ათი დღის წინ დაკავებული „კმარელები“ ბექა მურვანიძე და ძმები ჩხეტიები 18 იანვარს ქალაქის მეხუთე ქვეგანყოფილების იზოლატორიდან გაათავისუფლეს, სადაც ისინი ადმინისტრაციულ სასჯელს იხდიდნენ. გათავისუფლებულები ერთხმად აცხადებენ, რომ მათი დაკავება პოლიტიკური ნიშნით მოხდა და წაყენებულ ბრალდებას (პოლიციელების შეურაცხყოფას) კატეგორიულად უარყოფენ. „ეს არის აბსოლუტური სიცრუე, – ამბობს მურვანიძე – ჩვენ სადარბაზოში „კმარას“ პლაკატების გაკვრის დროს აგვიყვანეს. თავიდან იყო ფიზიკური ზეწოლის ფაქტები, მაგრამ აქ შედარებით ნორმალურად გვექცეოდნენ. მედიის საშუალებით კი მადლობა მინდა გადავუხადო მათ, ვინც ჩვენი გასაჭირი გულთან ახლოს მიიტანა. ჩვენი ქმედება არ იყო არაკანონიერი, ვმოქმედებდით კონსტიტუციის ფარგლებში. მომავალშიც ვაპირებთ გამოვხატოთ პროტესტი არსებული რეჟიმის წინააღმრდეგ“. თანამოაზრეების აზრს აგრძელებენ ძმები ჩხეტიებიც. ირაკლი ჩხეტიას თქმით, ეს ფაქტი მათთვის დიდი ცხოვრებისეული გამოცდა იყო – „აბსოლუტურად ნათელია აყვანის მოტივი, ჩვენ განსხვავებული აზროვნების გამო ვიდევნებოდით ხელისუფლების მხრიდან, რადგან „კმარა-დიქტატურა“ მათ წინააღმდეგ იყო მიმართული. ცივილიზებულ ქვეყნებში მსგავსი რამ არ ხდება, ჩვენი ბრძოლა სამართლიანია და მშვიდობიანი ფორმით ისევ გავაგრძელებთ მოქმედებას“. როგორც აჩიკო ჩხეტია ამბობს, ისინი მორალური ზიანის კომპენსაციას ხელისუფლებისაგან არ ითხოვენ, რადგან, მისი თქმით, “ჩვენი ქვეყნის პირობებში მსგავს მოთხოვნას აზრი არა აქვს”.
გათავისუფლებულმა „კმარელებმა“ ბათუმი იმავე დღეს დატოვეს. ჩხეტიების დედის ნანა დონდოლაძის თქმით, ისინი პროვოკაციისაგან დაცულები არ არიან. „საქმიანობას, რა თქმა უნდა, ვერ ავუკრძალავ, ეს მათი პოლიტიკური მრწამსია და საკუთარი მომავლისთვის ბრძოლის უფლება ყველას აქვს, მაგრამ ამ ეტაპზე მათთვის აჯობებს, რომ ქალაქიდან გავიდნენ. აქ რჩება ძალა, რომელიც უსამართლობის წინააღმდეგ ბოლომდე იბრძოლებს“, – ამბობს იგი. ბიჭების გათავისუფლებას სიხარულით შეხვდა ჯანო მურვანიძეც: „მთავარია, რომ ისინი თავისუფალი არიან. მათზე, ბუნებრივია, მომავალში ზეწოლა მოხდება, მაგრამ ისევ სულიერ სიმტკიცეს უნდა მოვუხმოთ და მოვიპოვოთ ის, რისთვისაც ვიბრძვით“.
ჩხეტიების მშობლების ინფორმაციით, ბიჭები ამჟამად ქალაქიდან გასულები არიან. ისინი დედაქალაქში ნაქირავებ ბინაში აპირებენ ცხოვრებას. „აჩიკო მანამდეც მუშაობდა ერთ-ერთ ამერიკულ ბარში მუსიკოსად, ახლაც იმუშავებენ და ასე გაიტანენ თავს. იმედია, მანამდე მდგომარეობა გამოსწორდება და შეძლებენ ბათუმში ნორმალურ ცხოვრებას“.
fotoze minaweri: დაკავებული „კმარელები“ ბექა მურვანიძე და ძმები ჩხეტიები გათავისუფლებული არიან
