აჭარის ტელევიზიაში კრიტიკულად განწყობილი ჟურნალისტების ჩამოშორების შემდეგ სასამართლოში რამდენიმე სარჩელი შევიდა. ეს საქმეები ჯერ არ განუხილავთ და ამის მოლოდინი არც არავის ჰქონია, რადგან პანდემიის პირობებში სასამართლო პროცესების დიდი ნაწილი გადადებულია, ან იგი დისტანციურ რეჟიმში იმართება.
თუმცა სასამართლოს არც ზუსტად ერთი წლის წინ შესული სარჩელი განუხილავს – 2019 წლის 30 აპრილს ბათუმის საქალაქო სასამართლოს სარჩელით აჭარის ტელევიზიის წინა დირექტორმა, ნათია კაპანაძემ მიმართა. ეს საქმე მოსამართლე ჯუმბერ ბეჟანიძეს დააწერეს, თუმცა ჯერ ერთი სხდომაც კი არ ჩატარებულა.
ნათია კაპანაძე 2019 წლის 19 აპრილს იმპიჩმენტის წესით გაათავისუფლეს აჭარის ტელევიზიის დირექტორის თანამდებობიდან. დირექტორის იმპიჩმენტის პროცედურის წამოწყებას წინ უსწრებდა არაერთი საერთაშორისო ორგანიზაციის, უცხო ქვეყნის საელჩოს, ეუთოს სპეცწარმომადგენლების შეშფოთება სარედაქციო პოლიტიკაში გარე ძალების ჩარევაზე, მაგრამ მაშინდელი მრჩევლებისთვის არ შეუშლია ხელი დირექტორის იმპიჩმენტის პროცედურა ბოლომდე მიეყვანა.
იმის გათვალისწინებით, რომ მედია მენეჯერებისა და ჟურნალისტების სავარაუდო დევნის საკითხის განხილვა პრიორიტეტი უნდა იყოს სასამართლოსთვის, „ბათუმელები“ დღეს დაინტერესდა, სარჩელის შეტანიდან ერთი წლის განმავლობაში, რატომ ამბობს უარს სასამართლო განიხილოს „ნათია კაპანაძის საქმე“ ან რატომ ვერ მოახერხა თუნდაც ერთი სხდომის ჩატარება.
„საქმეთა სიმრავლის და მოსამართლის გადატვირთულობის გამო არ მოხდა ამ დრომდე განხილვა. არ ვიცით, როდის განიხილება“, – მოგვწერეს დღეს, 20 მაისს ბათუმის საქალაქო სასამართლოდან.
ეს არაა პირველი შემთხვევა, როცა მოსამართლე ჯუმბერ ბეჟანიძე ანალოგიური მიზეზით აჭიანურებს საქმის განხილვას. ანალოგიური პასუხი „ბათუმელებმა“ 2018 წელსაც მიიღო, როცა „ბათუმში ახალი მეჩეთის აგების საქმეზე“ რამდენიმე თვე არ ტარდებოდა სხდომა.
იმავე პერიოდში მიმართული საქმეების დიდი ნაწილის განხილვა უკვე დასრულებულია. მაგალითად, ბათუმის საქალაქო სასამართლოში უკვე განიხილეს შრომითი დავა – სამსახურიდან გათავისუფლებულმა პირმა სასამართლოს გასული წლის მაისში მიმართა.
