ექსპროპრიაცია ბათუმში ელექტროგადამცემი ხაზის მშენებლობის გამო 

220 კვ ახალი ელექტროგადამცემი ხაზის – „ახალციხე-ბათუმი“ – მშენებლობის გამო ბათუმში ექსპროპრიაციას კიდევ 2 ოჯახის საკუთრება დაექვემდებარა.

საქართველოს ეკონომიკისა და მდგრადი განვითარების მინისტრის, გიორგი გახარიას ბრძანებაში აღნიშნულია: „ახალციხე-ბათუმის“ 220 კვ ელექტროგადამცემი ხაზის მშენებლობის პროექტი ჩაითვალოს აუცილებელი საზოგადოებრივი საჭიროების მქონე პროექტად და სს „საქართველოს სახელმწიფო ელექტროსისტემას“ მიენიჭოს პროექტის ფარგლებში მოქცეულ კერძო საკუთრებაში არსებულ შემდეგ უძრავ ქონებაზე ექსპროპრიაციის უფლება:

  • მესაკუთრე ბადრი ვანაძე, მიწის ნაკვეთი [882 კვ.მ], მდებარე: ქ. ბათუმი, დასახლება ერგე;
  • მესაკუთრე ოთარ ომერაძე, მიწის ნაკვეთი, მდებარე: ქ. ბათუმი, ხიხანის ქუჩა, №2ა [651 კვ.მ და მასზე არსებული შენობა-ნაგებობა]“.

„დასახელებულ პირებს „საქართველოს სახელმწიფო ელექტროსისტემის“ მიერ წერილობით ეცნობათ განსახორციელებელი პროექტის მნიშვნელობის თაობაზე და მიეცათ პროექტისათვის საჭირო მიწის ნაკვეთის ნებაყოფლობით გასხვისების წინადადება, განსახლების გეგმით განსაზღვრული საკომპენსაციო თანხის სანაცვლოდ, რაზედაც მათ უარი განაცხადეს,“ – აღნიშნულია მინისტრის ბრძანებაში.

ახალი ელექტროგადამცემი ხაზის მშენებლობის გამო, დასათმობი ქონების სანაცვლოდ შეთავაზებული საკომპენსაციო თანხის ოდენობას მესაკუთრეები ხშირად აპროტესტებენ, რის გამოც აჭარაში პერიოდულად აქციებიც კი იმართება, ხოლო ექსპროპრიაციას ათობით ოჯახი თუ კერძო საკუთრება დაექვემდებარა.

ამავე თემაზე:

ბათუმში, ტაოსა და ხიხანის ქუჩებზე, ოცამდე მოქალაქეს ქონებას ექსპროპრიაციით ჩამოართმევენ

კერძო საკუთრება, რომელიც ტაოსა და ხიხანის ქუჩებზე უნდა დათმონ [ფოტო]

„საქართველოს სახელმწიფო ელექტროსისტემის“ ხელმძღვანელის ყოველთვიური შემოსავალი 27 971 ლარია 

ექსპროპრიაცია აჭარაში – მესაკუთრეებს მიწის ნაკვეთებსა და სახლს ჩამოართმევენ

ხიხანის ქუჩაზე მცხოვრები: რეალურად შეფასდეს მიწა, მოგებას არ ვითხოვ

 

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com