Batumelebi | უცხოელების დაფინანსებული არჩევნები და უხელფასოდ დარჩენილი კომისიის წევრები უცხოელების დაფინანსებული არჩევნები და უხელფასოდ დარჩენილი კომისიის წევრები – Batumelebi
ნეტგაზეთი • RU

უცხოელების დაფინანსებული არჩევნები და უხელფასოდ დარჩენილი კომისიის წევრები

საპრეზიდენტო არჩევნების შემდეგ საკმაო დრო გავიდა. ეს არჩევნები მთლიანად საერთაშორისო ორგანიზაციებმა დააფინანსეს, აქედან გამომდინარე, კუთვნილი თანხები, წესით, ყველა კომისიას დროულად უნდა მიეღო, თუმცა აჭარაში არსებული ექვსი ოლქიდან თანხა (400 ათასი ლარი), შესრულებული სამუშაოსთვის, არავისთვის გადმოურიცხავთ.

#48-ე საარჩევნო უბნის რეგისტრატორი თეა დიასამიძე „გაზეთ ბათუმელებთან“ საუბარში აღნიშნავს, რომ 30-35 ლარიან გასამრჯელოს დღემდე უიმედოდ ელოდება: „4 იანვარი ისეთი დღეა, როცა ჯერ კიდევ სადღესასწაულო განწყობა გრძელდება. კომისიის წევრებმა ამ ყველაფერზე უარი ვთქვით, რათა ცოტა ფული გაგვეკეთებინა. შემდეგ გაირკვა, რომ ცესკო-ს თანხა არ გადმოურიცხავს. ყოველდღიურად გვპირდებიან 2-3 დღეში იქნებაო. ამ დაპირებებს, როგორც ჩანს ახდენა არ უწერია“.

საპარლამენტო არჩევნების შემდეგ იმავე საარჩევნო უბნის 15 კომისიის წევრს პრემიის სახით 50 ლარი დაურიგეს იმ სამუშაოსთვის, რაც მათ შეასრულეს. არჩევნებამდე ერთი კვირით ადრე შექმნილ უბნებში კი, სადაც ყველაფერი ნორმალურად ჩატარდა, კუთვნილი ანაზღაურების მიუღებლობა, გაღიზიანებას იწვევს. „მეორედ იმიტომ წავედი, ხელფასის დაკარგვა არ მინდოდა. გარანტია არც იმისა მაქვს, რომ ახლა მივიღებ. საპარლამენტო არჩევნების შემდეგ ერთ-ერთმა კომისიის წევრმა, რომელმაც ხმამაღლა მოითხოვა დროული ანაზღაურება, გარკვეული პრობლემები შეექმნა. მე არ ვამბობ, რომ ეს სამსახურის ფასად დაუჯდა, მაგრამ გარკვეული პირებისაგან გაილანძღა“, – აცხადებს თეა დიასამიძე.

თუმცა, ჩვენი რესპონდენტი არ გამორიცხავს, რომ პირველი არჩევნების დროს თანხის დროული გაცემა უზრუნველყო „აღორძინებამ“.

დღეს გამარჯვებულს, ანუ საქართველოს პრეზიდენტს, რა თქმა უნდა, არ ეცლება იმისათვის, რომ ცესკო-ს მიერ გაკეთებულ ხარჯთაღრიცხვას გაეცნოს, ან თანხების გადარიცხვა-არგადარიცხვა გააკონტროლოს, მაგრამ ცესკო-ს თავმჯდომარე ზურაბ ჭიაბერაშვილი ამაზე ნამდვილადაა პასუხისმგებელი. 46-ე საარჩევნო ოლქის კომისიის წევრი, „რესპუბლიკელი“ გუგული დუაძე როგორც აცხადებს, ამ საკითხის თაობაზე შეხვდა ცესკო-ს თავმჯდომარეს ზურაბ ჭიაბერაშვილს, რომელმაც განაცხადა, რომ თანხები უმოკლეს ვადაში გადმოირიცხება.

ნეტგაზეთის მასალების სხვა გამოცემებში გადაბეჭდვის წესი
მაკა მალაყმაძე