Batumelebi

საქართველოს შემოსავლების სამსახური საბაჟო გამშვები პუნქტი „სარფის“ შემომსვლელი და გამსვლელი გვირაბების რეკონსტრუქციას და მიმდებარე ტერიტორიის კეთილმოწყობას გეგმავს. შესაბამისი სამუშაოებისთვის საჭირო პროექტის შესაძენად სამსახურმა 45 ათასი ლარი გამოყო და ტენდერი გამოაცხადა.

როდის დაიწყება სამუშაოები, რა დრო დასჭირდება მის დასრულებას და რა თანხა იქნება საჭირო რეკონსტრუქციისთვის? – ამ პროექტის შედგენის შემდეგ გახდება ცნობილი [გამშვები პუნქტის რეკონსტრუქცია მიმდინარეობს თურქეთის მხარესაც].

რეკონსტრუქციისა და კეთილმოწყობის პროექტი, სატენდერო პირობის თანახმად უნდა მოიცავდეს:

[checklist]

• შემომსვლელი გვირაბი – წარმოადგენს კარკასული ტიპის, მიწისზედა ერთსართულიან მიშენებას. საორიენტაციო გაბარიტული ზომები: სიგრძე – 20-25მ, სიგანე – 12მ; სიმაღლე: 4,5 მ. [სავარაუდოდ, მოხდება არსებული მიშენების დემონტაჟი]; გამსვლელი გვირაბი – არსებული საფეხმავლო გვირაბის დაგრძელება. გაბარიტული ზომები: სიგრძე – 20მ, სიგანე – 12მ; სიმაღლე: 4,5 მ];
• საავტომობილო პარკინგი;
• მდინარის ჯებირის მოწყობა;
• მდინარის მიმდებარედ არსებული ტერიტორიის კეთილმოწყობა.

[/checklist]

ტენდერში წინადადებების მიღება დაიწყება 2018 წლის 30 ოქტომბერს და პირველ ნოემბერს დასრულდება. მოთხოვნილი საინჟინრო-საპროექტო დოკუმენტაცია ტენდერში გამარჯვებულმა შემოსავლების სამსახურს  ხელშეკრულების გაფორმებიდან 40 დღეში უნდა მიაწოდოს.

———

სარფში განახლებული საბაჟო-გამშვები პუნქტი 2011 წლის 31 მაისს გაიხსნა. იმავე დღეს საქართველოსა და თურქეთის პრეზიდენტებმა ხელი მოაწერეს საზღვრის გამარტივებული წესით გადაკვეთის შეთანხმებას, რომლის თანახმად, ორივე ქვეყნის მოქალაქეებს საზღვრის გადალახვა პირადობის მოწმობებითაც შეუძლიათ.

აჭარის განათლების სამინისტრომ  „სტუდენტთა დახმარების“ პროგრამის ფარგლებში დაფინანსებული სტუდენტები გამოავლინა. საკონკურსო კომისიამ 103 სტუდენტი დაასახელა გამარჯვებულად. მათ შორის, პირველი საფეხურის 90 და მეორე საფეხურის 13 სტუდენტი.

კონკურსში მონაწილეობდა 2015, 2016 და 2017 წელს ერთიანი ეროვნული გამოცდების შედეგად აკრედიტებულ უმაღლეს საგანმანათლებლო დაწესებულებებში აკრედიტებული საგანმანათლებლო პროგრამების პირველ (ბაკალავრიატი) და მეორე (მაგისტრატურა) საფეხურზე ჩარიცხული 117  სტუდენტი. მათ შორის პირველი საფეხურის 104 და მეორე საფეხურის 13 სტუდენტი.

აჭარის განათლების სამინისტროს ინფორმაციით, პროგრამა ითვალისწინებდა შემდეგი კატეგორიის სტუდენტების დაფინანსებას:

• სტუდენტები მაღალმთიანი აჭარიდან;
• მრავალშვილიანი ოჯახის წევრი – ოთხი ან მეტი შვილი;
• დედით ან მამით ობოლი, უდედმამო;
• სოციალურად დაუცველი – 100 000 ქულა ან ნაკლები.

იხილეთ კონკურსში გამარჯვებული სტუდენტების სახელობით სია კატეგორიების მიხედვით.

ადლიასა და ანგისაში უკვე მიმდინარე და დაგეგმილი სამშენებლო პროექტების დათვალიერებისას შეიძლება რეალურად მოგვეჩვენოს ამერიკულ თრილერებში ასახული სიუჟეტები და დავიჯეროთ მაღლივი სახლების სახურავებიდან სახურავებზე გადასვლის შესაძლებლობა.

ამ, ერთ დროს ორსართულიან დასახლებაში, ერთმანეთის მიყოლებით შენდება მაღლივი მრავალბინიანი სასტუმრო და აპარტოტელი, ასევე საცხოვრებელი სახლები. ადგილობრივებს, რომლებიც ჯერ კიდევ ორსართულიან სახლებში ცხოვრობენ, ახალი მშენებლობები სულაც არ ახარებთ. ისინი ამბობენ, რომ ახალმა „დიდმა სახლებმა“ მათი საცხოვრებელი გარემო გააუარესა.

ადლიისა და ანგისის დასახლებაში, მეორე ზოლში, მე-15 სართულამდე არსებულ ბინის მეპატრონეებს სახლთან ზღვა ახლოს ექნებათ, თუმცა ფანჯრიდან მის დანახვას ვერ შეძლებენ. ზღვის ხედს მხოლოდ ისინი ინარჩუნებენ, ვინც ბინა პირველ ზოლში აშენებულ მრავალბინიან კორპუსებში შეიძინა ან მომავალში შეიძენს.

პირველ ზოლში, შერიფ ხიმშიაშვილის #30-ში კომპანია „ელთ ბილდინგი“ თხუთმეტსართულიან აპარტოტელს აშენებს. შენობას ერთი მხრიდან – ზღვის მხარეს, ბათუმის ახალი ბულვარი ესაზღვრება, მეორე მხრიდან კი – ანგისის დასახლება, ორსართულიანი საცხოვრებელი სახლებით.

ხიმშიაშვილის ქუჩიდან კორპუსი სკოლა ლიცეუმ „თაობას“ ესაზღვრება. ფოტოზე ჩანს, რომ კომპანიამ კედელი ზედ სკოლის ფანჯრებთან ააშენა. ყრუ კედელი საკლასო ოთახებს ესაზღვრება. სკოლაში ამბობენ, რომ კორპუსმა კლასები ჩააბნელა.

სკოლა, რომლის ფანჯრებსაც ყრუ კედელი ამოუშენეს.

ამ უბნებში წამოწყებული მშენებლობის პარამეტრების განსაზღვრა რთულია, რადგან უმეტეს შემთხვევაში სამშენებლო მოედანზე საინფორმაციო დაფა განთავსებული არ არის. ვერანაირ ინფორმაციას ვერ იპოვი იქ, სადაც სასტუმროებს აშენებენ და ვერც იქ, სადაც მრავალბინიან საცხოვრებელი სახლები შენდება. საინფორმაციო ბანერის განთავსებას მშენებლობის ადგილზე ტერიტრორიის შემოღობვის დღიდან კანონით სავალდებულოა, ბანერზე მოცემული უნდა იყოს ინფორმაცია ნებართვის გამცემ ორგანოზე, ნებართვის გაცემის, მშენებლობის დაწყება-დასრულების თარიღებსა და მშენებლობის მასშტაბებზე. თუმცა ჩვენი თემა დღეს ის არ არის, თუ რატომ ვერ ამჩნევენ ბათუმის მერიაში ამ კანონდარღვევას, არამედ ის, თუ რა ხდება დასახლებაში.

სამშენებლო ობიექტზე მყოფი პირები კითხვებს არ პასუხობენ. განსხვავებულია იქვე განთავსებული გაყიდვების ოფისისა და მუშებისგან მიღებული ინფორმაციაც.

ხიმშიაშვილის #74-ში მრავალბინიან საცხოვრებელ სახლს აშენებს „NK GROUP“-ი. კომპანიამ თავდაპირველად მერიას შვიდსართულიანი სახლის მშენებლობა შეათანხმა. შვიდივე სართული აშენებული და მოპირკეთებულია კიდეც, თუმცა, როგორც ჩანს, კომპანიამ მშენებლობის სიმაღლეში გაზრდა გადაწყვიტა, რადგან სახურავზე ხიმინჯები ისევ აჰყავთ.

კომპანიის გაყიდვების ოფისში გვითხრეს, რომ მშენებლობა დასრულებულია, ამიტომაც არ არის საინფორმაციო დაფა ადგილზე განთავსებული. კითხვაზე, რატომ არის ხიმინჯები ამოყვანილი დასრულებული შენობის სახურავზე, გვიპასუხეს: „მაგას მოვჭრით, ჰო, ჰო, უნდა მოვჭრათ“. მშენებლობაზე დასაქმებული მუშა კი გვიხსნის, რომ სახლს კიდევ უნდა დააშენონ, მაგრამ არ იცის, რამდენი სართული.

„ბათუმელების“ ინფორმაციით, ამ კომპანიას სართულის დაშენების ნებართვა არ აქვს. გარდა ამისა, შეთანხმებული პროექტის დარღვევისთვის ის ერთხელ უკვე დააჯარიმეს.

კომპანია NK GROUP-ი  2015 წელს რუსეთის მოქალაქემ, კახაბერ ქათამაძემ დააფუძნა.

ხიმშიაშვილის #80-ში ორსართულიანი სახლების წინ ღია სივრცე სამშენებლო კომპანიებმა მაღლივი სამშენებლო პროექტებით უკვე აითვისეს. აქ ტერიტორია შემოღობილია და ერთმანეთის მიყოლებით იწყება ან დაგეგმილია მშენებლობა.

შპს „რუმის“  ვებგვერდზე დაგეგმილი სამშენებლო პროექტის რენდერებიდან ჩანს, თუ როგორი განაშენიანება ჰქონდა ამ ქუჩას მაღალსართულიანი შენობების მშენებლობის დაწყებამდე.

შპს „სი ემ ეს მეზღვაური“ ხიმშიაშვილის #85-ში მრავალბინიან სასტუმრო და საცხოვრებელ კომპლექსს აშენებს. ამ დროისთვის ერთი კარკასი შენდება, თუმცა რენდერის მიხედვით, დაგეგმილი პროექტი სამ კარკასს ითვალისწინებს. მშენებლობის გვერდით ორსართულიანი საცხოვრებელი სახლია, რომელსაც მესაკუთრე არ ჰყიდის.

სახლი ხიმშიაშვილის #83-ში, რომელსაც მესაკუთრე არ ჰყიდის, ორი მაღლივი მშენებლობის შუაშია მოქცეული. კომპანიები აქ ბინის შეძენის მსურველებს უხსნიან, რომ ეს პატარა სახლი მათ საცხოვრებელ გარემოს ვერ შეუცვლის, რადგან ახალი რეგულაციებით მას მაღალი სართულების დაშენების უფლება აღარ ექნება, „მაქსიმუმ ორი სართული დააშენოს“.

ამ მაღლივი სახლების უკან კი ჯერ კიდევ შენარჩუნებული ორსართულიანი დასახლებაა. ეს ფოტო თავად კომპანიებმა გადაიღეს და ვებგვერდზე რეკლამის მიზნით განათავსეს, მომხმარებელს რომ აჩვენონ მათი სახლების უკან ხედი, სადაც გამწვანებული საცხოვრებელი ზონა იშლება. ყოველ შემთხვევაში, ჯერჯერობით, ასეა.

ამ უბანში კიდევ არის ორსართულიანი სახლები მაღალი კორპუსების გვერდით. პატარა სახლებს მესაკუთრეები არ ჰყიდიან. თუმცა არის უკვე დაცარიელებული და დასანგრევად გამზადებული სახლებიც, მათ ადგილებზე კი მაღლივი კორპუსების, სასტუმროებისა და აპარტოტელების მშენებლობაა დაგეგმილი:

„შეთავაზება მას შემდეგ მივიღე, როცა ხულოს მერის მოადგილის პოსტი დავტოვე“, – გვითხრა ლაშა ბოლქვაძემ, რომელიც შპს „Goderdzi Resorts“-ის დირექტორის მოადგილედ დანიშნეს. ეს კომპანია აჭარის ავტონომიური რესპუბლიკის საკუთრებაშია და კურორტ „გოდერძის“ განვითარებას კურირებს.

„ბათუმელებმა“ ლაშა ბოლქვაძეს ჰკითხა, როდის მიიღო შეთავაზება და ვისგან. მისი თქმით, შეთავაზება კომპანიის დირექტორისგან – მალხაზ მახარაძისგან მიიღო.

ლაშა ბოლქვაძე ბოლო 4 წლის განმავლობაში ხულოს მერიაში მუშაობდა. ბოლოს ის ხულოს მერის მოადგილე იყო და მერთან, გოჩა მელაძესთან ერთად, როგორც თავად აცხადებს, საკუთარი სურვილით დატოვა თანამდებობა.

ხულოს მერი თავდაპირველად შვებულებაში გავიდა. ხულოს მერის თანამდებობიდან წასვლის შესახებ ინფორმაციის მედიაში გაჟღერების შემდეგ გოჩა მელაძე სამსახურში დაბრუნდა, მოადგილე – ლაშა ბოლქვაძე გაათავისუფლა, ახალი მოადგილე დანიშნა და თავადაც განცხადება დაწერა წასვლის შესახებ. თუ ხულოს მერი ამას არ გააკეთებდა, ხულოს მერის მოვალეობის შემსრულებელიც ვერ ეყოლებოდა სამართლებრივად, რიგგარეშე არჩევნების ჩატარებამდე.

რის გამო წამოვიდა ლაშა ბოლქვაძე ხულოს მერიიდან? – ხულოს მერის ყოფილი მოადგილე „ბათუმელებთან“ ამბობს, რომ ეს ოჯახური პირობების გამო გააკეთა. „მეორე შვილი შემეძინა, ჩემი ოჯახი ბათუმში ცხოვრობს, ხულოდან რთული იყო… „Goderdzi Resorts“-ის ოფისი ბათუმშია, შესაბამისად, ძირითადად ბათუმში ვიქნებით, გოდერძიზეც მოგვიწევს ხშირად ასვლა,“ – გვითხრა ლაშა ბოლქვაძემ.

ხულოს მერიამდე ლაშა ბოლქვაძე ბათუმის მერიაში მუშაობდა. მას არჩილ ვანაძესთან ერთად გამოძიება სამოხელეო დანაშაულის ჩადენას ედავებოდა გახმაურებული „ჟილინის არხის საქმეზე“. ბათუმის საქალაქო სასამართლომ 12 ივლისს ლაშა ბოლქვაძე და არჩილ ვანაძე უდანაშაულოდ მიიჩნია.

ამ თემაზე:

„რამდენიმე დღის წინ მიმინო დავიჭირე და მოვიდნენ, ეს აკრძალულია, 1000 ლარით გაჯარიმებთო. რაც აკვნიდან გადმოვვარდი, სულ მიმინოებს ვიჭერ, ბაბუაც ამას აკეთებდა. 12 წლის ვიყავი, როცა პირველი ჯილდო მივიღე, როგორც ბაზიერმა. ბოლოს თბილისობაზე მომცეს მედალი,“ – ეს  ბათუმში მცხოვრებმა ზურაბ ბარამიძემ მოგვიყვა სასამართლოს ფოიეში.

30 სექტემბერს გარემოს დაცვის ზედამხედველობის დეპარტამენტმა ზურაბ ბარამიძის წინააღმდეგ ადმინისტრაციული სამართალდარღვევის ოქმი შეადგინა. გარემოსდამცველებმა მიმინოს დაჭერა ბაზიერობისთვის „გარეული ცხოველის დატყვევებად“ შეაფასეს, ხოლო დატყვევებული მიმინო გაუშვეს.

ბაზიერობა, როგორც არამატერიალური კულტურული მემკვიდრეობა, იუნესკოს ძეგლთა დაცვის ნუსხაშია შეტანილი„თუ მიმინო არ დავიჭირე, ბაზიერი საიდან ვიქნები?“ – კითხულობს ზურაბ ბარამიძე. სასამართლო სხდომის დაწყებამდე ის მოგვიყვა, როგორ იჭერს და შემდეგ წვრთნის მიმინოს ნადირობისთვის, ასევე ჩემპიონატში მონაწილეობისთვის.

„ხაფანგით მიმინოს დაჭერა მარტივია, მერეა რთული, რომ შეგეჩვიოს… თავიდან პატარა ჩიტს ვიჭერ, მაჭო ჰქვია, იმის ხმაზე მოდის მიმინო, ტყუვდება და ჩემ მიერ წინასწარ დაფენილ ბადეში ეხვევა… მერე მუდმივად ხელზე მიზის და თოკით მყავს გამობმული, სადღაც ერთი კვირა. უკვე სამ დღეში ეტყობა, გეჩვევა თუ არა. სულ უნდა ეფერო, კარგად მოექცე. რამდენიმე დღეში მიხვდები, გიმეგობრდება თუ არა. თუ არაფერი გამოდის, ისევ უკან ვაბრუნებ. ცნობილია, რომ მიმინო საკვებად არ გამოიყენება…

აქამდე არავინ დაუჯარიმებიათ, პირველად მესმის. გარეული ცხოველები ივანიშვილსაც ჰყავს, რა გამოდის, მისთვის შეიძლება და რიგითი ადამიანებისთვის არა?“ – გვითხრა ზურაბ ბარამიძემ.

ბაზიერის ამბავი მოსამართლე ირაკლი შავაძემ განიხილა. სასამართლო სხდომაზე ბიძინა ივანიშვილის სახელმაც გაიჟღერა ზვიგენთან და პინგვინებთან ერთად.

„ბაზიერობა კულტურული მემკვიდრეობის ძეგლია. ის, რომ კანონმდებლობაში ბაზიერობის რეგულაცია არ არის, ეს ბატონი ზურაბის ბრალი არ არის…. საქართველოში არიან პირები, ვისაც ჰყავს გარეული ცხოველები სახლში. საინტერესოა, რატომ არ მოხდა მათ მიმართ რეაგირება?“ – იკითხა სასამართლო პროცესზე საია-ს იურისტმა, პაატა დიასამიძემ. ის სასამართლოში ზურაბ ბარამიძის ინტერესებს იცავდა.

„მოგვაწოდეთ ინფორმაცია და მოვახდენთ რეაგირებას,“ – უპასუხა შენიშვნას გარემოს დაცვის ზედამხედველობის დეპარტამენტის იურისტმა, ლანა ქიქავამ. მას საია-ს იურისტმა შეახსენა, რომ ასეთი ბიძინა ივანიშვილია, რომელსაც ზვიგენი ჰყავს და პინგვინებიც.

„ოფიციალურად შემოიტანეთ და განვიხილავთ,“ – მოკლე რეპლიკით სცადა უხერხული დიალოგის დასრულება დეპარტამენტის წარმომადგენელმა.

საია-ს იურისტმა სასამართლო პროცესზე ყურადღება გაამახვილა იმაზე, რომ ბაზიერობა სპორტია, რომელიც იმავდროულად კულტურული მემკვიდრეობის ძეგლია და ამ კუთხით ცალკე საკანონმდებლო რეგულაცია არ არსებობს.

„დადგენილი ფაქტია, რომ მან მიმინო დაიჭირა. ჩვენ არ ვიცით, რისთვის სჭირდებოდა მას ეს. წარმოედგინა მაშინ დოკუმენტი, რომ მიმინო ბაზიერობისთვის სჭირდებოდა,“ – თქვა გარემოს დაცვის ზედამხედველობის დეპარტამენტის იურისტმა, ლანა ქიქავამ.

„ბუნებაში არის ასეთი უწყება, რომელიც მსგავს ნებართვას გასცემს?“ – იკითხა მოსამართლემ.

„მიემართა სამინისტროსთვის ჯერ. წარმოდგენილი არ არის რაიმე დოკუმენტი, რომელიც ადასტურებს იმას, რომ მოქალაქემ შესაბამისი ნებართვის მისაღებად სამინისტროს მიმართა,“ – აღნიშნა ლანა ქიქავამ. მას საია-ს იურისტმა შეახსენა, რომ მტკიცების ტვირთი მასზეა, როგორც სახელმწიფო უწყების წარმომადგენელზე და მას უნდა წარმოედგინა სასამართლოსთვის ნებართვის ფორმა, ასეთის არსებობის შემთხვევაში.

გარემოს დაცვის ზედამხედველობის დეპარტამენტის წარმომადგენელმა ვერ თქვა დაზუსტებით, კონკრეტულად რა სახის ნებართვა უნდა აეღო მოქალაქეს ბაზიერობისთვის და რომელი უწყებიდან. გარემოს დაცვის სამინისტრო ნებართვებს ნადირობის კუთხით გასცემს.

„მე მაინტერესებს, როდის აქეთაა მიმინო ცხოველი?“ – იკითხა პროცესზე მოქალაქე ზურაბ ბარამიძემ. მას მოსამართლემ განუმარტა, რომ კანონმდებლობის მიხედვით მიმინოც ცხოველთა სამყაროს ეკუთვნის.

მოსამართლემ გადაწყვეტილება მალევე გამოაცხადა. მოსამართლე ირაკლი შავაძემ ზურაბ ბარამიძეს შენიშვნა მისცა, ადმინისტრაციული წესით დაჯარიმებაზე კი უარი თქვა. მოსამართლემ განმარტა, რომ მიმინოს დაკავება დადგენილი ფაქტია, რაც სამართალდარღვევად უნდა მივიჩნიოთ.

„გასაგებია, რომ ცალკე რეგულაცია ბაზიერობაზე არ არსებობს, მაგრამ მინისტრის 2013 წლის ბრძანება ნადირობის ნებართვებზე უნდა გავრცელდეს ამაზეც“, – დასძინა მოსამართლემ.

ბაზიერების შეჯიბრი ნოემბერშია დაგეგმილი. ზურაბ ბარამიძემ ჯერ არ იცის, დაიჭერს თუ არა ისევ მიმინოს. წუხს იმის გამო, რომ მონაწილეობას შეჯიბრში ვეღარ მიიღებს. „რომც დავიჭირო, გაწვრთნას ხომ დრო უნდა?“ – გვითხრა მან პროცესის დასრულების შემდეგ.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 24 ოქტომბრის 21 საათიდან 25 ოქტომბრის 21 საათამდე ბათუმში მოსალოდნელია ცვალებადი მოღრუბლულობა, ღამით – უმეტესად უნალექოდ, დღის მეორე ნახევრიდან დროგამოშვებით  იწვიმებს, ზოგან – ძლიერად.

იქროლებს ცვალებადი მიმართულების ქარი 10-15 მეტრი წამში, დღის მეორე ნახევრიდან კი გაძლიერება 17-22 მ/წმ-დე.

ამინდის ტემპერატურა სანაპირო რაიონებში იქნება:

• დღისით: 18 – 23 გრადუსი
• ღამით: 12 – 17 გრადუსი

მთაში მოსალოდნელია:

• დღისით: 10 – 15 გრადუსი
• ღამით: 2  – 7 გრადუსი

ზღვის წყლის ტემპერატურა აჭარის სანაპიროზე 19.5 გრადუსია. ტალღის სიმაღლე 15-20 დმ [4-5 ბალი].

გარემოს ეროვნული სააგენტოს ცნობით, 26-27 ოქტომბერს დასავლეთ საქართველოში  ჰაერის ტემპერატურის მნიშვნელოვანი დაკლებაა მოსალოდნელი, მაღალმთაში – თოვლი, ზოგან ძლიერი ქარი, ზღვაზე შესაძლებელია 4-5- ბალიანი შტორმი.

___________

ფოტო: „ბათუმელები“, თამარ ნერგაძე

„გამოძიების პროცესში დადგენილი ფაქტების შესაბამისად მოხდება რეაგირება,“ – ასე უპასუხეს აჭარის განათლების სამინისტროში ჩვენს შეკითხვას ქობულეთში 15 წლის გოგოს გათხოვების შესახებ. სამინისტროს ვკითხეთ, რა რეაგირება მოჰყვება სკოლის დირექტორის დამოკიდებულებას, რომელმაც პოლიციისთვის ამბის შეტყობინებას ქორწილში მისვლა არჩია.

სოფელ ლეღვაში სკოლის მოსწავლის დაქორწინების შესახებ პირველად საზოგადოებამ გუშინ, 22 ოქტომბერს TV25-ის  სიუჟეტიდან გაიგო. ამ შემთხვევაშიც მედიაში ინფორმაციის გაჟღერების შემდეგ დაიწყო გამოძიება. გამოძიება შინაგან საქმეთა სამინისტრომ არასრულწლოვანთან სექსუალური კონტაქტის მუხლით დაიწყო. ამ ეტაპზე დანაშაულის შეუტყობინებლობის მიმართულებით გამოძიება არ მუშაობს.

გამოძიებამ შესაძლოა დაადგინოს ან გამორიცხოს სკოლის დირექტორის მხრიდან დანაშაულის ჩადენა. დანაშაულის დადგენამდე შესაძლოა განათლების სამინისტრომ გამოარკვიოს, ჩაიდინა თუ არა სკოლის დირექტორმა სამართალდარღვევა. სკოლის დირექტორს ბავშვზე ძალადობის შესახებ ინფორმაციის შესაბამისი სახელმწიფო ორგანოებისთვის მიწოდებას მთავრობის 2015 წლის დადგენილება ავალდებულებს. რეფერირების დოკუმენტით გათვალისწინებული ვალდებულების დარღვევა სამართალდარღვევაა, რაც შესაბამისი სანქციით ისჯება.

„საბავშვო ბაღები, საგანმანათლებლო და სკოლისგარეშე სახელოვნებო ან/და სასპორტო საგანმანათლებლო დაწესებულებები, მანდატურის სამსახური, ბავშვთა სპეციალიზებული დაწესებულებები, თავშესაფრები, მათი კომპეტენციის ფარგლებში, უფლებამოსილნი არიან, რეფერირების პროცედურების ფარგლებში ბავშვზე ძალადობის ეჭვის გაჩენის შემთხვევაში ადგილზე გაანალიზონ შემთხვევა და საფუძვლიანი ეჭვის შემთხვევაში უზრუნველყონ სააგენტოსა და პოლიციის ინფორმირება. ამ პუნქტით გათვალისწინებული სუბიექტები ვალდებულნი არიან, სააგენტოსთან თანამშრომლობით აწარმოონ ძალადობის მსხვერპლი ბავშვის მდგომარეობაზე ზედამხედველობა, მათი კომპეტენციის ფარგლებში,“ – აღნიშნულია მთავრობის დადგენილებაში.

ლეღვას სკოლის დირექტორი მანონი მამულაიშვილი საქართველოს განათლების სამინისტრომ დანიშნა მოვალეობის შემსრულებლად. შესაბამისად, მისი საკითხი ამ უწყებამ უნდა მოიკვლიოს. საქართველოს განათლების სამინისტროს პრესცენტრში კი გვიპასუხეს, რომ საკითხზე კომენტარი აჭარის განათლების სამინისტროში უნდა გააკეთონ.

სოციალური მომსახურების სააგენტოს პრესცენტრის ინფორმაციით, წელს ადრეული ქორწინების 86 შემთხვევა დაფიქსირდა ქვეყნის მასშტაბით, გასულ წელს – 98. ესაა ფაქტები, როცა სოციალურ მუშაკებს დახმარებისთვის მიმართეს.

22 ოქტომბერს გახმაურებულ ისტორიაში 21 წლის ბიჭი დაქორწინდა 15 წლის გოგოსთან. „ჩემს ხელთ არსებული ინფორმაციით, ისინი თანაცხოვრებაში არ იმყოფებიან,“ – ეს დეპუტატმა ცოტნე ანანიძემ თქვა მას შემდეგ, როცა მოზარდის ქორწილის შესახებ გაიგო. ცოტნე ანანიძე უმაღლეს საბჭოში ადამიანის უფლებების დაცვის კომიტეტს ხელმძღვანელობს.

„მათ ჰქონდათ ჩანიშნული ნიშნობა, ხარჯების დაზოგვის მიზნით ნიშნობა გადაზარდეს საქორწილო რიტუალში,“ – თქვა დეპუტატმა.

მომხდარში ტრაგედიას ვერ ხედავს იმ სკოლის დირექტორი, სადაც გოგო გათხოვებამდე სწავლობდა. მან  ჟურნალისტებს გუშინ უთხრა, რომ სოცსააგენტოს არასრულწლოვანი მოსწავლის ქორწინების შესახებ არ შეატყობინა, რადგან გოგო მისი სკოლიდან სხვა სკოლაში გადავიდა. დღეს, 23 ოქტომბერს, ლეღვას სკოლის დირექტორმა, მანონი მამულაიშვილმა „ბათუმელებთან“ საუბრის დროს ხაზი გაუსვა გოგოს მშობლების გამოძიებისთვის მიცემულ ჩვენებას.

„გოგოს მშობელმა გამოძიებას უკვე უთხრა, შეგიძლიათ გადაამოწმოთ, რომ მე ამის შესახებ არ ვიცოდი. 17 სექტემბერს ის სკოლაში არ მოსულა. რომ მოვიკითხე, მითხრეს, რომ ბებიასთან ერთად არის დასასვენებლად წასულიო. ოქტომბრის დასაწყისში მშობელმა მობილობა მოითხოვა და მერე გაირკვა, რომ გოგო გათხოვდა…“, – გვითხრა სკოლის დირექტორმა.

როცა დირექტორი სამართალდამცველებს არ აწვდის დანაშაულის შესახებ ინფორმაციას და პირიქით – არასრულწლოვანი მოსწავლის ქორწილს ესწრება, ეს ხომ არ აჩვენებს იმას, რომ მოზარდის ქორწილი დირექტორისთვის მისაღებია? – მანონი მამულაიშვილმა ჩვენს ამ შეკითხვას პროვოკაციული უწოდა და გვირჩია არასრულწლოვნების სხვა პრობლემებით დავინტერესდეთ.

„ქორწილში მისვლა მგონი არ არის სისხლის სამართლის დანაშაული. მე ვიყავი ჩემი თანამშრომლის ქორწილში. ამ გოგოს დედა მასწავლებელია. მივედი ერთი საათით და წამოვედი… ეს არ ნიშნავს, რომ ბავშვთან დაქორწინება ჩემთვის მისაღებია. მე შეიძლება პროტესტიც გამოვხატე და შეიძლება არც მომწონდეს, მაგრამ ყველაზე დიდი ტკივილი გადაიტანა იმ ოჯახმა, საიდანაც გათხოვდა ეს გოგო. ძალიან ბევრი ასეთი შემთხვევა ხდება საქართველოში და სკოლის დირექტორები ვერ მოაწესრიგებენ ამას… ამხელა განგაშიც, არ ვიცი. უფრო მეტი რაღაცები ხდება, ძალიან ბევრი არასრულწლოვანი არის ჩართული ცუდ საქმეებში და ის გააშუქეთ, მაგაზე ილაპარაკეთ,“ – აღნიშნა მანონი მამულაიშვილმა.

სკოლის დირექტორი ჩვენმა მორიგმა შეკითხვამაც გააღიზიანა: გაქვთ თუ არა ინფორმაცია სკოლის სხვა მოსწავლეებზე, რომლებიც დაოჯახებას აპირებენ?

„წინასწარ ასეთ ინფორმაციას ვის აწვდიან, ეს მითხარით, მე გისვამთ უკან კითხვას… წინასწარ რომ ეს ვიცოდეთ, დირექტორიც მიიღებს ზომას და მშობელიც. რამდენიმე დღის წინ ჩვენს სოფელში მეათეკლასელი გოგო უბედური შემთხვევის შედეგად გარდაიცვალა. იმ ფონზე ეს დაქორწინება არ შეიძლება ჩავთვალო იმხელა ტრაგედიად, სიკვდილს ყველაფერი ჯობია, ჩემი პოზიცია ესაა“, – გვიპასუხა ლეღვას სკოლის დირექტორმა.

შინაგან საქმეთა სამინისტროს ინფორმაციით, გამოძიება 15 წლის გოგოსთან დაქორწინების ფაქტზე სისხლის სამართლის კოდექსის 140-ე მუხლით მიმდინარეობს, რაც გულისხმობს „სრულწლოვნის სექსუალური ხასიათის შეღწევას დამნაშავისთვის წინასწარი შეცნობით 16 წლის ასაკს მიუღწევლის სხეულში.“ დანაშაული 7-დან 9 წლამდე თავისუფლების აღკვეთას ითვალისწინებს.

140-ე მუხლით დაწყებული და გახსნილი საქმეების შესახებ კონკრეტული მონაცემი არ აქვს გამოქვეყნებული შინაგან საქმეთა სამინისტროს. ოფიციალური სტატისტიკა შსს-ს სქესობრივი ხასიათის დანაშაულზე [სსკ-ის 138, 139, 140, 141] ერთიანად აქვს ინტერნეტგვერდზე მოცემული.

ამ მონაცემის მიხედვით, სქესობრივი ხასიათის დანაშაულის ჩადენის მაჩვენებელი ქვეყანაში 35 პროცენტით გაიზარდა. 2017 წელს სქესობრივი ხასიათის დანაშაულის 149 შემთხვევა დაფიქსირდა და გაიხსნა 102.

2018 წლის 31 აგვისტოს ჩათვლით კი, 202 ფაქტზე დაიწყო გამოძიება, აქედან გაიხსნა – 87.

ბათუმში მშენებარე საფეხბურთო სტადიონის გადახურვის სამუშაოები დაწყებულია. ობიექტზე ამ ეტაპზე სახურავის ლითონის კონსტრუქციას ამონტაჟებენ. მონტაჟი, არსებული გრაფიკის მიხედვით, 2019 წლის იანვარში უნდა დასრულდეს. აჭარის ფინანსთა სამინისტროს ინფორმაციით, ბათუმის საფეხბურთო სტადიონის მშენებლობის სამუშაოების ჯამური სავარაუდო ღირებულება 157 344 846 ლარია.

სტადიონის მშენებლობა მეათე თვეა მიმდინარეობს, ტენდერში გამარჯვებულმა კომპანიამ კი მშენებლობის ზედამხედველობა 20 დღის წინ დაიწყო.

„ლითონის სახურავის მონტაჟი მომავალი წლის თებერვლამდე უნდა დასრულდეს, თუმცა გააჩნია როგორი ამინდი იქნება. ამ ეტაპისთვის დასრულებულია რკინა-ბეტონის სამუშაოების 90 პროცენტი, დარჩენილია მხოლოდ მეორე იარუსის ტრიბუნები. ასევე დასრულებულია ბლოკის წყობის [გადატიხვრები, ოთახები, კედლები, ფასადები] სამუშაოების 70 პროცენტი. პარალელურად, მიმდინარეობს ისეთი სამუშაოების დაგეგმვა, როგორიცაა ელექტრომექანიკური სამუშაოები და სადღაც ნოემბრის ბოლოსთვის ამ სამუშაოების დაწყებაც იქნება შესაძლებელი,“ – აღნიშნა „ბათუმელებთან“ სატელეფონო საუბარში მირზა ბოლქვაძემ, შპს „სტადიონის“ ინჟინერ-კონსტრუქტორმა.

ბათუმის საფეხბურთო სტადიონის მშენებლობას აჭარის ავტონომიური რესპუბლიკის შპს „სტადიონი“ კურირებს. მშენებლობას კი ტენდერში გამარჯვებული კომპანია „ანაგი“ ახორციელებს.

„ანაგს აქვს ფინანსური გეგმა-გრაფიკი, რაც ამ ეტაპისთვის გადაჭარბებით მიმდინარეობს,“ – აცხადებს მირზა ბოლქვაძე. მისივე ინფორმაციით, მშენებარე ობიექტზე, 2 ოქტომბრიდან, უკვე შესულია მშენებლობაზე ტექნიკური ზედამხედველი კომპანიაც – შპს „სიემსი“.

„როცა ლითონის სახურავის მონტაჟი დასრულდება, მშენებელი კომპანია შეადგენს რიგით მეექვსე ოქმს, რომლითაც დადასტურდება ნულოვან ნიშნულს ზემოთ მიწისზედა მზიდი კონსტრუქციული სისტემის დასრულების სამუშაოები. მშენებლობის წინა ხუთი ეტაპი დასრულებულია და წარმოდგენილია შესაბამისი ოქმები და ჩაბარებულია. ბოლო მეექვსე ეტაპი კი, შიდა გათვლებით, 2019 წლის 21 იანვრამდე უნდა დასრულდეს,“ – ამბობს მირზა ბოლქვაძე.

რაც შეეხება მშენებლობის ტექნიკურ ზედამხედველობას, მირზა ბოლქვაძის თქმით, „ზედამხედველი კომპანია ყოველდღიურად უწევს მეთვალყურეობას მშენებლობას და ადასტურებს თითოეული ფარული სამუშაოს შესრულების აქტს. როცა „ფორმა 2“-ს წარმომიდგენს ზედამხედველი კომპანია და „ანაგი“,  მათ უნდა წარმოგვიდგინონ ფარული სამუშაოს აქტები და სხვა სამუშაოების შესრულების შესაბამისი დოკუმენტაცია – ეს იქნება ლაბორატორიული შემოწმების აქტები თუ მასალების სერტიფიკატები. ამ კუთხით კი, შპს „სიემსს“, როგორც მშენებლობის ტექნიკურ ზედამხედველს, „ფორმა 2“ ამ დროისთვის არ დაუდია. ამ ფორმას კონკრეტული სამუშაოს დასრულების დროს მშენებელი ადგენს და ზედამხედველი ადასტურებს ან აძლევს შენიშვნებს.“

„ბათუმელებს“ კომპანია „სიემსში“ უთხრეს, რომ ზედამხედველობის პარალელურად ეცნობიან იმ აქტებს, რომლებიც 2 ოქტომბრამდე შესრულებულ სამუშაოებზე არის შედგენილი: „ვიდრე არ დასრულდება გარკვეული სამუშაოს ეტაპი და არ წარვადგენთ შესაბამის დოკუმენტებს, მანამდე ობიექტზე მიმდინარე სამუშაოების ან რაიმე ხარვეზის არსებობა-არარსებობის შესახებ ინფორმაციას ვერ გავცემთ“.

2018 წლის ოქტომბრამდე საფეხბურთო სტადიონის მშენებლობას ტექნიკურ ზედამხედველობას ტენდერში გამარჯვებული კომპანიის ნაცვლად, თავად შპს „სტადიონის“ ინჟინერ-კონსტრუქტორები ახორციელებდნენ.

ბათუმის საფეხბურთო  სტადიონის მშენებლობაზე ხელშეკრულება ტენდერში გამარჯვებულ შპს „ანაგთან“ 99 448 408 ლარზეა გაფორმებული [დღგ-ს გარეშე]. დღევანდელი მონაცემებით, კომპანიისთვის აჭარის ბიუჯეტიდან უკვე გადარიცხულია 48 702 526 ლარი.

რაც შეეხება ზედამხედველ კომპანიას, ხელშეკრულება „სიემსთან“ 2018 წლის 27 სექტემბერს 2 388 580 ლარზეა გაფორმებული. სახელმწიფო შესყიდვების სააგენტოს ვებგვერდის მონაცემებით, ზედამხედველი კომპანიისთვის ჯერ არცერთი თეთრი არ არის გადახდილი.

ბათუმის სტადიონი UEFA-ს IV კატეგორიის სტანდარტებით შენდება და ის 20 000 მაყურებელზე იქნება გათვლილი.

აჭარის ფინანსთა და ეკონომიკის სამინისტროს მიერ „ბათუმელებისთვის“ მოწოდებული ინფორმაციით: „ბათუმის საფეხბურთო სტადიონი ვერ უმასპინძლებს ჩემპიონთა ლიგის და უეფას ლიგის ფინალურ თამაშებს. ევროპის ჩემპიონატის ფინალის და გახსნა-დახურვის ცერემონიის ჩატარება ბათუმის საფეხბურთო სტადიონზე არ არის შესაძლებელი“.

სტადიონის მშენებლობა 2020 წლის სექტემბერში უნდა დასრულდეს.

ამ თემაზე:

საბავშვო სათამაშოებს, რომელთა შესყიდვაზეც სახელმწიფო ბიუჯეტიდან ათიათასობით ლარს ხარჯავს, მძიმე მეტალების შემცველობაზე არავინ ამოწმებს. ორგანიზაციაში, რომელიც წინა წლებში იკვლევდა ბავშვების სათამაშოების ხარისხს, აცხადებენ, რომ სათამაშოები, რომლებიც საბავშვო ბაღებში შეაქვთ, მავნე ნივთიერებებს შეიცავს.

„ბათუმელები“ დაინტერესდა, როგორ ყიდულობენ აჭარაში მოქმედი ბაღების გაერთიანებები სათამაშოებს ბაღებისთვის. ექვსივე მუნიციპალიტეტში გვითხრეს, რომ მათ სათამაშოების ხარისხზე ინფორმაცია არ აქვთ. 

ბათუმის საბავშვო ბაღების გაერთიანებამ, სულ ახლახან, ათი ათას ლარად ახალი საბავშვო ბაღისთვის ტენდერი გამოაცხადა სათამაშოებზე. სატენდერო პირობებში მითითებულია, რომ სათამაშოები არ უნდა შეიცავდეს ტყვიას და სხვა მეტალებს. თუმცა, როგორც ბათუმის ბაღების გაერთიანების ხელმძღვანელი მამუკა შამილიშვილი გვეუბნება, ხარისხის დამადასტურებელი დოკუმენტი ბაღების გაერთიანებამდე არ აღწევს.

ბათუმის საბავშვო ბაღების გაერთიანება წლის ბოლომდე კიდევ 150 ათას ლარზე  აპირებს ტენდერის გამოცხადებას. მამუკა შამილიშვილი ამბობს, რომ ბოლომდე არც ამ შემთხვევაშია დარწმუნებული, მიაწვდის თუ არა ტენდერში გამარჯვებული კომპანია ევროპული სტანდარტის ანუ უსაფრთხო სათამაშოებს.

ტენდერის გზით უკვე შეძენილი სათამაშოების შესყიდვის დოკუმენტაციაში მითითებულია, რომ სათამაშოები ჩინეთშია წარმოებული. სახელმწიფო შესყიდვების ვებგვერდზე სათამაშოების ხარისხის დამადასტურებელი დოკუმენტი ატვირთული არ არის.

„სატენდერო პირობებში გვიწერია, რომ სათამაშოები უნდა იყოს ეკოლოგიურად სუფთა, თუმცა საბოლოოდ მის ხარისხს ბოლომდე ვერ ვაკონტროლებთ“, – გვითხრა ბათუმის ბაღების გაერთიანების ხელმძღვანელმა, მამუკა შამილიშვილმა. მისი თქმით, ტენდერში გამარჯვებული კომპანია ამბობს, რომ მსგავსი დოკუმენტი მან საბაჟოზე წარადგინა. „ჩვენამდე კი ეს დოკუმენტი არ აღწევს“, – ამბობს შამილიშვილი.

„შარშან გადავწყვიტეთ საღებავზე ანალიზის გაკეთება, მივმართე სამხარაულის ბიუროს, სადაც გვითხრეს, რომ ნიმუში უნდა გადაგვეგზავნა თბილისში, იქედან კი გერმანიაში ან შვეიცარიაში გაიგზავნებოდა, რადგან ჩვენს ქვეყანაში მსგავს შემოწმებას ვერცერთი ლაბორატორია ვერ აკეთებს. ეს იყო თვეებში გაწელილი პროცესი და ტენდერის ვადებში ვერანაირად ვერ ჩავჯდებოდით“.

შამილიშვილის თქმით, სათამაშოების შემოწმების ერთადერთი გზა, გარეგნული დათვალიერებაა. „ძირითადად ვამოწმებთ წონის მიხედვით. უხარისხო სათამაშოები არის უფრო მსუბუქი, სუნიც მძაფრი აქვს. კომისია წარმოდგენილ ნიმუშებზე მსჯელობს და რაზეც ვთანხმდებით, შემდეგ ის შემოგვაქვს. სხვანაირად სტანდარტს ვერ ვიჭერთ.“

ბათუმის ბაღების გაერთიანების ხელმძღვანელის აზრით, ხარისხიანი პროდუქციის შემოტანაზე პასუხისმგებლობა სახელმწიფომ უნდა აიღოს, შესაბამისად, საბაჟოზე უნდა შემოწმდეს პროდუქცია ყველა სტანდარტის შესაბამისად, „ასე უფრო დაცულები ვიქნებით“.

შუახევის მუნიციპალიტეტის ბაღების გაერთიანების ხელმძღვანელი ნათელა გოგიტიძე ამბობს, რომ სათამაშოების ხარისხთან დაკავშირებით სახელმწიფოს ჯერ სტანდარტი ოფიციალურად დადებული არ აქვს. „ჩვენ კი ცარიელი ხელებით ვერაფერს შევეჭიდებით“, – გვეუბნება ის. მისი ინფორმაციით, სათამაშოების ყველაზე დიდი რაოდენობა ჩინეთიდან შემოდის და ძალიან რთულია მისი ხარისხი ბოლომდე აკონტროლო.

„მე, პირადად, როცა სატენდერო მოთხოვნები გავართულე, არავინ წამოვიდა ამ მოთხოვნებზე და სამჯერ ჩამივარდა ტენდერი. როცა ტენდერის გარეშე ვყიდულობდი, მაგალითად, 5 ათას ლარად ვიყიდე ხის სათამაშოები, რომლებიც უფრო მეტად ეკოლოგიურია, მაგრამ როცა ტენდერით ხდება შესყიდვა, იქ ხარისხს ვერ ვაკონტროლებთ“.

ნათელა გოგიტიძე ამბობს, რომ ახლახან 13 ათას ლარზე გამოაცხადა ტენდერი, რომლითაც ათი საბავშვო ბაღის მომარაგებას აპირებს სათამაშოებით. „შემომტანს მოვთხოვე ხარისხის დამადასტურებელი სერტიფიკატი. ის მეუბნება, რომ დოკუმენტი საბაჟოზე წარადგინა, თუმცა ჩვენამდე ეს დოკუმენტი არ აღწევს. ვფიქრობ, ხარისხთან დაკავშირებით ყველამ ერთად უნდა ვიზრუნოთ, მათ შორის სახელმწიფომაც“.

ქედის საბავშვო ბაღების გაერთიანების ხელმძღვანელი აიშე თებიძე ამბობს, რომ სათამაშოების შესყიდვის დროს აქცენტს ხის სათამაშოებზე აკეთებს. ძირითადად კი, ქართული წარმოების პროდუქციას ყიდულობს.

„გვაქვს პლასტმასის სათამაშოებიც, მაგრამ ვცდილობთ ცოტა ვიყიდოთ და ხარისხიანი. უფრო მეტად ხის ფაზლებს ვყიდულობთ“, – გვეუბნება ის და დასძენს, რომ 2019 წლისთვის 5 ათასი ლარის ფარგლებში კიდევ აპირებს სათამაშოების შეძენას: „ამჯერადაც ხის სათამაშოები უნდა შევიძინოთ“.

ხელვაჩაურის ბაღების გაერთიანების დირექტორის მოადგილის, ბადრი ირემაძის თქმით, ტენდერით შესყიდულ სათამაშოებს აწერია, რომ დასაშვებია ბავშვებისთვის.

„მძიმე მეტალებს შეიცავს თუ არა არ ვიცით, მაგრამ ეტიკეტზე ხარისხის ნიშანი მითითებული აქვს“.

მისი თქმით, სათამაშოები, ძირითადად, უკრაინაშია წარმოებული. „გაერთიანებაში ჩვენ არ გვაქვს ხარისხის დოკუმენტი, რადგან სათამაშოები ბაღებში ნაწილდება და ალბათ იქ უნდა იყოს წარმოდგენილი დოკუმენტი. ვფიქრობთ, სათამაშოები სახიფათო არ უნდა იყოს“.

რა ხარისხის სათამაშოები შემოაქვთ მომწოდებლებს, ამის შესახებ დეტალურ ინფორმაციას არც ქობულეთის ბაღების გაერთიანებაში ფლობენ. გაერთიანების ხელმძღვანელი ლია ხალვაში ამბობს, რომ სათამაშოები თანხის უქონლობის გამო სამი წელია არ შეუსყიდიათ: „წინა წლებში კი, რაც შევიძინეთ, იმის  ხარისხი არავის შეუმოწმებია. არც სახელმწიფოსგან მიგვიღია მითითება, რომ მოხმარებიდან ამოვიღოთ“.

ლია ხალვაში ამბობს, რომ იმ შემთხვევაში, თუკი 2019 წლის ბიუჯეტში სათამაშოების შესაძენად თანხას გამოუყოფენ, შეეცდება, ეს სათამაშოები ხარისხის დადგენილ სტანდარტს აკმაყოფილებდეს.

საქართველოს სტრატეგიული კვლევებისა და განვითარების ცენტრის“ პროექტის – „მომხმარებელი.გე“-ს ცნობით, თბილისის სათამაშოების მაღაზიებში ათი სახის სათამაშოზე 2016 წელს ჩაატარეს ლაბორატორიული შემოწმება, რომელმაც აჩვენა, რომ სათამაშოებში დასაშვებზე მეტი აღმოჩნდა მავნე ნივთიერება  დი-2-ეთილჰექსილფტალატი, რომელიც საშიშია ბავშვის ჯანმრთელობისთვის. „მომხმარებელი.გე“-ს კოორდინატორის, ვახტანგ კობალაძის თქმით, საბავშვო ბაღებშიც იმავე ხარისხის სათამაშოები შედის, რაც გაყიდვების ქსელშია.

„ქვეყანაში არ არსებობს კანონი, საბაჟო არ არის ვალდებული, რომ სათამაშოების უსაფრთხოება შეამოწმოს, არანაირი ნორმები არ არსებობს უსაფრთხოების… ნორმატიული აქტი განხილვაშიც კი არ არის, პირველადი ვარიანტიც კი არ არის გასაჯაროებული. როგორც გეგმით აქვთ გათვალისწინებული, 2019 წელს უნდა მიიღონ ნორმატიული აქტი, მაგრამ ეს როდის ამოქმედდება, ცალკე თემაა“.

ვახტანგ კობალაძის თქმით, გარანტია არ არსებობს იმ შემთხვევაშიც კი, თუ პროდუქციაზე დატანებულია ევროპული ხარისხის ნიშანდება – CE.

„ჩვენ რაც შევამოწმეთ, ყველა სათამაშოს ჰქონდა ეს ევროპული ნიშანდება, რომელიც სავალდებულოა ევროპის ეკონომიკურ ზონაში სხვადასხვა სახის პროდუქციაზე, მაგრამ შედეგები მაინც ნეგატიური იყო“.

ვახტანგ კობალაძე ამბობს, რომ ტექნიკურ უნივერსიტეტთან არსებობს ლაბორატორია, სადაც შესაძლებელია საღებავებისა და სათამაშოების ხარისხის შემოწმება, თუმცა ლაბორატორია, ჯერჯერობით, აკრედიტებული არ არის.

„ბათუმელებს“ არ გადაუმოწმებია, როგორ კონტროლდება ქვეყნის სხვა რეგიონებისა თუ დედაქალაქის საბავშვო ბაღებში შეტანილი სათამაშოების ხარისხი.

მნიშვნელოვანია, რომ ტყვიას შეიძლება შეიცავდეს არა მარტო სათამაშოები, ჭურჭელიც, განსაკუთრებით კი, ფაიფური. მძიმე მეტალებით, მათ შორის ტყვიით დაბინძურებული სათამაშოები სავალალო შედეგებს იწვევს ბავშვებში.

დასხივების მაღალი დონის შედეგად, ტყვია ზიანს აყენებს ტვინსა და ცენტრალურ ნერვულ სისტემას, რაც კომის, კონვულსიებისა და სიკვდილის მიზეზიც შეიძლება გახდეს. ბავშვებს, რომლებიც ინტოკსიკაციის შემდეგ გადარჩნენ, აზროვნების დაქვეითება და ქცევითი დისფუნქციები აღენიშნებათ.

გამომდინარე იქედან, რომ ბავშვების სისხლში ტყვიის მაღალ შემცველობაზე ბევრი ინფორმაცია ვრცელდება, გაეროს ბავშვთა ფონდმა (UNICEF) დაიწყო საქართველოში მცხოვრებ ათ წლამდე ბავშვებში სისხლის კვლევა, რომლის შედეგებიც 2019 წლისთვის გახდება ცნობილი.

ამავე თემაზე:

https://netgazeti.ge/news/295469/

ქობულეთის შემოვლითი გზის შეკვეთილი-გვარას მონაკვეთის განათებისთვის სახელმწიფო ბიუჯეტიდან 3 373 235 ლარი დაიხარჯება. საქართველოს საავტომობილო გზების დეპარტამენტმა უკვა შეარჩია კომპანია, რომელიც აღნიშნულ სამუშაოებს შეასრულებს. რაც შეეხება ამავე გზის გვარადან ჩაქვი-მახინჯაურის გვირაბამდე მონაკვეთს, მისი განათება, დეპარტამენტის ინფორმაციით, გზის მშენებლობის დროს მიღებული ეკონომიის ხარჯზე დაფინანსდება; შიდა სატენდერო პროცედურები დაწყებულია და კომპანია, რომელიც გზის განათებაზე იმუშავებს, მალე შეირჩევა. ამ მონაკვეთის განათებისთვის საჭირო თანხა დაზუსტებული ჯერ არ არის.

შერჩეულ კომპანიებს, შესაბამისი კონტრაქტის გაფორმების შემდეგ, მიეცემათ ერთთვიანი მოსამზადებელი ვადა, რომლის შემდეგაც დაიწყება სამუშაოები უშუალოდ გზის განათებაზე.

ქობულეთის შემოვლითი გზა დაახლოებით 32 კმ-ია, რომლის პირველი [13 კმ-დე] მონაკვეთი 2014 წელს გაიხსნა, მეორე კი – 2018 წლის ივნისში. არც ერთ მონაკვეთზე განათების სისტემა დღემდე არ არის დამონტაჟებული.

„ახალი მაგისტრალები მთელს სიგრძეზე, ნატახტარიდან რომ დავიწყოთ, თავის დროზე ისე დაპროექტდა, რომ განათება არც ერთ მონაკვეთზე არ იყო გათვალისწინებული და ცალკე, დამატებით კეთდება“, – გვითხრეს დეპარტამენტში.

შსს-ს ინფორმაციით, ქობულეთის შემოვლითი გზის მთლიან მონაკვეთზე მიმდინარე წლის აგვისტოდან ამოქმედებულია „ჭკვიანი“ ვიდეოკამერები და სიჩქარის მზომი სექციური რადარები.

გზის უსაფრთხოების კუთხით განათებასთან და კამერებთან ერთად აუცილებელია ზოლებს შორის გამყოფი ბარიერი, რაც ამ გზაზე არ არსებობს. გზა ორზოლიანია, დაშვებული სიჩქარე კი – 90 კმ/სთ.

„ქობულეთის შემოვლითი გზა როცა პროექტდებოდა, ტექნიკურ-ეკონომიკური მდგომარეობის შესწავლა მოხდა და აზიის განვითარების ბანკში, რომელიც აფინანსებდა ამ მშენებლობას, იქ დამტკიცდა. 2010 წელში, როცა შედგა ეს პროექტი, იმ პერიოდისთვის ინტენსიურობას აკმაყოფილებდა ეს ორზოლიანი გზა და გათვლილი იყო 30 წელზე. ამ პერიოდის გასვლის შემდეგ კი, ისევ უნდა შემდგარიყო ტექნიკურ-ეკონომიკური დასაბუთება და თუ საჭიროება მოითხოვდა, დაპროექტდებოდა დამატებით კიდევ ორზოლიანი გზა. დაპროექტებიდან თითქმის 10 წელი გავიდა და ვიდრე ბათუმის შემოვლითი გზა დასრულდება, შეიძლება კიდევ გაიზომოს და დადგეს საჭიროება დამატებითი ზოლის აშენების. არსებული გზის პროექტი ისეა შედგენილი, რომ გათვალისწინებულია დამატებით კიდევ ორზოლიანი გზის აშენების შესაძლებლობა“, – გვითხრეს საავტომობილო გზების დეპარტამენტში.

ამ ეტაპზე, დეპარტამენტის ინფორმაციით, არც დასაბუთება არის და არც ფინანსები, რათა ქობულეთის შემოვლითი გზა ოთხზოლიან მაგისტრალად გადაკეთდეს.

ქვეყნის მთავრობის გადაწყვეტილებით ოთხზოლიან მაგისტრალად გადაკეთდება ქუთაისის შემოვლითი ორზოლიანი გზა. მიზეზად ამ მონაკვეთზე ხშირი ავარიები დასახელდა, რასაც ათობით ადამიანის სიცოცხლე შეეწირა. ამის გამო, ახალი გზა ცალმხრივი გახადეს. ამჯერად კი, მის პარალელურად, კიდევ ერთი ორზოლიანი გზა აშენდება, რისთვისაც სახელმწიფო ბიუჯეტიდან 200 მილიონზე მეტი ლარი დაიხარჯება.

ავტოსაგზაო შემთხვევები ხდება ქობულეთის შემოვლით გზაზეც, რის შედეგადაც ადამიანები დაშავდნენ. ამ გზაზე ავარიებს რამდენიმე ადამიანიც ემსხვერპლა, მათ შორის ორი მცირეწლოვანი.