აჭარის ფინანსთა და ეკონომიკის სამინისტროს ნაერთი ბიუჯეტის განყოფილების უფროსი ლელა მიქალაძე გაიფიცა. მან გვითხრა, რომ დილით იმყოფებოდა სამსახურში და დახვდა ვითარება, რაც ბოლო წვეთი იყო მისთვის, ამიტომაც სწრაფად მიიღო გადაწყვეტილება და გამოაცხადა, რომ გაფიცულია:
„ისე იქცევიან, თითქოს არაფერი ხდება. მე ყოველთვის მქონდა ჩემი აზრი და ვაფიქსირებდი, მაგრამ ის, რომ თითქოს არაფერი ხდება…
ახალი მოადგილეების წარდგენისთვის ემზადებიან, ეს ბოლო წვეთი იყო ჩემთვის. მინისტრს არ შევხვედრივარ. მოადგილემ დამირეკა და ინფორმაცია მთხოვა, ვუთხარი, რომ სხვას სთხოვოს, რადგან გაფიცული ვარ. რა თქმა უნდა, ვაპროტესტებ როგორც ძალადობას, ასევე არჩევნების გაყალბებას“ – უთხრა ლელა მიქელაძემ „ბათუმელებს“.
გაფიცვის შესახებ ლელა მიქალაძემ ფეისბუქის გვერდზეც დაწერა:
სქრინი
ლელა მიქალაძეს ვკითხეთ, რა განწყობაა სამინისტროში და აპროტესტებენ თუ არა მისი თანამშრომლები არჩევნების შედეგებს, და, ასევე, ძალადობას აქციის მონაწილეებზე. მან გვითხრა, რომ სხვის ნაცვლად ვერ ისაუბრებს.
„ბათუმელების“ ინფორმაციით, სამინისტროს რამდენიმე თანამშრომელი აქციებზე იმყოფებოდა, თუმცა მათ საჯარო განცხადებები არ გაუკეთებიათ.
