უზენაესმა სასამართლომ დააკმაყოფილა ბათუმში მცხოვრები მოქალაქეების – რუსუდან ჭიჭინაძისა და იოსებ კუციას სარჩელი საკუთრების აღიარების თაობაზე. დავა ეხებოდა ბათუმში მაზნიაშვილის ქუჩაზე არსებულ 150 კვ/მეტრ მიწის ნაკვეთს, რომელიც მოქალაქეების განცხადებით, მათი საკუთრებაა, თუმცა მერია საკუთრებაში არ უბრუნებს.
„მიწის ნაკვეთი, რომელზეც ჩვენ ვსაუბრობთ, არის ჩემი დიდი ბაბუას მიერ შეძენილი 1879 წელს. 33 წელს, გასაბჭოების დროს, ბაბუაჩემს ჩამოართვეს საკუთრება, თუმცა შემდგომ წლებში მოხდა მისი დაბრუნება. ამ ეზოში გაიზარდა ჩემი ოჯახის ხუთი თაობა. აქ ცხოვრობენ ჩემი შვილები და შვილიშვილებიც.
მიწის ნაკვეთი, ძველი ჩანაწერების მიხედვით, მამის, შუქრი ჭიჭინაძის სახელზეა. თუმცა სახლი, რომელიც ამ მიწაზე აიგო, ჩემი მეუღლის, იოსებ კუციას სახელზეა რეგისტრირებული,“-ამბობს რუსუდან ჭიჭინაძე.
მისი განცხადებით, 2007 წელს, როდესაც პრეზიდენტის განკარგულება გამოიცა საკუთრების აღიარების შესახებ, მიმართეს მერიის საკუთრებოს აღიარების კომისიას, თუმცა თანხმობა ვერ მიიღეს.
ჰოსტელ „გლობუსის“ ეზო
„წლების მანძილზე საკუთრების აღირების კომისიიდან მოდიოდა უარი, განცხადების განხილვის გარეშე. ათი წლის განმავლობაში ვერ მივაღწიეთ იმას, რომ ერთხელ მაინც მოსულიყვნენ და ენახათ რაზე იყო საუბარი,“-ამბობს რუსუდან ჭიჭინაძე.
მისივე თქმით, მიწის ნაკვეთი ოთხივე მხრიდან შენობებით არის შემოსაზღვრული და არის შიდა პატარა ეზო, რომელსაც ეზოს გარდა სხვა დანიშნულებით ვერ გამოიყენებ.
„2012 წლიდან სახლში ჰოსტელი მაქვს გახსნილი და მინდოდა ეზოს კეთილმოწყობა. ხელისუფლება ამბობს, რომ ბიზნესს ხელს უწყობს, თუმცა მე მხოლოდ ხელს მიშლიან. აივანი მინდა გავაკეთო, მაგრამ ვერ ვიწყებ მშენებლობას. ვცდილობ, კანონის ფარგლებში გავაკეთო ყველაფერი, მაგრამ არ მაძლევენ ამის საშუალებას“.
რუსუდან ჭიჭინაძის სარჩელი სამი ინსტანციის სასამართლომ განიხილა და საკუთრების აღიარების კომისიას აღნიშნული მიწის ნაკვეთის აღიარება დაავალა, თუმცა მერია სასამართლოს გადაწყვეტილებას უკვე ათი წელია არ ასრულებს.
არასამთავრობო ორგანიზაცია „საერთაშორისო გამჭვირვალობა-საქართველოს“ იურისტის, ანი ბერძენიშვილის განცხადებით, საკუთრების აღიარების კომისია სისხლის სამართლის დანაშაულს სჩადის.
„საუბარია სასამართლოს მიერ კანონიერ ძალაში შესულ გადაწყვეტილებაზე. უზენაესმა სასამართლომ მიიღო გადაწყვეტილება, უკვე რვა თვე გადის და უმაღლესი ინსტანციის მიერ მიღებულ გადაწყვეტილებას კომისია არ ასრულებს ჩვენი არაერთი მოთხოვნის მიუხედავად,“-ამბობს ანი ბერძენიშვილი.
„საერთაშორისო გამჭვირვალობა-საქართველოს“ შეფასებით, აღნიშნული სისხლის სამართლის დანაშაულს წარმოადგენს.
„ჩვენ მივმართეთ პროკურატურას და ასევე საგამოძიებო სტრუქტურებს ვთხოვთ, დაუყოვნებლივ მოახდინონ რეაგირება აღნიშნულთან დაკავშირებით და დასაჯონ ამ საკითხზე პასუხისმგებლობის მქონე პირები“.
ანი ბერძენიშვილის განცხადებით, მოქალაქეს საქართველოში დღეს აღარ გააჩნია არანაირი სამართლებრივი ბერკეტი და საშუალება, რომ დაიბრუნოს უკანონოდ წართმეული საკუთრების უფლება.
მერიის საკუთრების აღიარების კომისიის თავმჯდომარე დათო ოქაძე ტელეფონს არ პასუხობს. მერიის პრესსამსახურის ინფორმაციით, დათო ოქაძე გადაწყვეტილებას საკითხის შესწავლის შემდეგ მიიღებს. „მან თქვა, რომ საკუთრების აღიარების კომისიის თავმჯდომარედ ცოტა ხნის წინ დაინიშნა და შესაბამისად, ამ საკითხს სიღრმისეულად არ იცნობს“-ამბობს თეკლა ჩიჩუა.
მისივე ინფორმაციით, დათო ოქაძე აღიარების კომისიის თავმჯდომარედ მიმდინარე თვეში დაინიშნა.
რუსუდან ჭიჭინაძის განცხადებით, ეზოს, რომელიც მის ოჯახს ეკუთვნის, მერია საკუთრებაში არ უკანონებს.
ფოტო: გულნარა კაკაბაძე
