ნეტგაზეთი • RU

ადიდებული მდინარეები და მეწყრული პროცესები – მდგომარეობა ხულოში

ხულოს მუნიციპალიტეტში უკვე მეორე დღეა გადაუღებლად წვიმს, მაღალი ზონის სოფლებში კი, მოთოვა. 
ხულოს მუნიციპალიტეტის გამგებლის მოვალეობის შემსრულებლის, ლაშა ბოლქვაძის ინფორმაციით, უხვმა ნალექმა მდინარეების ადიდება და მეწყრული პროცესები გამოიწვია.
ადიდებულმა მდინარემ სოფელ ჩაოსთან დამაკავშირებელი ხიდი წაიღო, მეწყერი ჩამოწვა სოფელ ჯვარიქედის  გზაზე, სოფელ ქედლებში საცხოვრებელ სახლს ქარმა სახურავი გადახადა, ხოლო სოფელ ტუნაძეებში ვალერიან ხარაბაძის საცხოვრებელი სახლი ჩამოიშალა.
„მიმდინარეობს გზების აღდგენითი სამუშაოები, სოფელ რაქვთაში მდინარის კალაპოტი გაიზარდა, რაც მდინარის ახლოს ორი საცხოვრებელი სახლის დატბორვის საშიშროებას ქმნის. ამ დროისთვის ორივე ოჯახი უსაფრთხო ადგილზე გავიყვანეთ, რაც შეეხება ვალერიან ხარაბაძის ოჯახს, ეს ოჯახი ახალ სახლს აშენებს, თუმცა მშენებლობა არ დაუსრულებია, საგანგებო ვითარებასთან დაკავშირებით გამგეობაში შტაბი 24 საათის განმავლობაში მუშაობს,” – თქვა ლაშა ბოლქვაძემ. 
 ბოლო ინფორმაციით, მეწყერი ისევ განვითარდა სოფელ ღურტაში. 

 

ნეტგაზეთის მასალების სხვა გამოცემებში გადაბეჭდვის წესი
ავტორი