Batumelebi | სხალთაში მოსახლეობა უსაფრთხო გარემოში ცხოვრებას ითხოვს სხალთაში მოსახლეობა უსაფრთხო გარემოში ცხოვრებას ითხოვს – Batumelebi
RU | GE  

სხალთაში მოსახლეობა უსაფრთხო გარემოში ცხოვრებას ითხოვს

დღეს, 26 ივნისს, ხულოს მუნიციპალიტეტის სხალთის თემის მოსახლეობა საპროტესტო აქციას დილიდან მართავს. ისინი უსაფრთხო გარემოში ცხოვრების უფლებას ითხოვენ. აქციის მონაწილეებმა პროტესტის ნიშნად საავტომობილო გზა გადაკეტეს.

აქციის ერთ-ერთი მონაწილე რევაზ ირემაძე „ბათუმელებთან“ საუბარში აცხადებს, რომ მოსახლეობის პროტესტის მიზეზი სოფელში წყაროს წყლების დაკარგვა და საცხოვრებელი სახლების დეფორმირებაა. მისი თქმით, სოფელ ყინჩაურსა და წაბლანის ტერიტორიაზე გვირაბის მშენებლობამ წყლის გაქრობა გამოიწვია.

„როგორც კი გვირაბის მშენებლობა და ბურღვა-აფეთქებითი სამუშაოები დაიწყეს, სოფელ ყინჩაურში საცხოვრებელი სახლების 50%-ზე მეტი დეფორმირდა, სოფელში არსებული ცხრა წყარო დაშრა, რეალურად სასმელი წყლის გარეშე დავრჩით მოსახლეობა და მდინარის გაუფილტრავ წყალს ვიყენებთ სასმელად“.

აქციის მონაწილეთა თქმით, რამდენიმე თვის წინ გეოლოგებმა სოფლის გეო-ფიზიკური კვლევა ჩაატარეს, რამაც საგანგაშო მდგომარეობა აჩვენა.

„კვლევებში წერია, რომ უნდა შეიზღუდოს მშენებლობის დროს მძიმე კონსტრუქციების განლაგება სოფელში, ეროზიისგან თავდაცვის მიზნით სანაპიროზე ნაპირსამაგრი კონსტრუქციები მოეწყოს, რამდენიმე საცხოვრებელი სახლი კი გამაგრდეს.

ამ დასკვნის მიუხედავად, უსაფრთხოების მიზნით სოფელში დღემდე არანაირი გამაგრებითი სამუშაოები არ ჩატარებულა, უსაფრთხო გარემოში ცხოვრების გარანტიას მოვითხოვთ! ვითხოვთ, მოსახლეობას სასმელი წყალი მოგვიყვანონ,“ – ამბობს რევაზ ირემაძე.

აქციის მონაწილეების განცხადებით, მათ ადგილობრივი ხელისუფლების წარმომადგენლები არ შეხვდნენ: „არ გამოვრიცხავთ, რომ მუნიციპალიტეტის გამგებელს, ბესიკ ბაუჩაძეს, სამუშაო ოთახის კარები ავუჭედოთ,“-აცხადებენ ისინი.

ბესიკ ბაუჩაძის განცხადებით, სოფელში წყალი არის, თუმცა „წყლის დონემ დაიკლო“.

„სასმელი წყლის პრობლემა არ არის, ჩავატარეთ კვლევები და სამუშაოების ჩატარება ამის მიხედვით იგეგმება, უბრალოდ დროში გაიწელა,“-ამბობს გამგებელი.

მისი თქმით, დროში გაწელვის მიზეზი პროექტირება იყო, რომელიც ახლა მიმდინარეობს. „პირველ კვლევას მოსახლეობა არ ეთანხმებოდა, შემდეგ კიდევ ჩავატარეთ გეოლოგიური კვლევა და 30 ივნისს გვექნება პასუხი. კვლევის მიხედვით სადრენაჟო სამუშაოების ჩატარება იყო რეკომენდებული და რამდენიმე ოჯახზე ითქვა, რომ კიდევ სჭირდება დამატებითი გეოლოგიური კვლევა. გეოფიზიკური კვლევაც ჩავატარეთ, თუმცა არც იმას დაეთანხმა მოსახლეობა“.

გამგებლის თქმით, ამ თემში საცხოვრებელი სახლები გამაგრებას არ საჭიროებს, „მხოლოდ რამდენიმეზეა საუბარი და ეს ოჯაზები დარეგისტრირებულნი არიან სახელმწიფოს პროგრამაში, რომელიც 25- ათასლარიან კომპენსაციას ითვალისწინებს. ასეთი არის ორი ოჯახი. დავამონტაჟეთ მონიტორებიც, რომელიც ნიადაგის მოძრაობის სიხშირეს ამოწმებს. ოთხი მონიტორია ასეთი და კონტროლდება. მოსახლეობას დაჩქარებული წესით უნდა ყველაფერი, მაგრამ ისინი ყურადღების გარეშე არ არიან,“-ამბობს გამგებელი.

ბესიკ ბაუჩაძის თქმით, სადრენაჟო სამუშაოებზე პროექტი მომზადებულია, ხარჯთაღრიცხვა კი ერთ კვირაში იქნება და შემდეგ სამუშაოებიც დაიწყება.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი