Batumelebi

პოსტაბაშიძისეული პერიოდისთვის გამალებული სამზადისი მიმდინარეობს. „ჩვენი აჭარას“ დამფუძნებელი თამაზ დიასამიძე აქტიურად ცდილობს პოლიტიკურ პროცესებში ჩართვას. მან საკონსტიტუციო სასამართლოში საგანგებო მდგომარეობის გაუქმების თაობაზე სარჩელი შეიტანა. ახლახანს კი, როცა „დემოკრატიული აჭარას“ დასაფუძნებლად სურმანიძემ ხალხი თბილისში გაიხმო, დიასამიძემ ვარდებით მსვლელობა მოაწყო ჩოლოქზე. „ჩოლოქის ხერგილის გახსნასთან დაკავშირებით სიმბოლური მსვლელობა მოვაწყეთ. გადავედით ჩოლოქზე, მოვბრუნდით უკან და შემხვედრს ვარდები დავურიგეთ“ განაცხადა ერთ-ერთმა აქტივისტმა.

ყველა ფიქრობდა, რომ დიასამიძის მხარდამჭერთა აქციას ხელისუფლება დაარბევდა, მაგრამ პირიქით კი მოხდა – ქობულეთის გამგეობის წარმომადგენლებმა აქციის მონაწილეებს ვარდები დაახვედრეს. ეს გახდა იმის საფუძველი, რომ ოპონენტებს ეთქვათ – „ჩვენი აჭარა“ ასლან აბაშიძის ხელისუფლებას შეეკრა და ერთობლივ სპექტაკლებს დგამს.

„გაზეთი ბათუმელები“ გთავაზობთ ინტერვიუს თამაზ დიასამიძესთან, რომელიც კვირის დასაწყისში შედგა.

ბატონო თამაზ, შედგება თუ არა პრეზიდენტის და აქედან გამომდინარე თქვენი თანამშრომლობა აჭარის ხელმძღვანელთან?

ვფიქრობ, რაიმე შუამავალს არ საჭიროებს ახალი პრეზიდენტი აბაშიძესთან ურთიერთობაში. სააკაშვილი გაბედულია და ცხადად აქვს კურსი აღებული აჭარაში შექმნილ მდგომარეობაზე. აქ სახელმწიფოებრივი კონტროლისა და კონსტიტუციური წესიგის აღდგენის მიმართულებით რეალური ნაბიჯები იდგმება და არამარტო განცხადების დონეზე. ერთ-ერთი ასეთი ნაბიჯი ახლახან ჩხაიძის (აკაკი ჩხაიძე) დაპატიმრება იყო. ეს ათი წლის განმავლობაში აჭარის ტერიტორიაზე აჭარის ფარგლებს გარედან ჩატარებული პირველი აქციაა. აბაშიძე ამ შემთხვევაში განერიდა მოვლენებს და შეატოვა ჩხაიძე თბილისის სამართალდამცავებს. ცენტრალურ ხელისუფლებაზე განაწყენებული თუ ძებნილი ადამიანები თავშესაფარს ყოველთვის ბათუმში პოულობდნენ. სახელმწიფო ქონების ძარცვისათვის ძებნილი მამალაძე აქედან გავიდა უცხოეთში, ცოლ-შვილი კი აქ ჰყავს დატოვებული, ეს აღარ იქნება.

ანალოგიური შეიძლება ითქვას პირიქითაც, აქ ძებნილები თბილისს აფარებდნენ თავს. ფაქტობრივად, წლების განმავლობაში თქვენც წასული იყავით…

მე არასოდეს გავქცეულვარ ჩემი კუთხიდან, თვეში ერთხელ ყოველთვის ჩამოვდიოდი ბათუმში. ზოგიერთი ქართული გაზეთი ავრცელებდა ინფორმაციას – ბათუმიდან გაქცეული დიასამიძეო. ცხადია, ასეთი რაღაცეები შემთხვევით არ ხდება, მაგრამ გააჩნია ადამიანები ამ რეგიონიდან რისთვის გარბიან. როცა ადამიანი გაურბის უსამართლობას, დაჩაგრულობას, ეს სხვა ამბავია, ხოლო როცა დამნაშავეა, სხვა.

თუმცა არც იმის უარყოფა შეიძლება, რომ ვინც გადააყენა აბაშიძემ, თბილისში წავიდნენ და მაღალ სამსახურზე მოეწყვნენ. ამ შემთხვევაში განსხვავება ისეთია,  როგორც ცასა და დედამიწას შორის. საერთოდ, სასაცილოა პოლიტიკური ცენტრის აღმოცენება ბათუმში. მეტოქეობა საქართველოს ხელისუფლებასთან, რომლის ტანდემიც 95 წლის შემდეგ აღმოცენდა, წმინდა მარცხით დამთავრდა. ბათუმის პოლიტიკური ცენტრი გათამაშებული იყო შევარდნაძე-აბაშიძეს შორის ძალაუფლებისა და ქონების გადანაწილებისთვის. პოლიტიკური პარტიები, ვინც კონცენტრირებული იყო ბათუმზე, აქ საზრდოს შოულობდნენ, კარიერას იკეთებდნენ აბაშიძეს გაყალბებული საარჩევნო სიებით და აბაშიძის ადვოკატობას თამაშობდნენ, იცავდნენ ამ დამპალ რეჟიმს. მათ გატაცებულ ტრილიონებს ყველას დავაბრუნებინებთ.

ამ თანხებზე თუ გაქვთ დოკუმენტაცია ან თქვენ, ან პრეზიდენტს…

ყველაფერზე დოკუმენტაცია, ბუნებრივია, არ არსებობს, მაგრამ რაც არსებობს, დაიდება. ყველამ იცის რა შემოსავლები არსებობს აჭარაში, ყველაფერს რომ თავი დავანებოთ, სანაოსნოს დოკუმენტაცია ხომ არსებობს ე.წ. თბილისის პოლიტიკურმა ცენტრმა რომ დაულაგა აბაშიძეს – მილიარდზეა ლაპარაკი.  ნახეთ, ნავთობის ტერმინალი, სადაც გემების მიღება-გაშვება საპორტო კონტროლის გარეშე ხდება, რამდენ დოლარად არის შეძენილი. სახელმწიფოსაგან ტერმინალი კერძო ფირმამ გამოისყიდა ჩალის ფასად – 40 მილიონ დოლარად, მისი ღირებულება კი ასეულ მილიონებს აღწევს. დაიანგარიშეთ რამდენი ტონა ნავთობის გადატვირთვა ხდება და ნახავთ რა თანხებს მიიღებთ. გატაცებული თანხების მნიშვნელოვანი ნაწილი ბანკებში არ დევს. ოქროსა და ვერცხლის, უცხოეთში სასახლეების სახით აქვთ დაბანდებული. ნახეთ წლების განმავლობაში რამდენი გადმოურიცხა ცენტრმა რეგიონს და აქედან რამდენი გადაირიცხა. ფაქტობრივად ქრთამავდა აბაშიძე ცენტრალურ ხელისუფლებას, პირამიდა იყო აქ გაკეთებული, საიდანაც საზრდოობდნენ პოლიტიკური პარტიები, მინისტრები. პოზიცია-ოზიციობანას თამაშობდნენ და ოპოზიციის ადგილი დაიკავეს ხელისუფლებაში. მოკლედ, ყველამ იცის სადღეღამისოდ რამდენი ფული იდება აბაშიძის მაგიდაზე და ისიც, რომ აქედან თბილისში მიედინებოდა მილიონები.

საქართველოს პარლამენტის წევრის, ასლან სმირბას სახლს დაუდგენელმა პირებმა ხელყუმბარა ესროლეს. კულუარული ინფორმაციით, ეს განაპირობა სმირბას „ნაციონალებთან“ ჩახუტებამ, თუ მის მიერ გაკეთებულმა განცხადებებმა. სმირბაზე ანგარიშსწორების (საუბრობდნენ ლიკვიდაციაზე) შესახებ ინფორმაციები კულუარებში რამდენიმე კვირის წინ გავრცელდა. მაშინ იმასაც ამბობდნენ, რომ ასლან სმირბამ მოსალოდნელი საშიშროების შესახებ იცის და ფერიაში, საკუთარ სახლშია ჩაკეტილი. რა ანგარიშსწორებაზეა საუბარი? – ამის შესახებ ოფიციალურად არავითარი ინფორმაცია არ ვრცელდება, მაგრამ სმირბა ამ აფეთქებით სერიოზულად რომ გააფრთხილეს, აშკარაა. „გაზეთ ბათუმელებთან“ მომხდარზე და, საერთოდ, მის ირგვლივ შექმილ „ბურუსზე“ თავად ასლან სმირბა საუბრობს:

დილით დამირეკა ჩემმა ძმამ და მითხრა არ შეგეშინდეს, მაგრამ სახლთან აფეთქება მოხდაო. რა მოხდა რომ ვიცოდე, ალბათ ძალოვან სტრუქტურაში ვიმუშავებდი. ერთი ბომბი პირდაპირ კარებზეა ნასროლი, დამსხვრეულია მინები. საბედნიეროდ, მეორე ბომბი (რგოლი მოხსნილი ჰქონდა) არ აფეთქებულა. ადგილზე ჯემალ გოგიტიძე მოვიდა – შინაგან საქმეთა მინისტრი, უშიშროებიდანაც იყვნენ. იმდენად უსიამოვნო იყო ჩემთვის იქ არსებული სიტუაცია, რომ წამოვედი.

ამბობენ, რომ ბოლო კვირას სწორედ ფერიაში აფარებდით თავს?

სიმართლე გითხრათ, ფერიაში არ ვყოფილვარ. ვერიდებოდი აქტიურობას, ისე ვიყავი სახლში, ქალაქში გამოსვლის სურვილი არ მქონდა.

ე.ი. რაღაც მართლა ხდებოდა?

არ ვიცი, ახლა რომ გითხრათ, რაღაცას ვგრძნობდი-მეთქი, არა. ყველანაირი ჭორი დადის. ყურადღებას არ ვაქცევდი.

ამ ფაქტის მერე სულ ვფიქრობ, არ მინდა ამ ყველაფრის პოლიტიკასთან დაკავშირება. იქნებ იმან გააღიზიანა ვინმე, რაც პრესაში დავწერე. ახალ ხელისუფლებასთან შეთანხმებით აფხაზეთთან დაკავშირებით კონცეფციაზე ვმუშაობ. შეიძლება ამანაც გააღიზიანა ვინმე. ჩემს ქალაქში ნამდვილად არ მყავს მტერი, ამას ხმამაღლა  ვაცხადებ. ნებისმიერ უწყებაში, სადაც მიმუშავია, ყველა დაგიდასტურებთ, ვმუშაობდი ხალხისთვის, ქვეყნისთვის და იმისთვის, რომ ის ორგანიზაცია წარმომეჩინა, სადაც ვიყავი.

პოლიტიკურ შეფასებას აძლევთ მომხდარს?

კიდევ ვიმეორებ, პოლიტიკურ შეფასებას რაღაც მიზნებით არ ვაძლევ, თავს ვიკავებ. ჯერ ძიებას დაველოდები და მერე მივიღებ გადაწყვეტილებას, განცხადებას რამდენიმე დღეში გავაკეთებ. ხმამაღლა ვამბობ, ნურავის ჰგონია, რომ მე მოსკოვში, ან სადმე სხვაგან გადავიხვეწები, არსად წამსვლელი არა ვარ. არც სამსახური მინდა, არც არაფერი, უბრალოდ, საქვეყნოდ ვიტყვი ჩემს სათქმელს.

ახალი ხელისუფლების მოსვლის შედეგ ქვეყანაში მიდის კორუფციასთან ბრძოლა. მე, ასლან სმირბას ვერაფერს დამაბრალებენ, რადგან ცოტა წინდახედული კაცი ვარ და რა დოკუმენტსაც ვაწერდი ხელს, ყველას ასლს ვინახავდი.

თქვენზე ამბობდნენ, თითქოს პოლიტიკური შეხედულებები შეიცვალეთ და „ნაციონალების“ მიმართ სიმპატიები გაქვთ?

კიდევ ვიმეორებ, არავითარი „ნაციონალური მოძრაობის“, არც ერთი პარტიის ძახილი არ მინდა, მაგრამ ვინმეს თუ აღიზიანებს, რომ მე მეგობრული ურთიერთობა მაქვს პრეზიდენტთან, ან შინაგან საქმეთა მინისტრთან, ნუ დაავიწყდებათ, რომ ბათუმელი კაცი ვარ და პოლიტიკისთვის მეგობრობას ვერ წავშლი. ვიღაცის ამბიციის გულისათვის სამეგობრო წრეს ვერც საქართველოში და ვერც სხვაგან, ვერ დავკარგავ.

ბათუმში ძალიან ბევრი ჭორი დადიოდა ჩემზე – სიტუაციის გამოყენებას გეგმავსო. პირველად ვაცხადებ, ასლან სმირბა არავითარი პოლიტიკური გარიგების, თამაშის მომხრე არ არის. მე სიტუაციაში ჩახედული კაცი ვიყავი და ვასრულებდი იმ საქმეს, რასაც კაცობა ჰქვია.

გულწრფელად გეუბნებით, ასლან აბაშიძესთან შეხვედრა არ მქონია, მაგრამ ჩემთვის სამარცხვინოა ის ფაქტი, როდესაც რამდენიმე ორგანიზაცია იქმნება. სულერთია ეს „აჭარა ჩემი სიამაყეა“ იქნება თუ სხვა, ორგანიზაცია უნდა შექმნას იმ ადამიანმა, ვისაც ამის მორალური უფლება აქვს.

როგორ ფიქრობთ, ეს აფეთქება გაფრთხილება იყო თუ დაშინება?

არაფრის არ მეშინია და თავს შევაკლავ ბოლომდე. ერთადერთი, რაც მაშინებს, ესაა ჩემი შვილების უსაფრთხოება, ბავშვი სკოლიდან წამოვიყვანე და ჩემთან მყავს. მე ქალაქში არ მჭირდება დაცვა, საქართველოს ყოფილი ცეკას მდივნის, შევარდნაძის ბრძანებით, ქვეყანაში დაცვა ეკუთვნის პრეზიდენტს და აჭარის მეთაურს. დანარჩენი ფორმირებები უკანონოა.

პოლიტიკიდან წასვლას ხომ არ აპირებთ?

შეიძლება წავიდე… შეიძლება ახალი სისტემა შევქმნა და ვიმუშავო.

რამდენიმე დღის წინ, მწერალთა გარკვეული ნაწილი განსხვავებული  პოზიციის დასაფიქსირებლად მწერალთა კავშირის წინ შეიკრიბა. მათი მოთხოვნა ამ შემთხვევაშიც უცვლელი იყო, გადადგეს აბაშიძე და აჭარაში შეიქმნას დემოკრატიული სივრცე. სააკაშვილს კი მოუწოდებენ, რომ ძველი ხელისუფლების მსგავსად აბაშიძესთან გარიგებებზე არ წავიდეს. წინააღმდეგ შემთხვევაში ისინი პრეზიდენტის იმიჯის შელახვას წინასწარმეტყველებენ და ამბობენ, რომ მას ვარდების რევოლუცია აღარ უშველის. „გაზეთი ბათუმელები“ რამდენიმე მათგანს გაესაუბრა.

ხათუნა თავდგირიძე: – „გვინდა გამოვხატოთ ჩვენი დამოკიდებულება იმ მოვლენების მიმართ, რომელსაც ბოლო დროს ადგილი აქვს აჭარაში და მხარდაჭერა გამოვუცხადოთ მოძრაობას „ჩვენი აჭარა“. მიგვაჩნია, რომ ეს არის რეალური ძალა, რომელმაც უნდა შეცვალოს უკეთესობისკენ ჩვენი კუთხის მომავალი. დარწმუნებული ვართ, რომ მომავალ არჩევნებში „აღორძინება“ არჩევნებს წააგებს და პოლიტიკური არენიდან წავა.

თქვენთვის აბაშიძის წასვლაა მთავარი თუ პოლიტიკური ორიენტაციის შეცვლა?

აბაშიძის წასვლა, რადგან შეუძლებელია მთელი ცხოვრება ემსახურებოდე ერთს და შემდეგ მოულოდნელად, რადიკალურად შემოატრიალო კურსი.

თუ დემოკრატიული ინსტიტუტების შექმნას დაუშვებს?

ეს იქნება გაბრძოლება, იძულებითი გზა, შეიძლება აბაშიძის ყური მიეჩვია განსხვავებული აზრის მოსმენას, მაგრამ ეს საკმარისი არ იქნება. ყველაზე ცუდი ის არის, რომ მწერლები იძულებული ვართ ჩვენი საქმე მივატოვოთ და რაღაც პოლიტიკური განცხადებები ვაკეთოთ. ჩვენ რომ თავიდანვე გამოგვეხატა პროტესტი, შეიძლება აღარ ვყოფილიყავით ამ დღეში…

რა გიშლიდათ აქამდე ხელს?

ადრე ცენტრისგან მხარდაჭერის იმედი არ გვქონდა, ახლა დემოკრატიული ხელისუფლება მოვიდა და იმედია აჭარასაც მოხედავს.

რევაზ ჩხარტიშვილი: – „ხელისუფლებისგან ვითხოვთ დემოკრატიას, სიმართლის გაგებას და დაფასებას. მე პიროვნებასთან არაფერი მაქვს სადაო, მაგრამ სათავეში ვინც უნდა იყოს, იგივეს მოვითხოვ.

ზურაბ ფირცხალაიშვილი: – ჩვენ გვინდა მზე, რომელიც ჩაგვიყლაპეს და რომელსაც თავისუფლება ჰქვია. ეს აკლია აჭარას. უნიჭო ადამიანები, მხოლოდ გვარიშვილობით ადიან იერარქიულ კიბეზე. მართალ აზრს არავინ გაგაჭაჭანებინებს.

ქეთევან გიორგაძე: – პოეტი არის მუდმივი ოპოზიცია, თუ სააკაშვილი იმას არ გააკეთებს, რასაც არჩევნებამდე გვპირდებოდა და თუ ძველი ხელისუფლების მსგავსად გააგრძელებს აბაშიძესთან გარიგებებს და ისევ გუთნის დედის როლში დავჩებით, რა თქმა უნდა, მისი რეიტინგი დაეცემა.  აბსოლუტურად მისაღები ხელისუფლება არ არსებობს, მაგრამ როცა დემოკრატიაა, მაშინ უფრო მეტი შანსია იმისა, რომ დაუდგრომელ სიტუაციებში არ აღმოჩნდე.

ცისანა ანთაძე: ყოველთვის მხარდამჭერი ვიყავი ასლან აბაშიძის პოლიტიკის. მასში ვხედავ დიდ მამულიშვილს, ძალიან ფხიზელ პოლიტიკოსს, ქვეყნის ბედზე დაფიქრებულს, დიპლომატსა და ერის კაცს.

სიტყვა ვარდები, ხავერდოვანი რევოლუცია, მიხაკების რევოლუცია, რაც გინდათ უწოდეთ, ჩემთვის მიუღებელია. არა მგონია რევოლუცია მთელი საქართველოსთვის მისაღები იყოს.

განსხვავებული აზრის არსებობა მიუღებელია თქვენთვის?

მისაღებია, მაგრამ არა ბარიკადებით. ადამიანის სულზე უარყოფითად არ უნდა იმოქმედო. ნებისმიერი რევოლუცია ადამიანის სულში უარყოფითად აისახება. არ მინდა საქართველოში ბრბო მყავდეს. მიყვარს ახალგაზრდობა, ჯანსაღი აზრი და ოპოზიციასაც დიდი გულისყურით ვუსმენ, მაგრამ აზრის გამოხატვის „კმარასეული“ ფორმა ჩემთვის მიუღებელია, შეურაცმყოფელია ერის, ოჯახის და ტრადიციისათვის.

მოგწონთ ხიდჩატეხილობა საქართველოში? იმ დღეს (პრეზიდენტის ჩამოსვლის დღე იგულისხმება ლ.დ.) ფეხზე იმისათვის ვიდექით, რომ შეხლა-შემოხლა არ მომხდარიყო. ყველამ დაინახა, რომ ასლან აბაშიძე მარტო არ არის. მის პოლიტიკურ კურსს 10 ათასობით ადამიანი უჭერს მხარს, ეს ხომ მისაღები უნდა იყოს. ამის დემონსტრირება მოახდინა იმ ხალხმა, ვინც საკუთარი ინიციატივით გამოვიდა იმ დღეს ქუჩაში.

ხალხის დარბევას როგორ შეაფასებდით?

მე არ მინახავს იქ დარბევა. ამას ვერ მივცემ დადებით შეფასებას, მაგრამ დამრბევი ხელისუფლება არ არის. განსხვავებული აზრი, ზოგჯერ, ვერ პოულობს სწორ მიმართულებას და ხალხი უპირისპირდება ერთმანეთს. ყველამ უნდა შევიკავოთ თავი ამ დაპირისპირებისგან. მე მინდა, რომ ბატონმა მიხეილ სააკაშვილმა მართოს ქვეყანა, ღირსეული პრეზიდენტი იყოს. მიხეილ სააკაშვილის მხარდამჭერებმა ხელი არ უნდა შეუშალონ თავად პრეზიდენტს. კარს მომდგარია არჩევნები, რა საჭიროა გადადექი, ვინ მკარნახობს მე ამას, „ჩვენი აჭარა“?

პრეზიდენტის ინაუგურაციის წინადღით, „აღორძინების“ მხარდამჭერები ბათუმის უნივერსიტეტის ტერიტორიაზე შეიკრიბნენ და ვინ იცის უკვე მერამდენედ შეახსენეს ერთმანეთს, რომ აბაშიძე აჭარის გადამრჩენია. რამდენიმე საათის განმავლობაში ისმოდა შეძახილები – „ვინ მოგვიტანა მშვიდობა, ვინ ფიქრობს დღე და ღამე ჩვენთვის, ვინ დაგვირგო პალმა! და ა.შ“. მომიტინგეებმა კიდევ ერთხელ დაგმეს „სოროსის ბნელი საქმეები“, „ცდები ქართველ ერზე“ და ხალხს მოუწოდეს, რომ სოროსის ფულით დაფინანსებული ტელეარხებისთვის არ შეეხედათ – უყურეთ მხოლოდ აჭარის ტელევიზიას, მხოლოდ აქედან გაიგებთ სიმართლეს – ქადაგებდა ერთ-ერთი გამომსვლელი.

კონსერვატორიის სახელით მომღერალი ირაკლი კახიძე გამოვიდა, რომელმაც საოპერო კულტურის აღორძინებაში ასლან აბაშიძის წვლილზე ისაურა (არ აღუნიშნავს ის, რომ საოპერო თეატრს, რომელსაც ათი წლის ისტორია აქვს, თითქმის ხუთი წელია თეატრალური დადგმა უფინანსობის გამო არ გაუკეთებია. იგივე მიზეზით ჩაიშალა საიუბილეო დადგმაც, რომელსაც თეატრი დეკემბრის თვეში ვარაუდობდა. ლ.დ.)

ერთ-ერთი აქტივისტის ანა კალანდაძის თქმით, ასლან აბაშიძე იმდენად მაღალი სულის პატრონია, რომ განსხვავებული მოსაზრების მქონე ადამიანები მისი  ყურადღების ღირსნიც კი არ ყოფილან. „მის ადგილზე რომ ვიყო, მაგნაირ ადამიანებს, შუქს კი არა, საერთოდ არაფერს ვაღირსებ და სამეგრელოსა და გურიის მსგავსად გაჭირვებაში ვამყოფებ“, – ამბობს ის.

„უღირსი ხალხის“ გასანათლებლად კი „ამღორძინებლები“ არც ლექსებს იშურებდნენ და არც ფრთიან სენტენციებს, საქართველოს პრეზიდენტს კი თბილ გულს და ერთგულებას ჰპირდებოდნენ, მხოლოდ იმ შემთხვევაში, თუ აბაშიძე „აჭარლების გვერდით დარჩება“ და თუ  „მიშა აჭარაში რევოლუციურ ვარდებს არ ჩამოიტანს…“

მომიტინგეებმა კიდევ ერთხელ ხაზგასმით აღნიშნეს, რომ „ცუდად არ ვცხოვრობთ, განსხვავებით სხვა კუთხეებისგან. ჩვენთან ხელფასები, პენსიები ყოველთვის დროულად რიგდება, ამის დაუნახაობა არ შეიძლება“. 37 წლის გამეორება სურთ საქართველოში – ამბობენ, მაგრამ ვის, არ აკონკრეტებენ.

„აღორძინების“ მხარდასაჭერ მიტინგზე აჭარის დროშის გვერდით, ნაცმოძრაობის „გაეროვნებული“ დროშაც ფრიალებდა. რაც შეეხება პლაკატებს, ძირითადად ასეთი შინაარსის იყო:  „გაუმარჯოს ბაბუს“, „გეყოფათ „კმარა“ და „შორს აჭარის ავტონომიისაგან“.

დასასრულს მიტინგს აჭარის მეთაურიც შეუერთდა. ასლან აბაშიძემ ისაუბრა დღეს არსებულ სიტუაციაზე ცენტრსა და რეგიონს შორის. კითხვას – თანამშრომლობს თუ არა რეგიონის ხელმძღვანელობა ცენტრთან? – თვითონვე აბსურდული და შეურაცხმყოფელი უწოდა: „აჭარა საქართველოს განუყოფელი ნაწილია. ბევრს უნდა, რომ შუღლი და მტრობა დათესოს, მაგრამ აჭარა იყო, არის და დარჩება ერთიანი  საქართველოს ქვაკუთხედად“.

აჭარის მეთაური „ქალამნების ჩაცმას აპირებს მონაპოვრის დასაცავად“ და ცენტრალური ხელისუფლებისაგან არსებული კურსის შეცვლას იმედოვნებს.

დღეს აჭარის მეთაურთან არსებული მთავარი საბჭოს გაფართოებული სხდომა ჩატარდა. დღის წესრიგში 2003 წლის სახელმწიფო ბიუჯეტის გეგმის შესრულების საკითხი იდგა. ასლან აბაშიძემ მკაცრი შეფასება მისცა გასული წლის ბიუჯეტის შესრულების შედეგებს. მისი თქმით, წარმოდგენილი დოკუმენტები სრულად ვერ ასახავს რეალობას. განსაკუთრებული უკმაყოფილება ბათუმის საგადასახადო სამსახურის მიმართ გამოხატა. მისი განცხადებით, დაუშვებელია, რომ ბათუმს ასეთი მაჩვენებელი ჰქონდეს. „დეკემბრის თვეში თუ შესაძლებელია ბიუჯეტის შესრულება, სხვა თვეებში რატომ არ ხდება“, – კითხულობს აბაშიძე.

კონტროლის პალატის თავმჯდომარის მოსაზრებით, საჭიროა საგადასახადო ინსპექციის თანამშრომლებს შენატანებისაგან გარკვეული პროცენტი დაურიგდეთ. ეს წინადადება ასლან აბაშიძემ მისაღებად მიიჩნია.

ავტონომიის მეთაურმა მკაცრი შენიშვნა გააკეთა ახალგაზრდული პარლამენტის პირველი სხდომის ჩაუტარებლობის გამო. ამასთან დაკავშირებით მინისტრთა საბჭოს თავმჯდომარის მოადგილემ ჩიტო ომერაძემ, სენატის თავმჯდომარემ ანთაზ ქიქავამ, პარლამენტის ვიცე-სპიკერმა ოსიკო გვარიშვილმა სხვადასხვა მიზეზი დაასახელეს, მაგრამ საყვედური მაინც დაიმსახურეს.

ასლან აბაშიძემ აჭარის პარლამენტის მიმართაც პრეტენზიები გამოთქვა: „პარლამენტის მუშაობა უფრო ქმედითი უნდა იყოს. თუ მისაღებია კანონი, თავის დროზე უნდა გაკეთდეს. მარტო რომ ვიყავი, უფრო უკეთესად ვართმევდი თავს საქმეებს“.

აღსანიშნავია, რომ დრამატული თეატრის კონფერენც-დარბაზში სხდომა განსაკუთრებულ ვითარებაში ჩატარდა. თეატრის დარბაზში ბავშვთა ოპერის სპექტაკლი „პრინცესა ტურანდოტი“ მიმდინარეობდა. თეატრის ეზოში კი ასლან აბაშიძის მხარდამჭერები მიტინგს მართავდნენ, დარბაზში ისმოდა სკანდირება „ბაბუ-ბაბუ“.

 

 

დღევანდელი დღე ბათუმში ვერტმფრენების გუგუნის ხმაზე გათენდა. სამხედრო ვერტმფრენები ქალაქის თავზე თითქმის მთელი დღის განმავლობაში დაფრენდენ. პარალელურად, ყოფილი უზენაესი საბჭოს მიმდებარე ტერიტორიასთან კბილებამდე შეიარაღებული სამხედრო ფორმირებები გამოჩნდა, თუმცა, ჯარისკაცები ავტომანქანებიდან არ გადმოსულან.

დილის 11 საათისთვის სამხედრო ავტომანქანები ჯარისკაცებთან ერთად ქალაქის ცენტრიდან გაუჩინარდა, ისინი ხ-ნძარსაწინააღმდეგო მანქანებით ჩაანაცვლეს. აჭარის მეთაურის რეზიდენციის წინ კი ხელისუფლების მხარდამჭერები შეიკრიბნენ.

ქალაქში გავრცელდა ინფორმაცია, რომ გუშინ აჭარაში, საგანგებო მდგომარეობიდან გამომდინარე მობილიზაცია გამოცხადდა. ამ ინფორმაციას ოფიციალურად არავინ ადასტურებს. აჭარის უშიშროების საბჭოს მდივნის, როსტომ ბოლქვაძის თქმით, მან მობილიზაციის შესახებ არაფერი იცის და ერთადერთი, რაც მისთვის არის ცნობილი ისაა, რომ ქალაქში ხელისუფლების მხარდამჭერები არიან შეკრებილი.

ქალაქში ვრცელდებოდა აგრეთვე ხმები იმის შესახებ, რომ დღეს ბათუმში, ადგილობრივი ხელისუფლების გადადგომის მოთხოვნით ფართომასშტაბიანი აქციები უნდა გამართულიყო. პარალელურად საუბრობდნენ იმაზეც, რომ მოსახლეობაში სხვადასხვა ტიპის იარაღი რიგდებოდა. იარაღის დარიგება დღის ბოლოს თავად ასლან აბაშიძემ უარყო.

ქალაქის მოსახლეობის ერთი ნაწილი პანიკამ მოიცვა. იმის შიშით, რომ რაღაც მოხდებოდა, ზოგიერთ მათგანს ბავშვები სკოლებშიც კი არ გაუშვიათ.

დღეს, ტელეკომპანია „იმედის“ ბათუმელ ოპერატორს  ბინაში შეიარაღებული პირები მიუვარდნენ, წაართვეს ვიდეოკამერა და კასეტა დაუმტვრიეს. ოპერატორს მოგვიანებით შს მინისტრის ჯემალ გოგიტიძის ჩარევით კამერა დაუბრუნეს, თუმცა სასტიკად დაემუქრნენ.

თუ როგორ განვითარდება მოვლენები, პროგნოზირება ამ ეტაპზე ძნელი სათქმელია.  ეტყობა, პასუხისმგებლობის საკუთარ თავზე  აღებას არც ხელისუფლება აპირებს, ვინაიდან, როგორც მისი ზოგიერთი წარმომადგენელი აცხადებს, ისინი კანონებს, ხოლო, მათი მხარდამჭერები კანონიერ ხელისუფლებას იცავენ.

იგივე პოზიციას აფიქსირებს უშუალოდ რეგიონის ხელმძღვანელიც, რომელიც, აჭარაში აფხაზეთის ამბების შესაძლო განმეორებას წინასწარმეტყველებს და პასუხისმგებლობას ქვეყნის ხელისუფლებასთან ერთად, უშუალოდ, ჟურნალისტებსაც აკისრებს.

 

აბაშიძის რეჟიმის საწინააღმდეგო ორგანიზაციის ჩამოყალიბებაზე რა პრეტენზია უნდა მქონდეს. პრეზენტაციაზე მისალმებასაც კი ვაპირებდი, თუმცა ედვარდ სურმანიძემ ჩათვალა, რომ იქ შეკრებილ ხალხს შესაძლოა ჩემთვის მხურვალე ტაში დაეკრა და ამიტომ არ ისურვა ჩემი სიტყვით გამოსვლა. არ შეიძლება დღეს საუბარი იმაზე, თუ ვინ იქნება აბაშიძის შემდგომი პერიოდისთვის ხელმძღვანელი. ჩვენ გვაქვს უკანასკნელი ბრძოლა აბაშიძის რეჟიმთან. ის გამუდმებით  სამხრეთ ოსეთს და აფხაზეთს გვახსენებს და წინააღმდეგობის გაწევის შემთხვევაში სისხლის დაღვრით გვემუქრება. ასეთ ფონზე ლაპარაკი იმაზე, რომ აბაშიძის შემდეგ მე უნდა ვიყვე, რადგან ზურაბ ჟვანიამ დამავალა, ან თქმა დაგასწარით, არ შეიძლება. პოლიტიკური თვალსაზრისით ეს არის უმწიფარობა, მორალური თვალსაზრისით კი მორალის ნაკლებობა.

„ჩვენი აჭარას“ მცდელობა ოპოზიციის გაერთიანებისა, პრაქტიკულად უშედეგოდ დამთავრდა.

ჩვენი ამოცანა იყო „ჩვენი აჭარა“ მათთვისაც ისეთი შინაური ყოფილიყო, როგორიც ბევრი სხვა ადამიანისთვისაა. „ჩვენმა აჭარამ“ ჩაატარა საპრეზიდენტო არჩევნები აჭარაში, მათ დააკომპლექტეს ყველა უბანი და უზრუნველყვეს ხმების დაცვაც. ჩვენ დავიწყეთ საარჩევნო პოლიტიკური სივრცის გახსნა აჭარაში ჯერ კიდევ სექტემბერ-ოქტომბერში. ამიტომ ჩვენგან დისტანცირებით სასიკეთო შედეგებს არამგონია რომ მიაღწიონ.

არის მეორე ფაქტორიც: პრაქტიკულად, ასლან აბაშიძის ხელისუფლების რესურსი იყო გამოყენებული ამ ხალხის თბილისში ჩამოსაყვანად, იყვნენ ისეთებიც, რომლებიც გულანთებული პატრიოტები და აბაშიძის ხელისუფლების მოწინააღმდეგეები არიან, მაგრამ აქტივისტებში შევიცანი ისეთებიც, რომლებიც აბაშიძემ თბილისში ჩამოიყვანა შევარდნაძის მხარდასაჭერად და რუსთაველზე ხერგილი მოგვიწყო. თქვენ წარმოიდგინეთ, ისინიც კი შევიცანი, 23 ოქტომბერს ჩვენი მიტინგი რომ დაარბიეს. ასეთი რესურსით ასლან აბაშიძის წინააღმდეგ ბრძოლა მაინცადამაინც წარმატებული ვერ იქნება. აი ეს საყვედური, თუ შენიშვნა შემიძლია ედვარდ სურმანიძის მიმართ ვთქვა. არ იყო სასურველი მეორე ოპოზიციური სტრუქტურის შექმნა.

საუბრობენ შესაძლო გარიგებაზეც.

შესაძლოა ასლან აბაშიძისთვის უფრო მისაღები იყოს ჟვანიასა და სურმანიძეს გაურიგდეს, ვიდრე სააკაშვილს და ბერძენიშვილს, ეს ბუნებრივია. ასლან აბაშიძე ცდილობს საქართველოს ახალი პრეზიდენტისგან თავი დაიცვას მისთვის ნაკლებად მტკივნეულ ხალხთან თანამშრომლობის გზით. თუ ასლან აბაშიძე ჟვანიას გადააბარებს ხელისუფლებას, მაშინ ჩაითვლება, რომ რაღაც ნომენკლატურული გადატრიალება ხდება. ეს არ იქნებოდა ურიგო, რადგან მერე დაინიშნება აჭარის უზენაესი საბჭოს არჩევნები და რეალურად გამოჩნდება, ვის რა ძალა აქვს. მაგრამ, ალბათობა იმისა, რომ აბაშიძე ჟვანია-სურმანიძეს გადააბარებს ხელისუფლებას, პრაქტიკულად ნულის ტოლია. ამიტომ გაუგებარია მათი სიმბიოზი (თანაცხოვრება) – ძირს აბაშიძე და მეორეს მხრივ კონსტრუქციული თანამშრომლობა მასთან.

ედვარდ სურმანიძეს ვუსურვებ იყოს აქტიური პოლიტიკოსი და ნაფთალინიდან ამოღებულს არ გავდეს. მას არ მიუღია მონაწილეობა ბოლო წლების, მითუმეტეს ბოლო თვეების პოლიტიკური პროცესებში. მაგრამ პრეზიდენტის ინაუგურაციის შემდეგ გამომჟღავნდა მისი ამბიციები. სხვათა შორის, მასთან და მის ბევრ მომხრესთან კარგი ურთიერთობა მაქვს. კარგი იქნება თუ მოხერხდება ორი ძალის თანამშრომლობა, ოღონდ წინასწარ გამოცხადებული აკვიატებების გარეშე, რომ აბაშიძიეს არ მიეცეს მანევრების შესაძლებლობა.

ეს პროცესები „ნაციონალებსა“ და „დემოკრატებს“ შორის დაპირისპირებას ხომ არ გამოიწვევს?

ზურაბ ჟვანია ფრთხილია, ვერ გარისკავს ცალკე გასვლას. ყველა რეიტინგი ადასტურებს, რომ  შეფარდება „ნაცმოძრაობასა“ და „დემოკრატებს“ შორის ექვსი ერთზეა, აჭარაში ეს შეფარდება ათი ერთზე იქნება. იმის დაფიქსირება, რომ ჟვანიას პარტია გაცილებით უფრო სუსტია, ვიდრე სააკაშვილისა, მათ ინტერესებში არ შეიძლება შედიოდეს. მე საკმაოდ მკაცრი განცხადება გავაკეთე ჟვანიას მისამართით, მაგრამ ეს იმას არ ნიშნავს, რომ მათთან თანამშრომლობის წინააღნდეგი ვარ.

„ჩვენი აჭარა“ აჭარაში ლიდერად თქვენს კანდიდატურას განიხილავს…

საპარლამენტო არჩევნების შემდეგ, ჩვენ შევალთ ინიციატივით, რომ პარლამენტმა მიიღოს კონსტიტუციური კანონი აჭარის შესახებ. ამ კანონის მიხედვით აჭარაში მეთაური და ორპალატიანი პარლამენტი არ იქნება.  იქნება მინისტრთა კაბინეტი და უზენაესი საბჭო – გუნდური მმართველობის ორგანო. ბუნებრივია, ჩვენი გუნდი მზადაა აჭარაში ხელისუფლების ასაღებად, მაგრამ პერსონალურად მე არ ვაპირებ აჭარაში დავიკავო რაიმე თანამდებობა, იქნება ეს პირველი, მეორე თუ მესამე.

უზენაესი საბჭოს თავმჯდომარის პოსტზე „ნაცმოძრაობიდან“  ვინ მოიაზრება?

გულწრფელად გეუბნებით, მაგაზე არ გვიფიქრია. წინ არის პოლიტიკური ვატერლოო, ან ჩვენ ვიგებთ, ან აბაშიძე. ჯერ აბაშიძის ხელისუფლებაა პოლიტიკურ საიქიოში გასასტუმრებელი. შემდეგ კონსტიტუციური კანონით დაინიშნება უზენაესი საბჭოს არჩევნები. არ არის გადაწყვეტილი თამაზ დიასამიძეზე, ოთარ ზოიძეზე, კობა ხაბაზზე, ჯემალ ინაიშვილზე, თუ რომელ პოლიტიკურ ფიგურაზე შევჩერდებით. არც ერთ ჩვენგანს არა აქვს ისეთი მდგომარეობა, სურმანიძისგან განსხვავებით, რომ არ შეეძლოთ პირველი ან მეორე პოსტის გარეშე იყვნენ წარმატებული პოლიტიკოსები.

 

 

ორშაბათს, ბათუმის სასამართლოს წინ, დაკავებული „ნაციონალების“, ნური ანანიძისა და ვაჟა კახიძის  ახლობლებმა ქუჩა გადაკეტეს.

დაკავებულთა ადვოკატები ირაკლი ფხალაძე და ზურაბ გვარჯალაძე  აცხადებენ, რომ დაპატიმრება უკანონოდ მოხდა და მას მოტივად პოლიტიკური სარჩული უდევს.

ზურაბ გვარჯალაძე: „ბრალდებები ვაჟა კახიძის მიმართ (იარაღის, საბრძოლო მასალისა და ნარკოტიკების უკანონო შეძენა-შენახვა) არის აშკარად შეთითხნილი, ჩხრეკა ჩატარდა უკანონოდ“. იგივეს აცხადებს ნური ანანიძის (თუმცა მის საქმეში ნარკოტიკი არ ფიგურირებს) ადვოკატიც, ირაკლი ფხალაძეც.

გზის გადაკეტვის მიზეზი გახდა ის, რომ აჭარის უმაღლესმა სასამართლომ არ დააკმაყოფილა ადვოკატთა შუამდგომლობა საქალაქო სასამართლოს მიერ გამოტანილი აღმკვეთი ღონისძიების (წინასწარი პატიმრობა) გაუქმებისა და დაკავებულთა დაუყოვნებლივი გათავისუფლების შესახებ. როგორც ადვოკატებმა განაცხადეს, ისინი აპირებენ მიმართონ საქართველოს გენერალურ პროკურატურას, რათა მიაღწიონ საქმეების გამოთხოვას და თბილისში გადატანას. მათივე თქმით, ისინი უმაღლესი სასამართლოს მიერ (მოსამართლე გივი აბაშიძე) სხვა გადაწყვეტილების მიღებას არც ელოდნენ, მიუხედავად იმისა, რომ შუამდგომლობაში მითითებული მოტივაცია საკმარისი იყო, რათა აღმკვეთი ღონისძიება გაუქმებულიყო.

როგორც ადვოკატები ამბობენ, ისინი შეხვდნენ დაკავებულებს და მათ მიმართ არანაირ ფიზიკურ ზეწოლას ადგილი არ ჰქონია. რაც შეეხება ფსიქოლოგიურს, – გამორიცხული არაა ასეთ ზეწოლას ჰქონოდა ადგილი, თუმცა თავად დაპატიმრებულები ამას არ ადასტურებენ. „შეიძლება ეშინიათ და იმიტომ ვერ ამბობენ ვერაფერს“, – თვლიან ადვოკატები, რომლებიც უმაღლესი სასამართლოს მისამართით აცხადებენ, რომ „დადგენილება გამოცხადდა სხდომის დამთავრებიდან 2 წუთში, რაც იმას ნიშნავს, რომ სასამართლოს დადგენილება წინასწარ ჰქონდა მიღებული“.

ე.წ. „შავრაზმელებმა“ გუშინ, სასამართლოს შენობის წინ შეკრებილი ადამიანების მსუბუქი ავტომანქანით (სახ. ნომერი: AMA 661) მიადგნენ და წინააღმდეგობის გაწევის მიუხედავად პიკეტი მანქანითვე გაარღვიეს. ფაქტობრივად ხალხს გადაუარეს. რამდენიმე ადამიანი მსუბუქად დაშავდა. ეს ყველაფერი ქალაქის პოლიციის შეფის ჯუმბერ ტაკიძის თვალწინ ხდებოდა, რომელმაც ცოტა ხნით ადრე ხალხს კატეგორიულად მოსთხოვა გაეთავისუფლებინათ ქუჩა. ხალხი აჭარის შს მინისტრის მისვლას ითხოვდა, ვინაიდან ყველაფერში სწორედ მას ადანაშაულებდნენ და რატომღაც ხაზს უსვამდნენ იმას, რომ ასლან აბაშიძემ არაფერი იცის, რაც ხდება აჭარაში და მას გარემოცვა ატყუებს.

მინისტრი მოპიკეტეებთან არ მისულა. მოგვიანებით გზის გახსნა ისევ პოლიციას მოუხდა, რა თქმა უნდა, ძალის გამოყენებით. ხალხი მას შემდეგ დაიშალა, რაც ადვოკატებსა და შს სამინისტროს წარმომადგენლებს შორის მოლაპარაკებები დაიწყო.

ოფიციალური ინფორმაციით, ნური ანანიძე  შეიარაღებული დაჯგუფების ჩამოყალიბებას გეგმავდა. როგორც ცნობილია, იგი ვეტერანთა კავშირის თავმჯდომარეა, რომელშიც ასეულობით ყოფილი მეომარია გაერთიანებული.

ის, რომ დღეს ფაბრიკა-ქარხნები გაჩერებულია, არავისთვისაა ახალი. არც ისაა ახალი, რომ იქ არსებული მანქანა-დანადგარებით, თუ კონსტრუქციების ჯართში ჩაბარებით, ბევრმა ხელი მოითბო. ყოველ ფეხის ნაბიჯზე ჯართის მიმღები პუნქტებია, რომლებსაც არავინ აკონტროლებს.

ხელვაჩაურის რაიონში, მანდარინის შემფუთავი ქარხნის ეზოში მჟავა-მედეგის მასალისაგან დამზადებული ცისტერნები იყო მოთავსებული. რამდენიმე დღის წინ, ღამით, ქარხნის ტერიტორიიდან ექვსი ცისტერნა მოიპარეს. გავრცელებული ინფორმაციით, თითოეულის ღირებულება დაახლოებით 6-10 ათას დოლარს აღწევს. ვრცელდება ინფორმაცია იმის შესახებაც, რომ თანხა ორგანიზაციის დირექტორს  ნიაზ ვარშალომიძეს და რაიონის ქონების მართვის სამმართველოს ხელმძღვანელს ედუარდ გორაძეს გაუნაწილებიათ.

აღნიშნულთან დაკავშირებით „გაზეთი ბათუმელები“ ინფორმაციის გადამოწმების მიზნით ორივე მათგანს დაუკავშირდა.

ნიაზ ვარშალომიძე: – მსხვილი და მცირე ბიზნესის ნებართვა აჭარის უმაღლესმა საბჭომ დამრთო. ეს სამი ცისტერნა („პავილიონის“ ეზოში მხოლოდ სამი მჟავა-მედეგის ცისტერნაა შემორჩენილი).  ჩემი საკუთრებაა – ერთმა თბილისელმა ვალში მომცა. ათი წელია აქ მიწყვია, ეზოში ადგილი არ მქონდა, ჩემია და კიდეც ვაპირებდი გაყიდვას, მაგრამ საქმე ჩამიშალეს – არეულობაა და შემდეგ გაატანეო. (მყიდველის ვინაობას  და ღირებულებას არ აკონკროტებს – მ.მ.). საგადასახადოში გადასახადს გადავიხდი და მაინც გავყიდი. იქით ეძებონ ქურდები. 26 ცისტერნა, რომელიც ბალანსზე იყო, მაშინდელმა სოფლის მეურნეობის მინისტრმა ანზორ დევაძემ გაანადგურა და გაყიდა. რაიონის გვირაბ-მაცივარიც დაჭრეს და ჯართად ჩააბარეს.

ედუარდ გორაძე: – მე და ნიაზ ვარშალომიძე ხშირად ერთად ვართ, ნათლობა გვაქვს. ეს ჭორი ჩემს მიმართ აგორდა და ნიაზიც მოჰყვა. თითქოსდა ცისტერნები ქარხნის ბალანსზეაო. იმ ღამეს ცისტერნებს კი არა, ხის მასალას ეძებდა რაიონის პოლიცია და ეკოპოლიცია. თითქოს ეს ხის მასალა მე მქონდა აქ შენახული და აქედან გამქონდა. ამით ცდილობენ ჩირქი მომცხონ, ჩემში კონკურენტს ხედავენ. ოფიციალურად დავსვამ ფაქტების გადამოწმების საკითხს, პირდაპირ ვიტყვი, ვის რა აქვს წაღებული, ეს ყველაფერი ისედაც დაფიქსირებულია. ყველას უკან მოვაყვანინებ გაყვანილ მანქანებს. საბოლოო ჯამში მე და ყოფილი გამგებელი გავილანძღეთ ამაზეც და თბილისში მიტინგზე ჩაყვანილ ხალხზე ფულის გაცემის თაობაზეც.

ცისტერნების ჯართში ჩაბარების ნებართვა ვინ გასცა?

ნებართვა გასცა ქონების მართვის სამმართველომ, ცისტერნები დამფუძნებელმა – სოფლის მეურნეობის სამინისტრომ წაიღო. ეს ორი წლის წინათ იყო. ამაზე დავა წარმოიშვა, მაგრამ ყველა გაჩუმდა, რადგანაც ეს საქმე სამინისტროს ეხებოდა. მინისტრთა საბჭოს განკარგულების თანახმად, ფაბრიკის ქონების ჯართად დაჭრის შემდეგ, რეალიზაციიდან მიღებული თანხის 20% ბიუჯეტში უნდა გადარიცხულიყო. ფაბრიკის ქონება გაიყიდა (ჩაის საკრეფი უნიკალური როლერები ჯართში 100 ლარად ჩააბარეს) და იქაურ თანამშრომლებს ამ თანხიდან ხელფასებიც კი არ დაურიგეს.

ახლახანს კიდევ ერთი არაპოლიტიკური ორგანიზაცია „დემოკრატიული აჭარა“ დაფუძნდა. როგორც წესი, მსგავსი ტიპის ორგანიზაციები დედაქალაქში ამჯობინებენ რეგისტრაციის გავლას. პირველობის დასამტკიცებლად დედაქალაქში ბათუმიდან, ამჯერად, ამ ორგანიზაციის დამფუძნებლებმა გადასხეს „დესანტი“. ფილარმონიის დიდ საკონცერტო დარბაზში აჭარიდან ჩასულმა დაახლოებით 4000 კაცმა მოიყარა თავი – არასამთავრობო და საზოგადოებრივი ორგანიზაციების, „დემოკრატიისა და სამართლიანობის ცენტრის“, „ჩვენი აჭარას“, ორგანიზაცია „აფსაროსის“ წარმომადგენლებმა. როგორც შეხვედრის ორგანიზატორები აცხადებდნენ, წასვლის მსურველები გაცილებით მეტნი იყვნენ, მაგრამ სიები მაქსიმალურად შემცირდა.

მოკლედ, დედქალაქს ესტუმრნენ ის ადამიანები, ვინც უკმაყოფილოა აჭარის ხელისუფლებით.

ბურჯანაძე-დემოკრატებმა ხალხის თბილისში ჩასაყვანად იგივე მეთოდები გამოიყენა, რის გამოც ერთი თვის წინ „აღორძინებას“ დასცინოდა. გავრცელებული ინფორმაციით, ამ პარტიამ აჭარიდან აქტივისტების ჩასაყვანად 150 ათასი ლარი გაიღო. 200-200 ლარი გადაუხადეს მძღოლებს, 50-50 მხარდამჭერებს…

„გაზეთ ბათუმელებთან“ საუბარში მსგავსი რამ კატეგორიულად უარყო „დემოკრატიული აჭარა“-ს ერთ-ერთმა ინიციატორმა ჯელალ ქიქავამ: „ამ ხალხის ჩასაყვანად პირადად ჩემს ფულს ვხარჯავ და ეს პრობლემა ნამდვილად არ არის, მხოლოდ მძღოლებს ვუხდი“. თავისი სიტყვების უტყუარობის დასამტკიცებლად ჯელალ ქიქავამ ჯიბიდან ლარების დასტა ამოიღო და დანახარჯის ოდენობად 10 ათასი ლარი დაასახელა.

მის განცხადებაში კორექტურა შეიტანა ორგანიზაციის ახალგაზრდა აქტივისტმა, რომელიც ბევრად უფრო გულწრფელი ჩანდა: „ბურჯანაძე-დემოკრატები“ გვაფინანსებს, ზუსტი ციფრი, ტყუილი რომ არ გითხრათ, არ ვიცი. ვიცი ის, რომ მძღოლებს 100 ლარს  და საწვავის  ტალონებს ურიგებდნენ. აქტივისტებს საგზლად თითო პური, ძეხვი და ლიმონათი დაურიგდათ. ჯიბის ფულად 5-5 ლარიც გაიცა“…

„დემოკრატიული აჭარა“-ს დამფუძნებლები, ისევე როგორც „ჩვენ აჭარა“-ში გაიძახიან, რომ მათი უმთავრესი მიზანი აჭარაში არსებული ხელისუფლების დემონტაჟია. პარალელურად მიმდინარეობს გამალებული ბრძოლა იმ სკამის დასაუფლებლად, რაზეც წლების განმავლობაში ასლან აბაშიძე მყარად იჯდა. კულუარული ინფორმაციით, რომელზეც ღიად საუბარს ყველა გაურბის, „ორივე აჭარა“ ინტენსიურ მოლაპარაკებას აწარმოებს აჭარის დღევანდელ ხელისუფლებასთან. რა თქმა უნდა, ცალ-ცალკე.

„დემოკრატიულ აჭარა“-ს ჰყავს გამოკვეთილი კანდიდატი, რომელიც  „მზადაა გაერთიანებისთვის, რათა ერთიანი ძალით იბრძოლონ აჭარაში დემოკრატიისთვის, დაიცვან აქ მცხოვრებთა უფლებები, აღიკვეთოს თავისუფალი სიტყვის  დევნა, ძალის დემონსტრირება“. ეს არის ედვარდ სურმანიძის ლოზუნგები, რომელიც ფორუმზე დაცვის თანხლებით და ვარდებით „შეიარაღებული“ გამოჩნდა. შეკრებილები მას ოვაციებით შეხვდნენ: „სურმანიძე, სურმანიძე, ძირს აბაშიძე, ძირს მისი კლანი“ – სკანდირებდა დარბაზი.

გამომსვლელები ხოტბას ასხამდნენ ახალ პრეზიდენტს, მეორეს მხრივ კი ბოდიშს იხდიდნენ იმ ხალხის ნაცვლად, ვინც ძალით ჩაიყვანეს შევარდნაძის მხარდასაჭერად. ამისთვის ასლან აბაშიძეზე პასუხის მოთხოვნასაც აპირებენ.

სურმანიძემ ისაუბრა მოთხოვნებზე, რომელსაც ავტონომიის მეთაურს უყენებდა: „ვუთხრათ კმარა მოძველებულ რეჟიმს და ჩავაბაროთ ისტორიას. ჩვენ თითოეულ მოსახლესთან მივალთ და დავარწმუნებთ შემოგვიერთდნენ, რათა ერთად ვიბრძოლოთ. დარწმუნებული ვარ ორ თვეში საზოგადოება, გოდერძის უღელტეხილიდან ჩოლოქამდე, მზად იქნება ცვლილებებისათვის“.

აჭარის ხელმძღვანელობას ედვარდ სურმანიძემ პირველ რიგში  საგანგებო სიტუაციის გაუქმების მოთხოვნა წაუყენა. „უნდა შევქმნათ ახალი კადრები, წარმოვაჩინოთ ახალგაზრდობა და ახალი სახეები. ჩავატაროთ დემოკრატიული არჩევნები გაყალბების გარეშე და ვნახავთ, რომ „აღორძინება“ ვერ გადალახავს 7-პროცენტიან ბარიერს. ჩვენ ვთავაზობთ თავისი ხელით, უახლოეს კვირეებში ცენტრალური ხელისუფლებისგან მიტაცებული პრეროგატივები გააუქმოს. უნდა გაუქმდეს უშიშროების სამინისტრო, საბაჟო, საფინანსო და სასაზღვრო სამსახურები“.

ცნობილი სახეებიდან შეხვედრაზე ვარდების რევოლუციის აქტივისტი გოგა ხაინდრავაც დაფიქსირდა.

სურმანიძის ამბიციამ, მოვიდეს აჭარის ხელისუფლებაში, ოპოზიციონერ რევოლუციონერებში გაღიზიანება გამოიწვია, თუმცა რადიკალურ განცხადებებს, ჯერჯერობით, ყველა ერიდება. ისე, საზოგადოებას კი ურჩევენ, გაიხსენოს უკანასკნელად როდის დალანდეს სურმანიძე აქტიურ პოლიტიკაში.

სურმანიძე არანაირ რეპლიკას არ აქცევს ყურადღებას და ბათუმში ჩამოსვლას გეგმავს, რათა სათავეში ჩაუდგეს „რევოლუციას ძირმომპალი რეჟიმის დასამხობად“. სურმანიძემ „გაზეთ ბათუმელებთან“ თავისი პოზიცია ავტონომიის სტატუსთან დაკავშირებითაც დააფიქსირა: „ავტონომიის გაუქმება არ დგას დღის წესრიგში, ყოველივე მიზანდასახულად განხორციელდება სტატუსის ქვეშ, აჭარა იქნება მაგალითის მიმცემი აფხაზეთისა და სამაჩაბლოსათვის“.

ედვარდ სურმანიძეს, როგორც მომავალ ხელისუფალს, აჭარიდან სპეციალურად მის სანახავად ჩასულ შემწეობის მთხოვნელებთან შეხვედრაც არ დაზარებია. ფორუმზე მისული თბილისელი სტუმრები სინამდვილეს თვალს უსწორებდნენ და „გაზეთ ბათუმელებთან“ საუბარში აცხადებდნენ, რომ აქ და ამგვარ შეკრებებზე ხალხი ქულების დასაწერად და მომავალი ლიდერისთვის თავის დასამახსოვრებლად მიდის. „ეს ჩვენი უბედურებაა, ბევრი ცდილობს ამ ძალას თავი დაამახსოვროს, რათა გამარჯვების შემთხვევაში თანამდებობას გამოჰკრას ხელი. სანამ ასე ვიქნებით, არაფერი გვეშველება“, – ამბობდნენ ისინი.

შეკრებილი საზოგადოება იმედოვნებს, რომ თებერვალში, როცა მთა და ბარი იებით დაიფარება, აჭარაში იების რევოლუციას მოახდენენ.

 

ორი დღის წინ მოძრაობა „ჩვენი აჭარას“ ინიციატივით აჭარაში, მთელ რიგ  საკრებულოებზე ხუთჯვრიანი დროშების აფრიალების პარალელურად, ბათუმში „აღორძინების“ მხარდამჭერები შეიკრიბნენ. დაახლოებით 30-40 კაცი ვარდებით, „აღორძინების“ დროშებითა და „ბაბუ, ბაბუს“ ძახილით ბულვარში, მემედ აბაშიძის ძეგლისკენ დაიძრა.

იმ დღევანდელი აქცია შეფასდა, როგორც „აღორძინების“ უსუსურობის დემონსტრირება.

ამიტომ, „აღორძინებისა“ და ასლან აბაშიძის მხარდამჭერები ბათუმში გუშინაც შეიკრიბნენ. ბუნებრივია, მათი შეკრების მიზეზი, როგორც თავად განაცხადეს, ბოლო დროს განვითარებული მოვლენებია. „ჩვენ დავიცავთ ასლან აბაშიძეს და დავიცავთ აჭარას“. „ყველა, ვისაც სურს მშვიდობიანი ცხოვრება აჭარაში, ვალდებულია ქუჩაში გამოვიდეს და გვერდით დაგვიდგეს“, „აბაშიძეზე უკეთესი ხელმძღვანელი აჭარას არ ჰყოლია და არც ეყოლება“ – აცხადებდნენ თეატრის წინ შეკრებილი მომიტინგეები და გაიძახოდნენ „გაუმარჯოს ბაბუს“. თუმცა, ერთი შეხედვითაც შეამჩნევდა კაცი, მათი მოქმედება ძირითადად იქეთკენ რომ იყო მიმართული, ყველაფერი დაეფიქსირებინა მედიას. სხვათა შორის, იმ მასმედიას, რომელსაც მომიტინგეები, თუ ანალოგიურ აქციათა ორგანიზატორ-მონაწილეები, ხშირად აუგად მოიხსენიებენ. თუმცა ამ მიტინგზე არ ყოფილა იმის საშიშროება, რომ რომელიმე ჟურნალისტს ანგარიშს გაუსწორებდნენ…

მომიტინგეთა უმეტესობას სხვადასხვა რაიონიდან ჩამოსული მოქალაქეები შეადგენდენ. მათ შორის იყვნენ ზოგიერთი უმაღლესი სასწავლებლის პროფესორ-მასწავლებლები, სტუდენტები, სამთავრობო დაცვის წევრები და აჭარის ხელისუფლების  წარმომადგენლებიც კი.

ამ ადამიანებში, ყველაზე დიდ უკმაყოფილებას მოძრაობა „ჩვენი აჭარა“ და „კმარას“ აქტივისტების აჭარაში მოღვაწეობა იწვევს და ამას ისინი არც მალავდნენ. ისინი, სწორედ ამ მოძრაობებს აკისრებენ პასუხისმგებლობას საზოგადოების შიგნით მოსალოდნელ დაპირისპირებაზე და ახსენებენ მათ, რომ „შვილს ყველა დედა ერთნაირი ცრემლით დასტირის“. მომიტინგე ქალბატონთა ერთი ნაწილისათვის, შეკრების უმთავრესი მიზანი სწორედ ის ყოფილა, რომ საქმე აქამდე არ მივიდეს.

ამჯერად, ბათუმის ქუჩებში ასობით ადამიანი გამოვიდა (თუ ჩამოვიდა), რითაც ხელისუფლების წარმომადგენლებს სახეზე აღტაცებაც კი ეტყობოდათ. თუმცა,  ზოგიერთ მათგანში გარკვეულმა შიშმა მაშინ დაისადგურა, როცა მომიტინგეები ასლან აბაშიძის რეზიდენციისაკენ დაიძრნენ. აქაოდა – ხვალ რომ ოპოზიცია ანალოგიურად მოიქცეს, შეიკრიბოს და ფანჯრებზე მშვიდობიანად მოგვიკაკუნოს, რა პასუხი უნდა გავცეთო. მათი შიში მაშინ გაქარწყლდა, როცა მომიტინგეებმა რეზიდენციას გვერდი აუარეს (უფრო ზუსტად არ გაატარეს) და აჭარის ტელევიზიისაკენ, შემდეგ კი უნივერსიტეტისაკენ გაემართნენ.

ასლან აბაშიძის მხარდამჭერები აცხადებენ, რომ ამაზე ფართომასშტაბიან მიტინგსაც გამართავენ, თუ, რა თქმა უნდა, ამის აუცილებლობას დაინახავენ…

 

„ვარდების რევოლუციის“ შემდეგ ქვეყანაში ერთპარტიული ხელისუფლების პრეცედენტი იქმნება. არსებული ხელისუფლების ოპონირებას მემარჯვენე ორიენტაციის პოლიტიკური ძალები აპირებენ. ექსპერტების აზრით, პარლამენტში მათი მოხვედრა მხოლოდ გაერთიანებითაა შესაძლებელი. „ახლების“, „მრეწველების“, „ედპ“-სა და „ტრადიციონალისტების“ გაერთიანებაზე კონსულტაციები მიმდინარეობს, თუმცა მოახერხებენ თუ არა ისინი არჩევნებამდე  ამას, ძნელი სათქმელია.

ედპ-ს აჭარის პარლამენტში თავისი დეპუტაცია ჰყავს. აჭარის პარლამენტის 2001 წლის არჩევნებზე „აღორძინებამ“ იშვიათი გამონაკლისი დაუშვა და დემოკრატიული ფონის შესაქმნელად „მრეწველებსა“ და ედპ-ს 5%-იანი ბარიერის გადალახვის საშუალება მისცა. ოპონენტები მაშინ ორივე პარტიას „აღორძინებასთან“ გარიგებაში ადანაშაულებდნენ.

ედპ-ს მთავარი კომიტეტის წევრი და აჭარის ორგანიზაციის ხელმძღვანელი ილია ვერძაძე აჭარის ხელისუფლებასთან ალიანსს უარყოფს: „ჩვენ ყოველთვის ვიყავით აჭარის ხელისუფლების ოპოზიციაში. ჩემთვის  მიუღებელია გარკვეული ფორმები, რადიკალურ დაპირისპირებას შეიძლება, როგორც დადებითი, ისე უარყოფითი მომენტები მოჰყვეს. მე ვთვლი, რომ პოლიტიკური დაპირისპირება სამოქალაქო დაპირისპირებაში არ უნდა გადაიზარდოს“.

ილია ვერძაძე აჭარის პარლამენტში თავის მოღვაწეობას უარყოფითად აფასებს. „პარლამენტში ჩემი ორწლიანი მოღვაწეობით უკმაყოფილო ვარ და ვთვლი, რომ ყოველდღიურმა რუტინულმა საკანონმდებლო საქმიანობამ ჩემზე უარყოფითად იმოქმედა“.

ილია ვერძაძე ბოლო დროს საპარლამენტო სხდომებზე არ ჩანს. იგი აქტიურ პოლიტიკაში ბრუნდება და მოახლოებულ არჩევნებისათვის აჭარაში ხმების მნიშვნელოვანი რაოდენობის მოსაპოვებლად ბრძოლას აპირებს. ედპ დღეს არსებული ხელისუფლების ოპოზიციაში იმყოფება, თუმცა სარიშვილის გადაყენების შემდეგ აჭარის ხელისუფლებასთან ტრადიციულ ურთიერთობებს წყვეტს. მართალია, მოძრაობა „ჩვენს აჭარაში“ გაერთიანებას ედპ ჯერ არ აპირებს, თუმცა მათ აქტიურობას დემოკრატიული არჩევნების ჩატარებისათვის დადებითად აფასებს და ხმების დაცვის იმედიც აქვს. „მე მესახება, რომ ძალიან დიდ ნაწილში აქცენტირება მაინც კეთდება რევანშისტულ პოზიციებზე“ – აცხადებს ვერძაძე, თუმცა აჭარის ხელისუფლების გარდაუვალ შეცვლაზე საუბრობს. იგი ამ თემაზე უახლოეს დღეებში პოლიტიკურ განცხადებასაც გააკეთებს.

სოფელ გონიოში ნაციონალების მხარდამჭერთა მიტინგი საკრებულოს თავმჯდომარეს თანამდებობის დატოვების ფასად დაუჯდა. თავად ზურა კახიძის თქმით, „არანაირი ზეწოლა არ ყოფილა, საკუთარი განცხადების საფუძველზე გადავდექი, გადავიღალე. დღეს ხელისუფლებაში მუშაობა, სოციალურად გაჭირვებულ მოსახლეობასთან ურთიერთობა, ძალიან ძნელია, უამრავი პრობლემაა გადასაწყვეტი“. თუმცა, ყოფილი საკრებულოს თავჯდომარე ისევ საკრებულოს თანამშრომლად  რჩება, ამ დღეებში გადაწყდება მისი მოადგილედ დანიშვნის საკითხი.

„გაზეთი ბათუმელები“ ახალ თავმჯდომარეს სიმონ ზაქარაძესაც გაესაუბრა, რომელმაც გამორიცხა ნაციონალების დროშის კულტურის სახლის შენობაზე ატანა: „კულტურის სახლის შენობის თავზე დროშები არ ყოფილა, ეზოში ეჭირათ. ჯამბულ ბერიძე და კაკაბაძე (სახელი არ მახსოვს) შემდეგ მოვიდნენ ჩემთან და მომიბოდიშეს, შეგვეშალაო“.

მიტინგი ახალსოფელშიც იყო დაგეგმილი, მაგრამ მისი ჩატარება ვერ მოხერხდა. რადგანაც ხელვაჩაურის რაიონის გამგეობის წარმომადგენლები და საკრებულოს თავმჯდომარე დანიშნული მიტინგის ადგილზე დროულად აღმოჩნდენ.

პენსიების გაცემასთან დაკავშირებით ავტონომიურ რესპუბლიკაში რამდენიმე თვის წინ დაწყებულმა ექსპერიმენტმა, როგორც ჩანს, არ გაამართლა. მაშინ პენსიების გაცემა კავშირგაბმულობისა და ფოსტის სამინისტროს ჩამოართვეს. ექსპერიმენტი მხოლოდ ხელვაჩაურის რაიონსა და ბათუმს მოიცავდა, სადაც  პენსიებს „საზღვაო ბანკი“ გასცემდა.

ჩვენი ინფორმაციით, ამ დღეებში აჭარის მეთაურთან გამართულ თათბირზე გადაწყდა, რომ პენსიები ისევ სამინისტრომ დაარიგოს. ანუ, პენსიონერებს ფოსტალიონები პენსიას სახლში მიუტანენ.

კავშირგაბმულობისა და ფოსტის მინისტრის, ნოდარ თამაზაშვილის თქმით, ზემოთქმული განაპირობა იმან, რომ შესაბამისი მოთხოვნა პენსიონერებს გაუჩნდათ. თუმცა, მათ, ვისაც სურთ პენსია ბანკში აიღონ, მინისტრის თქმით, არანაირი პრობლემა არ შეექმნებათ – ნებისმიერ პენსიონერს კუთვნილ პენსიას ბანკში გადაურიცხავენ.

უნდა აღინიშნოს, რომ ნოდარ თამაზაშვილი იმთავითვე წინააღმდეგი იყო  სამინისტროს აღნიშნული ფუნქცია ჩამორთმეოდა. მინისტრი თავის პოზიციას იმით ხსნიდა, რომ ეს ფოსტის განყოფილებების მუშაობის პარალიზებას გამოიწვევდა. დატარების სამსახურებში ფოსტალიონები ფაქტობრივად უმუშევრები რჩებოდნენ. ეს განსაკუთრებით მტკივნეული იყო იმ სოფლებში, რომლებშიც აღნიშნული ექსპერიმენტის განხორციელება დაიწყო.

ნოდარ თამაზაშვილის თქმით, გამორიცხული არაა ვითარება ისევ შეიცვალოს და ხელისუფლება, უკვე შეჩერებულ ექსპერიმენტს, ხელახლა მიუბრუნდეს.

 

ხელვაჩაურის რაიონის სოფელ მახოში მცხოვრები სულიკო ძნელაძე აჭარის ხელმძღვანელთან ასლან აბაშიძესთან ფიზიკური მსგავსების გამო საკმაოდ პოპულარულია. პროფესიით იურისტი, გადამდგარი სამხედრო პოლკოვნიკი, ახლა ადვოკატად მუშაობს. ბატონი სულიკო ხუთ ენას ფლობს, მათ შორის თურქულს. სწორედ ამიტომ ხშირად უხდება თურქეთის რესპუბლიკაში ყოფნა ჩვენი მოქალაქეების უფლებების დასაცავად.

თუ როგორ ცხოვრობს აჭარაში ასლან აბაშიძის ორეული, ამის შესახებ „გაზეთ ბათუმელებთან“ თავად რესპონდენტი საუბრობს.

– ბატონო სულიკო აჭარის მეთაურთან მსგავსების გამო კურიოზები ხომ არ შეგმთხვევიათ?

– მაინცა და მაინც არა. რამდენჯერმე ვიყავი, სადაც ჯერ არს. აყვანილი ვარ აღრიცხვაზე. გამაფრთხილეს, მოვერიდო რაიმე ნიშნით იმიტაციას. ერთხელ თბილისში ვიყავი, განათლების სამინისტროში მივიტანე დოკუმენტები მახინჯაურის ბავშვთა სახლის შესახებ. კარტოზიას ყურადღება არ მოუქცევია, მაგრამ სამინისტროში ატყდა ერთი ამბავი, – აჭარიდან ბაბუ გვესტუმრაო. მეორე დღესვე დავბრუნდი ბათუმში. სადგურში ორი ახალგაზრდა დამხვდა. მითხრეს, მოემზადე, ჩვენთან ერთად წამოხვალო. მიმიყვანეს შს სამინისტროში, მაშინ ენვერ ხალვაში იყო მინისტრი. მან საგანგებო მიღება მომიწყო. ხილით და კონიაკით პატარა ტაბლა დადგეს, გვერდით ჯემალ გოგიტიძე და თენგიზ კონცელიძე მომისხდნენ. ენვერ ხალვაშმა მკითხა, ბიჭები თუ მყავდა. ორი მყავს და ორივე რუსეთში-მეთქი – ვუთხარი. მერე მითხრეს – იცით რაზე გამოგიძახეთ? შენმა ძმამ დაგვირეკა, რომ აღრიცხვაზე აგიყვანოთო. ამის შემდეგ სურათები გადამიღეს, დაახლოებით 45 პოზაში. მისამართი მკითხეს, არადა თენგიზ კონცელიძემ მშვენივრად იცოდა, რადგან სამჯერ ვყავდი უშიშროების კომიტეტში. მერე მერსედესში ჩამსვეს და სახლში წამიყვანეს.

– თქვენზე ამბობენ,  სარფის საბაჟოზე მანქანები გაუშვა ურიგოდო.

– მაშინ რიგები კვარიათამდე იყო. ჩემთან მოვიდნენ უშიშროების სამსახურის ბიჭები, გამოვეწყვე და წავყევი. სარფში რომ მივედით, თურმე ბატონი ასლანი იქედან 5 წუთის წამოსული იყო. გაკვირვებული და აფორიაქებული მიყურებდნენ. ალბათ ფიქრობდნენ, რა არ მოეწონა, უკან რამ დააბრუნაო. მე გავეცი ბრძანება, ის მანქნები, იქ რომ იდგნენ, სასწრაფოდ გაეშვათ. დაახლოებით 500 მანქანა გავიდა ურიგოდ. მაშინ საზღვარზე რუსის ჯარი იდგა. ერთ-ერთ ჯარისკაცს გამოველაპარაკე, საიდან ხარ-მეთქი. ზაპოროჟიედანო – მიპასუხა. ვუთხარი, რომ იქ რამდენიმე წელს ვმსახურობდი და ჩვენ „ზემლიაკები“ ვართ-მეთქი. საწყალს გაოცებისაგან ავტომატი გაუვარდა ხელიდან.

– თქვენი საქმიანობის შესახებ რას გვეტყვით, რითი ხართ დაკავებული?

–  იურისტი ვარ. საბჭოთა პერიოდში პროკურატურაში ვმუშაობდი. ამჟამად ადვოკატად ვმუშაობ.

– უფრო ხშირად რა საქმეზე ხდებიან ჩვენი მოქალაქეები თურქეთის სასამართლოში?

– ჩვენგან განსხვავებით ძალზე მკაცრად ისჯება იქ ქურდობა და პროსტიტუცია. ყველაზე ხშირად ამ საკითხებზე მიხდება ჩასვლა. ჩვენთან მკვლელობაზე სამ წელს აძლევენ. იქ ქურდობაზე 50 წელს უსჯიან.

– დღევანდელ პოლიტიკურ სიტუაციას როგორ აფასებთ?

– მთავარია, მშვიდობა იყოს. საქართველოს ერთი პრეზიდენტი უნდა ჰყავდეს და ჰყავს კიდეც. კანონს ყველა უნდა დაემორჩილოს, ისე როგორც ევროპაშია. რაც შეეხება ასლან აბაშიძეს, ის ხალხისათვის იბრძვის, თუმცა გარშემომყოფები არ უვარგა. ზოგიერთები რომ ფიქრობენ, ეს კაცი აჭარას არ დაკარგავს. იმედი მაქვს, რომ საქართველო ერთიანი იქნება მუდამ. სააკაშვილი ახალგაზრდა კაცია. ხალხს მისი დიდი იმედი აქვს და ღმერთმა ქნას, რომ მან გაამართლოს. ბოლოს და ბოლოს ხომ უნდა გვეშველოს?!

ბათუმში კიდევ ერთი ახალგაზრდული არასამთავრობო ორგანიზაცია „ახალგაზრდობა აჭარისათვის და ამით მთელი საქართველოსათვის“ შეიქმნა. ამ ორგანიზაციის წევრები აჭარაში ხელისუფლების შეცვლის წინააღმდეგი არიან. ორგანიზაციის ხელმძღვანელი თენგიზ კახიძე წლების განმავლობაში „აღორძინების კავშირის“ აქტიური წევრი იყო. თუმცა, არასამთავრობო ორგანიზაციის დაფუძნებისთანავე მან პარტიის რიგები დატოვა. ორგანიზაციის შექმნის მიზეზი „ჩვენი აჭარას“ გააქტიურება და „კმარას“ გამოჩენა ყოფილა. თენგიზ კახიძე ორგანიზაციის მიზნებზე საუბრობს: „მიმდინარეობს ფარული მუშაობა, განსაკუთრებით, ახალგაზრდობის ფენაში, მიდის მათი გამოყენების პროცესი საკუთარი პარტიული ინტერესებისათვის. ჩვენი მიზანია გავიდეთ მოსახლეობაში, შევხვდეთ თანატოლებს და მოვუწოდოთ, რომ ბრმა იარაღად არ იქცნენ არც ხელისუფლების, არც ოპოზიციის, „კმარასა“ თუ სხვა ორგანიზაციის ხელში“.

არასამთავრობო ორგანიზაცია „ახალგაზრდობა აჭარისათვის და ამით მთელი საქართველოსათვის“ აჭარაში სიმშვიდისა და სტაბილიზაციის შენარჩუნებისათვის იბრძოლებს და ახალგაზრდობას თავშეკავებისაკენ მოუწოდებს. „ჩვენ ვთავაზობთ, დაველოდოთ ახლადარჩეული პრეზიდენტისა და ავტონომიის მეთაურის მომავალ შეხვედრას, მათ შორის გამართულ საუბარს. აქედან გამომდინარე ვთვლით, რომ აჭარა იყო, არის და იქნება საქართველოს უერთგულესი კუთხე, არ შეიძლება სხვა აზრი არსებობდეს“, – აცხადებს კახიძე.

ორგანიზაცია მიზნად ისახავს ახალგაზრდობის ჩაბმას კულტურულ საქმიანობაში და დასაქმების პრობლემების მოგვარებას, თუმცა, ამის კონკრეტული პროგრამა ჯერ არ არსებობს.

რაც შეეხება პოლიტიკური მოვლენების განვითარებას, „ჩვენ არ დავუშვებთ ქაოსს და ანარქიას. არსებული ხელისუფლების ძალისმიერი მეთოდით გადაგდების წინააღმდეგ ვიბრძოლებთ, ქუჩურ მანიფესტაციებს დავუპირისპირდებით უიარაღოდ, შიშველი ხელებით და საღი აზროვნებით, – აცხადებს ორგანიზაციის ხელმძღვანელი.

იქნება თუ არა ეს ორგანიზაცია „აღორძინების“  სატელიტი ორგანიზაცია? – თენგიზ კახიძე კატეგორიულად გამორიცხავს ამას. მისი მტკიცებით ახალგაზრდული ორგანიზაციის შექმნის ინიციატორი ასლან სმირბა არ ყოფილა. კახიძე ირწმუნება, რომ „ამის შესახებ დიდ ხანს ფიქრობდნენ“…

სხვადასხვა ბრალდებით აჭარაში კვლავ გრძელდება იმ ადამიანთა დაკავება-დაპატიმრება, რომლებიც ძირითადად „ნაციონალური მოძრაობის“ წევრები თუ ამ მოძრაობის მხარდამჭერები არიან. ეს „უცნაურობა“ თურმე ჩვეულებრივი დამთხვევებით აიხსნება და ამას ხელისუფლების მხრიდან მათი ოპონენტების მისამართით რაიმე სახით პოლიტიკურ ანგარიშსწორებასთან საერთო არაფერი აქვს. აჭარის პოლიციაში კი არაერთხელ განაცხადეს, რომ ისინი ჩვეულებრივ კრიმინალის წინააღმდეგ ილაშქრებენ და ამ „ლაშქრობის“ კანონიერ უფლებასთან ერთად, მისი განხორციელების საშუალებაც უნდა მიეცეთ. რამდენად კანონიერად მოქმედებს პოლიცია კანონით მინიჭებული უფლება-მოვალეობის შესრულებისა, ამაზე ფაქტები მეტყველებენ. თუმცა ყველაფერ ამას, ზედმიწევნით ზუსტ პასუხს ალბათ, ისევ და ისევ დრო გასცემს…

ამ დღეებში „ნაციონალური“ მოძრაობის კიდევ ორი წევრი ნური ანანიძე და ვაჟა კახიძე დააკავეს. მათ წაყენებული აქვთ ნარკოტიკული საშუალებების მოხმარება და იარაღის შენახვის ბრალდება.

ნური ანანიძის ოჯახის წევრები აცხადებენ, რომ მის დაკავებას პოლიტიკური სარჩული უდევს საფუძვლად. ისინი ამას, თურმე, მთელი კვირის განმავლობაში ელოდნენ, რადგან მათ სახლს „შავოსნები“ მეთვალყურეობდნენ. ყოფილა სატელეფონო გაფრთხილებები მესიჯების სახით.

„გაზეთი ბათუმელები“ ნური ანანიძის ოჯახის წევრებს გაესაუბრა. მარინა ანანიძე (მეუღლე): ღამით მოვიდა 20-25 კაცი, შინაგან საქმეთა სამინისტროდან იყვნენ, რაიონის პოლიციიდან ამირან ნაკაშიძე ახლდათ. სახლს ალყა ჰქონდა შემორტყმული. 12-ის ნახევარზე შემომოცვივდნენ სახლში, ნაწილი აივნიდან  შემოვიდა, შუქი არ გვქონდა. ბავშვები შეშინდნენ. ჩხრეკის ორდერის წარმოდგენის შემდეგ, კარები დაგვიხურეს და ყველა ერთ ოთახში შეგვყარეს. გვითხრეს, იარაღს ინახავთო. ჩემი ქმარი ამ დროს აყვანილი ჰყავდათ თურმე. ის აფხაზეთში იყო და იარაღი იქედან არ ჩამოუტანია. „ნაციონალებთან“ 4-5 თვეა, რაც არის. აბაშიძის წინააღმდეგი არასოდეს ყოფილა. „ნაციონალები“ ცხოვრების პირობების გაუმჯობესებას გვპირდებიან და იმიტომაც დაუდგა მათ გვერდით.

დაპატიმრებულის ძმა მურად ანანიძეც იარაღის და ნარკოტიკის ჩადებაზე საუბრობს: თუ ნარკოტიკის მომხმარებელი იყო და იარაღს ინახავდა, სახლში რატომ ვერ აიყვანეს? დაცვა და თვალთვალი რად უნდოდა. წინა დღით (17 რიცხვით) გამოწერილი ორდერი წარმოგვიდგინეს. მერე ჩვენი თანდასწრებით გადაასწორეს თარიღი. ეს პოლიტიკური თავდასხმაა, კაჭარავას გატაცების თვითმხილველი იყო, გამტაცებლებში „როზისკის“ თანამშრომლები ამოიცნო და ამ ყველაფერზე პასუხისმგებლობა აჭარის ხელისუფლებას დააკისრა.

დარიკო ანანიძე (და) – ნახევარი საათის ჩხრეკის შემდეგ შეგვიშვეს ოთახში. ჩემს დას უთხრეს, ქვევით რაც გიდევთ, ის გამოიღეო, – ავტომატი იდო, თვითონ მოიტანეს…

ნური ანანიძე ვეტერანთა კავშირის თავმჯდომარეა. „გაზეთი ბათუმელები“ ვეტერანთა კავშირის თავმჯდომარის მოადგილეს – ნოდარ სალაძესაც ესაუბრა: „ლევან კაჭარავას ცემის ფაქტზე ნურის მიერ გაკეთებული კომენტარის შემდეგ დაიწყო ჩვენი დევნა. ჩვენ პოლიტიკაში არ გვინდა გავერიოთ, მაგრამ ამას გვაიძულებენ. პოლიციის მინისტრი, გოგიტიძე დგამს სპექტაკლს, რაც ხალხს აღიზიანებს. მეც აქ ვიყავი ჩხრეკის დროს. სრულიად საქართველოს ინვალიდ მეომართა კავშირი „ერის ტკივილი“ აჭარაში 800 ადამიანს აერთიანებს, ნუ დავაყენებთ ამ ხალხს ფეხზე… ჩვენ ვიცით, სად იკვებებიან, როგორ აფინანსებენ იმ ხალხს, რომლებიც ამ სიბინძურეს სჩადიან. ჩვენ არ ვართ ნარკომანები, ხულიგნები, უბრალოდ, უკეთესი ცხოვრება გვინდა. ნური ანანიძეს ავტომატი ჩაუდეს, ვაჟა კახიძეს – ხელყუმბარა, ჩემთან ჩხრეკისას ალბათ ტანკი აღმოჩნდება, ვიცი  შემდეგი მე ვარ“.

ომარ გორგოშაძე (მეზობელი) – ისინი შავრაზმელები არიან, რომლებსაც ბაკურიძე (შს მინისტრის მოადგილე) 100-100 ლარს უხდის. ნური ანანიძე ნარკოტიკის მომხმარებელი არასდროს ყოფილა. არაყს კი სვამდა, მაგრამ ეს აკრძალული არ არის. აქ ბევრს ჩაუდეს ნარკოტიკი და ციხეში ჩასვეს..

„გაზეთი ბათუმელები“ კომენტარისთვის ხელვაჩაურის რაიონის პოლიციის უფროსს მერაბ ცინცაძეს დაუკავშირდა. მისგან, რა თქმა უნდა, ვერანაირი კომენტარი ვერ მივიღეთ.

შსს ყოველდღიურ კრებსში კი ასეთი მონაცემია შეტანილი: „1 ცალი ხელყუმბარისა და ავტომატური ცეცხლსასროლი იარაღის (22 ვაზნით) უკანონო შენახვისა და ჰაშიშის განმეორებით უკანონო მიღებისათვის დაკავებულია სოფელ მეჯინისწყალზე მცხოვრები ნური ანანიძე“.

ბათუმში „ერთიანობის დარბაზის“ სახელწოდებით მალე კიდევ ერთი საზოგადოებრივი მოძრაობა დაფუძნდება. მართალია, ანალოგიური სახელწოდების მოძრაობა თბილისში უკვე არსებობს, მაგრამ ეს ორგანიზაცია მის დაქვემდებარებაში ამ ეტაპზე არ არის, მომავალში კი შასაძლოა შევიდეს. „ერთიანობის დარბაზის“ მთავარი მიზანი იქნება აჭარაში დემოკრატიული გარდაქმნებისათვის საზოგადოებრივი აზრის მომზადება, პოლიტიკური პროცესების მშვიდობიანად წარმართვა და ადგილობრივი ხელისუფლების კონსტიტუციური გზით შეცვლაში აქტიური მონაწილეობა. საინიციატივო ჯგუფში იოსებ ხიმშიაშვილი, რამაზ სურმანიძე, ბიჭიკო დიასამიძე,  რამაზ ფარტენაძე, მიხეილ მახარაძე, ზურაბ ქათამაძე, ელგუჯა მაკარაძე და სხვები არიან. საინტერესოა, რომ საინიციატივო ჯგუფში სახალხო მოძრაობა „ჩვენი აჭარას“ წევრებიც ფიქსირდებიან.

„ერთიანობის დარბაზის“ საინიციატივო ჯგუფის ერთ-ერთი ხელმძღვანელის, იოსებ ხიმშიაშვილის განცხადებით „ჩვენი აჭარას“ ძირითადი ბირთვი თბილისშია. აქ მისი მუშაობა, ფაქტიურად იქიდან იმართება, რაც სირთულეებს ქმნის. მასში არიან სხვადასხვა პოლიტიკური პარტიების წარმომადგენლები. „ჩვენ გადავწყვიტეთ ორგანიზაცია მეცნიერების, ხელოვნების, ინტელიგენციისა და საზოგადოების ფართო წარმომადგენლობით დავაკომპლექტოთ“.

ეს ორგანიზაცია არ იქნება „ჩვენი აჭარას“ ალტერნატივა. „არც ერთ მოძრაობას არ ვუპირისპირდებით. ჩვენი მიზანი ყველა ორგანიზაციის გაერთიანებაა“, – აცხადებს იოსებ ხიმშიაშვილი და თავს არიდებს იმ საკითხზე ლაპარაკს, თუ რა არ აკმაყოფილებთ სხვა საზოგადოებრივ და პოლიტიკურ მოძრაობებში. „მათ უნდათ ხელისუფლების შეცვლა და ამ მოთხოვნის საფუძველი ნამდვილად არსებობს, მაგრამ ძალიან ზოგადი მოწოდებებია. ამიტომაც, საჭიროდ ჩავთვალეთ, ისეთი საზოგადოებრივი მოძრაობა შეგვექმნა, რომლითაც ხალხთან უფრო ახლოს მივიდოდით და სიმართლეს ვეტყოდით“.

მართალია, „ერთიანობის დარბაზი“ პოლიტიკური მოძრაობა არ იქნება, მაგრამ გამორიცხული არაა, მისი წარმომადგენლები რომელიმე პარტიაში გაწევრიანდნენ. „თუკი გაგვიჩნდა ამბიცია, შეიძლება ამა თუ იმ პარტიაში შევიდეთ კიდეც“, – აცხადებს ხიმშიაშვილი.

„ერთიანობის დარბაზის“ საინიციატივო ჯგუფის წარმომადგენლები აჭარის ხელისუფლების შეცვლას გარდაუვლად მიიჩნევენ. თავად იოსებ ხიმშიაშვილი ხელისუფლების წარმომადგენელია, იგი დღესაც ბეჭდვითი სიტყვის დეპარტამენტის თავმჯდომარეა. მისი თქმით, როდესაც საქართველოში დემოკრატიზაციის პროცესი დაიწყო, აჭარაში კვლავ გრძელდება რეგიონის ერთპიროვნული მართვა, თავისუფალი სიტყვის დევნა და ცენტრის წინააღმდეგ მოსახლეობის განწყობის დამუშავება. აჭარის ხელისუფლება ძველებურად აგრძელებს ულტიმატუმის ენაზე საუბარს და მოვლენებს არ აძლევს რეალურ შეფასებებს. „აქედან გამომდინარე გვრჩება შთაბეჭდილება, რომ აჭარის უმაღლესი ხელისუფალი მის გარემოცვას ინფორმაციულ ვაკუუმში ჰყავს. დასაგმობია საკადრო პოლიტიკა. აჭარის ხელისუფლება დღესაც ვერ აკეთებს დასკვნებს. ასლან აბაშიძემ რეაგირება უნდა მოახდინოს ე.წ. შავფორმიანებზე. ყველასთვის ცხადია, რომ მათ უკან რომელიმე მინისტრი, ან მაღალი თანამდებობის პირი დგას. თეთრი ბილეთის მქონე ადამიანი ხელმძღვანელობს შეიარაღებულ ჯგუფს. ასეთი ხალხი წარმოადგენს დღეს „აღორძინების“ სახეს. ისინი უნდა ჩამოშორდნენ ხელისუფლებას, სწორედ, ამის გამო გამიჩნდა პოლიტიკური ამბიციები“.

საზოგადოებრივი მოძრაობა „ერთიანობის დარბაზი“-ს პრეზენტაცია უახლოესი მომავლისთვის იგეგმება.

 

 

სახალხო მოძრაობა „ჩვენი აჭარა“-ს  წარმომადგენლები აჭარის ავტონომიურ რესპუბლიკაში არსებულ სიტუაციას კრიზისულს უწოდებენ და მეთაურის პოსტის გაუქმებას ითხოვენ.

ნუგზარ მგელაძე: – ხელისუფლების გარკვეულ წარმომადგენლებს, ადამიანებს, რომლებიც გაერთიანებულნი არიან პოლიტიკურ ორგანიზაცია „აღორძინებაში“, აღარ ძალუძთ მართონ ის პროცესები, რომლებიც დღეს საქართველოს სახელმწიფოებრივ სივრცეში არსებობს. უნდა ჩატარდეს აჭარის ავტონომიური რესპუბლიკის უზენაესი საბჭოს სახელისუფლო არჩევნები. ჩვენ მზადა ვართ დავაკომპლექტოთ და გავაკონტროლოთ ეს არჩევნები, რათა აჭარის მოსახლეობამ ერთხელ და სამუდამოდ გამოხატოს თავიანთი თავისუფალი ნება.

მოძრაობა ითხოვს მრავალპარტიული სისტემის აღდგენას: „ჩვენი ამოცანაა, რომ აღვადგინოთ დარღვეული მრავალპარტიული სისტემა. აბაშიძის მმართველობა – ეს არის საოჯახო მართვის განსაზღვრული ფორმა, რომელიც უნდა აიკრძალოს და საზოგადოების გარკვეულ ჯგუფებს მიეცეთ შესაძლებლობა, მიიტანონ თავიანთი გულისტკივილი ხელისუფლებასთან. ჩვენ უნდა ვიყოთ ერთიან სახელმწიფო სივრცეში, წინააღმდეგობა უნდა გავუწიოთ ყოველგვარ უსამართლობას. ჩვენ აქ შევიკრიბეთ, რათა აღვკვეთოთ ქურდები, კორუმპირებული ადამიანები და ყაჩაღები, რომლებიც დათარეშობენ ყოველდღიურად ჩვენს ქვეყანაში“.

თამაზ ფუტკარაძე: – ოპონენტები ყოველდღე გაჰკივიან, თითქოს ჩვენთან არის დემოკრატია. რომელ დემოკრატიაზეა საუბარი, როცა უწყინარ განცხადებასაც კი სატელეფონო მუქარა მოსდევს. უნდათ დაგვაჯერონ, თითქოს ჩვენთან ცხოვრების მაღალი დონეა. რა ცხოვრების დონეზეა საუბარი, აჭარის ბარის ზონაში მიწის საჰექტარო გადასახადი არენდაზე 400-800 ლარამდეა, როცა საქართველოს სხვა კუთხეში სადღაც 30-35 ლარია. ბათუმში 2-3 ოთახიანი ბინის გაფორმება 700-800 დოლარი ჯდება, როცა საქართველოს ნებისმიერ ქალაქში მსგავსი რამ 150-200 ლარი ღირს.

„ჩვენი აჭარა“ ავტონომიური რესპუბლიკის ხელმძღვანელობის ახალ ფორმას გვთავაზობს: „პრეზიდენტი აჭარას არ უნდა ჰყავდეს. აჭარას უნდა ჰყავდეს ხელმძღვანელი – აჭარის უზენაესი საბჭოს თავმჯდომარე – დღეისათვის ყველაზე მისაღები ფორმაა. ჩვენ შევიტანთ სარჩელს, რათა გაუქმდეს ეს პოსტი, რადგანაც იგი ერთი ადამიანის მიერ ხელოვნურადაა შექმნილი“.

 

ბათუმის ქუჩებში, საგანგებო მდგომარეობის დროს, პოლიციელთა რაოდენობამ იმატა. როგორც ამბობენ, ნებისმიერი საგზაო წესის დარღვევა, ხშირად, კამერაში წაყვანით სრულდება.

ხალხს რომ უჭირს გასაგებია, მაგრამ ეტყობა მათი გაჭირვება პოლიციის „გაჭირვებასთან“ მოსატანიც არაა. მართალია, მაინცა და მაინც ერთ ტაფაზე იწვისო არ ითქმის, თუმცა, სამართალდამცავებს რომ დღეს რაღაცა მაგრად „ეწვით“, ესეც ფაქტია. მოსახლეობაში კი ცნობილი „ტელმანი“ და მისი „ფილიალები“, უკვე, ერთიანად „ტაკიძის კამერად“ გადანათლულა, მაგრამ რად გინდა,  –  „თვითმხილველების“ თქმით, იქ მოხვედრის გზები და იქ არსებული პირობები იგივე დარჩენილა…

გაჭირვებული ხალხი თავიანთი ვალის გადაუხდელობასაც „საწყალ“ პოლიციელებს აბრალებენ და ხელსაყრელი მომენტის დადგომისთანავე ლამის პროცენტების გადახდაც მოსთხოვონ.

დიდ და საქვეყნო საქმეებს კი, ბუნებრივია, დიდი თუ პატარა კურიოზებიც ახლავს თან.

ასეთი „კურიოზები“ ბათუმის ცენტრალური ბაზრის მიმდებარე ტერიტორიაზე არც პოლიციელებს აკლიათ თურმე და არც იმ ადამიანებს, ვისაც პოლიცია აკავებს. „გაზეთი ბათუმელები“ ერთ-ერთი ასეთი შემთხვევის თვითმხილველია. საგზაო პოლიციელებმა გააჩერეს „BBB-936“ ნომრის მქონე ავტომანქანა. პოლიციელთა სიმრავლე ეტყობა ავტომანქანების გაჩერების მიზეზთა სიმრავლესაც უწყობს ხელს. ასეთ შემთხვევაში, რაც უფრო მეტია  არგუმენტი, მით უფრო „დაცულია“ პოლიცია. კონკრეტულ შემთხვევაში, ერთი პოლიციელი მძღოლის არაფხიზელ მდგომარეობაზე საუბრობს, მეორე საგზაო წესების დარღვევაზე – დაუმორჩილებლობაზე, მესამენი კი ამტკიცებენ, რომ ნომერი არ აქვს. სინამდვილეში მანქანას უკან არ ჰქონდა ნომერი.

სანამ კამერაში წაიყვანდნენ, „გაზეთი ბათუმელები“ შეეცადა მძღოლს ამირან ხინკილაძეს, გასაუბრებოდა, მაგრამ „დატყვევებულმა“ მხოლოდ ორიოდე სიტყვის თქმა „სულ ტყუილად გამაჩერესო…“, მოასწრო. პოლიციელებმა სიტყვა არ დაასრულებინეს და ძალით ჩასვეს საგზაო პოლიციის მანქანაში.

პოლიციელი, რომელმაც ამირან ხინკილაძის კუთვნილი ავტომანქანა წაიყვანა, მძღოლის აყვანის მიზეზად ნომრის უქონლობას ასახელებს, ხოლო, შეკითხვაზე თუ რატომ არ აჩერებს მის წინ მოძრავ უნომრო მანქანას, გვიპასუხა, რომ „ახლა საჭესთან ვზივარ და როგორ გავაჩეროო“.

ზემონახსენებ ფაქტს მეყვავილეები და იქვე მყოფი პურის მოვაჭრეები გამოეხმაურნენ. ზოგიერთი მათგანი აცხადებს, რომ პოლიციის პირველ განყოფილებაში უკანონოდ რამდენჯერმე ისინიც წაუყვანიათ.

ნესტანი (გვარს არ ასახელებს): – „4 წლის ავადმყოფი ბავშვი დავტოვე ოჯახში და სავაჭროდ გამოვედი, რათა ორი კაპიკი გამეკეთებინა. რატომ ყიდი პურსო, ამის გამო შემაგდეს ტაკიძის კამერაში. მერე მოვიდა დათო დავითაძე, ძალიან დიდი შეურაცხყოფა მომაყენა, მინა გატეხა და მითხრა, ამით თავს მოგჭრიო“…

ვეფხია ბერიძე: – „მაშხალებზე ვვაჭრობდი, ხუთმა პოლიციელმა ძალით შემაგდო მანქანაში. იმიტომ ვვაჭრობ, რომ სათვალის ფული  მაქვს გადასახდელი. ვუთხარი, ნუ მქაჩავთ, ჩემი ფეხით წამოვალ-მეთქი, მაგრამ არ ესმოდათ. ნასესხები ფულით ნაყიდი ბომბები ჩამომართვეს“.

„ბომბებჩამორთმეული“ ხალხი კი „რევოლუციაზე“ მაინც ფიქრობს და პოლიტიკურ განცხადებებსაც აკეთებს: „ამფერების გამო არის, რომ ბაბუი ვერ დარჩება მის თანამდებობაზე“.  

ახლახანს აჭარის ავტონომიური რესპუბლიკის პარლამენტის დადგენილებით შეიქმნა აჭარის დაზვერვის სახელმწიფო დეპარტამენტი.

კანონპროექტის ავტორმა ზურაბ დევაძემ დეპარტამენტის დაარსება შემდეგი მოტივით ახსნა: „ხავერდოვანი რევოლუციის შემდეგ სიტუაცია იძაბება, მოქმედებენ სხვადასხვა ექსტრემისტული დაჯგუფებები, რომლებიც ეცდებიან დესტაბილიზაცია შეიტანონ როგორც მთლიანად საქართველოში, ისე აჭარის ავტონომიური რესპუბლიკის ტერიტორიაზე. აღნიშნული სტრუქტურა არის სამთავრობო ორგანიზაცია, რომელიც ექვემდებარება საქართველოს პრეზიდენტს. მაგრამ გამომდინარე იმ სიტუაციებიდან, რა მოვლენებიც ვითარდება დღეს საქართველოში, მოსალოდნელია საფრთხე შეექმნას საქართველოს მთლიან მოსახლეობას, მის სასიცოცხლო ინტერესებს, პოლიტიკურ, ეკონომიკურ, სამხედრო-სტრატეგიულ და ეკოლოგიურ სფეროებში. აქედან გამომდინარე, აჭარის არ კონსტიტუციის მეორე მუხლის შესაბამისად მიღებული იქნას გადაწყვეტილება და შეიქმნას აღნიშნული სტრუქტურა, – დაზვერვის სახელმწიფო დეპარტამენტი“.

კანონპროექტს აჭარის პარლამენტმა ტრადიციულად, ერთსულოვნად დაუჭირა მხარი.

 

14 იანვარს ბათუმის წმინდა ბარბარეს სახელობის ეკლესიაში ღამის თევის ლოცვის შემდეგ ტაძარი გაქურდეს. მძარცველმა წაიღო ბარძიმი, საზიარებელი კოვზი, საუკუნის ვერცხლის მედალიონი წმიდა ბარბარეს გამოსახულებით და მრევლის მიერ შემოწირული თანხა. თანხის რაოდენობა დადგენილი არ არის.

საქმეს იძიებს ქალაქის პოლიციის სამმართველო, სადაც აცხადებენ, რომ სამძებრო განყოფილებას აქვს გარკვეული ვერსიები, თუ ვინ ჩაიდინა დანაშაული. მიმდინარეობს ამ ვერსიების გადამოწმება. აღძრულია სისხლის სამართლის საქმე.