იმ სამი მილიონი ლარიდან, რაც მთავრობამ ბიუჯეტში ეკომიგრანტებისთვის სახლების შესყიდვის პროგრამისთვის გაითვალისწინა, ამ დრომდე ლარიც არ დაუხარჯავთ. ეს ერთადერთი პროგრამაა აჭარის ჯანდაცვის სამინისტროს ოცდაერთი პროგრამიდან, რომელიც ამ დრომდე არ აუმოქმედებიათ.
აჭარის ჯანდაცვის მინისტრის ნუგზარ სურმანიძის განმარტებით, 2016 წლის პირველი კვარტალი მთავრობას გათვალისწინებული ჰქონდა იმ სამართლებრივი ბაზის მოსამზადებლად, რაც სჭირდება ამ პროგრამის განხორციელებას.
„მიღებული იქნა მთავრობის დადგენილება ამასთან დაკავშირებით, ჩვენ ასევე მოვიპოვეთ უფლება წვდომა გვქონოდა ლტოლვილთა და განსახლების სამინისტროს ერთიან ბაზასთან, სადაც ჩვენი ბენეფიციარები არიან რეგისტრირებულნი. ჩატარდა კომისიის პირველი სხდომა გასულ კვირას. განვიხილეთ პირველი სამოცდაათი ბენეფიციარი, რომელიც რეგისტრირებულია მონაცემთა ბაზაში. განხილული საკითხები და მასალები დასაზუსტებლად გადაეგზავნება მუნიციპალიტეტებს, იქიდან მასალების მიღების შემდეგ ჩვენ უკვე გავცემთ ნებართვებს და ისინი მოიძიებენ საცხოვრებლებს, რომელთა შეძენაც უნდათ. შემდეგ ჩვენ ჩავატარებთ ექსპერტიზას სამხარაულის მიერ. ესპერტიზის დასკვნის მიღების შემდეგ კი მივიღებთ გადაწყვეტილებას ამ საცხოვრებელი სახლების შეძენის თაობაზე.“ – განაცხადა მინისტრმა.
დღესვე მთავრობის სხდომაზე შექმნეს შერეული სამთავრობო კომისია , რომელიც განიხილავს ეკომიგრანტი ოჯახების დახმარების საკითხებს.
მთავრობის დადგენილებით ეკომიგრანტი ოჯახები გაიყო ორ ჯგუფად – ოჯახები რომლებიც საჭიროებენ განსახლებას, ვინაიდან მათი საცხოვრებელი ტერიტორია გამოუსადეგარია საცხოვრებლად და სტიქიის შედეგად დაზარალებული ოჯახები, რომელთა საცხოვრებელ ადგილზე შესაძლებელია ახალი სახლის მშენებლობა, ან სახლს, რომელშიც ბენეფიციარი ცხოვრობს, აღდგენითი სამუშაოები ესაჭიროება.
დღეს, 17 მაისს, მთავრობის სხდომაზე ჯანდაცვის სამინისტროს პირველი კვარტალის მუშაობის ანგარიშიც მოისმინეს. მინისტრის ინფორმაციით, პროგრამები 96 პროცენტით შესრულდა, თუმცა, სოციალური პროგრამების ყველა ვალდებულება შესრულებულია.
