Batumelebi

საზღვაო ტრანსპორტის სააგენტოს მონაცემებით, საქართველოში 5 მეზღვაური ქალია. მათგან ერთი კადეტია, სამი – მზარეული, ერთი კი, რანგით ყველაზე მაღალი, ბათუმელი ნათია ლაბაძეა, რომელმაც საზღვაო აკადემია გასულ წელს დაამთავრა და უკვე ორჯერ იმყოფებოდა შორეულ ნაოსნობაში, ერთხელ, როგორც პრაქტიკანტი და მეორედ – როგორც კაპიტნის მესამე თანაშემწე.

ბათუმის საზღვაო აკადემიაში საზღვაო ნავიგაციას ამჟამად ორი გოგო სწავლობს, ანა ყურშუბაძე და ლუსინე თამარიანი. ორივე მათგანი გემზე აპირებს მუშაობას.

ლუსინე პირველ კურსზეა. ამბობს, რომ გადაწყვეტილება, ესწავლა საზღვაო ნავიგაცია, უცებ მიიღო და ნაცნობ-მეგობრების კრიტიკის მიუხედავად, არ შეუცვლია. „ყველას უცნაური ეჩვენა ეს გადაწყვეტილება, დიდი კრიტიკა მოჰყვა მეგობრებიდან, ოჯახის წევრები უფრო ადვილად შეეგუენ, ვიდრე მეგობრები. ქალი გემზე? – ეს იყო კრიტიკის ძირითადი მიზეზი.  ალბათ იმიტომ უჭირთ ამის გაგება, რომ საქართველოს ისტორიაში არ ყოფილა ბევრი კაპიტანი ქალი, მეორე მსოფლიო ომის დროს იყვნენ, როგორც მახსოვს და ძალიან იშვიათი მოვლენაა.  და რატომ უნდა იყოს პრობლემა ქალი გემზე? რას აკეთებს მამაკაცი ისეთს, რისი გაკეთებაც ქალს არ შეუძლია? მითუმეტეს, როცა არ ვსაუბრობთ ფიზიკურ ძალაზე, თუმცა არიან მექანიკოსი ქალებიც. რაც შეეხება ნავიგაციას, გონებრივი მუშაობაა საჭირო და ეს პრობლემა არ არის,“ – ამბობს ლუსინე.  იგი მომავალში საკუთარ თავს კაპიტნის პოსტზე ხედავს, ასე რომ არ იყოს, არც ჩავაბარებდიო, ამბობს.

„მე რომ ჩავაბარე აკადემიაში, ნათია ლაბაძემ დაასრულა სწავლა. აკადემიაში  ყველა მასზე ყვებოდა, იმიტომ, რომ კარგი კარიერა აქვს. მისაბაძია ჩემთვის, მან დამანახა, რომ ქალს შეუძლია ეს საქმე და ქალს აქვს მომავალი ამ პროფესიაში, მთავარია, ისწავლო და ეცადო,“ – ამბობს ლუსინე.

ბათუმის სახელმწიფო საზღვაო აკადემიის საზღვაო ნავიგაციის სპეციალობის მეოთხე კურსზე სწავლობს ანა ყურშუბაძე. „ეს ძალიან კარგი პროფესიაა, პერსპექტიული და მრავალფეროვანი. არ მიყვარს ერთფეროვნება, პირიქით, დაბრკოლებები მომწონს. ჩემს თავს ვხედავ ისე, როგორც რიგითი მეზღვაური, გავივლი ყველა ეტაპს, რასაც მეზღვაურები გადიან, კაპიტნის წოდებამდე,“ – ამბობს ანა. იგი ამბობს, რომ მისი ოჯახის წევრები ძალიან კარგად შეხვდნენ მის გადაწყვეტილებას და მათგან დიდი მხარდაჭერა აქვს. ახლა ბევრი ინტერესდება ჩემი არჩევანითო – ამბობს.

________________________

კაპიტანი ქალების რაოდენობა მსოფლიოში ბოლო წლებში იზრდება, თუმცა ჯერ ისევ იშვიათობაა. გასულ წელს ინდოელი რადჰიკა მენონი გახდა პირველი ქალი კაპიტანი, რომელმაც საერთაშორისო საზღვაო ორგანიზაციის ჯილდო მიიღო ზღვაში გამოჩენილი განსაკუთრებული სიმამაცისთვის. ინდოეთის დროშის ქვეშ მცურავმა ნავთობის ტანკერმა, რომლის კაპიტანიც რადჰიკა იყო, ბანგლადეშის სრუტეში შვიდი მეთევზე გადაარჩინა დაღუპვას.

ამავე თემაზე: „ჩვენ მოძველებულ სტანდარტებს ვანგრევთ“ – ქალები გემზე 

ქალაქ ლისაბონის გრასას მონასტრის სათავო ოთახის ქეთევან დედოფლის წამების ამსახველი გამოსახულების რესტავრირებასა და კონსერვაციისთვის საქართველოს კულტურული მემკვიდრეობის დაცვის ეროვნული სააგენტო 16 325 ევროს გადაიხდის.

სააგენტოს განცხადებით, ქეთევან დედოფლის წამების ამსახველი 1080-ფილიანი აზულეჟოს პანოს რესტავრაცია და კონსერვაცია შეადგენს მთლიანი კომპლექსის [გრასას მონასტერი] აღდგენითი სამუშაოების ნაწილს; 12 მეტრი სიგრძისა და 3 მეტრი სიმაღლის პანო, პორტუგალიური ხელოვნების ტრადიციული სტილით, მოჭიქული თიხის ფილებზე ლურჯი საღებავითაა შესრულებული; მასზე გამოსახულია ქეთევან დედოფლის ირანში ჩასვლა, წამება და შემდეგ ავგუსტინელი ბერების მიერ წმინდანის ნაწილების გადაცემა მეფე თეიმურაზისთვის.

„პანო განსაკუთრებული ისტორიული და რელიგიური მნიშვნელობის ძეგლია ორივე ქვეყნისათვის… საქართველოსთვის მისი რესტავრაცია მაღალი სახელმწიფოებრივი, საზოგადოებრივი და კულტურული მნიშვნელობისაა და საქართველოსა და პორტუგალიას შორის არსებული მჭიდრო კავშირების გაღრმავებას უზრუნველყოფს. ამასთან, როგორც საქართველოს საგანგებო და სრულუფლებიანი ელჩის, რევაზ ბეშიძისა და გრასას მამათა მონასტრის წინამძღვრის ჟორჟე დიაშის საუბრის ჩანაწერში აღნიშნა ამ უკანასკნელმა, პანოს აბრაზე წარწერა გარდა პორტუგალიური, ფრანგული და ინგლისური ენებისა, შესრულებული იქნება ქართულ ენაზეც. აბრაზე ასევე იქნება მინაწერი, რომ აღნიშნული პანოს რესტავრაცია განხორციელდა საქართველოს მთავრობის დახმარებით“, – აცხადებენ სააგენტოში.

„სარესტავრაციო სამუშაოები დავიწყეთ, ვინაიდან ქეთევან დედოფლის წამების ამსახველი პანოს რესტავრაცია არის გრასას ეკლესიაში მიმდინარე აღდგენითი სამუშაოების ნაწილი. სარესტავრაციო კომპანიის Teixeira Duarte-ს მიერ შესრულდა მოსამზადებელი სამუშაოები, პანოს კედლის გამაგრება, დაზიანებული ფილების აღდგენა და რესტავრაცია. რჩება აზულეჟოს ფილების საბოლოო დამუშავება, გაწმენდა და აბრის განთავსება…

ეკლესიის სარესტავრაციო სამუშაოების დასრულება იგეგმება მიმდინარე წლის ივნისში. ოფიციალური გახსნის ღონისძიება დაგეგმილია 2017 წლის 1-ელ ივლისს. გახსნას დაესწრებიან პორტუგალიის პრეზიდენტი, ლისაბონის მერი, ლისაბონის პატრიარქი და სხვა მაღალი რანგის სტუმრები. რა თქმა უნდა, ქართული მხარე საპატიო სტუმრის სტატუსით იქნება მოწვეული“, – აღნიშნულია გრასას მამათა მონასტრის წინამძღვრის ჟორჟე დიაშის მიერ პორტუგალიაში საქართველოს ელჩისადმი მიწერილ  წერილში, რომელიც 10 მაისით არის დათარიღებული.

„გრასას სამრევლომ და ლისაბონის მერიამ გააფორმეს ოქმი გრასას მონასტრის რეაბილიტაციის მიზნით, ვინაიდან იგი სავალალო მდგომარეობაში იმყოფებოდა და საჭიროებდა ჩარევას. რეაბილიტაციის სამუშაოებში შედის: ძველი შესასვლელი, ძირითადი შიდა ეზო და მონასტრის კაპიტულის დარბაზი, სადაც აზულეჟოს პანოებია განთავსებული. მათ შორის ოთახის მთავარ ნაწილში განთავსებულია წმ. ქეთევანის წამების ამსახველი პანო.

იქიდან გამომდინარე, რომ სამონასტრო კომპლექსში აღდგენითი სამუშაოების ჩატარების ვადა მიმდინარე წლის ივნისში იწურება, აუცილებელია, რომ აღნიშნული პანოს რესტავრაციაც, რომელიც მთლიანი პროექტის მნიშვნელოვანი ნაწილია, ამ დროისათვის იყოს დასრულებული. დრო ძალიან შეზღუდულია, შესაბამისად, ეროვნული სააგენტო დამოკიდებულია პორტუგალიის მხარის მიერ შემოთავაზებულ ვადებსა და თარიღებზე, რის გამოც, წინასწარ შეუძლებელი იქნებოდა [სარესტავრაციო სამუშაოების] შესყიდვის დაგეგმვა“, – აღნიშნულია საქართველოს კულტურული მემკვიდრეობის დაცვის ეროვნული სააგენტოს მიერ შესყიდვების სააგენტოში გაგზავნილ წერილში.

ეროვნული სააგენტო პანოს რესტავრაციისთვის საჭირო თანხას გამარტივებული შესყიდვის წესით გადაიხდის, რაზედაც თანხმობა შესყიდვების სააგენტომ 27 ივნისამდე უნდა გასცეს.

ეროვნული სააგენტოს ინფორმაციით, „2015 წელს, „შატო მუხრანში“ გამართულ რთველზე საზეიმოდ გაიხსნა ქეთევან დედოფლის წამების ამსახველი პანო, რომელიც ქ. ლისაბონის გრასას სამონასტრო კომპლექსში წმინდანის მარტვილობის ამსახველი ერთადერთი გამოსახულების ზუსტი ასლია. დამზადებულია იმდროინდელი ტრადიციული ტექნოლოგიით, ქაშანურისა და ფაიფურის ფილებით. პანოს ორიგინალი პორტუგალიელმა ოსტატებმა XVIII საუკუნის, კათოლიკური ეკლესიის დაკვეთით და თვითმხილველი მისიონერების მიერ აღწერილი ისტორიების საფუძველზე შექმნეს. სხვადასხვა დროს პანოს აღმოჩენასა და შესწავლაში დიდი როლი შეასრულეს ქართველმა მეცნიერებმა და სასულიერო პირებმა“.

ბათუმში სამარშრუტო მიკროავტობუსების ტექნიკური დათვალიერება დასრულდა. ბათუმის მერიის საქალაქო ტრანსპორტის განყოფილების უფროსი, ემზარ ქავჟარაძე ამბობს, რომ მონიტორინგის შედეგად დაფიქსირებული დარღვევების უმეტესობა სავარძლებს შორის დაშორების სტანდარტზე მოდიოდა, რისი მიზეზიც მიკროავტობუსებში ჩამატებული ადგილებია.

„ბათუმში ქალაქის ხაზებზე სულ 424 მიკროავტობუსი მოძრაობს, გარკვეული დარღვევები მათ 20%–ში დაუფიქსირდათ. დარღვევების 80% სავარძლებს შორის დაშორება იყო. ყველა სამარშრუტო ტაქსს ტექპასპორტში უწერია, თუ რამდენი სავარძელი უნდა ჰქონდეს და როცა კიდევ რამდენიმე სავარძელს ამატებენ, ეს იკავებს თავისუფალ სივრცეს და ირღვევა სავარძლებს შორის დაშორების სტანდარტი”. – ამბობს ის.

ბათუმის საკრებულოს დადგენილებით, მიკროავტობუსში სავარძლებს შორის დაშორება მინიმუმ 65 სანტიმეტრი უნდა იყოს. ასევე, სავარძლები არ უნდა იყოს დაბინძურებული, დაზიანებული ან მორყეული.

ემზარ ქავჟარაძის განმატებით, კიდევ ერთი პრობლემა, რაც მიკროავტობუსებში განსაკუთრებით ზაფხულში არის აქტუალური, ვინტილაციაა, რომელიც მიკროავტობუსში, სულ ცოტა, ორი გასაღები ფანჯრის საშუალებით მაინც უნდა ხდებოდეს. „საერთოდ რომ არ ჰქონოდათ, არ ყოფილა ასეთი შემთხვევა, მაგრამ იყო შემთხვევები, როცა ერთი ჰქონდათ და დამატება გახდა საჭირო” – ამბობს ემზარ ქავჟარაძე.

მძღოლებს ხარვეზების გამოსწორების ვადა მიმდინარე თვის ბლომდე აქვთ. პირველი ივლისიდან დაიწყება სამარშუტო ტაქსების შერჩევითი შემოწმება იმის დასადგენად, გამოასწორეს თუ არა ხარვეზი. „ვისაც არ ექნება გამოსწორებული – დავაჯარიმებთ. თუ არ სურთ გამოსწორება, შევწყვეტთ მათთან ხელშეკულებას,” – ამბობს ემზარ ქავჟარაძე.

სანებართვო პირობის დარღვევისთვის  მძღოლი ჯარიმდება 100 ლარით. მისი გადაუხდელობის შემთხვევაში მძღოლს ერიცხება საურავი 500 ლარის ოდენობით. ასეთი ჯარიმა ერთსა და იმავე მძღოლზე შესაძლოა გამოიწეროს იმდენჯერ, რამდენჯერაც დაფიქსირდება დარღვევა.

ქალაქში სამარშრუტო მიკროავტობუსებს ბათუმის მერია ყოველწლიურად ამოწმებს. როგორც ბათუმის მერიის საქალაქო ტრანსპორტის განყოფილებაში გვითხრეს, გასულ წელს დარღვევებისთვის მძღოლთან ხელშეკრულების შეწყვეტის შემთხვევა არ ყოფილა, მხოლოდ დაჯარიმდნენ: „შარშანდელთან შედარებით წელს უკეთესი შედეგი იყო, იმას თუ არ ჩავთვლით, რომ მთლიანობაში ავტოპარკი ერთი წლით მოძველდა, წელს უფრო მეტი პასუხისმგებლობით მოეკიდნენ მძღოლები ამ პროცესს, რაც შესაკეთებელი იყო, თუ შესაღები, დროულად გააკეთეს ყველაფერი“.

შედარებით რთული მდგომარეობაა სოფლებისა და საქალაქთაშორისო მიკროავტობუსებში, სადაც სავარძლების რაოდენობას, მათ შორის დაშორებას, ვინტილაციასა და სხვა სტანდარტებს არავინ ამოწმებს: „ბოლო წლებში ბევრად გამოსწორდა მდგომარეობა სოფლის მარშუტკების სალონებში. ახლაც არის შემთხვევები, როცა ჩამატებულია ერთი–ორი ადგილი, ან არაკომფორტული სავარძელია, მაგრამ როცა გეჩქარება, რამდენიმესაათიან გზაზე ამას აღარ უყურებ,” – ამბობს მაია კონცელიძე, რომელიც ბათუმი-ქედის ხაზით  ხშირად მგზავრობს.

ემზარ ქავჟარაძის თქმით, მგზავრების ქალაქგარეთ გადაყვანაზე  დაახლოებით 200 მიკროავტობუსი მუშაობს: „მხოლოდ თვითმმართველ ქალაქებში სამგზავრო გადაყვანას სჭირდება ნებართვა. დანარჩენი არარეგულირებად სფეროს განეკუთვნება 2006 წლიდან, არც სერტიფიცირებას, არც ნებართვას არ საჭიროებს, ამიტომაც არის ასეთი პრობლემა.”

ამავე თემაზე: ბათუმის მერია სამარშრუტო მიკროავტობუსებს ამოწმებს

დღეს, 25 ივნისს, მეზღვაურთა საერთაშორისო დღეს, საქართველოს ეკონომიკისა და მდგრადი განვითარების მინისტრმა, გიორგი გახარიამ და აჭარის მთავრობის თავმჯდომარემ, ზურაბ პატარაძემ ქართველი მეზღვაურები დააჯილდოვეს.

საქართველოს საზღვაო ტრანსპორტის სააგენტომ „ნორმან ატლანტიზე“ გაჩენილი ხანძრის შედეგად დაღუპული არქიმანდრიტ ილია კარტოზიას სახელობის ჯილდო დააწესა, რომელსაც ყოველ წელს გადასცემს მეზღვაურებს ზღვაში გამოჩენილი განსაკუთრებული სიმამაცისთვის.

„17 აპრილს იტალიაში, კუნძულ ლამპედუსადან 80 მილის მოშორებით, შუა ზღვაში, ქართველი მეზღვაურებით დაკომპლექტებულმა გემმა გადაარჩინა დასაღუპად განწირული 200 ემიგრანტი. როგორც იცით, სავაჭრო ხომალდებზე არაა რეკომენდებული უცხო პირთა რაიმე ფორმით მოხვედრა, თუმცა კაპიტანმა მიიღო გადაწყვეტილება, რის შედეგადაც 200 ადამიანი გადარჩა“, – აღინიშნა დაჯილდოვების ცერემონიალზე.

ჯილდო გადაეცათ ეკიპაჟის წევრებს: როსტომ ცერცვაძესა და გელა გოგუაძეს, ასევე, ამჟამად შორეულ ნაოსნობაში მყოფ მეზღვაურებს: ირაკლი სარჯველაძეს, გიგლა ბერიძეს, ლევან მაჭუტაძეს, გაიოზ კუბლაშვილს, ნოდარ ჯაყელს, დავით ყურშუბაძეს და ომარ გორგოშაძეს.

საზღვაო სფეროში შეტანილი განსაკუთრებული წვლილისთვის ჯილდო გადაეცა გარდაცვლილი მეზღვაურის, ზურაბ-ჯონი პატარაძის მეუღლეს, კაპიტან გიორგი უნაფხოშვილს, კაპიტან ვასილიოს თერზისს, ბერძნული კომპანიის მფლობელს, ქართველ მეზღვაურთა დასაქმებაში შეტანილი წვლილისთვის; გარდაცვლილ კაპიტანს, აბესალომ ზენაიშვილს და „კოლუმბია შიფ მენეჯმენტის“ დირექტორს, ვლადიმერ შელიას – ქართველ მეზღვაურთა დასაქმებაში შეტანილი განსაკუთრებული წვლილისთვის.

საზღვაო-საგანმანათლებლო საქმეში შეტანილი წვლილისთვის დააჯილდოვეს საზღვაო აკადემიის ემირიტუსი პროფესორები: ნათელა დუმბაძე, ზურაბ გაბუნია, რაულ გეგენავა, იაგო წულაძე, თამაზ მელქაძე, დავით ცეცხლაძე, ვაჟა ცეცხლაძე, ტარიელ ქოქოლაძე და შოთა კუნჭულია. საზღვაო აკადემიის საპატიო დოქტორის წოდება მიენიჭა აწ გარდაცვლილ სოლომონ ბალაძეს.

ერთწლიანი სტიპენდია გადაეცათ საზღვაო აკადემიის სტუდენტებს: ლუკა სალუქვაძეს და გიორგი თურმანიძეს.

საქართველოს ეკონომიკისა და მდგრადი განვითარების მინისტრმა გიორგი გახარიამ დღეს, 25 ივნისს, ბათუმში, მეზღვაურებს საერთაშორისო, პროფესიული დღე მიულოცა.

„2010 წელს საერთაშორისო საზღვაო ორგანიზაციის დიპლომატიურმა კონფერენციამ გამოაცხადა მეზღვაურთა საერთაშორისო დღე – 25 ივნისი. ეს იყო ძალიან მნიშვნელოვანი დღე, რადგან მილიონ ნახევარი მეზღვაური დღეს მსოფლიოში ახორციელებს თავის საქმიანობას და ეს ის ადამიანებია, რომლებიც გადაზიდავენ მსოფლიოში წარმოქმნილი ტვირთის 90 პროცენტს. ეს ცხადყოფს იმას, რომ ეს სექტორი, ეს დარგი, არის ეკონომიკის განვითარების უმნიშვნელოვანესი ნაწილი, ეს არის ეკონომიკის განვითარების არტერია.

დღეს საქართველოს ჰყავს 10 000-მდე მეზღვაური, რომლებიც სხვადასხვა ქვეყნის დროშებით ცურავენ და ასობით გემზე შრომობენ თავისი ქვეყნის და ხალხის საკეთილდღეოდ.  ჩვენ კარგად გვესმის, რომ ეს არ არის მსუბუქი და მარტივი შრომა. ეს არიან ის ადამიანები, რომლებსაც უწევთ თვეობით იყვნენ თავიანთი ოჯახების გარეშე, გვესმის, რომ დაუფასებელია ამ ადამიანების წვლილი.  ჩვენი ორგანიზაციები, საქართველოს საზღვაო სააგენტო აქტიურად მოქმედებს იმისთვის, რომ ამ ადამიანებს შეუმსუბუქოს შრომა. ჩვენ ვაკეთებთ ყველაფერს იმისთვის, რომ ჩვენი კანონმდებლობა მაქსიმალურად დაუახლოვდეს დასავლეთ ევროპის საუკეთესო მაგალითებს“ – განაცხადა გიორგი გახარიამ.

დღეს, 25 ივნისს, მეზღვაურთა საერთაშორისო დღეს, ბათუმში რამდენიმე ღონისძიება გაიმართება. 13:00 საათზე ბათუმში საზღვაო აკადემიის კურსანტების საზეიმო მსვლელობაა დაგეგმილი.

საქართველოში ყველა სასწავლებელი, სადაც საზღვაო პროფესიები ისწავლება, ბათუმში მდებარეობს. ბოლო მონაცემებით, ბათუმის სახელმწიფო საზღვაო აკადემიის საზღვაო-საინჟინრო ფაკულტეტზე დაახლოებით ათას ხუთასი სტუდენტი სწავლობს, ბათუმის ნავიგაციის სასწავლო უნივერსიტეტის საზღვაო საინჟინრო ფაკულტეტზე – 359 სტუდენტი, ბათუმის საზღვაო საინჟინრო სასწავლებელ „ანრის“ პროფესიულ პროგრამებზე – 308, ხოლო საზღვაო საინჟინრო ფაკულტეტზე – 89 სტუდენტი.

საზღვაო ტრანსპორტის სააგენტოს ინფორმაციით, საქართველოში 9 500 მეზღვაური, 451 კაპიტანი და 382 უფროსი მექანიკოსია.

ხვალ, 25 ივნისს, დილის 06:00 საათზე მუსლიმი თემი სადღესასწაულო, ბაირამის ლოცვას შეასრულებს. ტარიელ ნაკაიძის ინფორმაციით, ხვალ ბათუმში სადღესასწაულო ლოცვა ორ მეჩეთში შესრულდება. მოქმედ მეჩეთსა და იმ ახალ მეჩეთში, რომელიც მუსლიმმა მრევლმა იმ ადგილზე გახსნა შენობის გარეშე, სადაც მათ ბათუმის მერიამ მშენებლობაზე უარი უთხრა.  

„ბათუმელების“ ინფორმაციით, ხვალ აჭარის მთავრობის თავმჯდომარე ზურაბ პატარაძე მუსლიმებისთვის ბაირამის მილოცვას პირადად გეგმავს. მივა თუ არა პატარაძე ორივე მრევლთან მისალოცად? – კითხვაზე ჯერჯერობით აჭარის მთავრობის პრესსამსახურისგან პასუხი არ გვაქვს.

„ … ჩვენ სპეციალურად არ მოვუწოდებთ, რომ მაინცა და მაინც აქ უნდა მოვიდნენ სალოცავად, მაგრამ ახალ მეჩეთში ვემზადებით მრევლის მისაღებად. მნიშვნელობა არ აქვს ჩვენთვის ხუთი ადამიანი იქნება თუ ორმოცდაათი. ყველას აქვს უფლება ილოცოს კომფორტულად. ვინც უფრო ახლოსაა, დარჩეს ძველ მეჩეთში და იქ ილოცოს. ვისაც უფრო ხელეწიფება, მოვიდეს ახალ მეჩეთში“, – ამბობს ნაკაიძე, ქართველ მუსლიმთა კავშირის თავმჯდომრის მოადგილე.

ტარიელ ნაკაიძის ინფორმაციით, ის და საინიციატივო ჯგუფის – „ახალი მეჩეთის მშენებლობა ბათუმში“ – წევრები გუშინ, 23 ივნისს, პრემიერთან გამართულ ვახშამზე მიწვეულები არ ყოფილან. პრემიერთან არ მიუწვევიათ არც ხულოს მუფთი [საქართველოს პრემიერ-მინისტრმა გიორგი კვირიკაშვილმა, მოახლოებულ რამაზან ბაირამთან დაკავშირებით, საქართველოს მუსლიმთა თემს იფთარზე უმასპინძლა და მათ რამაზანის თვე მიულოცა].

ტარიელ ნაკაიძე ვარაუდობს, რომ ხულოს მუფთის არ მიწვევაც ახალი მეჩეთის მშენებლობის საკითხის მიმართ მის პრინციპულ დამოკიდებულებას უკავშირდება:

„ …  არ ვიცი რაზე ისაუბრეს და რთულია შეფასების გაკეთება, მაგრამ ფაქტია, ახალი მეჩეთი ბათუმში გაიხსნა და ხელისუფლება ვალდებულია ესაუბროს იმ ადამიანებს, რომლებმაც ეს თემა აქამდე მოიყვანეს. ეს არის საინიციატივო ჯგუფი – „ახალი მეჩეთის  მშენებლობა ბათუმში“. ეჭვის თვალით ვუყურებ ინფორმაციას, რომ   პრემიერთან შეხვედრაზე მეჩეთის მშენებლობის თემაზე რაიმე ისაუბრეს. ამას მომავალი გვიჩვენებს.

ჩვენ ვცდილობთ გამოვიყენოთ ყველა სამართლებრივი გზა იმისათვის, რომ იმ ადგილზე, სადაც ახალი მეჩეთი გაიხსნა, ავაშენოთ ახალი კაპიტალური შენობა.“

ტარიელ ნაკაიძის მოსაზრებით, გადაწყვეტილება იმის შესახებ, თუ ვინ უნდა დასწრებოდა ვახშამს პრემიერთან და ვინ არა – რელიგიის სახელმწიფო სააგენტომ, კონკრეტულად კი მისმა ხელმძღვანელმა ზაზა ვაშაყმაძემ მიიღო:

„…2014 წელს მისი ხელდასმით  სერიოზული შეცდომა დაუშვა მუსლიმთა სამმართველომ, როდესც მეჩეთის სანაცვლოდ  რეზიდენციების მშენებლობა/გადმოცემა მოითხოვა. ის ამბობს, რომ ახალი მეჩეთის მშენებლობა არის ვიღაცის ახირება და არა რეალური საჭიროება, ამიტომ ჩვენ ვფიქრობთ, რომ ის ვერ მიაწვდის პრემიერს სწორ ინფორმაციას. ვფიქრობ, პრემიერი საქმის კურსში არ არის ამ თემებთან დაკავშირებით. ჩვენ, რა თქმა უნდა, ვეცდებით, მას მაქსიმალური ინფორმაცია მივაწვდინოთ ზაზა ვაშაყმაძის გვერდის ავლით.“

ტარიელ ნაკაიძე ამბობს, რომ ახალი მეჩეთის გახსნის შემდგომ, საინიციატივო ჯგუფს აჭარის მთავრობის თავმჯდომარემ  ახალი მეჩეთის გაფართოება შესთავაზა:

„… ჩვენ არ ვართ ამის წინააღმდეგი, მაგრამ არა ახალი მეჩეთის აშენების სანაცვლოდ. ასეთი დამოკიდებულება ხელისუფლების მხრიდან მუსლიმების მიმართ არის მუსლიმების შეურაცხყოფა. ჩვენი მიზანია დემოკრატიული ბრძოლა გამარჯვებისთვის. დარწმუნებული ვარ, რომ ახალი მეჩეთის მშენებლობას მუსლიმთა სამმართველოს წევრები მხარს დაუჭერენ. ამ დროსთვის ისინი არიან ზეწოლის ქვეშ ზაზა ვაშაყმაძის მხრიდან“.

ტარიელ ნაკაიძის თქმით, სიმართლეს არ შეესაბამება ინფორმაცია, თითქოს ბათუმის მერია და აჭარის მთავრობა ახალი მეჩეთის პროექტის მასშტაბების შემცირებას ითხოვდნენ.

„ბათუმელების“ ჟურნალისტის ინფორმაციით, რომელიც სარფის საბაჟოზე იმყოფებოდა, დღეს დილიდან საბაჟოზე ავტომანქანებით გადაადგილება შეზღუდულია.

ადგილზე მოქალაქეებისთვის არავის აუხსნია, რა მიზეზით შეიზღუდა დღეს საბაჟოზე ავტომანქანით გადასვლა და არც ის, თუ რამდენ ხანს გაგრძელდება ეს შეზღუდვა.

ბათუმში, თურქეთის საკონსულოში, კითხვებს არ პასუხობენ. მათი თქმით, ამ საკითხზე ინფორმირებულია საქართველოს შემოსავლების სამსახური.
შემოსავლების სამსახურში კი ტელეფონს არ პასუხობენ. არ პასუხობენ არც ამ სამსახურის ცხელ ხაზზე.

დღეს, 24 ივნისს, 16:30 საათზე , საქართველოს პრემიერ-მინისტრი გიორგი კვირიკაშვილი მონაწილეობას მიიღებს შუახევიჰესის მშენებლობის დასრულებისადმი მიძღვნილ ცერემონიაში.

აჭარის მთავრობის პრესსამსახურის ინფორმაციით შუახევიჰესის პროექტის საინვესტიციო ღირებულება 416 მილიონ ამერიკულ დოლარს შეადგენს.  ჰესების დადგმული სიმძლავრე ჯამურად 187 მეგავატია.

ელექტროსადგური 450 გიგავატ/საათ ელექტროენერგიას გამოიმუშავებს და უზრუნველყოფს სათბური გაზების შემცირებას წელიწადში 200 000 ტონაზე მეტით.

შუახევიჰესი პირველი ჰიდროელექტროსადგურია საქართველოში, რომელიც სერტიფიცირებულია „კლიმატის ცვლილებების შესახებ“ გაეროს ჩარჩო-კონვენციის მიერ ნახშირბადის გამოყოფის შესამცირებლად.

შუახევი ჰესის მშნებლობის წინააღმდეგ  მოსახლეობა საპროტესტო აქციებს პერიოდულად მართავდა. ადგილობრივები ამბობდნენ, რომ მათ ჰესის მშენებლობამ კონკრეტული ზიანი მიაყენა: გააქტიურდა მეწყერი და დაზიანდა სახლები.

საქართველოს პრემიერ-მინისტრმა გიორგი კვირიკაშვილმა, მოახლოებულ რამაზან ბაირამთან დაკავშირებით, საქართველოს მუსლიმთა თემს იფთარზე უმასპინძლა და მათ რამაზანის თვე მიულოცა.

მუფთის  ინფორმაციით საქართველოს პრემიერი მას მეჩეთის მშენებლობის საკითხის უახლოეს მომავალში მოგვარებას შეჰპირდა. ბეგლარ ქამაშიძე დარწმუნებულია, რომ ეს არ არის მორიგი დაპირება და ამჯერად მას შედეგი მოჰყვება:

„ … ეს პრობლემა ერთხელ და სამუდამოდ უნდა მოგვარდეს და დასრულდეს გარეთ, ქვაფენილზე ლოცვა. რაც შეეხება მშენებლობის ადგილის საკითხს, ეს ზურაბ პატარაძემ უნდა გადაწყვიტოს. ახლა მიმდინარეობს შეხვედრები და მოლაპარაკებები ამ საკითხთან დაკავშირებით“

პრემიერის პრესსამსახურის ინფორმაციით გიორგი კვირიკაშვილმა შეხვედრაზე ისაუბრა იმ პროგრამებსა და პროექტებზე, რომლებიც  სახელმწიფოს ხელშეწყობით ხორციელდება – მათ შორის, მეოთხე წელია მიმდინარეობს მუსლიმი თემისა და კიდევ რამდენიმე რელიგიური გაერთიანების, კომუნისტური რეჟიმის დროს მიყენებული ზარალის ნაწილობრივ ანაზღაურების მიზნით დაფინანსება;

გრძელდება მეჩეთებისა და სხვა საკულტო ნაგებობების რეგისტრაცია, სარემონტო-სარესტავრაციო სამუშაოები; რამდენიმე საჯარისო ნაწილში გაიხსნა სამლოცველოები მუსლიმი ჯარისკაცებისთვის.

„მინდა იცოდეთ, რომ სახელმწიფო მომავალშიც აქტიურად გააგრძელებს თქვენს მხარდაჭერას”, – მიმართა პრემიერმა მუსლიმებს შეხვედრაზე.

საქართველოს პროკურატურა პრემიერის თანხმობით ათ  სედანს შეიძენს, რაშიც ნახევარ მილიონზე მეტი ლარი დაიხარჯება. შესყიდვის შესახებ საქართველოს პროკურატურამ პრემიერს უკვე შეათანხმა და ტენდერიც გამოაცხადა.

საქართველოს პრემიერმა, გიორგი კვირიკაშვილმა, „საქართველოს პროკურატურისათვის დაკისრებული მოვალეობებისა და ფუნქციების შეუფერხებლად და ეფექტიანად წარმართვის, ასევე მის წინაშე მდგარი გამოწვევების წარმატებით დაძლევის უზრუნველსაყოფად“ –  შესყიდვის განხორციელებაზე თანხმობის შესახებ განკარგულება უკვე გასცა.

განკარგულება ათი ახალი მანქანის გარდა  ჰაერის კონდიცირების საშუალების [25 ერთეული] შეძენაზეც ითვალისწინებს თანხმობას.

მანქანების შეძენის მიზნით პროკურატურამ  ორი ელექტრონული ტენდერი  გამოაცხადა. ჯამში ორივე შესყიდვის ბიუჯეტი 713 550 ლარია. ტექნიკური დავალების მიხედვით მანქანები , რომლებსაც პროკურატურა შეიძენს, 2016 წელს უნდა იყოს გამოშვებული.

მსუბუქი ავტომანქანები საქართველოს პროკურატურამ გასულ წელსაც შეისყიდა.

საქართველოს საზღვაო ტრანსპორტის სააგენტოს ინფორმაციით, საქართველოში 9 500 მეზღვაურია რეგისტრირებული.

საზღვაო ტრანსპორტის სააგენტოს სტატისტიკური ინფორმაციის თანახმად, რომელიც საქართველოში რეგისტრირებულ 9-10 საკრუინგო კომპანიის მონაცემებს ეყრდნობა,  მეზღვაურთა დასაქმების სტატისტიკა ბოლო წლების მიხედვით ასე გამოიყურება:

2016 წელს დასაქმებული იყო 3928 მეზღვაური; 2015 წელს – 3677 , 2014 წელს კი – 3193 მეზღვაური.

სააგენტოს ინფორმაციით, საქართველოში 2013 წლიდან 2017 წლის აპრილამდე გაცემულია  კაპიტნის 451 და უფროსი მექანიკოსის 382 დიპლომი.

25 ივნისს ბათუმში მეზღვაურთა საერთაშორისო დღე არაერთი ღონისძიებით აღინიშნება. ბათუმი საქართველოში ტრადიციულად რჩება ქალაქად, სადაც ყველაზე მეტი მეზღვაური ცხოვრობს. ბათუმშია განთავსებული ყველა ქართული საგანმანათლებლო დაწესებულება, სადაც საზღვაო ტრანსპორტთან დაკავშირებული პროფესიები ისწავლება.

მთავარ ფოტოზე: საზღვაო აკადემიის კურსანტთა საზეიმო მსვლელობა ბათუმში. ფოტო „ბათუმელების“ არქივიდან. 

ბათუმის ბოტანიკური ბაღის ადმინისტრაციის ინფორმაციით, 25 ივნისს ბათუმში, მეზღვაურთა საერთაშორისო დღესთან დაკავშირებით, ევროპის მოედანზე სპეციალურად მოწყობილ სივრცეში სარეალიზაციო მცენარეები გამოიფინება.

მსურველებს შესაძლებლობა ექნებათ, ევროპის მოედანზე  შეიძინონ შემდეგი სახეობის მეცნარეები –  ჰორტენზია, ჭანჭყატი, ნეკერჩხალი, მაგნოლია, გარდენია, პალმა ბუტია კაპიტატა, პალმა – ვაშინგტონია, პალმა – ფინიკი, ტენსტროემია, ბიოტა (აღმოსავლური ტუია), როზმარინი, გაურა, კალისტემონი, მორცხვი მიმოზა, ოქროსფერი ტუია და ცერეუსი.

ამ დღეს  ბათუმში სხვადასხვა აქტივობაა  დაგეგმილი.

25 ივნისს, 16:30 საათზე, ბულვარის კოლონადებთან  ლატვიური კომპანიის “Baltic Bees Jet Team Professional Civilian Jet Team”-ის  ავიაპილოტაჟი სანახაობრივ შოუ -„FlyFest Georgia”-ს გამართავს. ექვსი საჰაერო  ხომალდი 30-წუთიან სანახაობრივ შოუს მოაწყობს.

ღონისძიება აჭარის განათლების, კულტურისა და სპორტის სამინისტროს მხარდაჭერით გაიმართება. სამინისტროს ინფორმაციით, ღონისძიების მიზანი  აჭარის რეგიონისა და ბათუმის ტურისტული პოტენციალის საუკეთესო კუთხით წარმოჩენაა:

„გარდა ბუნებრივი ლანდშაფტისა და ისტორიულ-ეთნოგრაფიული ღირსშესანიშნაობებისა, მნიშვენლოვანია წარმოვაჩინოთ  კულტურულ-სანახაობითი პოტენციალი. არსებობს დასაბუთებული მოლოდინი, რომ ასეთი სანახაობა გაზრდის რეგიონისა და მთლიანად ქვეყნის ტურისტულ ატრაქციულობას და იქცევა კულტურული ტურიზმისა და ალტერნატიული სანახაობითი ხელოვნების ერთ-ერთ უმთავრეს აქტივობად ამიერკავკასიის რეგიონში.“

ავიაშოუ ბათუმში პირველად გაიმართება.

კვირას, 25 ივნისს, მეზღვაურთა საერთაშორისო დღე აღინიშნება. ამასთან დაკავშირებით ბათუმში რამდენიმე ღონისძიებაა დაგეგმილი.

09:45 – შეხვედრა ექვსი მაისის პარკთან;

10:50 – მსვლელობა, იუნკერების საფლავის გვირგვინით შემკობა და მოწყობა მეათე ნავმისადგომზე;

11:55 – საპატიო სტუმრების სიტყვით გამოსვლა;

12:20 – ჯილდო საზღვაო სფეროში შეტანილი განსაკუთრებული წვლილისთვის;

13:00 – ბათუმის სახელმწიფო აკადემიისკენ მსვლელობა;

15:00 – WISTA Georgia – სსიპ საზღვაო ტრანსპორტის სააგენტო – საჯარო ლექცია თემაზე „პროფესია მეზღვაური“.

დღის განმავლობაში სხვადასხვა სახის აქტივობა ევროპის მოედნის მიმდებარე ტერიტორიაზეც გაიმართება. დილის  ცხრა საათიდან თორმეტ საათამდე ბათუმის სახელმწიფო საზღვაო აკადემია, ბათუმის ნავიგაციის სასწავლო უნივერსიტეტი და ბათუმის უმაღლესი საზღვაო-საინჟინრო სასწავლებელი „ანრი“ გამოფენას მოაწყობენ.

საღამოს ექვს საათზე ევროპის მოედანზე კონცერტი ჩატარდება, რომელშიც მონაწილეობას  მიიღებს ჯაზ-ბენდი Asea Soul-ი. აღნიშნულ ღონისძიებას ბათუმის ბოტანიკური ბაღიც შეუერთდება, დღის განმავლობაში ევროპის მოედანზე გამოიფინება მცენარეები, რომლის შეძენა დამთვალიერებელს ადგილზევე შეეძლება.