახედიდან რომ გითხრათ, როცა მასთან შევედით და ვკითხეთ, თუ როგორ არის, მან თქვა, „ალბათ ეს სიბრაზე მაძლებინებს“, რადგან იყო კიდევ უფრო შეურაცხყოფილი“ – ამბობს მაია მწარიაშვილი.

საქართველოს სახალხო დამცველი განცხადებას ავრცელებს 2 თებერვალს თბილისში გამართულ აქციაზე მოქალაქეთა დარბევის ამსახველ ვიდეოკადრებზე.

„შემაშფოთებელია საჯარო წყაროებში გავრცელებულ ვიდეოკადრებში ასახული მოქალაქეების, ჟურნალისტების და პოლიტიკოსების მიმართ პოლიციის მხრიდან განხორციელებული არასათანადო მოპყრობის და ძალის გადამეტების ფაქტები. ვრცელდება ინფორმაცია, პოლიციელების მხრიდან „ტვ პირველის“ დაშავებული ოპერატორის თაობაზეც.

ასევე, პირდაპირ ეთერში ვიხილეთ პოლიციელების მხრიდან სიტყვიერი შეურაცხყოფის კადრები ქალების, მათ შორის ქალი პოლიტიკოსების მიმართ.

სახალხო დამცველი გმობს პოლიციელების მხრიდან ყველა სახის კანონსაწინააღმდეგო ქმედებას, განსაკუთრებით კი არასათანადო მოპყრობის ფაქტებს. სახალხო დამცველი თითოეულ ფაქტზე განახორციელებს სამართლებრივ რეაგირებას.

სახალხო დამცველი მოუწოდებს სპეციალურ საგამოძიებო სამსახურს, დაუყოვნებლივ დაიწყოს ყველა ამ ფაქტზე გამოძიება და მისცეს შესაბამისი პირები სისხლის სამართლის პასუხისგებაში. ასევე, მოვუწოდებთ შინაგან საქმეთა სამინისტროს გენერალურ ინსპექციას – პოლიციელების მხრიდან სიტყვიერი შეურაცხყოფებისა და არაეთიკური მიმართვის ფაქტებზე ჩატარდეს სამსახურებრივი შემოწმება.

სახალხო დამცველის რწმუნებულები მოინახულებენ ყველა დაკავებულ მოქალაქეს, მათ შორის პოლიტიკოსებს. დამატებითი ინფორმაცია, საზოგადოებას მოგვიანებით მიეწოდება.

შემთხვევებზე შეტყობინების მიღების მიზნით, სახალხო დამცველის აპარატის ცხელი ხაზი – 1481 – მუშაობს 24- საათიან რეჟიმში“ – ვკითხულობთ სახალხო დამცველის ფეისბუქგვერდზე გამოქვეყნებულ განცხადებაში.

დღეს, 2 თებერვალს, თბილისში, „თბილისი მოლთან“ მიმდინარე აქციაზე ნიღბიანი პირები სცემენ მშვიდობიანი აქციის მონაწილეებს.

ფეისბუქზე პოლიციის მიერ მოქალაქეებზე ძალადობის ამსახველი არაერთი კადრი ვრცელდება. მათ შორის, კადრებში ჩანს, როგორ გამეტებით ურტყამს პოლიცია მოქალაქეს თავში, დაკავების შემდეგ.

ნახეთ ვიდეო:

ნახეთ ფოტომასალა: 

დღეს, 2 თებერვალს, „თბილისი მოლთან“ მიმდინარე აქციაზე ნიკა მელია და გიგი უგულავა დააკავეს.

აქციაზე დააკავეს გიორგი კირთაძეც, რომელიც, „ბათუმელების“ ინფორმაციით, მალე გამოუშვეს.

ვრცელდება ცნობები სხვა დაკავებულების შესახებაც. „ბათუმელები“ ინფორმაციას აზუსტებს.

„თბილისი მოლთან“ ვითარება მას შემდეგ დაიძაბა, რაც აქციის მონაწილეებმა მსვლელობით საქალაქო სასამართლოსკენ გადაადგილება სცადეს. მოქალაქეთა დიდი რაოდენობის მიუხედავად, პოლიციამ მათ გზის სავალ ნაწილზე გადასვლის საშუალება არ მისცა.

აქციაზე სამსახურებრივი მოვალეობის შესრულებისას დაშავდა „ტვ პირველის“ ოპერატორი ნიკო კოკაია. სასწრაფო სამედიცინო დახმარების ჯგუფმა ის საავადმყოფოში გადაიყვანა.

პოლიცია და სპეცრაზმი დღეს შუადღიდანაა მობილიზებული „თბილისი მოლთან“, სადაც მოქალაქეები პროტესტის ნიშნად 16:00 საათიდან შეიკრიბნენ. აქ იმყოფება შსს-ს განსაკუთრებულ დავალებათა დეპარტამენტის ხელმძღვანელი ზვიად ხარაზიშვილიც, იგივე „ხარება“.

საიამ მიმართა საქართველოს სახალხო დამცველ ლევან იოსელიანს, შექმნას სპეციალური სამედიცინო ჯგუფი, რომელიც მონიტორინგს გაუწევს მზია ამაღლობელის ჯანმრთელობის მდგომარეობას.

ახალგაზრდა იურისტთა ასოციაციის განცხადებით, 2025 წლის 31 იანვარს მიღებული სამედიცინო დოკუმენტაციის გადამოწმების შედეგად გაირკვა, რომ მზია ამაღლობელს არ უტარდება ყველა ის აუცილებელი კვლევა და პროცედურა, რომელიც საჭიროა მისი ჯანმრთელობის მდგომარეობის სრულფასოვნად შესაფასებლად.

„მიუხედავად იმისა, რომ 1-ელ თებერვალს შესაბამის უწყებებს მივმართეთ აღნიშნული კვლევების უზრუნველსაყოფად, ამ დრომდე უცნობია, რა რეაგირება მოჰყვა ჩვენს მოთხოვნას. ამასთან, მზია ამაღლობელი უკვე 22 დღეა, სრულ შიმშილობაზე იმყოფება, რაც მნიშვნელოვნად ზრდის მისი ჯანმრთელობის მდგომარეობის კრიტიკულად დამძიმების რისკს.

იმისთვის, რომ მზია ამაღლობელის ჯანმრთელობის მდგომარეობა სათანადოდ გაკონტროლდეს, აუცილებელია ექიმთა სპეციალური ჯგუფის შექმნა, რომლის პირველადი შემადგენლობა უნდა დაკომპლექტდეს რეანიმატოლოგის, ენდოკრინოლოგისა და მეტაბოლური დაავადებების სპეციალისტებით. საჭიროების შემთხვევაში, მათ უნდა შეუერთდნენ ნევროპათოლოგი, კარდიოლოგი და გასტროენტეროლოგი“, — ნათქვამია განცხადებაში.

საია სახალხო დამცველს მოუწოდებს, უზრუნველყოს ამ ჯგუფის შექმნა, რათა დროულად იქნას მიღებული საჭირო სამედიცინო ზომები. სახალხო დამცველს ასევე მიეწოდა იმ ექიმების სია, რომლებიც მზად არიან, ჩაერთონ მონიტორინგის პროცესში.

„ნეტგაზეთისა“ და „ბათუმელების“ დამფუძნებელი მზია ამაღლობელი 22 დღეა, შიმშილობს.

ის 11-12 იანვარს ღამით, ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა.

მას შემდეგ, რაც წინააღმდეგობის მოძრაობის წევრებმა პროტესტის ნიშნად თბილისის შემოსასვლელის გადაკეტვა დააანონსეს, „ქართული ოცნების“ მთავრობამ კიდევ ერთი რეპრესიული საკანონმდებლო ცვლილება მიიღო და „საერთაშორისო მნიშვნელობის საავტომობილო გზების“ გადაკეტვაც კრიმინალად აქცია.

2025 წლის 31 იანვარს „ოცნების“ მთავრობამ ახალი დადგენილებით „სტრატეგიული ან/და განსაკუთრებული მნიშვნელობის ობიექტების ნუსხას“ „საერთაშორისო მნიშვნელობის საავტომობილო გზები“ დაამატა.

2 თებერვალს დაანონსებულ საპროტესტო აქციამდე ერთი დღით ადრე კი, შინაგან საქმეთა სამინისტრომ განცხადება გაავრცელა, სადაც ნათქვამია, რომ აღნიშნული ტერიტორიის გადაკეტვა უკანონია. საუბარია დედაქალაქის შემოსასვლელთან, 16:00 საათზე დაანონსებულ აქციაზე.

სამინისტრო ამ შემთხვევაში 31 იანვარს, „ქართული ოცნების“ პრემიერ-მინისტრის, ირაკლი კობახიძის ხელმოწერილ დადგენილებას დაეყრდნო.

რომელი გზაა საქართველოში „საერთაშორისო მნიშვნელობის საავტომობილო გზა“? – ამ გზების კონკრეტულ ჩამონათვალშია სწორედ „თბილისის შემოსავლელიც“.

მიუხედავად შსს-ს განცხადებისა, იურისტი ბექა ბასილაია თავის ფეისბუქგვერდზე წერს, რომ 2 თებერვალს „თბილისის შემოსასვლელი გზის გადაკეტვა სისხლის სამართლის დანაშაული არ არის“. თუ რატომ? – ბასილაიას ამავე პოსტში აქვს ახსნილი:

„მთავრობის დადგენილებაში შეტანილი ცვლილება გამოქვეყნდა 31 იანვარს, რაც ნიშნავს, რომ სისხლისამართლებრივი მიზნებისთვის მისი გამოყენება დაუშვებელია 15 თებერვლამდე.“ – წერს იურისტი.

ბექა ბასილაიამ მოგვიანებით კიდევ ერთი პოსტი გამოაქვეყნა, სადაც წერს, რომ მართალია, გზის გადაკეტვა დანაშაულად არ მიაჩნია, თუმცა, ეს „არ ნიშნავს, რომ ვინმეს ვარწმუნებდე, ამ აქციაში მონაწილეობის გამო ბიძინას პოლიცია და სასამართლო არ შეგვეხება. პირიქით, იმის მოლოდინი მაქვს, რომ, როგორც არაერთგზის აქამდე, კანონს ფეხზე დაიკიდებენ და რეპრესიის მექანიზმად გამოიყენებენ 222-ე მუხლს;

ის, რომ ვადებთან დაკავშირებული არგუმენტებით ხვალინდელი გზის გადაკეტვა დანაშაულად არ მიმაჩნია, არ ნიშნავს, რომ 15 თებერვლის შემდგომ გზის გადაკეტვის გამო 222-ე მუხლის ამოქმედებას სწორად მივიჩნევდე.“

„სტრატეგიული ან განსაკუთრებული მნიშვნელობის ობიექტების ხელში ჩაგდება ან ბლოკირება“ სისხლის სამართლის კოდექსის 222-ე მუხლით გათვალისწინებული დანაშაულია, ეს მუხლი სასჯელის სახით ითვალისწინებს ჯარიმას, ან გამასწორებელ სამუშაოებს ვადით ერთ წლამდე, ასევე თავისუფლების აღკვეთას 2 წლამდე ვადით. ამ დანაშაულის ჯგუფურად ჩადენა კი, ისჯება თავისუფლების აღკვეთით ვადით 2-დან 4 წლამდე.

„ქართულმა ოცნებამ ცვლილებები შეიტანა მთავრობის დადგენილებაში და სტრატეგიული ობიექტების ნუსხას დაემატა საერთაშორისო მნიშვნელობის საავტომობილო გზები. შესაბამისად, ახლა უკვე სისხლის სამართლის წესით დაისჯება ასეთი ობიექტების ბლოკირება. მარტივად რომ ვთქვათ, ხელისუფლებამ მოახდინა ავტობანებზე შეკრება-მანიფესტაციების კრიმინალიზება.

ეს ცვლილებები ჩემთვის ორ რამეს აჩვენებს:

ა) მთავრობას ეშინია პროტესტის, აქტივისტური ჯგუფების და ამ შიშის გამო, მზადაა ავტორიტარიზმის ყველა ნიშან-თვისება დააკანონოს;

ბ) პროტესტს ჭირდება მეტი მოქნილობა, კრეატიულობა და ოპერატიულობა. ავტორიტარი ხელისუფლბის პირობებში, ნებისმიერ მოქმედებას ძალიან მძიმე ფასი შეიძლება ჰქონდეს. ამიტომ ჩვენი ნაბიჯები ძალიან სტრატეგიულად, კრეატიულად და ოპერატიულად უნდა იგეგმებოდეს, რათა მუდმივად რამდენიმე ნაბიჯით უკან არ ვიყოთ,“ – წერს იურისტი გურო იმნაძე.

აღსანიშნავია, რომ საერთაშორისო მნიშვნელობისაა ასევე სენაკი-ფოთი[ასაქცევი]-სარფის[თურქეთის რესპუბლიკის საზღვარი] ავტომაგისტრალიც, რომლის შემადგენელი ნაწილია შემდეგი ქუჩები ბათუმის ადმინისტრაციულ საზღვრებში:

• თამარ მეფის გამზირი [მდინარე ჩაქვისწყალიდან თამარის დასახლებაში მდინარე ყოროლისწყლამდე მონაკვეთი. მოიცავს ჩაქვი-მახინჯაურის გვირაბებს];
• აეროპორტის გზატკეცილი [ანგისიდან ახალსოფლის დასახლებამდე – მდინარე ჭოროხზე არსებული ხიდის ჩათვლით]
• აფსაროსის გზატკეცილი [ახალსოფლიდან გონიოს ციხემდე მონაკვეთი]
• ანდრია პირველწოდებულის გზატკეცილი [გონიოს ციხიდან კვარიათის ჩათვლით მონაკვეთი]

საერთაშორისო მნიშვნელობისაა ასევე ავტომაგისტრალი კვარიათიდან სარფის საბაჟომდე [თურქეთის საზღვრამდე] მონაკვეთში [ხელვაჩაურის მუნიციპალიტეტის ტერიტორიაზე].

„ოცნების“ ახალი დადგენილებით კი, პროტესტის დროს ბათუმში გზის ზემოთ აღნიშნული მონაკვეთების ბლოკირებაც სისხლის სამართლის დანაშაულად ჩაითვლება.

[სენაკი-სარფის ავტომაგისტრალის შემადგენელი იყო ასევე ბათუმში ოდისეი დიმიტრიადის, ბაქოს, ილია ჭავჭავაძისა და ტბელ აბუსერიძის ქუჩებიც, თუმცა ჩვენი ინფორმაციით საქართველოს საავტომობილო გზების დეპარტამენტის მიერ ამ დასახელების ქუჩები ბათუმის მუნიციპალიტეტზეა გადაცემული].

რა ხდება:

ბოლო დღეების განმავლობაში გააქტიურდა მსჯელობა პროევროპული საპროტესტო აქციების მაგისტრალზე გადატანის შესახებ. მოქალაქეები, რომლებიც უწყევტად, უკვე ორ თვეზე მეტია ითხოვენ ხელახალი არჩევნების დანიშვნასა და აქციების განმავლობაში დაკავებული მოქალაქეების გათავისუფლებას, განიხილავდნენ პროტესტის სხვა ფორმებს, მათ შორის მაგისტრალის გადაკეტვას.

სამოქალაქო აქტივისტი, ილია ღლონტი ამბობს, რომ მისი სახლის ჩხრეკისა და გამოკითხვაზე წაყვანის საფუძველი სოციალურ ქსელში, „პუბლიკას“ ნიუსის გაზიარება გახდა. უფრო მეტიც, ის ამბობს, რომ დღის განმავლობაში განვითარებული მოვლენები – სხვა აქტივისტების სახლების ჩხრეკა და დაკავება სწორედ ამ ნიუსს ეხება. კონკრეტულად, 2 თებერვალს, 16:00 საათზე, თბილისი მოლის მიმდებარედ დაგეგმილ აქციას.

მწერალი, მთარგმნელი და პუბლიცისტი, ნაირა გელაშვილი ნეტგაზეთი/ბათუმელების თანადამფუძნებლისა და დირექტორის, მზია ამაღლობელის პატიმრობას ეხმაურება. ის პასუხისმგებელ უწყებებს მოუწოდებს, სასწრაფოდ გაათავისუფლონ როგორც ამაღლობელი, ისე სხვა “სინდისის პატიმრები”.

“როდემდე?

როდემდე უნდა ტკბებოდეთ უდანაშაულო ადამიანის, შუა ხნის ქალის ნელი სიკვდილით?

იგი შიმშილობს, რადგან დაამცირეს, რადგან ღირსება შეულახეს და არაადამიანურად მოექცნენ!

იგი შიმშილობს იმის გამო, რომ მისი ქვეყანა აივსო უღირსებო, ლაჩარი კაცებით, რომლებიც ვაჟკაცობად თვლიან უმწეო  პატიმარი ქალის შეურაცხყოფას, მისდამი უხამს მუქარას და შურისძიებას!

რომლებსაც მამაკაცური ღირსების კოდექსის არსებობის შესახებ არასოდეს არაფერი სმენიათ!

ი. დ.-ძის მაგვარ ძალოვანთა გარეგნულად გაფუყული მამაკაცობა უბადრუკობით არის ამოვსებული! ასეთებს   შეუძლიათ საქვეყნოდ იწუწუნონ, რომ ქალის სუსტად მოქნეულმა ხელმა, უფრო ზუსტად კი თითების შეხებამ ნიკაპზე, ტკივილი მიაყენა მათ! (აი, ამაზე კი შეგვიძლია თქმა, რომ მსგავსი რამ საქართველოსა და კავკასიის ისტორიაში ნამდვილად არ მომხდარა!).

ასეთებს ვერავინ და ვერაფერი ვეღარ გააგებინებს, რას ნიშნავს სიტყვა „სირცხვილი“ და „სამარცხვინო“!

ეს სუბიექტი ჩვენს უახლეს ისტორიასა და წიგნში „ღირსების შესახებ“ (რომელიც, საბედნიეროდ, იწერება), შევა, როგორც მამაკაცის გადაგვარების ქრესტომათიული, ტრაგიკომიკური მაგალითი!

საერთოდ, მზია ამაღლობელის ამბავი ტესტია მთელი საზოგადოებრივი მორალისთვის და ცალკე  უნდა გაანალიზდეს იმ  არსებათა საქციელი, სისხლისა და შურისძიების წყურვილი ქვეცნობიერში რომ აქვთ ჩატენილი და მსგავს შემთხვევებში ამოანთხევენ ხოლმე ან ხმამაღლა ან ხმადაბლა, ოღონდ შეფუთულს სახელმწიფოებრივი წესრიგისადმი ერთგულებით. ასეთები ჩუმად იტანდნენ და იტანენ დამცირებას და ახლა უბრალოდ შურთ იმისი, ვინც ეს ვერ და არ აიტანა („შიმშილობს და იშიმშილოს!“ „იშიმშილოს და მოკვდეს“! -სოციალური ქსელები).

მაგრამ განსაკუთრებით შემზარავი ის არის, რომ არც საერო და არც სასულიერო ხელისუფალთა შორის ერთიც კი არ აღმოჩნდა, ვინც შეწუხდებოდა მაინც, რომ უდანაშაულოდ დასჯილი ადამიანი, ქალი, (რომელიც მუდამ სანიმუშო რეპუტაციით, პროფესიული ცოდნითა და თავდადებული შრომით გამოირჩეოდა), უკვე 21-ე დღეა  შიმშილობს!

ვინც შეწუხდებოდა მაინც, რომ მოქალაქე  ჯერ უკანონოდ დააპატიმრეს, მერე არა ადამიანური მოპყრობით აფექტურ მდგომარეობამდე მიიყვანეს,  და მერე  სუსტად მოქნეული სილის გამო შვიდ წელს უსჯიან და თან სახელს უტეხენ! ვინც აღშფოთდებოდა, რომ მას მშვიდად იმეტებენ სიკვდილისათვის! ეს ხომ იგივეა რაც მკვლელობა!

ცხადია, ვისაც ბოლომდე სურს მკვლელად ჩამოყალიბდეს, იმას ვეღარაფერი შეაჩერებს, მაგრამ რადგან სასწაულების მჯერა, მაინც მოგიწოდებთ: სასწრაფოდ გაათავისუფლეთ მზია ამაღლობელი! გაათავისუფლეთ სინდისის პატიმრები!  (ომშიც ხომ აქვს ადგილი სიკეთის ცალკეულ გამოვლინებებს). მერე მართლა გვიან იქნება და გვიან იქნება მრავალი თვალსაზრისით,“ – წერს ნაირა გელაშვილი.

——————————————————————————————

უკვე 22 დღეა, რაც მზია ამაღლობელი შიმშილობს.

ის 11 იანვარს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა “იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა.

მზია ამაღლობელისთვის შეფარდებული აღკვეთის ღონისძიება მისმა ადვოკატებმა ქუთაისის სააპელაციო სასამართლოში გაასაჩივრეს. თუმცა ქუთაისის სააპელაციო სასამართლომ საჩივარი არც კი განიხილა.

არაერთი იურისტისა და უფლებადამცველის შეფასებით, მზიას ამაღლობელის ქმედება შეუსაბამოა მისთვის წარდგენილ ბრალთან. სპეციალისტები განმარტავენ, რომ მისი ქმედება ბევრად უფრო მსუბუქია, ვიდრე პროკურატურა ედავება. ბევრი მათგანი თვლის, რომ ეს საერთოდ არ არის დანაშაული და მხოლოდ ადმინისტრაციულ სამართალდარღვევად უნდა ჩაითვალოს.

იურისტები დაუსაბუთებლად მიიჩნევენ აღკვეთოს ღონისძიების სახით მზია ამაღლობელის დაპატიმრებასაც.

„ბათუმელების“ მანიფესტი „ახალი თეატრის“ წარმოდგენაზე ბათუმში, 1 თებერვალს.

___________________________________________

„ჩვენ დღეს აქ არ უნდა ვიყოთ, მაგრამ აქ ვართ, რადგან წარმოვადგენთ გამოცემა „ბათუმელებს“, რომელიც მზია ამაღლობელმა დააარსა.

ბათუმში, ამ ადგილიდან ორიოდე კვარტლის დაშორებით „ბათუმელების“ რედაქციაა. დღეს ამ რედაქციის აივანზე დიდი ბანერია გადმოფენილი, რომელზეც წერია – „თავისუფლება მზიას“.

ვერასდროს წარმოგვედგინა, რომ ამ მოთხოვნის გაჟღერება მოგვიწევდა, ვერ წარმოგვედგინა, რომ საქართველოში პოლიტიკური კრიზისი და თავისუფალი სიტყვის დევნა მიაღწევდა იმ ზღვარს, როცა „ბათუმელების“ დამფუძნებელს, ჟურნალისტ და მედიამენეჯერ მზია ამაღლობელს დააკავებდნენ და მას 4-დან 7 წლამდე პატიმრობა დაემუქრებოდა.

რა შეუძლია უსამართლოდ დატყვევებულ ადამიანს?! უსამართლოდ დატყვევებულ ადამიანს რა შეუძლია?!

მზია ამაღლობელი 21 დღეა შიმშილობს. ესაა მზია ამაღლობელის, რეჟიმის მიერ დატყვევებული ჟურნალისტი ქალის უხმო მანიფესტი.

მზია ამაღლობელი ოთხ კედელშია გამოკეტილი, მაგრამ მისი ხმა უსიტყვოდაც ისმის ისე ხმამაღლა, რომ ყველას სწვდება.

სწორედ ამიტომ, მზია ოთხ კედელშიც კი უფრო თავისუფალია, ვიდრე ამ რეჟიმის ნებისმიერი მსახური და შემგუებელი, რომელსაც შეუძლია, მაგრამ არ ლაპარაკობს.

მზია ამაღლობელი არის ქალი, რომელმაც 24 წლის წინ, ამ ქალაქში, სადაც მაშინ ასლან აბაშიძე მართავდა ყველაფერს და სუნთქვა ჭირდა, განიზრახა შეუძლებელი – დაეარსებინა პოლიტიკური გავლენებისგან თავისუფალი გაზეთი, რომელიც გახდებოდა ათასობით, ათი ათასობით ადამიანის ხმა და ეს ხმა გააძლიერებდა დემოკრატიას, ეს იქნებოდა ხმა ავტორიტარიზმის წინააღმდეგ.

მზია ამაღლობელი მაშინ 26 წლის იყო. ის იყო მაღალმთიანი აჭარის სოფლიდან ჩამოსული ახალგაზრდა ქალი, რომელსაც ჰქონდა აბსოლუტური რწმენა, რომ ავტორიტარიზმისა და დიქტატურის დამარცხება შესაძლებელია თავისუფალი სიტყვით, სიტყვით, რომელიც შუქს ჰგავს. შუქი, ერთი პატარა სანთელიც კი, წყვდიადს ანათებს.

სწორედ ასეთ სანთელს ჰგავდა მაშინ „ბათუმელები“, ერთ, პატარა ოთახში გახსნილი გაზეთის რედაქცია, სადაც მხოლოდ ერთი ძველი კომპიუტერი იდგა, მაგრამ „ბათუმელებს“ ჰქონდა ის, რაც აშინებს ყველა რეჟიმს – უზარმაზარი ენთუზიაზმი და თავისუფალი სიტყვისა და სამართლიანობის რწმენა.

„ბათუმელების“ პირველი ნომერი 2001 წლის 26 მაისს გამოვიდა. ეს თარიღი არ ყოფილა შემთხვევითი, ეს იყო განაცხადი, თუ რა მნიშვნელოვანი იყო საქართველოს და სიტყვის თავისუფლება „ბათუმელებისთვის“.

მზია ამაღლობელმა ერთხელ უკვე შეძლო შეუძლებელი.

რეჟიმის პირობებში მან დააარსა გაზეთი და პატარა რედაქცია აქცია გავლენიან გამოცემად, რომელსაც არ შეუცვლია დამფუძნებელი, არ ყოფილა არც ერთი პოლიტიკური ჯგუფის პროპაგანდის იარაღი და მუდამ რჩებოდა და რჩება ადგილად, საიდანაც ყველა ჩაგრულ ადამიანს შეუძლია ხმა მიაწვდინოს ქვეყანას.

მზია ამაღლობელის მიერ დაარსებულ „ბათუმელებსა“ და „ნეტგაზეთს“ არასდროს არ შეშინებია, არასდროს არ დაუხევია უკან სისტემისგან დაჩაგრული არც ერთი ადამიანის, არც ერთი ჯგუფის გაშუქებაზე.

„ბათუმელები“ და „ნეტგაზეთი“ წერდა ყველაფერზე:

წერდა, როგორ დევნიდა და ავიწროებდა სისტემა ადამიანებს:

წერდა კორუფციასა და ნეპოტიმზე;

წერდა ომის დროს ცემით მოკლულ ჯარისკაცზე;

წერდა სიღარიბისგან სასოწარკვეთილ ადამიანებზე, პოლიტიკურ დევნილებზე, უსამართლოდ დაპატიმრებულ სტუდენტებზე, განათლების ხელმისაწვდომობის აუცილებლობაზე, ბათუმსა და თბილისში ისტორიული შენობების ნგრევაზე…

ვიყავით და ვართ ყველგან, სადაც ვჭირდებით ადამიანებს, სადაც ვჭირდებით მათ, ვისი ხმაც არ ისმის, ვის ხმასაც სისტემა ახშობს.

ეს არ იყო იოლი.

ეს არ იყო არასდროს იოლი.

„ბათუმელები“ და შემდგომში „ნეტგაზეთი“, ყოველთვის იყო ხელისუფლებების სამიზნე.

ყველა ხელისუფლების.

ჩვენს გამოცემას გადაუტანია ფიზიკური დევნა, ზეწოლა, მაგრამ არასდროს დაუხევია უკან, არასდროს უთქვამს უარი გაევრცელებინა თავისუფალი სიტყვა.

ჩვენ ახლა ევროპის მოედანზე ვართ. ამ ადგილიდან ზუსტად ორი კვარტლის მოშორებით „ბათუმელების“ რედაქციაა, სადაც, მეოთხე სართულზე, საქართველოს, ევროკავშირის და უკრაინის დროშები ფრიალებს.

აქ, მეოთხე სართულზე, მზია ამაღლობელის სამუშაო ოთახია. ამ ოთახში ხშირად შუაღამემდე ანთია შუქი. ეს შუქი ნიშანია იმის, რომ საქართველოში, ჩვენს ქვეყანაში, რომელიც ამ ქვეყნის მოქალაქეებს ეკუთვნის და სხვას არავის, თავისუფალი მედია მუშაობს.

სანამ ეს შუქი ანთია, ეს ნიშნავს, რომ გრძელდება ბრძოლა სიტყვის თავისუფლებისთვის, საქართველოს ევროპული მომავლისთვის, დემოკრატიისთვის.

21 დღეა მზია ამაღლობელი დაკავებულია და ციხეში შიმშილობს, მაგრამ მის ოთახში ანთია შუქი. ჩვენ ვიბრძვით მისთვის და რეჟიმის ყველა პატიმრისთვის.

დასასრულს, მინდა წაგიკითხოთ მზიას წერილი, რომელიც ჩვენმა რედაქციამ მისი დაკავებიდან რამდენიმე დღის შემდეგ მიიღო. ესაა მზია ამაღლობელის მანიფესტი და გზავნილი არა მხოლოდ „ბათუმელებისთვის“, არამედ მთელი ქვეყნისთვის.

გიკითხავთ წერილს:

„ფაქტი, რის გამოც დღეს ბრალდებული ვარ, შედეგია იმ რეპრესიული, მოღალატეობრივი, ძალადობრივი, ადამიანის, სიტყვის და გამოხატვის წინააღმდეგ მიმართული პროცესების, რომელიც ბოლო ერთი წელია ვითარდება და ჩვენს ყოველდღიურ ცხოვრებაში ფეხს იკიდებს როგორც დიქტატურა.

არ ვაპირებ მივიღო რეჟიმის დღის წესრიგი.

ვშიმშილობ.

სიცოცხლეზე ღირებული თავისუფლებაა.

ჩემს მოცემულობაში ნებისმიერი ის მოქალაქე შეიძლება აღმოჩნდეს, ვისაც დემოკრატიულ, სამართლიან, ევროპულ, რუსული გავლენებისგან თავისუფალ საქართველოში უნდა ცხოვრება.

იბრძოლეთ, სანამ გვიანი არ არის.

იბრძოლეთ ყველგან, სადაც არ უნდა იყოთ, ქვეყანაში თუ ქვეყნის გარეთ, სოფელსა თუ ქალაქში, ქუჩებსა თუ აუდიტორებში, საზოგადოებრივ და სამუშაო სივრცეებში.

იყავით მამაცები, გაუფრთხილდით და გააძლიერეთ ერთმანეთი.

არ დაუშვათ საქართველოს იზოლირება ცივილიზებული სამყაროსგან“.

თავისუფლება მზიას!“

„ბათუმელებისა“ და „ნეტგაზეთის“ დამფუძნებლის, მზია ამაღლობელის ძმისშვილის, მანანა ამაღლობელის სიტყვა „ახალი თეატრის“ საპროტესტო მანიფესტზე ბათუმში:

____________________________________________

„მინდა გიამბოთ მზიაზე, ისეთ მზიაზე, რომელსაც არავინ იცნობს – სხვა მზიაზე.

მზია ამაღლობელი, რომელზეც ახალი ამბების ყველა გამოშვებაში ლაპარაკობენ, ჩემი მამიდაა.

მზია ამაღლობელი უკვე 21 დღეა შიმშილობს და წყლის გარდა არაფერს იღებს.

მე პროფესიით ექიმი ვარ და ვიცი, რას ნიშნავს ეს. ვიცი, რომ ყოველდღე შესაძლოა ჯანმრთელობამ უღალატოს. ვიცი, როგორ განვითარდება მოვლენები და ეს სულ უფრო მეტად მაშინებს.

მზია ჩემთვის მარტო მამიდა არაა. მზიას უკავშირდება მთელი ჩემი ცხოვრება, ბავშვობის ყველაზე ტკბილი და ყველაზე მწარე მოგონებები.

6 წლის ვიყავი, როცა 28 წლის მამაჩემი, მზიას ძმა დაიღუპა.

იმ დილას მზია თავზე მედგა და მეფერებოდა, მაშინ გამიჩნდა პირველად განცდა, რომ მზია ჩემი მფარველი ანგელოზი იყო, რომელიც ცდილობდა ჩემთვის ტკივილი აერიდებინა.

დედამ და ბებიამ ვერ შეძლეს არ გატეხილიყვნენ, მაგრამ შეძლო მზიამ.

ახლა, ამდენი წლის შემდეგ, მიკვირს, როგორ შეძლო პატარა, 21 წლის გოგომ ამხელა ძალის მოკრება და პასუხისმგებლობის აღება ძმისშვილების აღზრდაზე. სწავლაზეც უნდოდა უარი ეთქვა, ჩვენზე რომ ეზრუნა, მაგრამ გადაარწმუნეს. უთხრეს, რომ მის ძმას უხაროდა, რომ სწავლობდა – მხოლოდ ამით შეძლეს მისი გადარწმუნება.

იმ საშინელ, ბნელ წლებშიც კი ცდილობდა ჩვენთვის ბედნიერი ბავშვობა შეექმნა და ამისთვის ყველაფერს აკეთებდა.

ჩვენ არ გვყავდა მამა, მაგრამ გვყავდა მზია!

გვყავდა მზია, რომელიც სოფელში, ლამპის შუქზე გვიკითხავდა წიგნებს, გვასწავლიდა გაკვეთილებს, გვიყვებოდა ამბებს, რომ ჩვენ, ბავშვები გავეხალისებინეთ და სახლის კედლებში მხოლოდ ტირილის ხმა არ ყოფილიყო.

ყოველი შაბათ-კვირა ზეიმი იყო ჩვენთვის! მზია, რომელიც მაშინ ბათუმის უნივერსიტეტში სწავლობდა, შაბათ-კვირას სოფელში ჩამოდიოდა და ჩვენს ცხოვრებაში შუქი, იმედი და სიხარული შემოჰქონდა.

მზია ჩვენი, 4 ობოლი ძმისშვილის მფარველი ანგელოზი იყო.

მზია არც მაშინ გატყდა, როცა ძმის დაღუპვიდან მალევე მამა მოუკვდა, რომელმაც შვილის სიკვდილით გამოწვეულ ტკივილს ვერ გაუძლო. არც მაშინ, როცა დედამისი, ჩემი ბებია გარდაიცვალა, რომელზეც სამსახურიდან გვიან დაბრუნებული მზია ისე ზრუნავდა, როგორც პატარა ბავშვზე, ღამეებს უთენებდა და თვალებში უყურებდა, რომ მას არაფერი სტკენოდა, არაფერი გასჭირვებოდა.

მხოლოდ ერთხელ ვნახე, როგორ გატყდა, მაშინ, როცა მისი გაზრდილი ძმისშვილი, 24 წლის თეო გარდაიცვალა.

მაშინ პირველად ვნახე, როგორ გაიბზარა მზია. უზარმაზარმა ტკივილმა გაბზარა, მაგრამ გაუძლო და შეძლო, რომ ეს ტკივილი ჩვენთვის თავზე არ მოეხვია.

ერთხელ მზიამ მითხრა: მამაშენის და თეოს სიკვდილის მერე რამ უნდა გამტეხოსო… სწორედ ამიტომ, ახლა ძალიან მეშინია, მეშინია მისი მტკიცე ხასიათის, მეშინია მისი თავგანწირვის.

11 იანვარს, როცა მზია პოლიციასთან პირველად დააკავეს სტიკერის გაკვრისთვის, სახლში ვიყავი.

გავიგე თუ არა, იმ წუთასვე გავიქეცი და ასე შევესწარი მის მეორედ დაკავებას.

მეორე დაკავებამდე იყო დიდი ჭყლეტა, ისეთი, რომ მზიას ფეხსაცმელი გასძვრა და დაკავებისას მხოლოდ ცალი ფეხსაცმელი ეცვა.

პოლიციის ეზოში შეყვანის კადრში, რომელიც ალბათ ნახეთ, მზია ფეხშიშველია. მისი ცალი ფეხსაცმელი ჩემმა ბიძაშვილმა, ივეტამ იპოვა და დაჟინებით ცდილობდა, პოლიციელების დახმარებით გადაეცა მზიასთვის.

12 იანვრის ღამეს ციოდა, არ ვიცოდით რა მოხდებოდა. ივეტა კი ეძებდა შედარებით გულისხმიერ პოლიციელს, რომელიც მზიას ფეხსაცმელს შენობაში შეუტანდა.

რამდენიმე საათის განმავლობაში ვიდექით პოლიციასთან, მზიასთან ადვოკატს არ უშვებდნენ. ეს იყო ერთ-ერთი ყველაზე რთული საათები ჩემს ცხოვრებაში.

მერე, როცა გავიგე, რომ ჩემს, ყველაზე კეთილ, ყველაზე ძვირფას მზიას სისხლის სამართლის მუხლით უპირებდნენ გასამართლებას, თითქოს ცა ჩამოიქცა ჩემს თავზე და ეს გრძნობა მაქვს ახლაც.

მზიამ ციხიდან მხოლოდ ერთხელ დამირეკა, დაკავებიდან მე-16 დღეს. მიუხედავად იმისა, რომ მხნედ მესაუბრა, მივხვდი და ვიგრძენი მისი ყველა ტკივილი.

გვითხრა, რომ ძალიან ვუყვარვართ. გვითხრა, რომ არ ვიდარდოთ მასზე და ვიცხოვროთ ისე, როგორც ვცხოვრობდით, მაგრამ ეს ძნელია, ძნელი კი არა, შეუძლებელია.

როგორ არიან ბავშვები? როგორ ხართ თქვენ? – ეს იყო მისი მთავარი კითხვები ციხიდან. გვითხრა, რომ შიმშილობის შეწყვეტაზე არ ველაპარაკოთ, არ ვცადოთ მისი გადარწმუნება. გვითხრა – „არ მინდა ციხეში მნახოთ და მერე ამაზე ინერვიულოთ, ასე სჯობს თქვენთვის და ჩემთვის.“

ასეთია მზია, სხვანაირად არ შეუძლია.

მზია არის ქალი, რომელიც გასცემს და სანაცვლოს არაფერს ითხოვს.

21 დღე გავიდა მზიას დაკავებიდან. დღეში რამდენჯერმე მინდა ავიღო ხელში ტელეფონი და მივწერო – მა, როგორ ხარ?

თითქოს სული დამიცარიელდა მზიას გარეშე. შუქი დაკარგა ყველაფერმა, მაგრამ ვცდილობ ძლიერი ვიყო, ისეთი, როგორიც მზიას მოეწონება.

მზიას იმედს ვერ გავუცრუებ.

მისი ხასიათი და შემართება არ მაძლევს უფლებას, ხელი ჩავიქნიო.

ჩემი ჯერია, ახლა მე არ უნდა გავტყდე.

ამიტომ, როგორც მზიამ მოგვწერა:

უნდა ვიბრძოლოთ ყველგან, ვიბრძოლოთ, სანამ გვიან არ არის.

მზია, გვჭირდები.

გვჭირდები ჯანმრთელი და ციხის გარეთ.

მამიდა, მჭირდები“.

„ეროვნული ინტერესების მოღალატე, შეშინებული ე.წ. ხელისუფლება თავის გადარჩენას მშვიდობიან პროტესტზე ძალადობით ცდილობს. ის ყველას მიუკაკუნებს კარზე, მათ შორის, მათ, ვინც დღეს ჩუმადაა, ფიქრობს, რომ მას არაფერი შეეხება და თავისი სიჩუმით ახალისებს მოძალადე რეჟიმს. ეს მხოლოდ დროის საკითხია“, – წერს პარტია „საქართველოსთვის“ ლიდერი, ყოფილი პრემიერი გიორგი გახარია. ის ამ განცხადებით თბილისში დღეს, პირველ თებერვალს მიმდინარე პროცესებს ეხმაურება.

დღეს, პირველ თებერვალს, დილიდან დაიწყო და უკვე რამდენიმე საათია თბილისის მასშტაბით პოლიცია აქტივისტებისა და რიგითი მოქალაქეების სახლებს ჩხრეკს.

გახარია პოლიციის დღევანდელ აქტივობას გადამწყვეტ ბრძოლაში შესვლას უწოდებს:

„შეშინებული, არაადეკვატური ხელისუფალი იმის ნიშანია, რომ ბრძოლის გადამწყვეტ ფაზაში შევედით და ჩვენი გამარჯვებაც დროის საკითხია, რომელიც ძლიერი, თანმიმდევრული, მშვიდობიანი პროტესტით გარდაუვლია. თავისუფლება რეჟიმის მძევლებს!“ 

ამ დროისთვის არსებული ინფორმაციით, სამართალდამცველებმა გაჩხრიკეს აქტივისტ ისაკო დევიძისა და ფეისბუქჯგუფ „დაიტოვეს“ ადმინისტრატორების, ილია ღლონტისა და ნენსი ვოლანდის [ქრისტინე ბოტკოველი] სახლები. ნენსის სახლში ჩხრეკას ადვოკატი შოთა თუთბერიძე ესწრებოდა, ადვოკატის მისვლამდე ნენსი ცუდად გახდა, ადგილზე სასწრაფო-სამედიცინო დახმარების ჯგუფი გამოიძახეს.

ილია ღლონტის სახლში ჩხრეკა უკვე დასრულდა. თუმცა, როგორც თავად ილია ღლონტმა განაცხადა, მას ადვოკატი არ ესწრებოდა. ჩხრეკის დასრულების შემდეგ ის პოლიციის განყოფილებაში, სავარაუდოდ, გამოკითხვაზე გადაიყვანეს.

რაც შეეხება ისაკო დევიძეს, შინაგან საქმეთა სამინისტროს ინფორმაციით, ის ადმინისტრაციულ სამართალდარღვევათა კოდექსის 173-ე მუხლის საფუძველზე, პოლიციელზე წინააღმდეგობის გაწევისთვის დააკავეს.

რაც შეეხება უშუალოდ ჩხრეკის საფუძვლებს, უწყების ინფორმაციით, საგამოძიებო მოქმედებები სისხლის სამართლის კოდექსით მიმდინარე გამოძიების ფარგლებში ტარდება. კონკრეტულად, ჯგუფური ძალადობის ორგანიზებისა და ჯგუფური მოქმედების ორგანიზების ფაქტებზე.

ვრცლად ამ თემაზე:

პოლიცია აქტივისტების სახლებს ჩხრეკს, დაკავებულია ისაკო დევიძე

სახალხო დამცველთან არსებული ეთნიკური უცმირესობების საბჭო 7-მა წევრმა დატოვა.

მათი განცხადებით, საბჭოს შიგნით კოორდინატორების მხრიდან იდევნება კრიტიკული და განსხვავებული აზრი, ისინი პირადად წყვეტენ, რომელ საბჭოს წევრს მიიწვევენ ამა თუ იმ შეხვედრასა თუ ღონისძიებაზე, რაც პირდაპირ ეწინაღმდეგება აღნიშნული საბჭოს პრინციპებსა და ეთნიკური უმცირესობების ინტერესებს.

გთავაზობთ გავრცელებული განცხადების ტექსტს.

„ჩვენ, სახალხო დამცველთან არსებული ეთნიკური უმცირესობების საბჭოს წევრი და წინამდებარე განცხადებაზე ხელმომწერი ორგანიზაციები, ვაცხადებთ, რომ ვტოვებთ აღნიშნულ საბჭოს.

სახალხო დამცველთან არსებული ეთნიკური უცმირესობების საბჭო, რომელსაც კოორდინაციას უწევს ტოლერანტობის ცენტრი, წლების განმავლობაში წარმოადგენდა მნიშვნელოვან პლატფორმას სამოქალაქო ინტეგრაციისს საკითხების განსახილველად და ეთნიკური უმცირესობების საჭიროებებზე სამუშაოდ, თუმცა ბოლო ერთი წლის გაანმავლობაში საბჭოს საქმიანობა ჩიხში შევიდა.

ქვეყანაში შექმნილი კრიზისული ვითარება, პირდაპირ აისახა აღნიშნული საბჭოს საქმიანობაზე, რომელიც არ/ვერ ასრულებს მასზე დაკისრებულ პასუხისმგებლობას. ბოლო ათი თვის განმავლობაში არ გამართულა არც ერთი სამუშაო შეხვედრა, მიუხედავად საბჭოს სხვადასხვა წევრის არაერთი მოთხოვნისა.

ე.წ. გამჭვირვალობის (რუსული) კანონის წინააღმდეგ საბჭოს მიერ გავრცელებულ განცხადებას მოჰყვა საბჭოს კოორდინატორის, კობა ჩოფლიანის მხრიდან საბჭოს საქმიანობაში უხეში ჩარევა, საბჭოს წინააღმდეგ მისი სახელით გავრცელდა ხელმომწერებისთვის შეურაცხყმყოფელი და ცილისმწამებლური განცხადება. ასევე, ჩვენთვის ცხადი გახდა, რომ მას და იზაბელა ოსიპოვას, საბჭოს წევრებთან და ტოლერანტობის ცენტრის ხელმძღვანელთან შეუთანხმებლად, სურთ საბჭოს საქმიანობის წარმართვა.

აგრეთვე საბჭოს შიგნით კოორდინატორების მხრიდან იდევნება კრიტიკული და განსხვავებული აზრი, ისინი პირადად წყვეტენ რომელ საბჭოს წევრს მიიწვევენ ამა თუ იმ შეხვედრასა თუ ღონისძიებაზე, რაც პირდაპირ ეწინაღმდეგება აღნიშნული საბჭოს პრინციპებსა და ეთნიკური უმცირესობების ინტერესებს.

აქედან გამომდინარე საბჭოში შემავალმა ორგანიზაციების თუ ფიზიკურმა პირების ერთმა ნაწილმა, რომლებიც წარმოადგენენ ქვეყნის სხვადასხვა ეთნიკურ უმცირესობებს, მიიღეს ერთობლივი გადაწყვეტილება –  ერთი მხრივ, უფუნქციო საბჭოს დატოვების თაობაზე, ხოლო მეორე მხრივ, ახალი – ეთნიკური მრავალფეროვნების – საბჭოს დაარსებაზე.

ეთნიკური მრავალფეროვნების საბჭოში შემავალ ყველა სუბიექტს აქვს სურვილი, რომ მათი საქმიანობა რეალურად ასახავდეს ქვეყანაში მცხოვრები ეთნიკური უმცირესობების საჭიროებებს, საზოგადოებას აწვდიდეს ამომწურავ ინფორმაციას ეთნიკური უმცირესობების წინაშე არსებული გამოწვევების შესახებ, აჟღერებდეს მათ სათქმელს სხვადასხვა ფორუმისა თუ პლატფორმის გამოყენებით და მუშაობდეს ადგილობრივი თემების პრობლემების მოგვარებაზე.

აგრეთვე, ხელს უწყობდეს ქვეყნის ეთნიკური მრავალფეროვნების ისტორიის გადააზრებას, თანასწორობის პრინციპების დამკვიდრებასა და გამყარებას“-ნათქვამია განცხადებაში, რომელიც დღეს, 1 თებერვალს გავრცელდა.

საბჭო დატოვეს შემდეგმა პირებმა:

• ელნურ ალისოი – სოლიდარობის მოძროაბა.
• ზაზა კალაშოვი – ქუთული ორგანიაზაცია რონაი.
• რაშან ზიადალიევი – სამოქალაქო ჩართულობისა და ატივიზმის ცენტრი.
• ჯეიხუნ მუჰამედალი – წითელი ხიდი.
• ალექსანდრე ქავთარაძე – საქართველოს უდიები.
• სამირა ისმაილოვა – სამოქალაქო თანასრორბის პლატფორმა
• გიორგი ტუმასიანი – საქართველოს სომხური სათემო პლატფორმა

___________________

მთავარი ფოტო: ეთნიკურ უმცირესობათა საბჭოს სხდომა/ფოტო: სახალხო დამცველის აპარატი.

„ჩვენ მოვითხოვთ მზია ამაღლობელის გათავისუფლებას, რადგან მის ქმედებას არ შეეძლო კონკრეტული ადამიანის ჯანმრთელობისთვის რაიმე საფრთხე შეექმნა, განსაკუთრებით იმ გარემოებაში, როდესაც ადგილი ჰქონდა არა ფიზიკურ თავდასხმას, არამედ უბრალოდ სილის გაწვნას, რომელიც ცხადად სიმბოლურ ხასიათს ატარებდა,“ – ნათქვამია პოლიტიკური პარტია „გირჩის“ დღეს, 1-ელ თებერვალს გავრცელებულ განცხადებაში.

გირჩის პოლიტიკოსები თვლიან, რომ მზია ამაღლობელის ქმედება არ არის სისხლის სამართლის დანაშაული, შესაბამისად მის მიმართ არ უნდა იქნეს გამოყენებული პატიმრობა.

„პოლიციელის მუნდირისა და სახელმწიფოს უპატივცემულობაზე ყურადღების გამახვილებით, ხელისუფლება იმეორებს კომუნისტური ეპოქის მიდგომებს, ხოლო ხუთწლიანი პატიმრობის მუქარა, სილის გაწვნისთვის, არა მხოლოდ გადაჭარბებულია, არამედ უფრო ღრმა ეთიკურ, სამართლებრივ და სისტემურ პრობლემებზე მიუთითებს, რაც კიდევ ერთხელ და ნათლად აჩვენებს, რომ მთელი სასამართლო და ძალოვანი სისტემა ხელისუფლების ჯიბეში ზის და გამოიყენება მმართველი ძალის დასაცავად. ამიტომ, საქართველოში სამართლებრივი სისტემა სერიოზულ რეფორმას საჭიროებს,“ – ნათქვამია „გირჩის“ განცხადებაში.

——————————-

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

საქართველოს მართლმადიდებელი ეკლესიის დეკანოზი გიორგი წეროძე პროკურატურას მზია ამაღლობლის საქმეზე მიმართავს. ის პროკურატურას ბრალდების შერბილებისკენ მოუწოდებს.

„მზია ამაღლობლისთვის ღმერთმა ჩამასმინა ეს მომართვა საქართველოს პროკურატურისთვის, ამიტომ თქვენთან, ყველა ღმერთის მოყვარულისთვის სავალდებულო უნდა გახდეს.

შეარბილეთ ბრალდება.

თქვენც კარგად იცით, რომ ამ ვითარებასა და ამ ქმედებისთვის სისხლის სამართლის მუხლით საქმის აღძვრა და წინასწარი პატიმრობა შურისძიება და ფაქტობრივად სასჯელის დაწესებაა. (ასეა არა მარტო მზია ამაღლობლისთვის).

დაუთმეთ ადგილი სასამართლოს.

გახსოვდეთ, ყველა, ვინც ქრისტეს მოსვლამდე მიიტაცებს სასჯელის გამოტანის უფლებას – არის ანტიქრისტე. მორწმუნისთვის ეს დამღუპველია. ქრისტიანისთვის დამღუპველია იცოდეს სიკეთის კეთება და ვერ/არ აკეთოს, იცოდეს, რომ ცოდვას სჩადის და არ გადაიფიქროს. ის, ვისაც არ სწამს მკვდრეთით აღდგომა და ის, რომ ღმერთი ახლა ჩვენ შორის არის – სანქციებისა არ იყოს, მშრალი გამოვა წყლიდან.

აი, ღმერთის მოყვარულს კი გაუჭირდება. იმიტომ, რომ იცის – ცოდვას სჩადის, შურს იძიებს, იტაცებს სასამართლოს ფუნქციას და ღმერთის ხმას მაინც უგულებელყოფს.

ნუ მოტყუვდებით, რომ მხოლოდ პატრიარქმა ან ეპისკოპოსმა უნდა გაგაგონოთ მსგავსი შეგონება. ეს შეუძლია ყველა ქრისტეს მოყვარე ადამიანს და ასევე მეც, დეკანოზ გიორგი წეროძეს. 1პეტ 2:6-10: “თქვენა ხართ რჩეული მოდგმა, სამეფო სამღვდელოება, წილხვედრი ხალხი, რათა ყველას აუწყოთ მისი სიქველე, ვინც სიბნელიდან გამოგიხმოთ, რომ გეხილათ მისი საოცარი ნათელი. ოდესღაც არა ხალხი, ხოლო აწ ღვთის ხალხი, ოდესღაც არა შეწყალებულნი, ხოლო აწ შეწყალებულნი”.

ვისაც ღმერთი უყვარს, შემოგვიერთდით”, – წერს დეკანოზი.

—————————–

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

პირველ თებერვალს „ახალი თეატრი“ ბათუმში საპროტესტო თეატრალურ მანიფესტს გამართავს.

ბათუმის შემდეგ, 2 თებერვალს, სოლიდარობის მანიფესტი ზუგდიდში გაიმართება.

„ჩვენ მოვდივართ სოლიდარობისთვის, რომ ერთად ყოფნით გადავარჩინოთ ჩვენი ქვეყანა. ჩვენ ერთად გადავცურავთ ზღვას“ – აცხადებენ „ახალი თეატრის“ მსახიობები.

„ახალი თეატრი აგრძელებს მანიფესტის ტალღას და მთავარი ამ ყველაფერში არის ის, რომ ყველას, ვინც ჩამოვდივართ, გვაინტერესებს თქვენი მანიფესტი. ძალიან გვინდა თქვენი ხმა გავიგონოთ.

მჯერა ყველაფერი გამოგვივა, თუ ვიქნებით სოლიდარულები და თუ ვიქნებით ერთიანი“ – ამბობს მსახიობი ნანკა კალატოზიშვილი.

„მოვდივართ იმიტომ, რომ გავერთიანდეთ, მოვდივართ იმიტომ, რომ ერთმანეთს გავუზიაროთ ტკივილები და რაც მთავარია, მოგისმინოთ თქვენ. თქვენ ხართ მნიშვნელოვანი და თუ ასე ერთად ვიქნებით, ასე ბევრად უფრო იოლად გადავცურავთ ზღვას“- ამბობს თეატრის რეჟისორი დავით დოიაშვილი.

„მოვდივართ იმისთვის, რომ ერთმანეთს დავუდგეთ მხარში, ვაჩვენოთ ერთმანეთს სოლიდარობა“ – აცხადებენ მსახიობები.

„ახალი თეატრი“ ამით იწყებს საპროტესტო გასვლებს რეგიონებში.

ადვოკატი მაია მწარიაშვილი, რომელიც მზია ამაღლობელის ინტერესების ერთ-ერთი დამცველია, რუსთავის ქალთა კოლონიიდან გამოსვლის შემდეგ პატიმრის მდგომარეობას აფასებს.

როგორც მწარიაშვილი ამბობს, ნეტგაზეთი/ბათუმელების თანადამფუძნებელი და დირექტორი უფრო სუსტად გამოიყურება, ვიდრე ბოლო მონახულების დროს, ორი დღის წინ, უფრო ნელა მოძრაობს და საუბრობს. თუმცა, არ ითხოვს კლინიკაში გადაყვანას.

მწარიაშვილის თქმით, მათ ჩაიბარეს ყველა იმ ანალიზის პასუხი და სამედიცინო დოკუმენტაცია, რაც ამ დრომდე შეადგინეს ციხის ექიმებმა მზია ამაღლობელთან დაკავშირებით.

„როგორც იქნა, ჩავიბარეთ სამედიცინო დოკუმენტაცია დღევანდელი მდგომარეობით. გვითხრეს, რომ ეს არის ბოლო დოკუმენტაცია. ახლა სპეციალისტებს ვაჩვენებთ, თავისთავად ცხადია და მერე შეგვეძლება ვთქვათ რამე სამედიცინო კუთხით.

რაც შეეხება, სხვა თვალსაზრისით, 20 დღის ნაშიმშილები ადამიანი როგორც გამოიყურება, ისე გამოიყურება. თუმცა, საოცარი ადამიანია და კი არ ცდილობს, რომ დაგანახოს, რომ სუსტად არის. პირიქით, ამბობს, რომ არა, ჯერ ვუძლებ, არ შეწუხდეთ, კიდევ გავუძლებ და როცა ვერ გავუძლებ, მაშინ გეტყვით. გავუძლებ, იმ თვალსაზრისით, რომ რაიმე დამხარებას არ ითხოვს, სადმე გადაყვანას არ ითხოვს, ამბობს, რომ არა, ვუძლებ […]

21-ში იყო სისხლის საერთო. ჩავიბარეთ, ასევე, 28-ში რომელიც გაუკეთეს. ამ ანალიზის პასუხი, სანამ ჩვენ არ მივედით არ იცოდა. ახლა აჩვენეს, სავარაუდოდ და ჩვენ დოკუმენტები გადმოგვცეს. გვითხრეს, რომ დღევანდელის ჩათვლით ეს არის. თუმცა, შემდეგ კვირას გეგმავენ, როგორც მზიამ გვითხრა, უკვე სერიოზული კვლევების ჩატარებას, რომელიც აქ [ციხეში] ვერ ჩატარდება”, – განაცხადა მაია მწარიაშვილმა.

ადვოკატი ამბობს რომ დაუსაბუთებელია მზია ამაღლობელის დაპატიმრება ორივე შემთხვევაში – როგორც ადმინისტრაციული წესით, ისე სისხლის სამართლის კოდექსით. მწარიაშვილის შეფასებით, შეუსაბამოა მისთვის წარდგენილი ბრალიც. შეხვერდაზე მათ ეს საკითხებიც განიხილეს, თუმცა ადვოკატს საჯაროდ ამ დეტალებზე არ უსაუბრია.

მწარიაშვილის თქმით, ამაღლობელი თვალს ადევნებს ქვეყანაში მიმდინარე პროცესებს და წუხს შექმნილი ვითარების გამო. თუმცა, ამავე დროს, სურს, რომ საზოგადოების ყურადღება სხვა საკითხებზე გამახვილდეს და მისი პატიმრობა და შიმშილობა არ იყოს განხილვის „მთავარ თემა”.

„მე რასაც დავაკვირდი, ვიზუალურად, უფრო გამხდარია, ვიდრე ორი დღის წინ იყო. ნელა მოძრაობს უფრო. მანძილი უნდა გამოიაროს [ადვოკატთან შესახვედრად] და თავისთავად, ნელა მოძრაობს. შეხვედრის ოთახში რომ შემოვიდა, დაჯდა და რაღაც პერიოდი დასჭირდა, რომ დამშვიდებულიყო და მერე საუბარი გაგვეგრძელებინა. დამშვიდებულიყო იმ თვალსაზრისით, რომ დაღლილი იყო.

უფრო ნელა საუბრობს, ვიდრე იქამდე. თუმცა, სხვადასხვა თემებზე ვისაუბრეთ. საქმესთან დაკავშირებით რაღაცებზე ვისაუბრეთ. მისი მოსაზრებები იცით. ძალიან წუხს მის მიმართ მაღალი ყურადღებით და ყველაზე ჯერზე გვეუბნება, რომ მე არა ვარ მთავარი თემა. არაერთი უკანონოდ დაკავებული, დაპატიმრებული, ნაცემი ადამიანია და არ მინდა, რომ მე ვიყო მთავარი ამბავი ქვეყანაში. ევროსაბჭოს ამ ბოლო ამბებზე იყო ძალიან, ძალიან შეწუხებული”, – განაცხადა მაია მწარიაშვილმა რუსთავის ქალთა კოლონიიდან გამოსვლის შემდეგ.

ნეტგაზეთი/ბათუმელების დირექტორი, მზია ამაღლობელი უკვე 20 დღეა რაც შიმშილობს.

ის 11 იანვარს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა “იფიცება საქართველო”, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა. 14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა.

მზია ამაღლობელისთვის შეფარდებული აღკვეთის ღონისძიება მისმა ადვოკატებმა ქუთაისის სააპელაციო სასამართლოში გაასაჩივრეს. თუმცა ქუთაისის სააპელაციო სასამართლომ საჩივარი არც კი განიხილა.

არაერთი იურისტისა და უფლებადამცველის შეფასებით, მზიას ამაღლობელის ქმედება შეუსაბამოა მისთვის წარდგენილ ბრალთან. სპეციალისტები განმარტავენ, რომ მასი ქმედება ბევრად უფრო მსუბუქია, ვიდრე პროკურატურა ედავება. ბევრი მათგანი თვლის, რომ ეს საერთოდ არ არის დანაშაული და მხოლოდ ადმინისტრაციულ სამართალდარღვევად უნდა ჩაითვალოს.

კინორეჟისორი ლანა ღოღობერიძე მზია ამაღლობლის შესახებ პოსტს აქვეყნებს და მის გათავისუფლებას ითხოვს.

„აუტანელია ფიქრი მზიაზე, რომელიც ჩვენ თვალწინ წირავს თავს – წირავს თავს სამშობლოსთვის, ჩვენთვის, ყველასათვის და შენ არაფერი არ შეგიძლია გააკეთო იმისათვის, რომ ეს ტრაგედია არ დადგეს! აქ ყოველი ჩვენგანის განცდები თუ ღამის კოშმარები მოსატანიც არ არის. თან ის ისეთი სადაა, ისეთი  გულწრფელი, ისე უბრალოდ ითხოვს, მის ჯანმრთელობაზე არ ვილაპარაკოთ! და ჩემთვის ნათელია, მასში ის უიშვიათესი კოდია ჩადებული – სამშობლოსთვის თავგანწირვის კოდი. ეს ის ადამიანებია, მერე გმირებს რომ ვეძახით!

დღეს კი არსებობს ერთადერთი გამოსავალი – თავისუფლება მზიას! თქვენ, ვისაც ეს ხელგეწიფებათ, შეისმინეთ არა მარტო ჩვენი, არამედ მსოფლიოს მთელი დემოკრატიული საზოგადოების მომართვა: ჩაიდინეთ ეს ელემენტარული სამართლიანი აქტი, თუ არ გინდათ ისტორიაში უმძიმესი სახელწოდებით დარჩეთ.

მზია კი ისტორიაში უკვე შევიდა საქართველოსთვის თავდადებული გმირის სახელით,” – წერს რეჟისორი.

——————————————————-

„ნეტგაზეთისა“ და „ბათუმელების“ დამფუძნებელი და დირექტორი, მზია ამაღლობელი 11 -12 იანვრის ღამეს ორჯერ დააკავეს. პირველად საპროტესტო შინაარსის პლაკატის გაკვრის გამო, რომელზეც ეწერა „იფიცება საქართველო“, მეორედ – ბათუმის პოლიციის უფროს ირაკლი დგებუაძისთვის სილის გაწვნის გამო სისხლის სამართლის კოდექსის 353¹ მუხლით, პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციულ ქმედებებს მოჰყვა.

მზია ამაღლობელი დაკავების დღიდან პროტესტის ნიშნად შიმშილობს.

სახალხო დამცველის წარმომადგენლებმა, მათ შორის ექიმმა, პენიტენციურ დაწესებულებაში მოშიმშილე მზია ამაღლობელი კიდევ ერთხელ მოინახულეს.

სახალხო დამცველის აპარატის ცნობით, ექიმი გაესაუბრა მზია ამაღლობელს, გაეცნო მის სამედიცინო დოკუმენტაციას და გაესაუბრა პენიტენციური დაწესებულების სამედიცინო პერსონალს.

„მზია ამაღლობლის ჯანმრთელობის მდგომარეობა ამ ეტაპზე დამაკმაყოფილებელია. ამავდროულად, უნდა აღინიშნოს, რომ მას დაკავებამდე ჰქონდა ჯანმრთელობის კონკრეტული პრობლემები და შიმშილობის ფონზე არსებობს მისი გართულების რისკი. მზია ამაღლობელს უტარდება სამედიცინო კვლევები და იმყოფება ინტენსიური სამედიცინო მეთვალყურეობის ქვეშ. სახალხო დამცველის აპარატმა მიიღო მიმდინარე კვირაში ჩატარებული უახლესი გამოკვლევების შედეგები, რაც დღეს უკვე მიეწოდა ადვოკატს“, – აცხადებს სახალხო დამცველი.

ამასთან, ომბუდსმენის აპარატი ეხმაურება კონსილიუმის შექმნასთან დაკავშირებულ კითხვებს და განმარტავს, რომ არც თავად მზია ამაღლობელს, არც მის ოჯახს და არც მის კანონიერ წარმომადგენლებს, მსგავსი მოთხოვნა არ დაუყენებიათ.

„სახალხო დამცველი განიხილავს, კანონმდებლობით მისთვის მინიჭებული მანდატის ფარგლებში, დამატებითი სპეციალისტების მოწვევის საკითხს, ასეთის აუცილებლობის გამოვლენის შემთხვევაში. ამ ეტაპზე, მზია ამაღლობლისთვის პენიტენციური სამსახურის მხრიდან სამედიცინო სერვისების მიწოდების საკითხზე სახალხო დამცველი აქტიურ მონიტორინგს ახორციელებს აპარატში დასაქმებული ექიმის დახმარებით, ისევე, როგორც სხვადასხვა დროს არაერთი სხვა მოშიმშილე პატიმრის შიმშილობისა თუ სხვა ჯანმრთელობის პრობლემების მართვის მონიტორინგის პროცესში“, – ნათქვამია განცხადებაში.

ამავდროულად, სახალხო დამცველის აპარატი განმარტავს, რომ არ ერთვებოდა და არ ერთვება პატიმრების მკურნალობის პროცესში და ომბუდსმენის მანდატი პატიმრისთვის სამედიცინო მომსახურების მიწოდებაზე მონიტორინგია, რაც დაკავებულთა ჯანდაცვის უფლებას უკავშირდება.

სახალხო დამცველი აცხადებს, რომ თუ იმ სამედიცინო მასალების საფუძველზე, რასაც სახალხო დამცველის აპარატი გადასცემს დაცვის მხარეს, მათგან იქნება დაყენებული დამატებითი კვლევებისა თუ სხვაგვარი სამედიცინო მომსახურების საჭიროების საკითხი, კომპეტენციის ფარგლებში დამატებით რეაგირებას მოახდენს.

მზია ამაღლობელი მე-20 დღეა შიმშილობს. ის მხოლოდ წყალს იღებს.

დღეს, 31 იანვარს, ბათუმში, სპეციალურ საგამოძიებო სამსახურთან  „ბათუმელები“ მზია ამაღლობელთან დაკავშირებული კითხვებით მივიდა.

კითხვები, რომელთაც საგამოძიებო სამსახური რამდენიმე დღეა არ პასუხობს, ასეთია:

• რატომ არ ენიჭება მზია ამაღლობელს დაზარალებულის სტატუსი?
• გამოკითხეთ ბათუმის პოლიციის უფროსი  ირაკლი დგებუაძე?
• რა საგამოძიებო მოქმედებები ჩაატარეთ ირაკლი დგებუაძის მხრიდან ჩადენილ სავარაუდო დანაშაულზე?
• რატომ არ უჩერდება ბათუმის პოლიციის უფროსს, ირაკლი დგებუაძეს გამოძიების დასრულებამდე სამსახურებრივი უფლებამოსილება?
• რატომ დაიწყეთ გამოძიება სამსახურებრივი უფლებამოსილების გადამეტების მუხლით და არა არაადამიანური, დამამცირებელი მოპყრობის მუხლით, რაზეც მზია ამაღლობელი საუბრობს?
• ირაკლი დგებუაძე 2023 წელსაც დაადანაშაულეს ფეხის სახეში ჩარტყმაში, „გენრი დოლიძის საქმე“, მოქალაქის გინება – „ხათუნა ბერიძის საქმე“, პისტოლეტით დამუქრებაში – „კახა გურგენაძის საქმე“… რა გამოიძიეთ?
• რატომ არ გამოიძიეთ საპროტესტო აქციებზე ჟურნალისტებზე თავდასხმის ფაქტები?
• როდის დაიწყებთ გამოძიებას ირაკლი დგებუაძის მხრიდან მზია ამაღლობლის მიმართ არაადამიანურ და დამამცირებელ მოპყრობაზე?

რადგან საგამოძიებო სამსახური არც წერილობით  და არც სატელეფონო საუბარში არ სცემდა ამ კითხვებზე პასუხს, დღეს „ბათუმელები“ შეეცადა პირდაპირ ჩართვაში დაესვა ეს კითხვები სპეციალური საგამოძიებო სამსახურის აჭარის სამმართველოს უფროსისთვის, გიორგი პერანიძისთვის.

ჩვენ მას ბათუმში, სამსახურის შესასვლელთან დავხვდით და ვკითხეთ, რატომ არ ამზადებენ შესაბამის დასკვნას „ბათუმელები“/„ნეტგაზეთის“ დამფუძნებლის მზია ამაღლობლის საქმეზე, რომელიც უნდა გადაეგზავნოს პროკურატურას, რის შემდეგაც მზია ამაღლობელს უნდა მიენიჭოს დაზარალებულის სტატუსი.

გიორგი პერანიძემ „ბათუმელების“ ლაივში სტანდარტული კომენტარი გააკეთა, თუმცა კითხვებს მაინც არ გასცა ამომწურავი პასუხი.

„როგორც სამსახურმა გაავრცელა რელიზი, თქვენთვის და საზოგადოებისთვის ცნობილია, საქმეზე მიმდინარეობს გამოძიება აქტიურ რეჟიმში, ტარდება საგამოძიებო და საპროცესო მოქმედებები ქალბატონ მზიას საქმესთან დაკავშირებით.

დაზარალებულად ცნობის საკითხი სპეციალურ საგამოძიებო სამსახურის კომპეტენციას სცილდება, ამ ეტაპზე სხვას ვერაფერს მოგახსენებთ, თუ სურვილი აქვთ ქალბატონ მზიას ადვოკატებს და უფლებადამცველებს, ნებისმიერ დროს შეუძლიათ მოგვმართონ საქმის მასალების გასაცნობად“ – განაცხადა მან „ბათუმელების“ პირდაპირ ჩართვაში.

გიორგი პერანიძემ ასევე არ უპასუხა ჩვენს კითხვას, დაიკითხა თუ არა ბათუმის პოლიციის უფროსი ირაკლი დგებუაძე მზია ამაღლობლის მიმართ განხორციელებული არაადამიანური და დამამცირებელი მოპყრობის ფაქტზე.

რა უნდა გააკეთოს სპეციალურმა საგამოძიებო სამსახურმა იმისთვის, რომ მზია ამაღლობელი დროულად ცნოს პროკურატურამ დაზარალებულად?

როგორც საია განმარტავს, ვინაიდან ამ საქმეს იძიებს სპეციალური საგამოძიებო სამსახური, [პოლიციის დანაშაულებრივ ქმედებებთან დაკავშირებულ საქმეებს], ისინი ვალდებულნი არიან, შეაგროვონ მტკიცებულებები.

„მინიმალური სტანდარტით მაინც უნდა შეაგროვონ მათ მტკიცებულებები და გამოკვეთონ ის, რომ ქალბატონი მზია ამაღლობელი დანაშაულებრივი ქმედების შედეგად არის დაზარალებული. ამის შემდეგ პროკურორი ვალდებულია, დაზარალებულად ცნოს პირი, რის შედეგადაც დაცვის მხარესა და დაზარალებულს ექნებათ უფლება იმისა, რომ საქმის მასალებს გაეცნონ.

აქამდეც უნდა ყოფილიყო მზიას დაზარალებულად ცნობა,“ – ამბობს ჯუბა ქათამაძე, საიას იურისტი, რომელიც მზია ამაღლობლის ინტერესებს იცავს.

მისივე თქმით, კონკრეტული ვადები არ არის განსაზღვრული კანონში, თუ რამდენ ხანში უნდა შეაგროვოს საგამოძიებომ მტკიცებულებები დაზარალებულად ცნობის თაობაზე, თუმცა როგორც ჯუბა ქათამაძე განმარტავს, სწრაფად უნდა შეგროვდეს ეს მტკიცებულებები.

„პრაქტიკაში არის ერთი თვე დაახლოებით, მაგრამ ჩვენ უკვე ვაპირებთ მივმართოთ აღნიშნულთან დაკავშირებით პროკურატურას, რადგან გამოძიებაზე ზედამხედველი პროკურატურაა და მათი ვალდებულებაცაა ეს.

თუ, რა თქმა უნდა, არ შეაგროვეს მტკიცებულებები და არ შეასრულეს თავიანთი ვალდებულება, დაზარალებულად ცნობაზე ზედმეტია ლაპარაკი,“ – ამბობს ჯუბა ქათამაძე.

„ბათუმელების“/„ნეტგაზეთის“ დამფუძნებელი მზია ამაღლობელი ბათუმში, პოლიციის სამმართველოს წინ დააკავეს.

დაკავებისას და შემდეგ, მას პოლიციის უფროსი ირაკლი დგებუაძე არაადამიანურად და დამამცირებელად მოეპყრო, რის გამოც საია მოითხოვს, პოლიციის უფროსს გამოძიების დასრულებამდე შეუჩერდეს უფლებამოსილება და დაიწყოს გამოძიება აღნიშნულ ფაქტზე, მზია ამაღლობელს კი, რომელიც იზოლატორში მე-20 დღეა შიმშილობს, მიენიჭოს დაზარალებულის სტატუსი.

30 იანვარს დააკავეს ზუგდიდის აქციების მედროშე, შალვა ესართია.

ზუგდიდელი აქტივისტი და „დროას“ წევრი, მარიამ სიჭინავა ფეისბუქზე წერს, რომ შალვა ესართია დააკავეს იმისთვის, რომ პოლიციის შენობაში, სადაც დაიბარეს ადმინისტრაციული სამართალდარღვევის ოქმის ჩასაბარებლად, იგი ტელეფონით შევიდა.

„პოლიცია სთხოვდა ტელეფონის ჩაბარებას, რაზეც შაკომ უარი განაცხადა. ახლა საქმე არის ორი მუხლით, 173-ე – პოლიციის კანონიერი მოთხოვნისადმი დაუმორჩილებლობა და 174-ე – აქციაზე სახის დამფარავი საშუალებით მისვლა“ – წერს მარიამ სიჭინავა.

შალვა ესართიას მეუღლის, მარიკა ნადარაიას თქმით, შალვა ესართია გადაყვანილია ფოთის იზოლატორში. „თვითონ ძალიან მხნედ გრძნობს თავს. ადვოკატი შესული იყო, ესაუბრა, თქვა, რომ არანაირ ძალადობას ადგილი არ ჰქონია“ – ამბობს მარიკა ნადარაია.

შალვა ესართია საქართველოში მიმდინარე საპროტესტო აქციების მეორე მედროშეა, რომელიც დააკავეს. აქამდე პოლიციამ ბათუმში დააკავა თემურ ქათამაძე [ჯაფარ ილმაზი], რომელიც ციხეში შიმშილობს.

ზუგდიდში, ბათუმში, ქუთაისში, თბილისსა და საქართველოს სხვა ქალაქებში ორ თვეზე მეტია მიმდინარეობს პროევროპული საპროტესტო აქციები.

აქტივისტების დაკავების, თავდასხმის, პოლიციისა და სპეცრაზმის მიერ აქციების დარბევის მიუხედავად, პროტესტი არ წყდება. პროტესტის ორი მთავარი მოთხოვნაა: ხელახალი, სამართლიანი საპარლამენტო არჩევნები და აქციაზე დაკავებული პირების გათავისუფლება.

___________

ფოტოზე: ზუგდიდელი აქტივისტები შალვა ესართიას მხარდამჭერი პლაკატით.

„მოვკვდები სიმართლისთვის“- ამბობს ლაშა ჩხვიმიანი, მსახიობი, რომელიც მეორე დღეა დმანისის მერიის წინ შიმშილობს.

მოშიმშილე მსახიობი „ბათუმელებთან“ საუბარში ხსნის, თუ რატომ გახდა საჭირო ასეთი რადიკალური ნაბიჯის გადადგმა სიმართლის დასაცავად.

„იმ უსამართლობის გამო, რასაც განსაკუთრებით ამ ბოლო თვეების განმავლობაში ვხედავთ“-ამბობს ლაშა ჩხვიმიანი.

ის სოლიდარობას უცხადებს „ბათუმელების“/„ნეტგაზეთის“ დამფუძნებელ მზია ამაღლობელს, რომელიც ივანიშვილის რეჟიმის პატიმარია და იზოლატორში მე-19 დღეა შიმშილობს.

„გუშინ, როცა გამოვდიოდი სახლიდან, „იმედზე“ გადიოდა კობახიძის ინტერვიუ, სადაც ცინიკურად ლაპარაკობდა ადამიანზე (მზიაზე), რომელიც მე-19 დღეა შიმშილობს და არ ვიცით როგორი დღე გაუთენდება ხვალ. არ შემიძლია ამ საშინელების წინაშე მდუმარედ ვიდგე და უმოქმედოდ ვიდგე“- ამბობს ლაშა.

რა შეიძლება დაუპირისპიროს საზოგადოებამ ამ ცინიზმს და გულგრილობას? – ვკითხეთ მას.

ლაშას ხალხის იმედი აქვს.

„ერთადერთი, ხალხის იმედი მაქვს მხოლოდ, რადგან ხალხი, რომელიც ხედავს უსამართლობას, ხედავს, რომ უსამართლოდ ჩატარდა არჩევნები და როგორ უკანონოდ დაიჭირეს ამ უსამართლო არჩევნების გასაპროტესტებლად გამოსული ხალხი.

მე არ შემხვედრია ხალხი, ვისაც ამის საწინააღმდეგო არგუმენტი ჰქონოდა, ყველა ვთანხმდებით, რომ დღეს უსამართლობაში ვცხოვრობთ.

უბრალოდ ერთია, ვეგუებით ამ უსამართლობაში ცხოვრებას, თუ არ ვეგუებით. მე ვერ წარმომიდგენია ამაზე თვალი დავხუჭოთ“- ამბობს ლაშა.

მისი თქმით, სისტემამ ყველაზე მეტად რეგიონებში მცხოვრები ადამიანები დაასუსტა და დააშინა. ახლა კი ამ სისუსტეზე დგას რეჟიმი.

„ვითომ ხომ „მოიგეს“ არჩევნები რეგიონებში, მაგრამ ყველაზე მეტად რეგიონებშია ხალხი გამწარებული, ყველაზე მეტი პრობლემები დღეს რეგიონებს აქვთ. უბრალოდ, ყველაზე მეტად გაღარიბებულია ხალხი რეგიონში და ყველაზე მეტად გამოჭერილი ჰყავთ.

დმანისის მაგალითზე ვიტყვი, 20 ათასი ადამიანიდან 9 ათასი ადამიანი სოციალურად დაუცველია და მათ ქცევაზეა დამოკიდებული მათი ხვალინდელი დღე.

ისინი ზედა რგოლს გააფერადებდნენ საარჩევნო ბიულეტენში თუ ქვედა რგოლს, რომელიც ჩანდა, ამაზე იყო დამოკიდებული, შეუნარჩუნდებოდათ თუ არა მათ ეს 300-ლარიანი დახმარებები. გააღარიბეს და შეაშინეს ხალხი და ამ სიღარიბესა და შიშზე დგას ეს ხელისუფლება.

მაგრამ ხალხმა ხომ უნდა გავიგოთ, რომ ჩვენზეა დამოკიდებული ეს ხელისუფლება და ჩვენ არ ვართ მასზე დამოკიდებული.

როგორც კი ჩვენ უსამართლობის წინააღმდეგ გავერთიანდებით, მაშინვე ჩამოიშლება ეს სისტემა, „სახელმწიფოს“ რომ უწოდებს რამდენიმე ასეული ადამიანი.

არა მგონია, ვინმეს გაცნობიერებული არ ჰქონდეს რა ხდება, მაგრამ რაღაც გვაკლია სრული ერთიანობისთვის.

ჩვენ თვალწინ ადამიანს უსამართლოდ სცემენ და ეს ხომ ფაქტია. ჩვენ თვალი უნდა ავარიდოთ ამას? ფაქტია, რომ დაგვიჭირეს, ფაქტია, რომ აქციებზე დაჭერილ, პოლიციის ფურგონში შეყრილ ადამიანებს სცემეს, დაასახიჩრეს ადამიანები. ამიტომ არ ვიცი, როგორ შეგვიძლია, რომ გავჩუმდეთ.

ეს უნდა გავიაზროთ, რომ ძალა არის ჩვენს ხელში, ჩვენს გაერთიანებაში და არანაირად არ ვართ ხელისუფლებაზე დამოკიდებული. პირიქით, ისინი დგანან ახლა ჩვენს გაუბედაობასა და შიშზე“- ამბობს ლაშა ჩხვიმიანი.

მისი აზრით, ყველაფერი მალე დამთავრდება, თუ ხალხმა ეს ნაბიჯი ერთად გადადგა.

„ახლა ჭაობის პირას ვდგავართ. ერთ ნაბიჯს გადავდგამთ და გადავეშვებით ჭაობში. ისეთი კანონები აქვთ მიღებული, ისეთი გეგმები აქვთ, ჩვენ რომ დაველოდოთ მომდევნო საპარლამენტო არჩევნებს, სახელმწიფო აღარ იარსებებს, ჩამოყალიბებული დიქტატურა იქნება ჩვენს ქვეყანაში და ამიტომ აღარ უნდა ჩავდგათ იმ ჭაობში ფეხი.

გადამწყვეტ მომენტში ვართ და ეს ხომ ყველამ ვიცით, რუსეთის მაგალითები ხომ ვიცით, რა მოხდა იქ. აი, ამ ზღვარზე ვდგავართ. გადავეშვებით ან გადავრჩებით.

ამიტომ ჩავთვალე, რომ რადიკალური ზომა იყო ახლა მისაღები. ბევრი ადამიანი ვანერვიულე ჩემი გადაწყვეტილებით, მაგრამ ჩვენ ძალიან ლამაზი, მრავალფეროვანი პროტესტი ვცადეთ ამ ორი თვის განმავლობაში, მიუხედავად იმისა, რაც ჩვენ გაგვიკეთეს, – გაგვიყალბეს არჩევნები, თეთრზე შავად გაჟონა და სასამართლოზე გვითხრეს, რომ არ გაუჟონია, გამოვედით ამის გასაპროტესტებლად და გვცემეს და ჩვენ მაინც ვითმენდით მშვიდობიანი, არაძალადობრივი მეთოდებით, მაგრამ რაღაცნაირად მგონია, რომ დადგა დრო, უფრო რადიკალურები ვიყოთ“- გვითხრა ლაშამ.

ლაშა ბოლო წლებში დმანისის სახელმწიფო თეატრის სამხატვრო ხელმძღვანელი იყო, თუმცა წულუკიანის კულტურის მინისტრად დანიშვნის შემდეგ, თეატრიდან წამოვიდა და დმანისში  მულტიფუნქციური სახელოვნებო სივრცე ააშენა.

„ეს იყო პირველი, სახალხო დაფინანსებით აშენებული სივრცე, „შეხვედრის ადგილი“, სადაც თეატრიც იქნება, კაფეც, წიგნების მაღაზიაც და ასე შემდეგ.

მას შემდეგ, რაც შიმშილობა დაიწყო, ლაშა ამბობს, რომ ბევრმა ადამიანმა გამოხატა მის მიმართ სოლიდარობა.

„საერთოდ, ამ ორი თვის პროტესტის განმავლობაში ბევრმა დმანისელმა აღმოვაჩინეთ ერთმანეთი, ბევრი საინტერესო საპროტესტო აქტივობებიც გვქონდა და გავაძლიერეთ ერთმანეთი და დღეს არიან ადამიანები, რომლებიც მეიმედებიან და აქვთ სურვილი, რომ ამ ჩემს პროტესტზე რაღაც დავაშენოთ, გაკეთდეს რაღაც გამოღვიძებისთვის“- გვეუბნება ის.

ვინც მერიაში შედის და გამოდის, იმ ადამიანების სახეებზე თუ კითხულობთ ემოციებს და რა ემოციებია ეს, გრძნობთ სოლიდარობას თუ არა? – ვკითხეთ ლაშას.

„ბევრი „ოცნების“ მხარდამჭერი და თვითმმართველობაში დასაქმებული ახლობელი, ვისაც არც კი ველაპარაკებოდი, ასეთი ადამიანები მოვიდნენ ჩემთან და ღელავენ ჩემ გამო.

ვისაუბრეთ და კიდევ ერთხელ დავრწმუნდი, რომ ყველა ვხედავთ ამ უსამართლობას. უბრალოდ, გვინდა, რომ ახლა ერთად გავიდეთ.“ – ამბობს ლაშა ჩხვიმიანი.