გაბრიელა ტრანსგენდერი ქალია და იგი პოლიციელებს ძალადობაში ადანაშაულებს. ამბობს, რომ გუშინ ღამით ბათუმში, მოძალადეებისგან თავის დასაცავად პოლიცია თვითონ გამოიძახა, მათ კი დაცვის ნაცვლად განყოფილებაში წაიყვანეს, სიტყვიერად შეურაცხყეს და ადმინისტრაციული სამართალდარღვევის ოქმი შეუდგინეს – პოლიციელების შეურაცხყოფისა და წვრილმანი ხულიგნობის გამო.
„დაახლოებით ღამის ოთხ საათზე ჭავჭავაძეზე, ეკლესიასთან მდებარე სკვერში ვიდექი მეგობართან ერთად. გამოიარა ხუთმა მამაკაცმა და დაგვიწყეს საუბარი. აგრესიას სხვადასხვა სიტყვით გამოხატავდნენ. მათ შორის ერთი განსაკუთრებით აგრესიული იყო ჩემს მიმართ, დანაც კი ამოიღო, უნდა აგჩეხოო. მე პოლიციას დავურეკე და დახმარება ვითხოვე,“ – გვიყვება გაბრიელა როსკიპოვა-რომანოვა [მისი გვარი პასპორტის მიხედვით არის- ბუზარიაშვილი]. გაბრიელა თბილისში ცხოვრობს და ის რამდენიმე დღით ესტუმრა ბათუმს.
გაბრიელას მონაყოლის მიხედვით, პოლიციას არ გამოუკითხავს ის ხუთი პირი, რომელიც ადგილზე იმყოფებოდა პოლიციის მისვლის დროს. გაბრიელა პოლიციის მეორე განყოფილებაში გადაიყვანეს და გამოკითხეს. დილით კი პოლიციელებმა ადმინისტრაციული-სამართალდარღვევის ოქმი შეადგინეს გაბრიელას წინააღმდეგ.
„პოლიციელები არ მალავდნენ აგრესიას ჩემს მიმართ. მეუბნებოდნენ, რომ მე ვჩხუბობდი თითქოს ქუჩაში. ქუჩაში მქონდა კამათი იმაზე, რომ მე მითხრეს, განყოფილებაში წამოდიო, თითქოს მე ვიყავი დამნაშავე… განყოფილებაში პოლიციელები არ მალავდნენ ცინიზმს და აგრესიას ჩემ მიმართ. გინება დამიწყეს, როცა გაიგეს, რომ ტელეფონით ვიღებდი მათ რეაქციებს. მერე ტელეფონში ყველაფერი წამიშალეს. ადმინისტრაციულ ოქმს ხელი არ მოვაწერე. დღეს მოსამართლე ლაშა თავარქთილაძეს საქმის გადადება ვთხოვე, რადგან საქმის მასალებს არ ვიცნობ და არც ადვოკატი მყავს. საქმის განხილვა გადაიდო“, – ამბობს გაბრიელა.
გაბრიელა ამბობს, რომ შარსებობს რამდენიმე მოწმე, ვინც ჭავჭავაძის ქუჩაზე ამ შემთხვევას შეესწრო. გაბრიელა მათ მიწვევას აპირებს ბათუმის საქალაქო სასამართლოში.
