დღეს, 18 მაისს „ქართველ მუსლიმთა კავშირის“ ოფისში, სახალხო დამცველთან არსებულმა რელიგიათა საბჭომ, ხუთწევრიანი წარმომადგენლობით, საკონსულტაციო შეხვედრა გამართა, აჭარაში არსებულ არასამთავრობო ორგანიზაციებთან, სტუდენტებსა და მედიის წარმომადგენლებთან.
შეხვედრას უძღვებოდა სახალხო დამცველთან არსებული ტოლერანტობის ცენტრის ხელმძღვანელი ბექა მინდიაშვილი. როგორც მან შეხვედრის დასაწყისში აღნიშნა, შეხვედრის მიზანი იყო აჭარაში რელიგიურ უმცირესობათა წინაშე მდგარი პრობლემებისა და გამოწვევების შესახებ ადგილობრივი ინფორმაციის მიღება. მისივე თქმით, ეს ინფორმაცია რელიგიათა საბჭოს საერთო სურათის აღქმისა და ანალიზისთვის სჭირდება, რათა შესაბამისი რეკომენდაციები გაიცეს.
შეხვედრაზე განიხილეს ბათუმში მეჩეთის მშენებლობის, საჯარო სამსახურებში რელიგიურ უმცირესობათა დასაქმების, სკოლებში სეკულარიზმის დაცვისა და სხვა საკითხები.
