ტერაბანკის სწრაფი ფულადი გზავნილები რობოტიზაციის ინოვაციური ტექნოლოგიით განხორციელდება

ტერაბანკმა ბიზნესპროცესებში ახალი ტექნოლოგიების დანერგვის კუთხით ინოვაციური ნაბიჯი გადადგა და რობოტიზაციის გამოყენება საქართველოში პირველმა დაიწყო.

ბანკში ციფრული რობოტების დანერგვა BDO Digital-თან პარტნიორობით განხორციელდა და პირველ ეტაპზე ისინი სწრაფ ფულად გზავნილებში ინტეგრირდა. ამჟამად რობოტიზაციის დახმარებით 9 ფულადი გზავნილი ხორციელდება: ტრანზაქციებსა და მათ ავტორიზაციას მთლიანად რობოტები ახორციელებენ, ტერაბანკის თანამშრომლები კი მხოლოდ მონიტორინგის ნაწილში ერთვებიან.

ინოვაციური ტექნოლოგიის დახმარებით, გაუმჯობესდა ბანკის თანამშრომლების დროის მართვა და იმ რუტინის ნაცვლად, რომელსაც უკვე რობოტები ასრულებენ, ისინი საკუთარ რესურსს უფრო სტრატეგიულ საკითხებს უთმობენ. შესაბამისად, გაიზარდა მათი პროდუქტიულობაც. ამავდროულად, სრულად გამოირიცხა მექანიკური შეცდომების ალბათობა და დაიზოგა არა მარტო საბანკო პროცესების წარმართვისთვის, არამედ შეცდომების გამოსწორებისთვის საჭირო დროც.

„გვსურდა, თანამედროვე ტექნოლოგიების გამოყენებით დანახარჯების მნიშვნელოვანი შემცირებისთვის მიგვეღწია, სწორედ ეს იყო BDO Digital-თან თანამშრომლობის მიზანი. უნდა აღინიშნოს, რომ მუშაობის პროცესი რობოტების მეშვეობით, მართლაც, საგრძნობლად დაჩქარდა, დაიზოგა როგორც პროცესისთვის, ისე შეცდომების გამოსწორებისთვის საჭირო დრო. შეგვიძლია ვთქვათ, რომ რობოტები ჩვენი ვირტუალური თანამშრომლები გახდნენ და ყველა განმეორებადი, რუტინული და წესებზე დაფუძნებული საქმე შეითავსეს. ჩვენს თანამშრომლებს კი გამოუთავისუფლდათ დრო და რესურსი, რომელსაც ახლა კომპანიისთვის ბევრად მნიშვნელოვან და საჭირო საქმეს უთმობენ“, – აცხადებს ტერაბანკის ოპერაციული დირექტორი ვახო ხუციშვილი.

აღსანიშნავია, რომ პროექტის საწყის ეტაპზე BDO Digital-მა ტერაბანკის ბექ ოფისის საოპერაციო ნაწილი და რობოტიზაციასთან თავსებადობა დეტალურად შეისწავლა და დიაგნოსტიკის საფუძველზე, ავტომატიზაციის შესაძლებლობებიც განსაზღვრა. შედეგად, გამოვლინდა ის პროცესები, რომლებსაც რობოტიზაცია მნიშვნელოვნად დააჩქარებდა, ადამიანური შეცდომის რისკს გამორიცხავდა და ბანკს ყველაზე მეტ სარგებელს მოუტანდა. BDO Digital-თან პარტნიორობის ფარგლებში,  ტერაბანკი რობოტიზაციის ტექნოლოგიის დანერგვა სხვა ბიზნესპროცესებშიც გეგმავს.

დაწვრილებითი ინფორმაციისთვის ან პროდუქტით სარგებლობისთვის ეწვიეთ ტერაბანკის ბათუმის ფილიალებს მისამართებზე: ჭავჭავაძისა და ლუკა ასათიანის ქუჩების კვეთა, რუსთაველის N10  ან დარეკეთ ნომერზე: 2 55 00 00

შაბათს ოპოზიცია აქციას ბათუმშიც გამართავს

შაბათს, 6 ნოემბერს, ოპოზიცია საპროტესტო აქციას ბათუმშიც გამართავს. აქციაზე შეკრებილები ისევ საქართველოს მესამე პრეზიდენტის – მიხეილ სააკაშვილის გათავისუფლებას მოითხოვენ.

საპროტესტო აქცია ბათუმში აჭარის მთავრობის სახლის წინ გაიმართება, სადაც გასული წლის საპარლამენტო არჩევნების შემდეგ „თავისუფლების კვარტალი“ მოეწყო. აქციას ოპოზიცია ისევ „თავისუფლების კვარტალში“ აანონსებს, თუმცა ამ დროისთვის ოპოზიციის ლიდერებს გადაწყვეტილი არ აქვთ, ექნება თუ არა ამ აქციებს პერმანენტული ხასიათი და გაიშლება თუ არა კარვები.

„გეგმა აქციაზე გაჟღერდება, აქცია იქნება ყველა დიდ ქალაქში,“ – ამბობს რეზო ხარაზი, ბათუმის საკრებულოს წევრი „ნაციონალური მოძრაობიდან“.

აქციის მონაწილეები შაბათს, 5 საათზე შეიკრიბებიან.

მიხეილ სააკაშვილი 35-ე დღეა, რაც შიმშილობს. მისი თანაპარტიელები და მკურნალი ექიმები ამბობენ, რომ მდგომარეობა მძიმდება.

სპეციალური პენიტენციური სამსახური კი აცხადებს, რომ სიმართლეს არ შეესაბამება გავრცელებული ინფორმაცია, თითქოს მე-12 პენიტენციურ დაწესებულებაში ექიმების განსაკუთრებული მობილიზებაა და დაწესებულების მედპერსონალი მსჯავრდებულ მიხეილ სააკაშვილის ჯანმრთელობის მდგომარეობას ვეღარ მართავს.

ამასთან, უწყებაში ადასტურებენ, რომ ციხეში შევიდა “ვივამედის” ანგიოლოგი და დაგეგმილია პულმონოლოგის პრევენციული ხასიათის ვიზიტი.

აღნიშნე ნოვას დაბადების დღე და მიიღე საჩუქრები კომპანიისგან

მეგაცენტრ ნოვას 8 ნოემბერს 15 წელი უსრულდება. სამშენებლო მასალების იმპორტიორი და მწარმოებელი კომპანია ამ თარიღის განსაკუთრებულად აღნიშვნას გეგმავს. მას სურს, რომ მისი დაბადების დღე ისეთივე სასიხარულო გახადოს მომხმარებლებისთვის, როგორიც ეს თავად ნოვასთვისაა. სწორედ ამიტომ, კომპანია 6, 7 და 8 ნოემბერს მეგაცენტრების სამივე ფილიალისა და მისი ონლაინმაღაზიის სტუმრების გულუხვად დასაჩუქრებას გეგმავს.

ნოვას ბორბალი

თუკი ამ სამი დღის განმავლობაში ნოვას თბილისის, ქუთაისისა და ბათუმის მეგაცენტრებს ესტუმრებით, იქ გათამაშების ბორბალი დაგხვდებათ. მასზე დატანილი იქნება გრაფები, რომლებზეც სხვადასხვა ტიპის საჩუქარს ამოიკითხავთ. გათამაშებაში ჩაერთვებიან ის მომხმარებლები, რომლებიც მეგაცენტრებში მინიმუმ 200 ლარის პროდუქციას შეიძენენ. ბორბლის დატრიალების უფლება მათ დღეში მხოლოდ ერთხელ მიეცემათ.

თქვენ შეძლებთ მოიგოთ 50, 100 და, რაც მთავარია, 1000 ლარიანი ვაუჩერები. გაითვალისწინეთ, რომ 1000 ლარიანი მხოლოდ 15 ვაუჩერი გათამაშდება. ასევე, ისრის შესაბამის გრაფაზე გაჩერების შემთხვევაში შეგეძლებათ უკან დაიბრუნოთ დანახარჯი 300 ან 500 ლარამდე.

საჩუქრად, შესაძლოა, ნოვას ყუთი მიიღოთ. მასში კომპანია შეარჩევს და თავს მოუყრის მეგაცენტრებში ხელმისაწვდომ პროდუქტებს. თუკი, ისარი ხელსაწყოების გრაფაზე გაჩერდება, თქვენ Ingco-ს პროფესიონალური ხელსაწყოების სტენდიდან თქვენთვის სასურველი პროდუქცია უსასყიდლოდ გადმოგეცემათ. ისრის DIY ნივთის გრაფაზე შეჩერების შემთხვევაში კი, საჩუქრად ქართულ ხელნაკეთ ნივთს მიიღებთ.

ნოვა სტუმრებს სახალისო თამაშებსაც შესთავაზებს. თუ ისარი გრაფაზე – შეკითხვები ნოვაზე გაჩერდება, თქვენ კომპანიის შესახებ სამ კითხვას დაგისვამენ. თითო სწორ პასუხზე 50 ლარიან ვაუჩერს მიიღებთ, სამივე სწორი პასუხის შემთხვევაში კი, 150 ლარით დასაჩუქრდებით. მართალია, კითხვები რთული არ იქნება, თუმცა, ნოვაზე მეტი ინფორმაციის ინტერნეტსივრცეში წინასწარ მოძიებას მაინც გირჩევთ.

ბოლოს კი, მათ ვისი ისარიც, 15 წამი ნოვაში შეჩერდება, ყველაზე სახალისო თამაში ელის წინ. მან 15 წამის განმავლობაში უნდა მიირბინოს მისთვის სასურველ ნებისმიერ პროდუქტამდე და მისი სალარომდე მიტანაც მოასწროს. ამ შემთხვევაში მას ეს ნივთი უფასოდ გადაეცემა.

გათამაშებისა და პრიზების გარდა, კიდევ უფრო სადღესასწაულო განწყობის შესაქმნელად, ნოვა სტუმრებისთვის სხვა სიურპრიზებსაც ამზადებს.

საჩუქრები ნოვას ონლაინმაღაზიის მომხმარებლებისთვის

ნოვამ საჩუქრები მოუმზადა მათაც, ვინც 6, 7 და 8 ნოემბერს პროდუქციას მისი ონლაინმაღაზიის საშუალებით შეიძენს. კომპანიის მიერ წინასწარ შერჩეული პროდუქტების შეძენისას, მომხმარებლებს დამატებით საჩუქრად გადაეცემათ სხვა ნივთებიც. მაგალითად, ტორშერის შეძენის შემთხვევაში საჩუქრად ჭაღს მიიღებთ, თუკი გათბობის ქვაბს შეიძენთ – საშრობს, ხელსაბანის შემთხვევაში – სარკეს და ა.შ. ამ პროდუქტების სრული ჩამონათვალი 6, 7 და 8 ნოემბერს საიტზე შესულ მომხმარებლებს პირველივე გვერდზე დახვდებათ.

ამასთან ერთად, შეძენილ პროდუქციას ნოვა სასურველ მისამართზე უფასოდ მოგიტანთ. ხოლო თუ თქვენი შენაძენი 100 ლარზე მეტი იქნება, დამატებით სასაჩუქრე ყუთსაც გადმოგცემთ. გამოვლინდება ტოპ სამი შეკვეთაც. ეს ნიშნავს, რომ 200 ლარიან ვაუჩერს მიიღებს ის სამი მომხმარებელი, რომელიც ამ დღეების განმავლობაში ყველზე დიდ შენაძენს გააკეთებს.

გაითვალისწინეთ ისიც, რომ შოურუმებში და ონლაინმაღაზიაზე წარმოდგენილ ყველა პროდუქტზე, სულ მცირე, 15%-იანი ფასდაკლება იმოქმედებს. პროდუქციის ფართო ასორტიმენტზე კი განსაკუთრებული ფასდაკლება გავრცელდება.

ასე, რომ დაესწარით ნოვას სადღესასწაულო დღეებს, ისარგებლეთ კიდევ უფრო შეღავათიანი ფასებით და მიიღეთ ვაუჩერები და საჩუქრები კომპანიისგან.

 

ბაღდათის საკრებულოს 38 წლის ყოფილი წევრი კოვიდით გარდაიცვალა

კორონავირუსით გარდაიცვალა ბაღდათის მუნიციპალიტეტის ბოლო მოწვევის საკრებულოს წევრი, 38 წლის მამუკა გორგოძე.

მუნიციპალიტეტის საკრებულოს პრესსამსახურის ინფორმაციით, მამუკა გორგოძე კორონავირუსს შინ მკურნალობდა, მდგომარეობის დამძიმების შემდეგ ის კლინიკაში გადაიყვანეს, სადაც კორონავირუსის გართულების შედეგად გარდაიცვალა.

ბაღდათის მუნიციპალიტეტის საკრებულოში მამუკა გორგოძე ფრაქცია „ქართული ოცნება-კონსერვატორების“თავმჯდომარე იყო, ხელმძღვანელობდა ეკონომიკური პოლიტიკის, ინფრასტრუქტურისა და ქონების მართვის საკითხთა კომისიას.

2021 წლის თვითმმართველობის არჩევნებზე კი საკრებულოში პარტიიდან – „საქართველოსთვის” იყრიდა კენჭს.

მამუკა გორგოძე ოთხი შვილის მამა იყო.

___

ბოლო 24 საათში კოვიდით საქართველოში 53 ადამიანი დაიღუპა. ამის მიუხედავად, ბოლო 24 საათში ქვეყანაში მხოლოდ 3 569 ადამიანი აიცრა.

აჭარაში კოვიდის 193 ახალი შემთხვევაა | 4 ნოემბერი

4 ნოემბრის მონაცემებით, გასულ 24 საათში აჭარაში 193 ახალი შემთხვევა დადასტურდა.

ამავე პერიოდში რეგიონში 5 ადამიანი გარდაიცვალა კორონავირუსით.

დღეის მონაცემებით, აჭარის კოვიდკლინიკებშია 545 პაციენტი, კოვიდსასტუმროში იმყოფება 230 ინფიცირებული.

4 ნოემბრის მონაცემებით, საქართველოში კოვიდის 5 206 ახალი შემთხვევა დადასტურდა, 53 პაციენტი გარდაიცვალა.

მსოფლიოს საუკეთესო ყველის სტატუსი წელს ანდალუზიურმა თხის ყველმა მიიღო

მსოფლიოს საუკეთესო ყველის სტატუსის 2021 წელს ესპანურმა თხის ყველმა მიიღო, რომელსაც პატარა კომპანია აწარმოებს ანდალუზიაში.

კომპანიას – Quesos&Besos, რომლის მომზადებულმა ყველმა ყველაზე მაღალი შეფასება მიიღო, მხოლოდ ექვსი თანამშრომელი ჰყავს.

მსოფლიოში საუკეთესო ყველი 40 ქვეყანაში მომზადებული ყველის 4079  ნიმუშიდან შეარჩიეს.

მსოფლიოში საუკეთესო ყველის გემო შეადარეს „მინდვრების გემოს გაზაფხულის დღეს“.

World Cheese Awards უკვე 30 წელია იმართება. ღონისძიება შარშან გაუქმდა კოვიდის პანდემიის გამო.

World Cheese Awards

 

„უმამის“ აზიური სამზარეულო უკვე ბათუმშია

აზიური სამზარეულოს აღმოსაჩენად გეპატიჟებით განახლებულ რესტორან-ტერასა „ქლაუდში“.

„გამორჩეული კულინარიული სტილი და ტრადიცია“ – ასე ახასიათებენ აზიურ სამზარეულოს, რომლის მრავალფეროვნებისა და გემოში მოგზაურობის საშუალებასაც ჩვენი ახალი მენიუ მოგცემთ. ზღვისა და მთის ულამაზესი პანორამული ხედები კი დამატებითი სიამოვნებაა აზიური კულინარიის მოყვარულებისთვის.

რადისონ ბლუ ბათუმი
რადისონ ბლუ ბათუმი

„რადისონ ბლუ ბათუმის“ ბოლო სართულზე მდებარე „ქლაუდი“ გამორჩეული ინტერიერით და უკვე აზიური სამზარეულოთი ქალაქის სტუმრებისთვის ერთ-ერთი ყველაზე მიმზიდველი (must visit) ადგილია.

ბენდები კი ცოცხალი შესრულებით ყოველ პარასკევს და შაბათს 20:00 საათიდან იზრუნებენ თქვენი განწყობისთვის.

53 პაციენტი გარდაიცვალა კოვიდით, 5206 ახალი შემთხვევა დადასტურდა

4 ნოემბრის მონაცემებით, საქართველოში დადასტურდა კოვიდის  5 206 ახალი შემთხვევა. ჩატარდა 48 615 ტესტი კორონავირუსზე.

გასულ 24 საათში 53 პაციენტი გარდაიცვალა კოვიდით.

დღეს ქვეყანაში გამოვლენილი ინფიცირების 5 206 ახალი შემთხვევიდან თბილისში გამოვლენილია 1 885 შემთხვევა, აჭარაში – 193, იმერეთში – 979, ქვემო ქართლში – 360, შიდა ქართლში – 428, გურიაში – 142, სამეგრელო – ზემო სვანეთში – 378, კახეთში – 530, მცხეთა-მთიანეთში – 118, სამცხე-ჯავახეთში – 157, რაჭა-ლეჩხუმსა და ქვემო სვანეთში -36.

ამ ეტაპზე ინფიცირების მიმდინარე აქტიური შემთხვევაა 49 619, მათგან 6 648 ადამიანი მკურნალობს საავადმყოფოში.

3 ნოემბრის მდგომარეობით, დადებითობის დღიური მაჩვენებელი არის 10.71%, ბოლო 14 დღის მანძილზე – 9.34% ხოლო 7 დღის მანძილზე – 9.77%.

22 წლის ლერი აბულაძე ხულოდან მეორედ გახდა მსოფლიო ჩემპიონი

ბერძნულ-რომაული სტილით მოჭიდავე, 22 წლის ლერი აბულაძე, მსოფლიო ჩემპიონი გახდა 63 კილოგრამ წონით კატეგორიაში, ბელგრადში გამართულ ჩემპიონატზე. 

2 ნოემბერს ლერიმ ფინალში თურქი სპორტსმენი აჰმეთ იართანი  დაამარცხა, ფინალამდე კი ყაზახ, რუსსა და ირანელ მეტოქეებს სძლია. 

ლერი აბულაძეს „ბათუმელები“ დღეს, 3 ნოემბერს, ესაუბრა. 

„სასტუმროში რომ მოვედი და გავხსენი ტელეფონი, უამრავი შეტყობინება დამხვდა, ალბათ მაინც ოჯახის წევრებმა მომილოცეს პირველად.

როგორც ყველა ჩემპიონის, ასევე ჩემი მიზანია ოლიმპიური ჩემპიონობა. ვეცდები, რომ პარიზში, 2024 წლისთვის მივიღო მონაწილეობა და ჩვენს ქვეყანას ოქროს მედალი მოვუტანო.

ოსლოში, დიდების ფინალში დაძაბული შეხვედრის 5:4 წაგების შემდეგ უფრო მოტივირებული ვიყავი. 23 წლამდელთა შორის უფრო თავდაჯერებული ვიყავი და ლიდერად ვგრძნობდი თავს, ძალიან გამახარა მოგებამ,“ – გვითხრა ლერიმ. 

ლერი აბულაძემ წელს, აპრილში, ევროპის ჩემპიონატზე ბრინჯაოს მედალი მოიპოვა. 

ლერი მსოფლიო ჩემპიონი პირველად 2016 წელს გახდა, ჭაბუკებს შორის. 

მისი მთავარი და მუდმივი გულშემატკივრები მისი მამა და ძმა არიან. „მე და ჩემი ძმა ერთად ვჭიდაობთ, ერთმანეთს სულ მხარში ვუდგავართ და ძალიან ვგულშემატკივრობთ,“ – ამბობს ლერი. 

ლერი აბულაძე სკოლის დასრულებამდე ხულოში ცხოვრობდა და ვარჯიშობდა, დღეს კი თბილისში ცხოვრობს. მისი პირველი მწვრთნელი მამა იყო.

„არც მახსოვს, როდის შევედი ჭიდაობაზე, ასე ვთქვათ, ფეხი ავიდგი დარბაზში. მამაჩემმა მიმიყვანა, ჭიდაობდა და თავის კვალს გავყევი, მწვრთნელია,  მე და ჩემს ძმას ერთად გვავარჯიშებდა,“ – გვიყვება ლერი. 

ლერი სპორტის უნივერსიტეტში, ბიზნესადმინისტრირებაზე მენეჯმენტის განხრით, მესამე კურსზე სწავლობს.  

მთავრობამ სახალხო არტისტებს და მხატვრებს 600-ლარიანი სტიპენდია დაუნიშნა

საქართველოს მთავრობის 2021 წლის 2 ნოემბრის დადგენილებით, სახელმწიფო სტიპენდია დაენიშნებათ:

ოლიმპიური და პარალიმპიური თამაშების ჩემპიონებს, პრიზიორებს, საჭადრაკო ოლიმპიადებში გამარჯვებულებს, მსოფლიოსა და ევროპის ჩემპიონებს, სახალხო არტისტებს, სახალხო მხატვრებსა და შოთა რუსთაველის სახელობის პრემიის ლაურეატებს.

ამავე დადგენილების მიხედვით, სახალხო არტისტებს, სახალხო მხატვრებსა და შოთა რუსთაველის სახელობის პრემიის ლაურეატებს დაენიშნოთ ყოველთვიური სტიპენდია 600 ლარის ოდენობით.

სახალხო არტისტებს ან სახალხო მხატვრებს, რომელთაც იმავდროულად მინიჭებული აქვთ შოთა რუსთაველის სახელობის პრემიის ლაურეატის წოდება, ყოველთვიური სტიპენდიის ოდენობა ორივე წოდებისათვის განესაზღვრებათ ასევე 600 ლარით.

ოლიმპიური და პარაოლიმპიური თამაშებისა და საჭადრაკო ოლიმპიადების პრიზიორებს დაენიშნებათ ყოველთვიური სტიპენდია შემდეგი ოდენობებით:

ვერცხლის მედლის მფლობელებს − 800 ლარი

ბრინჯაოს მედლის მფლობელებს − 500 ლარი

საჭადრაკო ოლიმპიადაში გამარჯვებულს, რომელიც იმავდროულად არის საჭადრაკო ოლიმპიადის პრიზიორი (ვერცხლის ან/და ბრინჯაოს მედლის მფლობელი), ყოველთვიური სტიპენდიის ოდენობა განესაზღვრებათ 2000 ლარის ოდენობით;

საჭადრაკო ოლიმპიადის ვერცხლის მედლის მფლობელებს კი, რომლებიც იმავდროულად საჭადრაკო ოლიმპიადის ბრინჯაოს მედლის მფლობელები არიან, ყოველთვიური სტიპენდიის ოდენობა განესაზღვრებათ 800 ლარის ოდენობით.

ზემოთ ჩამოთვლილი პირების სტიპენდიისათვის საჭირო საბიუჯეტო სახსრები გამოიყოფა საქართველოს კულტურის, სპორტისა და ახალგაზრდობის სამინისტროსათვის წლიური საბიუჯეტო კანონით გათვალისწინებულ ასიგნება­თა ფარგლებში.

2 ნოემბრის ამ დადგენილებას ხელს პრემიერ-მინისტრი ირაკლი ღარიბაშვილი აწერს.

რა არის თავბრუსხვევის მიზეზები და რას ნიშნავს ვერტებრო-ბაზილარული სინდრომი

ვერტიგო ლათინური სიტყვაა და თავბრუსხვევას ნიშნავს. ქრონიკული და მოვლა-გავლითი თავბრუსხვევა მნიშვნელოვნად აქვეითებს ადამიანის ცხოვრების ხარისხს.

ვერტიგო შეიძლება მრავალი სხვადასხვა დაავადების სიმპტომი იყოს. მათ შორის ძალიან ხშირად ეს შეიძლება მიანიშნებდეს ვერტებრო-ბაზილარულ სინდრომზე.

რა დაავადებები იწვევს ვერტიგოს, რა არის ვერტებრო-ბაზილარული სინდრომი, რაც ხშირადაა თავბრუსხვევით გამოხატული, როგორ დგინდება მისი არსებობა და რა კვლევებია ამ დიაგნოზის დასადგენად საჭირო. ვერტებრო-ბაზილარულ სინდრომთან და თავბრუსხვევასთან დაკავშირებულ ამ და სხვა კითხვებზე „ბათუმელებთან“ ექიმი ნევროლოგი ჯამბულ მაკარაძე საუბრობს.

  • ბატონო ჯამბულ, რა არის ვერტებრო-ბაზილარული სინდრომი, რომელიც ხშირადაა თავბრუსხვევის მიზეზი?

ეს არის ხერხემლის არტერიების ან ბაზილარული არტერიის [თავის ტვინის ერთ-ერთი ძირითადი არტერიაა] აუზში სისხლის ცირკულაციის მოშლა და ამითაა გამოწვეული თავბრუსხვევაც. ვერტებრო-ბაზილარული სინდრომი თავად დაავადებას ჰქვია, ხოლო ვერტიგო ანუ თავბრუსხვევა არის სიმპტომი, რომელიც ასევე ამ დაავადების დროსაც შეიძლება გამოვლინდეს და სხვა მრავალი დაავადების მიზეზიც შეიძლება იყოს.

  • რა არის მისი გამომწვევი მიზეზი და რა დაავადებები სდევს თან?

როგორც აღვნიშნე, ეს სისხლძარღვოვანი, ანუ არტერიული მიზეზებით გამოწვეული სინდრომია. მიზეზი ძირითადად არტერიების კედლის შევიწროებაა, როცა სახეზეა ე.წ. ათეროსკლეროზული „ფოლაქები“.

დაავადება ხშირად მაღალწნევიან ადამიანებს უვითარდებათ. არტერიების დაავადება შეიძლება გამოიწვიოს გულიდან ან სხვა დიდი არტერიებიდან წამოსულმა ემბოლმა ან თრომბმა, რომელიც, უხეშად რომ ვთქვათ, შეიძლება გაიჭედოს ვერტებრო-ბაზილარულ სისხლძარღვებში.

სწორედ ამის შემდეგ ყალიბდება თავბრუსხვევა და თავის ტვინის დაზიანების სინდრომები, რაც ზოგჯერ სიცოცხლესთან შეუთავსებელია.

ვერტებრო-ბაზილარული სინდრომი ათეროსკლეროზის შედეგიცაა – მარტივად რომ ვთქვათ, მიზეზად შეიძლება იქცეს ცხიმის დაგროვება არტერიებში. შესაძლებელია მიზეზი იყოს არტერიების სისხლჩაქცევაც ან ამ არტერიის გახეთქვა – რაც უკვე ინსულტია, ინსულტსაც ახასიათებს თავბრუსხვევა ხშირად.

  • რით უნდა მივხვდეთ, რომ ვერტებრო-ბაზილარული სინდრომი გვაქვს, გარდა თავბრუსხვევისა, რა სიმპტომები ახასიათებს ამ დაავადებას?

ვერტებრო-ბაზილარული სინდრომი ეს არის სიმპტომების კრებული. თავბრუსხვევა ერთ-ერთი ძირითადი სიმპტომია.

ადამიანი ამ დროს გრძნობს, რომ ირგვლივ ყველაფერი ტრიალებს, უჭირს წონასწორობის დაცვა. შესაძლებელია ამ დროს მხედველობის პრობლემაც განვითარდეს, ან დავიწროვდეს მხედველობის ველი, ანუ ჩამობნელდეს ჩვენი ხედვის არეალის ნახევარი. ამას ჰემიენოპია ჰქვია.

ვერტებრო-ბაზილარული სინდრომის დროს სმენაც შეიძლება დაკარგოს პაციენტმა. შეიძლება სახის ერთი ან ორივე ნახევარიც დაბუჟდეს, ძნელდება ყლაპვა, იცვლება მეტყველება, შესაძლოა ხელ-ფეხიც კი გაჩერდეს.

ვერტებრო-ბაზილარული სინდრომი იშვიათად, მაგრამ მაინც შესაძლოა იყოს გამოხატული სინკოპეთი, ეს ძალიან საინტერესო სიმპტომია. ადამიანი გონების დაკარგვის გარეშე წყლის წვეთივით მოწყვეტით ეცემა უეცრად, მეორე წუთს კი შეუძლია წამოდგეს და გაიაროს.

  • როგორ იკვლევენ ექიმები თავბრუსხვევის მიზეზს და რა კვლევებია საჭირო ვერტებრო-ბაზილარული სინდრომის დასადგენად?

საწყის ეტაპზე დიაგნოზის დასასმელად ექიმის კვალიფიკაცია და გამოცდილებაა საჭირო. თავბრუსხვევა აუცილებლად ვერტებრო-ბაზილარულ სინდრომს არ ნიშნავს.

უამრავი სხვა მიზეზი აქვს თავბრუსხვევას და უხშირესად გამოწვეულია არა თავის ტვინის დაზიანებით, არამედ შიგნითა ყურის პრობლემებით, რასაც ე.წ. პერიფერიულ თავბრუსხვევასაც უწოდებენ.

ექიმმა უპირველესად უნდა გაარკვიოს ვერტიგო ანუ თავბრუსხვევა ცენტრალური არტერიებითაა გამოწვეული თუ პერიფერიულით. თუ ირკვევა, რომ ეს არის ცენტრალური გენეზისის თავბრუსხვევა, ამ შემთხვევაში საჭიროა ამ არტერიების დოპლეროგრაფიული კვლევა, ანუ ხერხემლისა და ბაზილარული არტერიის კვლევა.

ასევე თავის ტვინის მაგისტრალური, დიდი არტერიების ულტრაბგერითი კვლევა და თუ არის აშკარა პათოლოგია, როგორიცაა, ვთქვათ, დაბუჟება სახის არეში, რა თქმა უნდა, სასურველია ჩატარდეს თავის ტვინის ბირთვული, მაგნიტურ-რეზონანსული კვლევა თავის ტვინის დასათვალიერებლად.

თავის ტვინის დაზიანების კერები ვიზუალური   შემოწმებით შეიძლება ვერც კი გამოიცნოს ექიმმა. კვლევითი ვიზუალიზაცია გვეხმარება სიმპტომების განვითარების პროგნოზირებაში და გართულებების პრევენციაში.

თუ  დადგინდა კვლევით, რომ ეს სინდრომი აქვს ადამიანს, მეორე ეტაპია რისკების შესწავლა: რის გამო ხდება სიმპტომების ჩამოყალიბება, დიაბეტი ხომ არ აქვს პაციენტს, არითმია, ათეროსკლეროზი, უნდა შეიცვალოს უმოძრაო ცხოვრების სტილი და ა.შ.

სამწუხაროდ, ვერტებრო-ბაზილარული სინდრომისას თუ არ იმკურნალა პაციენტმა, გართულების შემთხვევაში ვითარდება თავის ტვინის ინფარქტი ან სისხლჩაქცევა, რის გამოც შეიძლება ყველაფერი ლეტალურად დასრულდეს. შესაძლებელია სინდრომმა მძიმე უნარშეზღუდულობაც გამოიწვიოს. სწორედ ამიტომაა მნიშვნელოვანი რისკების განსაზღვრა.

  • არსებობს თუ არა უწყინარი, თუნდაც ძლიერი თავბრუსხვევა, რასაც შეიძლება არაფერი ედოს საფუძვლად გარდა სტრესისა?

დიახ, თავბრუსხვევა შეიძლება სტრესის დროსაც დაიწყოს და ეს არ არის ვერტებრო-ბაზილარული სინდრომი. უნდა აღვნიშნოთ, რომ თავბრუსხვევის მიზეზებზე საუბრისას არსებობს თავბრუსხვევის კლასიფიკაცია: არის ცენტრალური არტერიების და მისი სტრუქტურების დაზიანება, არის პერიფერიული არტერიების დაზიანებით გამოწვეული ვერტიგო, კერძოდ, შიგნითა ყურიდან პატარა გამტარი გზებია, რომლითაც ვესტიბულური ნერვი უერთდება თავის ტვინს, ამ გზაზე თუ გაჩნდა პრობლემა, იწყება თავბრუსხვევა.

არსებობს ფსიქოგენური წარმოშობის თავბრუსხვევაც, როგორც ზემოთ ვთქვით სტრესის, დაძაბულობის, დეპრესიის, ისტერიის დროს რომ იწყება.

ფსიქოგენური წარმოშობის ვერტიგოს სიტყვასიტყვით ჰქვია კეთილთვისებიანი პაროქსიზმული პოზიციური ვერტიგო.

კეთილთვისებიანი იმიტომ ჰქვია, რომ კეთილი მიმდინარეობა აქვს, ონკოლოგიასთან ამას კავშირი არ აქვს. პაროქსიზმული ნიშნავს, რომ შეტევითია: მოვლა-გავლითია ამ დროს თავბრუსხვევა. პოზიციური ნიშნავს, რომ თავის პოზიციის შეცვლასთან ერთად იწყება ვერტიგო და როგორც კი გახევდება ადამიანი, მალევე ჩერდება თავბრუსხვევა.

  • რა ხდება ფსიქოგენური თავბრუსხვევის დროს ადამიანის ორგანიზმში?

შუა ყურში სამი ნახევარრკალოვანი არხია ერთმანეთის პეროენდიკულარულად განლაგებული. ამ არხებში ენდოლიმფა ცირკულირებს. ზოგჯერ გროვდება მიკროკრისტალები არხებში, მიკრომარილები, ეს ენდოლიმფა ცირკულირებს მუდმივად და აქედან იწყება ზუსტად ჩვენი სივრცეში შეგრძნება დგომის, ჯდომის თუ გადააადგილების. მიკროკრისტალების არსებობა ხელს უშლის ენდოლიმფის თავისუფალ გადაადგილებას და ამ დროს ადამიანს ეწყება თავბრუსხვევა მოძრაობის, გადაადგილებისას, მაგრამ როგორც კი ენდოლიმფა თავისუფლად იწყებს დინებას, მაშინვე ჩერდება თავბრუსხვევა. ასე, რომ ამ ტიპის თავბრუსხვევას არ აქვს საერთო ვერტებრო-ბაზილარულ სინდრომთან და აბსოლუტურად სხვა სპექტრია. როგორც ვახსენეთ, ეს არის კეთილთვისებიანი პაროქსიზმული პოზიციური ვერტიგო.

  • გავრცელებულია მოსაზრება, რომ კეთილთვისებიანი პაროქსიზმული პოზიციური ვერტიგო ძირითადად ქალებისთვისაა დამახასიათებელი, ასეა ნამდვილად?

კი, ასეა. ლიტერატურაშიც ასეა, რომ  შუახნისას, 50 წლის ასაკიდან ეწყებათ ეს სინდრომი ქალებს. მინახავს გაცილებით ახალგაზრდა ასაკშიც, კაცებშიც. პროცენტულად ნამდვილად უფრო ქალებშია გავრცელებული.

  • რა შეიძლება იყოს პრევენცია, ცხოვრების წესი, ვარჯიში, კვება… თუ უკვე აქვს ეს დაავადება ადამიანს, რა ცხოვრების წესია მისთვის რეკომენდებული?

ისევე როგორც უამრავი სხვა დაავადების შემთხვევაში, ამ დროსაც პაციენტი უნდა  ცხოვრობდეს ჯანსაღი ცხოვრების წესით, ანუ ჰიპოდინამია, უმოძრაო ცხოვრების სტილი, სუფრის მარილის ჭარბად მოხმარება, ნახშირწყლების – კერძოდ ამ შემთხვევაში შაქრის ჭარბად მოხმარება, ნიკოტინი – არის ერთ-ერთი ყველაზე გავრცელებული და ვერაგი რისკფაქტორები სისხლძარღვოვანი დაავადებებისა, ქოლესტერინის ცვლა, ქოლესტერინის ცვლის  მოდიფიცირებასა და მის მენეჯმენტში ერთ-ერთი მნიშვნელოვანი არის საკვებში ცხოველური ცხიმის შეზღუდვა, იგულისხმება ქონი და კარაქი. არ იგულისხმება თევზეული, რომელიც პირიქით, კარგია.

რაც შეეხება ვარჯიშს. ეს ისეთი პათოლოგიაა, რომ კისრის ვარჯიში უკუნაჩვენებია: კისრის არტერიები გადის ხერხემალში, კისრის  მკვეთრმა ტრიალმა შეიძლება ისედაც შევიწროებული არტერიები უფრო შეავიწროოს, ხელი შეუწყოს სისხლმომარაგების შეფერხებას და თავის ტვინის ინფარქტის განვითარებას. მკვეთრი მოძრაობები ასეთ შემთხვევაში, წესით, არ შეიძლება. თუმცა ეს არ ნიშნავს, რომ ადამიანმა ზომიერად არ იმოძრაოს, არ ივარჯიშოს, არ იაროს ფეხით.

მეტსაც გეტყვით: ვესტიბულარული დარღვევების მქონე პაციენტებისთვის არსებობს ე.წ. წონასწორობის დამცველი ვარჯიშები. პაციენტი ამას იმისთვის აკეთებს, რომ დაისწავლოს სხეულის კოორდინირებულად მართვა.

სამინისტრო ძველ ბათუმში 1კვ/მ ფართობს 4516 ლარად ყიდის – აუქციონი

ძველ ბათუმში, მაზნიაშვილის ქუჩაზე, 142.6 კვადრატული მეტრი ფართობის შენობას, აჭარის ფინანსთა და ეკონომიკის სამინისტრო პირობებიან აუქციონზე 644 000 ლარად, ანუ 1 კვ/მ-ს დაახლოებით 4516 ლარად ყიდის. ეს ქონების გასაყიდი საწყისი ფასია, ვაჭრობის ბიჯი კი, 15 ათასი ლარია; საგარანტიო თანხა – 150 000 ლარი.

ელექტრონული აუქციონი დაწყებულია და ის 2021 წლის 22 ნოემბერს დასრულდება.

აუქციონში გამარჯვებულს, პირობის მიხედვით, ორი ვალდებულება ექნება;

[checklist]

  • „სარემონტო/სარეკონსტრუქციო/სარესტავრაციო სამუშაოების [როგორც შიდა, ასევე ფასადის] ჩატარება განხორციელდეს ქალაქ ბათუმის მუნიციპალიტეტის მერიასთან შეთანხმებით.
  • აუქციონში გამარჯვებულმა საბოლოო საპრივატიზებო თანხა უნდა გადაიხადოს ელექტრონული აუქციონის დასრულებიდან 30 კალენდარული დღის ვადაში“.

[/checklist]

დოკუმენტების მიხედვით, აღნიშნული ფართობი 2006 წლიდან საქართველოს სახალხო დამცველის აპარატზე იყო გადაცემული უზუფრუქტით. უზუფრუქტის უფლების შეწყვეტის მოთხოვნით კი, აჭარის ფინანსთა და ეკონომიკის სამინისტრომ საჯარო რეესტრს 2021 წლის მარტში მიმართა.

ბათუმში, მაზნიაშვილის ქუჩა 9-ში მდებარე ფართობი, რომელიც აუქციონზე იყიდება / ფოტო აუქციონიდან
ბათუმში, მაზნიაშვილის ქუჩა 9-ში მდებარე ფართობი, რომელიც აუქციონზე იყიდება / ფოტო აუქციონიდან

ჩვენ საკუთარ საფლავს ვთხრით – გაეროს გენერალური მდივანი კლიმატის ცვლილებებზე

„ჩვენ საკუთარ საფლავს ვთხრით“, – გააფრთხილა გაეროს გენერალურმა მდივანმა, ანტონიო გუტერეშმა გლაზგოში გაეროს კლიმატის კონფერენციაზე შეკრებილი მსოფლიო ლიდერები. 

მან ხაზგასმით აღნიშნა, რომ კაცობრიობის დამოკიდებულება წიაღისეული საწვავის მიმართ უბიძგებს მას უფსკრულისკენ. 

„ექვსი წელი პარიზის კლიმატის შეთანხმების ხელმოწერიდან იყო ყველაზე ცხელი ექვსი წელიწადი დაკვირვებათა ისტორიაში,“ –  გუტერეშმა. მისი თქმით, დღეს კაცობრიობა „მკაცრი არჩევანის“ წინაშე დგას – ან შეაჩერებს ამ პროცესს, ან კრიზისი შეაჩერებს სიცოცხლეს პლანეტაზე. 

„საკმარისია ბიომრავალფეროვნების დაზიანება, საკმარისია საკუთარი თავის მოკვლა ნახშირბადის გამონაბოლქვით, საკმარისია ბუნებასთან ისე მოპყრობა, როგორც უნიტაზთან,  საკმარისია წვა, ბურღვა და სულ უფრო და უფრო ღრმად თხრა. ჩვენ თვითონ ვუთხრით საფლავს საკუთარ თავს“, – განაცხადა გაეროს ხელმძღვანელმა.

ანტონიო გუტერეშმა ხაზი გაუსვა, რომ ზღვის დონე ორჯერ უფრო სწრაფად იზრდება, ვიდრე 30 წლის წინ, ოკეანეები უფრო სწრაფად თბება და ამაზონის ტროპიკული ტყეების ნაწილი ატმოსფეროში უფრო მეტ ნახშირბადს გამოყოფენ, ვიდრე შთანთქავენ. 

„თუ მოუსმენთ ბოლო განცხადებებს კლიმატის ცვლილებასთან დაკავშირებით მიღებული ზომების შესახებ, შეიძლება ისე ჩანდეს, რომ ჩვენ სიტუაციის შეცვლის გზაზე ვართ. ეს ილუზიაა. ბოლო ანგარიში აჩვენებს, რომ ვალდებულებების შესრულების მიუხედავად, მსოფლიო უწინდებურად განწირულია ტემპერატურის კატასტროფული – 2,7- გრადუსიანი მატებისთვის“ – განაცხადა ანტონიო გუტერეშმა. 

იგი ამბობს, რომ მხარს უჭერს კლიმატის დასაცავად შექმნილ შეუჩერებელ აქტივისტთა ჯგუფს, რომელსაც ახალგაზრდობა ხელმძღვანელობს: „მათი რიცხვი სულ უფრო და უფრო იზრდება. მათი ხმები სულ უფრო ძლიერდება და გარწმუნებთ, უკან არ დაიხევენ. მე მათ მხარს ვუჭერ.“

 

პატიმრობა ყოფილი ცოლის ცემისთვის – “6 წელია დაშორებული ვართ”

პროკურატურის ინფორმაციით, სასამართლომ დამნაშავედ სცნო ახალგაზრდა კაცი, რომელმაც 2021 წლის 17 მაისს, ყოფილი ცოლი ფიზიკურად და სიტყვიერად შეურაცხყო. დაზარალებული ჰყვება, რომ მაისში თბილისში თავის მეგობარ გოგოსთან ერთად იმყოფებოდა, როცა ყოფილმა ქმარმა დაურეკა და შეხვედრა სთხოვა.

“17 მაისს მოხდა ზუსტად, ბათუმიდან ჩავედი შეყვარებულთან და კიდევ ერთ მეგობართან ერთად. ჩემი ყოფილი ქმარი დამიკავშირდა და გადავწყვიტეთ გველაპარაკა. შევხვდით სამივე სადგურის ტერიტორიაზე, სადაც შეკამათებისას ჩემკენ წამოიწია, რამდენჯერმე დამარტყა, ჩემი დახრჩობაც სცადა, ძალადობის კვალიც მეტყობოდა. სიტყვიერი შეურაცხყოფაც მოგვაყენა, დაგვემუქრა მოკვლით მეც, ჩემს მეგობარ გოგოსაც.

ითხოვდა, რომ ისევ მასთან ვყოფილიყავი, შენ ისევ ჩემი ცოლი ხარო, ისევ ჩემთან ერთად უნდა იყო ან მოგკლავ და თავსაც მოვიკლავო. ექვსი წელია დაშორებული ვართ.

დამემუქრა ბათუმში ჩამოვალ და შვილს წაგართმევო. ბავშვს მისი გვარიც კი არ აქვს დაბადების მოწმობაში, ამის სურვილი თავად არ გამოუჩენია. სულ ხუთჯერ ჰყავს ბავშვი ნანახი,” – ჰყვება დაზარალებული. – “იმ წუთში დასახმარებლად ვერავის მივმართე, მერე უკვე ბავშვზე იმუქრებოდა, ბათუმში აპირებდა ჩამოსვლას. გამოვიქეცი ბათუმში და აქ სათემო ორგანიზაციას, იდენტობა იუსს დავუკავშირდი, საიდანაც გამყვნენ საიაში, იქიდან კი საჩივარი თბილისში გადააგზავნეს, რადგან იქ მოხდა შემთხვევა”.

პროკურატურის ინფორმაციით, 25 წლის კაცი დამნაშავედ სცნეს სისხლის სამართლის კოდექსის 126′-1 და 11′-151-2დ მუხლებით, რაც ნიშნავს ოჯახში ძალადობას და მუქარას ოჯახის წევრის მიმართ.

ახალგაზრდა კაცს დანაშაულთა ერთობლიობით განესაზღვრა ერთი წლითა და ექვსი თვით თავისუფლების აღკვეთა.

თითქმის კარდაკარის მეთოდია საჭირო ვაქცინაციისთვის – აჭარის ჯანდაცვის მინისტრი

კოვიდზე აცრილთა რაოდენობა ბათუმში მოზრდილი მოსახლეობის 60%-ს შეადგენს, თუმცა აჭარის სხვა მუნიციპალიტეტებსა და სოფლებში ვაქცინირებულთა პროცენტული რაოდენობა ამდენივე არ არის.

აჭარის ჯანდაცვის სამინისტროს ცნობით, მთლიანად აჭარაში 2 დოზით აცრილია მოსახლეობის 29.1%, ერთი დოზით – 32.3%.

რა უშლის ხელს ვაქცინაციის პროცესს აჭარის სოფლებში, რა ტიპის სამუშაოებს ეწევა ჯანდაცვის სამინისტრო აცრის ტემპის დასაჩქარებლად და რა ელის რეგიონს, თუ ვაქცინაციის ტემპი არ აჩქარდება? – კოვიდვაქცინაციასთან დაკავშირებულ ამ და სხვა კითხვებზე „ბათუმელები”  აჭარის ჯანდაცვის მინისტრს ნინო ნიჟარაძეს ესაუბრა.

  • თქვენ ამბობთ, რომ ინფიცირებისა და სიკვდილიანობის კლებადი დინამიკა აჭარაში უკავშირდება რეგიონში ვაქცინაციის მაღალ მონაცემებს. აგვიხსენით, სხვა რეგიონებისგან განსხვავებული რა ვითარება გვაქვს აჭარაში?

ეპიდემიოლოგიურად სტაბილური ვითარებაა აჭარაში. 4%-ის ფარგლებში მერყეობს ჩვენი დაინფიცირების მაჩვენებელი.

ეს ციფრები ცვალებადია კვირის განმავლობაში. მართალია, ბათუმში მოზრდილი მოსახლეობის 60% აცრილია, მაგრამ ეს ზღვარი უკვე აღარ მიიჩნევა საუკეთესო მაჩვენებლად.

როცა ვაქცინაციის ეროვნული გეგმა შემუშავდა, მაშინ მოსახლეობის 60%-ის აცრა იყო სასურველი მაჩვენებელი, მაგრამ ახლა ამ ციფრმა 80%-მდე აიწია.

ჩვენ სხვა ქვეყნების მონაცემებს ვეყრდნობით, როცა ვამბობთ, რომ მინიმუმ 60% მაინც უნდა იყოს აცრილთა რაოდენობა. საქმე ისაა, რომ სადაც მოზრდილი მოსახლეობის 60% იყო აცრილი, იქ ავადობის შემდგომი ტალღები კარგად წარიმართა და ვაქცინაციის სასურველი ზღვარი ახლა ასწიეს – ხალხის მეტ რაოდენობას ცრიან.

მოსახლეობის 60%-ის აცრა დაინფიცირების შემდგომი ტალღების წარმოქმნისგან ვერ გვიცავს.  მუნიციპალიტეტებში ბათუმის მსგავსად 60%-იანი აცრისთვის არ მიგვიღწევია.

  • მოზრდილი მოსახლეობის აცრილი ნაწილის 60% ბათუმზე მოდის. გამოდის, აჭარაში იმუნიზაციის მაღალი მაჩვენებელიც ამის ხარჯზეა მაღალი. რამდენი ადამიანი აიცრა, მაგალითად, აჭარის მთის სოფლებში – თუ გაქვთ დათვლილი, აჭარის აცრილი მოსახლეობის რა პროცენტი მოდის ბათუმზე და რა – მუნიციპალიტეტებზე?

ახლა მიდის ინტენსიური მუშაობა იმის აღსაწერად და დასადგენად, ადგილობრივ მცხოვრებ მოქალაქეებს შორის ვინ არის აცრილი და ვინ არა. ბათუმში ვაქცინირებულთა შორის გვყავს მუნიციპალიტეტებიდან ჩამოსული მოსახლეობაც, რომლებიც აჭარის მუნიციპალიტეტებსა და სოფლებში ცხოვრობენ, იქ არიან რეგისტრირებულები, უბრალოდ, ბათუმში აიცრნენ.

ყველაზე ცოტა, აჭარის სხვადასხვა მუნიციპალიტეტიდან, სოფლებიდან, 20% მაინც არის აცრილი ბათუმში. 2 თვეა დავიწყეთ მუნიციპალიტეტებსა და სოფლებში ვიზიტები მოსახლეობასთან შესახვედრად, ვაქცინაციის პროცესზე დასაკვირვებლად და პროცესის ფართოდ დასანერგად.

ქედის ყველა სოფელში, მაგალითად, საკმაოდ მაღალია ვაქცინირებულთა რაოდენობა, ჩვენი ხედვა ასეთია, რომ თითოეულმა სოფლის ექიმმა უნდა იცოდეს თავის სოფელში რამდენი ადამიანი დარჩა ასაცრელი და ახლა ამ სიების იდენტიფიცირებაზე მუშაობენ.

  • რა ტიპის პრობლემებს აწყდებით მუნიციპალიტეტებში ვაქცინაციის დროს? დეზინფორმაცია არის ხელშემშლელი ფაქტორი სოფლებში მოსახლეობის აცრისას?

განსაკუთრებული პრობლემები, ისეთი, რაც არ გვხვდება ქალაქში, არ გვხვდება არც სოფლებში.

ვაქცინაციის საწყის ეტაპზე აიცრა ყველა მსურველი, მაგრამ ახლა აუცრელია მოსახლეობის ის ნაწილი, ვისაც ვაქცინაციის მიმართ მკვეთრად ნეგატიური დამოკიდებულება აქვს, მათთვის მეტი ინფორმაციის მიწოდებაა საჭირო.

მათთან მუშაობისას დიდი როლი აქვს ოჯახის ექიმს, რადგან სწორედ ოჯახის ექიმს აქვს ნდობა და ავტორიტეტი სოფელში. სამინისტრო კოორდინაციას უწევს თითოეული სოფლის და თემის დონეზე თვითმმართველობების სამსახურებთან ამ მუშაობას.

ძალიან აქტიურად მუშაობენ ხულოში სოფლის ექიმები, გუშინ, მაგალითად, ვიმუშავეთ ჩაქვის ტერიტორიაზე, ხალისა და ჩაისუბნის ტერიტორიაზე და ექიმებთან ერთად შევადგინეთ უბნებზე გასვლის გეგმა-გრაფიკი.

თითქმის კარდაკარის მეთოდია საჭირო ვაქცინაციის სასურველი ზღვარის მისაღწევად.

  • როგორ მოხერხდა ბათუმში მოზრდილი მოსახლეობის 60%-ის აცრა? თქვენი აზრით, რამ იქონია ყველაზე მეტად გავლენა ბათუმელებზე?

დრამატულად წარიმართა აჭარაში თავიდან პროცესები. ინფიცირებისა და სიკვდილიანობის მაღალმა მაჩვენებელმა იმოქმედა. გაიზარდა აცრის მსურველთა რაოდენობა. ქალაქში თითქმის ყველას ნათესავი, მეზობელი ან მეგობარი აღმოჩნდა დაავადებულებს და გარდაცვლილებს შორის.

ზოგადად, აჭარაში, საქართველოს სხვა მუნიციპალიტეტებთან შედარებით, ყოველთვის მაღალი იყო იმუნიზაციის მაჩვენებელი, რასაც დაავადებათა კონტროლის ეროვნული ცენტრიც აღნიშნავდა ყოველთვის, ვგულისხმობ ბავშვთა გეგმიურ იმუნიზაციას.

უნდა ვთქვათ, რომ პირველადი ჯანდაცვის სექტორი ამ თვალსაზრისით კარგად იყო მობილიზებული და დიდი გამოცდილება აქვთ სოფლისა თუ ქალაქის ექიმებს იმუნიზაციის პროცესის წარმართვის.

  • როგორც ვიცით, აჭარაში ყოველდღიურად კოვიდით გარდაცვლილებს შორის არიან არამხოლოდ აჭარის, არამედ სხვა რეგიონების მცხოვრებლებიც. ეს ნამდვილად ასეა?

ჩვენ საკმაოდ დიდი საწოლფონდი გვაქვს, ამიტომ კატასტროფის სამსახურს სხვა რეგიონებიდანაც გადმოჰყავს ჩვენთან ჰოსპიტალიზაციის საჭიროების მქონე პაციენტები. ეს მაშინ ხდება, როცა ჩვენს მეზობელ რეგიონებში იმატებს ინფიცირების მაჩვენებელი და ცხადია, დგება ლეტალური შედეგებიც.

დიახ, აჭარაში კოვიდით ყოველდღიურად გარდაცვლილთა შორის არიან მეზობელი რეგიონებიდანაც და არამხოლოდ ბათუმიდან.

  • მოსალოდნელია თუ არა აჭარაში ინფიცირების შემთხვევებისა და სიკვდილიანობის ზრდა, თუ ვაქცინაციის ტემპი არ გაიზარდა რეგიონში?

ჩვენი გათვლებით სიტუაცია დრამატულად არ უნდა განვითარდეს აჭარაში, თუ ვაქცინაციის ამ ტემპით წავალთ, ხოლო თუ ცოტა კიდევ გაიზრდება ეს ტემპი, რა თქმა უნდა, შენარჩუნდება ის სიტუაცია, რაც გვაქვს.

ბუსტერზეც დაიწყო მუშაობა, ვინც უკვე გაიკეთა ვაქცინის 2 დოზა, განსაკუთრებით რისკჯგუფებზეა საუბარი, მათ აქვთ დამატებითი დოზების მიღების საშუალებაც.

აცრა აუცილებელია მათთვისაც, ვინც უკვე გადაიტანა კოვიდი. ხშირად მოგვმართავენ ამ კითხვით და ჩვენ ყველას ვეუბნებით, რომ აუცილებელია ვაქცინაცია მყარი იმუნიტეტისთვის მაშინაც კი, როცა კოვიდი უკვე გადატანილი გაქვთ.

ვაქცინაცია, საინფორმაციო შეხვედრები – ყველაფერი ერთად მუშაობს და ვფიქრობთ, რომ ვაქცინაციის ეს მაჩვენებელი რაც ახლა გვაქვს აჭარაში, ცუდი არ არის, ყოველ შემთხვევაში, სიტუაციის სამომავლო დრამატიზებისგან დაგვიცავს.

  • ფაქტია, რომ აცრის მსურველთა რიცხვი აჭარის სოფლებში არ არის მაღალი. რა კეთდება აცრის ტემპის დასაჩქარებლად, რა გეგმა გაქვთ ამ მხრივ?

სოფლად ჩვენი სტრატეგია ეხება არამხოლოდ სოფლების ამბულატორიებს, არამედ თითოეულ თემს, თემის სამედიცინო პუნქტს და უბანს. სოფლის ექიმი შესაბამისი პროტოკოლით გათვალისწინებული ყველა წესის დაცვით თვითმმართველობის და ჯანდაცვის სამინისტროს წარმომადგენელთან ერთად აწყობს შეხვედრებს მოსახლეობასთან.

ამის პარალელურად სოფლის ექიმი თავის ტერიტორიაზე აუცრელ მოსახლეობას აღნუსხავს და მათ მიაკითხავს ან გამოიძახებს სრულად ინფორმირებისთვის.

ქალაქში პერიოდულად სამიზნე ჯგუფებს ვხვდებით, სადაც კამპანიას ვატარებთ. ლექციის, საუბრის შემდეგ მიგვყავს ამცრელი ბრიგადა და პარალელურ რეჟიმში ვაქცინაციის შესაძლებლობა ადგილზევე ეძლევათ ადამიანებს.

შეიძლება მომართვიანობა დიდი არ იყოს და ერთი საუბრის შემდეგ მხოლოდ 20 ან 22 მსურველი აიცრას, მაგრამ პანდემიის დროს თითოეულ აცრას აქვს მნიშვნელობა.

  • რამდენად ეფექტურია სოფლის ამბულატორიების მუშაობა რეალურად?  რამდენად მოიცავს მათი მუშაობა ვაქცინაციაზე თემთან საუბრებს, ამომწურავი ინფორმაციის გაცემას?

როცა ვსაუბრობთ პირველადი ჯანდაცვისა და ამბულატორიის ჩართულობის მნიშვნელობაზე ვაქცინაციის პროცესში, აქ პირველ რიგში ვგულისხმობთ სოფლის ექიმის წარმოებულ კამპანიას, როგორც თავშივე აღვნიშნე, სოფლის ექიმი დიდი ავტორიტეტია თავის თემში და მის რჩევას დიდი მნიშვნელობა აქვს.

ჩვენი სოფლის ექიმები კოვიდსასტუმროებში იყვნენ დასაქმებულები. მათ რეალურად ნახეს, თუ რა გამოიარა აჭარის სამედიცინო სისტემამ და რა გადაიტანეს პაციენტებმა, ამ გამოცდილებას ისინი სოფლის მოსახლეობას უზიარებენ და არწმუნებენ ვაქცინაციის აუცილებლობაში.

წარჩინებული მოსწავლეებისთვის ლეპტოპებს ყიდულობენ – ბიუჯეტიდან 23 მილიონი გამოიყო

9 000 წარჩინებული მოსწავლისთვის გადასაცემი ლეპტოპების შესაძენად სახელმწიფო ბიუჯეტში 23 265 000 ლარია გათვალისწინებული. ლეპტოპების შესაძენად საგანმანთლებლო და სამეცნიერო ინფრასტრუქტურის განვითარების სააგენტომ ტენდერი უკვე გამოაცხადა.

ტენდერში გამარჯვებულმა სააგენტოს ლეპტოპები ხელშეკრულების გაფორმებიდან 8 თვეში უნდა მიაწოდოს. ტენდერში წინადადებების მიღება კი, 2021 წლის 28 ნოემბერს დაიწყება და ხუთ დღეში, 3 დეკემბერს დასრულდება.

„საგანმანათლებლო და სამეცნიერო ინფრასტრუქტურის განვითარების სააგენტო, პროგრამის – „ჩემი პირველი კომპიუტერი“ ფარგლებში, 2020 და 2021 წლის წარჩინებულ მოსწავლეებს, რომლებმაც დაასრულეს საბაზო საფეხური და რომელთა საფეხურის ნიშანია 10 ქულა [დამრგვალების გარეშე], გადასცემს პორტაბელურ კომპიუტერებს.

2019/2020 სასწავლო წლის ბენეფიციარების რაოდენობა 4 461 მოსწავლეა.

გამომდინარე იქედან, რომ პერიოდულად ემატებიან მოსწავლეები, რომლებმაც ეროვნული სასწავლო გეგმის შესაბამისად დადგენილ ვადებში აიმაღლეს წლიური შეფასება და მათი საფეხურის ნიშანია 10 ქულა [დამრგვალების გარეშე], 2019‐2020 წლის წარჩინებული მოსწავლეებისათვის სააგენტოს სჭირდება 4500 ცალი პორტაბელური კომპიუტერი.

ვინაიდან, გლობალური პანდემიის გამო 2020 წელს ვერ მოხერხდა წარჩინებული მოსწავლეებისათვის გადასაცემი კომპიუტერების შესყიდვა, საქართველოს განათლებისა და მეცნიერების სამინისტროს გადაწყვეტილებით, ამ მოსწავლეებსაც 2021 წელს დააჯილდოებენ.

რაც შეეხება 2020‐2021 სასწავლო წლის წარჩინებულ მოსწავლეებს, მათი რაოდენობა სტატისტიკიდან გამომდინარე, სავარაუდოდ, შეადგენს 4 385 ბენეფიციარს“, – აღნიშნულია დოკუმენტებში.

„წარჩინებული მოსწავლეებისთვის ლეპტოპების გადაცემა მოსწავლეთა წახალისების გარდა ატარებს სოციალურ ხასიათს და ამ ღონისძიების მიმართ საზოგადოების ინტერესი დიდია. აღნიშნულს ადასტურებს ის გარემოებაც, რომ სააგენტოში არ წყდება მომართვიანობა, თუ როდის მოხდება წარჩინებულ მოსწავლეთა დაჯილდოება ლეპტოპებით,“ – მიიჩნევენ საგანმანათლებლო და სამეცნიერო ინფრასტრუქტურის განვითარების სააგენტოში.

სატენდერო დოკუმენტების მიხედვით, ლეპტოპების შესასყიდი სავარაუდო თანხის დასადგენად სააგენტომ ბაზრის კვლევა ჩაატარა. ლეპტოპების ჩვეულებრივი და არა კონსოლიდირებული ტენდერით შესყიდვაზე თანხმობა კი, სააგენტოს საქართველოს მთავრობამ მისცა.

ამავე თემაზე:

4 460 მოსწავლეს დაპირებული კომპიუტერი არ მიუღია, 6 ათასზე მეტს კი – ოქროს მედალი

 

კუთხემოხეული ბიულეტენის ამბავი – რა ჩანს ცესკოს ვიდეოში

ბათუმის საოლქო-საარჩევნო კომისიამ არ დააკმაყოფილა საჩივარი, რომლითაც საია ყუაგადახეული ბიულეტენის გაბათილებას ასაჩივრებდა, ამ ბიულეტენში არჩევანი ბათუმის მერობის გაერთიანებული ოპოზიციის კანდიდატის სასარგებლოდ იყო გაკეთებული. ბიულეტენი 50-ე საუბნო-საარჩევნო კომისიამ მხოლოდ იმის გამო გააბათილა, რომ მას კიდე ჰქონდა მოხეული.

79-ე ოლქში საჩივრის განხილვისას საუბნო კომისიის თავმჯდომარეს ტელეფონით დაუკავშირდნენ. ამ ბიულეტენის პრობლემურობაზე საუბრისას მან განმარტა, რომ ბიულეტენი ყუთში კონვერტის გარეშე იყო მოთავსებული.

ეს ცესკოს ვებგვერდზე ატვირთული ვიდეოჩანაწერით არ დასტურდება.

რა ჩანს ცესკოს კადრებში

„დარღვეულია მთლიანობა, გადახეულია ყუა და თარიღი არ ჩანს, მე ოლქში დავრეკე და კომისიამ გადაწყვიტოსო. ხელი აწიოს ყველამ“, –  ასე პასუხობს ბათუმის 50-ე საუბნო-საარჩევნო კომისიის თავმჯდომარე, ქეთევან მოქია ხმების დათვლის დროს დამკვირვებლის პრეტენზიას, რომელიც ყუაგადახეული ბიულეტენის გაბათილებას აპროტესტებს. ეს ყველაფერი კარგად ჩანს/ისმის ვიდეოკადრებში, რომელიც ცენტრალური საარჩევნო კომისიის ვებგვერდზეა ატვირთული.

კადრების მიხედვით, ბიულეტენი, სადაც ამომრჩევლის არჩევანი გაერთიანებული ოპოზიციის მერობის კანდიდატის, გიორგი კირთაძის სასარგებლოდ იყო გაკეთებული, კომისიამ იმის გამო გააბათილა, რომ ყუა მოხეული ჰქონდა – კონკრეტულად ის ნაწილი, სადაც ბიულეტენს თარიღი და „მეორე ტური“ აწერია.

სხვა რაიმე მიზეზი, რის გამოც ეს ბიულეტენი შეიძლებოდა გაბათილებულიყო, საკითხის განხილვისას კომისიის არც ერთ წევრს და არც თავმჯდომარეს, ხმების დათვლის დროს, არ უხსენებია.

„მეორე ტური და თარიღი არის წაშლილი, ვისაც გინდა ჰკითხე… გამიყვანე დასახვრეტად“,  – ისმის ვიდეოში დამკვირვებლის ხმა.

დამკვირვებელი „ლელა“ კი თავმჯდომარეს ეუბნება: „ვიდავებ ამ ხმის გამო“.

სხვა დამკვირვებელი მას ეუბნება: „იდავე ლელა, რომ გაგიხსნან „ვაფშე“ გაგიუქმებენ, იმიტომ, რომ არაა სწორი.“

ამ კამათისას არავის უხსენებია, რომ ბიულეტენი კონვერტის გარეშე იყო ყუთში მოთავსებული.

რა და რა მოტივით გადაწყვიტა 79-ე საოლქო კომისიამ

ოლქში შესული საიას საჩივრის განხილვისას, კომისიის თავმჯდომარემ საოლქო კომისიას უთხრა, რომ ამ კონკრეტულ ბიულეტენს ორი პრობლემა ჰქონდა – ყუა ჰქონდა გადახეული და კონვერტის გარეშე იყო ყუთში მოთავსებული, რაც მისი ბათილობის ერთ-ერთი საფუძველია.

მომჩივანი მხარე, საქართველოს ახალგაზრდა იურისტთა ასოციაციის წარმომადგენელი, ოლქის წევრებს უხსნიდა, რომ მსგავსი პრეტენზია ხმების დათვლის დროს მათ დამკვირვებელს არ დაუფიქსირებია. ამის მიუხედავად, საუბნო კომისიის თავმჯდომარის ინფორმაცია უტყუარად მიიჩნია საოლქო კომისიამ  და დაადგინა, რომ ბიულეტენი კანონიერად არის გაუქმებული.

საოლქო კომისიის თავმჯდომარემ, ციალა შავაძემ, გამოაცხადა, რომ საჩივარი უსაფუძვლობის გამო არ დააკმაყოფილეს.

50-ე უბნის კომისიის თავმჯდომარემ, ქეთევან მოქიამ, „ბათუმელებთან“ სატელეფონო საუბარში განმარტებისას აღიარა, რომ თავად არ დაუნახავს, ნამდვილად იყო თუ არა ეს კონკრეტული ბიულეტენი ყუთში კონვერტის გარეშე მოთავსებული.

„გოგოებმა მითხრეს“, – გვითხრა მან.

„იმ წუთას არ ვუყურებდი, მაგ დროს ტელეფონზე მირეკავდნენ და ზურგით ვიყავი. გოგოებმა ნახეს, რომლებმაც ამის დაფიქსირება ვერ გაბედეს. ვერც კი ვთქვით, ვერ მოვასწარითო, როცა მთვლელმა თქვა, რომ დაზიანებული იყო, ეგრევე ყურადღება მიექცა მაგას, რომ მოხეული იყო ყური, ატყდა ხმაური და  იმდენად იყო გადატანილი ყურდღება დაზიანებაზე, ბავშვებმა კი თქვეს მერე, ვერ გაბედეს“, – უთხრა დღეს, 3 ნოემბერს, ქეთევან მოქიამ „ბათუმელებს“.

გუშინ ბათუმის 79-ე საოლქო კომისია არ დაელოდა ცესკოს ვიდეოს ატვირთვას და ისე გადაწყვიტა დაეჯერებინა არა საიას წარმომადგენლისთვის, არამედ უბნის თავმჯდომარისთვის. შესაბამისად, „ბათუმელები“ დღეს ოლქის თავმჯდომარეს, ციალა შავაძეს, ცესკოს მიერ გავრცელებული კადრების შესაფასებლად დაუკავშირდა. ციალა შავაძემ გვითხრა, რომ ჯერ კადრები უნდა ნახოს და ამის შემდეგ იმსჯელებს კომისიის დისციპლინალურ პასუხისმგებლობაზე: „ ჯერ კადრები უნდა ვნახოთ და ამის შემდეგ გაგიკეთებთ კომენტარს.“

79-ე საოლქო-საარჩევო კომისიამ 2 ნოემბერს არასამთავრობო ორგანიზაციების 20 საჩივარი განიხილა.

დღეს ოლქი პოლიტიკური პარტიების საჩივრების განხილვას იწყებს.

___

წინასწარი მონაცემებით, 30 ოქტომბრის ბათუმის მერის მეორე ტურის არჩევნებზე ოპოზიციის კანდიდატ გიორგი კირთაძეს სახელისუფლო კანდიდატმა არჩილ ჩიქოვანმა 1 526 ხმით მოუგო.

ბათუმის 79-ე ოლქში ამ არჩევნებზე 2017 ბიულეტენი გააუქმეს.

___

დამატებითი შეზღუდვები არ იგეგმება – ჯანდაცვის მინისტრის მოადგილე

საქართველოს ჯანდაცვის მინისტრის მოადგილის, თამარ გაბუნიას განცხადებით, მიუხედავად კორონავირუსის ახალი შემთხვევების გაზრდილი სტატისტიკისა, საქართველოს მთავრობა არ განიხილავს დამატებითი შეზღუდვების დაწესებას.

„ამ ეტაპზე დამატებითი შეზღუდვების დაწესება, დღევანდელი მდგომარეობით, არ იგეგმება, მაგრამ ის შეზღუდვები და რეგულაციები, რომლებიც უკვე დაწესებულია, აუცილებლად უნდა აღსრულდეს, რადგან თუ არ მოხდა იმის აღსრულება, რაც უკვე დაწესებულია, აბსოლუტურად აზრს მოკლებულია დამატებითი შეზღუდვების დაწესება,“ – თქვა თამარ გაბუნიამ დღეს, 3 ნოემბერს.

მისივე თქმით, ჯერჯერობით ჯანდაცვის სისტემა ახერხებს პაციენტთა ნაკადის მართვას:

„ჯერჯერობით ნაკადების მართვა კლინიკებში ხერხდება, თუმცა იმატებს რეანიმაციაში პაციენტთა რაოდენობა, 350-ს გადააჭარბა უკვე ამ დილის მდგომარეობით. ჯერჯერობით შესაძლებელია საველე ჰოსპიტლების გარეშე. ვფიქრობთ, მომდევნო რამდენიმე დღე ჩვენ გვექნება შესაძლებლობა, იმართოს პაციენტთა ნაკადები,“ – აღნიშნა თამარ გაბუნიამ.

დღევანდელი, 3 ნოემბრის მონაცემებით, საქართველოში 6024 ახალი შემთხვევა დადასტურდა, გარდაიცვალა 49 პაციენტი.

 

ბოსტნეული 43%-ით გაძვირდა, ზეთი 31.6 პროცენტით | საქსტატი 

საქართველოს სტატისტიკის ეროვნული სამსახურის მონაცემებით, ბოლო ერთი წლის განმავლობაში ფასები მნიშვნელოვნად გაიზარდა საკვებ პროდუქტებზე.

საანგარიშო პერიოდში ფასები მომატებულია შემდეგ ქვეჯგუფებზე:

    • ბოსტნეული და ბაღჩეული (43.0 პროცენტი),
    • ზეთი და ცხიმი (31.6 პროცენტი),
    • პური და პურპროდუქტები (19.4 პროცენტი),
    • რძე, ყველი და კვერცხი (18.2 პროცენტი),
    • შაქარი, ჯემი და სხვა ტკბილეული (18.0 პროცენტი),
    • თევზეული (16.0 პროცენტი),
    • მინერალური და წყაროს წყალი, უალკოჰოლო სასმელები და ნატურალური წვენები (13.0 პროცენტი),
    • ხორცი და ხორცის პროდუქტები (11.2 პროცენტი),
    • ხილი და ყურძენი (9.3 პროცენტი),
    • ყავა, ჩაი და კაკაო (6.4 პროცენტი);

ტრანსპორტის ჯგუფში ფასები გაიზარდა 19.6 პროცენტით, კომუნალური ხარჯები და სახლის მოვლა გაძვირდა 11.9 პროცენტით, ჯანმრთელობის დაცვა – 8.4 პროცენტით.

რაც შეეხება პურის ფასს, 11 ოქტომბრის მდგომარეობით, საქართველოში პურის ფასი საშუალოდ 10-15 თეთრით გაიზარდა.

ბათუმში ღამით იწვიმებს, უახლოს დღეებში კი უნალექო ამინდი იქნება

აჭარის რეგიონული ჰიდრომეტეოროლოგიური ობსერვატორიის ინფორმაციით, 3 ნოემბრის 21 საათიდან 4 ნოემბრის 21 საათამდე აჭარაში მოსალოდნელია ცვალებადი მოღრუბლულობა, ღამით ზოგან მცირე წვიმა, დღისით უმეტესად უნალექოდ.

იქროლებს ცვალებადი მიმართულების ქარი 8-13 მეტრი წამში.

ჰაერის ტემპერატურა სანაპირო და შიდამთიან რაიონებში იქნება:

  • დღისით: 17 – 23 გრადუსი
  • ღამით: 10 – 15 გრადუსი

მაღალ მთაში მოსალოდნელია:

  • დღისით: 8-13 გრადუსი
  • ღამით: 0-5 გრადუსი

სინოპტიკოსების ცნობით, მომდევნო 2 დღეს, 5-6 ნოემბერს, მოსალოდნელია უმეტესად უნალექო ამინდი.

6 გარდაცვლილი და კოვიდის 229 ახალი შემთხვევა აჭარაში- 3 ნოემბერი

ბოლო 24 საათში აჭარაში კორონავირუსის 229 ახალი შემთხვევა დადასტურდა, გარდაიცვალა 6 პაციენტი.

აჭარის ჯანდაცვის სამინისტროს ინფორმაციით, ამ დროისთვის კოვიდკლინიკებში მკურნალობს 512 ადამიანი, კოვიდსასტუმროებში – 202, ხოლო ონლაინკლინიკაში – 857 პაციენტი.

ქვეყნის მასშტაბით დღეს, 3 ნოემბერს, კორონავირუსის 6024 ახალი შემთხვევა დაფიქსირდა.

კოვიდის 6024 ახალი შემთხვევა, გარდაიცვალა 49 პაციენტი – 3 ნოემბერი

ბოლო 24 საათის განმავლობაში,  საქართველოში კორონავირუსის 6024 ახალი შემთხვევა დადასტურდა, გარდაიცვალა 49 პაციენტი.

17 აგვისტოს შემდეგ, როდესაც ინფიცირების 6 208 შემთხვევა იყო ქვეყანაში, მსგავსი მაღალი მაჩვენებელი დღეს პირველად დაფიქსირდა.

ამის მიუხედავად ქვეყანაში ბოლო 24 საათის განმავლობაში მხოლოდ 3 868 ადამიანი აიცრა.

stopcov.ge-ის ინფორმაციით, გამოჯანმრთელდა 3818 ადამიანი.

აჭარის რეგიონში დაფიქსირდა 229 ახალი შემთხვევა.

ხელოვნური სუნთქვის აპარატზე იმყოფება 337 პირი, მათგან თბილისში – 183, აჭარაში – 40, იმერეთში – 33.

___

ევროპის პატარა ქვეყნებს შორის საქართველოში კოვიდით ყველაზე მეტი ადამიანი დაიღუპა

რა მოხდა ბათუმში არჩევნების მეორე ტურზე – შეფასება

„ჩვენ წაგვერთვა არჩევანის უფლება. მე, როგორც მოქალაქე, შეურაცხყოფილი ვარ ამ არჩევნებით,“ – ამბობს ნათია აფხაზავა, „სამოქალაქო საზოგადოების ინსტიტუტის“ ბათუმის ორგანიზაციის ხელმძღვანელი. მას და სამოქალაქო ორგანიზაციის სხვა წარმომადგენლებს ვკითხეთ: რა მოხდა ბათუმში არჩევნების მეორე ტურზე, თუკი პირველ ტურზე სახელისუფლებო კანდიდატზე მეტი ხმა ენმ-ს მერობის კანდიდატმა – გიორგი კირთაძემ დააგროვა და საკრებულოში მანდატების უმრავლესობა ოპოზიციამ მოიპოვა?

ნათია აფხაზავას დაკვირვებით, მმართველმა პოლიტიკურმა ძალამ მეორე ტურზე მაქსიმალური მობილიზების გზას მიმართა და დემოკრატიული არჩვენების პრინციპებს კიდევ უფრო მეტად დაშორდა, ოპოზიციამ კი, იგივე არ გააკეთა.

„ან ოპოზიციამ არჩია, რომ „ოცნების“ გზით არ წასულიყო, რადგან ეს იქნებოდა ერთგვარი ზეწოლა…

გამოჩნდა, რომ რადიკალიზაცია კიდევ უფრო მეტად გაღრმავდა. კატეგორიული ტონი მიუთითებს, რომ ჩვენ წაგვერთვა არჩევანის უფლება, რადგან რეალურად თვითმმართველობაზე და მის განვითარებაზე კი არ იყო საუბარი, არამედ ორ პარტიას შორის დაპირისპირებასა და ჯიბრზე… მე, როგორც მოქალაქე, ვარ შეურაცხყოფილი, რადგან ერთგვარი მსხვერპლი ვართ მოქალაქეები ამ პოლიტიკური თამაშის. მერამდენე არჩევნებია და საარჩევნო კულტურა პოლიტიკურმა პარტიებმა ვერ მიიღეს. ვერ მივაღწიეთ თანაბარ, სოლიდარულ, ურთიერთპატივისცემაზე ორიენტირებულ არჩევნებს“, – მიიჩნევს ნათია აფხაზავა.

ნათია აფხაზავა თვლის, რომ „ქართულმა ოცნებამ“ ძირითადად ადმინისტრაციული რესურსის გამოყენებით და საჯარო მოხელეებზე ზეწოლით მიაღწია ამ შედეგს. გარდა იმისა, რომ არსებობს არაერთი საჩივარი დარღვევებზე და კითხვის ნიშნები არჩევნების მითვისებაზე.

„გამიგია, რომ ურეკავდნენ იმას, ვინც ბათუმშია რეგისტრირებული და არ იყო ქალაქში. ეუბნებოდნენ, რომ აუცილებლად უნდა ყოფილიყო ბათუმში… ხელისუფლებამ საჯარო მოხელეების და მათთან დაკავშირებული პირების მაქსიმალური ჩართვით მიიღო ეს შედეგი და ეს არ იყო თანაბარ გარემოში ჩატარებული არჩევნები. როგორც ამ ხელისუფლების, ასევე წინა ხელისუფლების პირობებში საჯარო მოხელეები ყოველთვის იყო ქცეული ინსტრუმენტად ხელისუფლების ხელში სამწუხაროდ,“ – გვითხრა ნათია აფხაზავამ.

„4 საჩივარი გვაქვს დაწერილი მხოლოდ ბათილი ბიულეტენების სიმრავლის გამო და ვითხოვთ ხმების ხელახლა გადათვლას,“ – ამბობს პაატა დიასამიძე, „ახალგაზრდა იურისტთა ასოციაციის“ აჭარის ფილიალის ხელმძღვანელი. საია-მ არჩევნების დღეს 6 საჩივარი დაწერა, შემაჯამებელი ოქმების დაწერის შემდეგ კი, 7 საჩივარი დაამატა.

„შევისწავლეთ შემაჯამებელი ოქმები და იმ უბნებზე მოვითხოვეთ შემაჯამებელი ოქმის ბათილად ცნობა, შესაბამისად, ხმების ხელახლა გადათვლა, სადაც ბათილი ბიულეტენების რაოდენობა ძალიან მაღალია და ეს ბადებს ეჭვებს,“ – ამბობს პაატა დიასამიძე და შენიშნავს, რომ, მაგალითად, ბათუმის მე-3 უბანზე გააბათილეს 38 ბიულეტენი, რაც ამ უბანზე მისული ამომრჩევლების 6.1 პროცენტია.

„მე-10 უბანზეც 38 ბიულეტენი გაბათილდა და ეს არჩევნებზე მისული ამომრჩევლების 4.1 პროცენტია, ხოლო 34-ე უბანზე ბათილია 33 ბიულეტენი, რაც ამომრჩევლების 4.7 პროცენტია. 53-ე უბანზეც 4.6 პროცენტი გაბათილდა,“ – მონაცემებს გვაცნობს საია-ს აჭარის ფილიალი ხელმძღვანელი პაატა დიასამიძე და კიდევ ერთ საჩივარს გვაცნობს, რაც ასევე ბიულეტენები გაბათილების პრობლემას ეხება – ბათუმის 50-ე უბანზე კომისიამ ბათილად მიიჩნია ბიულეტენი, სადაც ამომრჩევლის ნება მკაფიოდ არის გამოხატული, რეგისტრატორს ბეჭედიც აქვს დასმული და ხელმოწერაც. ერთადერთი პრობლემაა ბიულეტენის დაზიანებული კუთხეა, სადაც თარიღი სრულყოფილად არ იკითხება.

ეს ბიულეტენი საარჩევნო კომისიამ ბათილად მიიჩნია

პაატა დიასამიძე ყურადღებას ამახვილებს კიდევ ერთ დეტალზე – როგორც ჟურნალისტებს, ისე საია-ს დამკვირვებლებს უზღუდავდნენ მეორე ტურზე ფოტოგადაღებას.

„ერთი საჩივარი ამის გამო დავწერეთ 89-ე უბანზე,“ – გვიყვება პაატა დიასამიძე. – „ჩვენმა დამკვირვებელმა დააფიქსირა, რომ სავარაუდოდ სადეზინფექციო სითხე გამოიყენეს მარკირების სითხის ნაცვლად და ამის დაფიქსირება უნდოდა ფოტოგადაღებისთვის განკუთვნილი ადგილიდან, მაგრამ ამის შესაძლებლობა არ მისცეს,“ – გვითხრა პაატა დიასამიძემ.

საია-ს საჩივრებში კიდევ ერთი საინტერესო საჩივარია, რომელიც ამომრჩევლის ნების კონტროლს ასახავს – ეს ბათუმის 91-ე საარჩევნო უბანზე დაწერილი საჩივარია.

„აქ კომისიის თავმჯდომარემ დაახლოებით საღამოს 6 საათზე რეგისტრატორებს დაავალა, რომ მონაცემები ეთქვათ, ვინ არ მივიდა არჩევნებზე. ეს აჩენს ეჭვს, რომ შესაძლოა ამზადებდნენ იმათ სიას, ვინც არ მივიდა არჩევნებზე და შემდეგ უზრუნველეყოთ მათი მიყვანა. ეს აჩვენებს პრობლემას სავარაუდოდ ამომრჩევლის ნების კონტროლის კუთხით,“ – დასძინა პაატა დიასამიძემ.

დაფიქსირდა ბალანსის პრობლემაც – მაგალითად, მე-16 უბანზე ერთით მეტობა დაფიქსირდა შემაჯამებელ ოქმში.

„საგულისხმოა, რა რეაგირებას მოახდენს ამ დარღვევებზე საოლქო საარჩევნო კომისია. ამის შემდეგ შესაძლებელია სრულყოფილი სურათის დანახვა,“ – მიიჩნევს საია-ს აჭარის ფილიალის თავმჯდომარე პაატა დიასამიძე.

„შეიძლება ითქვას, რომ მუდმივად იარსებებს კითხვის ნიშანი არჩევნების გაყალბებაზე, რადგან ის, ვინც ვალდებულია გაარკვიოს, რა მოხდა და ჰქონდა თუ არა გაყალბებას ადგილი, საზოგადოება ნაკლებად ენდობა, ეს იქნება საოლქო კომისია, თუ სასამართლო,“ – ამბობს ასლან ჭანიძე, „თავისუფალ ჟურნალისტთა სახლის“ ხელმძღვანელი.

ასლან ჭანიძე ხელისუფლებას ურჩევს ყველა საჩივარი ადეკვატურად განიხილოს საარჩევნო ადმინისტრაციამ და არ გაღრმავდეს ეჭვი არჩევნების ლეგიტიმურად ჩატარებაზე.

„მაგალითად, ეუთო ოდირის დასკვნის მიხედვით, ზეგავლენა ხდებოდა ამომრჩევლის ნებაზე, რაც ყველაზე საგანგაშოა. პირდაპირ ვერ იტყვიან, რომ გაყალბდა, რადგან არსებობს დიპლომატიური ენა, მაგრამ ნათქვამია, რომ ყველა ის მექანიზმი გამოიყენეს, რამაც გავლენა მოახდინა ამომრჩევლის ნებაზე.

ჩემი აზრით, წააგო ამომრჩეველმა, რომელსაც სულ ექნება ეჭვი, რომ არჩევანი წაართვეს,“ – ამბობს ასლან ჭანიძე.

ევროპის პატარა ქვეყნებს შორის საქართველოში კოვიდით ყველაზე მეტი ადამიანი დაიღუპა

პანდემიის დაწყებიდან დღემდე მსოფლიოში 5 მილიონზე მეტი ადამიანი დაიღუპა კორონავირუსით. სიკვდილიანობის მაჩვენებლით მსოფლიოში პირველ ადგილზე კვლავ შეერთებული შტატებია (767 436), შემდეგ ბრაზილია (607 954), ინდოეთი (458 470), მექსიკა (288 464) და რუსეთი (240 871).

საქართველო ამ სიაში 223 -დან 56-ე ადგილზეა, თუმცა სამხრეთ კავკასიის რეგიონსა და იმ ქვეყნების ჩამონათვალში, რომელთა მოსახლეობაც საქართველოს მსგავსად, რამდენიმე მილიონია, საქართველო პირველ ადგილზეა.

ასე გამოიყურება კოვიდით გარდაცვალების მაჩვენებელი საქართველოსა და ევროპის პატარა ქვეყნებში:

ამავე ქვეყნებთან შედარებით საქართველო კოვიდით ინფიცირების მაჩვენებლითაც პირველ ადგილზეა:

_____________________________

წყარო: ჯონს ჰოპკინსის უნივერსიტეტი, worldometers და მსოფლიო ბანკი.

ლაო ჯინ ჯაოს სახლი საპარტნიორო ფონდს საკუთრებაში გადაეცა

ლაო ჯინ ჯაოს ისტორიული სახლი ჩაქვში საპარტნიორო ფონდის საკუთრებაში გადავიდა, შესაბამისი ცვლილება საჯარო რეესტრში 2021 წლის აგვისტოშია დაფიქსირებული. საპარტნიორო ფონდს ეკუთვნის ამ სახლთან დაკავშირებული 1379 კვ.მეტრი მიწის ნაკვეთიც.

შენობას კულტურული მემკვიდრეობის ძეგლის სტატუსი აქვს და ამ დრომდე ის აჭარის ფინანსთა და ეკონომიკის სამინიტროს საკუთრება იყო.

სამინისტროს ეს სახლი გასულ წლებში კონკრეტულ კომპანიაზეც ჰქონდა გადაცემული, რომელმაც ვალდებულებები ვერ შეასრულა, ამიტომაც ქონება სამინისტროს ბალანსზე დაბრუნდა.

ლაო ჯინ ჯაოს სახლი ქობულეთის მუნიციპალიტეტის ტერიტორიაზე, დაბა ჩაქვში, ზღვისპირას დგას. შენობა 348,20 კვ.მ. -ია.

ამ სახლში, ნინოშვილის #12-ში, ჩინელი მეწარმე, ლაო ჯინ ჯაო მე-20 საუკუნის 10-20-იან წლებში ცხოვრობდა. წლების წინ აქ მუზეუმის გახსნის იდეაც  განიხილებოდა.

იმის გათვალისწინებით, რომ შენობას ძეგლის სტატუსი აქვს, ლაო ჯინ ჯაოს სახლში სამშენებლო სამუშაოების წარმოების შემთხვევაში, პროექტი აჭარის კულტურული მემკვიდრეობის სააგენტომ უნდა შეითანხმოს და შესაბამისი ნებართვაც გასცეს.

სააგენტოს დირექტორის მოვალეობის შემსრულებლის, ოლეგ ბოლქვაძის ინფორმაციით, ამ დროისთვის სააგენტოს არანაირი ნებართვა ჩაქვში, ნინოშვილის #12-ში მდებარე ძეგლთან დაკავშირებით გაცემული არ აქვს.

საპარტნიორო ფონდს ქობულეთში დარეგისტრირებული აქვს ასევე 70 073 კვ.მ. მიწის ნაკვეთი ქობულეთის შემოსასვლელში, მდინარე ჩოლოქთან ახლოს, პლაჟსა და საავტომობილო მაგისტრალს შორის. აღნიშნული ნაკვეთი ბოლო წლებში ყაზახურ კომპანია „ყაზმუნაიგაზ-სერვისის“ საკუთრებაში იყო.

ამ თემაზე დეტალურად წაიკითხეთ აქ:

გასაყიდი მიწები აჭარის სანაპიროზე, სადაც შესაძლოა სასტუმროები აშენდეს

 

 

ბათუმში მთავრობის სახლთან ოპოზიციის აქცია იმართება | LIVE

დღეს, 2 ნოემბერს, ბათუმში, აჭარის მთავრობის სახლთან, 17 საათზე დაიწყო ოპოზიციის აქცია, რომლის ორგანიზატორი „ერთიანი ნაციონალური მოძრაობაა“.

დღეს ბათუმში იმყოფება ენმ-ის ლიდერი ნიკა მელია, რომელიც აქციაში მიიღებს მონაწილეობას.

აქცია მიმდინარეობს სლოგანით – „არა გაყალბებულ არჩევნებს“, „თავისუფლება მიშას“.

აჭარის მთავრობის სახლთან მობილიზებულია პოლიცია.

ბათუმში აქციით ოპოზიცია იწყებს აქციების სერიას საქართველოს ქალაქებში. ბოლო აქცია თბილისში გაიმართება.

აქციების პარალელურად, ოპოზიცია აპირებს ოლქებსა და შემდეგ სასამართლოებში გაასაჩივროს ყველა საარჩევნო დარღვევა.

ოპოზიცია არ აღიარებს ადგილობრივი თვითმმართველობის არჩევნების შედეგს, რადგან მიიჩნევს, რომ „ქართულმა ოცნებამ“ ის გააყალბა. არჩევნების შედეგების მიხედვით, 64 ქალაქიდან და მუნიციპალიტეტიდან მერის არჩევნებში 63 ოლქი მოიგო მმართველმა პარტიამ და მხოლოდ წალენჯიხაში მოიგო ენმ-ის კანდიდატმა.

ბოიკოტის რეჟიმში გადასვლას წინ უნდა უძღოდეს საერთო ოპოზიციური განხილვები – ნაკაიძე

პარლამენტის დამოუკიდებელი პედუტატი ტარიელ ნაკაიძე ოპოზიციის წევრების მხრიდან პარლამენტის დატოვებაზე თავის მოსაზრებას ავრცელებს. დეპუტატის თქმით, თუ ოპოზიცია მიიღებს გადაწყვეტილებას, რომ გადავიდეს ბოიკოტის რეჟიმში, ამას წინ უნდა უძღოდეს საერთო ოპოზიციური განხილვები, რათა შეფასდეს რისკები და ყველა შესაძლო სცენარი.

„ჩვენ ვიმყოფებით ბრძოლაში ივანიშვილის ავტორიტარული რეჟიმის წინააღმდეგ. შეუძლებლად მესახება, ამ ბრძოლაში წარმატებას მივაღწიოთ კოორდინირებული მუშაობისა და გააზრებული ნაბიჯების ერთობლივად გადადგმის გარეშე.

მამუკა ხაზარაძის მიერ დემონსტრაციაზე მანდატის დატოვების შესახებ განცხადება და თუნდაც შემდეგ ნაციონალური მოძრაობის ზოგიერთი წევრის პარლამენტის წევრობის დატოვებასთან დაკავშირებით განცხადება, პირველ რიგში, არის მათი პირადი გადაწყვეტილება, მაგრამ ამგვარი გადაწყვეტილების ამ ფორმით მიღება საერთო ოპოზიციურ ბრძოლას არათუ არ წაადგება, არამედ, დააზიანებს კიდეც.

თუ ვიღებთ გადაწყვეტილებას, რომ გადავიდეთ ბოიკოტის რეჟიმში, ან რაიმე შედეგს გვაძლევს პარლამენტის დატოვება, ამას წინ უნდა უძღოდეს საერთო ოპოზიციური განხილვები, რისკების შეფასება და ყველა შესაძლო სცენარის გააზრება. ამ ბრძოლაში არ აქვს მნიშვნელობა, ვინ წარმოადგენს დიდ პოლიტიკურ ძალას და ვინ – პატარას. თუ ვსაუბრობთ შედეგებზე დაფუძნებულ თანამშრომლობაზე, მაშინ ყველას აზრი თანაბრად უნდა იმსახურებდეს ყურადღებას“, – ამბობს ტარიელ ნაკაიძე.

მისი თქმით, დაგეგმილია საკონსტიტუციო ცვლილებები, რომლის მიხედვითაც, შემდგომი საპარლამენტო არჩევნები უნდა ჩატარდეს არა 5%-იანი, არამედ დაბალი ბარიერით. ამის პირობა „ქართულმა ოცნებამ“ შარლ მიშელის დოკუმენტის ანულირების შემდეგ კვლავ დადო. თუმცა ოპოზიციონერების მიერ პარლამენტის დატოვებას ხელისუფლება იმისთვის გამოიყენებს, რომ ბარიერი არ დაწიოს და ეს ოპოზიციას გადააბრალოს.

„აქ საკითხი არ ეხება იმას, თუ რამდენად ვენდობით ივანიშვილის მარიონეტების პირობას, ისევე როგორც მრავალ მოქალაქეს, მეც მაქვს საფუძვლიანი მოლოდინი, რომ „ოცნება“ აქაც შეეცდება საკითხის ჩაგდებას და მისთვის საკეთილდღეოდ შეტრიალებას, მაგრამ ამჟამად მანდატების დატოვება და საკონსტიტუციო ცვლილებებისთვის საჭირო 113 დეპუტატის ფიზიკურად არარსებობა პარლამენტში, „ქართულ ოცნებას“ აძლევს საფუძველს, რომ საკონსტიტუციო ცვლილებების ჩავარდნა მთლიანად ოპოზიციას გადააბრალოს.

5%-იანი ბარიერის დაწევის ჩავარდნა ნიშნავს იმას, რომ არსებული პოლიტიკური პოლარიზაცია, სამომავლოდ, კიდევ უფრო გაღრმავდება, რადგან პარლამენტში შესვლას, ორი პარტიის გარდა, ძალიან რთულად ან საერთოდ ვერ მოახერხებს ვერცერთი პოლიტიკური ძალა.

მნიშვნელოვანია, შემდგომ სესიებზე, დაველოდოთ „ქართული ოცნების“ გადაწყვეტილებას, კენჭს უყრიან თუ არა საკონსტიტუციო ცვლილებებს და შემდგომ მივიღოთ გააზრებული გადაწყვეტილება საპარლამენტო ცხოვრების გაგრძელება/არ გაგრძელებასთან დაკავშირებით“.

____

ხუთმა ოპოზიციონერმა დეპუტატმა – მამუკა ხაზარაძემ, ლევან ვარშალომიძემ, ნონა მამულაშვილმა, ანა წითლიძემ, ზურა გირჩი ჯაფარიძემ განაცხადეს, რომ ტოვებენ საპარლამენტო მანდატებს.  ფრაქცია „ლელო – პარტნიორობა საქართველოსთვის“ კი პარლამენტს ბოიკოტს უცხადებს.

რა კავშირშია ხორცის ჭამა კიბოს განვითარების რისკთან?

კიბო მსოფლიოში სიკვდილის მეორე წამყვანი მიზეზია. მის გამომწვევ მიზეზებზე საუბრისას პირველ რიგში თამბაქოს, აზბესტისა და ულტრაიისფერი გამოსხივების ზეგავლენა სახელდება, შემდეგ მოდის ქრონიკული ინფექციების წვლილი, თუმცა უკვე წლებია სულ უფრო და უფრო იზრდება კიბოს გამომწვევ მიზეზებში ცხოვრების წესთან დაკავშირებული ფაქტორების, კერძოდ დიეტის, ფიზიკური აქტივობისა და ალკოჰოლის მოხმარების როლის აღიარება.

კიბოს კვლევის საერთაშორისო სააგენტო ერთ-ერთ ანგარიშში წერს იმის შესახებ, რომ ხორცის მოხმარებისა და კიბოს რისკზე ჩატარებული ეპიდემიოლოგიური კვლევები ადასტურებს კავშირის არსებობას მსხვილი და სწორი ნაწლავის კიბოს რისკის ზრდასთან.

ჯანმოს მიხედვით, დამუშავებული ხორცი კლასიფიცირდება, როგორც პირველი ჯგუფის კანცეროგენი (კიბოს გამომწვევი), რაც მიუთითებს დამუშავებული ხორცის გამოყენების კიბოსთან კავშირზე. წითელი ხორცი კლასიფიცირებულია როგორც ჯგუფი 2A კანცეროგენი, რაც იმას ნიშნავს, რომ ის სავარაუდოდ იწვევს კიბოს.

კიბოს კონტროლის პოლიტიკაზე მომუშავე წამყვანი ავსტრალიური ორგანიზაცია Cancer Council-ი წერს, რომ წითელ და დამუშავებულ ხორცში არის გარკვეული ქიმიკატები – როგორც დამატებული, ასევე ბუნებრივი წარმოშობის – რაც იწვევს ამ საკვების კანცეროგენობას.

„მაგალითად, როდესაც წითელ ხორცში შემავალი ქიმიკატი ჰემი იშლება ნაწლავში, წარმოიქმნება N-nitroso ქიმიკატები და აღმოჩენილია, რომ ისინი აზიანებენ ნაწლავის ფენის უჯრედებს, რამაც შეიძლება გამოიწვიოს ნაწლავის კიბო.

იგივე ქიმიკატები წარმოიქმნება დამუშავებული ხორცის მონელების დროსაც.

გარდა ამისა, კონსერვანტები, რომლებიც გამოიყენება დამუშავებული ხორცის კონსერვირებისთვის, წარმოქმნიან ამ N-nitroso ქიმიკატებს და შეიძლება გამოიწვიონ ნაწლავის კიბო“ – აღნიშნულია კვლევაში. 

ჯანმო წერს, 10 კვლევის მონაცემების ანალიზმა დაადგინა, რომ დამუშავებული ხორცის 50 გრამის ოდენობით ყოველდღიური მიღება ზრდის მსხვილი და სწორი ნაწლავის კიბოს რისკს დაახლოებით 18%-ით. ხოლო წითელი ხორცის 100-გრამიანი ულუფის ყოველდღიური მოხმარების შემთხვევაში ვარაუდობენ, რომ კოლორექტალური კიბოს რისკი შეიძლება გაიზარდოს 17%-ით.

ჯანმოს წყაროებში გამოყენებულია დამოუკიდებელი აკადემიური კვლევითი ორგანიზაციის – „დაავადებათა გლობალური ტვირთის პროექტის“ შეფასება, რომლის მიხედვითაც მსოფლიოში ყოველწლიურად კიბოთი გარდაცვალების დაახლოებით 34 000 შემთხვევა დაკავშირებულია დამუშავებული ხორცით მდიდარ დიეტებთან.

ამ რიცხვებს ემატება დაახლოებით 1 მილიონი გარდაცვალება ყოველწლიურად თამბაქოს მოხმარებით გამოწვეული სიმსივნის გამო, 600 000 გარდაცვალება – ალკოჰოლის მოხმარების მიზეზით და 200 000-ზე მეტი შემთხვევა – ჰაერის დაბინძურებით გამოწვეული სიმსივნეების გამო.

ამერიკის კიბოს ასოციაცია ასევე ირწმუნება, რომ ჯანსაღ კვებას და ფიზიკურ აქტივობას დიდი მნიშვნელობა აქვს კიბოს რისკის შემცირებაში, კერძოდ, მათივე რეკომენდაციით ჯანსაღი კვების რეჟიმი ზღუდავს ან გამორიცხავს წითელი (ძროხის, ღორის და ცხვრის) ხორცს და ისეთ დამუშავებულ ხორცს, როგორიცაა: ბეკონი, ძეხვი და სოსისი.

 

3-დან 7 ნოემბრამდე ჩაქვის გვირაბებში მოძრაობა მონაცვლეობით აიკრძალება

საავტომობილო გზების დეპარტამენტის ცნობით, 3 ნოემბრის 00:00 საათიდან 5 ნოემბრის 00:00 საათამდე ჩაქვი-მახინჯაურის საავტომობილო გვირაბში, ქობულეთი-ბათუმის, ხოლო 5 ნოემბრის 00:00 საათიდან 7 ნოემბრის 00:00 საათამდე გვირაბის ბათუმი-ქობულეთის მიმართულებაზე იკრძალება ყველა სახის ავტოტრანსპორტის მოძრაობა.

დეპარტამენტის ცნობით, მოძრაობის აკრძალვის მიზეზი პროფილაქტიკური სამუშაოებია.

ქობულეთი-ბათუმის მიმართულების ჩაკეტვის პერიოდში ავტოტრანსპორტის ნაკადი გადაერთვება გვირაბის ბათუმი-ქობულეთის მიმართულებაზე; ხოლო ბათუმი-ქობულეთის მიმართულების ჩაკეტვის პერიოდში ავტოტრანსპორტის ნაკადი გადაერთვება ქობულეთი-ბათუმის მიმართულებაზე.

„აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით,“ – აცხადების გზების დეპარტამენტი.

ბიზნესისთვის ბუნებრივი გაზი 20 თეთრით ძვირდება – „სოკარი“

2021 წლის პირველი დეკემბრიდან საქართველოში „სოკარ ჯორჯია გაზის“ საცალო არასაყოფაცხოვრებო მომხმარებლებისთვის გაზი 20 თეთრით ძვირდება.

აქამდე 1 კუბ.მეტრ ბუნებრივი აირის მოხმარების ფასი 95 თეთრი იყო, პირველი დეკემბრიდან კი 1 ლარი და 15 თეთრი იქნება დღგ-ს ჩათვლით.

„სოკარი“ აცხადებს, რომ გაზის ფასი უცვლელი დარჩება პურის მწარმოებელი კომპანიებისათვის.

„არასაყოფაცხოვრებო მომხმარებლებისათვის ბუნებრივი გაზის ფასი შპს „სოკარ ჯორჯია გაზის“ მიერ შენარჩუნებული იყო ბოლო ორ-ნახევარი წლის განმავლობაში.

ფასის კორექტირების აუცილებლობა მომსახურებასთან დაკავშირებული დანახარჯების გაზრდისა და ეროვნული ვალუტის გაცვლითი კურსის ცვლილებითაა განპირობებული,“ – აცხადებს კომპანია.

აჭარაში კოვიდის 149 ახალი შემთხვევაა

2 ნოემბრის მონაცემებით, გასულ 24 საათში აჭარაში 149 ახალი შემთხვევა დადასტურდა.

ამავე პერიოდში რეგიონში 5 ადამიანი გარდაიცვალა კორონავირუსით.

დღეის მონაცემებით, აჭარის კოვიდკლინიკებშია 526 პაციენტი, კოვიდსასტუმროში იმყოფება 193 ინფიცირებული.

2 ნოემბრის მონაცემებით, საქართველოში კოვიდის 5 553 ახალი შემთხვევა დადასტურდა, 47 პაციენტი გარდაიცვალა.

პირდაპირ პლაჟთან ან ცოტა მოშორებით – ქობულეთის მერია მიწებს ყიდის

გასულ კვირას ქობულეთის მერიამ საკრებულოს თანხმობით გასაყიდი ქონების ნუსხას კიდევ ორი ნაკვეთი შეჰმატა. შედეგად მერიის საპრივატიზებო ობიექტების ისედაც შთამბეჭდავი ნუსხა კიდევ უფრო მიმზიდველი გახდა. ამ ნუსხაში არის ნაკვეთები ზღვასთან ახლოს, პირდაპირ პლაჟთან, მრავალწლოვანი ნარგავებით – ნაძვებით, ფიჭვებითა და საუკეთესო ხედებით.

საკრებულოში გადაგზავნილი დოკუმენტის მიხედვით, ქობულეთის მერიას საპრივატიზებო ობიექტების ნუსხაში აქვს შეტანილი 6051 კვ.მეტრი გამწვანებული მიწის ნაკვეთი ქობულეთის პლაჟთან. როგორც მერიაში განმარტეს, ეს არის პანსიონატ „ქარიშხალასა“  და აღმაშენებლის N700-ს შორის მდებარე ტერიტორია. საჯარო რეესტრის მონაცემებით, ამ ნაკვეთს შპს „დრიმლენდ ოაზისის“ საკუთრებაში არსებული ნაკვეთი ესაზღვრება.

ქობულეთის მერია გასაყიდად გაიტანს ასევე ორ ტერიტორიას, ჯამში 16 968 კვ.მეტრ გამწვანებულ მიწის ნაკვეთს პირდაპირ პლაჟთან, აღმაშენებლის გამზირზე N522-დან – N576-მდე. ამ ნაკვეთებს ერთი მხრიდან შპს “ალიანსი ქობულეთის” საკუთრება ესაზღვრება.

გასაყიდი ტერიტორიების ნუსხაშია 2332 კვ.მეტრი მიწის ნაკვეთი რუსთაველის #172-ში, ამ ნაკვეთის მომიჯნავედ შპს “Georgian Industrial Asset Management Group”- ის მიწა და შენობა მდებარეობს.

მონიშნულია გასაყიდი მიწის ნაკვეთი

ქობულეთის მერიამ საკრებულოს თანხმობით საპრივატიზებო ობიექტების ნუსხაში შეიტანა თავისუფლების #13-ში მდებარე ორსართულიანი შენობა, სადაც სოციალური მომსახურების სააგენტოა განთავსებული. გაიყიდება ასევე მასთან დაკავშირებული 1177.00 კვ.მეტრი მიწის ნაკვეთი.

კითხვაზე, სად განთავსდება სოციალური მომსახურების სააგენტოს ადმინისტრაციული შენობა, „გარეთ არ დავტოვებთ“ – გვიპასუხეს ქობულეთის მერიაში.

საჯარო რეესტრის მონაცემებით, ამ შენობის პირველ სართულზე 239.7კვ.მეტრი ფართობი სოციალური მომსახურების სააგენტოსთვის უზურფრუქტის წესით არის გადაცემული. შენობის 136.65 კვ.მეტრი ასევე უზურფრუქტის წესით ფიზიკურ პირს, მამუკა თხილაიშვილს აქვს დაკავებული, 41 .5. კვ.მეტრ ფართობში კი სსიპ „იურიდიული დახმარების ცენტრი“ მუშაობს.

ქობულეთის მერიის ინფორმაციით, აუდიტის შეფასებით 1,177 კვ.მეტრი არასასოფლო-სამეურნეო დანიშნულების მიწის ნაკვეთის საწყისი საპრივატიზებო ღირებულება  58 850 ლარია, ხოლო მასზე განთავსებული 1 024 კვ.მეტრი ფართობის შენობის საწყისი საპრივატიზებო ღირებულება – 460 800 ლარი.

მონიშნულია გასაყიდი მიწის ნაკვეთი

საპრივატიზებო ობიექტების ნუსხაშია 2222 კვ.მეტრი მიწის ნაკვეთი ბაგრატიონის ქუჩაზე.

გასაყიდი მიწის ნაკვეთი ბაგრატიონის ქუჩაზე

გასაყიდად გაიტანენ თავისუფლების ქუჩა N28-ის მიმდებარედ 2651 კვ.მეტრ მიწის ნაკვეთსაც.

საპრივატიზაციოდ გაიტანენ ასევე ქობულეთის ყოფილი სანეპიდსადგურის შენობას [330კვ.მ]  და მასთან დაკავშირებულ მიწის ნაკვეთს [779კვ.მ].

დადასტურდა კოვიდის 5553 ახალი შემთხვევა | 2 ნოემბერი

2 ნოემბრის მონაცემებით, საქართველოში დადასტურდა კოვიდის 5 553 ახალი შემთხვევა. ჩატარდა 48 901 ტესტი კორონავირუსზე.

გასულ 24 საათში 47 პაციენტი გარდაიცვალა კოვიდით.

1-ლი ნოემბრის მდგომარეობით, დადებითობის დღიური მაჩვენებელი არის 11.36%, ბოლო 14 დღის მანძილზე – 9.02% ხოლო 7 დღის მანძილზე – 9.06%.

დღეს ქვეყანაში გამოვლენილი ინფიცირების 5 553 ახალი შემთხვევიდან თბილისში გამოვლენილია 1 794 შემთხვევა, აჭარაში – 149, იმერეთში – 1 189, ქვემო ქართლში – 317, შიდა ქართლში – 512, გურიაში – 132, სამეგრელო – ზემო სვანეთში – 448, კახეთში – 657, მცხეთა-მთიანეთში – 149, სამცხე-ჯავახეთში – 123, რაჭა-ლეჩხუმსა და ქვემო სვანეთში – 83.

დღეს ბათუმში ოპოზიციის აქცია გაიმართება

დღეს, 2 ნოემბერს, 17 საათზე, აჭარის მთავრობის სახლთან ოპოზიციის აქცია გაიმართება სლოგანით – „არა გაყალბებულ არჩევნებს“, „თავისუფლება მიშას“.

ბათუმში აქციით ოპოზიცია იწყებს აქციების სერიას საქართველოს ქალაქებში. ბოლო აქცია თბილისში გაიმართება.

აქციების პარალელურად, ოპოზიცია აპირებს ოლქებსა და შემდეგ სასამართლოებში გაასაჩივროს ყველა საარჩევნო დარღვევა.

ოპოზიცია არ აღიარებს ადგილობრივი თვითმმართველობის არჩევნების შედეგს, რადგან მიიჩნევს, რომ „ქართულმა ოცნებამ“ ის გააყალბა. არჩევნების შედეგების მიხედვით, 64 ქალაქიდან და მუნიციპალიტეტიდან მერის არჩევნებში 63 ოლქი მოიგო მმართველმა პარტიამ და მხოლოდ წალენჯიხაში მოიგო ენმ-ს კანდიდატმა.

„ბათუმის დინამომ“ 4:0 დაამარცხა „საბურთალო“

ბათუმში საფეხბურთო მატჩი „დინამო ბათუმსა“ და „საბურთალოს“ შორის „ბათუმის დინამოს“ სასარგებლოდ დასრულდა ანგარიშით 4:0.

ამ მატჩის შემდეგ „ბათუმის დინამომ“ 67 ქულა დააგროვა და ეროვნული ჩემპიონატის სატურნირო ცხრილში ლიდერია.

მეორე ადგილზე 63 ქულით „თბილისი დინამო“ იმყოფება.

რაც შეეხება „საბურთალოს“, ის ეროვნული ლიგის გათამაშებაში მეოთხე პოზიციაზეა.

დღეს 32-ე ტურის ბოლო შეხვედრა გაიმართა, 2021 წლის გათამაშება კი 4 ტურის შემდეგ დასრულდება.

„ბათუმის დინამოს“ მომდევნო მატჩი გასვლითი იქნება და ის 6 ნოემბერს გაიმართება – ამ მატჩში „ბათუმის დინამო“ თბილისი „ლოკომოტივს“ დაუპირისპირდება.

„ხელისუფლება უკმაყოფილებით შექმნილ ნაღმზე ზის“ – ინტერვიუ პოლიტოლოგთან

„სკეპტიკური დამოკიდებულება, რომ აი, არაფერი გვეშველება და ამ ქვეყანას შანსი არ აქვს, ყველაზე მეტად რუსეთს აწყობს… ეს აძლიერებს ასევე იმ სკეპტიკოსი ქვეყნების გზავნილს, რომლებიც ახლაც მიიჩნევენ, რომ საქართველო არ არის მზად, მაგალითად, ნატოში გაწევრიანებისთვის,“ – გვიპასუხა პოლიტოლოგმა კორნელი კაკაჩიამ, რომელსაც არჩევნების მეორე ტურის ჩავლის შემდეგ ვესაუბრეთ და ვკითხეთ: რეალურად რა შანსი აქვს საქართველოს დემოკრატია გააძლიეროს და საერთაშორისო თანამეგობრობის ინტერესი შეინარჩუნოს ამ ვითარებაში, როცა არჩევანის თავისუფლების უზრუნველყოფა ჭირს? „ბათუმელებმა“ ინტერვიუ „საქართველოს პოლიტიკის ინსტიტუტის“ ხელმძღვანელთან, კორნელი კაკაჩიასთან ჩაწერა.

  • ბატონო კორნელი, თქვენი აზრით, რა შანსი აქვს საქართველოს დღეს, რადგან, როგორც ჩანს, არჩევნების უფლების დაცვასაც ვერ ვახერხებთ? 

ეს არჩევნები იყო ხელიდან გაშვებული შანსი, რომელიც ჰქონდა ქვეყანას, რომ დაბრუნებოდა დემოკრატიული განვითარების რელსებს. ხელისუფლებამ დაინახა, რომ დიდ ქალაქებში აღარ აქვს პრაქტიკულად დასაყრდენი და რომ არ გამოეყენებია ისევ აქტიურად ადმინისტრაციული რესურსი, დაშინება და ის მეთოდები, რაც ეუთოს ანგარიშებშიც მოხვდა, ამით საფუძველს ჩავუყრიდით მრავალპარტიული სისტემის შექმნას და ცენტრის და რეგიონების ურთიერთობებსაც დაეტყობოდა უკეთესობა.

ეს შანსი გაშვებულია ხელიდან. შესაბამისად, გაიზრდება ზეწოლა ხელისუფლებაზე, როგორც სამოქალაქო საზოგადოების, ასევე ოპოზიციის, საერთაშორისო ინსტიტუტების მხრიდან. არავინ იცის, რამდენად გაუძლებს ხელისუფლება ამ ძლიერ ზეწოლას. შესაძლოა, ის საერთოდ ჩამოიშალოს, როგორც შევარდნაძის ხელისუფლება და ეს არ გვინდოდა ჩვენ ყველას ერთად, რომ მერე საერთოდ გაქრეს ეს პოლიტიკური ძალა პოლიტიკური ველიდან. ახლა რეალურად ხელისუფლების მიმართ რადიკალიზაცია იზრდება, რაც შეუძლებელს ხდის სტაბილურობის მიღწევას ქვეყანაში.

  • რამდენად გაიზარდა რისკი, რომ რეალურად დასავლეთის ინტერესი დავკარგოთ? 

თუ გადავხედავთ საელჩოების თუ მაღალჩინოსნების განცხადებებს, იგრძნობა ეს გულაცრუება, როგორც ევროკავშირის, ისე აშშ-ს მხრიდან. დღეს ხდება საქართველოს საკითხით ე.წ. გადაღლა, როგორც ეს, მაგალითად, უკრაინის შემთხვევაში მოხდა. ამან შესაძლოა გამოიწვიოს ის, რომ საქართველოსკენ გამოხედვა მის მეგობარ ქვეყნებსაც კი აღარ მოუნდეთ. ეს გაუგებარი პოლარიზება, გაუტანლობა და სიძულვილი ყელში ამოუვიდა ყველას. ყველამ იცის, რომ ეს ენერგია, რომელიც იხარჯება ამ ვიწრო პარტიული ინტერესების გატარებაში, უნდა იყოს მიმართული იმ საკითხების მიმართ, რაც რეალურად აწუხებს მოსახლეობას. ამ ე.წ. გადაღლილობამ შესაძლოა გამოიწვიოს ისიც, რომ საქართველოს საკითხმა კიდევ უფრო მეტად დაკარგოს აქტუალურობა და ქვეყანა თანდათანობით იზოლაციაში მოექცეს.

რეალურად საქართველოს ხელისუფლების განცხადებებიც ამ იზოლაციას უწყობს ხელს, როცა შენ შენს სტრატეგიულ პარტნიორებს ეუბნები, რომ მათი აზრი არ გაინტერესებს, ჩემს საქმეში ნუ ერევი, რამდენს ბედავო.

ამ დროს უნდა გადავხედოთ ასევე, ვინ არიან ჩვენ გარშემო: რუსეთი, თურქეთი, ირანი. არც ერთი მათგანი არ გამოდგება ნიმუშად დემოკრატიული განვითარების თვალსაზრისით. თურქეთიც არალიბერალური სახელმწიფოა.

აქედან გამომდინარე, საქართველოს არ აქვს იზოლაციის ფუფუნება. პირიქით, ეს პირდაპირ აწყობს რუსეთს, რომ საქართველო მოექცეს იზოლაციაში და მას აღარ დარჩეს საერთაშორისო პარტნიორი.

  • ხედავთ საფრთხეს, რომ შესაძლოა საქართველო რუსეთისთვის მისაღებ ფორმატში ჩაერთოს, ან, მაგალითად, განაცხადოს, რომ მისთვის ე.წ. ნეიტრალიტეტია მისაღები, რაც ასევე რუსეთის ინტერესია? 

ჩვენ მოვისმინეთ განცხადებები 3+3 ფორმატზე. საგარეო საქმეთა მინისტრმა კი განაცხადა, არასწორად გაიგეთ განცხადებებიო, მაგრამ კითხვები გაჩნდა. ფაქტია, რომ ეს ფორმატი არაფრით შეესაბამება საქართველოს ეროვნულ ინტერესებს.

ჯერჯერობით მარგინალური, პრორუსული პარტიების გარდა ნეიტრალიტეტზე ვერავინ საუბრობს ღიად, რადგან ჩანს მკაფიოდ, რომ ამ იდეის მომხრეები საქართველოში არ არიან. იციან, რომ ეს იქნება პოლიტიკური დასამარება და ამიტომაც არ საუბრობენ. ცნობილია, რომ  მოსახლეობის დაახლოებით 80 პროცენტი მხარს უჭერს ევროინტეგრაციას.

  • თუმცა ეს ხელს არ უშლის ხელისუფლებას, არ შეასრულოს სასამართლოს რეფორმა და მერე უარი უთხრას ევროპას ფინანსურ მხარდაჭერაზე. 

ეს იყო პირველი შემთხვევა, როცა ევროკავშირმა აამოქმედა პირობითობის პრინციპი, რაზეც საქართველომ უარი თქვა. ეს არის ძალიან სახიფათო ტენდენცია – გამოჩნდა, რომ ეს იყო ტყუილი, რადგან რეალურად გვჭირდებოდა ეს ფული და ახლა სხვა გზით უნდა მოვიპოვოთ იგი. ასე იქცევიან ავტორიტარული ქვეყნები, ასე იქცევა აზერბაიჯანი, ბელორუსია.

ეს არის გზა არსაით.

უკუსვლის გარდა ხელისუფლების განცხადებებში უკვე მკაფიოდ იგრძნობა ავტორიტარული ტონი. ხელისუფლების პირველი პირები, მათ შორის, განსაკუთრებით პრემიერი, უნდა იყვნენ გაერთიანებაზე ორიენტირებული და ამ დროს პირიქით, პრემიერი არის რადიკალიზაციის წყარო. ეს სერიოზულ პრობლემას უქმნის მდგრადი დემოკრატიის განვითარებას.

ხელისუფლება ხედავს, რომ მისი პოპულარობა დაეცა, მაგრამ ეშხშია შესული, რომ ძალაუფლება შეინარჩუნოს ნებისმიერ ფასად, თანაც, მოქმედებას ე.წ. ვენდეტის წესი, როცა ახალი ხელისუფლება ცდილობს წინა ჩაძიროს და გააქროს. „ოცნებაშიც“ მიიჩნევენ, რომ იძულებული არიან იბრძოლონ ბოლომდე, ვენდეტის წესი მათზეც რომ არ გავრცელდეს.

  • ამ ვითარებაში რა შეიძლება აკეთონ კრიტიკულად განწყობილმა მოქალაქეებმა? 

ახლა მოქალაქეების და სამოქალაქო საზოგადოების ვალია, დაასრულონ რადიკალიზაცია. ვფიქრობ, არასწორად ვიყენებთ ტერმინს „პოლარიზაცია“, რადგან პოლარიზება ნიშნავს იდეოლოგიურ შეუთავსებლობას. ჩვენთან კი, გამოკითხვებით ჩანს, რომ უმრავლეს საკითხში „ქართული ოცნების“ და „ნაციონალური მოძრაობის“ ამომრჩევლებიც ერთნაირად ხედავენ პრობლემების მოგვარებას. ეს დაძაბულობა უფრო არის რადიკალიზაცია კონკრეტული ლიდერების გარშემო. ჩვენ ეს პიროვნული დაპირისიპირება უნდა გადავიყვანოთ ინსტიტუციონალურ ჩარჩოში, ბიპოლარული სისტემა რომ ავიცილოთ თავიდან. ჩვენ უნდა გავაძლიეროთ პატარ-პატარა პარტიები, მულტიპარტიული სისტემა და ვცადოთ, ისევ ერთპარტიული სისტემა არ მივიღოთ სამომავლოდ.

ამ ჯაჭვის გაწყვეტაა საზოგადოების მოვალეობა.

ბოლო დღეებშიც გაჟღერდა ეს, რომ ერთიან ფრონტში უნდა ჩაერთონ არა მხოლოდ პოლიტიკოსები, არამედ ბიზნესი, მედია, სამოქალაქო საზოგადოება და ასე შემდეგ. მხოლოდ პოლიტიკოსებს არ აქვთ ცვლილებების რესურსი, რაც გამოჩნდა. მოქალაქეებმა ხელი უნდა შევუწყოთ მეტოქეობას კონკრეტული საკითხების გარშემო, მსჯელობას იმ საკითხებზე, რაც ჩვენ გვაინტერესებს, გვაწუხებს. ეს არჩვენები ხომ ადგილობრივი თვითმმართველობის იყო და ამ დროს მუნიციპალურ საკითხებზე საერთოდ არ იყო საუბარი.

  • რა რესურსს ხედავთ ამისთვის და რა გზით?  

გამოუვალი სიტუცაცია ჩანს ახლა, მაგრამ, ვფიქრობ, რომ ეს მაინც დროებითია.

რაღაც გამოსავალი ყოველთვის არსებობს, უბრალოდ, ამას სჭირდება გარკვეული დრო. ჩვენ მივდივართ კონსოლიდირებული დემოკრატიისკენ და ქვეყანა დაუბრუნდება განვითარების კალაპოტს. ეს გარდაუვალია.

სკეპტიკური დამოკიდებულება, რომ აი, არაფერი გვეშველება და ამ ქვეყანას შანსი არ აქვს, ყველაზე მეტად რუსეთს აწყობს… ეს აძლიერებს ასევე იმ სკეპტიკოსი ქვეყნების გზავნილს, რომლებიც ამბობდნენ და ახლაც მიიჩნევენ, რომ საქართველო არ არის მზად, მაგალითად, ნატო-ში გაწევრიანებისთვის… ბალტიისპირეთშიც იყო ასეთი დაპირისპირებები, მაგრამ საერთო ინტერესი წინ წამოწიეს.  კონსესუსის მიღწევა ჩვენც უნდა ვისწავლოთ.

  • ოპოზიცია აანონსებს ისევ ქუჩის აქციებს. თქვენი აზრით, ახლა სხვა დატვირთვა შეიძლება ჰქონდეს ქუჩაში გამოხატულ პროტესტს, როცა მიხეილ სააკაშვილი ციხეში შიმშილობს? 

ბევრი რამეა დამოკიდებული იმაზე, თუ როგორ მოაგვარებს მიხეილ სააკაშვილის შიმშილობის საკითხს ხელისუფლება. ეს არის ხელისუფლების ყველაზე დიდი თავის ტკივილი. ხელისუფლებისთვის არის პრობლემა შიმშილობა, ისიც, რომ ციხიდან გაუშვას… თუ ასე გაგრძელდა, ეს გამოიწვევს საერთაშორისო თანამეგობრობის ჩარევას და კიდევ უფრო ხისტი პოზიციების მიღებას. მძიმე მდგომარეობაშია ხელისუფლება, რადგან არჩევნებმა აჩვენა, რომ რეალურად ყველა დიდ ქალაქში ოპოზიციური მუხტია, მორალურად ოპოზიციამ გაიმარჯვა და არ არის გამორიცხული რიგგარეშე არჩევნები მივიღოთ.

ქუჩის დემონსტრაციებით არა მგონია მოხერხდეს საპროტესტო მუხტის შენარჩუნება, მით უფრო, კოვიდპანდემიის პირობებში, მაგრამ ფაქტია, რომ ახლა ხელისუფლება უკმაყოფილებით შექმნილ ნაღმზე ზის, რომელიც არავინ იცის, როდის აფეთქდება.

მიხეილ სააკაშვილი ელოდა საერთაშორისო თანამეგობრობის უფრო მეტ მხარდაჭერას, მაგრამ ეს მხარდაჭერა არ იყო. დასავლეთი არ არის დაინტერესებული რადიკალიზაციით და რევოლუციით. სააკაშვილს რეალურად სურდა „ვარდების რევოლუციის“ ახალი ვერსია შეექმნა, მაგრამ საზოგადოება არ იყო ამისთვის მზად. ეს იყო გაუთვლელი ნაბიჯი, რადგან ჩვენს დასავლელ პარტნიორებს ინტერესი აქვთ მხარი დაუჭირონ საქართველოს სიძლიერეს და არა რომელიმე ლიდერს. ისინი ხედავენ, რომ ხელისუფლება არასწორ პოლიტიკას ატარებს, მაგრამ ოპოზიციასაც აქვს პრობლემები.

მაგალითად? 

მაგალითად, იგივე რადიკალიზაცია, ქუჩაში გასვლა პარლამენტში მუშაობის ნაცვლად, გეგმის არქონა…. მაგალითად, როცა ოპოზიციამ კოალიციური მერიის შემადგენლობა წარმოადგინა, „ნეტგაზეთთან “ ვთქვი, რომ ეს იყო სწორი, მაგრამ დაგვიანებული ნაბიჯი. არასერიოზულია, როცა არჩევნებამდე სამი დღით ადრე აანონსებ კოალიციურ მოდელს, ეს არ ქმნის კარგ შთაბეჭდილებას. ოპოზიციამ უნდა მოახერხოს დასავლეთს თავისი პოლიტიკური მზაობა, მოწიფულობა დაანახოს.

ოპოზიციამ უნდა აჩვენოს დასავლეთს, რომ ის უკეთესი ვარიანტია.

Exit mobile version