ბათუმში, გორგილაძის #94-ში, მოქალაქემ ამხანაგობის წინააღმდეგობის მიუხედავად მრავალბინიან საცხოვრებელ სახლს აივანი მიაშენა. ახალაშენებულ სახლზე აივნის მიშენების ნებართვა ბათუმის მერიამ მშენებელ კომპანიასთან – „დარ ბილდინგთან“ შეთანხმების გარეშე გასცა. ამის შესახებ არც ამხანაგობამ იცოდა.

გორგილაძის #94-ში ახლახან აშენებულ 21-სართულიან სახლს ერთადერთი მიშენებული აივანი აქვს. მეზობლები, რომლებსაც ჩვენ ვესაუბრეთ ამ მიშენებას ეწინააღმდეგებოდნენ, ამიტომ მიშენების კანონიერებით დაინტერესდნენ და ინფორმაცია როგორც ბინის მშენებელ კომპანიასთან, ასევე ბათუმის მერიაში გადაამოწმეს.

„მერიის ზედამხედველობის სამსახურში გავარკვიეთ, რომ მერიამ აივნის მიშენების ნებართვა გასცა ისე, რომ ეს მშენებელ კომპანიასთან არ შეუთანხმებია, თანაც ნებართვა გასცა მოთხოვნიდან ორ დღეში. მშენებლობა ისე დაიწყო, არც მე მქონია ინფორმაცია. ამ საკითხის გასარკვევად განცხადება გვაქვს შეტანილი და რვა დღეა პასუხს ველოდებით“, –  ამბობს თამარ სიხარულიძე, გორგილაძის #94-ის ამხანაგობის თავმჯდომარე.

ბათუმში, გორგილაძის #94 -ში, „მაკდონალდსის“ მიმდებარედ, ზღვის ხედით ბინაში მცხოვრებლებმა თითოეულ კვადრატში 600-800 დოლარამდე გადაიხადეს. ისინი მიიჩნევენ, რომ როგორც ბინის მოვლა-დასუფთავება, ასევე მისი იერსახის შენარჩუნება მათი საზრუნავია:

„რამდენჯერმე დაგვიზიანდა ფასადი რემონტის გამო, ვთხოვეთ კომპანიას და აღადგინა. ახლა თუ ერთ მეპატრონეს მიშენების უფლება მისცეს, არ არის გამორიცხული ხვალ სხვამ მოინდომოს. არც ისაა გამორიცხული, რომ ის აივანი ხვალ ოთახის ნაწილი გახდეს და რას დაემსგავსება აქაურობა, რაში გადავიხადეთ ფული?“ – ამბობს თამარ სიხარულიძე.

მოქალაქე, რომელმაც უკვე ექსპლუატაციაში შესულ სახლს აივანი მიაშენა, მეზობლების თქმით, ნატო ბურჯანაძეა, რომელიც თბილისში ცხოვრობს. ისინი ვარაუდობენ, რომ ნატოს ბათუმის მერიაში ახლობლები ჰყავს:

„…სხვანაირად როგორ მიიღებდა ნებართვას? – სხვა მეზობელს ვერანდის მსუბუქი კონსტრუქციით გადახურვა უნდოდა, მიმართა მერიას და უარი უთხრეს. გადახურვა არ შეიძლება და მიშენება შესაძლებელი ყოფილა.“

ბათუმის მერიის ინფორმაციით, აივნის მიშენებაზე ნებართვა მერიამ ნამდვილად გასცა, მშენებლობის პროექტი კი მერიის არქიტექტურის სამსახურში  თავად მრავალბინიანი სახლის პროექტის ავტორმა გოჩა გარუჩავამ წარადგინა.

„…თუ ფასადის კონსტრუქცია გვაძლევს იმის საშუალებას, რომ აივანი მოემატოს, ან მოაკლდეს, ან რაიმე მოხდეს ისე, რომ ფასადის პრინციპი არ დაირღვეს, მე  მგონი, ეს უნდა იყოს მისაღებია. თუ იქ სხვასაც მოუნდება მიშენება, რა თქმა უნდა, ყოველი შემთხვევა ცალკე უნდა განვიხილოთ. თუ ეს დასაშვები იქნება იმ პრინციპიდან გამომდინარე, რაზეც მე ვსაუბრობდი, ეს შესაძლებელია. რაც შეეხება მშენებელ კომპანიას, მე არ ვუთანხმდები „დარ ბილდინგს“ პეტრეს ან პავლეს, ეს ამხანაგობის გადასაწყვეტია და მეპატრონეების თანახმობა იდო ამ შემთხვევაში, ამხანაგობის თანხმობის გარეშე მერია ნებართვას არ მისცემდა“, – განმარტა პროექტის ავტორმა, გოჩა გარუჩავამ.

მშენებლობები ბათუმში, განსაკუთრებით მიშენება-დაშენების პოლიტიკა ეჭვს იწვევს კორუფციაზე. ამის შესახებ ოგანიზაცია „ბათომმა“ აჭარის მთავრობის თავმჯდომარეს და თავად ქალაქის მერს ოფიციალურად წერილობით არაერთხელ მიმართა.

კითხვებზე, როგორ მოახერხა მოქალაქემ ექსპლუატაციაში შესულ სახლზე აივნის მიშენების ნებართვის მიღება? – ბათუმის მერი გიორგი ერმაკოვი პასუხობს:

„ვის რა ეჭვი უჩნდება მაგაზე, მე ვერ ვიმსჯელებ, როდესაც არქიტექტურის სამსახური გასცემს ნებართვას. ამ კონკრეტულ შემთხვევაზე განცხადებაც იყო შემოსული, გავეცანი და არქიტექტურის სამსახურსაც ვთხოვე დაზუსტება. ნებისმიერი მიშენებისას ახალაშენებულ სახლზე აივნის ამოყვანა  პროექტის ავტორთან შეთანხმების გარეშე არ ხორციელდება. განცხადებით იყო შემოსული პროექტის ავტორი. თვითონ მისი ნებართვის გარეშე ვერც მიშენებას ვერ დაშენებას, ჩვენ ვერ განვახორციელებთ. თუ ისევ იქნება მომართვა, ისევ არქიტექტურის სამსახური გადაწყვეტს მიზანშეწონილობას. მიშენებაზე ნებართვის გაცემის  წინააღმდეგი ვართ ყოველთვის, გარდა იმისა, რომ რიგ შემთხვევებში ეს შეიძლება მიზანშეწონილი იყოს, თუ პროექტის ავტორი იძლევა მაგაზე თანხმობას. დანარჩენ შემთხვევებში არქიტექტურის სამსახური წყვეტს. გირჩევთ არქიტექტურის სამსახურს ყველა წვრილმანი გამოკითხოთ და მიიღებთ პასუხს.“

არქიტექტურის სამსახურის უფროსმა, ირაკლი ახალაძემ კი თავისი პასუხი ასე ჩამოაყალიბა:

„ნებართვის მიმღებმა წარმოადგინა არქიტექტორის განცხადება და საექსპერტო დასკვნა, ვიზუალურად მისაღები იყო და ჩვეულებრივად მიიღო ნებართვა – არანაირი მიღწევა და გავლენები არ არის აქ. თუ სხვაც მოვა ავტორის პროექტით? – გააჩნია როგორი პროექტი იქნება, თუ ჩაჯდება და ვიზუალურ ესთეტიკურ მოთხოვნებს დააკმაყოფილებს, რა პრობლემაა? – ასეთი აჟიოტაჟი ამ პატარა აივანზე რატომ ატყდა, არ მესმის. ეს არის მხოლოდ ინდივიდუალურად თავის ფართობზე ისეთი აივნის მიშენება, რომელიც არ იწვევს კოეფიციენტის ცვლილებას, ამიტომ ამხანაგობის თანხმობა საჭირო არ იყო.“

„ბათუმელები“ ნატო ბურჯანაძესაც დაუკავშირდა, მან კომენტარის გაკეთება არ ისურვა. გვითხრა, რომ ამ საკითხზე ჯერ ოჯახს  გაესაუბრება და შემდეგ დაგვიკავშირდება.

ბათუმის შოთა რუსთაველის სახელმწიფო უნივერსიტეტის [ბსუ] ინფორმაციით, ძლიერმა ქარმა სასწავლო კორპუსის 460 კვ/მ-ზე გადახადა სახურავი და მოშალა ხის კონსტრუქცია. შექმნილი ვითარების აღმოსაფხვრელად კი, შესყიდულია სახურავის აღდგენის სამუშაოები, საერთო თანხით 33 ათას 616 ლარი.

„გადაუდებელი აუცილებლობის ვითარება დადგა 2017 წლის 16-17 ოქტომბრის ღამით, სააგენტოში მომართვის წარდგენამდე უნივერსიტეტმა შეისყიდა სახურავის დაზიანებული ნაწილის აღდგენის საპროექტო-სახარჯთაღრიცხვო დოკუმენტაცია ღირებულებით 44 235.6 ლარი, რომლის საფუძველზეც ჩატარდა ბაზრის კვლევა, კერძოდ, შეტყობინება დაეგზავნა 6 კომპანიას, საიდანაც თავისი შემოთავაზებები წარმოადგინა სამმა კომპანიამ, ხელშეკრულება გაფორმდა დაბალი ფასის წინადადების მქონე კომპანიასთან“ – აღნიშნულია უნივერსიტეტის მიერ სახელმწიფო შესყიდვების გვერდზე.

უნივერსიტეტის ინფორმაციით, სამშენებლო სამუშაოების მოცულობები განისაზღვრა უნივერსიტეტის შეკვეთის საფუძველზე შპს „საბა“-ს მიერ 2017 ქლის 17 ოქტომბერს წარმოდგენილი სახარჯთაღრიცხვო დოკუმენტაციით.

უნივერსიტეტი სააგენტოსთან გადაუდებელი აუცილებლობით შესყიდვის შემდგომ შეთანხმებას ითხოვს, რაზედაც სააგენტომ პასუხი 25 ოქტომბრამდე უნდა გასცეს.

„დაზიანებული სახურავის დაუყოვნებლივ შეუკეთებლობის შემთხვევაში დგებოდა უნივერსიტეტის მრავალათასლარიანი ქონების, ლაბორატორიების, აუდიტორიების, სამეცნიერო ხელსაწყოებისა და წიგნადი ფონდის დაზიანება-განადგურების საშიშროება შენობაში მოხვედრილი ნალექის შედეგად,“ – აცხადებს ბსუ, რომელმაც დაზიანებული სახურავის აღდგენაზე შესაბამისი ხელშეკრულება, თანხით 33 616 ლარი, შპს „აკო 777“-თან 18 ოქტომბერს გააფორმა.

ძლიერმა ქარმა ბათუმის რუსთაველის უნივერსიტეტის შენობის ნაწილს [მეორე კორპუსს] სახურავი 17 ოქტომბერს გადახადა.

ბათუმის ბულვარის ადმინისტრაციის ინფორმაციით,  ბულვარში აზიური ფაროსანას გავრცელების საწინააღმდეგო შეწამვლა დაიწყო.  პრევენციის ფარგლებში,  10 ათას ძირამდე სხვადასხვა ჯიშის მრავალწლოვანი და ბუჩქოვანი ხე-მცენარე შეიწამლება ქიმიური ნივთიერებებით.

„ზღვისპირა ბულვარში აზიური ფაროსანასგან დასაცავად სულ შეიწამლება 15 ჰექტარი ფართობი ეტაპობრივად. მონიტორინგის შედეგად, ბულვარის პერიმეტრზე მავნებელი მწერის გავრცელების ფაქტი ჯერჯერობით არ დაფიქსირებულა,“-აცხადებენ ბულვარის ადმინისტრაციაში.

მათივე ინფორმაციით, ქიმიური ნივთიერება რითაც ხე-მცენარეები შეიწამლება, უსაფრთხოა ჯანმრთელობისთვის: „არატოქსიკურია და მოსახლეობისთვის საფრთხეს არ წარმოადგენს“.

ბათუმში, მწვანე კონცხის დასახლებაში მდებარე 20 366 კვ/მ არასასოფლო-სამეურნეო დანიშნულების მიწის ნაკვეთი საქართველოს მთავრობამ პირდაპირი მიყიდვის ფორმით, 931 ათას ლარად, საკუთრებაში გადასცა კომპანიას, რომელიც კერძო პირმა ქონების გადაცემამდე რამდენიმე დღით ადრე დაარეგისტრირა.

აღნიშნული ქონება აჭარის ავტონომიური რესპუბლიკის საკუთრებაში იყო და ის სახელმწიფოს, გაყიდვამდე რამდენიმე დღით ადრე უპირობოდ გადაეცა. ქონების გადაცემა აჭარის მთავრობისგან სახელმწიფომ ითხოვა, „სახელმწიფოსთვის ქონების გადაცემა კი, ჩვენი მხრიდან რაიმე პირობებით არ ხდება“ – გვითხრეს აჭარის ფინანსთა და ეკონომიკის სამინისტროში.

კომპანია „ელიტ კონსტრაქშენ გრუპი“, რომელსაც საქართველოს მთავრობამ მწვანე კონცხზე მიწის ნაკვეთი მიჰყიდა, 2017 წლის 21 აგვისტოსაა დარეგისტრირებული. მიწის მიყიდვაზე საქართველოს მთავრობის განკარგულებას კი პრემიერმა გიორგი კვირიკაშვილმა ხელი, დაახლოებით ერთ თვეში, ამავე წლის 28 სექტემბერს მოაწერა. ამ კომპანიის 100% წილის მფლობელი დაჩი ჩაგანავაა, დირექტორი – ლერი ბოლქვაძე.

მთავრობის განკარგულების მიხედვით, კომპანიამ ქონების საფასურის ნაწილი, 300 ათასი ლარი, მიმდინარე წლის 21 დეკემბრამდე უნდა გადაიხადოს, 600 ათასი – ხელშეკრულების გაფორმებიდან 6 თვის, ხოლო დარჩენილი 31 ათასი ლარი – ერთი წლის ვადაში.

ამავე განკარგულების მიხედვით, ქონების შემძენმა, „პირადად ან/და მესამე პირის მეშვეობით“, შესაბამისი ხელშეკრულების გაფორმებიდან 4 წლის ვადაში უნდა უზრუნველყოს „უძრავი ქონების ან მისი ნაწილის განვითარება/განაშენიანება [რაც მოიცავს, მაგრამ შესაძლებელია, არ შემოიფარგლებოდეს, კომერციული/საოფისე/კვების დანიშნულების ობიექტ(ებ)ს, სპორტულ მოედანს, არანაკლებ 50 ავტომობილზე გათვლილ ავტოსადგომს“], რისთვისაც არანაკლებ 4 მილიონი ლარის ინვესტიცია უნდა ჩადოს.

„ელიტ კონსტრაქშენ გრუპი“ ვალდებული იყო, შესაბამისი ხელშეკრულების გაფორმებამდე წარედგინა აღნიშნული თანხის არანაკლებ 10%-ის ოდენობის უპირობო და გამოუხმობი საბანკო გარანტია.

ნასყიდობის ხელშეკრულება კომპანიასთან 2017 წლის 6 ოქტომბერს გაფორმდა. იმავე დღეს მიწის ნაკვეთი კომპანიის საკუთრებად დარეგისტრირდა.

გასხვისებული მიწის ნაკვეთი ბათუმში, თამარ მეფის გამზირის გასწვრივ, ზღვისპირას მდებარეობს [მახინჯაურთან, სადაც მწვანე კონცხის უღელტეხილზე და გვირაბისკენ მიმავალი გზები იყოფა]:

აჭარის მთავრობის თავმჯდომარეს, ბატონ ზურაბ პატარაძეს,

ქალაქ ბათუმის მერს, ბატონ გიორგი ერმაკოვს

მოგახსენებთ, რომ ამა წლის 12 ოქტომბერს აჭარის კულტურული მემკვიდრეობის სააგენტოში ჩატარდა კულტურული მემკვიდრეობის (ე.წ. „ზონალური“) საბჭოს მორიგი სხდომა, რომელსაც „გუშაგი ძაღლების“ როლში ესწრებოდნენ კულტურული მემკვიდრეობის დაცვის აქტივისტები, რომლებმაც გამოხატეს მკვეთრი პროტესტი ერთ–ერთი განსახილველი საკითხის მიმართ. კერძოდ – მაზნიაშვილისა და ჟორდანიას კუთხეში (##27/17) მდებარე ისტორიული სახლების დანგრევისა და მის ადგილას ხუთსართულიანი სახლის მშენებლობასთან დაკავშირებით. შემოთავაზებული პროექტის განხორციელება თავისი მასშტაბითა და სტილით დიდ ზიანს მიაყენებს ჯერ კიდევ შემორჩენილ ისტორიულ განაშენიანებას და სავალალო გავლენას იქონიებს მთლიანად ისტორიული ბათუმის ისედაც საფრთხის ქვეშ მყოფ კულტურულ და ისტორიულ მახასიათებლებსა და ფასეულობებზე. ისტორიული განაშენიანების შენარჩუნებისთვის ასევე მნიშვნელოვანია აქ არსებული ფონური ღირებულების მქონე ნაგებობების დაცვა.

მიუხედავად სხდომაზე გამოთქმული პროტესტისა,  კულტურული მემკვიდრეობის საბჭოს წევრების უმრავლესობამ (გარდა კულტურული მემკვიდრეობის სააგენტოს ორი წევრისა) ჩვეულებისამებრ, ყოველგვარი არგუმენტაციის გარეშე (შეგიძლიათ იხილოთ ოქმის ჩანაწერი) მხარი დაუჭირა აღნიშნულ პროექტს. სწორედ ამ საბჭოს წევრების არაკომპეტენტურობისა და გადაწყვეტილების მიღებისას საზოგადოებრივი ინტერესების გაუთვალისწინებლობის გამო გწერდით რამდენიმე თვის წინ და მოვითხოვდით კულტურული მემკვიდრეობის საბჭოს დაკომპლექტების და გადაწყვეტილების მიღების წესის შეცვლას.

რამდენადაც ჩვენთვის ცნობილია, თქვენი დავალების საფუძველზე აჭარის კულტურული მემკვიდრეობის სააგენტომ მოამზადა მემკვიდრეობის საბჭოს ცვლილების რამდენიმე ვარიანტი, თუმცა ის არ განუხილიათ. არსებული კულტურული მემკვიდრეობის საბჭოს ქმედებები, მათ მიერ გადაწყვეტილებების მიღების პროცესი, სრულ საფუძველს გვაძლევს ვიფიქროთ, რომ არაკომპეტენტურობასთან, საზოგადოების ღირებულებებისა და ინტერესების ფეხქვეშ გათელვასა და სრულ იგნორირებასთან ერთად, აქ სერიოზულ კორუფციულ პრაქტიკასთან გვაქვს საქმე. ვინაიდან კულტურული მემკვიდრეობის საბჭო მთავრობასთან არსებული ადმინისტრაციული ორგანოა, ამიტომ მათ მიერ მიღებულ გადაწყვეტილებებზე პასუხისმგებლობა აჭარის მთავრობის თავმჯდომარესაც ეკისრება.  ამიტომ, სასიცოცხლოდ აუცილებელია დროულად მოხდეს საბჭოს რეფორმირება და მასი დაკომპლექტება კომპეტენტური, საზოგადოების წინაშე პასუხისმგებლიანი და კეთილსინდისიერი ადამიანებით.

საბჭოს ამჟამინდელ წევრებს – საჯარო მოხელეებს, სამწუხაროდ, არა აქვთ დღევანდელობის შესაფერისი სახელმწიფოებრივი აზროვნება; არ იციან და არც ცდილობენ, რომ გააცნობიერონ რამდენად მნიშვნელოვანი რესურსია კულტურული მემკვიდრეობა საზოგადოების მდგრადი სოციალური და ეკონომიკური წინსვლისთვის, ეროვნული იდენტობის განმტკიცებისთვის, ადამიანთა ყოველდღიური გარემოს გაუმჯობესებისათვის, რომ მის გარეშე ვერ მოხდება ქვეყნის სწორი, სიცოცხლისუნარიანი განვითარება. ასევე ისინი არ ითვალისწინებენ საზოგადოების და პროფესიული ჯგუფების რეკომენდაციებს, ხშირ შემთხვევაში კერძო კომპანიის და საჯარო უწყების თანამდებობის პირის პოზიცია უპირისპირდება საზოგადოებრივ ინტერესს, ქალაქის  ცივილურ განვითარებას.

ცალკეა აღსანიშნავი ქალაქ ბათუმის მერისა და მერიის პასუხისმგებელი პირების დამოკიდებულება კულტურული მემკვიდრეობის მიმართ. ბატონ გიორგი ერმაკოვის მერობის პერიოდში არ განხორციელდა მემორანდუმით გათვალისწინებული მთავარი დაპირება – ისტორიულ-კულტურული საყრდენი გეგმის ან თუნდაც მისი ერთ-ერთი შემადგენელი ნაწილის – ისტორიული განაშენიანების სახელმწიფო დაცვის ზონის დამტკიცება; საზოგადოებრივი აზრის ზემოქმედებით მოხერხდა მუშაობის დაწყება ისტორიული განაშენიანების ზონის საზღვრების დადგენაზე, რომელიც ამა წლის ნოემბრის ბოლოს უნდა დასრულდეს; მაგრამ არ სრულდება მერის ზეპირი დაპირება შესაბამისი რეჟიმის დამტკიცებამდე ისეთი პროექტების განხილვის შეჩერებაზე, რომლებიც ეწინააღმდეგება საქართველოს კანონს „კულტურული მემკვიდრეობის შესახებ“, ურბანული მემკვიდრეობის დაცვის პრინციპებს და გამოუსწორებელ ზიანს აყენებს ქალაქის ისტორიულ ნაწილს. სწორედ ამის  დასტურია საბჭოს ზემოაღნიშნული  სხდომის ოქმი.

ბოლოს, გამოვთქვამთ იმედს, რომ ქალაქის მერი ამჯერად მაინც გაიხსენებს მის მიერ დადებულ პირობას, გამოიჩენს კეთილგონიერებას და არ შეითანხმებს აღნიშნულ პროექტს მაზნიაშვილისა და ჟორდანიას კუთხეში.

საზოგადოება „ბათომი“

როგორ მივიღოთ ადგილობრივი დემოკრატიული ხელისუფლება – ამ თემაზე ბათუმის დემოკრატიული ჩართულობის ცენტრში დისკუსია შედგა. ჰაინრიჰ ბიოლის ფონდის ორგანიზებულ დისკუსიაზე მომხსენებლები იყვნენ: ჟურნალისტი ზვიად ქორიძე, „თავისუფალ ჟურნალისტთა სახლის“ ხელმძღვანელი ასლან ჭანიძე და „ევროპული საქართველოს“ ბათუმის მერობის კანდიდატი პეტრე ზამბახიძე. დისკუსიის მოდერატორი ჟურნალისტი ნატა იმედაიშვილი იყო.

ანგარიშვალდებულების მნიშვნელობაზე ისაუბრა ასლან ჭანიძემ. მისი აზრით, მოცემულობა მაშინ შეიცვლება, თუკი პოლიტიკოსები იგრძნობენ, რომ ისინი ამომრჩეველთან არიან ანგარიშვალდებული და არა პოლიტიკურ ლიდერებთან.

„გინახავთ სადმე საკრებულოს წევრს ანგარიში ჩაებარებინოს მოსახლეობისთვის? მე არ მინახავს. პირიქით, მედიაში ჟღერდება ინფორმაცია, რომ, მაგალითად, ბათუმის საკრებულოს წევრი ირაკლი მიქელაძე თვეების განმავლობაში არ დადის საკრებულოს სხდომებზე და შემდეგ ის ისევ საარჩევნო სიაშია. ამომრჩეველს პოლიტიკური პარტიები არც იმას ეუბნებიან, როგორ არჩევენ კანდიდატებს, რა კრიტერიუმების მიხედვით, ვინ არჩევს… შესაბამისად, ვისმენთ ერთსა და იმავე დაპირებებს, ტოპ სამეული გვაქვს უკვე – დასაქმება, პენსია, სოციალური დახმარება. ამიტომაც ამბობს ამომრჩეველი, რომ დაიღალა,“ – აღნიშნა ასლან ჭანიძემ, „თავისუფალ ჟურნალისტთა სახლის“ ხელმძღვანელმა.

„მთავარია, პრობლემას ხედავდეს ადგილობირივი ხელისუფლება,“ – თქვა დისკუსიაზე პეტრე ზამბახიძემ. მან, ძირითადად, მოქალაქეების თვითმმართველობაში ჩართვის აუცილებლობაზე ისაუბრა და იმაზე, თუ რა ფორმით უნდა მონაწილეობდნენ ამომრჩევლები თვითმმართველობის მართვაში.

„ორი რამ აშინებთ საქართველოში ხელისუფლებებს ყველაზე მეტად – დამოუკიდებელი თვითმმართველობა და სასამართლო,“ – თქვა დისკუსიაზე ზვიად ქორიძემ. მან თვითმმართველობის ისტორია მიმოიხილა, თუ როგორ არიდებდა თავს სხვადასხვა დროს ხელისუფლება ძლიერი თვითმმართველობის შექმნას მიუხედავად იმისა, რომ მოსვლამდე ისინი ზუსტად თვითმმართველობების გაძლიერებას ჰპირდებოდნენ ამომრჩეველს. მან ისაუბრა იმაზეც, რომ „ქართული ოცნების“ ხელისუფლებამაც უარი თქვა პატარ-პატარა თვითმმართველობების შექმნაზე და მათ გაძლიერებაზე.

„საინტერესოა, რომ ამ საკითხზე ორი ინსტიტუტის პოზიცია დაემთხვა ერთმანეთს – უშიშროების სამსახურის და ეკლესიის… მაგალითად, მარნეულს, სადაც 27 ათასი ადამიანი ცხოვრობს, პირდაპირ უთხრეს, რომ თვითმმართველი ქალაქი არ უნდა იყოს, რადგან შესაძლოა აზეირბაიჯანელი მერი აირჩიოთო. ჩვენ ამის არ უნდა შეგვეშინდეს… დღეს ჩვენ ვისმენთ სხვადასხვა პოლიტიკური ძალის ერთნაირ  დაპირებას სოციალურ პრობლემებზე, გამწვანებაზე, თუ დასაქმებაზე, მაგრამ არ ისმის მთავარი – იქნება თუ არა დემოკრატიული საკრებულო, რამდენად ისმის ჩემი ხმა საკრებულოში?“- აღნიშნა ჟურნალისტმა ზვიად ქორიძემ.

ზვიად ქორიძემ ახსენა დასავლური პრაქტიკაც, სადაც ქართული რეალობისგან განსხვავებით, ადგილობრივი თვითმმართველობის არჩევნებზე ამომრჩევლის ინტერესი გაცილებით მაღალია, ვიდრე სხვა არჩევნებზე, რადგან ამ დროს „პრობლემა უფრო ახლოს მიდის მოქალაქესთან…“

ქედის მუნიციპალიტეტის სოფელ ოქტომბერში ძლიერი წვიმის შედეგად განვითარებული მეწყრით დაზარალებული ბაჯელიძეების ოჯახი აცხადებს, რომ სახელმწიფო განსახლების პროგრამით არ უსარგებლიათ და ამ პროგრამით გათვალისწინებული  თახა, 25 000 ლარი არ აუღიათ:

„რადგან 25 000 ლარით ვერაფერს შევიძენდით, ამ თანხის მიღებაზე უარი განვაცხადეთ, საჭირო დოკუმენტებიც არ წარგვიდგენია” – ამბობს გაბრიელ ბაჯელიძე.

[highlight color= red]ამავე თემაზე: მეწყერმა ქედაში საცხოვრებელი სახლი წაიღო[/highlight]

სტიქიის შედეგად დაზარალებულ ოჯახთან დაკავშირებით ინფორმაცია batumelebi.ge – ზე დღეს დილით გამოქვეყნდა. ინფორმაციაში მოყვანილი იყო ქედის გამგებლის, დავით დუმბაძის ციტატა იმასთან დაკავშირებით, რომ ბაჯელიძეების ოჯახმა  სახელმწიფოს განსახლების პროგრამით დახმარება მიიღო.

მას შემდეგ, რაც ბაჯელიძეების ოჯახი „ბათუმელებს“ დაუკავშირდა და ინფორმაცია მოაწოდა იმის შესახებ, რომ მათ დახმარება არ მიუღიათ, ქედის გამგებელს ხელახლა დავუკავშირდით ინფორმაციის დასაზუსტებლად. დავით დუმბაძე აღნიშნულთან დაკავშირებით ამბობს, რომ მან  სახელმწიფოსგან თანხის გამოყოფა იგულისხმა და ასეთი განმარტება გააკეთა:

„სახელმწიფომ ამ ოჯახს 25 000 ლარი გამოუყო, თუმცა ანგარიშზე მხოლოდ იმიტომ არ დაერიცხათ, რომ ოჯახმა საჭირო დოკუმენტი არ წარადგინა”.

სახლის დამეწყრის დროს გაბრიელ ბაჯელიძის ოჯახის შვიდი წევრიდან მხოლოდ ორი იმყოფებოდა სახლში, სტიქიის შედეგად არავინ დაზიანებულა.

გუშინ, 17 ოქტომბერს, საღამოს, მთიდან ჩამოსულმა მიწის მასამ ბაჯელიძეების საცხოვრებელი სახლი, ბოსელთან და საქონელთან ერთად წაიღო.

ბათუმის შოთა რუსთაველის სახელმწიფო უნივერსიტეტმა ქობულეთში ფიტოპათოლოგიისა და ბიომრავალფეროვნების კვლევითი ინსტიტუტის ახალი, თანამედროვე ცენტრის მშენებლობა დაიწყო. ცენტრის მშენებლობას საძირკველი დღეს, 18 ოქტომბერს ჩაეყარა.

ოფიციალური ინფორმაციით, კვლევითი ცენტრის მშენებლობა უნივერსიტეტის ბიუჯეტიდან ერთი მილიონ 578 ათასი ლარით დაფინანსდება,  800 ათასი ლარი კი აჭარის ავტონომიური რესპუბლიკის 2018 წლის ბიუჯეტშია გათვალისწინებული.

„ფიტოპათოლოგიისა და ბიომრავალფეროვნების კვლევითი ინსტიტუტის ახალი ცენტრი 1100 კვ.მ ფართობზე, სამსართულიან  შენობაში განთავსდება, რომელიც პროექტის მიხედვით, მთლიანად შეესაბამება საერთაშორისო სტანდარტებს და ითვალისწინებს კვლევითი სფეროს სპეციფიკისათვის საჭირო ინფრასტრუქტურას“.

ბსუს-ს ინფორმაციით, ინსტიტუტში განთავსდება მოლეკულური ბიოლოგიის ლაბორატორია, მიკრობიოლოგიის ლაბორატორია, მიკოლოგიის ლაბორატორია, ბიომრავალფეროვნების კვლევის ლაბორატორია და სამკურნალო მცენარეთა ლაბორატორია. 5.2 ჰ მიწის ფართობზე კი საცდელი ნაკვეთი უნდა განთავსდეს, სადაც ერთწლიანი და მრავალწლიანი მცენარეების კვლევა იწარმოებს.

კვლევითი ცენტრის მშენებლობას სამშენებლო კომპანია ,ვექტორი“ ახორციელებს. მშენებლობა 2018 წლის ივნისში უნდა დასრულდეს.

„ბათუმში არარსებულ მისამართებზე ამომრჩევლები არიან რეგისტრირებული,“ – განაცხადა „ნაციონალური მოძრაობის“ ბათუმის საარჩევნო სიის პირველმა ნომერმა, მირდატ ქამადაძემ. მან დღეს ბრიფინგი მამია ვარშანიძის მეოთხე ჩიხში გამართა და თქვა, რომ ჩიხში სულ სამი მისამართია, საარჩევნო სიაში კი ამ ჩიხში – 50 ამომრჩეველი.

„ამ ჩიხში შეგიძლიათ ნახოთ მხოლოდ სამი მისამართი, სამი სახლი. დანარჩენი მისამართი ბუნებაში არ არსებობს, მაგალითად, მეოთხე ან მეთხუთმეტე. ეს ამომრჩევლები ცხოვრობენ იმ მისამართზე, რომელიც ბუნებაში არ არსებობს. არსებობს რისკი, რომ ისინი იყვნენ რეგისტრირებული სხვაგანაც და იქაც მისცენ ხმა. ამ დროისთვის არ გვაქვს ინფორმაცია, ეს ადამიანები იყვნენ თუ არა რეგისტრირებული აქ წინა არჩევნებზე, ან არიან თუ არა ისინი სხვა საარჩევნო ოლქის სიაშიც,“ – გვითხრა მირდატ ქამადაძემ.

„სამართლიანი არჩევნების“ აჭარა-გურიის კოორდინატორი, მადონა ბერიძე მიიჩნევს, რომ პრაქტიკულად უნდა გადამოწმდეს ეს მისამართები დაინტერესებული მხარის, ან საარჩევნო ოლქის მიერ.

„შესაძლებელია, რომ იქ იყო ძველი იტალიური ეზო, ან კორპუსი და ამ ადამიანებს დარჩათ ძველი იურიდიული მისამართი. შეიძლება ახლა დაამატეს მოქალაქეების განცხადების საფუძველზე. ორი რეგისტრაციის ადგილი მოქალაქეს ვერ ექნება,“ – ამბობს ის.

ბათუმის საარჩევნო საოლქო კომისია ამ შემთხვევის შესწავლას არ აპირებს. კომისიაში გვითხრეს, რომ ამომრჩეველი ერთი პირადობის მოწმობით აძლევს ხმას და პრაქტიკულად გამორიცხულია ერთი და იგივე ამომრჩეველი ორ ადგილას იყოს რეგისტრირებული.

„ჩვენ სიებთან შეხება არ გვაქვს. სიებს იუსტიციის სამინისტრო უგზავნის ცესკოს, ცესკო – ჩვენ. გაორება გამორიცხულია,“ – გვითხრა ბათუმის საოლქო კომისიის თავმჯდომარის მოადგილემ, ვალერი ბერიძემ.

რატომ შეიძლება იყვნენ რეგისტრირებული არარსებულ მისამართებზე ამომრჩევლები? – „ბათუმელები“ ცესკოს დაუკავშირდა, სადაც გვითხრეს, რომ კომენტარს საკითხში გარკვევის შემდეგ გააკეთებენ.

მთავარ ფოტოზე: „სპაიდერმენი“ საარჩევნო უბანზე 2016 წლის საპარლამენტო არჩევნებზე.

ამავე თემაზე: ბათუმში ამომრჩეველთა რაოდენობა ცესკოს სიაში უფრო მეტია, ვიდრე სტატისტიკის მონაცემებით

აჭარის რეგიონალური ჰიდრომეტეოროლოგიური ობსერვატორიის სინოპტიკოსების პროგნოზით, აჭარაში მზიანი ამინდი ერთი კვირა შენარჩუნდება. ძლიერი წვიმის შემდეგ, ბათუმში დღეს, 18 ოქტომბერს, გამოიდარა. ჰაერის საშუალო ტემპერატურა 19-20 გრადუსია.

ამინდის პროგნოზის მიხედვით, უახლოეს დღეებში ჰაერი 25 გრადუსამდე გათბება. მზიანი ამინდი იქნება მთაშიც, სადაც დღისით ჰაერის საშუალო ტემპერატურა 7-12 გრადუსი იქნება.

გზებისა და ტროტუარების მოწესრიგება – პირველ პრობლემად დაასახელეს ქალმა ამომრჩევლებმა გამოკითხვის დროს. არასამთავრობო ორგანიზაცია CiDA-მ ქვეყნის მასშტაბით 1106 ქალს დაუსვა შეკითხვა – დაასახელეთ სამი მნიშვნელოვანი პრობლემა, რაც აწუხებთ ქალებს თქვენს ქალაქში ან სოფელში. გამოკითხვა ჩატარდა ბათუმშიც.

გამოკითხვის შედეგად ხუთი პრობლემა გამოიკვეთა, რაც ქალმა ამომრჩევლებმა დაასახელეს: 1) გზებისა და ტროტუარების გაუმჯობესება, 2) სასმელ წყალზე ხელმისაწვდომობა, 3) პარკები, სკვერები და სხვა საჯარო ადგილები, გამწვანება, გარე განათება, 4) ბაღებისა და სკოლამდელი აღზრდის დაწესებულებების ხელმისაწვდომობა და გაუმჯობესება და 5) ნარჩენების მართვა. მესამე და მეოთხე პრიორიტეტებს შორის პროცენტული სხვაობა უმნიშვნელო იყო.

„ხშირად ისინი აღნიშნავდნენ იმას, რომ ტროტუარები არის ვიწრო, ან ჩაკეტილია მანქანებით… ქალებმა ასევე დაასახელეს პრობლემად საბავშვო ბაღებისა და სკოლის ხელმისაწვდომობა. წერენ, რომ საბავშვო ბაღების სამუშაო დრო ხშირად არ ემთხვევა მათ განრიგს და უწევთ სამსახურში დაგვიანება, ან იქედან ადრე წამოსვლა,“ – გვიყვება ნინო გაბეჩავა, „დემოკრატიის ინსტიტუტის“ წარმომადგენელი. ამ ორგანიზაციამ გამოკითხა ქალი ამომრჩევლები ბათუმსა და ქედაში.

ქალ ამომრჩევლებს შეეძლოთ მათთვის პრიორიტეტული საკითხების დასახელებაც. აჭარაში ასეთ საკითხად ქალებმა დაასახელეს: ბიბლიოთეკები, მუზეუმები და გასართობი ადგილები. ნინო გაბეჩავა ამბობს, რომ ქალები ძირითადად ხაზს უსვამდნენ ბიბლიოთეკების მატერიალურ გაუმართაობას სოფლებში. მთლიანად ქვეყანაში პრიორიტეტად ქალმა ამომრჩევლებმა გზების და საბავშვო ბაღების გარდა, ცხოველების დაცვა დაასახელეს.

პრიორიტეტულ ხუთეულში ვერ მოხვდა ქალთა მიმართ ძალადობა. „მაგრამ ამ კუთხით ქალმა ამომრჩევლებმა გამოკვეთეს პრობლემა, რომ მაგალითად, არ იციან ცხელი ხაზის ნომერი, ასევე აქვთ განცდა, რომ პოლიცია მათ ვერ დაიცავს,“ – აღნიშნავს ნინო გაბეჩავა.

რესპონდენტების 29%-ის სურვილია, რომ პოლიტიკურმა პარტიებმა და საარჩევნო კანდიდატებმა თავად ჰკითხონ ქალებს მათი პრობლემების შესახებ. 28%-ის აზრით ქალებმა და მოქალაქეთა ჯგუფებმა უნდა აიღონ ხელში ინიციატივის გამოხატვა, 22% კი ამ როლის შესრულებას არასამთავრობო სექტორს ანდობს.

რა აღმოჩნდა მოულოდნელი ამ გამოკითხვის დროს? – „დემოკრატიის ინსტიტუტის“ წარმომადგენელმა გვიპასუხა, რომ მოულოდნელი აღმოჩნდა ქალი ამომრჩევლების დამოკიდებულება იმ პოლიტიკური სუბიექტების მიმართ, რომლებიც ქალთა საჭიროებებზე ამახვილებენ ყურადღებას წინასაარჩევნო პროგრამებში.

„გამოკითხულთა 67 % უპირატესობას ანიჭებს ასეთ პოლიტიკურ პარტიას, ან კანდიდატს. 17 % -სთვის კი ეს არ არის პრიორიტეტი. ჩვენთვის ეს ციფრიც საკმაოდ მაღალი იყო,“ – დასძენს ნინო გაბეჩავა.

ქალი ამომრჩევლების საჭიროებებზე ანგარიში მომზადდა  არასამთავრობო ორგანიზაცია ,,სიდას“ და სამოქალაქო საზოგადოების რეგიონული ქსელის (R-CSN) მიერ აღმოსავლეთ-დასავლეთის მართვის ინსტიტუტის ACCESS-ის პროექტის  ფარგლებში, აშშ საერთაშორისო განვითარების  სააგენტოს (USAID) და ევროკავშირის ფინანსური მხარდაჭერით.

ფაროსანას წინააღმდეგ განხორციელებულ ღონისძიებებზე აჭარის სოფლის მეურნეობის მინისტრმა, ავთანდილ მესხიძემ, დღეს, 17 ოქტომბერს, ბრიფინგი გამართა. მინისტრის ინფორმაციით,  ციტრუსის მოახლოვებულ  სეზონთან დაკავშირებით, სურსათის ეროვნული სააგენტოსგან აჭარამ  13 000 ლიტრი ბიფენტრინის შემცველი პრეპარატი და საინფორმაციო ბუკლეტები მიიღო. ფაროსანას საწინააღმდეგო პრეპარატები უკვე დაურიგდა მოსახლეობას: ქობულეთში – 5300 ლიტრი, ხელვაჩაურში – 4200 ლიტრი,  ქ. ბათუმში – 2100 ლიტრი, ქედის მუნიციპალიტეტში  – 1400 ლიტრი. სულ ისარგებლა  52 000-მა ათასმა ფერმერმა.  მინისტრის თქმით, სამინისტრომ კიდევ მიიღო 3000 ლიტრი ბიფენტრინის შემცველი პრეპარატი, რომელიც დამატებითი საჭიროებისათვის გადაეცემა ფერმერებს.

ფაროსანას გავრცელების ინტენსივობის დადგენის მიზნით აჭარის სოფლის მეურნეობის სამინისტრო, სურსათის ეროვნული სააგენტოსთან ერთად, მონიტორინგს ახორციელებს, რისთვისაც სპეციალური ფერომონები (მწერის დამჭერი) მოეწყო. ქობულეთში, ხელვაჩაურსა და ბათუმში სულ 425  ფერომონი დამონტაჟდა.

„მონიტორინგის შედეგების გათვალისწინებით, სურსათის ეროვნული სააგენტოს მიერ გადმოცემული იქნა ბიფენტრინის შემცველი პრეპარატი.  აჭარის მთავრობის სარეზერვო ფონდიდან მექანიზაციის საშუალებების მომსახურების შესყიდვის მიზნით გამოყოფილი იქნა 300 000 ლარი. ასევე აჭარის მთავრობის სარეზერვო ფონდიდან მექანიზაციის საშუალებების მომსახურეობის შესყიდვის მიზნით  დამატებით გამოყოფილი იქნა  80 000 ლარიციტრუსოვანთა პლანტაციებში მაღალი რისკის შემცველი ზონების შესაწამლად,“ – განაცხადა  აჭარის სოფლის მეურნეობის მინისტრმა.

ამავე თემაზე:

სურსათის ეროვნული სააგენტო : როგორ დავიცვათ ციტრუსი აზიური ფაროსანასგან

პატიმრებზე წერა სხვაგვარ ამბებზე წერისგან ძალიან განსხვავდება. თუ სხვა რესპონდენტებს ჟურნალის ფურცლებზე აღმოჩენა ახარებთ და ინტერვიუს გამოქვეყნებას ელიან, ყოფილი პატიმრები, პრობაციონერები და პატიმართა ოჯახის წევრები ჟურნალისტებს უფრთხიან. ხშირად არ პასუხობენ უცხო ზარებს, უკეთეს შემთხვევაში პირველად ოჯახის წევრები იღებენ ყურმილს, რომ გაარკვიონ, ვინ რეკავს, რატომ და რისთვის. როცა მათ ვუხსნით, რომ ყოფილ პატიმართა რეაბილიტაციისა და რესოციალიზაციის საკითხებზე ვწერთ, უამრავი კითხვა ჩნდება…

„მაინც და მაინც ჩემზე უნდა წეროთ?“, „რისთვის გჭირდებათ ეს ისტორიები?“, „ფოტოს გადაღებაზე ვერ დაგთანხმდებით, შარს არ ვეძებ, ძლივს გამოვედი იქიდან“, „რა გინდათ ჩემგან?“. შიშებს დამთრგუნველი გამოცდილება ბადებს. საპატიმროგამოვლილებს ხშირად უჭირთ საუბარი საკუთარ წარსულსა და მომავალზეც კი. ეს იმის მანიშნებელია, რომ ყოფილი პატიმრები გათავისუფლების შემდეგაც გრძნობენ ფარულ კონტროლს. ღიად საუბარსა და პრობლემების თავისუფლად განხილვას ჩუმად ყოფნა ურჩევნიათ.

ჟურნალისტისთვის საუკეთესო შემთხვევაა, როცა შეუძლია ნახოს რესპონდენტის სამოქმედო სივრცე, აქვს გადაღების უფლება და სრულად აღიქვამს მოცემულობას, მაგრამ ყოფილი პატიმრების ისტორიების მომზადებისას ყოველთვის ამის ფუფუნება არ გვაქვს, ხშირად ისინი არ ამხელენ სახელსა და გვარს, არ თანხმდებიან გადაღებას, ამიტომ ხანდახან არ გვაქვს მათი ფოტოები და ვიდეო, მაგრამ გვაქვს სატელეფონო ხმები, რომლებსაც ვერ ვკარგავთ ერთი მიზეზის გამო – ამ ხმებში სათქმელი ისმის, სათქმელი, რომელიც შეიძლება სხვებისთვის შიშების, პასიურობისა და უიმედობის დამძლევი ბიძგი აღმოჩნდეს.

დავითი (სახელი შეცვლილია) ყოფილი პატიმარია, რომელთანაც სატელეფონო ინტერვიუ ჩავწერეთ. ციხეში ორი წელი და რამდენიმე თვე გაატარა. ამბობს, რომ ჟურნალისტებთან საუბარი მისთვის სამომავლოდ საფრთხეს არ შეიცავს, მაგრამ მაინც არჩევს ვინაობა დავფაროთ. „არ არის პრობლემა ინტერვიუს ჩაწერა, მაგრამ სახელი მაინც არ გვინდა“, – გვეუბნება.

„რბილი ხასიათი მაქვს, ფეთქებადი არ ვარ, არც რადიკალური შეხედულებები მაქვს არაფერზე. ციხეში მოხვედრასაც კი ცივი გონებით მივუდექი. საკუთარ თავს შთავაგონებდი, რომ დარდი და ნერვიულობა არაფერს მომიტანდა. თავიდან თექვსმეტი წელი მქონდა მისჯილი, თავს ვირწმუნებდი – პრობლემებს მოვერეოდი. აპელაციის შემდეგ მართლაც სამი წელი დამიტოვეს და ნელ-ნელა ყველაფერი გადავლახე. ციხიდან არც ნევროზი გამომყოლია, არც სხვა სახის გართულებები, ხანდახან როცა ვიხსენებ რა გადავიტანე, მგონია, ვიღაც სხვამ გაიარა ეს გზა და არა მე. საპატიმროში რომ მოვხვდი მცირეწლოვანი შვილი, ცოლი და დედა მარტო დარჩა… დედაჩემს პატარა მაღაზია ჰქონდა სოფელში და თავი ამით გაჰქონდათ“, – ამბობს ყოფილი პატიმარი.

ოჯახს თავი დედის პატარა მაღაზიით გაჰქონდა, დავითს კი პატიმრობის წლები წიგნებმა გაატანინა.

„კითხვა მიყვარდა, წიგნებმა გადამარჩინა. არ ვიცი როგორ შეიძლება თქვა, რომ ციხეშიც შეიძლება დროის საინტერესოდ გატარება, მაგრამ წიგნებით შეგიძლია განვითარდე და ტკივილი ცოტა ხნით დაივიწყო. ციხეში იყო ბიბლიოთეკა, დადიოდა სოციალური სამსახური, შეგეძლო წიგნები გამოგეწერა და შემდეგი ვიზიტისას აუცილებლად მოგიტანდნენ, ახლობლებსაც ვაბარებდი, რაც ბიბლიოთეკაში არ ჰქონდათ. აღარ მინდა იმ პერიოდის გახსენება“, – ყვება დავითი.

საუბარშიც კი იგრძნობა, რომ აქტიური ადამიანია, შესაბამისად გათავისუფლების შემდეგაც არ ჰქონია ინტეგრაციის პრობლემა. ხშირად ერთვება სხვადასხვა ორგანიზაციის მიერ მოწყობილ პროექტებში, ესწრება ტრენინგებსა და სემინარებს. დავითმა ერთ-ერთმა პირველმა მიმართა „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამას“.

გათავისუფლების შემდეგ მეორე შვილი შეეძინა, ახლა უფროსი მესამე კლასშია უმცროსი – ორწლინახევრის. ერთი თვე გაუგრძელდა ადაპტაციის პროცესი და მალევე შეუდგა აქტიურ ცხოვრებას. „რა თქმა უნდა, მქონდა პრობლემები: 2012 წელს გავთავისუფლდი და 2016-მდე უმუშევარი ვიყავი, ისევ დედაჩემის პატარა მაღაზიაზე და სოფლის ნობათზე ვიყავით დამოკიდებული, თხილი, სიმინდი მოგვყავდა. 4 წელი ველოდი სამსახურის დაწყებას, მაგრამ ეს ლოდინი ჩემი ნასამართლეობით არ იყო განპირობებული, პატარა რაიონია და სამუშაო ადგილები ჭირს უბრალოდ.  ბოლოს ჩემი მოლოდინი მაინც გამართლდა და დავსაქმდი. ცოლიც მუშაობს ბაღში და ვცხოვრობთ“. იხსენებს გათავისუფლების შემდგომ პერიოდს.

ბიძაშვილმა მოანდომებინა ჩაბმულიყო გურიის ახალგაზრდული ცენტრის პროგრამებში. ჩავიდა ოზურგეთში, ტრენინგებს დაესწრო ბიზნესის თემაზე, პროექტების წერა ისწავლა და ინიციატივაც დაუფინანსეს: სოფლის მცხოვრებლებს გაზაფხულ-ზაფხულზე ბალახის მოცელვა სჭირდებათ, ზამთარში კი შეშის დახერხვა – ამიტომ დავითმა ელექტროცელი და ბენზოხერხი შეიძინა, ოჯახში დამატებითი შემოსავლის წყარო გაჩნდა.

„ჩემს რაიონში, სოფელში ბევრ ახალგათავისუფლებულ ყოფილ პატიმარს ვიცნობ, სულ  ვამხნევენ და შევძახი, რომ იმოქმედონ, საქმე გაიჩინონ, ცხოვრებას იმედიანად უცქირონ. ჩემს გამოცდილებას ვუყვები ბევრს და ვასწავლი ორგანიზაციების მისამართს, სადაც შეუძლიათ პროექტები წერონ, ინიციატივა გამოიჩინონ და რამე აკეთონ. ხშირად ახალგათავისუფლებულები გონებით ისევ საპატიმროში რჩებიან. მინდა, ვისაც შევძლებ და შეგონებით დავეხმარები იქედან დროზე გამოვიყვანო. ზოგი მიჯერებს, ზოგი არა. ვისთანაც ხმა მიმიწვდება ყველას ვეტყვი, რომ მოქმედება, აქტიურობა აუცილებელია და ყოველთვის ამართლებს. მჯერა, რომ მონდომებით ყველას შეუძლია ცხოვრების შეცვლა“.

თითქოს დავითი არც არაფერს ამბობს ისეთს, ვინაობის გამხელა რომ ეჩოთირებოდეს. თუმცა ის მაინც მხოლოდ „ხმად დარჩენას“ არჩევს და იმედი აქვს, ასეც შეძლებს სათქმელი მიიტანოს სიახლეების მაძიებელ, ახალი ცხოვრების მომლოდინე ყოფილ პატიმრებთან.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.