ნეტგაზეთი • RU

მდინარეში ნაპოვნი ცხედრის საქმე – 28 წლის ბრალდებულს უვადო პატიმრობა ელის

„ღამით ბრალდებული შევიდა ნესტორ დ.-ს დროებით საცხოვრებელ ოთახში და განსაკუთრებული სისასტიკით, დანით, მრავლობითი ჭრილობები მიაყენა მას გულ-მკერდის, კისრის და მუცლის არეში…“ – ეს ამონარიდია საბრალდებო დასკვნიდან ქობულეთში, მდინარე კინტრიშში ნაპოვნი ახალგაზრდა მამაკაცის ცხედრის საქმიდან. მკვლელობა თებერვლის ერთ-ერთ საღამოს მოხდა.

გამოძიებამ სასამართლოზე წარმოადგინა საქმის მასალები, მათ შორის, ურიკა, რომლითაც ცხედარი გამთენიისას მდინარემდე მიიტანეს.

„ეს მუხლი ითვალისწინებს 16-დან 20 წლამდე, ან უვადო თავისუფლების აღკვეთას,“ – მიმართა ბრალდებულს მოსამართლე გიორგი გრატიაშვილმა.

ბრალდებული ვიტალი უ. 28 წლისაა. ის და გარდაცვლილიც, აფხაზეთიდან დევნილები არიან და ქობულეთის ერთ-ერთ დასახლებაში, ერთ სახლში, სხვადასხვა ოთახში ცხოვრობდნენ.

დღევანდელ სხდომაზე მოსამართლემ განზრახ მკვლელობის სავარაუდო მოტივიც გააჟღერა – ანგარება. პროკურატურის მტკიცებით, ბრალდებულის ოჯახს გარდაცვლილისთვის 3 ათასი დოლარი ჰქონდა დასაბრუნებელი.

საქმეში დევს სესხის ხელშეკრულებაც, რომელსაც გარდაცვლილი და ბრალდებულის დედა 2014 წელს აწერენ ხელს. ამ ხელშეკრულების მიხედვით, ბრალდებულის ოჯახს ნესტორ დ.-სთვის გასული წლის ბოლოს უნდა დაებრუნებინა თანხა, მანამდე კი, ნესტორი ბრალდებულის სახლში იცხოვრებდა.

ვიტალი უ. წარდგენილ ბრალს არ აღიარებს. მოსამართლემ მას დღევანდელ სხდომაზე შესთავაზა, საქმე ნაფიც მსაჯულებს განეხილათ, რადგან ბრალი განსაკუთრებით მძიმე დანაშაულს ეხება. ბრალდებულმა ნაფიც მსაჯულებზე უარი თქვა.

მორიგ სხდომაზე სასამართლო არსებით განხილვას დაიწყებს და იმ მოწმეებს მოუსმენს, რომლებიც პროკურატურამ უკვე დაკითხა.

ნესტორ დ. ნაგირავებ ბინაში მარტო ცხოვრობდა.

ნეტგაზეთის მასალების სხვა გამოცემებში გადაბეჭდვის წესი
ავტორი