მომავალ წელს მერიის შენობებს ის კომპანია დაასუფთავებს, რომელიც ანალოგიურ სამუშაოს მიმდინარე წელშიც ასრულებდა. შპს „სუფთა სამყარო აჭარაში“ წელს მერიის საოფისე და არასაოფისე ფართობებს 98 ათას 919 ლარსა და 97 თეთრად ასუფთავებდა, მომავალ წელს კი, თითქმის იგივე სამუშაოს 96 ათას ლარად შეასრულებს.
ბათუმის მერიის ადმინისტრაციული შენობების საოფისე და არასაოფისე ფართობი ჯამში 4817 კვ/მეტრია, რომლის დასუფთავებას თვეში 3612 ლარზე მეტი, ანუ წელიწადში 43 ათას ლარზე მეტი დასჭირდება. 216 ფანჯრის გაწმენდაში მერია წელიწადში 3 700 ლარამდე, ხოლო 11 ცალი ფარდის გარეცხვაში 99 ლარს გადაიხდის; 2277 ლარი დასჭირდება 69 ვიტრაჟის დაწმენდას, ხოლო 120 კვ/მ ხალიჩების წმენდას – 3500 ლარზე მეტი.
დერეფნებისა და კაბინეტების 15 ჭაღის დაწმენდაში მერია მომავალ წელს 504 ლარს გადაიხდის, ხოლო ჰოლის დიდი ჭაღი მხოლოდ ერთხელ, 25 ლარად გაიწმინდება. ერთხელ ჩამოირეცხება ლუკა ასათიანის 25 ნომერში მდებარე შენობის გარე ფასადიც, რომელშიც ტენდერში გამარჯვებულ კომპანიას 647 ლარსა და 96 თეთრს გადაუხდიან.
ბათუმის მერია ერთი სველი წერტილის ყოველდღიურ დალაგებაში, ქიმიურ დასუფთავება-დეზინფექციასა და საჭირო ჰიგიენური ნივთებით მომარაგებაში თვეში 120 ლარს, წელიწადში კი ჯამში 38 880 ლარს გადაიხდის (მერიის შენობებში ყოველდღიურად 27 სველი წერტილი უნდა დალაგდეს).
ელექტრონულ ტენდერში, რომელიც 19 დეკემბერს დასრულდა, ორი კომპანია მონაწილეობდა: შპს „სუფთა სამყარო აჭარაში“ და შპს „სისუფთავის სერვისი“. ამ უკანასკნელმა მერიას თავისი მომსახურების საბოლოო ღირებულება, პრეტენდენტისგან განსხვავებით, ერთი ლარით ნაკლები – 95 999 ლარი შესთავაზა. სატენდერო კომისიამ კი დაზუსტებული დოკუმენტაციის ერთ დღეში წარმოუდგენლობის გამო მისი დისკვალიფიკაცია მოახდინა.
„დაზუსტებული დოკუმენტაცია“ კომისიაში მოთხოვნილებისამებრ, ერთ დღეში წარადგინა „სუფთა სამყარო აჭარამ“, რომელსაც შესაბამისი ხელშეკრულების მაქსიმუმ ოთხი დღის ვადაში გაფორმება, 25 დეკემბერს, წერილობით აცნობეს.
