Batumelebi

მწვანე კონცხზე, ბოტანიკური ბაღის შესასვლელთან და პლაჟის მიმდებარე ტერიტორიაზე სარეაბილიტაციო სამუშაოების დროულად დასრულება კითხვით ნიშნის ქვეშ დგას. პრობლემას წარმოადგენს რკინიგზა, რომელიც დასახლებას [იმ ადგილს, სადაც N31 სამარშრუტო მიკროავტობუსების ბოლო გაჩერებაა] პლაჟისგან ჰყოფს. რკინიგზაზე შლაგბაუმი არ არის, ავტომანქანებისთვის დროებითი გადასასვლელის მოწყობაზე კი „საქართველოს რკინიგზამ” უარი განაცხადა.

„რკინიგზას რომ ნებართვა მიეცა კომპანიისთვის, ახლა სანაპირო ზოლში მეტი სამუშაო იქნებოდა შესრულებული. უნდა გაკეთდეს სკვერი, გამაგრდეს ნაპირი, კეთილმოეწყოს ზღვაში შეჭრილი ხიდი, რომლისთვისაც რკინის მოაჯირები მუშებმა ხელით გადმოზიდეს რკინიგზაზე. ახლა ამ ხიდზე ბეტონი უნდა დაიგოს, მანქანებს კი არ უშვებენ. ჩაბნელებული და უპატრონო იყო აქაურობა, პლაჟზე ღამით ტურები დარბიან, განათებაც ახლა მონტაჟდება, სეზონი იწყება და იმედია გალამაზდება ეს ადგილი,” – გვითხრა ერთ-ერთმა ადგილობრივმა მოქალაქემ.

მწვანე კონცხის დასახლებაში, ბოტანიკური ბაღის შესასვლელთან არსებული ტერიტორიის კეთილმოწყობის სამუშაოებს ტენდერში გამარჯვებული კომპანია „მონოლითი 2015″ ახორციელებს. კომპანიამ სამუშაოები, მერიასთან გაფორმებული ხელშეკრულების მიხედვით, მიმდინარე წლის პირველ აგვისტომდე უნდა დაასრულოს. ობიექტური მიზეზების არსებობის შემთხვევაში კი კომპანიას ვადის კიდევ ერთი თვით [ანუ სექტემბრამდე] გაგრძელების მოთხოვნის უფლებაც აქვს.

„ვფიქრობ, ყველაფერი დადებითად გადაწყდება. სამუშაოები მიმდინარეობს და დროულად დავასრულებთ. რკინიგზას რაც შეეხება, ჩვენ მივწერეთ ბათუმის მერიას და „საქართველოს რკინიგზასთან~ ის აგვარებს საქმეს. დროებითი გადასასვლელის პროექტიც მზადაა და შეთანხმების ეტაპზეა. ერთ კვირაში უნდა გადაწყდეს. რაც შეეხება სამშენებლო მასალების ლიანდაგზე ხელით გადატანას, ამას ვერ დავუშვებ, საფრთხეში ვერავის ჩავაგდებ. მაქ დიდი საფრთხეა და რკინიგზაც სიფრთხილით ეკიდება ეტყობა ამ საკითხს. ყველაფერი მაღალ დონეზე უნდა შეთანხმდეს,” – განაცხადა „ბათუმელებთან~ სატელეფონო საუბარში „მონოლითი 2005“-ის დირექტორმა მერაბ დოლიძემ.

აღსანიშნავია, რომ ციხისძირში რკინიგზაზე, იმ ადგილზე, საიდანაც ექსპრემიერმა ბიძინა ივანიშვილმა ურეკში ტიტას ხე გადაიტანა, დროებითი გადასასვლელი მოწყობილია [აქედან კიდევ ორი ხეა გადასატანი].

მწვანე კონცხის ერთ-ერთი მცხოვრები იმასაც ამბობს, რომ „რკინიგზის თუ სამინისტროს წარმომადგენელმა, რომელიც აქ იყო, თქვა – ბოტანიკური ბაღის შესასვლელთან ქვეითად მოსიარულეთათვის არსებული გადასასვლელის დატოვებაც არ შეიძლება”. ამ გადასასვლელით კი სარგებლობს როგორც ბოტანიკურ ბაღში შემსვლელი, ასევე მწვანე კონცხის პლაჟზე გადამსვლელებიც.

„ბათუმელებს“ „საქართველოს რკინიგზაში” უთხრეს, რომ მათთან შესულია ბათუმის მერიის წერილი, მიმდინარეობს განხილვა და რამდენიმე დღეში, დიდი ალბათობით, დადებითად გადაწყდება: „უცებ არ წყდება ასეთი საკითხები, მანდ უნდა მოეწყოს დროებითი გადასასვლელი, მოძრაობაც უნდა დარეგულირდეს, შესაძლოა დროებით ჩვენი წარმომადგენელიც მივამაგროთ მაგ ადგილს”.

რაც შეეხება ქვეითად მოსიარულეებს, რკინიგზაში აცხადებენ, რომ რაიმეს შეცვლას მწვანე კონცხთან მიმართებაში არ აპირებენ – „ყველაფერი დარჩება ისე, როგორც არის“.

ბათუმის მერიამ აღნიშნული ტერიტორიის კეთილმოწყობაში თითქმის მილიონი – 997 ათას 676 ლარი უნდა გადაიხადოს. ამ ტერიტორიამდე მისასვლელ გზას კი სხვა კომპანია არემონტებს.

19 მაისის პლენარულ სხდომაზე დეპუტატები უმაღლესი საბჭოს 2017 წლის ბიუჯეტს უყრიან კენჭს. პროექტის მიხედვით, მომავალი წლის ბიუჯეტი 4 მილიონ 846 ათას ლარს შეადგენს. თავდაპირველი პროექტის მიხედვით, ბიუჯეტი 93 ათასით მეტი იყო და ის დეპუტატებისთვის ხელფასის გაზრდასაც ითვალისწინებდა – 3400 ლარით.

პირვანდელი ვერსია, რომელიც კრიტიკის საგანი გახდა, საფინანსო-საბიუჯეტო კომისიამ უკვე დააკორექტირა. დეპუტატებისთვის ხელფასის გაზრდა აღარ იგეგმება, გარდა ამისა, დაფინანსება მოაკლდათ ფრაქციებს. ამასთან ერთად, თუკი აქამდე მომავალი წლის ბიუჯეტის პროექტი 6 ფრაქციის დაფინანსებას ითვალისწინებდა, ამჯერად დაფინანსება 5 ფრაქციაზეა გათვლილი. ამჟამად უმაღლეს საბჭოში მაქსიმალური ოდენობის – 7 ფრაქცია მუშაობს.

„ოპოზიციის კრიტიკის შედეგად შეიცვალა პროექტი. ჩვენ ბიუჯეტისთვის მხარის დაჭერას ისევ არ ვაპირებთ, თუკი მას არ მოაკლდება ფრაქციების ავტომანქანების მომსახურებისთვის გათვალისწინებული ხარჯები, ეს დაახლოებით 20 ათასს ლარს შეადგენს” – უთხრა „ბათუმელებს“ პეტრე ზამბახიძემ, ფრაქცია „ერთიანი ნაციონალური მოძრაობიდან“ . მისი შეფასებით, ბიუჯეტი არასწორად არის შედგენილი და მორგებულია ერთპიროვნული მმართველობისთვის.

დღის განმავლობაში ვერ მოხერხდა დაკავშირება ანზორ თხილაიშვილთან, საფინანსო-საბიუჯეტო კომისიის თავმჯდომარესთან. ამავე კომისიის აპარატის ხელმძღვანელის, როლანდ გათენაძის განმარტებით, გამორიცხული არაა, ბიუჯეტის პროექტში ისევ შევიდეს ცვლილებები, ვიდრე საკითხი კენჭისყრაზე გავა.

2016 წელს აჭარის უმაღლესი საბჭოს ბიუჯეტი 4 მილიონ 957 ათასს ლარს შეადგენს.

უმაღლესი საბჭოს ბიუროს გადაწყვეტილებით, 19 მაისს უმაღლესი საარჩენო კომისიის თავმჯდომარის და წევრის კენჭისყრა გაიმართება. უსკო-ს თავმჯდომარეობის კანდიდატი დავით ქარცივაძეა, წევრობის – მამუკა ჯაში, რომელიც უმაღლესი საბჭოს წევრის – ირაკლი ჯაშის შვილია.

„დაირღვა შეჯიბრებითობის პრინციპი, ამიტომ მე ამ საკითხის კენჭისყრაზე გატანას მხარი არ დავუჭირე.” – უთხრა “ბათუმელებს” თემურ კახიძემ, იურიდიულ და საპროცედურო საკითხთა კომისიის თავმჯდომარემ.

“ბიუროს ამ გადაწყვეტილებით დაირღვა კანონი, რადგან კანონში პირდაპირ წერია, რომ უმაღლესი საარჩევნო კომისიის წევრობისთვის წარმოდგენილი უნდა იყოს მინიმუმ ორი კანდიდატურა. ერთი წევრისთვის კენჭისყრის უფლება უმაღლეს საბჭოს არ აქვს. ამით დასტურდება ნეპოტიზმი და ინტერესთა კონფლიქტი” – ამბობს უმაღლესი საბჭოს წევრი პეტრე ზამბახიძე ფრაქცია “ერთიანი ნაციონალური მოძრაობიდან”

ამ ფრაქციამ, ასევე ფრაქციებმა “თანასწორობამ” და “მაჟორიტარებმა” 12 მაისს საჯაროდ დააფიქსირეს საკუთარი პოზიცია და თქვეს, რომ არ დაუჭერენ მხარს დეპუტატის შვილს, ასევე დავით ქარცივაძეს, რომელიც პარტია “ქართული ოცნების” წევრია.

ბიუროს სხდომაზე უსკო-ს საკითხის კენჭისყრაზე გატანას მხარი არ დაუჭირა: “ნაციონალურმა მოძრაობამ”, ასევე თემურ კახიძემ “თავისუფალი დემოკრატებიდან”. დღევანდელ სხდომას არ ესწრებოდა ამ ფრაქციის თავმჯდომარე სულხან ღლონტი. საკითხის მხარდაჭერისგან თავი შეიკავა „რესპუბლიკელმა“ გიორგი მასალკინმა.

17 მაისს, უმაღლესი საბჭოს წევრმა ირაკლი ჯაშმა განაცხადა, რომ „ნაციონალური მოძრაობის“ გეგმაა არჩევნები ჩაატაროს უსკოს დღევანდელმა შემადგენლობამ.

„ქართულ ოცნებას“ 21-კაციან უმაღლეს საბჭოში უმრავლესობა აღარ ჰყავს. ორი დღის წინ დავით ბაციკაძემაც დაწერა განცხადება ფრაქცია „ქართული ოცნება-აჭარიდან“ გასვლასთან დაკავშირებით, თუმცა მეორე დღეს განცხადება უკან გაიტანა.

საქართველოს სტატისტიკის ეროვნული სამსახურის [საქსტატი] ინფორმაციით, მიმდინარე წლის აპრილში შრომისუნარიანი ასაკის მამაკაცის საარსებო მინიმუმი 161 ლარით და 20 თეთრით განისაზღვრა, რაც 70 თეთრით მეტია 2015 წლის ანალოგიურ პერიოდთან შედარებით.

საშუალო მომხმარებლის საარსებო მინიმუმი კი, მიმდინარე წლის აპრილში, 142 ლარით და 80 თეთრით განისაზღვრა, რაც გასული წლის მაჩვენებელთან შედარებით 60 თეთრით მეტია.

საარსებო მინიმუმი საქართველოში საქსტატის მონაცემებით:

„2004 წლიდან საქსტატი საარსებო მინიმუმის მაჩვენებლებს ანგარიშობს იმ მინიმალური სასურსათო კალათის მიხედვით, რომელიც განსაზღვრულია და დადგენილია ,,საკვებ ნივთიერებებსა და ენერგიაზე ორგანიზმის ფიზიოლოგიური მოთხოვნილებებისა და საარსებო მინიმუმის განსაზღვრისათვის საჭირო სასურსათო კალათის შემადგენლობის ნორმებისა და ნორმატივების დამტკიცების შესახებ” საქართველოს შრომის, ჯანმრთელობისა და სოციალური დაცვის მინისტრის 2003 წლის 8 მაისის N111/ნ ბრძანების შესაბამისად.“ – აღნიშნულია საქსტატის ინფორმაციაში.

საქსტატის მონაცემებით, 2004 წლის აპრილში შრომისუნარიანი ასაკის მამაკაცის საარსებო მინიმუმი 80,2 ლარი იყო.

ინდური პროდაქშენი – „Abbass Mustan“ – აბაას და მუსტან ბარმავალების რეჟისორობით საქართველოში თრილერის, სახელწოდებით „მაშინ“ გადაღებას გეგმავს. პროდაქშენის წარმომადგენლები რამდენიმე დღეა საქართველოში იმყოფებიან და არჩევენ ადგილებს ფილმის ეპიზოდებისთვის.

„Abbass Musta“-ს წარმომადგენელი დარისპან პრაშელი ამბობს, რომ ფილმში მონაწილეობას მხოლოდ ინდოელი მსახეობები მიიღებენ და სრულ ფილმს საქართველოს სხვადასხვა მხარეში, მათ შორის აჭარაში გადაიღებენ.

„ფილმის გადასაღებად ივნისში ინდოეთიდან 100 ადამიანი ჩამოვა, ერთ-ერთი ეპიზოდი ქედაში ძველ ხიდზე უნდა გადავიღოთ, ადგილები შერჩეული კი გვაქვს, მაგრამ კიდევ ერთხელ ვაზუსტებთ დეტალებს, ფილმის გადაღებაში ტექნიკურად ქართველები დაგვეხმარებიან“, – ამბობს დარისპანი ფილმის ბიუჯეტი მილიონი 300 000 დოლარია.

უმაღლესი საბჭოს წევრის, მედეა ვასაძის განმარტებით, უმაღლესი საბჭოს აპარატმა მას არ მიაწოდა ვიდეოჩანაწერები, რომლითაც ის შეძლებდა დაედასტურებინა, რომ დეპუტატ დავით ბაციკაძესა და უსკოს წევრობის კანდიდატ მამუკა ჯაშს შორის ფიზიკურ შეხლა-შემოხლას ნამდვილად ჰქონდა ადგილი [მამუკა ჯაში აჭარის უმაღლესი საბჭოს წევრის, ირაკლი ჯაშის შვილია]. „მიპასუხეს, რომ უნდა მივმართო დაცვის სამსახურს. მე გავამზადე წერილი დაცვის სამსახურის სახელზე და ახლა მათგან ველოდები პასუხს“, – ამბობს მედეა ვასაძე.

გუშინ ინციდენტის შემდეგ ინფორმაცია მხოლოდ მედეა ვასაძემ დაადასტურა, მომხდარის შესახებ მამუკა ჯაშმაც უარყო და დავით ბაციკაძემაც. თუმცა, დავით ბაციკაძე არ უარყოფს ინფორმაციას, რომ გუშინ დაწერა განცხადება ფრაქცია „ქართული ოცნება-აჭარიდან“ გასვლასთან დაკავშირებით, ხოლო მეორე დღეს დილითვე ის უკან გაიტანა. ამ ფრაქციას ირაკლი ჯაში ხელმძღვანელობს და ფრაქციის დაშლის შემთხვევაში, ირაკლი ჯაში რიგით წევრად დარჩებოდა უმაღლეს საბჭოში. შესაბამისად, დაკარგავდა თანამდებობის პირის პრივილეგიებს, რაც მაღალ ხელფასს, ავტომობილის მომსახურებას და სხვა სიკეთეებს გულისხმობს.

ინციდენტის შესახებ ინფორმაცია ირაკლი ჯაშმა არც უარყო და არც დაადასტურა. „მე ბათუმელი კაცი ვარ, რომც მომხდარიყო არ გეტყოდით“, – ამბობს ირაკლი ჯაში.

დღესვე გახდა ცნობილი ისიც, რომ კანდიდატურა მოხსნა უსკოს წევრად წარდგენილმა ირაკლი გვარამიამ. ის დავით ბაციკაძის პარტიის – „კონსერვატორების“ წევრია და მისი მხარდაჭერით სარგებლობდა. მისივე განმარტებით, წინასწარი კონსულტაციებით გაირკვა, რომ გვარამია ვერ შეძლებდა 11 ხმის მოგროვებას [ასარჩევად ამდენი ხმაა საჭირო], რის გამოც კენჭისყრაში მონაწილეობამ აზრი დაკარგა.

გვარამიას გადაწყვეტილების შემდეგ უსკოს წევრის კონკურსის ლეგიტიმაცია „ნაციონალურმა მოძრაობამ“ ეჭვქვეშ ისევ დააყენა.

რაც შეეხება დავით ბაციკაძის გადაწყვეტილებას ფრაქციის დატოვებასთან დაკავშირებით, ის განმარტავს, რომ აპირებდა ფრაქცია „ქართული ოცნება-თავისუფლებაში“ გადასვლას მერაბ აბაშიძის ნაცვლად, ხოლო მერაბ აბაშიძე მის ადგილს დაიკავებდა. „მაგრამ ახლა მერაბ აბაშიძე გაბრაზდა და უარზეა“,- განმარტა დავით ბაციკაძემ „ბათუმელებთან“.

დღეს, 17 მაისს, მთავრობის სხდომაზე დღის წესრიგით გათვალისწინებული საკითხების განხილვის დასრულების შემდეგ მთავრობის თავმჯდომარემ არჩილ ხაბაძემ განაცხადა, რომ წელს, ბათუმის ძველ ბულვარში განთავსდება ახალი სასწრაფო ამბულატორია, რომელიც გადაუდებელ დახმარებას გაუწევს ქალაქის დამსვენებლებს.

თანამედროვე ტიპის ამბულატორია სულ ორია საქართველოში და ერთ-ერთ მათგანს ბათუმის ბულვარში განათავსებენ.

„ბათუმის კულტურის ცენტრი“ ლედ ეკრანს მაქსიმუმ 260 ათას ლარად შეისყიდის. შესაბამისი ტენდერი გამოცხადებულია. ეკრანი უნდა აკმაყოფილებდეს სატენდერო პირობებით გათვალისწინებულ ტექნიკურ მახასიათებლებს. ამასთან:

ეკრანი უნდა იყოს გარე გამოყენების;
ეკრანი უნდა დამონტაჟდეს დამკვეთის მიერ მითითებულ ადგილზე;
მიწოდებული საქონელის ინსტალაცია უნდა განხორციელდეს მწარმოებლის მიერ სერტიფიცირებული ინჟინერის მიერ;
ეკრანი უნდა დამონტაჟდეს გრუნტზე, რისთვისაც უნდა მოეწყოს სპეციალური მეტალის კონსტრუქცია;
შესაძლებელი უნდა იყოს ეკრანის სამაგრი კონსტრუქციის გადაადგილება და დაყოფა ორ დამოუკიდებელ ნაწილად;
შესაძლებელი უნდა იყოს ეკრანის დანაწილება ორ სრუფასოვან დამოუკიდებელ ეკრანად;
შესაძლებელი უნდა იყოს ეკრანის მონტაჟი – დემონტაჟი განხორციელდეს ამწე-მანქანის დახმარების გარეშე.
ეკრანების კომპლექტაციაში უნდა შედიოდეს ვიდეო ფაილების გამშვები მოწყობილობა;
მიმწოდებელი ვალდებულია ჩაატაროს სწავლება ეკრანის მონტაჟზე და ექსპლუატაციაზე შემსყიდველის მიერ გამოყოფილი პირისთვის.

ეკრანის მიწოდება უნდა განხორციელდეს ხელშეკრულების გაფორმებიდან 65 კალენდარულ დღეში; მიწოდების ადგილი: ა(ა)იპ „ბათუმის კულტურის ცენტრი“ ბათუმი, ზღვისპირა პარკის ტერიტორია, საზაფხულო თეატრის შენობა.

ფილმების ღია ჩვენებებისთვის ეკრანის შეძენის დაფინანსების მოთხოვნით ბათუმის საკრებულოს BIAFF-ხელმძღვანელებმა მიმართეს. წარდგენილი პროექტის მიხედვით, ეკრანის ღირებულება 55 ათასი ევრო ჯდებოდა.

ვიდრე საკრებულო საკითხს კენჭს უყრიდა, ინიციატივა განიხილა და მოიწონა საკრებულოს განათლების, კულტურის, ტურიზმის და სპორტის საკითხთა კომისიამ. კომისიის თავმჯდომარე, ნინო ბერაძემ „ბათუმელებთან“ აღნიშნა, რომ კომისიას ვიცე-მერმა, ალექსანდრე მითაიშვილმა ურჩია, სხვა, უფრო ძვირადღირებული ეკრანის შეძენა.

შესასყიდი ეკრანის ტექნიკურ მახასიათებლები:

არსებითი განხილვა გამომცემლობების საქმეზე საკონსტიტუციო სასამართლოში დღეს, 17 მაისს გაიმართა. მოქალაქე ირინა რუხაძე და გამომცემლობები: „ინტელექტი“, „არტანუჯი“, „ლოგოს პრესი“ მოითხოვენ არაკონსტიტუციურად ჩაითვალოს კანონის ის მოთხოვნა, რომლის მიხედვითაც, საკონსტიტუციო სასამართლო ვერ განიხილავს საქმეს, თუკი განხილვის მომენტისთვის სადავო სამართლებრივი აქტი გაუქმებულია, ან ძალადაკარგულად არის მიჩნეული.

ამ გამომცემლობებს, მათი განცხადებით, ზიანი 2013 წელს მიადგათ, როცა განათლების მინისტრი გიორგი მარგველაშვილი იყო. მინისტრის ბრძანების საფუძველზე, მათ ვალდებულება დაეკისრათ, გადაეცათ საავტორო უფლებები განათლების სამინისტროსთვის სკოლის სახელმძღვანელოების გამოსაცემად.

„ზიანის მიყენების შემდეგ, გიორგი მარგველაშვილმა რამდენიმე სიტყვა შეცვალა ამ ბრძანებაში და ის უკვე ჩაითვალა ახალ ნორმატიულ აქტად. ამით მხარეს წაერთვა შერსაძლებლობა, დაეცვა საკუთარი უფლებები, ვერც საკონსტიტუციო სასამართლო იმსჯელებდა სადავო აქტის კონსტიტუციურობაზე. თუ საკონსტიტუციო სასამართლო დააკმაყოფილებს სარჩელს, ეს საშუალებას მისცემს სხვა პირებს, რომ მათ იდავონ სასამართლოში იმ შემთხვევაშიც კი, თუკი სადავო სამართლებრივი აქტი უკვე ძალადაკურგულად არის მიჩნეული, ან გაუქმებულია“ – ამბობს „თავისუფალი უნივერსიტეტის“ იურისტი, გიორგი მშვენიერაძე, რომელიც მოსარჩელეების ინტერესებს იცავს.

მოპასუხე მხარე, პარლამენტის წარმომადგენელმა, დღევანდელ პროცესზე მედიისთვის კომენტარი არ გააკეთა.

ქედის მუნიციპალიტეტის სოფელ მახუნცეთში მცხოვრები ვაჟა ხაბაძე და მისი ნათესავები საპროტესტო აქციას გეგმავენ. ხაბაძის განცხადებით, მიწა რომელსაც მემკვიდრეობით ფლობს სახელმწიფომ გაუყიდა. ვაჟა ხაბაძე მიწის დაბრუნებას ითხოვს.

„ათასი მეტრი მიწა წამართვეს და გამიყიდეს. მიწა საჯარო რეესტრში არ მქონდა გატარებული, რადგან სოფელში არავის აქვს საკუთრება დარეგისტრირებული. ის რომ მიწა ჩემი საკუთრებაა, ამის ძველი საკომლო ჩანაწერებიც ადასტურებს. გარდა ამისა, მაქვს ანდერძი რომლითაც დასტურდება ამ მიწაზე ჩემი საკუთრება“-გვეუბნება ვაჟა ხაბაძე.

ვაჟა ხაბაძე ამბობს, რომ გამგეობამ მიწა აჭარის ფინანსთა და ეკონომიკის სამინისტროს გადასცა, რომელმაც მიწა აუქციონზე გაყიდა. „მიწის გაყიდვა მაშინ გავიგეთ, როცა ტრაქტორმა მუშაობა დაიწყო. მთელმა სამეზობლომ, სანათესაომ იცის რომ მიწა მე მეკუთვნის“-გვეუბნება ის.

ვაჟა ხაბაძემ  საპროტესტო აქცია 17 მარტსაც გამართა: „პოლიციაში რეკავენ, რადგან ამ თემაზე ხმაური არ აწყობთ. დღეს სასამართლო პროცესი მქონდა, პოლიციისთვის წინააღმდეგობის გაწევას მედავებოდნენ, მაგრამ სასამართლომ გამამართლა. თუმცა, მეორე სასამართლო კიდევ არის დანიშნული, სხვისი ქონების დაზიანებას მედავებიან. ჩემს მიწაზე შემოიჭრნენ, საკუთრება წამართვეს და თურმე მე მშენებლისთვის ფიცარი გამიტეხია, ამას მედავებიან“-ამბობს ვაჟა ხაბაძე.

მისი თქმით, საპროტესტო აქცია ხვალ, 17 მაისს, მახუნცეთში გაიმართება.   მახუნცეთის ჩანჩქერის მიმდებარე ტერიტორიაზე არსებული 847,80 კვ/მ შენობა-ნაგებობა და მასზე მიმაგრებული 1045 კვ/მ არასასოფლო-სამეურნეო დანიშნულების მიწის ნაკვეთი, 20 450 დოლარად, პირობებიან აუქციონზე, აჭარის ფინანსთა და ეკონომიკის სამინისტრომ გასულ წელს გაყიდა.