ბოლო ერთი წლის განმავლობაში პედაგოგების 30%-იან ხელფასის დანამატის გაუცემლობამ აჭარის ხელისუფლებას სერიოზული პრობლემები შეუქმნა. ადრე ადგილობრივი მთავრობა აცხადებდა, რომ ეს თანხები ცენტრის დასაფარი იყო, ცენტრი კიდევ ბიუჯეტში გადაურიცხავ თანხებს ახსენებდა რეგიონს. საბოლოო ჯამში პედაგოგები რჩებოდნენ დაზარალებულები.
ახალი წლიდან აჭარის ხელისუფლებამ გამონახა თანხები და როგორც ვრცელდება ინფორმაცია, გასული წლის დავალიანების დაფარვაც დაიწყო. ეს, რა თქმა უნდა, განაპირობა იმან, რომ პედაგოგთა დიდი ნაწილი ასლან აბაშიძის მხარდამჭერებად აღარ მოიაზრებოდა. განათლების მინისტრის ნანი გუგუნავას ინფორმაციით, „მილიონ რვაასი ათასი ლარი აჭარიდან გადაირიცხა ცენტრალურ ბიუჯეტში, კონკრეტულად აჭარის პედაგოგებისთვის ხელფასის დანამატის გაცემისათვის. ამ მომენტისათვის დაფინანსებულია გასული წლის სამი თვის დანამატი. საკრებულოებში ეს თანხა გადარიცხულია. იანვრიდან პარალელურად დაფინანსდება 2003 წლის სხვა თვეებიც და 69%-იან დანამატს მივიღებთ“.
ამით პედაგოგების გულის მოგება წესით უნდა მოეხერხებინა აჭარის ხელისუფლებას, მაგრამ როგორც „გაზეთ ბათუმელებისათვის“ ცნობილი გახდა, ბათუმის 22-ე, 10-ე და 28-ე სკოლებში პედაგოგთა გაფიცვები, ხელფასის მომატების მოთხოვნით, კვლავაც იგეგმება.
