Batumelebi

აჭარაში საინიციატივო ჯგუფმა, რომელშიც რეგიონის ოპოზიციის წარმომადგენლებიც შედიან, დღეს, 15 ივლისს, აჭარის მთავრობის თავმჯდომარის თანამდებობაზე არმაზ ახლედიანის კანდიდატურა დაასახელა, რომელსაც პრეზიდენტს წარუდგენენ.

„საზოგადოებისთვის ცნობილმა ადამიანებმა არმაზ ახვლედიანის კანდიდატურა შესთავაზეს პოლიტიკურ პარტიებს, მათ შორის შემოგვთავაზეს ჩვენც. მოგეხსენებათ, პრეზიდენტი კონსულტაციებს გადის უმაღლეს საბჭოში წარმოდგენილ პოლიტიკურ სუბიექტებთან, ეს არის მისი პირველი რიგის ვალდებულება, შესაბამისად, ამათგან უნდა მოისმინოს კანდიდატები. ჩვენ და ევროპულმა საქართველომ დღეს უკვე ღიად წარვადგინეთ არმაზ ახვლედიანის კანდიდატურა, როგორც ჩვენს მიერ მხარდაჭერილი კანდიდატურა. იმედს ვიტოვებ, რომ „ბურჯანაძე-დემოკრატების“ პოზიციაც იქნება იგივე, და გამოდის, რომ ქართული ოცნების გარდა უმაღლეს საბჭოში მხარს უჭერენ არმაზ ახვლედიანის კანდიდატურას. დანარჩენი პრეზიდენტის გადასაწყვეტია,“ – განაცხადა „ბათუმელებთან“ გიორგი კირთაძემ, „ერთიანი ნაციონალური მოძრაობის“ ბათუმის ორგანიზაციის თავმჯდომარემ.

ენმ-ის აჭარის ორგანიზაციაში თვლიან, რომ „არის საკმაოდ დიდი შანსი პრეზიდენტმა წარადგინოს არმაზ ახვლედიანი, იმიტომ რომ ყველა ის საჯარო განცხადება, რაც მოვისმინეთ პრეზიდენტისგან ცხადყოფს იმას, რომ პრეზიდენტი, ყოველ შემთხვევაში ამ ეტაპისთვის, მოწადინებულია კარგი კანდიდატი წარუდგინოს უმაღლეს საბჭოს. ამიტომ მოხდა არმაზის ირგვლივ, ასე ვთქვათ, გაერთიანება. თორნიკე რიჟვაძესა და არმაზ ახვლედიანს შორის არჩევანის გაკეთება პრეზიდენტს არ უნდა გაუჭირდეს“.

განიხილავდა თუ არა ენმ საკუთარ კანდიდატურას პრეზიდენტისთვის წარსადგენად?

„ჩვენ კარგად ვიცით ვინ იქნება აჭარის მთავრობის თავმჯდომარეობის ყველაზე კარგი კანდიდატი, გვყავს კიდეც ჩვენი კანდიდატი. მაგრამ არსებული რეალობიდან გამომდინარე, რა ვითარებაშიც ახლა ვართ [ახლა არ გვაქვს არჩევნები, უმაღლესმა საბჭომ უნდა აირჩიოს კანდიდატი], თან ვართ ოპოზიციაში, სხვა პოლიტიკურ პარტიებთან და საზოგადოებრივ ჯგუფებთან კონსულტაციის შედეგად იქნა შერჩეული ნეიტრალური და ძლიერი პოლიტიკური წონის კანდიდატი. თორემ ჩვენი კანდიდატურა არის ლევან ვარშალომიძე, არჩევნების დროსაც გვყავდა დაყენებული და იმედია მომავალშიც დავაყენებთ მის კანდიდატურას,“ – გვითხრა გიორგი კირთაძემ.

გიორგი კირთაძის თქმით, „საინიციატივო ჯგუფში ძირითადად შედიან მალხაზ ნაკაშიძე, კახა ფალავანდიშვილი, ჯემალ ცეცხლაძე, ირაკლი ჯიჯავაძე, ჯელალ ქიქავა, სოფო მეგრელაძე და სხვები. რაც შეეხება პოლიტიკურ პარტიებს, ტექნიკურად წარდგენას აკეთებს „ევროპული საქართველო“ და „ერთიანი ნაციონალური მოძრაობა“, არმაზ ახვლედიანის კანდიდატურას კი, თითქმის ყველა პოლიტიკური პარტია, ვინც არის რეგიონში წარმოდგენილი, გარდა „ქართული ოცნებისა“ და მგონი „პატრიოტთა ალიანსისა“, ღიად უჭერს მხარს“.

„დემოკრატიული აუდიტის ცენტრის“ ხელმძღვანელი, არმაზ ახვლედიანი „ქართული ოცნების“ პოლიტსაბჭოს ყოფილი წევრია. ის  ბათუმის 69-ე საარჩევნო ოლქის დამოუკიდებელი დეპუტატობის კანდიდატი იყო 2016 წლის საპარლამენტო არჩევნების დროს.

აჭარის უმაღლეს საბჭოში მმართველმა პარტიამ აჭარის მთავრობის თავმჯდომარეობის საკუთარი კანდიდატი 6 ივლისს დაასახელა. ამ თანამდებობაზე ქვეყნის პრეზიდენტს „ქართულმა ოცნებამ“ თორნიკე რიჟვაძის კანდიდატურა შესთავაზა.

აჭარის მთავრობის თავმჯდომარის პოსტი ზურაბ პატარაძემ 4 ივლისს დატოვა. აჭარის კონსტიტუციის მიხედვით, მთავრობის თავმჯდომარის უფლებამოსილების შეწყვეტის შემთხვევაში, პრეზიდენტმა ორი კვირის ვადაში აჭარის უმაღლეს საბჭოს თავმჯდომარეობის კანდიდატი უნდა წარმოუდგინოს. პრეზიდენტმა 18 ივლისამდე უნდა დაასახელოს მისთვის სასურველი კანდიდატი.

კონსტიტუციის თანახმად, საქართველოს პრეზიდენტმა აჭარის მთავრობის თავმჯდომარის კანდიდატურასთან დაკავშირებით კონსულტაციებს უნდა გამართოს აჭარის უმაღლესი საბჭოს ყველა სუბიექტთან – პარტიებთან, რომლებიც უმაღლეს საბჭოში არიან. ამ კონსულტაციების შედეგად წყვეტს პრეზიდენტი, თუ ვისი კანდიდატურა უნდა წარუდგინოს უმაღლეს საბჭოს დასამტკიცებლად.

პრეზიდენტმა გიორგი მარგველაშვილმა უკვე გამართა შეხვედრები უმაღლეს საბჭოში და დახურულ კარს მიღმა თორნიკე რიჟვაძესაც შეხვდა.

კონსტიტუციის მიხედვით, შესაძლებელია პრეზიდენტმა არც ერთი პოლიტიკური ძალის კანდიდატი არ წარადგინოს აჭარის უმაღლეს საბჭოში დასამტკიცებლად. თავის მხრივ, აჭარის უმაღლეს საბჭოსაც შეუძლია პრეზიდენტის წარდგენილ კანდიდატურას მხარი არ დაუჭიროს. ასევე, კონსტიტუცია პრეზიდენტს აძლევს უფლებას დაითხოვოს უმაღლესი საბჭო, თუ ეს ორგანო ზედიზედ ორჯერ არ დაუჭერს მხარს პრეზიდენტის მიერ წარდგენილ კანდიდატურას.

აჭარის კულტურული მემკვიდრეობის დაცვის სააგენტოს გონიო-აფსაროსის მუზეუმ-ნაკრძალში რომაული ბანაკის მოწყობა აქვს დაგეგმილი. საჭირო კარვებისა და ინვენტარის დამზადებისთვის კი სააგენტოს ბიუჯეტიდან 114 500 ლარია გამოყოფილი.

მუზეუმ-ნაკრძალში რომაული ბანაკისათვის კარვებისა და ინვენტარის დამზადების სამუშაოებს სააგენტო ელექტრონული ტენდერით შეისყიდის. ტენდერი გამოცხადებულია. წინადადებების მიღება 2018 წლის 27 ივლისს დაიწყება და 30 ივლისს დასრულდება.

სატენდერო პირობების მიხედვით, პრეტენდენტს 2015 წლის იანვრიდან 2018 წლის იანვრამდე პერიოდში უნდა გააჩნდეს მინიმუმ: ერთი კულტურული მემკვიდრეობის ძეგლზე სარეაბილიტაციო სამუშაოების, 5 ხის ნივთის დამზადებისა და 10 000 ლარის ოდენობით ხის სამუშაოების გამოცდილება, რომლებზეც წარმოდგენილი უნდა იქნას ფოტომასალა და შესაბამისი დოკუმენტაცია [ხის სამუშაოებში იგულისხმება ხისგან ნივთების დამზადება].

რომაული ბანაკი, გონიო-აფსაროსის ტერიტორიაზე, ტენდერში გამარჯვებულთან ხელშეკრულების გაფორმებიდან 60 დღეში უნდა მოეწყოს.

კულტურული მემკვიდრეობის დაცვის სააგენტომ ჩხერის ხიდის, გონიოს ციხის კოშკებისა და გონიოს არქეოლოგიური უბნების
რესტავრაცია-რეაბილიტაციის მიზნით კვლევითი სამუშაოებისა და სარეაბილიტაციო სამუშაოების საპროექტო დოკუმენტაციის შედგენაზეც გამოაცხადა ტენდერი, თუმცა ეს ტენდერი არ შედგა. სააგენტოს დოკუმენტაციის შესადგენად 30 ათასი ლარი ქონდა გათვალისწინებული, თუმცა ტენდერში მონაწილეობა არავინ მიიღო.

მრავალწლოვანი ევკალიპტის ხე, რომელიც შეკვეთილში, ბიძინა ივანიშვილის პარკში გადააქვთ, ამჯერად ბათუმში, მახინჯაურის დასახლებაში ამოთხარეს. ტვირთის წონა დაახლოებით 1100 ტონაა. ხე მახინჯაურიდან შეკვეთილში ზღვით უნდა გადაიტანონ.

კომპანიაში, რომელიც ევკალიპტის ხის გადატანაზე მუშაობს, გვითხრეს, რომ ხის ზღვამდე მისატანად, 2 კილომეტრამდე მანძილია დარჩენილი, ამ გზაზე კი ხის აღმართში ატანაც მოუწევთ. ევკალიპტის ზღვის ნაპირამდე მიტანას, დაახლოებით 10 დღე დასჭირდება.

ევკალიპტის ხე გადააქვთ სპეციალური მისაბმელით [ლაფეტით], რომელსაც 256 საბურავი აქვს.

დაახლოებით ერთი თვის წინ ციხისძირიდან შეკვეთილში მრავალწლოვანი ტიტას ხე გადაიტანეს, რომელიც 1000 ტონამდე იწონიდა.

აჭარიდან მრავალწლოვანი ხეების ამოთხრისა და შეკვეთილში მათი გადატანის დამკვეთი დღეს შპს „ურეკი რეზიდენსია“. ეს კომპანია ბიძინა ივანიშვილმა 2016 წლის ივლისში დააფუძნა. გასული წლის იანვარში კი, კომპანიის წილის 100% თავის შვილს, ბერა ივანიშვილს საკუთრებაში 4 მილიონ ლარად გადასცა. „ურეკი რეზიდენსის“ საკუთრებაშია დღეს ის ნაკვეთები ოზურგეთის მუნიციპალიტეტის სოფელ შეკვეთილში, სადაც მილიარდერი და ყოფილი პრემიერ-მინისტრი ე.წ. დენდროლოგიურ პარკს აშენებს.

See more

 

 

ეროვნულმა ბანკმა კომერციული ბანკებისთვის ეთიკის კოდექსი დაამტკიცა. ეროვნული ბანკის პრეზიდენტის ბრძანება – „ეთიკის პრინციპებისა და პროფესიული ქცევის სტანდარტების კოდექსი კომერციული ბანკებისთვის“ – მიმდინარე წლის 10 ივლისიდან შევიდა ძალაში. კომერციულ ბანკებს მიეცათ 6 თვე, რათა მათი საქმიანობა კოდექსით გათვალისწინებულ სტანდარტებთან და მოთხოვნებთან, სრულ შესაბამისობაში მოიყვანონ.

„კოდექსით განსაზღვრულია ეთიკის ის ზოგადი პრინციპები და პროფესიული ქცევის სტანდარტები, რომლებსაც კოდექსის მოქმედების სფეროში ჩართული პირები პროფესიული საქმიანობისას უნდა იცავდნენ“ – ნათქვამის ეროვნული ბანკის განცხადებაში.

კოდექსის მიხედვით, კომერციული ბანკი ვალდებულია, შექმნას კოდექსით განსაზღვრული პრინციპებისა და სტანდარტების ეფექტური შესრულებისთვის საჭირო გარემო; კოდექსის/ბანკის შიდა დოკუმენტის ეფექტური შესრულების მიზნებისათვის შექმნას [ან არსებულ სტრუქტურულ ერთეულს ფუნქციურად შეუთავსოს] შესაბამისი სტრუქტურული ერთეული; განახორციელოს ეროვნული ბანკის მიერ შემუშავებული ყოველთვიური ანგარიშგება კოდექსის ფარგლებში დაფიქსირებულ ინციდენტებთან, დარღვევებთან, საჩივრებთან და გატარებულ ზომებთან დაკავშირებით.

ამასთან, „კოდექსის მოქმედების სფეროში შემავალი პირები უნდა აცნობიერებდნენ, რომ კოდექსით განსაზღვრული პრინციპებისა და სტანდარტების დარღვევის შემთხვევაში, დამრღვევი პირის მიმართ დარღვევის სერიოზულობიდან გამომდინარე, შესაძლოა, გატარებულ იქნეს „კომერციული ბანკების საქმიანობის შესახებ“ საქართველოს კანონით ან/და კომერციული ბანკის შიდა სტანდარტების დოკუმენტით განსაზღვრული ზომები. ეროვნული ბანკი, გარდა სანქციის დაწესებისა, უფლებამოსილია, გასცეს წერილობითი მითითება/გაფრთხილება, დააწესოს შეზღუდვები და ინდივიდუალური მოთხოვნები“.

ეროვნული ბანკის განცხადებით, „აღნიშნული დოკუმენტი მომავალშიც დაექვემდებარება განახლებას კოდექსის ჩარჩოსთან დაკავშირებით დამატებითი ინტერპრეტაციებისა და დაზუსტებების გაკეთების საჭიროების შემთხვევაში“.

საქართველოში დღეს 16 კომერციული ბანკი ფუნქციონირებს.

საქართველოს ეროვნული ბანკის [სებ] მონაცემებით, კომერციული ბანკების წმინდა მოგებამ 2018 წლის პირველ ხუთ თვეში 362 მილიონ 467 ათასი ლარი შეადგინა, რაც 10 მილიონ 422 ათასი ლარით მეტია გასული წლის ანალოგიურ პერიოდთან შედარებით.

ამავე თემაზე:

ვემსახურები ბანკს

See more

მომხმარებელთა უფლებების დაცვის ახალი წესები ბანკების გარდა მიკროსაფინანსო ორგანიზაციებზეც გავრცელდება

See more

საგანგებო სიტუაციების მართვის სამსახური აცხადებს, რომ დღეს, 14 ივლისს, ზღვაზე მოსალოდნელია 4-ბალიანი შტორმი და შავი ზღვის სანაპიროზე დამსვენებლებს აფრთხილებს, რომ ბანაობა აკრძალულია.

„შავი ზღვის სანაპიროზე, ყველა სამაშველო კოშკურაზე აღმართულია წითელი ალამი. ყურადღება მიაქციეთ ამკრძალავ ნიშნებს. კოშკურებზე თეთრი ალმის აღმართვის შემთხვევაში ზღვაში შესვლა ნებადართული იქნება. გთხოვთ, დაიცვათ უსაფრთხოების წესები“ – აცხადებს საგანგებო სიტუაციების მართვის სამსახური.

შაბათ-კვირის ამინდის პროგნოზი ბათუმში

See more

საქართველოს საავტომობილო გზების დეპარტამენტი ბათუმში, მახინჯაურის დასახლებაში მცხოვრებ ნაკაშიძეების ოჯახთან, მათი საცხოვრებელი სახლისა და საკარმიდამო ნაკვეთის ნებაყოფლობით დათმობაზე, ამ დრომდე ვერ შეთანხმდა. სახლი ბათუმის შემოვლითი გზის მშენებლობის გამო აღებაშია. მესაკუთრეები აცხადებენ, რომ დეპარტამენტი ქონების სანაცვლოდ მათ არარეალურ ფასს სთავაზობს. ახალი გზის მშენებლობა დაწყებულია და ნაკაშიძეების სამეზობლოში რამდენიმე სახლი უკვე დაანგრიეს.

„ჩვენი სამსართულიანი სახლი არაობიექტურად შეაფასეს. აქ ორი, მე და ჩემი დის ოჯახი ვცხოვრობთ დედასთან ერთად და ისეთ კომპენსაციას გვთავაზობენ, რომ სანაცვლოდ ალტერნატიულ საცხოვრებელს ვერ ვიყიდით. გვინდა შევიძინოთ მიწის ნაკვეთი და ავაშენოთ სახლი. როგორც ვცხოვრობდით ისე გვინდა ვიცხოვროთ. მეზობლად ხალხს ოთხმაგად გაუუმჯობესდათ ცხოვრება და ჩვენ რა დავაშავეთ… ამ დღეებში დეპარტამენტშიც ვიყავით, მინისტრსაც შევხვდით და აზიის განვითარების ბანკის წარმომადგენლებსაც. ეს ბანკიც ამბობს, რომ არავინ დარჩეს უკმაყოფილო და დაჩაგრული. გვეუბნებიან, რომ გადახედავენ და შეისწავლიან ჩვენს მდგომარეობას, მაგრამ შედეგი არ ჩანს“, – ამბობს თამარ ნაკაშიძე, ქონების ერთ-ერთი მესაკუთრე.

„ბათუმელები“ საავტომობილო გზების დეპარტამენტს დაუკავშირდა. „მოლაპარაკების ეტაპი ნაკაშიძეების ოჯახთან ამოწურულია დღეის მდგომარეობით და მიმდინარეობს საქართველოს კანონმდებლობით გათვალისწინებული პროცედურები, რაც გულისხმობს ექსპროპრიაციას. დეპარტამენტი მიმართავს შუამდგომლობით სამინისტროს, ჩაინიშნება კომისიის სხდომა და უკვე ეკონომიკის სამინისტრო იმსჯელებს დეპარტამენტისთვის ექსპროპრიაციის უფლების მინიჭება-არმინიჭებაზე. რაც შეეხება ნაკაშიძეებთან შეხვედრას, უწყებებში ბუნებრივია ყველა მოქალაქეს ხვდებიან და თუ იქნება [ამა თუ იმ საკითხზე] კანონთან შესაბამისობა, ასეთ შემთხვევაში მიიღება შესაბამისი გადაწყვეტილება“, – გვითხრა სატელეფონო საუბარში მიხეილ უჯმაჯურიძემ, საავტომობილო გზების დეპარტამენტის განსახლების სამსახურის უფროსმა.

„ექსპროპრიაციითაც გვემუქრებიან, მაგრამ ჩვენ ვერანაირად ვერ დავთმობთ მამა-პაპისეულ ქონებას. ეს არ არის მუქთად შეძენილი და აშენებული. 70 წელია ვშრომობთ და ვაკოწიწებთ და ასე ერთი ხელის მოსმით რატომ უნდა განახევრდეს ქონება? ნახევარი სახლია ფაქტობრივად შეფასებული. სირცხვილია“, – ამბობს თამარ ნაკაშიძე.

„ექსპროპრიაციის შემთხვევაში, როდესაც ქონება გადმოდის სახელმწიფოს სახელზე სასამართლოს გზით, კიდევ ერთხელ მოხდება მესაკუთრისთვის შეთავაზება წერილობით იმ თანხის, რასაც თავიდანვე ვთავაზობდით. თუ მესაკუთრე კვლავ უარს განაცხადებს თანხის მიღებაზე, ამ შემთხვევაში მოხდება დეპონირება ნოტარიუსის ანგარიშზე, თუმცა, მესაკუთრეს რჩება უფლება, რომ სასამართლოს გზით იდაოს და, შესაბამისად, სასამართლო რა გადაწყვეტილებასაც მიიღებს, ბუნებრივია, ორთავე მხარე უნდა დაემორჩილოს. ან იქნება იგივე თანხა დატოვებული, ან თუ სასამართლო გაზრდის ოდენობას, დეპარტამენტი იხელმძღვანელებს სასამართლოს გადაწყვეტილების შესაბამისად“, – ამბობს მიხეილ უჯმაჯურიძე.

ბათუმის შემოვლითი გზის მშენებლობა დაწყებულია. ამ გზის მშენებლობის გამო ნაკაშიძეების გარდა დეპარტამენტი, როგორც ამ უწყებაში გვითხრეს, კიდევ ერთ მესაკუთრესთან ვერ შეთანხმდა. თუმცა, დეპარტამენტში განაცხადეს, რომ ჯერ კიდევ მზად არიან „ნებაყოფლობით გაფორმდეს შესაბამისი ხელშეკრულება, უმტკივნეულოდ და  ყოველგვარი სასამართლო დავის გარეშე მოვრიგდეთ“.

მიხეილ უჯმაჯურიძეს ვკითხეთ იმის შესახებაც, აქვს თუ არა დეპარტამენტს უფლება ნაკაშიძეების შემთხვევაში მორიგდნენ და გაზარდონ კომპენსაციის ოდენობა.

„ეს არ არის გზების დეპარტამენტის კომპეტენცია, ეს არის სასამართლოს კომპეტენცია, შესაბამისად, ასეთ საკითხზე დეპარტამენტი არ მსჯელობს. ეს პირდაპირ ეწინააღმდეგება კანონს“, – გვითხრა დეპარტამენტის განსახლების სამსახურის უფროსმა.

ამავე თემაზე:

გზების დეპარტამენტი ექსპროპრიაციაზე: ყველა სახლი ინდივიდუალურად ფასდება

See more

 

 

„პოლიტიკური თანამდებობიდან წასვლა, ისე, რომ არ უხსნი საზოგადოებას რატომ მიდიხარ, ერთის მხრივ შეურაცხმყოფელია, ხოლო მეორეს მხრივ არის დემოკრატიული პოლიტიკური პროცესის საწინააღმდეგო, იმიტომ, რომ გარკვეული მოლოდინის შექმნა, იმ ადამიანის მიმართ, რომელიც ემსახურება საზოგადოებას ცენტრალური ან ადგილობრივი ხელისუფლების დონეზე, არის განჭვრეტადი დემოკრატიული პროცესის ნაწილი. ჩემთვის დღემდე პასუხგაუცემელია კითხვა, რა არგუმენტით წავიდა პრემიერ-მინისტრი, რა იყო ასეთი მნიშვნელოვანი გადაწყვეტილების საფუძველი. …მნიშვნელოვანია მოქალაქეებმა იცოდნენ, რა პრინციპით გვყავს ან აღარ გვყავს უმაღლესი თანამდებობის პირები,“ – განაცხადა საქართველოს პრეზიდენტმა გიორგი მარგველაშვილმა უმაღლეს საბჭოში გამართული კონსულტაციების შემდეგ.  ჟურნალისტებმა მას გიორგი კვირიკაშვილისა და ზურაბ პატარაძის თანამდებობიდან წასვლის შესახებ ჰკითხეს.

„მინდა გავასაჯაროო ის ემოცია, რაც იყო ფაქტიურად დღესაც, ყველა ოპოზიციურ პარტიასთან შეხვედრის დროს. ეს ემოცია არის ის, რასაც მეც ვიზიარებ და არაერთხელ დამიფიქსირებია. სხვათა შორის ამის თაობაზე ბათუმში გავაკეთე განცხადება პრემიერ-მინისტრის გადადგომის მეორე დღეს. იგივე კითხვა ისმის ბატონი პატარაძის მიმართულებით. ყველა ოპოზიციურმა პარტიამ, ერთსულოვნად, მიუხედავად იმისა, რომ სხვადასხვა პოლიტიკურ პლატფორმაზე არიან, ერთნაირად გამოხატეს აღშფოთებაც და შეშფოთებაც პრემიერ-მინისტრის და რეგიონის ხელმძღვანელის პოლიტიკიდან ასე წასვლის თაობაზე,“ – აღნიშნა გიორგი მარგველაშვილმა.

პრეზიდენტს მინისტრთა ახალი კაბინეტის შემადგენლობაზე და თეა წულუკიანის თანამდებობაზე დარჩენის შესახებაც დაუსვეს შეკითხვა:

„რაც შეეხება ქალბატონ წულუკიანს, მე ვდგევარ იმ პოზიციაზე და ვიზიარებ არასამთავრობო სექტორის და საზოგადოების დიდი ნაწილის შეშფოთებას. მე ფაქტად ვხედავ იმას, რომ სასამართლო ხელისუფლება ჩვენი ქვეყნის დემოკრატიული განვითარებისათვის ერთ-ერთი, არააქტიურად ჩართული ნაწილია და მიმაჩნია, რომ ის სერიოზული უკმაყოფილებების ტალღა, რომელიც სულ ერთი თვის წინ იყო, ის ტრაგიკული ისტორიები, რომელსაც ჩვენ ვისმენდით რუსთაველზე, არ იყო მარტო სარალიძის, ეს იყო ათობით შემაძრწუნებელი საქმე. არ უნდა სჭირდებოდეს დაზარალებულს ღამეების თენება პროკურატურასთან ან შინაგან საქმეთა სამინისტროსთან იმისთვის, რომ მიაღწიოს სამართალს. ამიტომაც მე ვიზიარებ საზოგადოების შეხედულებას, რომ ამ მიმართულებით ბევრად უფრო რადიკალური ნაბიჯები იყო გადასადგმელი,“ – განაცხადა გიორგი მარგველაშვილმა.

გიორგი მარგველაშვილმა ასევე აღნიშნა, რომ დადებითად აფასებს მიხეილ ბატიაშვილის დასახელებას საქართველოს განათლების მინისტრის პოსტზე:

„მისი სახელი პოლიტიკური წრეებისთვის შეიძლება მაინცდამაინც ცნობილი არ არის, მაგრამ მე მიმუშავია მასთან რიგ პროექტებზე, მხარს ვუჭერ მას, როგორც განათლების მინისტრს და იმედი მაქვს, რომ ექნება წარმატება და მნიშვნელოვანი ნაბიჯები გადაიდგმება ამ მიმართულებით“ – აღნიშნა პრეზიდენტმა.

გიორგი მარგველაშვილი დღეს აჭარის უმაღლესი საბჭოს წევრებს შეხვდა. ბათუმში პრეზიდენტის ვიზიტის მიზეზი აჭარის მთავრობის თავმჯდომარეობის კანდიდატის შერჩევაა. ამ ეტაპზე აჭარის მთავრობის თავმჯდომარის თანამდებობაზე მხოლოდ თორნიკე რიჟვაძის კანდიდატურაა დასახელებული.

„ამ ეტაპზე წარმოდგენილია მხოლოდ ერთი, თორნიკე რიჟვაძის კანდიდატურა. მე მას უნდა შევხვდე, აქ ვარ და, ბუნებრივია, შევხვდები, მას არ ვიცნობ. ბატონი თორნიკე რიჟვაძის კანდიდატურა დასახელებული იქნა იმ პარტიის მიერ, რომელიც არის უმრავლესობაში და, ბუნებრივია, უნდა გავესაუბრო ადამიანს, რომელსაც მხარს უჭერს მმართველი პარტია. ასეთივე ლოგიკით გავესაუბრები სხვა კანდიდატებსაც, თუ იქნებიან“, – განაცხადა გიორგი მარგველაშვილმა.

მან ასევე აღნიშნა, რომ პრეზიდენტმა კანდიდატურის წარდგენამდე უნდა გაითვალისწინოს რეგიონის შეხედულელები და მოსაზრებები ამ თემაზე.

შეკითხვაზე – ჰყავს თუ არა მას საკუთარი კანდიდატურა, გიორგი მარგველაშვილმა თქვა, რომ ის კანდიდატურის შერჩევის პროცესშია.

გიორგი მარგველაშვილმა ასევე განაცხადა, რომ მზადაა შეხვდეს მურმან დუმბაძესა და მედეა ვასაძეს, რომელთაც დღეს პრეზიდენთან შეხვედრა სურდათ, თუმცა ისინი უმაღლეს საბჭოში არ შეუშვეს.

აჭარის მთავრობის თავმჯდომარეობის პოსტზე უმაღლესი საბჭოს უმრავლესობამ თორნიკე რიჟვაძე 6 ივლისს დაასახელა.

აჭარის მთავრობის თავმჯდომარის თანამდებობა 4 ივლისს შემდეგაა ვაკანტური, როცა ეს პოსტი ზურაბ პატარაძემ დატოვა. აჭარის კონსტიტუციის მიხედვით, მთავრობის თავმჯდომარის უფლებამოსილების შეწყვეტის შემთხვევაში, პრეზიდენტმა ორი კვირის ვადაში აჭარის უმაღლეს საბჭოს თავმჯდომარეობის კანდიდატი უნდა წარმოუდგინოს, ანუ პრეზიდენტმა 18 ივლისამდე უნდა დაასახელოს მისთვის სასურველი კანდიდატი.

 

აჭარის უმაღლესი საბჭოს უმრავლესობასთან შეხვედრის შემდეგ პრეზიდენტი გიორგი მარგველაშვილი ოპოზიციას შეხვდა.

უმაღლესი საბჭოს წევრმა „ერთიანი ნაციონალური მოძრაობიდან“, გია აბულაძემ შეხვედრის შემდეგ განაცხადა, რომ ისინი თორნიკე რიჟვაძის კანდიდატურას მხარს არ დაუჭერენ:

„ჩვენი პოზიცია დავაფიქსირეთ, რომ ივანიშვილის შემოთავაზებული სისტემა მიუღებელია და ჩვენ მხარს ვერ დავუჭერთ კანდიდატს, რომელიც ანგარიშვალდებული არ იქნება ჩვენს მოსახლეობასთან. ის გაითვალისწინებს მხოლოდ ერთი ადამიანის ინტერესებს რეგიონში. ჩვენთვის მნიშვნელოვანია არსებობდეს რეალური პოლიტიკური პროცესი, როდესაც ადამიანები მოდიან თანამდებობებზე, გააჩნიათ საკუთარი ხედვა თუ როგორ გადაწყვიტონ რეგიონის პრობლემები და ანგარიშს უწევენ მოსახლეობას და არა რომელიმე ერთ ოლიგარქს.  პრეზიდენტის პოზიციას რაც შეეხება, მისთვისაც გაუგებარია ბოლო პერიოდში განვითარებული მოვლენები, მისი მხრიდანაც უარყოფითად შეფასდა ეს პოლიტიკური პროცესი.“

გია აბულაძემ ასევე აღნიშნა, რომ მათ ამ ეტაპზე პრეზიდენტისთვის აჭარის მთავრობის თავმჯდომარეობის კანდიდატურა არ შეუთავაზებიათ განსახილველად, თუმცა არ არის გამორიცხული ამასთან დაკავშირებით კონსულტაციები გააგრძელონ.

კითხვაზე – დაუჭერს თუ არა მხარს რიჟვაძის კანდიდატურას, „საქართველოს პატრიოტთა ალიანსის“ წარმომადგენელმა, უმაღლესი საბჭოს წევრმა ზაზა ოქუაშვილმა ჟურნალისტებთან განაცხადა, რომ ჯერ უფრო ახლოს უნდა გაეცნოს „ახალი კანდიდატის დამსახურებას“: „…უმრავლესობამ უკეთ იცის. მე არა ვარ ის ოპოზიცია, რომელიც, ასევ ვთქვათ, იაფად ავლენს თავის ოპოზიციონერობას,“ – აღნიშნა მან.

„ნინო ბურჯანაძე-დემოკრატიული მოძრაობის“ წარმომადგენელი, აჭარის უმაღლესი საბჭოს წევრი გიორგი ცინცქილაძე ამბობს, რომ თორნიკე რიჟვაძის კანდიდატურას მხარს არ დაუჭერს: „ოპოზიციურ პარტიებთან, პოლიტიკურ გაერთიანებებთან ერთი ორი დღის განმავლობაში გვექნება ჩვენ მოლაპარაკებები და ღირსეულ კანდიდატს წარვადგენთ. ორი დღის შემდეგ იქნება ნათელი, რაზე შევთანხმდებით“ – განაცხადა მან.

კონსტიტუციის თანახმად, საქართველოს პრეზიდენტმა აჭარის მთავრობის თავმჯდომარის კანდიდატურასთან დაკავშირებით კონსულტაციებს უნდა გამართოს აჭარის უმაღლესი საბჭოს ყველა სუბიექტთან – პარტიებთან, რომლებიც უმაღლეს საბჭოში არიან. ამ კონსულტაციების შედეგად წყვეტს პრეზიდენტი, თუ ვისი კანდიდატურა უნდა წარუდგინოს უმაღლეს საბჭოს დასამტკიცებლად.

კონსტიტუციის მიხედვით, შესაძლებელია პრეზიდენტმა არც ერთი პოლიტიკური ძალის კანდიდატი არ წარადგინოს აჭარის უმაღლეს საბჭოში დასამტკიცებლად. თავის მხრივ, აჭარის უმაღლეს საბჭოსაც შეუძლია პრეზიდენტის წარდგენილ კანდიდატურას მხარი არ დაუჭიროს. ასევე, კონსტიტუცია პრეზიდენტს აძლევს უფლებას დაითხოვოს უმაღლესი საბჭო, თუ ეს ორგანო ზედიზედ ორჯერ არ დაუჭერს მხარს პრეზიდენტის მიერ წარდგენილ კანდიდატურას.

საქართველოს პრეზიდენტი, გიორგი მარგველაშვილი აჭარის უმაღლესი საბჭოს წევრებს ხვდება. პრეზიდენტის ვიზიტის მიზეზი აჭარის მთავრობის თავმჯდომარეობის კანდიდატის შერჩევაა. აჭარის მთავრობის თავმჯდომარეობის პოსტზე უმაღლესი საბჭოს უმრავლესობამ თორნიკე რიჟვაძე 6 ივლისს დაასახელა.

შეხვედრა უმაღლესი საბჭოს უმრავლესობის წევრებთან უკვე დასრულდა. შეხვედრიდან გამოსული უმრავლესობის წევრები იმედოვნებენ, რომ პრეზიდენტი მათ მიერ დასახელებულ თორნიკე რიჟვაძის კანდიდატურას მხარს დაუჭერს.

„პრეზიდენტმა დასვა კითხვები, ამომწურავი პასუხები მიიღო. ვისაუბრეთ იმაზე, თუ რა კრიტერიუმებით მოხდა კანდიდატის შერჩევა. 40 წუთში ამომწურავი პასუხები მიიღო საქართველოს პრეზიდენტმა და ვფიქრობ, მისი გადაწყვეტილება შესაბამისი იქნება. მისი რეპლიკები და მისი პასუხებიც იყო იმედისმომცემი. ვფიქრობ, დაუჭერს მხარს ჩვენს კანდიდატურას“, – განაცხადა „ბათუმელებთან“ აჭარის უმაღლესი საბჭოს წევრმა ილია ვერძაძემ. მან ასევე აღნიშნა, რომ პრეზიდენტს საკუთარ კანდიდატურაზე არაფერი უთქვამს.

კანდიდატის დასახელებამდე კანონი პრეზიდენტის კონსულტაციებს ითვალისწინებს უმაღლეს საბჭოში წარმოდგენილ პოლიტიკურ ჯგუფებთან. სავალდებულო არაა პრეზიდენტმა ის დაასახელოს კანდიდატად, ვინც რომელიმე პოლიტიკური ჯგუფის ან უმრავლესობის ფავორიტია.

„ვფიქრობ, როგორც მოიქცა პრეზიდენტი ზურაბ პატარაძის შემთხვევაში, ასე მოიქცევა თორნიკე რიჟვაძესთან მიმართებაშიც. კანონში არის შესაძლებლობა პრეზიდენტმა წარმოადგინოს ვინც მას უნდა, მაგრამ სწორი იქნება მან პატივი სცეს უმრავლესობის გადაწყვეტილებას“, – აღნიშნა დავით ბაციკაძემ.

გიორგი მარგველაშვილი ახლა უმაღლესი საბჭოს ოპოზიციას ხვდება.

აჭარის მთავრობის თავმჯდომარის პოსტი ზურაბ პატარაძემ 4 ივლისს დატოვა. აჭარის კონსტიტუციის მიხედვით, მთავრობის თავმჯდომარის უფლებამოსილების შეწყვეტის შემთხვევაში, პრეზიდენტმა ორი კვირის ვადაში აჭარის უმაღლეს საბჭოს თავმჯდომარეობის კანდიდატი უნდა წარმოუდგინოს. პრეზიდენტმა 18 ივლისამდე უნდა დაასახელოს მისთვის სასურველი კანდიდატი.

_________

მთავარ ფოტოზე: აჭარის უმაღლესი საბჭო. მანანა ქველიაშვილის ფოტო  

 

აჭარის უმაღლეს საბჭოში, სადაც დღეს, 13 ივლისს, საქართველოს პრეზიდენტი გიორგი მარგველაშვილი იმყოფება, მურმან დუმბაძე და მედეა ვასაძე მივიდნენ, თუმცა ისინი შენობაში არ შეუშვეს.

საქართველოს პარლამენტის ყოფილმა წევრმა, მურმან დუმბაძემ განაცხადა, რომ მათ პრეზიდენტთან შეხვედრა მიმდინარე საკითხზე, აჭარის მთავრობის თავმჯდომარეობის კანდიდატურის შესახებ უნდათ. „ჩემზე საშვი დაშვებულია, თუმცა ჩათვალეს, რომ მურმან დუმბაძე და მედეა ვასაძე კარებს გარეთ უნდა დარჩნენ“, – განაცხადა მურმან დუმბაძემ ჟურნალისტებთან.

„რაღაც მოჭარბებულ საშიშროებას ხედავენ, როგორც ჩანს. მე მინდა პრეზიდენტს ვუთხრა, რაც მაქვს სათქმელი და ჩემი მოქალაქეობრივი ვალი მოვიხადო. მე ვფიქრობ, რომ მან დამინახა. თუ არ დამინახა, მიაწოდეთ ხმა, რომ ჩვენ გვინდა მასთან შეხვედრა“, – განაცხადა მედეა ვასაძემ, აჭარის უმაღლესი საბჭოს ყოფილმა წევრმა.

მურმან დუმბაძე 2012-2016 წლებში საქართველოს პარლამენტის წევრი იყო, იგი ბათუმის მაჟორიტარად „ქართულმა ოცნებამ“ წარადგინა, თუმცა მან „ოცნება“ 2014 წელს დატოვა. 

„ქართული ოცნების“ წევრი იყო მედეა ვასაძეც, აჭარის უმაღლესი საბჭოს ყოფილი წევრი, მან პარტია 2015 წელს დატოვა. 2016 წელს მურმან დუმბაძემ და მედეა ვასაძემ პარტია „ემსახურე საქართველოს“ დააფუძნეს.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, უახლოეს დღეებში აჭარაში და ქალაქ ბათუმში  მოსალოდნელია ცვალებადი მოღრუბლულობა, დროგამოშვებით იწვიმებს. იქროლებს სამხრეთ-აღმოსავლეთის ქარი 10-15 მეტრი წამში.

13-14 ივლისს ბათუმში ჰაერის ტემპერატურა იქნება:

• დღისით: 25-30 გრადუსი 
• ღამით: 20-25 გრადუსი 

მთაში მოსალოდნელია:

• დღისით: 23-28 გრადუსი 
• ღამით: 12-17 გრადუსი 

ზღვის წყლის ტემპერატურა 26,6 გრადუსია, შაბათს, 14 ივლისს, ტალღის სიმაღლე იქნება 15-20 დმ (3-4 ბალი).

სინოპტიკოსების ცნობით, მომდევნო ორ დღეს მოსალოდნელია  დროგამოშვებით  წვიმა, ზოგან – ძლიერი.

საქართველოს პრეზიდენტი გიორგი მარგველაშვილი ხვალ, 13 ივლისს, აჭარის უმაღლეს საბჭოში წარმოდგენილ პოლიტიკურ ჯგუფებს შეხვდება. შეხვედრის თემა აჭარის მთავრობის თავმჯდომარეობის კანდიდატის შერჩევა იქნება.

აჭარის მთავრობის თავმჯდომარის პოსტი ზურაბ პატარაძემ 4 ივლისს დატოვა. აჭარის კონსტიტუციის მიხედვით, მთავრობის თავმჯდომარის უფლებამოსილების შეწყვეტის შემთხვევაში, პრეზიდენტმა ორი კვირის ვადაში აჭარის უმაღლეს საბჭოს თავმჯდომარეობის კანდიდატი უნდა წარმოუდგინოს. პრეზიდენტმა 18 ივლისამდე უნდა დაასახელოს მისთვის სასურველი კანდიდატი.

კანდიდატის დასახელებამდე, კანონი პრეზიდენტის კონსულტაციებს ითვალისწინებს უმაღლეს საბჭოში წარმოდგენილ პოლიტიკურ ჯგუფებთან. სავალდებულო არაა პრეზიდენტმა ის დაასახელოს კანდიდატად, ვინც რომელიმე პოლიტიკური ჯგუფის ან უმრავლესობის ფავორიტია.

აჭარის უმაღლესი საბჭოს პრესსამსახურის ინფორმაციით, პრეზიდენტი უმაღლეს საბჭოში შეხვედრებს დღის 12 საათიდან დაიწყებს. თავდაპირველად პრეზიდენტი პოლიტიკური უმრავლესობის წარმომადგენლებს შეხვდება, რომლებმაც აჭარის მთავრობის თავმჯდომარეობის პოსტზე მათთვის სასურველი კანდიდატი – თორნიკე რიჟვაძე 6 ივლისს უკვე დაასახელეს.

პრეზიდენტი გიორგი მარგველაშვილი ხვალვე შეხვდება უმაღლესი საბჭოს ოპოზიციურ ფრაქციას „ერთიანი ნაციონალური მოძრაობა“. ამ პოლიტიკურ ძალას სასურველი კანდიდატი საჯაროდ ჯერ არ დაუსახელებია. პრეზიდენტი ცალ-ცალკე მოისმენს დამოუკიდებელი დეპუტატების – პეტრე ზამბახიძის [ევროპული საქართველო], გიორგი ოქუაშვილის [პატრიოტთა ალიანსი] და გიორგი ცინცქილაძის [დემოკრატიული მოძრაობა – ერთიანი საქართველო] პოზიციებს.

პრეზიდენტის მიერ დასახელებულ კანდიდატს უმაღლესმა საბჭომ სიითი შემადგენლობის უმრავლესობით უნდა დაუჭიროს მხარი. თუ უმაღლესი საბჭო კანდიდატს დაიწუნებს, პრეზიდენტი ისევ ორ კვირაში უმაღლეს საბჭოს იგივე ან სხვა კანდიდატს წარმოუდგენს. თუ ამ შემთხვევაში უმაღლესი საბჭო აჭარის მთავრობის თავმჯდომარის დამტკიცებაზე უარს იტყვის, პრეზიდენტს შეუძლია პარლამენტში უმაღლესი საბჭოს დათხოვნის მოთხოვნით შევიდეს.

 

სანდასუფთავების ინფორმაციით, დღეს ბათუმში მუნიციპალური ნარჩენებით გარემოს დანაგვიანების გამო მოქალაქე 100 ლარით დაჯარიმდა.

შპს „სანდასუფთავების“ მონაცემებით, 2018 წელს, იანვრიდან ივლისამდე, ქუჩების დანაგვიანებისთვის 60 ჯარიმა დაიწერა, მათგან ნაწილი სამშენებლო ნარჩენების ქუჩაში დატოვებისთვის, ნაწილი კი – საყოფაცხოვრებო ნარჩენებით და სხვა ტიპის დანაგვიანებისთვის.

მონიტორინგისა და ზედამხედველობის სამსახურის ინსპექტორებს მოქალაქის თუ კომპანიის დაჯარიმება იმ შემთხვევაში შეუძლიათ, თუ თავად გახდებიან ფაქტის შემსწრე ან ორი მოწმე დაადასტურებს დანაგვიანების ფაქტს და პიროვნების ვინაობას, ან კიდევ არსებობს ფაქტის დამადასტურებელი კამერის ჩანაწერი. ვრცლად ამ თემაზე.

 

 

 

ბათუმში თურქეთის საკონსულოს განცხადებით, მძღოლებმა, რომელთაც თურქეთის ტერიტორიაზე მგზავრები გადაჰყავთ, სპეციალური ნებართვა თურქეთის ტრანსპორტისა და ინფრასტრუქტურის სამინისტროში უნდა მიიღონ.

საკონსულო ტურისტული კომპანიების მძღოლების საპროტესტო აქციას გამოეხმაურა, რომელიც ბათუმში 10 ივლისს გაიმართა. მძღოლები აცხადებენ, რომ მათ თურქეთის პოლიცია უსამართლოდ აჯარიმებს, როცა საქართველოდან ტურისტები ერთდღიანი ტურით თურქეთში შეჰყავთ.

„როგორც ყველა ქვეყანაში, ასევე თურქეთშიც მგზავრთა გადაყვანა ექვემდებარება კონკრეტულ ნებართვებს. რამოდენიმე საქართველოს მოქალაქემ, რომლებიც შესაბამისი ნებართვის არ მქონე კერძო სატრანსპორტო საშუალებებით ეწეოდნენ კომერციული მიზნით მგზავრთა გადაყვანას, სახმელეთო მგზავრთა გადაყვანის რიგით 2918 ადმინისტრაციული კანონის თანახმად, თითოეულ ავტოსატრანსპორტო საშუალება დაჯარიმებული იქნა 1002 თურქული ლირის ოდენობით და აეკრძალა 15 დღის განმავლობაში გადაადგილება. მსგავსი რეგულაციები არსებობს საქართველოშიც და ჯარიმა განისაზღვრება 5000 ლარით. იმისათვის, რომ თავიდან იქნას აცილებული მსგავსი პრობლემები, მოგმართავთ თხოვნით, რომ თავი შეიკავოთ კომერციული მიზნით მგზავრთა გადაყვანის ნებართვის არმქონე მსუბუქი ავტომობილებით, მიკროავტობუსებითა და მსგავსი სატრანსპორტო საშუალებით გადაადგილებისგან“ – აღნიშნულია საკონსულოს განცხადებაში.

საკონსულოს განცხადებით, 1995 წელს თურქეთისა და საქართველოს რესპუბლიკების მთავრობებს შორის დადებული საერთაშორისო სახმელეთო გადაზიდვის ხელშეკრულების მეექვსე პუნქტში – მგზავრთა გადაზიდვა – მითითებულია, რომ ხელშეკრულების ერთი მონაწილე მხარის გადამზიდველმა უნდა განახორციელოს რეგულარული რეისები ან ტრანზიტული მომსახურება მეორე მონაწილე მხარის ტერიტორიაზე სპეციალური ნებართვების საფუძველზე, რომელიც გაცემულია მეორე მონაწილე მხარის კომპეტენტური ორგანოს მიერ.

„გადამზიდავმა  უნდა აიღოს ერთწლიანი ნებართვა, რათა მეორე ხელმომწერი მხარის ტერიტორიაზე განახორციელოს რეგულარული რეისები და რეგულარული ტრანზიტული მიმოსვლა. მგზავრთა რაოდენობას არ აქვს მნიშვნელობა. მგზავრთა კომერციული გადაყვანის განსახორციელებლად შესაბამისი ქვეყნის კომპეტენტური უწყებიდან შესაძლებელია ერთწლიანი ნებართვის აღება. თურქეთში ამ დოკუმენტის აღება შესაძლებელია თურქეთის ტრანსპორტის და ინფრასტრუქტურის სამინისტროში,“ – აცხადებენ თურქეთის საკონსულოში.

კითხვაზე, კონკრეტულად რა დოკუმენტებია საჭირო ასეთი ნებართვის მისაღებად და რა ღირს ნებართვა, ამაზე საკონსულოში ვერ გვიპასუხეს, თუმცა გვითხრეს, რომ სამინისტროს უახლოესი წარმომადგენლობა ქალაქ ტრაპზონში მდებარეობს.

ხელშეკრულებაში, რომელიც 1995 წლიდან ივნისიდანაა ძალაში, ტერმინების განმარტებაში აღნიშნულია, რომ ტერმინი – „სატრანსპორტო საშუალება“ მგზავრთა გადაყვანის დროს ნიშნავს ავტობუსს ან ნებისმიერ ავტოსატრანსპორტო საშუალებას, რომელსაც გააჩნია არა უმცირეს 8 დასაჯდომი ადგილი მძღოლის ადგილის ჩაუთვლელად. ქართველი მძღოლები, რომელთაც ტურისტები გადაჰყავთ თურქეთში, ამბობენ, რომ მათ ექვსადგილიანი მინივენები ჰყავთ.