Batumelebi

მამუკა თურმანიძე

ბატონო მამუკა, როგორც სამაშველო სამსახურის უფროსი, როგორ შეაფასებთ 2014 წელს, მძიმე სამუშაო წელი გქონდათ?

2014 წელი კატაკლიზმებით დაიწყო, უხვი ნალექი მოვიდა მაღალმთიან მუნიციპალიტეტებში, რამაც გამოიწვია სპეციალური სამსახურების პარალიზება, ერთადერთი დასაყრდენი მოსახლეობისთვის იყო სამაშველო სამსახური, სასწრაფო დახმარების მანქანები ვერ მიდიოდნენ საჭიროების მქონე პირებთან, ჩვენს თანამშრომლებს უწევდათ სასწრაფო დახმარების ფუნქციების შეთავსებაც, საკაცეზე დაწვენილი ავადმყოფები სამი-ოთხი საათის სავალ გზაზე ჩამოჰყავდათ ფეხით, მათ შორის ფეხმძიმე ქალებიც, რომლებმაც იმშობიარეს რამდენიმე საათში.

საგზაო დეპარტამენტის ფუნქციების შესრულებაც გვიწევდა, ძალიან მძიმე დღეები იყო, მაგრამ შემიძლია ვთქვა, რომ არც ერთი ოჯახი არ დაგვიტოვებია უყურადღებოდ. ამას უძღვოდა მძიმე ტურისტული სეზონი, წელს ტურისტების შემოსვლით, მივუახლოვდით იმ ნიშნულს, რომელიც არ დაფიქსირებულა საქართველოში კომუნისტური პერიოდის შემდეგ. იყო ისეთი შემთხვევებიც, როცა რეგიონიდან გასვლა გვიწევდა. შემოდგომაზე იყო სამი საგანგებო მდგომარეობა აჭარაში, ექვსბალიანი შტორმით. მძიმე წელი იყო, თუმცა ჩვენი მთავარი მიზანია სამაშველო ოპერაციებისთვის თავის გართმევა. 25 პროცენტით გაიზარდა წელს გამოძახება, უპრეცედენტო ნიშნულს ვუახლოვდებით. შემიძლია ვთქვა, რომ წლევანდელი სეზონი წარმატებით სრულდება, რადგან წელს ჩვენი მუშაობის შედეგად შემცირებულია გარდაცვლილთა რიცხვი.

სამაშველო სამსახურში რამდენი ხანია მუშაობთ?

2011 წლიდან – ერთი წლის განმავლობაში ვიყავი სამაშველო სამსახურის უფროსის მოადგილე, შემდეგ ჩვენმა ხელმძღვანელმა გადაინაცვლა სხვა სამსახურში, მე დავინიშნე სამაშველო სამსახურის უფროსის მოვალეობის შემსრულებლად, ექვსი თვის შემდეგ კი _ უფროსად.

აქ მოსვლამდე სად მუშაობდით?

ბათუმში დავიბადე და გავიზარდე, სკოლის დასრულების შემდეგ ვმუშაობდი სამკერვალო ფაბრიკაში, მერე გამიწვიეს ჯარში, მერე თამბაქოს ქარხანაში დავიწყე მუშაობა. პროფესიით ჟურნალისტი ვარ, ათი წლის განმავლობაში პირველ არხზე ვმუშაობდი, დავიწყე ოპერატორად და იქ მუშაობა დავასრულე რეჟისორის ამპლუაში. შემდეგ აღმოვჩნდი 31-ე საავიაციო ქარხნის უსაფრთხოების სამსახურში, ვიყავი ყოფილი პრემიერის, ბიძინა ივანიშვილის „ქართუ ჯგუფის“ დაცვაში, ოღონდ მაშინ ის პრემიერი არ იყო.

ჟურნალისტები ხშრად ამბობენ, რომ ყველაზე რთულ დროსაც პასუხობთ ჟურნალისტების შეკითხვებს, მოგწონთ ჟურნალისტებთან ურთიერთობა, თუ მიგაჩნიათ, რომ ეს საჭიროა თქვენი სამსახურისთვის?

ტელევიზიაში მუშაობის ათი წლის შედეგია ის, რომ მოგვარებული მაქვს ჟურნალისტებთან ურთიერთობა. ვიცი რას აკეთებენ ჟურნალისტები, როგორ სჭირდებათ ინფორმაცია. ვფიქრობ, რომ ინფორმაცია უნდა იყოს საჯარო, თუ არ წარმოადგენს სახელმწიფო საიდუმლოებას. მიზეზი, რის გამოც ვფიქრობ ასე, ერთი მხრივ, არის ჩემი გამოცდილება და მეორე მხრივ, ვფიქრობ, საჭიროა ჩვენი სამსახურის პოპულარიზაცია. ადამიანებმა ბოლო-ბოლო გაიგეს, რომ არსებობს სამაშველო სამსახური, რომელსაც შეიძლება მიმართო. წელს 112-ის მანქანებს უთმობდნენ გზას, ადრე ასე არ იყო, მხოლოდ უცხოელები გვითმობდნენ. ხოფის ბაზრობის აფეთქების თემაზე რომ ვთქვათ, თუ ჟურნალისტებმა არ გააშუქეს ეს თემა შესაბამისად, არ მოხდება დროული რეაგირება, ჟურნალისტები სვამენ კითხვებს, გვთავაზობენ ექსპერტების მოსაზრებებს, რითაც ნათელია, რომ ფეთქებადი ნივთიერებები არ უნდა იყიდებოდეს მსგავს დაწესებულებებში. ჩემი საუბარი ამ თემაზე მხოლოდ კაბინეტში ვერ შეცვლის ვერაფერს, ჩვენ ვიბრძვით პრევენციისათვის, მედია კი გვიმცირებს სამუშაოს.

თქვენი სამსახური გადადის შინაგან საქმეთა სამინისტროს დაქვემდებარებაში. როგორ ფიქრობთ, ეს ფაქტი ხომ არ დააზარალებს სამაშველოს მედიასთან ურთიერთობის  თვალსაზრისით?

შსს ერთ-ერთი სამმართველოს სახით გავაგრძელებთ მუშაობას იანვრიდან. ეს იმას ნიშნავს, რომ გამიჭირდება ჟურნალისტებთან ურთიერთობა. ადამიანი, რომელიც ატარებს სამუშაო ფორმას, უნდა იყოს ბრძანების მორჩილი, აქამდე მაძლევდნენ საშუალებას დამემყარებინა კომუნიკაცია მასმედიასთან, მე არ მეზარებოდა ღამის საათებში ჟურნალისტების ზარებზე პასუხი, მათ ვაგებინებდი ამბავს. სამწუხაროდ, ამას ვეღარ შევძლებ. ეს ფაქტი არ მახარებს, თუმცა მე ყველაზე დიდ დისკომფორტს შემიქნის ის, თუ არ შევასრულებ იმ ბრძანებას, რომელსაც დამავალებენ.

თქვენი ამ სამსახურში მუშაობის განმავლობაში რომელი მომენტი გახსენდებათ ყველაზე რთულად?

ახალსოფელში, ეკლესიის ჩამონგრევა მახსენდება. 40-ტონიანი გუმბათი ჩამოიშალა და მოიყოლა ოთხი სტიქაროსანი. ჩვენმა თანამშრომლებმა შეუძლებელი შეძლეს, რთული ვითარება იყო, სამწუხაროდ, ორი სტიქაროსანი გარდაიცვალა, ორის გადარჩენა კი, შემიძლია თამამად ვთქვა, ჩვენი ბიჭების დამსახურებაა, ბეტონის მასის ქვეშ შეძვრნენ მაშველები და გამაყუჩებლები გაუკეთეს სტიქაროსნებს, სასწრაფოს ექიმებმა ეს ვერ შეძლეს. მაშველები განსაცდელის გამო არ წუწუნებენ, იციან რა სამსახურშიც არიან. მე, პირადად, ყველაზე მძიმედ განვიცადე ერთი შემთხვევა: თბილისში მივლინებით ვიყავი, მეგობრის ოჯახში მეზობლის პატარა ბიჭმა დახმარება გვთხოვა, გვითხრა, რომ პაპა უკვდებოდა. როცა მივედი იმ ადამიანთან, უკვე გარდაცვლილი იყო, თუმცა გულის მასაჟითა და ხელოვნური სუნთქვით მოვაბრუნე, მაგრამ, სამწუხაროდ, ჟანგბადი არ მქონდა, სასწრაფომ კი დაიგვიანა. დღემდე განვიცდი ამას, ჟანგბადი რომ მქონოდა, ადამიანს გადავარჩენდი.

მამუკა თურმანიძე

ხშირ შემთხვევაში თავად გადიხართ შემთხვევის ადგილზე, გაქვთ ვალდებულება ოპერაციებში ჩართვის?

ჩემი უშუალო ვალდებულება არ არის, რომ ვესწრებოდე ოპერაციებს, ჩემი ფუნქციაა სამუშაო ადგილიდან დავგეგმო ოპერაცია, მაგრამ არ შემიძლია შედეგის ლოდინი სამსახურში, ვასწრებ ოპერაციაზე მისვლასაც, სამაშველო ოპერაციების 80 პროცენტს ვესწრები. მაშველი როცა ხედავს, რომ ხელმძღვანელი გვერდითაა, გაათმაგებულად მუშაობს, უფრო მონდომებულია, მეც ვერთვები სამაშველო პროცესებში.

გადაბმულად რამდენ ხანს გიმუშავიათ?

ქალაქის დატბორვისას ხუთი დღის განმავლობაში მაშველები სახლებში არ მივსულვართ, მხოლოდ რამდენიმე საათით ვისვენებდით ისევ ოფისში.

როგორი სამუშაოს შემდეგ ხართ კმაყოფილი?

ჩვენი სამსახურის კმაყოფილება მრავალგვარია, გააჩნია რა შემთხვევასთან გვაქვს საქმე. კმაყოფილი ვარ, როდესაც ადამიანს გადავარჩენ და კმაყოფილი ვარ მაშინაც, როცა გარდაცვლილს ვიპოვი, შარშან, მაგალითად, სომხეთიდან ჩამოსულ ბიჭს სამი დღე ვეძებდით ზღვაში, ცოლთან და ცოლის ძმასთან ერთად იყო ჩამოსული, ზღვაზე ისვენებდნენ, მოულოდნელად ტალღები ამოვარდა, ცოლმა და ცოლის ძმამ არ იცოდნენ ცურვა, ეს ბიჭი, ფაქტობრივად, ორივეს იჭერდა, ჩვენმა მაშველებმა მათი გამოყვანა შეძლეს, მაგრამ ამ ბიჭის გამოსაყვანად რომ შეტრიალდნენ, ვეღარ იპოვეს. მამაც ჩამოფრინდა მერე ამ ბიჭის, მახინჯაურში ვიპოვეთ სამდღიანი ძებნის შემდეგ. ჩემთვის ბედნიერება იყო, რომ ჭირისუფალს მიცვალებული დავუბრუნეთ. ჩვენი მაშველები როცა ადამიანი არის გადასარჩენი, ექვსბალიან შტორმშიც ითხოვენ ზღვაში შესვლის უფლებას, მაგრამ მე ამ უფლებას ვერ გავცემ, ნიახურივით მეორედ ვერ მოვლენ.

კურიოზულ შემთხვევას გაიხსენებთ?

ზღვაზე, „ალი და ნინოს“ ძეგლთან მივიღეთ გამოძახება. წყლიდან ამოვიყვანეთ ქალი, საკაცეზე გვეწვა უკვე, როცა მოვარდა სამი პატარა გოგონა, ორიდან ათ წლამდე თუ იქნებოდა მათი ასაკი, ცოტა მოვასულიერეთ ეს ქალი თუ არა, დაიწყო ბავშვებზე ზრუნვა, დაისვა პატარა და ძუძუს წოვება დაუწყო, ჭამის დრო აქვსო. თვითონ არ იყო კარგად, კუჭის ამორეცხვა სჭირდებოდა, ვთხოვე ქმრის ნომერი მოეცა, რომ ბავშვები დაგვეტოვებინა მამისთვის, იუარა, არ მოგცემთ, ერთი კვირის წინ ინფარქტი მიიღო, ეს რომ გაიგოს, გული გაუსკდებაო. გავაყოლე ქალი სასწრაფოს, მივიყვანე ბავშვებიც საავადმყოფოში, რეამინაციაში შეყვანამდე ისევ ვთხოვე ქმრის ნომერი და არ მომცა, თითქმის უკვე შეყვანილი ჰყავდათ რეანიმაციაში, გააჩერებინა საკაცე და დამიძახა: ორ საათზე შუათანას ჭამის დრო არისო! –  ეს თქვა და შეიყვანეს, მე დამრჩა ეს სამი ბავშვი, საითაც წავიდოდი, ყველგან მომსდევდნენ უკან დედიკო-დედიკოს ძახილით, ბოლოს ექთნებმა დაიტოვეს.

რამდენია მაშველის ხელფასი და თუ სარგებლობთ სახელმწიფო დაზღვევით?

630 ლარი აქვთ ანაზღაურება, ჩვენ ასევე გვაქვს საპრემიო ფონდი, წელს თითქმის მთლიანად ამოვწურეთ ეს ფონდი მაშველების წასახალისებლად. 2011 წლამდე მაშველებმა არ იცოდნენ პრემია რა იყო, ამ პრემიის ხარჯზე თითქმის ათას ლარამდე აუდით ანაზღაურება ყოველთვიურად, მაქსიმუმი საპრემიო თანხა არის ხელფასის 100 პროცენტი. ყველა იღებს თავისი დამსახურების შესაბამის პრემიას, მაგალითად, 100 პროცენტი პრემია მიიღო მაშველმა, რომელიც შევიდა ხუთბალიან შტორმში და გამოიყვანა მსხვერპლი, რომელმაც თავი დაიხრჩო, გემებს შორის იყო გვამი, სხვა ვერაფრით მივუდექით. სახელმწიფო დაზღვევით არ ვსარგებლობთ, ჩვენ გვაქვს ინდივიდუალური დაზღვევა.

რა ტიპის სამუშაოები მოგწონთ?

მე მომწონს, როცა სამუშაო მთაშია, ბუნებაში ყოფნა მომწონს. აჭარაში არ დარჩენილა ადგილი, სადაც არ ვყოფილვარ.

თქვენი სამსახურის მიმართ მადლიერებას თუ გამოხატავენ მოქალაქეები?

რა თქმა უნდა, ცდილობენ მაშველებს რამე აჩუქონ ან სადმე დაპატიჟონ, მაგრამ ამის უფლება არ აქვს მაშველს. მე ყველას ვეუბნები, თუ გსურთ მადლობის გადახდა მაშველისათვის, დარეკეთ 112-ზე და თქვით, რომ მაშველმა კარგად იმუშავა. მაშველებს რაც შეუძლიათ აკეთებენ, ჩვენ მადლობასაც შეჩვეული ვართ და უკმაყოფილებასაც, ადამიანებს ზოგჯერ ისეთი ზარალი ადგებათ, რომ შეუძლებელია არ იყვნენ უკმაყოფილო.

თქვენი ოჯახის წევრებს როგორი დამოკიდებულება აქვთ თქვენი სამსახურის მიმართ?

თავადაც შევეჩვიეთ ამ რეჟიმს და შევაჩვიეთ ჩვენი ოჯახის წევრებიც. თუ ამ სამსახურში ხარ, უნდა გააკეთო ეს. ძალიან ვეცოდები ამ რეჟიმისთვის ოჯახის წევრებს, მაგრამ დროთა განმავლობაში შეეჩვიენ. ღამით რომ მივდივარ სახლიდან, ცოტას აპროტესტებენ, მაგრამ მერე უკვე გულშემატკივრობენ. ჩემი მეუღლე სხვა ოთახში იმის გამო გადავიდა, რომ ღამის სამ საათზე ჩემთან დარეკილი ზარები აღვიძებს და მერე თვითონაც ვეღარ ისვენებს.

თქვენი სამომავლო გეგმები როგორია, კარიერულ ცვლილებებს ხომ არ გეგმავთ?

ბავშვობიდან მიყვარს ადამიანების დახმარება, ახლა სწორედ იქ ვარ, სადაც შემიძლია ეს საქმე გავაკეთო. ცვლილებები სამაშველო სფეროში იგეგმება, ჩვენ გვემატება სამოქალაქო უსაფრთხოება. უსაფრთხოების წესებს შევიმუშავებთ, ამის სტატუსიც გვექნება და მოთხოვნის უფლებაც. ისეთ ობიექტებში, სადაც მასობრივად არიან ადამიანები, ჩვენ ჩავატარებთ ინფორმაციულ შეხვედრებს, საგანგაშო სირენები უნდა აღვადგინოთ დაწესებულებებში.

„ეს არის „ატლას ჯორჯია“, ხუთი თვე ვცდილობდით ამ ბიზნესმენის მობრუნებას და დღეს აქ ცხოვრობს. კარგი ინვესტორია და ბევრს გააკეთებს ბათუმისთვის. ეს იქნება 250 ნომერზე გათვლილი სასტუმრო. იქნება სავაჭრო ცენტრი, აპარტამენტები. ჩვენი საინვესტიციო პირობებით 42 მილიონი უნდა დახარჯოს, იმ პროექტით კი, რაც მას აქვს წარმოდგენილი, 90-მილიონი. ამ პიროვნებას უკავშირდება ის, რომ ბათუმი-თბილისის რეისი (ავტობუსი „მეტრო“) გაჩნდა, თავიდან 10 ლარი იყო ფასი, ახლა 12 ლარია. ყბადაღებული რკინიგზის სადგურიც შეიძლება ჩაითვალოს, რომ მათი [ყოფილი ხელისუფლების] დაწყებულია… ავტოსადგური „ატლას ჯორჯიამ“ გააკეთა. რკინიგზის სადგურს რაც შეეხება, ინვესტორს უნდოდა მისი გაკეთება, მაგრამ არ აძლევდნენ საშუალებას. მოვედით თუ არა, ითხოვა ვადის გაგრძელება…     

ქალაქის ტერიტორია რომ აიღოთ (გონიოს პოლიგონის გარდა, რომელზეც მუშავდება კონცეფცია) 10-15 ნაკვეთია დარჩენილი – ყველა 1 ლარადაა გაცემული. ახლა ინვესტორებთან ვმუშაობთ, ან უნდა ჩამოვართვათ, რაც არც ისე სახარბიელოა, რადგან ან დაწყებული აქვს მშენებლობა, ან შუაში აქვს მიყვანილი, ან უნდა გააგრძელონ. ვმუშაობთ, რომ საქმე გააგრძელონ. ყველაზე იტყვის „ნაციონალური მოძრაობა“ ჩემი შემოყვანილიაო, მაგრამ მისი შემოყვანილი ათიდან ორი განხორციელდა, რვა – არა.

 ინვესტორებთან ძალიან ფაქიზად უნდა მუშაობა. არჩევნების შემდეგ ყოფილი პრეზიდენტი გაჰკიოდა, რომ ინვესტიციები შეჩერდა და ქვეყანა აღარ არის მიმზიდველი. ჩემი წინამორბედი თურქეთში დარბოდა, იქ ინვესტიცია არ ჩადოთ, ყველაფერი შეჩერდაო. ამ ფონზე ვცდილობდით ინვესტორების მობრუნებას და „ატლას-ჯორჯია“ ზუსტად ასეთია, თვითონ ამბობს – ძველი ხელისუფლების წარმომადგენლები მეუბნებოდნენ არ ჩადო ინვესტიციაო. ახალ ბულვარშიც იგივე სიტუაცია იყო. ბევრი ინვესტორი მოვაბრუნეთ.“ -განაცხადა არჩილ ხაბაძემ. 

კონკურსანტების ცოდნას კომისიის ხუთი წევრი აფასებს. კომისიის თავმჯდომარე მუნიციპალიტეტის გამგებელი დავით დუმბაძეა. კომისიის შემადგენლობაში შედის ქედის საკრებულოს თავმჯდომარის მოადგილე გურამ ანანიძე, ქედის საკრებულოს წევრი ჯამბულ სურმანიძე და მოწვეული წევრები: პროფკავშირების აჭარის რესპუბლიკური გაერთიანების თავმჯდომარის მოადგილე დოდო მექვაბიშვილი და აჭარის მთავრობის აპარატიდან -ავთანდილ ბოლქვაძე.

საკონკურსო-საატესტაციო კომისიის თავმჯდომარის დავით დუმბაძის განცხადებით ქედის მუნიციპალიტეტის საკრებულოსა და გამგეობაში ვაკანტური თამნამდებობის დასაკავებლად, კონკურსის მესამე ეტაპს-გასაუბრებას 116 აპლიკანტი გაივლის,  კონკურსის წესით შერჩეულ თაანამშრომლების დანიშვნის ბრძანებულება კი 31 დეკემბერს დაიწერება.

 „გასაუბრება დღეს დავიწყეთ და სამშაბათს დასრულდება. საკონკურსო-საატესტაციო მუდმივმოქმედი კომისია ხუთი წევრით არის წარმოდგენილი და შემადგენლობა არ შეიცვლება. მაქსიმალურად ვცდილობდით კომისია ობიექტური ყოფილიყო და შესაბამისად ყველა კონკურსანტს ერთი და იგივე კითხვა დავუსვით.  31 დეკემბერს დაიწერება ბრძანება თანამშრომლების აყვანასთან დაკავშირებით“ – აცხადებს დავით დუმბაძე.

პროფკავშირების აჭარის რესპუბლიკური გაერთიანების თავმჯდომარის მოადგილე დოდო მექვაბიშვილი გასაუბრებას დადებითად აფასებს და აღნიშნავს, რომ ბოლო ათი წლის განმავლობაში პროფკავშირებს პირველად მიეცათ უფლება კომისიის შემადგენლობაში ყოფილიყვნენ.

 „ბოლო ათი წლის განმავლობაში  პირველია შემთხვევა როცა პროფკავშირები მიგვიწვიეს კომისიის შემადგენლობაში, ეს კარგი და აღსანიშნი ფაქტია, ყველა მუნიციპალიტეტში ჩვენი წარმომადგელები არიან კომისიის წევრები. რაც შეეხება დღევანდელ გასაუბრებას ქედაში, ნორმალურად მიმდინარეობდა. კითხვებთან მიმართებაში ობიექტური იყო კომისიის ყველა წევრი.  ვცდილობდით ისეთი გარემო შეგვექმნა კონკურსანტებისთვის, რომ არავინ აღელვებულიყო“ – აცხადებს დოდო მექვაბიშვილი.

გასაუბრებას ქედაში არასამთავრობო ორგანიზაცია „სამართლიანი არჩევნების“ წარმომადგენელი ვლადიმერ თებიძე ესწრებოდა.

კონკურსის მესამე ეტაპი დღეს დაიწყო და სამშაბათს დასრულდება. ვინ დაიკავებს  31 ვაკანტურ თანამდებობას ქედის მუნიციპალიტეტის გამგეობასა და სარებულოში, ოთხ დღეში გახდება ცნობილი.

ცურვა რეზინის ნავით ბათუმის ქუჩებში. 21 სექტემბერი. ავტორის ვინაობა „ბათუმელებმა“ ვერ დაადგინა, ავტორის გამოხმაურების შემთხვევაში, ფოტოზე მისი სახელი და გვარი მითითებული იქნება. 213 მოწონება, 144 გაზიარება.  

ბათუმში, ევროპის მოედანზე ნაძვის ხე იწვის. 25 დეკემბერი. ხვიჩა მამულაძის ფოტო. 191 მოწონება, 193 გაზიარება 

მუსლიმები  ყურბან-ბაირამს აღნიშნავენ. ლოცვა ღია ცისქვეშ, ბათუმის მეჩეთთან. 4 ოქტომბერი. მანანა ქველიაშვილის ფოტო. 148 მოწონება, 28 გაზიარება. 

მეზღვაურთა საერთაშორისო დღე ბათუმში. 25 ივნისი. მანანა ქველიაშვილის ფოტო.  142 მოწონება, 30 გაზიარება.

საპატრულო პოლიციის მანქანა ევაკუატორზე, დატბორილ ბათუმში. ჭავჭავაძისა და ლერმონტოვის ქუჩების კვეთა. გელა ძნელაძის ფოტო. 21 სექტემბერი. 133 მოწონება, 160 გაზიარება. 

ბათუმში, „ხოფის“ ბაზრობაზე ფეიერვერკების მაღაზია იწვის. 7 დეკემბერი.  ვლადიმერ ღლონტის ფოტო. 124 მოწონება, 121 გაზიარება 

 „ბათუმმა“ რაგბში „არმაზი“ დაამარცხა. 12 მარტი. ნინო ხიმშიაშვილის ფოტო.  113 მოწონება, 105 გაზიარება. 

ქედაში თოვს. 2 ნოემბერი. სოფელი მეძიბნა. უჩა დუმბაძის ფოტო. 112 მოწონება, 28 გაზიარება. 

წყალდიდობა ბათუმში. დატბორილი #11 მუნიციპალური ავტობუსი. 21 სექტემბერი.  ზვიად ჩხენკელის ფოტო. 97 მოწონება, 92 გაზიარება.  

წყალდიდობა ბათუმში. 21 სექტემბერი. გელა ძნელაძის ფოტო. 80 მოწონება, 36 გაზიარება.

შს სამინისტროს ცნობით, საექსპორტოდ გასატანი თივის შესამოწმებლად სურსათის ეროვნული სააგენტოს აჭარის რეგიონულ სამმართველოში მისულ მოქალაქეს ამავე სააგენტოს თანამშრომელმა გიორგი კაკაბაძემ ფიტო-სანიტარული სერტიფიკატის გაცემის სანაცვლოდ ოფიციალური გადასახადის გარდა ქრთამის სახით მოსთხოვა და გამოართვა 325 ლარი, ამასთანავე, აღნიშნული მოქალაქე დააკავშირა ამავე სააგენტოს თანამშრომელს ლია ქიქავას, სოფლის მეურნეობის სამინისტროს ლაბორატორიის ბათუმის საველე სადგურის უფროსს თამარ ჭკუასელს და შპს “ფუმიგატორი“-ს ხელმძღვანელს ირაკლი ზაქარაძეს, რის შემდეგაც ლია ქიქავამ ვეტერინარული ექსპორტის სერტიფიკატის გაცემის სანაცვლოდ, სამსახურის ანგარიშზე კანონით დადგენილი გადასახადის შეტანის გარდა, ქრთამის სახით მოსთხოვა და გამოართვა 150 ლარი; თამარ ჭკუასელმა ლაბორატორიული გამოკვლევის შედეგის გაცემის სანაცვლოდ, სამსახურის ანგარიშზე კანონით დადგენილი გადასახადის შეტანის გარდა, ქრთამის სახით მოსთხოვა და გამოართვა 150 ლარი; ირაკლი ზაქარაძემ კი ფუმიგაციის მომსახურებასთან დაკავშირებით ყალბი მოწმობა დაუმზადა.

ანტიკორუფციული სააგენტოს თანამშრომლებმა ჩატარებული ოპერატიულ-საგამოძიებო ღონისძიებების შედეგად ოთხივე პირი დააკავეს.

შს სამინისტროს ინფორმაციით, გამოძიება ყალბი ოფიციალური დოკუმენტის დამზადების და ჯგუფურად ჩადენილი ქრთამის აღების ფაქტზე მიმდინარეობს (საქართველოს სისხლის სამართლის კოდექსის 362-ე მუხლის 1-ლი ნაწილით და 338-ე მუხლის 2-ე ნაწილით, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს). გამოძიებას შინაგან საქმეთა სამინისტროს ანტიკორუფციული სააგენტო აწარმოებს.

მე მოვუწოდებ ქალბატონ მედეას, რომელმაც არ იცის ადამიანის უფლებები როგორ უნდა დაიცვას, არ იცის როგორ უნდა დაიცვას ბავშვთა უფლებები, არ იცის როგორ უნდა ესაუბროს ხალხს და არ იცის, როგორ უნდა მოექცეს ჟურნალისტებს, გადახედოს თავის ქცევებს, თორემ მსგავსი ტიპის ადამიანებს არც აღმასრულებელ ხელისუფლებაში და არც უმაღლეს საკანონმდებლო ორგანოში საქმე არ აქვთ.

რაც შეეხება ბოდიშის მოხდას იმის თაობაზე, რომ თითქოსდა მას „ოცნების ქალაქში“ მცხოვრებლებმა ბოდიში მოუხადეს. სრული პასუხისმგებლობით ვამბობ, „ოცნების ქალაქში“ მედეა ვასაძის ყოფნის დროს მსგავსი არაფერი მომხდარა.

მინდა ვისარგებლო შემთხვევით და დავამატო ერთი რამ – 22 დეკემბრის აქციასთან თამაზ ბაკურიძის კავშირი მინიმალურია: ჩვენ ვართ ცუდ დღეში და ჩვენ ვსაჭიროებთ დახმარებას.

დეპუტატმა გადაცემაში ყურადღება გაამახვილა იმაზე, თუ ამდენი ხალხი როგორ ჩავიდა ჩაქვში. ყველას გასაგონად მინდა ვთქვა – მოსახლეობამ შევკრიბეთ სამ-სამი ლარი და გავიყოლეთ მიკროავტობუსები.

ასე რომ, თამაზი ბაკურიძის მიმართ ბრალდება ქალბატონ მედეას მიერ, არის სრულიად უსაფუძვლო. თითქმის დარწმუნებული ვარ, რომ არა თამაზ ბაკურიძე, უმაღლესი საბჭოს წევრები იმ დღეს, როცა ხალხი ჩაქვში, უმაღლეს საბჭოში ჩავიდა, აღარ დარჩებოდნენ სკამებზე – ფანჯრებიდან გაფრინდებოდნენ და იმიტომ.  

მაგრამ იცოდეთ, ამის შემდეგ ხალხს ვერც თამაზი ბაკურიძე და ვეღარც მერაბ ბლადაძე ვეღარ დაიმორჩილებს, ამიტომ სიფრთხილისკენ მოვუწოდებ მთავრობას, ქალბატონ მედეასაც და უმაღლესი საბჭოს სხვა წევრებსაც. იქნება საუბრის დროს შეარჩიოთ სათანადო სიტყვები და ცეცხლს ნუ ეთამაშებით. 

შინაგან საქმეთა სამინისტროს ინფორმაციით,  27 დეკემბერს, ღამის საათებში, ბათუმში, ერთ-ერთ კლუბში, ბრალდებულმა ცეცხლსასროლი იარაღის გამოყენებით თავის არეში სასიკვდილო ჭრილობა მიაყენა შსს-ს აჭარის მთავარი სამმართველოს ბათუმის საქალაქო სამმართველოს მეშვიდე განყოფილების უმცროს ინსპექტორს, 1992 წელს დაბადებულ თარაშ მ-ს, რომელიც არ ასრულებდა სამსახურებრივ მოვალეობას.

თარაშ მ. მიყენებული ჭრილობის შედეგად ადგილზე გარდაიცვალა, ხოლო რამაზ დ. შემთხვევის ადგილიდან მიიმალა. სამართალდამცველებმა   ჩატარებული სამძებრო და საგამოძიებო ღონისძიებების შედეგად ბრალდებული საქართველოს სახელმწიფო საზღვრის გადაკვეთისას დააკავეს. სამართალდამცველებმა მკვლელობის იარაღი და მასრები ნივთმტკიცების სახით შემთხვევის ადგილიდან ამოიღეს.

გამოძიება განზრახ მკვლელობის ფაქტზე მიმდინარეობს (საქართველოს სსკ-ის 108-ე მუხლით).

საკრუიზო გემის მარშრუტი ასე გამოიყურებოდა: ბათუმი-სოჩი-სტამბული-ლამისოლი-ხაიფა-სტამბული-სოჭი-ბათუმი, თუმცა სოჭში გაჩერების შემდეგ გემი სტამბულისკენ აღარ წასულა.

„ჯემინის“ დირექტორის ლიანა რომანაძის თქმით, ამის მიზეზი ისიც გახდა, რომ ზღვა აღელვებული იყო – „ამის გამო ნელა უნდა გვევლო და ასეთ შემთხვევაში 29-ში გაყიდული ბილეთები უკვე ამოვარდებოდა გრაფიკიდან” – ამბობს ის.

გარდა ამისა, ლიანა რომანაძის თქმით, იმის გამო რომ გემზე დაგვიანდა პროდუქტების მოტანა, გემს ბათუმის პორტიდანაც დააგვიანა გასვლა.

„ჯემინის“ დირექტორის თქმით, „Isabella 1“ იგივე მარშრუტს იგივე პირობით, ხელმეორედ განახორციელებს – “ხვალ დღის ხუთი საათისკენ, გემი ისევ გავა ბათუმი-სოჩის მიმართულებით და ყველა ის მგზავრი, ვინც ვერ მოახერხა სტამბულში ჩასვლა ისევ უფასოდ იმგზავრებს და ამჯერად სტამბულშიც ჩავალთ” – ამბობს ლიანა რომანაძე. 

გემის მგზავრები ტურისტების გარდა, ტურისტული კომპანიების, მასმედიის და აჭარის მთავრობის წარმომადგენლებიც იყვნენ. 

ნიგოზი – 25 ლარი;

თხილი – 25 ლარი;

ყველი (იმერული) – 9.50 ლარი;

ყველი (აჭარული) – 7.00 ლარი;

ყველი (სულგუნი) – 14 ლარი;

ხორცი (ძროხის) – 9-11 ლარი;

ხორცი (ღორის) – 12 ლარი;

გოჭი ( 8 კგ.) – 130 ლარი;

ქათამი ( 1 კგ. ) – 5 ლარი;

ინდაური –  60 ლარი;

ჩურჩხელა 1ც.  – 1-2 ლარი;

კიტრი, პომიდორი – 2.50 ლარი;

ვაშლი – 2 ლარი;

მანდარინი, ფორთოხალი – 1.50 ლარი;

ღვინო (სახლში დამზადებული) – 3 ლარი

ქედის საკრებულომ ქედის გამგებლის მოთხოვნა მუნიციპალიტეტის საკუთრებაში არსებული ქონების „როტაციული ფრეზისა“ და „სამკორპუსიანი გუთანის“ ამხანაგობა „ქედისათვის“ გადაცემის შესახებ არ დააკმაყოფილა. ვიდრე დეპუტატები გამგებლის მოთხოვნასთან დაკავშირებით განსახილველ საკითხს კენჭს უყრიდნენ, ფრაქცია ,„ნაციონალური მოძრაობის“ თავმჯდომარემ ვაჟა ბოლქვაძემ საკითხის საფუძვლიანი შესწავლა მოითხოვა.

ვაჟა ბოლქვაძის მოთხოვნა საკრებულოს ყველა დეპუტატმა გაითვალისწინა და წარმოდგენილ საკითხს 19 დეპუტატიდან არავინ არ დაუჭირა მხარი.

ვაჟა ბოლქვაძე ამბობს, რომ ამხანაგობა „ქედას“ მუნიციპალიტეტთან ვალდებულებები არ აქვს და შესაბამისად სახელმწიფო ქონება არ უნდა გადაეცეს.

„ამხანაგობას, რომელიც აბსოლუტურად დამოუკიდებელია და მუნიციპალიტეტთან არანაირი ვალდებულება არ აქვს, არ შეიძლება სახელმწიფო ქონება გადავცეთ“ – აცხადებს ვაჟა ბოლქვაძე.

ქედის მუნიციპალიტეტის საკრებულოს თავმჯდომარე ამირან ცინცაძე აღნიშნავს, რომ საკითხს საფუძვლიანად შეისწავლიან.

„აღნიშნულ საკითხთან დაკავშირებით სერიოზულად ვიმსჯელებთ, ეს არის სახელმწიფო ქონება, რომელიც 15-20 000 ლარი ღირს და მას  ჩვენ კერძო პირს არაკანონიერად არ გადავცემთ“ – აცხადებს ამირან ცინცაძე.

საკრებულოს თავმჯდომარე 2014 წლის ახალი მოწვევის საკრებულოს მუშაობას დადებითად აფასებს, მისი თქმით საკრებულომ რამდენიმე თვეში ხუთი მილიონ ლარზე მეტი მოსახლეობის სასარგებლოდ განკარგა.

„საკრებულომ ბევრი სასიკეთო საქმე გააკეთა, ხუთ მილიონზე მეტი თანხა საკრებულოს დადგენილებით მოსახლეობის სასარგებლოდ დაიხარჯა, მაშინ როცა ნაციონალიური მოძრაობის არსებობის ცხრაწლიან პერიოდში მხოლოდ სამი მილიონია დახარჯული მოსახლეობის სასარგებლოდ. ვთვლი, რომ მოქმედმა საკრებულომ 2014 წელს მასზე დაკისრებული მისია შეასრულა, ჩვენ თამედროვე ტიპის ბაგა-ბაღები გავხსენით, წყლის სიტემა მოვაწესრიგეთ. მე კმაყოფილი ვარ საკრებულოს მუშაობით, ყველაზე მნიშვნელოვანი რაც გავაკეთეთ, ესაა დაბა ქედისა და მახუნცეთის რეაბილიტაციაა“ – აცხადებს საკრებულოს თავმჯდომარე.

ოპოზიციის წევრი ვაჟა ბოლქვაძე კი საკრებულოს მუშაობას უწუნებს:

„დადგენილებები, განკარგულების აქტები სრულყოფილი არ იყო და საკითხს ისე ღებულობდნენ. საბოლოოდ ძლივს მივაღწიე იმას, რომ მოქმედი კომისიების დასკვნები ბოლო ორ სხდომაზე მოვიდა, მანამდე არც ერთი დადგენილების პროექტს განმარტებითი ბარათი არ ჰქონდა დატანილი.

ახალი მოწვევის საკრებულოს არაფერი გაუკეთებია, გარდა იმისა, რომ კულტურულ ღონისძიებიებსა და პრემიების დაფინანსებას ზრდიდა, ყველა საკითხი მოსახლეობის საკეთილდღეოდ კი არა თავის კეთილდღეობაზე იყო მორგებული, ხალხისათვის არც საკრებულოს და არც მუნიციპალიტეტის გამგებელს არ უზრუნია“ – აცხადებს ვაჟა ბოლქვაძე.

დღევანდელ სხდომაზე კომისიამ ძირითადად ორ საკონკურსო ლოგოზე იმსჯელა, მათ შორის ერთი გამარჯვებული ლოგო, მეორე კი გელა წულაძის ნამუშევარი „ყირამალა“ იყო. სხდომის დასაწყებისთანავე კომისიამ ორივე ლოგოს ავტორისგან პრეზენტაცია მოისმინა:

გელა წულაძე

გელა წულაძე „ყირამალას“ ავტორი:

„… ეს ადამიანი ბათუმელი, ქართველია. იმოგზაურა და ბათუმში დამკვიდრდა, კეთილია. ტურისტს ელოდება, როცა ტურისტი შემოვა და პირველ კონტროლს გაივლის ის დახვდება, ამის შემდეგ წაყვება იქ, სადაც წავა. ასევე ძალიან დიდი მნიშვნელობა აქვს ოცდამეერთე საუკუნის გამოწვევებს, რომელიც პრინციპში ჩვენს ბავშვებზე და  მომომავალ თაობებზეა დამოკიდებული. მივიჩნევ, რომ ამ გამოწვევში არის სიმბოლოები, რომლებიც ამ ადამიანს დააქვს. ეს არის ოჯახის სიყვარული, სამშობლოს სიყვარული და სამი მთავარი სიმბოლო – თავისუფლების, სიყვარულის და მშვიდობის სიმბოლო, ეს სიმბოლოები ჩვენმა მომავალმა თაობებმა უნდა ატარონ და მგონია, რომ ბათუმს თუ ეს ლოგო ექნება, დაეხმარება მომავალში.“

ირაკლი თოფურია

ირაკლი თოფურია, გამარჯვებული ლოგოს ავტორი:

„ზღვისფერი გული არის ზღვის ტალღების თემა, ზოლები დროშასთან და ასვე ზღვასთანაა დაკავშირებული – ქოლგა, საცურაო კოსტუმი და სხვა. ზღვა, თოლიები და ჰაეროვნება, სიყვარული – ამ ყველაფერს ეს ლოგო აერთიანებს, გარდა ამისა ლოგო ისეა გაკეთებული, რომ მცირე ზომებშიც აღქმადი იყოს.“

წარდგენის შემდეგ ბათუმის მერის მრჩეველმა ალექსანდრე თევზაძემ განაცხადა, რომ ორივე ნამუშევარი აკმაყოფილებს იმ მოთხოვნებს, რაც ბათუმს ბაზარზე ღირსეულად წარსადგენად ლოგოს სახით სჭირდება:

„ტექნიკურად ძალიან კარგად არი შესრულებული, თუმცა გულიდან აფრენილი თოლიები ვფიქრობ ისეთი მყვირალა ვერ იქნება, როგორიც შეიძლება იყოს ყირამალა, რადგან ის არ არის კლასიკური ლოგო.“

კომისიის წევრმა ზვიად ელიზიანმა განაცხადა, რომ ის მხარს უჭერდა “ყირამალას”, რადგან იყო უფრო კრეატიული, ამბიციური და ემოციური:

„და მე არ მიმაჩნია, რომ აუცილებელია ზღვის ელემენტი ჩანდეს ლოგოში“ – აღნიშნა ზვიად ელიზიანმა.

პოზიციების დაფიქსირების შემდეგ კომისიის თავმჯდომარემ ირაკლი ჭეიშვილმა განაცხადა, რომ მასაც მოსწონს „ყირამალა“, თუმცა რიგი საკითხების გათვალისწინებით მისი არჩევენი სხვა მხარეს იხრება:

„მაშინ ისე უნდა გაგვეკეთებინა, რომ ჩვენი თაობის ადამიანები ვყოფილიყავით მხოლოდ კომისიაში, მე ახალგაზრდა ბიჭი ვარ, 33 წლის ვარ და მეც მომწონს ყირამალა, მართლა რას არ ვაკეთებდით ყირაზე ვდგებოდით, მაგრამ სხვა აზრიც გასათვალისწინებელია და ჩემი აზრი ასეთია. აქ არის მეორე ლოგო რომელიც უბრალო და მარტივია. ადრე მეც არ მივეცი ამ ლოგოს ხმა და ეს იცით.“

საბოლოოდ კომისიამ კენჭისყით 11 ხმით რვის წინააღმდეგ ბათუმის ლოგოდ „გულიდან აფრენილი თოლიები“ აირჩია.

600

ხანძარი დღის ორ საათზე, სასწავლო პროცესის დროს გაჩნდა და მის სავარაუდო მიზეზად მოკლე ჩართვა სახელდება. ხანძრის ჩასაქრობად, ხულოს სამაშველო სამსახურის გარდა, დამატებით ქედისა და შუახევის სახანძრო ბრიგადების გამოძახება გახდა საჭირო. ცეცხლი 200 კვ/მ-ზე იყო მოდებული და მეხანძრეთა თქმით, მის ჩაქრობას დიდი დაკლვამლიანება ართულებდა.

როგორც პანსიონის საფინანსო-საბიუჯეტო სამსახურის უფროსის მოადგილე არჩილ თავართქილაძე, ერთ-ერთ სატელევიზიო ინტერვიუში ამბობს, ცეცხლმოკიდებული შენობიდან მხოლოდ ინვენტარის ნაწილის გამოტანა მოხერხდა – “ხანძრის დროს განადგურდა ბავშვების ტანსაცმელი, დაიწვა ლოგინები. ასევე გაფუჭდა ინვენტარი ქვედა სართულებზე. ძალიან დიდი ზარალი გვაქვს” – ამბობს ის.

აქცია გონიოში. ფოტო ბათუმელების არქივიდან

უფლებათა დამცველი თამაზ ბაკურიძის თქმით აქციაზე 700-მდე ადამიანი შეიკრიბა – “გვინდა შევახსენოთ ხელისუფლებას პრობლემა, რომელიც წლების განმავლობაში ამ ხალხის წინაშე დგას. ეს ხალხი ითხოვს ამ მიწების, მათ საკუთრებაში დაბრუნებას, რომელიც ჯერ კიდევ წინა ხელისუფლებამ მათ გადასცა და შემდეგ წაართვა,“ -ამბობს თამაზ ბაკურიძე.

მისივე თქმით, ხალხმა გადაკეტა ცენტრალყური ქუჩა და მთავრობისგან პასუხს მოითხოვენ. „მთავრობა დაპირდა ამ ხალხს, რომ ძველით ახალწლამდე მოგვარდებოდა ეს პრობლემა მაგრამ ასეთი ტიპის დაპირებები მათგან თითქმის ყოველ თვეში ისმის,“ – ამბობს თამაზ ბაკურიძე.

იმის გამო, რომ აჭარის მთავრობის თავმჯდომარე არჩილ ხაბაძე ქალაქში არ იმყოფება, შეკრებილები მოითხოვენ აქციაზე იმ პირების მისვლას, რომლებიც მათ ამ პრობლემის მოგვარებას ჰპირდებოდა – “მოითხოვენ ავთანდილ ბერიძის, მურმან დუმბაძის და სხვების აქციაზე მოსვლას, წინააღმდეგ შემთხვევაში აქციის მონაწილეები არ დაიშლებიან” – ამბობს თამაზ ბაკურიძე.

გასულ კვირას გონიოში მიწასთან დაკავშირებული პრობლემების შესახებ აჭარის მთავრობის თავმჯდომარემ, არჩილ ხაბაძემ „ბათუმელებთან“, წლის შემაჯამებელ ინტერვიუში ისაუბრა.

„უმაღლეს საბჭოსთან ერთად ჩვენ შევიმუშავეთ კანონში შესატანი ცლილება და შეგვეძლება სამუდამოდ გადავჭრათ ეს პრობლემები. ბევრია ცდუნება, ბევრი კორუფციის ნიშანია, მაგრამ ეს აუცილებლად უნდა განვახორციელოთ. ვინც დაიჩაგრა, ვისაც ეკუთვნის მიწის ნაკვეთი, უნდა მიიღოს. ეს ერთ თვეში და ერთ დღეში არ მოხდება, მაგრამ პოლიტიკური ნება არის. ჩამორთმეულებსაც დაუბრუნდებათ კანონიერი გზით მიწა. მინდა ყველას ვუთხრა – თუ მიწა არასამართლიანად ჩამოგერთვათ, ჩვენ ამის მოგვარებას კანონიერი გზით ვაპირებთ“ – განაცხადა არჩილ ხაბაძემ „ბათუმელებთან“. 

26 დეკემბერი, 18:00 საათი: ევროპის მოედანზე აჭარის ხალხური ცეკვის სახელმწიფო ანსამბლი „ხორუმი“;

27 დეკემბერი, 19:00 საათი: ევროპის მოედანზე საახალწლო კონცერტი, მონაწილეობენ: ქ.ბათუმის მერიის კულტურის ცენტრთან არსებული ვაჟთა ვოკალური ანსამბლი, ვაჟთა ფოლკლორული გუნდი „იბერიონი“ ქორეოგრაფიული ანსაბლი „მწვერვალი“, გოგონათა ვოკალური გუნდი „თირიმი“.

28 დეკემბერი, 17:00 – 22:00 საათი: ევროპის მოედანზე საახალწლო კონცერტში მონაწილეობას მიიღებენ ლადო ყატაშვილი ბენდთან ერთად, „გროოვ რეპორტსი“, თეო ჩიტიშვილი და ჯგუფი „ვანილა ქეიჯი“. საახალწლო პროგრამის ფარგლებში გაიმართება ხელნაკეთი ნივთების გამოფენა-გაყიდვა;

29 დეკემბერი, 20:00 საათი:  ევროპის მოედანზე საახალწლო კონცერტი მერიის კულტურის ცენტრთან არსებული „ჯაზ ბიგ ბენდის“ მონაწილეობით.

30 დეკემბერი, 21:00 საათი: ევროპის მოედანზე საახალწლო კონცერტი ნიაზ დისამიძის მონაწილეობით.

31 დეკემბერი, 23:00 საათი: ევროპის მოედანზე, საახალწლო კონცერტი, რომელშიც მონაწილეობენ: ანსაბლი „ბათუმი“, კვარტეტი „ნოტა“ ნინო ქათამაძე, ბენდი „ინსაიდი“.საქართველოს სახელმწიფო სიმფონიური ორკესტრი ნიკოლოზ რაჭველის ხელმძღვანელობით.

2 იანვარი, 12:00 საათი: ევროპის მოედანზე, საახალწლო დღეების ფარგლებში მოეწყობა ქუჩის კარნავალი, საბავშვო-გასართობი პროგრამები, პერფორმანსები, საკონცერტო ნომრები და ეთნოგრაფიული კუთხეები. საახალწლო კონცერტში მონაწილეობას მიიღებენ: საბავშვო გასართობი ცენტრი „ბერიკები“, მუსიკალური სტუდია ჩიორა, მუსიკალური სტუდია „ჰარმონია“, მუსიკალური სტუდია „ლიმპოპო“, სტუდია „ბასტი-ბუბუ“, ქორეოგრაფიული სტუდია „მეზღვაურები“, საბალეტო სკოლა, ხალხური ხელოვნების სკოლა, სტუდია “Bთ-Aღთ”, თანამედროვე ცეკვების ჯგუფი „2 სტეპ ცრეწ“, ჰენრი დოლიძე და პოეტების ჯგუფი, ქობულეთის, ხელვაჩაურის,ხულოს, ქედის და შუახევის, მუნიციპალიტეტების წარმომადგენლები, მომღერალი ნანა მესხი, ჯგუფი „მგზავრები“, ჯგუფი „გუფილენდი“.

3 იანვარი, 20:00 – 21:00 საათი: ევროპის მოედანზე, ჯაზ ბენდი „კალისტო“, ჯაზ ბენდი „სი საიდი“, როკ ჯგუფი „ჯეოპლანეტი“.

4 იანვარი, 17:00 – 19:00 საათი: ევროპის მოედანზე წარმოდგენილი იქნება თითების თეატრის დასი, ენვერ ხაბაძის სახელობის მერიის ქორეოგრაფიული ანსამბლი, გოგონათა ვოკალური ანსამბლი, ქალთა კამერული გუნდი, ხალხური სიმღერის ვაჟთა ვოკალური ანსამბლი, ახალგაზრდა, ბათუმელი პოეტები.

5 იანვარი, 19:00 – 20:00 საათი: ევროპის მოედანზე საკონცერტო პროგრამის ფარგლებში წარმოდგენილი იქნება რეპ ჯგუფი „ბაბილონი“და როკ ჯგუფები: “ბეთლემი“ „ფემილი ბენდი“ “მაო ძე დუნი“, “ნემო“

6 იანვარი, 18:00 საათი: ევროპის მოედანზე აჭარის მელიტონ კუხიანიძის სახელობის სიმღერისა და ცეკვის ანსამბლი.

7 იანვარი, 19:00 საათი: ევროპის მოედანზე დასკვნითი კონცერტი. მონაწილეობენ: აჩიკო ბერიძე და ტრიო, ანსამბლი „ბათუმი“, სოფო ხალვაში და ბენდი, პანტომიმის ჯგუფი.