Batumelebi

„მადლიანი მაგიდა“ ფარნავაზ მეფის ქუჩაზე

ბათუმში, ფარნავაზ მეფის ქუჩაზე, დღეს, პირველ მარტს, სოციალურად დაუცველი ადამიანებისთვის „მადლიანი მაგიდა“ დაიდგა, რომელზეც სხვადასხვა საკვები პროდუქტია განთავსებული. აქციის ორგანიზატორთა თქმით, მალე საკვები პროდუქტებისთვის მაცივარსაც დადგამენ, მალფუჭებადი პროდუქტები დაცული რომ იყოს.

„მადლიანი მაგიდის“ ინიციატორი კერძო სტუდია-ბაღი „მონპარნასია“ . სტუდიის მენეჯერის ნინო ბიაძის თქმით, სოციალური აქციის მიზანია, ადამიანებმა აღარ იშიმშილონ.

„ჩვენ ვუერთდებით დათო გაჩეჩილაძის წამოწყებას – „დააპურე საქართველო“, რომელიც თბილისში დაიწყო. ვაპირებდით, გაგვეხსნა მადლიანი მაცივარი, მაგრამ დღეს ვერ მოესწრო დადგმა, გვინდოდა, რომ გაზაფხულის პირველი დღე სოლიდარობით დაგვეწყო, ამიტომ მოვაწყეთ მადლიანი კუთხე,“-ამბობს ის.

ნინო ბიაძე ამბობს, რომ პირველ დღეს „მადლიან მაგიდაზე“ საკვები პროდუქტები სტუდია-ბაღის ბავშვების მშობლებმა განათავსეს. აქტივისტები აპირებენ, სოციალურად დაუცველი ადამიანებისთვის საკვები ყოველდღიურად მოათავსონ მაცივარში.

„გვინდა, რომ ბევრ ადამიანს ჰქონდეს ამაზე ინფორმაცია და საჭიროების შემთხვევაში აცნობონ მათ, ვისაც სჭირდება დახმარება. ამისთვის საჭიროა, რომ მაგიდასთან გადაიღონ ფოტო და გაავრცელონ სოციალურ ქსელებში,“-ამბობს ნათია.

ორგანიზატორის თქმით, მადლიანი მაცივარი ქალაქში რამდენიმე ადგილას განთავსდება.

იყიდება ბინა სასწრაფოდ

სასწრაფოდ იყიდება „მაგნოლიაში“ ოროთახიანი ბინა, 46 კვ/მ, შავი კარკასი. ზღვისა და ტბის ხედით. ფასი: 26 000$

მობ.: 577 07 11 85; 577 07 11 88
batumi-makler.com ID:13437

ინვესტიცია ბავშვთა გასართობი პარკის ნაცვლად

ბათუმში, მეჯინისწყლის დასახლებაში მდებარე 264 კვ/მ მიწის ნაკვეთზე ბავშვთა გასართობი პარკი უნდა გაკეთებულიყო. სწორედ ამ მიზნით გადასცა ნაკვეთი აჭარის მთავრობამ ბათუმის მერიას საკუთრებაში. მოგვიანებით მერიამ აჭარის მთავრობის თავმჯდომარეს ამ ნაკვეთთან დაკავშირებით ისევ მიმართა, ამჯერად ქონების აჭარის მთავრობისთვის უკან დაბრუნების მიზნით.
დოკუმენტში, რომლითაც ქონების უკან დაბრუნებაზე მერიამ საკრებულოს თანხმობა ითხოვა, ნათქვამია, რომ მერიამ პარკის გაკეთება უსაფრთხოების ნორმებიდან გამომდინარე გადაიფიქრა: „ამ ტერიტორიაზე ბავშვთა სათამაშო პარკის მოწყობა სახიფათო იქნებოდა, ვინაიდან ეს ტერიტორია განლაგებულია საგზაო მაგისტრალის მიმდებარედ.“

ამავე დოკუმენტის განმარტებით ბარათში ნათქვამია, რომ ნაკვეთის პრივატიზებით ფიზიკური პირი სულიკო სურმანიძეა დაინტერესებული. პროექტში არ არის ინფორმაცია იმის შესახებ, თუ რა გეგმები აქვს აღნიშნულ ნაკვეთზე სულიკო სურმანიძეს.
ფინანსთა და ეკონომიკის სამინისტროს ინფორმაციით, ტერიტორია ჯერ გასხვისებული არ არის.

უსკოს მოქმედი თავმჯდომარე ახალი კანდიდატის შესარჩევ კონკურსა და დარღვევებზე

არჩილ მიქელაძე
უმაღლესი საარჩევნო კომისიის თავმჯდომარე
1 მარტი 2016 წელი

დღეს, 2016 წლის 1 მარტს სრულდება უმაღლესი საარჩევნო კომისიის თავმჯდომარის თანამდებობაზე ჩემი უფლებამოსილების 5 წლიანი ვადა. მიუხედავად ამისა, ,,აჭარის ავტონომიური რესპუბლიკის უმაღლესი საბჭოს არჩევნების შესახებ” აჭარის ავტონომიური რესპუბლიკის კანონისა და დღეისათვის შექმნილი ვითარებიდან გამომდინარე, თანამდებობაზე ყოფნის ეს ვადაგაგრძელდება მანამდე, ვიდრე არ იქნება არჩეული ახალი კანდიდატიკომისიის თავმჯდომარის თანამდებობაზე.

შექმნილ ვითარებაში,იმის გამო, რომ სულ უფრო ცოტა დრო რჩება უმაღლესი საბჭოს მორიგ არჩევნებამდე,ასევე იმის გათვალისწინებით, რომ ჩემთვის სულერთი არ არის, თუ როგორწარიმართება თავმჯდომარის შერჩევის შემდგომიპროცესი,თავს მოვალედ ვთვლიგამოვთქვა ჩემი მოსაზრება იმ პროცესებთან დაკავშირებით, რომელიც განვითარდა კანდიდატის შერჩევისას.დავაფიქსირო ჩემი პოზიციაიმ საკითხებსა და პრობლემებთან მიმართებაში, რომელიც შეიძლება წარმოიშვას წინასაარჩევნოდ.

უპირველეს ყოვლისა, უნდა აღინიშნოს, რომ თითქმის საყოველთაო კონსესუსია იმ საკითხთან დაკავშირებით, რომ კომისიის თავმჯდომარის კანდიდატის შერჩევის პროცესი წარიმართა ხარვეზებით, რასაც გააჩნია რამდენიმე მიზეზი. მათგან ალბათ მთავარია ორი: 1-ლი – კანონში არსებული ხარვეზი და მე-2 – ავტონომიურ რესპუბლიკაში არსებული სახელისუფლებო კრიზისი,რა დროსაცარსებულ ხელისუფლებას უმაღლეს საბჭოში არ გააჩნია საკმარისი უმრავლესობა გადაწყვეტილების მისაღებად.

საარჩევნო კანონმდებლობის შესაბამისად, რომელიც მოქმედებდა 2011 წლამდე, როგორც ცესკოს, ასევე უსკოს თავმჯდომარისა და წევრების არჩევის პროცედურები თითქმის იდენტური იყო ადგილობრივი და ცენტრალური ხელისუფლების განმასხვავებელი ნიუანსების გათვალისწინებით. 2010წლიდან ცესკოს თავმჯდომარის არჩევის წესი შეიცვალა და მისი შერჩევის პროცესში უფრო მეტი უპირატესობა მიენიჭათ არასამთავრობო ორგანიზაციებს. ცესკოში მოქმედიოპოზიციური პარტიების მიერ დანიშნულ წევრებს მიეცათ საშუალება აერჩიათ კომისიის თავმჯდომარე. რაც შეეხება ავტონომიურ რესპუბლიკას, აქ წესები უცვლელი დარჩა და დღეს მოქმედი ნორმებით არსებული რეგულაციაუცვლელია 2005 წლიდან.

რაც შეეხება ამჟამად, უმაღლესი საარჩევნო კომისიის თავმჯდომარის პოზიციაზეკანდიდატის შესარჩევად არსებულ პროცედურებსა და ფაქტობრივადგანხორციელებულ მოქმედებებს:

კანონთან პირველი წინააღმდეგობა, შეიქმნა ჯერ კიდევ გასული წლის 30 დეკემბერს, როდესაც გამოცხადდა კონკურსი უმაღლესი საარჩევნო კომისიის თავმჯდომარის პოზიციაზე და საბუთების მიღების ბოლო ვადად განისაზღვრა 2016 წლის 12 იანვარი.უმაღლესი საბჭოს არჩევნების შესახებ კანონისმე-13 მუხლის მე-8 პუნქტის შესაბამისად, კანდიდატობის მსურველთა მიერ საბუთების წარდგენის ვადად განსაზღვრულია 14 დღე. ამავე კანონის მე-5 მუხლის პირველი პუნქტის მიხედვით (ასევე საარჩევნო კოდექსითაც)განსაზღვრულია, რომ ამ კანონში მითითებული ვადის ათვლა გულისხმობს კალენდარულდღეებს, მათ შორის უქმე დღეებს – მხოლოდ საარჩევნო პერიოდში და არა სხვა პერიოდისთვის. ნორმატიული აქტების შესახებ საქართველოს კანონის მე-6 მუხლის (ვადების ათვლა ნორმატიულ აქტში) თანახმად, ვადების ათვლისას კანონმდებლობით განსაზღვრული უქმე და დასვენების დღეები არ ჩაითვლება.შესაბამისად,კანონით დადგენილი 14 დღიანი ვადა გულისხმობს მხოლოდ სამუშაო დღეებს. თუ გადავითვლით სამუშაო დღეებს 30 დეკემბრიდან – საბუთების წარდგენის ვადა უნდა განსაზღვრულიყო 21 იანვარით, ნაცვლად 12 იანვრისა. აღნიშნულით კონკურსში მონაწილეობის მსურველებს უსაფუძვლოდ შეეზღუდათ კანონით დაწესებული საბუთების წარდგენის ვადა.

შემდგომი წინააღმდეგობა უშუალოდ კანონთან მიმართებაში წარმოიქმნა კანდიდატურის უმაღლეს საბჭოში განხილვისას, კერძოდ,უმაღლესსაბჭოში მ/წლის 4 თებერვალს კანდიდატის მიერ საჭირო ხმების მიუღებლობის შემდეგ წამოჭრილი ბუნდოვანი საკითხები იყო:ა) უნდა გამართულიყო თუ არა განმეორებითი კენჭისყრა; ბ) კენჭისყრის გამართვის შემთხვევაში უნდა გამართულიყო იგი იმავე სხდომაზე თუ სხვა დროისათვის სხვა სხდომაზე. უმაღლესმა საბჭომ ,,გადაწყვიტა’’ რომ ხელახალი კენჭისყრა უნდა გამართულიყო და უნდა გამართულიყო სხვა დროისათვის.
ამავე დროს,სხვადასხვა თანამდებობის პირებისა თუ პოლიტიკოსების მხრიდან კეთდება განცხადებები, რომ კანონი არის ბუნდოვანი და ერთმნიშვნელოვნად ვერ განსაზღვრავენ ზუსტ პროცედურებს. მთავრობის თავმჯდომარე მიმართავს უმაღლეს საბჭოს განმარტოს შემდგომი პროცედურები, თუკი კანდიდატი კვლავ ვერ მოიპოვებს საკმარის მხარდაჭერას. უმაღლესი საბჭოს იურიდიული კომისიის მიერ განიმარტა (კანონის ოფიციალური განმარტების უფლება აქვს მხოლოდ სასამართლოს ნორმის შეფარდებისას), რომ კანდიდატურის ჩავარდნის შემთხვევაში წარდგენილი სამი კანდიდატიდანუმაღლეს საბჭოს უნდა წარედგინოს ორი.
ხელახალი კენჭისყრის გამართვა უმაღლეს საბჭოში ჩაინიშნა პროცედურისათვის კანონით გათვალისწინებული ვადის ბოლო დღეს -18 თებერვალს. (უმაღლეს საბჭოს 14 დღიანი ვადა ათვლილი აქვს არასამუშაო დღეების გამოკლებით) უმაღლეს საბჭოში ქვორუმის არარსებობის გამო სხდომა არ შედგა, კანდიდატს კენჭი არ ეყარა.

სხდომის არ შემდგარად გამოცხადებიდან (18 თებერვალი) მე-5 დღეს 23 თებერვალს მთავრობის თავმჯდომარე (ა.ხაბაძე) აკეთებს განცხადებას, რომ- ,,ბუნდოვანების თავიდან ასაცილებლად ხელახლა უნდა ჩატარდეს კონკურსი, დღეს ბოლო დღეა და დღეს დაიწერება ბრძანება, კონკურსის გამოცხადების შესახებ როგორც თავმჯდომარის ვაკანსიაზე ასევე კომისიის წევრის ვაკანსიაზე“.
გაზეთ ,,აჭარა’’ -ს 25 თებერვლის ნომერში განთავსებული განცხადების მიხედვით კონკურსი გამოცხადდა თავმჯდომარისა და წევრის ვაკანსიებზე და საბუთების მიღების ვადად დადგინდა 26 თებერვლიდან 10 მარტის ჩათვლით.

აღნიშნულით, ერთის მხვრივ დადასტურდა მთავრობის მხრიდან საბუთების წარდგენის ვადების კანონსაწინააღმდეგო შემცირება (18 თებერვალს ჩატარებული სხდომიდან კანონით გადაწყვეტილების მიღებისათვის დადგენილი სამდღიანი ვადის ბოლო დღედ მთავრობამ განსაზღვრა 23 თებერვალი, ე.ი. ვადაში არ მიათვალა უქმე დღეები (20,21 თებერვალი)) და მეორეს მხვრივ გააძლიერა საზოგადოებაში არსებული მოლოდინები იმასთან დაკავშირებით, რომ თავმჯდომარისა და კომისიის ერთი წევრის ვაკანსიაზე კონკურსის ერთდროულად ჩატარებისშესაძლებლობის გაჩენით,უმაღლეს საბჭოშიც ჩნდება შესაძლებლობა, არსებულ ცალკეულ ჯგუფებთან წარმატებით წარიმართოს თავმჯდომარის ვაკანსიაზე წარდგენილი ახალი კანდიდატურისთვის შესაძლო ხმების მოგროვების პროცესი.
ზემოთაღწერილი ფაქტების შემდგომ ნათელია, რომ როგორც აჭარის მთავრობის, ასევე უმაღლესი საბჭოს მიერ იგნორირებულია, ცალკეულ შემთხვევებში დარღვეულია უმაღლესი საბჭოს არჩევნების შესახებ კანონის მოთხოვნები, კერძოდ:

როგორც ზემოთ აღინიშნა, მთავრობის თავმჯდომარის მიერ კანონით დაწესებული საბუთების წარდგენის ვადა უსაფუძვლოდ არის შემცირებული. განმეორებითი კონკურსის გამოცხადების შემთხვევაშიც (26 თებერვალი)კანდიდატობის მსურველთა საბუთების წარდგენის ვადა,ნაცვლად მითითებული 10 მარტისა, კანონის მიხედვით უნდა წარმოებდეს 18 მარტის ჩათვლით.
უმაღლესი საბჭოს მიერ არ იქნა უზრუნველყოფილი კანონის აღსრულება, კერძოდ, კანდიდატისათვის 18 თებერვალს ხელახალი კენჭისყრის გამართვა. ქვორუმისარარსებობის გამო სხდომის ჩაშლა არ ნიშნავს ავტომატურად, რომ კენჭისყრა შედგა. შესაბამისად, უმაღლესი საბჭოს გადაწყვეტილება რომ კანდიდატისათვის ორჯერ ეყარათ კენჭი უგულვებელყოფილი იქნა მათ მიერვე. უმაღლესი საბჭოს მიერ სხდომის მოწვევა ვადის ბოლო დღისათვის (18 თებერვალი) ვერ იქნებოდა გონივრული და წინასწარვე ქმნიდა სიტუაციის იმგვარი განვითარების საშუალებას რა დროსაც შეუძლებელი იქნებოდა გადაწყვეტილების მიღება.
კანდიდატისათვის ხელახალი კენჭისყრის ჩატარების საფუძვლად მოშველიებულია უმაღლესი საბჭოს არჩევნების შესახებ კანონის მე-13 მუხლის მე-14 პუნქტი.თუმცა, ამ პუნქტის პირველივე წინადადებაში მითითებულია, რომ ,,თუ კენჭისყრის შედეგად არ შეივსო ყველა ვაკანსია, ხელახლა ეყრება კენჭი დარჩენილ კანდიდატებს’’. ამ პუნქტის ეს წინადადება მიანიშნებს, რომ ამ შემთხვევისთვის,თავმჯდომარის ვაკანსიაზე წარდგენილი ერთი კანდიდატი, არ შეიძლება იყოს ,,დარჩენილი სხვა კანდიდატები’’.

არსებულ სიტუაციაში, მთავრობის თავმჯდომარის მიერ, ხელახალი კონკურსის გამოცხადება სამართლებრივ საფუძვლებს მოკლებულია, ვინაიდან კანონში არ არსებობს ნორმა, რომლითაც შესაძლებელია იხელმძღვანელოს მთავრობის თავმჯდომარემ აღნიშნულ სიტუაციაში გადაწყვეტილების მიღებისას. ზემოთნახსენები ნორმა კი(მე-13 მუხლის მე-14 პუნქტი) ერთადერთია, რომელიც ადგენს უსკო-ში ვაკანსიის არსებობისას კონკურსის ხელახლა გამოცხადებას. თუკი ამ ნორმით იხელმძღვანელებდა გადაწყვეტილების მიმღები, ანუ ჩათვლიდა, რომ ამნორმით რეგულირდებაასევე პროცედურები კომისიის თავჯდომარის ვაკანსიაზე, მაშინ უპირველესად უნდა შესრულებულიყო ამავე ნორმის მოთხოვნა არსებულკანდიდატთაგან, რომელიმე მათგანის უმაღლესი საბჭოსთვის წარდგენის შესახებ. თუკი საპირისპიროდ ვიტყვით,- რომ ეს ნორმა არ ეხება კომისიის თავმჯდომარის ვაკანსიას,ასეთ შემთხვევაში, არც კონკურსის ხელახლა გამოცხადების საფუძვლად შეგვიძლია მივიღოთ იგი. მოსაზრება, რომ – რადგან კანონში ხარვეზია კანონის ანალოგიით (მსგავსი ნორმებით)ვისარგებლოთ (თუნდაც კომისიის წევრისთვის დადგენილი წესით) ბუნდოვანების თავიდან ასაცილებლად,მიზანშეწონილობის ან სხვა რაიმე მიზეზით, – უნდა გვახსოვდეს, რომ ,,ნორმატიული აქტების შესახებ’’ საქართველოს კანონი (მუხლი5) დაუშვებლად მიიჩნევს საჯარო სამართლებრივ სფეროში კანონის ანალოგიის გამოყენებას, თუკი ეს პირდაპირ არ არის გათვალისწინებული კანონით.
სად შეიძლება იყოს სწორი გამოსავალი?

პირველი – ვინაიდან უშუალოდ არ გვაქვს კანონის ნორმა, რომელსაც ამ შემთხვევაში დავეყრდნობოდით – შესაბამისი საკანონმდებლო ინიციატივის უფლების მქონე პირთა მიერ უნდა მოხდეს ახალი კანონპროექტის ინიცირება, რომელიც ნათლად და გამჭვირვალედ უზრუნველყოფს კომისიის თავმჯდომარის არჩევის,როგორც კრიტერიუმების, ასევე ყველა სხვა პროცედურის დადგენას.
ან მეორე – დაინტერესებული პირების ან/და არასამთავრობო ორგანიზაციების ჩართულობით,სარჩელით,სასამართლოსთვის მიმართვა და სასამართლოს მიერ არსებული ფაქტობრივი მდგომარეობის შესაბამისად სწორი სამართლებრივი შეფასების მიღება.

არსებული სიტუაციის ყველა სხვა სახით გადაწყვეტა, დაკავშირებული იქნება ბუნდოვანებასთან, დატოვებს კითხვებს გადაწყვეტილების კანონიერების თაობაზე, რაც დააზარალებს და ხელს არ შეუწყობს შემოდგომაზე გასამართი არჩევნების ადმინისტრირების გამჭვირვალობასა და სამართლიანობას. აქვე თუ გავითვალისწინებთ იმასაც, რომ დღეისათვის სასამართლოში მიმდინარეობს დავა უმაღლესი საბჭოს გადაწყვეტილებების კანონშესაბამისობაზე 2015 წლის აგვისტოში არჩეული კომისიის წევრების პარტიულინიშნით შერჩევასთან დაკავშირებით – შედეგად შეიძლება მივიღოთ ის რომ პროფესიული ნიშნით არჩეული კომისიის შემადგენლობის უმრავლესობის მიმართ იარსებებს კითხვები მათი არჩევის კანონიერებასა და მათ მიუკერძოებლობასთან დაკავშირებით. ეს კი როგორც აღინიშნა საკმაო კითხვებს გააჩენს იმ პროცესების მიმართ, რომელიც შემოდგომაზე უნდა წარიმართოს არჩევნების სახით.

უმაღლესი საარჩევნო კომისიის დაკომპლექტების საკითხმა თითქმის მთლიანად გადასწია უკანა პლანზე საკითხები, რომლებიც უშუალოდ დაკავშირებულია 2016 წლის არჩევნებთან, ეს არის საარჩევნო სისტემის საკითხი, მაჟორიტარული ოლქების დაყოფის საკითხი და სხვა ტექნიკური ხასიათის ცვლილებები, რომლებიც უნდა განხორციელდეს კანონში. ერთერთი მთავარი საკითხად სავარაუდოდ იქნება საარჩევნო ოლქების დაყოფის საკითხი, უმაღლესი საბჭოს მაჟორიტარული არჩევნებისათვის. დღეს მოქმედი წესით, მაჟორიტარული ოლქის საზღვრები ემთხვევა პარლამენტის არჩევნებისათვის შექმნილი ოლქის საზღვრებს. როგორც ცნობილია,საკონსტიტუციო სასამართლოს ცნობილი გადაწყვეტილების გამო პარლამენტის მიერ უკვე შეტანილია ცვლილებები საქართველოს საარჩევნო კოდექსში. ცვლილების მიხედვით, მაგალითისათვის, ქედის, შუახევისა და ხულოს მუნიციპალიტეტების საზღვრები მოქცეულია ერთ ოლქში. რამდენად იქნება მიზანშეწონილი უმაღლესი საბჭოსათვის ანალოგიურის განხორციელება მსჯელობის საგანი უნდა გახდეს. შესაბამისად, საჭიროა მთელი რიგი უკვე ნახსენები და ასევე სხვა საკითხების განხილვა და გადაწყვეტილებების მიღება ავტონომიური რესპუბლიკის დონეზე. წინააღმდეგ შემთხვევაში ერთ დღესაც შეიძლება კვლავ დავდგეთ ფაქტის წინაშე, რომ კანონში რაღაც საკითხი ბუნდოვანი ან მოუწესრიგებელია და ამის გამო ეჭვქვეშ დავაყენოთ მთლიანად მომავალი საარჩევნო პროცესი.

და ბოლოს, როგორც დასაწყისში აღვნიშნე, დღეს სრულდება ჩემი უფლებამოსილების 5 წლიანი ვადა. განვლილი დროის განმავლობაში, რა თქმა უნდა, ყველაზე მნიშვნელოვანი მოვლენა იყო 2012 წლის არჩევნები, რა დროსაც პირველად განხორციელდა ხელისუფლების მშვიდობიანად, არჩევნების გზით გადაცემა. მიუხედავად იმისა, რომ ვისაც არ ეზარება ყველა თვითონ იბრალებს ამ მოვლენის დადებით მხარეებს, მაინც მინდა აღვნიშნო, რომ ეს იყო ყველას, მთელი საზოგადოებისა და მათ შორის საარჩევნო ადმინისტრაციის მუშაობის შედეგი. მსურს გამოვთქვა იმედი, რომ მომავალშიც არ შეექმნება საფრთხე ხალხის ნების შესაბამისად, ხელისუფლების მშვიდობიან ცვლას არჩევნების გზით და ამ გზაზე საარჩევნო ადმინისტრაციის წარმატებულ საქმიანობას. დარწმუნებული ვარ,თუ იქნება საზოგადოების ნება, არჩევნებთან დაკავშირებული ყველა პროცესი, წარიმართება კანონიერების, გამჭვირვალობისა და სამართლიანობის სულისკვეთებით.

სასწრაფოდ იყიდება სხვენის ბინა

სასწრაფოდ იყიდება ცხრასართულიანი კორპუსის მე-10 სართულზე აუწეველი 57 კვ/მ სხვენი (ბინა). ძველი გარემონტებული, ზღვისპირას, კოლიზეუმის წინ, ჭერის სიმაღლე – 2.10 მ.შესაძლებელია აწევა და კიდევ მანსარდის დადგმა. ფასი: 19000$

მობ.: 577 07 11 85; 577 07 11 88

batumi-makler.com ID: 13322

მეტი ქალი პოლიტიკაSHE

საარჩევნო წელს, პოლიტიკაში ქალების ჩართულობის გასაზრდელად, ბრიტანული არასამთავრობო ორგანიზაცია ოქსფამის ფინანსური მხარდაჭერით, ქალთა საინიციატივო ჯგუფმა წამოიწყოგენდერული კვოტების შესახებ საინფორმაციო კამპანია – “‎პოლიტიკაSHE”. კამპანიის ფარგლებში ლექცია-დისკუსიები საქართველოს ხუთ ქალაქში – თელავში, ქუთაისში, გორში, ზუგდიდსა და ბათუმში გაიმართება.

საქართველოს მოსახლეობის 52% ქალია, საქართველოს პარლამენტში კი ქალები მხოლოდ 12%-ით არიან წარმოდგენილი, ანუ პარლამენტის 150 წევრთაგან მხოლოდ 18 ქალი დეპუტატია. გენდერის სპეციალისტებისა და უფლებადამცველთა ერთი ჯგუფი მიიჩნევს, რომ ქვეყანაში არსებული სტერეოტიპების გათვალისწინებით, პოლიტიკაში გენდერული დისბალანსის შესამცირებლად გენდერული კვოტების დაწესებაა საჭირო. ეს დროებითი მექანიზმია, რომელიც პალიტიკურ პარტიებს, პარტიულ სიებში ქალების წინასწარ განსაზღვრული რაოდენობით ჩასმას ავალდებულებს.

საინფორმაციო კამპანია “‎პოლიტიკაSHE”-ს ფარგლებში სამი შეხვედრა უკვე მოეწყო თელავსა და ქუთაისში, სადაც ადგილობრივ არასამთავრობო ორგანიზაციებს, სტუდენტებსა თუ დაინტერესებულ პირებს, ქალების პოლიტიკური ჩართულობისა და სავალდებულო გენდერული კვოტების შესახებ ესაუბრეს. ქალთა საინიციატივო ჯგუფის წევრი და ფემინისტი აქტივისტი ბახტურიძე ამბობს, რომ დისკუსიები საინტერესო გამოდის, რადგან იმ ადამიანებს, რომლებიც გენდერული კვოტებისადმი სკეპტიკურად არიან განწყობილი, საშუალება ეძლევათ პირისპირ გაესაუბრონ ადგილობრივ ქალ პოლიტიკოსს, რომელიც პირველ პირში ყვება საკუთარი გამოცდილებისა და იმ ბარიერების შესახებ, რაც მას პოლიტიკაში მოსვლისას შეხვდა. “აუდიტორიის დიდი ნაწილი თანხმდება ქალებისა და კაცების თანაბარ მონაწილეობაზე პოლიტიკაში, ამის საჭიროებას ყველა ხედავს. დავა არის იმაზე, თუ როგორ უნდა მოხდეს ეს, სწორედ აქ ჩნდება აზრთა სხვადასხავობა – როცა გამოსავლის გზად კვოტები სახელდება”, -ამბობს იდა ბახტურიძე.

პროექტის ავტორების შეფასებით, ძირითადი ბარიერები, რაც პოლიტიკაში მოსვლის მსურველ ქალებს საქართველოში ექმნებათ, პარტიების წინასწარი განწყობები და სტერეოტიპებია იმის შესახებ, რომ ქალის ადგილი არ არის პოლიტიკაში. “ქალს უწევს ბარიერების გადალახვა ჯერ ოჯახში, შემდეგ საზოგადოებაში, ამის შემდეგ იწყება ბარიერები უშუალოდ პარტიაში. ქალს არ ენდობა პარტია, არ სჯერა, რომ მას შეუძლია ხმებისა და, შესაბამისად, გამარჯვების მოტანა. სპეციფიკურია რეგიონებში მოღვაწე ქალების პრობლემები, რადგან სიების შედგენის საკითხს ცენტრალურ ოფისებში რამდენიმე კაცი წყვეტს. რეგიონებში მომუშავე ქალების მიერ გაწეული შრომით არავინ ინტერესდება, ისინი უხილავები არიან”, – ამბობს იდა ბახტურიძე.

ყველაზე ხშირად გენდერული კვოტების საწინააღმდეგო არგუმენტად სახელდება კვოტირების პროცესებში ხელოვნური ჩარევა, რაც დამამცირებელია ქალებისთვის. იდა ბახტურიძე ამბობს, რომ ეს არასწორი შეფასებაა, რადგან ამ თვალსაზრისით ყველა რეგულაცია ხელოვნურია: “იმ პირობებში, როცა კონკრეტულ ადამიანებს რაღაც სფეროში რეალიზებისას აშკარა ბარიერები ექმნებათ, ხდება მათი დისკრიმინაცია და ირღვევა მათი უფლებები – სახელმწიფო უნდა ჩაერიოს. მოთხოვნა, რომ ქალთა მონაწილეობა გაიზარდოს, მათ შორის დაწესდეს გენდერული კვოტები, გათვალისწინებულია არაერთ საერთაშორისო რეკომენდაციაშიც. გარდა ამისა, ქალების პოლიტიკურ თანამონაწილეობაზე საუბრისას, რატომღაც ჩნდება საკითხი მათი კომპეტენტურობისა, რაც უსამართლოა, რადგან სხვა გარემოებებში ეს საკითხი არავის ახსენდება”, – ამბობს ის.

გენდერული კვოტების მომხრეა რესპუბლიკური პარტიის რაიონული ორგანიზაციის თავმჯდომარე ახმეტაში ლუიზა მუთოშვილი, რომელიც ამბობს, რომ ეს არგუმენტები ყველაზე ხშირად კაცებისგან ესმის.”სახელმწიფოში, სადაც გენდერული საკითხები ნაკლებად პრობლემატურია, იქ შესაძლოა შეურაცხმყოფელი იყოს კვოტაქალებისთვის, მაგრამ დღეს ჩვენს ქვეყანაში არსებული მდგომარეობის გათვალისწინებით, ქალთა პოლიტიკური მონაწილეობის გაზრდისთვის ეს ერთ-ერთი ყველაზე ეფექტური მექანიზმია”.

წარმოშობით ქისტი ლუიზა მუთოშვილი 2014 წელს ახმეტის მუნიციპალიტეტში, პანკისში ადგილობრივ არჩევნებში მონაწილეობდა. იგი ამბობს, რომ საქართველოში პოლიტიკაში ჩართვა ორმაგად უფრო რთულია ეთნიკური ან რელიგიური უმცირესობების წარმომადგენელი ქალებისთვის: “ახლობლები და ნათესავები მარწმუნებდნენ, რომ არანაირი შანსი არ მქონდა არჩევნებში გამარჯვების, მაგრამ გადავწყვიტე, რომ ცდად მაინც ღირდა. ძირითადი მიზეზი რის გამოც არჩევნებში ვერ მოვიგე, ჩემი ნათესავების”არა თანადგომა” გახდა. ჩემს მოგებას დააკლდა 12 ხმა. ჩემები არ მოვიდნენ არჩევნებზე, არ დამიჭირეს მხარი. იმიტომ, რომ ჩემი მოგების შემთხვევაში მიწევდა საკრებულოში მუშაობა, სადაც თანამშრომლების უმეტესობა იქნებოდა კაცი, რაც ჩვენთან ახალგაზრდა ქალის რეპუტაციაზე ცუდად იმოქმედებდა. მაგრამ აქ მნიშვნელოვანი იყო შედეგი – საზოგადოების სტერეოტიპული შეხედულება, რომ ახალგაზრდა ქალს არაფერი ესაქმებოდა პოლიტიკაში – აღმოჩნდა მცდარი. ასე გვეგონა ყველას, ქალებს, კაცებს, ახალგაზრდებს, მოხუცებს… ჩემი მაგალითი კარგია სხვა ქალებისთვის, რომელთაც სხვა დროსაც ჰქონიათ არჩევნებში მონაწილეობის სურვილი, მაგრამ უმრავლესობის მხრიდან ასეთი სტერეოტიპული დამოკიდებულებების გამო ვერ გაბედეს”, – ამბობს ის.

ქალთა საინიციატივო ჯგუფის კიდევ ერთი წევრი მაია ჩიტაია ამბობს, რომ ლუიზას მაგალითი კარგი არგუმენტია მათთვის, ვინც მიიჩნევს, რომ ქალებს პარტიისთვის ხმების მოტანა არ შეუძლიათ: `კვლევების მიხედვით, ქართველი ამომრჩევლების საკმაოდ დიდი ნაწილი ორჭოფობს არჩევანის გაკეთებისას. ეს ის ამომრჩეველია, რომელთა ინტერესების გათვალისწინება აქამდე ვერც ერთმა პარტიამ ვერ მოახერხა. როცა პარტიების წარმომადგენელ კაცებთან დაგვისვამს კითხვა, თუ რა საჭიროებები შეიძლება ჰქონდეს საშუალო სტატისტიკურ, 38 წლის მარტოხელა დედას, პასუხი, სამწუხაროდ, არავის აქვს”,- ამბობს ის.
პარლამენტის იურიდიულმა კომიტეტმა გასულ თვეში ჩააგდო გენდერული თანასწორობის საკითხზე მომუშავე არასამთავრობოების ჯგუფის მიერ მომზადებული საკანონმდებლო ინიციატივა, რომლის მიხედვითაც პარლამენტში ქალებს პროპორციულ სიებში 50%-იანი წარმომადგენლობა ექნებოდათ, ანუ მათი (განსხვავებული სქესის წარმომადგენელთა) რაოდენობა, ნაცვლად საერთო რაოდენობის 12%-ისა, იქნებოდა 25% (18 ქალის ნაცვლად იქნებოდა 38 ქალი). გარდა ამისა, იურიდიულმა კომიტეტმა მხარი არ დაუჭირა ქალთა კვოტირების შესახებ კანონპროექტს, რომელიც უმრავლესობის დეპუტატებმა მოამზადეს და რომელიც ქალებისთვის პროპორციულ სიებში 30%-იანი კვოტის დაწესებას გულისხმობს – ამ შემთხვევაში ქალთა წარმომადგენლობა პარლამენტში 12%-დან 15%-მდე გაიზრდება. ქალთა საინიციატივო ჯგუფისა და ოქსფამის წარმომადგენლების აზრით, ეს არ არის საკმარისი იმისთვის, რომ მათ პროცესებზე გავლენა მოახდინონ.

“უნდა შეიქმნას კრიტიკული მასა, რაც მთლიანი პარლამენტის 30% მაინც უნდა იყოს. შემიძლია გითხრათ ქალების ამხელა პროცენტულმა მონაწილეობამ რა ცვლილებები გამოიწვია სხვა ქვეყნებში. 20% ქალების მონაწილეობა დღის წესრიგში აყენებს ბავშვების საკითხებს, 30%-ის შემთხვევაში – წინა პლანზე გამოდის სოციალური და ქალთა საკითხები, 40-50%-მდე ქალების მონაწილეობას პროცესები მიჰყავს პოლიტიკური კულტურის გაჯანსაღებაზე. მოგეხსენებათ დღეს რა უშვერი სიტყვებიც ისმის ტრიბუნებიდან, ერთმანეთის ლანძღვაზე არიან ორიენტირებული”, – ამბობს მაია ჩიტაია.

დეპუტატების მიერ მომზადებული კანონპროექტი ჯერ კიდევ რჩება დღის წესრიგში. კანონპროექტის ეს ვერსია შესაძლოა 2016 წლის საგაზაფხულო სესიის ბოლომდე განიხილონ.

პროექტი – “პოლიტიკაSHE” დაახლოებით ერთ თვეში დასრულდება, მაგრამ მაია ჩიტაიას თქმით, ქალები გენდერული კვოტირების დასაკანონებლად აქტიურობას არ შეწყვეტენ იმ შემთხვევაშიც კი, თუ 2016 წლის საპარლამენტო არჩევნებისთვის კვოტირება საკანონმდებლო ნორმად არ იქცევა.

კამპანია – “‎პოლიტიკაSHE” ბათუმში დისკუსიას სავარაუდოდ მარტში გამართავს.

22 წელი დევნილობაში, საცხოვრებლის გარეშე

41 წლის ერასტი ჯანაშია დევნილია აფხაზეთიდან. ის შეზღუდული შესაძლებლობის მქონე პირია და დამოუკიდებლად ცხოვრება, მისი ახლობლების თქმით, არ შეუძლია. ერასტი ჯანაშია 22 წელია ბათუმში ცხოვრობს, თუმცა სახელმწიფოს, როგორც დევნილისთვის, მისი საცხოვრებელი პირობებისთვის დღემდე არ უზრუნია. ერასტი ჯანაშია დედის გარდაცვალების შემდეგ, მეცხრე წელია დისა და სიძის სახლში ცხოვრობს.

„მამა აფხაზეთის ომში დაგვეღუპა. ომის შემდეგ დედა და ჩემი ძმა ბათუმში, ნაქირავებ ფართობში ცხოვრობდნენ. მიუხედავად იმისა, რომ დევნილები იყვნენ, სახელმწიფოს საცხოვრებელი არ მიუცია. მე, ბიცოლასთან ერთად, ყოფილი სასტუმრო „ნარინჯის“ შენობაში ვცხოვრობდი. ჩემს ძმას ჯანმრთელობის პრობლემები ბავშვობიდან აქვს და ძირითადად დედასთან იყო, მაგრამ დედა რომ გარდაიცვალა, სულ მარტო დარჩა და ჩემი ქმრის სახლში მოვიყვანე. ბინა პატარაა, ჩვენი შვილებიც გაიზარდნენ, მალე რძალიც უნდა შემოვიდეს ოჯახში, იქნებ ახლა მაინც იზრუნოს სახელმწიფომ და ერთი პატარა ოთახი გადასცეს ჩემს ძმას საცხოვრებლად“, – ამბობს ერასტი ჯანაშიას და, ვიქტორია.

ვიქტორია ამბობს, რომ მას და მის შვილებს, როგორც დევნილებს, სახელმწიფოსგან საცხოვრებელი არ მიუღიათ. „არც არასდროს მომითხოვია, ერთადერთი ის მინდა, რომ ჩემს ძმას ჰქონდეს თავისი ბინა, რადგან ამ პატარა ბინაში ამდენი ადამიანის ერთად ყოფნა ძალიან ძნელია. თანაც ჩემს ძმას მუდმივი ყურადღება სჭირდება, მარტო ვერ დატოვებ, რადგან გონებრივი პრობლემები აქვს, ხან წყალი რჩება მოშვებული, ხან გაზი, ამიტომ მასზე მეურვეობას ოფიციალურად ვითხოვ და ვიზრუნებ კიდეც, მაგრამ თავისი ოთახი ხომ უნდა ჰქონდეს?“ – ამბობს ვიქტორია.

ერასტი ჯანაშიას საუბარი უჭირს, ამიტომ მის პრობლემებზე მისი და და სიძე საუბრობენ.

„45 ლარს იღებს დევნილის შემწეობას და 100 ლარი აქვს პენსია. ბუნებრივია, ჩემი ცოლის ძმაა და სახლიდან არ გავაგდებ, მაგრამ სახელმწიფოს ხომ აქვს თავისი წილი პასუხისმგებლობა? ეს თანხა არ არის საკმარისი იმისთვის, რომ ადამიანმა იარსებოს. მას მუდმივად სჭირდება მედიკამენტები და მინიმუმ წელიწადში ერთხელ ათდღიანი მასაჟი. ამის გარეშე შეიძლება საერთოდ ვეღარ შეძლოს გავლა“, – ამბობს მამია დავითაძე.

ერასტი ჯანაშია დასთან და სიძესთან ერთად.

მისი თქმით, წელიწადში ერთხელ ის რუსეთში, კრასნოიარსკში მიდის და ცოლის ძმაც ამ ქალაქში მიჰყავს სამკურნალოდ.
„აფხაზეთის ომამდე მშობლებს ამ ქალაქში სამკურნალო წყლებზე დაჰყავდათ და მეც იქ დამყავს. ერთი მასაჟი ქართული ვალუტით რომ ვიანგარიშოთ, 500 ლარი ჯდება. ადრე ვითხოვეთ, რომ სოციალური შემწეობა დაენიშნათ და იქნებ მაშინ მიეცათ ბინა, როგორც სოციალურად დაუცველისთვის, მაგრამ მეუბნებიან, რადგან თქვენთან ცხოვრობს, შემწეობა თქვენ სახელზე უნდა გაფორმდესო. მე არ ვითხოვ სახელმწიფო დახმარებას, მე ვითხოვ, რომ სახელმწიფომ მიხედოს ადამიანს, რომელიც არის დევნილი და შეზღუდული შესაძლებლობის მქონე“, – ამბობს მამია დავითაძე.

ერასტის და, ვიქტორია ჯანაშია ამბობს, რომ ბინის მიღების თაობაზე განცხადებით რამდენჯერმე მიმართა როგორც ლტოლვილთა და განსახლების სამინისტროს, ასევე ბათუმის მერიას, თუმცა შედეგი ვერ მიიღო:

„კი ეკუთვნის ბინა, – მეუბნებიან, მაგრამ არაფერს აკეთებენ. განცხადებას დაწერ, ახლა არ არის მაგის დროო, გვეუბნებიან. აბა, როდის არის? 22 წელი გავიდა და კიდევ რამდენი ხანი უნდა ელოდოს ჩემი ძმა.“

ერასტი ჯანაშია სახლიდან იშვიათად გადის. რომც გავიდეს, შორს წასვლა არ შეუძლია, რადგან შეიძლება გზა აერიოს. ერასტის და და სიძე ამბობენ, რომ ის მთელ დღეებს სახლში ატარებს: „კომპიუტერიც ჰქონდა, ისიც გაუფუჭდა და ასე ზის მთელი დღე დივანზე“.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს განცხადებით, სამინისტროს გააჩნია დევნილთა განსახლების კრიტერიუმები და შშმ მქონე პირებს დამატებით ენიჭებათ სამნახევარი ქულა. „თუ ერასტი ჯანაშიას შევსებული აქვს განაცხადი და დადგენილ კრიტერიუმებში ჯდება, რიგითობის მიხედვით მიეცემა ბინა“ – გვეუბნება სამინისტროს საზოგადოებასთან ურთიერთობის დეპარტამენტის ხელმძღვანელი დალი გოგოლაძე. თუმცა, მისივე განმარტებით, სამინისტროს დევნილთა განსახლებაზე ბათუმში ამ ეტაპზე, არც ერთი პროექტი არ აქვს და ბინის შეთავაზება მხოლოდ სხვა რეგიონებში შეუძლიათ:

`შეიძლება მას აქვს კონკრეტული მოთხოვნა, რომ ბინა მიიღოს ბათუმში, მაგრამ ბათუმზე სამინისტროს არც ერთი პროექტი არ აქვს. ბინები გაიცემა ზუგდიდში, ქუთაისში, სოფლად სახლის პროექტის ფარგლებში. გამოსავალი არის ისიც, რომ მოიძიონ ბინა და სამინისტრო შეუძენს“ – ამბობს ის.

მამია დავითაძე „ბათუმელებთან“ საუბარში ამბობს, რომ სამინისტროს მიერ დადგენილი კრიტერიუმების შესახებ აქამდე არ სმენიათ და ქულების საკითხს გადაამოწმებენ.

ისევ შეუსრულებელი ვალდებულებები და „ანბანის კოშკი“

„ანბანის კოშკთან“ დაკავშირებული ვალდებულებები ინვესტორმა ვერ შეასრულა. შენობა, რომელშიც ბიუჯეტიდან 60 მილიონზე მეტი ლარი დაიხარჯა, ისევ უფუნქციოდაა. გავრცელებულ ინფორმაციას, რომ კომპანიის წილები გადანაწილდება და ახალი პარტნიორი რუსული ინვესტიციით შემოვა, კომპანიაში არ ადასტურებენ, თუმცა ადასტურებენ იმას, რომ ახალი კადრი გამოჩნდება მართვის მენეჯმეტში, რომელიც რუსი ტურისტების მოზიდვაზე იმუშავებს.

„ის ახალგაზრდა ბათუმელი ბიჭია, რომელიც რუსეთში მოღვაწეობდა და აქვს კარგი კავშირები. ის ფულით არ შემოდის, ჩვენ მხოლოდ მისი გამოცდილება გვჭირდება. ევროპული მენეჯმენტი უნდა ყოფილიყო, ახლა რუსი და რუსულენოვანი ტურისტების მოზიდვაზე უნდა ვიმუშაოთ, რომლებიც სეზონზე ჩამოდიან ბათუმში. მასთან მოლაპარაკება გვაქვს და მემგონი, არ იქნება სწორი, ახლა მისი სახელი რომ დაგისახელოთ. არ ვგულისხმობ კომპანიის ახალ დირექტორს,“ – უთხრა „ბათუმელებს“ კომპანია „ბუსტ ჯორჯიას“ თანამფლობელმა ზურა ნასყიდაშვილმა.

„ატმ-ანბანის კოშკის მენეჯმენტის“ ახალ დირექტორად გასულ კვირას, 19 თებერვალს, ოლეგ სანდროშვილი დაარეგისტრირეს.
აჭარის მთავრობამ ბათუმის ბულვარში 1344,7 კვ/მ შენობა – „ანბანის კოშკი“ და მასზე მიმაგრებული 5736 კვ/მ არასასოფლო-სამეურნეო დანიშნულების მიწის ნაკვეთი კომპანია „Boost Spain S.I.“-ს 20 წლის ვადით გადასცა. ქონებით სარგებლობის წლიურ საფასურად კი, სიმბოლური ფასი, ერთი ლარი დაუწესა. მთავრობასთან აღებული ვალდებულების თანახმად, „ანბანის კოშკში“ გასართობი ობიექტები ინვესტორს ხელშეკრულების დადებიდან სამ თვეში უნდა გაეხსნა. ხელშეკრულება 2015 წლის ივნისში გაფორმდა.

აღებული ვალდებულების მიხედვით, კომპანიას სარგებლობაში გადაცემული ქონების მშენებლობის დროს გამოყენებული ტექნოლოგიური პროცესების დაცვით დამუშავება ევალებოდა. ასევე ხელშეკრულების გაფორმებიდან სამ თვეში კომპანიას ლიფტების გამართულობა და ექსპლუატაციაში გაშვება უნდა უზრუნველეყო. იმავე ვადაში უნდა გამართულიყო განათების სისტემა. ვალდებულების თანახმად ეს ყველაფერი კომპანიამ ობიექტის სარგებლობის პერიოდში უნდა შეინარჩუნოს. საბოლოო ჯამში კი, ხელშეკრულების დადებიდან სამ თვეში, ანუ გასული წლის სექტემბერში კომპანიას კოშკში მრავალფუნქციური ობიექტები: რესტორანი და კაფე უნდა აემოქმედებინა. კომპანიას უნდა უზრუნველეყო „მიმზიდველი ადგილის მოწყობა ტურისტებისთვის ქალაქის ხედების დასათვალიერებელი გადმოსახედის სახით“, ინვესტორს საქართველოს არანაკლებ ათი მოქალაქე უნდა დაესაქმებინა.

ადგილზე დათვალიერებით ირკვევა, რომ იქ ჯერ არც გასართობი ობიექტები აუმოქმედებიათ და არც ლიფტია გამართული. შენობაში და არც შენობის ირგვლივ პასუხის გამცემი არავინაა. ლიფტის გამჭვირვალე კარიდან კი მის ფსკერზე დაგუბებული წყალი მოჩანს. ეს ყველაფერი იმაზე მიუთითებს, რომ ინვესტორმა ვალდებულება ვერ შეასრულა. მთავრობა კი „ანბანის კოშკის“ გასართობ ობიექტად გადაქცევას ჯერ კიდევ წინა საკურორტო სეზონზე ვარაუდობდა.

გასულ წელს იქ სარემონტო სამუშაოები მიმდინარეობდა და გარკვეული დროით კაფეც მუშაობდა. ვალდებულებების რა ნაწილი შეასრულა კომპანიამ, ამაზე პასუხი ვერ მივიღეთ. „კომპანიის დამფუძნებელი აპირებს, რომ მოაწყოს ბრიფინგი ჟურნალისტებისთვის, სადაც ყველა კითხვაზე გაგცემთ პასუხს. მე არ ვარ კომპეტენტური გიპასუხოთ,“ – უთხრა „ბათუმელებს“ კომპანიის წარმომადგენლემა ირაკლი ორმოცაძემ. 19 თებერვლამდე ის კომპანიის დირექტორად ფიქსირდებოდა.

აჭარის მთავრობის ინფორმაციით, კომპანიამ ვადის გაგრძელება ითხოვა. ახალი შეთანხმებით ნაკისრი ვალდებულებები ინვესტორმა ახალ საკურორტო სეზონამდე უნდა შეასრულოს და ამ დროისთვის უნდა უზრუნველყოს კოშკის ახალი განათების დამონტაჟებაც.

რეესტრის მონაცემებით „Boost Spain S.I.“ – ესპანური კომპანიაა და მისი დამფუძნებელი ესპანეთის მოქალაქე ბართლომეო სორელ სელმანკაა. ამავე მონაცემებით, ბართლომეო სორელ სელმანკა ფლობს საქართველოში 2015 წლის აპრილში დარეგისტრირებული კომპანიის – „ბუსტ ჯორჯიას“ 67 პროცენტს, დარჩენილი 33 პროცენტის მფლობელი კი საქართველოს მოქალაქე ზურაბ ნასყიდაშვილია. მათვე დააფუძნეს „ატმ-ანბანის კოშკის მენეჯმენტი“. ზურაბ ნასყიდაშვილი კიდევ ერთი კომპანიის მფლობელია – მან 2014 წელს „ბიზნეს მენეჯმენტ ჯგუფი“ დააფუძნა და კომპანიას ერთპიროვნულად ფლობს. შპს „ატმ – ანბანის კოშკის მენეჯმენტს“ 100%-ით „ბუსტ ჯორჯია“ ფლობს.

რძის პროდუქტები ქართულ ბაზარზე და ევროსტანდარტები

არის თუ არა ქართულ ბაზარზე არსებული რძის პროდუქტები უვნებელი; რა რეგულაციების შემოღებას ავალდებულებს საქართველოს ევროკავშირთან ასოცირების ხელშეკრულება რძისა და რძის პროდუქტების წარმოების სფეროში; რა კეთდება და რა უნდა გაკეთდეს ხელისუფლების მხრიდან ქვეყნისთვის ამ ერთ-ერთი ტრადიციული დარგის განვითარების ხელშესაწყობად? რამდენად ინფორმირებული არიან ამ დარგში დასაქმებულები იმ მოთხოვნებისა და სტანდარტების დაცვაზე, რასაც მათ კანონმდებლობა ავალდებულებს.

გადაცემა „მთავარი თემა“ ამ საკითხზე წარმოგიდგენთ ორ სიუჟეტს. პირველ სიუჟეტში საუბარია საოჯახო-ფერმერულ მეურნეობაზე, რომელიც გაფართოებას აპირებს. გადაცემის მეორე ნაწილი კი, რძის გადამამუშავებელ საწარმოს ეხება, რომელიც თანამედროვე ტექნოლოგიებისა და ჰასპის სტანდარტების დანერგვას გეგმავს.

აჭარის სოფლის მეურნეობის სამინისტროს სოფლის მეურნეობის განვითარების დეპარტამენტის უფროსი ჯამბულ აბულაძე და ეკონომიკის სპეციალისტი დავით არძენაძე გადაცემაში საუბრობენ სახელმწიფოს მიერ რძის პროდუქტების წარმოების ხელშეწყობაზე, ასევე იმ სტანდარტებზე, რომელთა დაცვაც მეწარმეებს მოეთხოვებათ.

დისკუსიას „ბათუმელების“ ჟურნალისტი ლელა დუმბაძე უძღვება.

რატომ ყრია სამშენებლო მასალები ბულვარის სკამებზე

ბათუმის ბულვარის შესასვლელში (დიმიტრი თავდადებულის ქუჩის მხრიდან) ქვაფენილების განახლება მიმდინარეობს. აქ სამშენებლო მასალა – სილა, ხრეში, ბულვარის სკამებზეა დაყრილი.

„ბათუმელები“ ბათუმის ბულვარის ადმინისტრაციას დაუკავშირდა. კითხვაზე, – აყენებს თუ არა ზიანს ბულვარის ქონებას კომპანია და რა ნორმებს უნდა იცავდეს ბილიკების რეკონსტრუქციის დროს ის?

ბულვარის ადმინისტრაციაში განაცხადეს: „ქონება არ დაზიანებულა, თუმცა ბულვარის მონიტორინგის სამსახური აკონტროლებს ხოლმე მშენებლობის პროცესს და მსგავსი ფაქტების შემთხვევაში შენიშვნებს აძლევს. სამშენებლო მასალების სკამებზე დაყრის გამო ამ კომპანიასაც მისცეს შენიშვნა და მალე გაწმენდენ.“

ბულვარის ცენტრალური ბილიკების რეკონსტრუქციას კომპანია „იმერეთი 98“ აწარმოებს.

შავშეთის ქუჩის მონაკვეთზე მოძრაობა ორი დღით შეიზღუდება

ბათუმში შავშეთის ქუჩის მონაკვეთი (ყოფილი მენთეშევის ქუჩა), იქ სადაც სარკინიგზო ხაზი გადის, 2 მარტის ჩათვლით გადაკეტილი იქნება. რის გამოც, ქალაქში მოძრავი ავტომანქანების გადააგილება ამ მიმართულებით შეზღუდულია.

„საქართველოს რკინიგზა“ გზის ამ მონაკვეთზე სარემონტო სამუშაოებს აწარმოებს.

„ტექნიკურ სამუშაოებს საქართველოს რკინიგზა აწარმოებს, მთლიანად იცვლება სატვირთო მატარებლის ორი ლიანდაგი, ავტომანქანების გადასასვლელ მონაკვეთში, იყრება ახალი ღორღი და ლიანდაგებიც ახალი კეთდება, რადგან მძიმე წონიანი და სხვა სახის ტრანპორტის მოძრაობის გამო, ლიანდაგები მორყეული იყო“- გვეუბნება, დასავლეთის სალიანდაგო სამმართველოს უფროსი, ლევან ლომაძე.

მიმდინარე სამუშაოების გამო, ავტოტრანსპორტი წერეთლის ქუჩით გადაადგილდება.

ეკოლოგიურად დაბინძურებული მდინარეები და საფრთხეები

რას ავალდებულებს ევროკავშირთან ასოცირების ხელშეკრულება საქართველოს გარემოს დაცვის საკითხებში და რას ვერ უმკლავდება ხელისუფლება. როგორია სამოქალაქო ცნობიერება და რა გამოწვევების წინაშე დგას ბუნება და ადამიანი, მწვანე გარემოს დაბინძურების გამო.

გადაცემა „მთავარი თემა“ამ პრობლემაზე წარმოგიდგენთ ორ სიუჟეტს. პირველი სიუჟეტი შეეხება საყოფაცხოვრებო ნარჩენებით მდინარეების დაბინძურებას, რომელსაც საკმაოდ მასშტაბური სახე აქვს დღეს, როგორც აჭარის მაღალმთიანეთში, ასევე დაბლობში.

გადაცემის მეორე ნაწილი დაეთმობა კიდევ ერთ სიუჟეტს, რომელიც ბათუმში ზღვის დაბინძურების კერებს შეეხება და იმ პრობლემებს, რისი მოგვარებაც აქამდე ვერ შეძლო ხელისუფლებამ.

გადაცემის პირველ ბლოკში მოწვეული სტუმარი, ეკოლოგი, ბათუმის სახელმწიფო უნივერსიტეტის ასოცირებული პროფესორი ნარგულ ასანიძე საუბრობს იმ გამოწვევებზე, რა ზიანი შეიძლება მოჰყვეს მდინარეების, ხევების და წყლის დაბინძურებას როგორც ადამიანების ჯანმრთელობისთვის, ასევე ზოგადად გარემოსთვის. მეორე ნაწილში კი აჭარის გარემოს დაცვის სამმართველოს წარმომადგენელი, ნუგზარ პაპუნიძე ხელისუფლების პოზიციაზე ისაუბრებს. დისკუსიას „ბათუმელების“ ჟურნალისტი ცაგო კახაბერიძე უძღვება.

„გოდერძის“ განვითარების მიზნით ინვესტორების შეხვედრა იგეგმება

აჭარის ტურიზმის დეპარტამენტის ინფორმაციით, 12 მარტს, სამთო-სათხილამურო კურორტ „გოდერძის“ განვითარების ფარგლებში, კურორტზე ინვესტორებთან შეხვედრა გაიმართება. ტურიზმის დეპარტამენტის ცნობით, ბიზნესწრეების წარმომადგენლები საინვესტიციო პოტენციალსა და განაშენიანების რეგულირების გეგმას გაეცნობიან.

„დაინტერესებულმა პირებმა პროექტები აჭარის ფინანსთა და ეკონომიკის სამინისტროში 5 მარტამდე უნდა წარმოადგინონ. პროექტებს ეკონომიკური გუნდი განიხილავს,“- ნათქვამია ტურიზმის დეპარტამენტის ინფორმაციაში.

მოქალაქეთა ჩართულობის ახალი ფორმები რეალური თვითმმართველობისთვის

თვითმმართველობა მოქალაქეთა თვითორგანიზების ფორმაა და იგი საზოგადოების მონაწილეობის გარეშე ვერ გახორციელდება

2014 წლის ზაფხულში ფონდის “ღია საზოგადოება – საქართველო” ინიციატივით შექმნილმა დამოუკიდებელ ექსპერტთა ჯგუფმა შეიმუშავა ხედვა მოქალაქეთა ჩართულობის მექანიზმების შესახებ. ამ ხედვების ნაწილის გათვალისწინებით, საქართველოს რეგიონული განვითარებისა და ინფრასტრუქტურის სამინისტრომ შეიმუშავა კანონპროექტი ადგილობრივი თვითმმართველობის საქმიანობაში მოქალაქეთა მონაწილეობის გასაძლიერებლად, რომელიც საქართველოს პარლამენტმა 2015 წლის 22 ივლისს მიიღო.

ადგილობრივი თვითმმართველობის კოდექსში შეტანილი ცვლილებებით, კანონით განსაზღვრულ ფორმებს _ პეტიცია; მუნიციპალიტეტის საკრებულოს და მისი კომისიის სხდომებში მონაწილეობა; მუნიციპალიტეტის გამგებლის/მერის და მუნიციპალიტეტის საკრებულოს წევრის მიერ გაწეული მუშაობის შესახებ ანგარიშების მოსმენა, დაემატა ახალი ფორმები: დასახლების საერთო კრება და სამოქალაქო მრჩეველთა საბჭო.

გამგებლებთან/მერებთან არასამთავრობო და კერძო სექტორის წარმომადგენლებისგან შეიქმნა სამოქალაქო მრჩეველთა საბჭოები, რომლებმაც ხელი უნდა შეუწყონ სამოქალაქო საზოგადოებასთან და ადგილობრივ მაწარმეებთან მუნიციპალიტეტის თანამშრომლობას; დასახლების მცხოვრებლებს კი, საერთო კრებებზე შეუძლიათ მუნიციპალიტეტის ორგანოების წინაშე დასვან მათთვის მნიშვნელოვანი საკითხები, უშუალოდ მიიღონ მონაწილეობა მათ გადაწყვეტაში.

დასახლების საერთო კრება

კანონით განსაზღვრულია საერთო კრების უფლებამოსილებები, მისი მოწვევისა და საქმიანობის წესი იმ დასახლებებისთვის, სადაც რეგისტრირებულ ამომრჩეველთა რაოდენობა 2000-ს არ აღემატება.

იმ დასახლებისთვის, რომელშიც რეგისტრირებულ ამომრჩეველთა რაოდენობა 500-ს აღემატება, რთულია მთელი მოსახლეობის საერთო კრების ორგანიზება; ამიტომ, საკრებულომ შეიძლება დააწესოს დასახლების ცალკეულ ნაწილებში კრების ეტაპობრივად მოწვევის პროცედურა.

დიდ დასახლებაში, სადაც ამომრჩეველთა რაოდენობა 2000-ს აღემატება, მუნიციპალიტეტის საკრებულო დადგენილებით განსაზღვრავს საერთო კრების უფლებამოსილებებს, მისი მოწვევისა და საქმიანობის წესს, აგრეთვე შეუძლია, ამ დასახლებაში შექმნას რამდენიმე საერთო კრება.

კრების წევრები

კანონის შესაბამისად, საერთო კრების წევრად მიჩნეულია დასახლებაში რეგისტრირებული ამომრჩეველი, თუმცა, სათათბირო ხმა შეიძლება ჰქონდეთ დასახლების ტერიტორიაზე არსებული უძრავი ქონების მესაკუთრეებს და ამ დასახლებაში მცხოვრებ სხვა სრულწლოვან პირებსაც.

ვინ არის რჩეული

კრების წევრები საკუთარი შემადგენლობიდან ირჩევენ რჩეულს. კანდიდატურის დასახელების უფლება წევრთა არანაკლებ 5%-ს აქვს. რჩეული უძღვება საერთო კრებას, უზრუნველყოფს გადაწყვეტილების მუნიციპალიტეტის შესაბამისი ორგანოებისთვის წარდგენას, აგრეთვე ასრულებს კრების ცალკეულ დავალებებს. რჩეულს უფლებამოსილება აქვს მომდევნო კრების ჩატარებამდე და ის ავტომატურად გრძელდება, თუ ახალი რჩეული არ აირჩიეს. უფლებამოსილების ავტომატურად გაგრძელება შეიძლება ზედიზედ არაუმეტეს 5-ჯერ, შემდეგ კი აუცილებლად ახალი პირი უნდა აირჩეს.

რა საკითხები განიხილება საერთო კრებაზე

საერთო კრებაზე განიხილება დასახლების მნიშვნელოვანი სოციალური და ეკონომიკური საკითხები, მიმდინარე პროექტები და მზადდება შესაბამისი წინადადებები მუნიციპალიტეტის ორგანოებისთვის წარსადგენად, ასევე, დასახლების ტერიტორიაზე განსახორციელებელი პროექტები ჯერ კიდევ ადგილობრივ ბიუჯეტში მათ ასახვამდე, რათა მოსახლეობას ჰქონდეს შესაძლებლობა მუნიციპალიტეტის ორგანოებს წარუდგინოს დასაბუთებული შენიშვნები და წინადადებები.

კრებაზე ხდება დასახლებისთვის მნიშვნელოვანი საკითხების გადაწყვეტის ორგანიზება, მაგალითად, ტერიტორიის დასუფთავებაში, საქველმოქმედო საქმიანობაში, ინფრასტრუქტურის შეკეთებასა და მოწესრიგებაში ადგილობრივი მოსახლეობის მოხალისეობრივი ჩართვა.

მუნიციპალური ორგანოების ინიციატივით, კრებამ შეიძლება განიხილოს დასახლების ტერიტორიაზე არსებული მუნიციპალური ქონების საპრივატიზებო ობიექტების ნუსხაში შეტანის საკითხი; იმსჯელოს დასახლების საზღვრების დადგენასა და შეცვლაზე, აგრეთვე, ნებისმიერ სხვა საკითხზე, რომელსაც გამგებელი/მერი გამოიტანს საერთო კრებაზე მსჯელობისთვის. შეუძლია საკუთარი სახელით პეტიცია წარუდგინოს მუნიციპალიტეტის საკრებულოს და, ასეთ შემთხვევაში, მასზე ხელმოწერების შეგროვება აღარაა საჭირო.

კანონი მუნიციპალიტეტის ორგანოებს ავალდებულებს, განიხილონ საერთო კრების გადაწყვეტილებები და დასაბუთებული პასუხი, კანონით განსაზღვრულ ვადებში, აცნობოს საერთო კრების წევრებს ან რჩეულს.

ვის აქვს საერთო კრების მოწვევის უფლება

საერთო კრების მოწვევის უფლება აქვს როგორც საერთო კრების რჩეულს, ასევე დასახლებაში რეგისტრირებულ ამომრჩევლებს და მუნიციპალიტეტის გამგებელს/მერს – საკუთარი ინიციატივით ან მუნიციპალიტეტის საკრებულოს შუამდგომლობით.

თუ საერთო კრების მოწვევა დასახლების მცხოვრებლებს სურთ, მაშინ იქ რეგისტრირებული არანაკლებ სამი ამომრჩევლის შემადგენლობით იქმნება საინიციატივო ჯგუფი და გამგებელს/მერს წარუდგენს განცხადებას, რომელსაც თან დაურთავს დღის წესრიგს. მუნიციპალიტეტის გამგეობა/მერია ამ ინიციატივას არეგისტრირებს და 3 სამუშაო დღის ვადაში საინიციატივო ჯგუფს მისცემს რეგისტრაციის ცნობას, ხოლო რეგისტრაციის თაობაზე ინფორმაციას და საერთო კრების დღის წესრიგს საჯაროდ გამოაქვეყნებს.

რეგისტრაციის ცნობის მიღების დღიდან, საინიციატივო ჯგუფი იწყებს საერთო კრების მოწვევის ინიციატივის მხარდამჭერი ამომრჩევლების სიის შედგენას და მათი ხელმოწერების შეგროვებას. ერთი თვის ვადაში საინიციატივო ჯგუფმა გამგებელს/მერს უნდა წარუდგინოს განცხადება საერთო კრების მოწვევის შესახებ, სადაც აღნიშნული იქნება კრების ჩატარების თარიღი, დრო და ადგილი, და თანდართული ექნება დასახლებაში რეგისტრირებულ ამომრჩეველთა არანაკლებ 5%-ის ხელმოწერებიანი სია.

განცხადების წარდგენიდან 5 სამუშაო დღის ვადაში, მუნიციპალიტეტის გამგებელი/მერი ან მის მიერ უფლებამოსილი მოხელე გასცემს კრების მოწვევის შესახებ ინფორმაციის რეგისტრაციის ცნობას, რის შემდეგაც საერთო კრება უფლებამოსილია შეიკრიბოს. საერთო კრების მოწვევის თარიღად შეიძლება განისაზღვროს განცხადების წარდგენის დღიდან არაუადრეს მე-15 დღე. ინფორმაცია საერთო კრების დღის წესრიგის, მოწვევის თარიღის, დროისა და ადგილის შესახებ, მუნიციპალიტეტმა 3 დღის ვადაში საჯაროდ უნდა გამოაქვეყნოს.

როცა კრებას იწვევს რჩეული ან გამგებელი/მერი, ასეთ ინიციატივას რეგისტრაცია და მხარდამჭერთა ხელმოწერების შეგროვება არ ესაჭიროება, მაგრამ კრების დღის წესრიგის, მოწვევის თარიღის, დროისა და ადგილის შესახებ ინფორმაცია რეგისტრირდება და საჯაროდ ქვეყნდება. მუნიციპალიტეტის გამგებელს/მერს უფლება არ აქვს, საერთო კრების დღის წესრიგში შეიტანოს საერთო კრების რჩეულის გადარჩევის საკითხი.

საერთო კრების მოწვევის ორგანიზებას და მისი მოწვევის შესახებ ინფორმაციის დასახლებაში გავრცელებას, უზრუნველყოფენ მუნიციპალიტეტის გამგეობა/მერია და საინიციატივო ჯგუფი, აგრეთვე, თუ მანამდე არჩეული იყო _ საერთო კრების რჩეული.

იმ დასახლებაში, სადაც არჩეულია საერთო კრების რჩეული, მუნიციპალიტეტის გამგებელი/მერი ვალდებულია, წელიწადში არანაკლებ ორჯერ უზრუნველყოს საკუთარი ინიციატივით საერთო კრების მოწვევა.

საერთო კრება უფლებამოსილი რომ იყოს, მას უნდა ესწრებოდეს საერთო კრების წევრთა არანაკლებ 20%. საინიციატივო ჯგუფის მიერ კრების მოწვევის შემთხვევაში, საერთო კრების საქმიანობას წარმართავს ამ ჯგუფის ის წევრი, რომლის ხელმოწერაც განცხადებაში პირველია მითითებული, ხოლო მისი არყოფნისას – ჯგუფის სხვა წევრი ან, ჯგუფის თანხმობით, მუნიციპალიტეტის გამგეობის/მერიის უფლებამოსილი მოხელე, ხოლო კრების ოქმის შემდგენი მდივნის ფუნქციას ასრულებს საინიციატივო ჯგუფის რომელიმე წევრი. თუ საერთო კრება მოიწვია გამგებელმა/მერმა, მაშინ კრების საქმიანობას წარმართავს და ოქმს ადგენს გამგეობის/მერიის უფლებამოსილი მოხელე.

ამგვარად ხდება იმ შემთხვევებში, როცა კრება პირველად იკრიბება ან არ მომხდარა რჩეულის არჩევა. იმ დასახლებაში, სადაც არჩეულია საერთო კრების რჩეული, საერთო კრების საქმიანობას ის წარმართავს, საერთო კრების მდივნის ფუნქციასაც თავად, ან მის მიერ უფლებამოსილი პირი ასრულებს.

როგორ იღებს კრება გადაწყვეტილებას

დასახლების საერთო კრება გადაწყვეტილებას იღებს საერთო კრებაზე დამსწრე წევრთა ხმების უმრავლესობით. კენჭისყრა, როგორც წესი, ხელის აწევით იმართება, მაგრამ კრებას შეუძლია დაადგინოს კენჭისყრის სხვა ფორმაც. საერთო კრების ეტაპობრივად, დასახლების ცალკეულ ნაწილებში გამართვისას, ჯამდება საერთო კრებაზე დამსწრე საერთო კრების წევრთა ყველა ხმა.

საერთო კრებაზე დგება ოქმი, სადაც უნდა იქნას შეტანილი მისი ნომერი, კრების გამართვის თარიღი და ადგილი, დამსწრე საერთო კრების წევრთა რაოდენობა, ყველა განხილული საკითხი და მიღებული გადაწყვეტილება, და, საჭიროების შემთხვევაში, სხვა ინფორმაცია. კრების წარმმართველი პირი ოქმის ასლს მისი გამართვიდან 7 დღის ვადაში წარადგენს მუნიციპალიტეტის გამგეობაში/მერიაში, რომელიც ვალდებულია ოქმის ან მისი ასლის მიღებიდან 10 დღის ვადაში ის საჯაროდ გამოაქვეყნოს.

კანონის შესაბამისად საერთო კრების მოწვევასთან დაკავშირებული დეტალური საკითხები, როგორიცაა დასახლების ნაწილებში მისი გამართვის, საკითხების ინიცირების, მათი განხილვისა და კენჭისყრის გამართვის პროცედურები, რჩეულისა და მდივნის უფლებები და მოვალეობები, რჩეულის არჩევის პროცედურა და ა.შ., რეგულირდება საერთო კრების ტიპური დებულებით, რომელსაც დადგენილებით ამტკიცებს მუნიციპალიტეტის საკრებულო.

მიუხედავად იმისა, რომ კანონის მიღებიდან 8 თვეა გასული, ჯერჯერობით არცერთ სოფელში არ გამოუთქვამს მოსახლეობას შეკრების და პრობლემის გადაწყვეტაში მონაწილეობის მიღების სურვილი. საზოგადოების ნაწილმა კი, დღემდე არ იცის რა შეიძლება მოთხოვოს ადგილობრივ ხელისუფლებას და შეუძლიათ თუ არა მათ მონაწილეობა მიიღონ პრობლემის გადაწყვეტაში.

არასამთავრობო ორგანიზაციების წარმომადგენლები, რომლებიც რეგიონებში იკვლევენ მოქალაქეთა ჩართულობის მაჩვენებლებს, ამბობენ, რომ საზოგადოების პასიურობა, ერთი მხრივ, მოსახლეობის ინდიფერენტულობითა და ინფორმაციის ნაკლებობით, მეორე მხრივ, ადგილობრივი ხელისუფლების მიმართ უიმედობით არის გამოწვეული.

ცენტრალურ ხელისუფლებაში კი იმედოვნებენ, რომ მოქალაქეები ჩართულობის ახალ ფორმებს გამოიყენებენ, აქტიურად ჩაერთვებიან პრობლემების გადაწყვეტაში და მათ ამაში ადგილობრივი ხელისუფლებაც ხელს შეუწყობს.

სტატია მომზადებულია პროექტის – “თვითმმართველობაში სოფლის მოსახლეობის ჩართვის მხარდაჭერა”.პროექტის ფინანსური მხარდამჭერია ფონდი “ღია საზოგადოება – საქართველო”. შინაარსზე პასუხისმგებელია “საქართველოს მედია მონიტორი’’

საინფორმაციო შეხვედრა ქალებისთვის ქედაში

აჭარის სავაჭრო-სამრეწველო პალატასთან არსებულ ქალ – ბიზნესმენთა ასოციაციის „ქალთა ოთახმა“ ქედის მუნიციპალიტეტში საინფორმაციო ხასიათის შეხვედრა გამართა. შეხვედრა, რომელიც თვითმართველი ორგანოს სააქტო დარბაზში მოეწყო, ქედის გამგეობასა და აიპ-ებში დასაქმებული თანამშრომლები ესწრებოდნენ. ბათუმის „ქალთა ოტახის“ კოორდინატორმა ნათია სურმანიძემ შეხვედრის მონაწილეებს ბათუმში არსებულ „ქალთა ოთახში“ მოქმედი სერვისები გააცნო.

12809898_967594686669571_222023369_o — ნათია სურმანიძე

„ჩვენი მიზანია დავეხმაროთ ქალებს, არა მარტო ბათუმში, არამედ რეგიონის სხვადასხვა მუნიციპალიტეტებშიც, შესაბამისად, დღეს გაცნობითი ხასიათის შეხვედრა გვაქვს ქედაში. ფერმერ ქალბატონებს ბიზნესის წამოწყებაში, ხოლო მოქმედ ბიზნესმენებს – ბიზნესის გაფართოებასა და გაძლიერებაში დავეხმარებით. ჩვენს სერვისებში შედის, როგორც ბიზნეს კონსულტაცია, ასევე იურიდიული მომსახურება, აგრეთვე გვაქვს „ბავშვთა ოთახი“. ვიმედოვნებ, რომ სამომავლოდ მუნიციპალიტეტის თემებშიც მოვაწყობთ საინფორმაციო შეხვედრებს“ – ამბობს ნათია სურმანიძე.

აჭარის ქალ-ბიზნესმენთა ასოციაციის თავმჯდომარე მაყვალა კვირიკაძე: „ვისაც ბიზნესის დაწყება სურს შეუძლიათ მოგვმართონ და ჩვენთან უფასოდ შეძლებენ ბიზნესგეგმის დაწერას. დაინტერესებულ ქალბატონებს დავეხმარებით არა მარტო ბიზნესგეგმის დაწერაში, არამედ იურიდიულ კონსულტაციას გავუწევთ იმ საკითხებზე, რაც ბიზნესს ახლავს“.

პატიმარი ბათუმის ციხიდან ევროკავშირის ელჩს მიმართავს

კახა მეცხვარიშვილი ბათუმის მე-3 სასჯელაღსრულების დაწესებულებიდან დახმარებისთვის ევროკავშირის ელჩს მიმართავს. პატიმრის თქმით, მას არაადამიანურად ეპყრობიან და სტრასბურგის ადამიანის უფლებათა დაცვის სასამართლოს უკვე მიმართა. კახა მეცხვარიშვილი იურისტის დახმარებას ითხოვს:

„სტრასბურგის“ სასამართლოდან უკვე მოვიდა დოკუმენტაცია, მაგრამ ვერ გავერკვიე, რა ფორმით უნდა შევავსო, სად-ის მე-3 დაწესებულებაში არ ჰყავთ იურისტი. 20 დღის წინ მივმართე მთავრობას, პარლამენტის წევრებს, არასამთავრობო ორგანიზაციებს, რადგან არ მაქვს საშუალება, რომ დავიქირავო იურისტი და დამცველი ადვოკატი“, – ნათქვამია პატიმრის წერილში, რომელიც მან ევროკავშირის ელჩის გარდა, გაუგზავნა სხვადასხვა უწყებას, მათ შორის, „ბათუმელებს“.

სასჯელაღსრულების და პრობაციის სამინისტროს ინფორმაციით, მსჯავრდებულ კახა მეცხვარიშვილის მიმართ არაადამიანურ მოპყობას ადგილი არ ჰქონია და ბოლო მოკვლევა პატიმრის მიერ დასახელებულ პრობლემებზე მიმდინარე წლის 13 თებერვალს დასრულდა:

„სამინისტროს გენერალურმა ინსპექციამ მოკვლევა არაერთხელ ჩაატარა, თუმცა მის მიმართ სასჯელაღსრულების სისტემის ორგანოებში მოსამსახურე პირთა მხრიდან მოქმედი კანონმდებლობით გათვალისწინებული დისციპლინური გადაცდომისა და კანონით დადგენილი მოთხოვნების დარღვევა არ გამოვლენილა“, – აღნიშნულია სამინისტროდან „ბათუმელებისთვის“ მოწერილ წერილში.

ამავე წერილის მიხედვით, კახა მეცხვარიშვილს უტარდება ყველა საჭირო სამედიცინო გამოკვლევა და მიეწოდება სათანადო სამედიცინო სერვისი. სასჯელაღსრულების სამინისტროს პრესსამსახურის განმარტებით, მსჯავრდებულს სამართლებრივი მხარდაჭერისთვის შეუძლია მიმართოს საქართველოს პარლამენტის იურიდიული დახმარების სამსახურს.

მსჯავრდებულისთვის სამარლებრივი მხარდაჭერისთვის მზაობას გამოთქვამენ „ახალგაზრდა იურისტთა ასოციაციაში“. ორგანიზაციის იურისტი კახა მეცხვარიშვილს ბათუმის ციხეში რამდენიმე თვის წინ შეხვედრია. საიას იურისტმა პაატა დიასამიძემ “ბათუმელებს” უთხრა: „შევისწავლით მის საქმეს და თუ არსებობს შესაბამისი საფუძველი, ჩვენ გავუწევთ სამართლებრივ დახმარებას. ჩვენთან შეხვედრის დროს ამ პატიმარს პრეტენზია ჰქონდა მხოლოდ იმაზე, რომ სათანადო სამედიცინო მომსახურებას ვერ იღებდა. მაშინვე მივწერეთ სასჯელასრულების დეპარტამენტს, მაგრამ პასუხი არ მიგვიღია“.

სიღარიბის მანკიერი წრე

გიორგი თავაძე, ეკონომიკის მეცნიერებათა აკადემიური დოქტორი, ენერგეტიკის აკადემიის ნამდვილი წევრი

სულ ახლახან, დავოსის მსოფლიო ეკონომიკურ ფორუმზე მყოფმა ბილ გეითსმა მის მიერ გამოქვეყნებულ ესეიში კაცობრიობის წინაშე მდგარი უმთავრესი გამოწვევების: უკანონო თუ იძულებითი მიგრაციების, ეკონომიკური არასტაბილურობის, გლობალური უსაფრთხოებისა თუ გლობალური კლიმატური ცვლილებების დაძლევის წინაპირობად სიღარიბის დამარცხება გამოაცხადა და იწინასწარმეტყველა, რომ მეცნიერების მიღწევებისა და უახლესი ტექნოლოგიების დანერგვის გზით 15 წელიწადში სიღარიბე მსოფლიოში გაქრება.

არ ვიცი, რამდენად მოიაზრება ჩვენი ქვეყანა თხუთმეტ წელიწადში სიღარიბეგამქრალ მსოფლიოში, მაგრამ დიდი ბილის ესეიმ სიღარიბის დაძლევის მნიშვნელობის შესახებ ასოციაციურად დიდი ინგლისელის, თომას ჰობსის ფილოსოფიურ-ესეისტური ნაშრომი „ლევიათანი“ (ლევიათანი სახელმწიფო) გამახსენა, რომელშიც ის ჯერ კიდევ 350 წლის წინ წერდა, რომ სიღარიბე სახელმწიფოს საშინელი მტერია, უფრო საშინელი, ვიდრე გარეშე მტერი და არამარტო მოუწოდებდა ხელისუფლებას ყველა ღონე ეხმარა მის დასამარცხებლად, ხელისუფლების ვალდებულებად თვლიდა გაემდიდრებინა თავისი მოქალაქეები.
სტატისტიკის ექსპერტების ემპირიული შეფასებით საქართველოს მოსახლეობის 2-3 პროცენტი მდიდარია, 7-8% – შეძლებული, 8-10% – საშუალო ფენას შეიძლება მივაკუთვნოთ, ხოლო – 80% ღარიბს, რომელთაგან ნახევარ მილიონზე მეტი აბსოლუტურ სიღარიბეში ცხოვრობს (საჭმლის, ჩასაცმლისა და საცხოვრისის სერიოზული პრობლემები აქვთ), ხოლო დანარჩენი ფარდობით სიღარიბეში იმყოფებიან, რაც იმას ნიშნავს, რომ დღემდე არსებულ ხელისუფლებებს ჰობსის დანაბარების შესასრულებლად ბევრი არაფერი გაუკეთებიათ.

ქვეყნის ეკონომიკური განვითარებისა და სიმდიდრე-სიღარიბის ერთ-ერთი ყველაზე განზოგადებული მაჩვენებლის – ერთ სულ მოსახლეზე მთლიანი შიგა პროდუქტის მოცულობით საქართველოს, 2015 წელს, მსოფლიო ბანკის მონაცემებით, 3720 აშშ დოლარით 116-ე ადგილი უკავია მსოფლიოში და არაფერი რომ არ ვთქვათ ყოფილ საბჭოთა რესპუბლიკებზე:

აღნიშნული მაჩვენებლით ისეთ ქვეყნებსაც კი ჩამოვრჩებით, როგორებიცაა: შრი-ლანკა – 3770$, გაიანა – 3990$, გვატემალა – 3885$ და სამოა – 4480$. ის, რომ ცოტათი ვუსწრებთ სომხეთს – 3560$, ტუვალუს – 3130$ და ვანუატუს – 2870$, ქართველების ლომურ თავმოყვარეობას, ვფიქრობ, მალამოდ ვერ დაედება. ამ მაჩვენებლის მიხედვით, არ ვადარებ რა ჩვენ სამშობლოს ამერიკის შეერთებულ შტატებს – 55 900$, გერმანიას – 41 300$, საფრანგეთს – 37700$ და ინგლისს – 44000$, აღარაფერს ვამბობ შვეიცარიასა – 82200$ და ნორვეგიაზე – 76300$, ვნახოთ რა მდგომარეობაა ტერიტორიითა და მოსახლეობის რიცხოვნებით დაახლოებით ჩვენი ზომის ქვეყნებში:

ურუგვაიშიც კი, რომელიც ერთ-ერთ საცოდავ ქვეყნად ითვლება, მშპ ერთ სულ მოსახლეზე 16000 დოლარია, ბარბადოსში – 15920, ხოლო ტრინიდადსა და ტობაგოში სულაც 20 400$!

კიდევ უფრო კარგად რომ გავაცნობიეროთ, თუ როგორ სიღარიბეში ცხოვრობს ჩვენი ქვეყანა, ვიტყვი, რომ 2015 წელს საქართველოს მთლიანმა შიდა პროდუქტმა მხოლოდ 16,5 მილიარდი აშშ დოლარი შეადგინა, მაშინ, როცა ტერიტორიით ჩვენზე ორჯერ პატარა ბელგიაში ის 532 მილიარდი დოლარის ტოლია (32-ჯერ მეტი!), ავსტრიაში – 436 მილიარდის (26-ჯერ მეტი), დანიაში 342 მილიარდის (20-ჯერ მეტი), ისრაელში 306 მილიარდის (18-ჯერ მეტი) და ა.შ.

სიღარიბე კი, როგორც აღვნიშნეთ, არც ისეთი უწყინარი რამეა. იგი ადამბლავებს სახელმწიფო ინსტიტუტებს. ააქტიურებს კორუფციულ, კრიმინალურ და დესტრუქციულ ძალებს. ღარიბ სახელმწიფოში ადვილია მოსახლეობის უკმაყოფილების გამოწვევა, რადგან დიდი გასაქანი აქვს პოპულისტურ და რადიკალურ რიტორიკას, რაც ძაბავს პოლიტიკურ ველს და შინააშლილობის გამოწვევის წინაპირობაა. ასეთ ვითარებაში ბიზნესი, რომელიც ძალიან მგრძნობიარეა არასტაბილური პროცესების მიმართ, საჭირო რაოდენობის ინვესტიციებს არ განახორციელებს. პირდაპირი ინვესტიციების გარეშე კი ვერც ერთი ქვეყნის ეკონომიკა ვერ განვითარდება.

დამოუკიდებლად იმისა, თუ როგორია ქვეყანაში სიღარიბის წარმოშობის პირველადი მიზეზები, რადგან წარმოიშვება, სიღარიბე თავისთავის კვლავწარმოებას ახდენს და ქვეყანა სიღარიბის მანკიერ წრეში ექცევა. მოსახლეობის რაც უფრო მეტი პროცენტი იმყოფება სიღარიბის ზღვართან ან მის მიღმა, მით უფრო მეტი შანსი აქვს ასეთ ქვეყანას სიღარიბის მანკიერ წრეში მოხვდეს. როცა მოსახლეობის მნიშვნელოვანი ნაწილი შეზღუდული მსყიდველუნარიანობის გამო ვერ ახერხებს საკმარისი რაოდენობის საქონლის შეძენას, ქვეყანაში არასაკმარისად შემოდის საწარმოო ინვესტიციები, რაც შეუძლებელს ხდის ეკონომიკის განვითარებას და მოსახლეობის შემოსავლების ზრდას. იქმნება მანკიერი წრე: არაა საკმარისი რაოდენობის ფული, არ იყიდება და არ იწარმოება საკმარისი რაოდენობის საქონელი. არ იწარმოება საქონელი (იმიტომ, რომ არ იყიდება), არაა სამუშაო ადგილები, დასაქმება და ფული. ამასთან, რაც უფრო მეტია სიღარიბეში მყოფი მოსახლეობის რაოდენობა, მით უფრო რთულია ქვეყნისთვის სიღარიბის მანკიერი წრისგან თავის დაღწევა.

მაგრამ, როგორც ერჰარდი ამბობდა, არ არსებობს გამოუვალი ეკონომიკური მდგომარეობა. თუ როგორ უნდა გავარღვიოთ სიღარიბის მანკიერი წრე და როგორ უნდა დააღწიოს თავი სიღარიბეს ჩვენმა ქვეყანამ, ამის შესახებ ჩვენს მოსაზრებებს შემდგომ სტატიებში შემოგთავაზებთ.

ქობულეთში ავტოავარიის შედეგად სამი ადამიანი გარდაიცვალა

29 თებერვალს, დილით, ქობულეთში ერთმანეთს მიკროავტობუსი და ავტომანქანა შეეჯახა. ავარიის შედეგად სამი ადამიანი გარდაიცვალა. არიან დაშავებულებიც, მათგან ორი საავადმყოფოშია გადაყვანილი.

შს სამინსიტროს პრესსამსახურის ინფორმაციით, გამოძიება 276-ე მუხლის მესამე ნაწილით მიმდინარეობს, რაც სატრანსპორტო საშუალების მოძრაობის წესების დარღვევას გულისხმობს და ისჯება ჯარიმით ან თავისუფლების შეზღუდვით ვადით ხუთ წლამდე ანდა თავისუფლების აღკვეთით იმავე ვადით.

ბათუმის საერთაშორისო საუნივერსიტეტო ჰოსპიტალი

IUHB მრავალპროფილური ჰოსპიტალი ბათუმში გთავაზობთ მაღალი ხარისხის ამბოლატორიულ და სტაციონარულ მომსახურებას. ჰოსპიტალში მუშაობს: მიმღებ-დიაგნოსტიკური ცენტრი, კარდიოლოგიური, გულ-სისხლძარღვთა და ზოგადი ქირურგიის, მეან-გინეკოლოგიისა და რეპროდუქტოლოგიის, ოფთალმოლოგიის, უროლოგიისა და რადიოლოგიის, ნეიროქირურგიისა და ნევროლოგიის განყოფილებები და უახლესი ტექნოლოგიით აღჭურვილი ლაბორატორია. ჰოსპიტალი 103 საწოლზეა გათვლილი. ჰოსპიტალში 65 პალატაა, 3 – ინტენსიური მოვლის ცენტრი (21 საწოლი), ახალშობილთა ინტენსიური მოვლის ცენტრი (5 საწოლი), მიმღებ-დიაგნოსტიკური ცენტრი (12 საწოლი), 3 საოპერაციო ოთახი და 2 სამშობიარო ბლოკი.

გულ–სისხლძარღვთა დაავადებების დიაგნოსტიკა

ჰოსპიტალში გულ-სისხლძარღვთა დაავადებების დიაგნოსტიკა და მკურნალობა უახლესი მეთოდებითა და აპარატურით ხდება. კარდიოლოგიურ მიმართულებას ცნობილი კარდიოლოგი ისმეთ დინდარი _ მიქელაძე ხელმძღვანელობს. გამოცდილ კარდიოლოგთა გუნდი მიოკარდიუმის მწვავე ინფარქტით, მწვავე კორონარული სინდრომით, გულის მწვავე უკმარისობით, კარდიოგენული შოკითა და სიცოცხლისათვის საშიში სხვა დაავადების მქონე პაციენტებს მკურნალობს. გულის კათეტერიზაციის ლაბორატორია აღჭურვილია ბოლო თაობის – Ge innova 3100 ანგიოგრაფიული აპარატით. ტარდება კორონაროგრაფია, კორონარული ინტერვენცია; პერიფერიული ანგიოგრაფია; პერიფერიული ინტერვენცია. ამ დახმარების მიღება შესაძლებელია 24 საათის განმავლობაში, უწყვეტად. მიოკარდიუმის მწვავე ინფარქტის მქონე პაციენტებს კი დაუყოვნებლივ უტარდებათ სიცოცხლის შემანარჩუნებელი პროცედურა-ბალონური ანგიოპლასტიკა და კორონარული სტენტირება.

რადიოლოგიური განყოფილება

ჰოსპიტალში უახლესი ციფრული აპარატურით სამედიცინო კვლევების სრული სპექტრის ჩატარებაა შესაძლებელი. ჩვენთან კეთდება: მაგნიტურ-რეზონანსული კვლევები; კომპიუტერულ-ტომოგრაფიული კვლევები; რენტგენოლოგიური დიაგნოსტიკა; ულტრაბგერითი დიაგნოსტიკა.

მამოგრაფია

ჰოსპიტალში თანამედროვე ციფრული მამოგრაფით ხდება სარძევე ჯირკვლების სკრინინგი. ჰოსპიტალის რადიოლოგიური განყოფილება Senographe Crystal -ის უახლესი მოდელითაა აღჭურვილი. მამოგრაფის მაღალი რეზოლუცია ზუსტი კვლევისა და პათოლოგიების ადრეულ ეტაპზე გამოვლენის საშუალებას იძლევა.

Senographe Crysta- ციფრული მამოგრაფით უმცირესი ცვლილებების დაფიქსირებაა შესაძლებელი. გარდა ამისა: მნიშვნელოვნად შემცირებულია პაციენტის დასხივება; გამორიცხულია უზუსტობები, განმეორებითი კვლევებისა და პაციენტის ხელმეორე დასხივების აუცილებლობა; ციფრული ტექნოლოგიის მეშვეობით პაციენტს შეუძლია კვლევის შედეგები სახლიდან ან ოფისიდან გაუსვლელად, ხარისხისა და ინფორმაციულობის დანაკარგის გარეშე გადასცეს დედამიწის ნებისმიერ ადგილას.

ოფთალმოლოგია

ჰოსპიტალი აღჭურვილია მსოფლიო ბრენდის – NIDEK-ის ბოლო მოდელის აპარატურით. მისი გამოყენებით შესაძლებელია ზუსტი რუტინული და დამატებითი ოფთალმოლოგიური კვლევების, სხვადასხვა სახის ოპერაციის, მათ შორის ლაზერულის ჩატარება.

მისამართი: ბათუმი, გენერალ ასლან აბაშიძის ქუჩა #14
ტელეფონი: 0422 21 33 33
ვებ გვერდი: www.iuhb.ge

გონიოელები ხელისუფლებას პასუხს სთხოვენ

გონიოელები მომავალი ორშაბათიდან მასობრივ საპროტესტო აქციებს და მთავარი მაგისტრალის გადაკეტვას აპირებენ, თუკი ბათუმის საკრებულო მათი მიწების ჩამორთმევის გახმაურებულ საკითხს ისევ არ განიხილავს. გონიოში მცხოვრებმა ადამიანებმა დღეს ბათუმის საკრებულოსთან საპროტესტო აქცია იმიტომ გამართეს, რომ იანვარში მიწერილ ოფიციალურ, კოლექტიურ წერილზე პასუხი ვერ მიიღეს.

გონიოელებს ბათუმის საკრებულოს სხდომათა დარბაზში საკრებულოს საკუთრების უფლების აღიარების კომისიის თავმჯდომარე ლევან კინწურაშვილი და გონიოს მაჟორიტარი დეპუტატი ბათუმის საკრებულოში – ირაკლი მიქელაძე შეხვდნენ. ლევან კინწურაშვილი გონიოელებს ერთ კვირაში დაპირდა პასუხს. ამ დროში საკრებულომ უნდა გაარკვიოს, რა პოზიცია აქვს სახელმწიფო ქონების მართვის ეროვნულ სააგენტოს, რომელიც სადავო მიწების მესაკუთრედ ითვლება.

„ერთი საბუთი მაინც მაჩვენეთ, რა გააკეთეთ, რომ დავიჯერო რამეს აკეთებთ“ – მიმართა ლევან კინწურაშვილს გონიოელმა ენვერ ირემაძემ მას შემდეგ, რაც ლევან კინწურაშვილისგან მოისმინა: „პროცესი მიმდინარეობს“. ბათუმის საკრებულოს საკუთრების უფლების აღიარების კომისია გონიოელებს სადავო მიწების საკითხის განხილვას დაახლოებით ერთი წელია პირდება.

„თქვენ უნდა შემოიტანოთ ინდივიდუალურად დოკუმენტაცია და ცალ-ცალკე განვიხილავთ“ – ლევან კინწურაშვილს ამ შეთავაზებაზე ენვერ ირემაძემ გასული წლის 28 მაისს მის მიერ ინდივიდუალურად შეტანილი წერილი შეახსენა, რაზეც უარი მიიღო. „აღიარების კომისია დაელოდება აღნიშნულ საკითხზე სახელმწიფო ქონების ეროვნული სააგენტოს და მთავრობის ეკონომიკური საბჭოს მიერ რაიმე სახის გადაწყვეტილების მიღებას“ -აღნიშნულია საკრებულოს საკუთრების უფლების აღიარების კომისიის მიერ ენვერ ირემაძისთვის მიწერილ წერილში.

ამ წერილით ენვერ ირემაძემ სასამართლოს უკვე მიმართა და ორი ინსტანცია მოიგო. სასამართლოს გადაწყვეტილებით, საკრებულოს კომისიამ უნდა განიხილოს, ჩამოართვეს თუ არა კანონიერად მას გონიოში მიწის ნაკვეთი, თუმცა ბათუმის საკრებულო სასამართლოს გადაწყვეტილების გასაჩივრებას მესამე ინსტანციაში აპირებს.

„ეს არის ვალდებულება, ყველა ინსტანცია უნდა გავიაროთ და თუ საბოლოოდ დაგვავალდებულებს სასამართლო, მაშინ განვიხილავთ“ – ამბობს ლევან კინწურაშვილი, რომელიც ამავდროულად საკრებულოს იურიდიული კომისიის თავმჯდომარეცაა. „ეს ვალდებულება არ აქვს საკრებულოს, მას უბრალოდ უფლება აქვს, გაასაჩივროს სასამართლოს მიერ მიღებული გადაწყვეტილებები. სასამართლოს არ დაუდგენია, რომ მიწის ნაკვეთი აუცილებლად უნდა დაუბუნონ ენვერ ირემაძეს. სასამართლომ დაადგინა, რომ საკითხი უნდა განიხილოს აღიარების კომისიამ“ – უთხრა „ბათუმელებს“ ნინო სიორიძემ, „სერთაშორისო გამჭვირვალობა საქართველოს“ იურისტმა. ეს ორგანიზაცია ენვერ ირემაძეს სამართლებრივად ეხმარება.

ლევან კინწურაშვილის თქმით, დღევანდელი კანონმდებლობის მიხედვით, კომისია მიწებს გონიოელებს ვერ დაუბრუნებს. „ამას სჭირდება პოლიტიკური ნება. რამდენჯერმე მივმართეთ ქონების მართვის სააგენტოს, მაგრამ პასუხი არ მიგვიღია. ამ კვირაში კიდევ ერთხელ ვეცდებით გავიგოთ მათი პოზიცია. თუ ეს არ გამოვიდა, მაშინ საქმეზე ადმინისტრაციულ წარმოებას დავასრულებთ“.

ქონების მართვის ეროვნულ სააგენტოს პრესსამსახურის ინფორმაციით, მათი როლი ამ პროცესში მინიმალურია და „პოლიტიკური ნება“ სააგენტოზე არაა დამოკიდებული. უწყების პრესსამსახური ამ საკითხზე კომენტარს დღის ბოლომდე დაგვპრიდა.

სადავო მიწები გონიოში 271 ოჯახს ექსპრეზდენტმა მიხეილ სააკაშვილმა გადასცა. 2010 წელს ეს მიწები გონიოელებს ჩამოართვეს. ხელისუფლებაში მოსვლადე, კოალოიცია „ქართული ოცნების“ ერთ-ერთი დაპირება სწორედ გონიოს მიწების დაბრუნება იყო.

ბათუმის მერია: გოგებაშვილის ქუჩაზე მოძრაობა შეფერხებულია

ბათუმის მერიის ინფორმაციით, ამ დროისთვის ბათუმში, გოგებაშვილის ქუჩაზე, ზღვის მხარეს, საკანალიზაციო სატუმბი სადგურის მოწყობისთვის საჭირო სამუშაოები ტარდება, რომელიც დღის ბოლოსთვის უნდა დასრულდეს.

მერიისავე ინფორმაციით, იმავე ტიპის სამუშაოები ქუჩის მოპირდაპირე მხარეს 4 დღის შემდეგ განახლდება.

აღნიშნული სამუშაოების გამო გოგებაშვილის ქუჩასა და მიმდებარე ტერიტორიაზე სატრანსპორტო მოძრაობა შეფერხებულია.

რესტორანი „BK“: „ბათუმის წყლის“ დირექტორმა სასურველი მაგიდის ვერშეთავაზების გამო წყალი ჩაგვიკეტა“

ბათუმის წყლის დირექტორს ალეკო მიქელაძეს რესტორანმა „ BK“-მ ბათუმში სასურველი მაგიდა ვერ შესთავაზა. ის რესტორნიდან გაბრაზებული წავიდა. რამდენიმე წუთში კი რესტორანს წყლის მიწოდება შეუწყვიტეს – რესტორანმა ორგანიზაციის წინააღმდეგ პროკურატურას მიმართა.

რესტორნის პერსონალის ინფორმაციით, გასულ შაბათს, საღამოს „ბათუმის წყლის“ დირეტორი ალეკო მიქელაძე რესტორან „bk“-ში მეგობრებთან ერთად მივიდა. მას რესტორანში სასურველი მაგიდა არ დახვდა თავისუფალი, რის გამოც უკმაყოფილება გამოხატა. რესტორნის პერსონალმა შესთავაზა სხვა მაგიდა, ვიდრე მისთვის სასურველი მაგიდა არ გათავისუფლდებოდა. „ბოდიში მოვუხადეთ და ვუთხარით, რომ როგორც კი გათავისუფლდებოდა მისთვის სასურველი მაგიდა, გადავიყვანდით“, – ამბობს ნინო ბეჟანიძე, რსტორნის ერთ-ერთი მეპატრონე.

27 თევერვალი. ბათუნის წყლის თანამშრომლები BK-თან წყლის ჩასართავად ფოტო გადაღებულია რესტორნის მეპატრონის მიერ — 27 თევერვალი. ბათუმის წყლის ხელმძღვანელი ალეკო მიქელაძე BK-თან. ფოტო გადაღებულია რესტორნის მეპატრონის მიერ

ამ შეთავაზებამ ალეკო მიქელაძე არ დააკმაყოფილა. მან რესტორანი დატოვა, წასვლისას კი პერსონალს დაემუქრა – „თუ საჭიროა რესტორანსაც დავცლი.“

მისი წასვლიდან რამდენიმე წუთში რესტორანს წყლის მიწოდება შეუწყდა. ეს ამბავი მენეჯერმა მეპატრონეეებს შეატყობინა. ისინი „ბათუმის წყალს“ ცხელი ხაზის საშუალებით დაუკავშრდენენ, სადაც მიიღეს პასუხი, რომ დაზიანებაა და „ხელოსნები საჭირო მასალების შესასყიდად წავიდნენ“. ეს ზარი და პასუხიც დაახლოებით ღამის 10 საათზე დაფიქსირდა.

წყლის გათიშვიდან ცოტა ხანში პერსონალმა სტუმრების მომსახურება ვეღარ შეძლო და რესტორანი დაიცალა. ზოგიერთი კი დაზიანების ადგილის მოსაძებნად გავიდა, რა დროსაც მათ აღმოაჩინეს, რომ მემედ აბაშიძის ქუჩაზე, სადაც რესტორანი BK“ – ა განთავსებული, წყალი მხოლოდ ერთ ეზოში იყო გამორთული.

მეპატრონეები ცხელ ხაზს ისევ დაუკავშირდნენ და დაზიანების ადგილსა და მიზეზზე კითხეს. მიზეზად გაჟონვა დასახელდა. ადგილი კი გაურკვეველი დარჩ, მას შემდეგაც, როცა ხელოსნები წყლის ჩასართავად მივიდნენ. რესტორნის პერსონალი ამბობს, რომ მანამდე იქ სარემონტო სამუშაოების ჩასატარებლად არავინ მისულა. მათ სიტუაციის გასარკვევად პატრულიც გამიძახეს, ხოლო ხელოსნებს „რესტონის“ ხელმძღვანელებმა წყლის ჩართვის საშუალება აღარ მისცეს: „ თუ დაზიანება იყო და წყალი ჟონავს, სარემოტო სამუშაოების გარეშე მისი ჩართვა როგორ შეიძლებოდა? – ამიტომ ჩვენ წყალი არ ჩავართვევინეთ და დავსვით კითხვა, თუ წყლის გაჟონვის გემო რაიმე დაზიანდებიდა (რადგან მას რთავდნენ) პასუხიმგებლობას ვინ აიღებდა? “

ამის შემდეგ ადგილზე „ბათუმის წყლის“ კიდევ ერთი თანამშრომელი მივიდა „განყოფილების უფროსი ვარ და წყალი უნდა ჩავრთო. თუ არ ჩამართვევინებთ პატრულს გამოვიძახებო.“

რესტორანში ამბობენ, რომ ამ გაურკვევლობის შემდეგ ადგილზე ალეკო მიქელაძეც მივიდა:
„მას ვკითხეთ, თუ რატომ გაგვითიშეს წყალი გაუფრთხილებლად და გვიპასუხა ხომ არ გინდათ შეტყობინება გამოგიგზავნოთო“ „BK“-ს მეპატრონეებს გადაღებული აქვთ ვიდეო კადრები და ფოტო, სადაც ალეკო მიქელაძე და მისი მანქანაც ჩანს.

ალეკო მიქელაძის ვერსია:

„ბათუმელები“ ალეკო მიქელაძეს ტელეფონით დაუკავშირდა.

„რეტორანში იყვნენ ჩემი ახლობლები შვილებთან ერთად, მათ მივაკითხე და რადგან იქ ვიყავი, რესტორანი წყლის გეგმიური გათიშვის შესახებ გავაფრთხილე. ვუთხარი, ერთი საათით წყალი გაგეთიშებათ-მეთქი და არ ვიცი რატომ აღიქვეს ასე, რატომ ატეხეს ამბავი. მე არ გავჩერებულვარ იქ დიდხანს, ყავაც არ დამილევია. სისულელეა, თითქოს სასურველი მაგიდა მოვითხოვე ან ვინმეს დავემუქრე. ეს ყველაფერი სისულელეა. რატომ უნდა აკეთებდეს ამას რასტორანი არ ვიცი.

რაც შეეხება გეგმიურ გათიშვას. ჩვენ ამ ქუჩაზე გვქონდა წყლის დიდი დანაკარგი. ეტაპობრივად ვთიშავდით მიწოდების სხვადასხვა ადგილს და ვამოწმებდით. აღმოჩნდა, რომ ერას მოედანზე შადრევნები რომაა, ამის გამო გვქონდა დანაკარგი“ – განაცხადა ალეკო მიქელაძემ.

ბათუმის მერის კომენტარი

რესტორნის ერთ-ერთმა მეპატრონემ „ბათუმელებს“ უთხრა, რომ ამ ამბის შესახებ „საქმის კურსში ჩააყენა ბათუმის მერი გიორგი ერმაკოვი: „მან გვითხრა, რომ ასეთი რამ გამორიცხულია და არ შეიძლება მოხდეს. შეგვპირდა გავარკვევო“.

ბათუმის მერმა „ბათუმელებს“ განუცხადა, რომ მას შემდეგ რაც რესტორნის მეპატრონე ესაუბრა, დაინტერსდა თუ რატომ იყო წყალი გამორთული შაბათს საღამოს მემედ აბაშიძის ქუჩის კონკრეტულ ეზოში. მან მიიღო განმარტება, რის შემდეგაც გასცა მითითება, რომ აუცილებლად წინასწარ უნდა გააფრთხილონ აბონენტები წყლის შესაძლო გათიშვილს შესახებ: „რომ არ მოხდეს შემდეგ სხვა ინტერპრეტაცია.“

რაც შეეხება იმას, დაემუქრა თუ არა ბათუმის წყლის დირეტორი რესტორანს და იყო თუ არა წყლის გამორთვა ამ მუქარის შედეგი – გიორგი ერმაკოვის თქმით, ის ამას ვერ გაარკვევს. „ერთი მეტყვის დამემუქრა, მეორე არ დავმუქრებივარო. გამოიძიონ და დაადგინონ“, – ამბობს ბათუმის მერი.

შპს „ბათუმის წყალი“ მერიის მუნიციპალური ორგანიზაციაა და მის ხელმძღვანელს მერი ნიშნავს. ალეკო მიქელაძე წინა ხელისუფების დროს ბათუმის წყლის დირექტორის მოადგილედ მუშაობდა, გიორგი ერმაკოვმა მას ორგანიზაციის უფროსის თანამდებობა ჩააბარა.

რესტორან „BK“-ს მეპატრონეები მიიჩნევენ, რომ გაუფრთხილებლად წყლის გამორთვის გამო რესტორნის იმიჯი შეილახა და რესტორანი დაზარალდა. ამ მიზეზით ისინი „ბათუმის წყალს“ პროკურატურაში უჩივიან.

საგადასახადო შეღავათები მძიმე დაზიანება მიღებული სამხედროებისთვის

2015 წლის 16 დეკემბერს საქართველოს პარლამენტმა მიიღო კანონი „საქართველოს საგადასახადო კოდექსში ცვლილების შეტანის შესახებ’’, რომელსაც 25 დეკემბერს საქართველოს პრეზიდენტმა ხელი მოაწერა და გამოაქვეყნა. კანონი ძალაში შევიდა გამოქვეყნებისთანავე. საქართველოს საგადასახადო კოდექსში ცვლილების ავტორი საქართველოს თავდაცვის სამინისტრო იყო, ხოლო ინიციატორი – საქართველოს მთავრობა.

sagadasaxado shegavatebi mdzime dazianeba migebuli samxedroebistvis — ბესიკ ლოლაძე

საქართველოს საგადასახადო კოდექსში ცვლილების შეტანის იდეა წარმოიშვა დაჭრილი და დაშავებული მეომრების სოციალური მდგომარეობის გაუმჯობესების კონტექსტში, მათთან კონსულტაციების შედეგად.

როგორც ცნობილია, საქართველოს უდიდესი წვლილი შეაქვს საერთაშორისო მშვიდობისა და უსაფრთხოების შენარჩუნებისა და აღდგენის საქმეში. შესაბამის ოპერაციებში საქართველოს შეიარაღებული ძალების სამხედრო მოსამსახურეები და სამოქალაქო პერსონალი აქტიურად მონაწილეობს. სამწუხაროდ, არის შემთხვევები, როდესაც ისინი ჯანმრთელობის მძიმე დაზიანებებს იღებენ.

ამ კატეგორიის პირები, რომელთა თავდადება და დამსახურება ქვეყნის წინაშე ძალიან დასაფასებელია, კვლავ ირიცხებიან შეიარაღებული ძალების რიგებში (აქვე აღსანიშნავია, რომ საგადასახადო კოდექსში განხორციელებული ცვლილება ამ თვალსაზრისით არაფერს ცვლის).
მათთვის შეზღუდული შესაძლებლობის მქონე პირის სტატუსის მინიჭება გახდებოდა შეიარაღებული ძალების რიგებიდან დათხოვნისა და იმავდროულად, სოციალური მდგომარეობის გაუარესების საფუძველი.

ზემოაღნიშნულის გათვალისწინებით, საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებში ჯანმრთელობის მძიმე დაზიანება მიღებული პირებისათვის საგადასახადო შეღავათის მისანიჭებლად გადაწყდა საქართველოს საგადასახადო კოდექსში შესაბამისი სპეციალური ნორმის შეტანა. საქართველოს თავდაცვის სამინისტროს ამ ინიციატივამ მოიპოვა როგორც საქართველოს მთავრობის, ასევე საქართველოს პარლამენტის სრული მხარდაჭერა.

საგადასახადო კოდექსში შეტანილი ცვლილებით, საშემოსავლო გადასახადით კალენდარული წლის განმავლობაში მიღებული 6000 ლარამდე დასაბეგრი შემოსავალი არ იბეგრება. ეს შესამჩნევად გააუმჯობესებს საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებში ჯანმრთელობის მძიმე დაზიანება მიღებულ პირთა ფინანსურ და სოციალურ მდგომარეობას.

ბესიკ ლოლაძე, თავდაცვის მინისტრის მოადგილე

მომზადებულია საქართველოს თავდაცვის სამინისტროს სტრატეგიული
კომუნიკაციების დეპარტამენტის მიერ
ტელ: +995(32) 2 72 35 35;
ელ-ფოსტა: stratcom@mod.gov.ge;
ვებ-გვერდი: mod.gov.ge

ციალა ქათამიძე აჭარაში სახალხო დამცველის წარმომადგენლად დაინიშნა

სახალხო დამცველის რეგიონული დეპარტამენტის აჭარის სამმართველოს პირველი მარტიდან ახალი უფროსი ეყოლება და ის 29 წლის იურისტი ციალა ქათამიძე იქნება. ციალა ქათამიძე ჯერჯერობით სამთვიანი გამოსაცდელი ვადით დაინიშნება.

ციალა ქათამიძე მანამდე არასამთავრობო ორგანიზაცია „ბორჯღალის“ აღმასრულებელი დირექტორი იყო. ამ ორგანიზაციის ერთ-ერთი ძირითადი მიმართულება ეკომიგრანტების პრობლემატიკაზე მუშაობა იყო.

ციალა ქათამიძე კონკურსის წესით იქნა შერჩეული, რომელიც სახალხო დამცველის ოფისმა სულ ცოტა ხნის წინ გამოაცხადა. კონკურსში მონაწილეობას 60 იურისტი იღებდა.

სახალხო დამცველის ყოფილი წარმომადგენელი აჭარაში, გიორგი ჩარკვიანი საქმიანობას კვლავაც სახალხო დამცველის ოფისში გააგრძელებს, ამჯერად ხელშეკრულებით.

გიორგი ჩარკვიანი განათლებით იურისტი არ არის. სახალხო დამცველის ახლი მოთხოვნის მიხედვით კი, სამმართველოს უფროსი აუცილებლად განათლებით იურისტი უნდა იყოს.

სამაცივრე მეურნეობების პროგრამა ამოქმედდა – ერთად ევროპისკენ

საქართველოს ევროკავშირში კურკოვანი კულტურის ექსპორტის შესაძლებლობა იანვრიდან მარტამდე აქვს, როდესაც ევროპაში ატმის, ვაშლატამას, ალუბლის, გარგარისა და ქლიავის დეფიციტია. თუმცა წლის ამ პერიოდში კურკოვანი კულტურის ნაკლებობაა საქართველოშიც. 2015 წლის იანვრიდან მარტამდე საქართველოდან ხილის ამ სახეობების ექსპორტის მაჩვენებელი ნულის ტოლია. ადგილობრივი კომპანიების განცხადებით, ამის მიზეზი პროდუქტის მცირე რაოდენობა და სამაცივრე მეურნეობების არარსებობაა.

როდესაც ველაპარაკებით პარტნიორებს, აუცილებელი მოთხოვნაა სტაბილური მიწოდების უზრუნველყოფა, რაც ჩვენ შემთხვევაში თითქმის გამორიცხულია, რადგან არ არსებობს შესაბამისი შესაფუთი პირობები’’, – ამბობს ,,ფრუტილიას’’ დამფუძნებელი ვახტანგ ბეჟიტაშვილი.

ქართული კომპანია ,,ფრუტილია’’ ხილის ექსპორტს რუსეთში, ყაზახეთში, უკრაინასა და ბელორუსში ახორციელებს. ამ ეტაპზე ევროკავშირის ბაზარზე გასვლას რამდენიმე ფაქტორის გამო ვერ ახერხებს. კომპანიის დამფუძნებელი აცხადებს, რომ დარგს ხელისუფლებისგან მეტი მხარდაჭერა სჭირდება.

,,ევროკავშირში გატანას ვგეგმავთ, თუმცა ჯერ კონკრეტული არაფერია, რადგან ხარისხი და ფასი არ არის შესაბამისი. თუ საბაზრო ღირებულებამ არ მოგვცა იმის საშუალება, რომ კონკურენტული ფასი შევთავაზოთ, შეუძლებელია ექსპორტის განხორციელება. დარგს სჭირდება ხელისუფლებისგან უფრო მეტი მხარდაჭერა, რომ პროდუქტი ქვეყნის გარეთ გავიტანოთ. უნდა იყოს შესაბამისი შესაფუთი სამაცივრე სისტემები, ლოჯისტიკური საშუალებები, რომ ხილი დაბინავდეს სეზონზე და შემდგომ სისტემური და სტაბილური მიწოდება მოხდეს,’’ – ამბობს ვახტანგ ბეჟიტაშვილი.

კურკოვანი კულტურა – ატამი, ვაშლატამა, ქლიავი, გარგარი და ალუბალი ევროპის არა ერთ ქვეყანაში მოდის, ამიტომ ევროკავშირში განვითარებადი ქვეყნებიდან იმპორტი მხოლოდ იანვრიდან მარტამდე ხორციელდება, როდესაც მოსავლის სეზონი არ არის. ამ მიმართულებით ევროპის ყველაზე დიდი მომმარაგებლები სამხრეთ აფრიკა, თურქეთი და ჩილე არიან. განვითარებადი ქვეყნებიდან ყველაზე დიდი ოდენობით კურკოვანი კულტურა ევროკავშირში ნიდერლანდებსა და გაერთიანებულ სამეფოს შეაქვთ, შემდეგ კი ევროკავშირის სხვა ბაზრებზე რეექსპორტს ახორციელებენ. ყველაზე დიდი მოთხოვნა ატამზე, ვაშლატამაზე, ქლიავზე, გარგარსა და ალუბალზე გერმანიაშია. 2014 წელს გერმანიაში 451 000 ტონა კურკოვანი კულტურა შევიდა. გერმანიის შემდეგ ყველაზე დიდი იმპორტიორები არიან: საფრანგეთი (190 000 ტონა), გაერთიანებული სამეფო (177 000 ტონა), იტალია (143 000 ტონა) და პოლონეთი (130 000 ტონა).

გორის რაიონში ქლიავის ბაღების გაშენებას იწყებს გიორგი მაჭარაშვილი, რომელმაც პროექტის „დანერგე მომავალი“ ფარგლებში თანხა მიიღო. პროგრამა „დანერგე მომავალი“ მრავალწლოვანი კულტურების ბაღების გაშენებას ისახავს მიზნად. მაჭარაშვილმა ქლიავის ბაღებისთვის ამ ეტაპზე 335,000 ლარი დაიხარჯა, აქედან თანადაფინანსებამ 192,000 ლარი შეადგინა. ატმის ბაღებისთვის 69,000 ლარი გამოიყო, ხოლო თანადაფინანსებამ 41,000 ლარი შეადგინა. რაც შეეხება გარგარის, ვაშლატამასა და ალუბლის ბაღებს, ამ ეტაპზე პროექტის ფარგლებში განაცხადი აღნიშნული კულტურების ბაღის გაშენებაზე არ შესულა. გიორგი მაჭარაშვილი 3 წელიწადში უკვე ქლიავის მოსავალსაც მიიღებს, თავდაპირველად ადგილობრივ ბაზარზე სურს დამკვიდრება, მომავალში კი ექსპორტსაც გეგმავს.

`ვფიქრობ, ექსპორტზე გასვლას, მაგრამ ნაკლებად სავარაუდოა, რადგან საქართველოს ბაზარი დეფიციტურია, იმპორტული პროდუქტია დომინანტი, ჯერ ადგილობრივი ბაზარი უნდა დავიკავოთ, შემდეგ ექსპორტზე ვიფიქრებთ. ევროპის მიმართულებით გამოცდილება ნაკლებია, არ ვიცი, გადამზიდი კომპანიები თუ მუშაობენ, ძალიან ბევრი ბუნდოვანი საკითხია. ნაკლები ინფორმაცია მაქვს ევროპის ბაზართან დაკავშირებით,“ – ამბობს გიორგი მაჭარაშვილი.

იმისთვის, რომ ქართველმა მწარმოებლებმა ხილის სათანადოდ შენახვა და შემდგომ საჭირო დროს ექსპორტირება შეძლონ, რამდენიმე სახელმწიფო პროგრამა მოქმედებს. გადამამუშავებელი და შემნახველი საწარმოების თანადაფინანსების პროგრამას სამაცივრე მეურნეობების კომპონენტი გასული წლის ნოემბერში დაემატა, ახალი მიმართულება სავარაუდოდ თვის ბოლომდე ამოქმედდება.

თანხის მიღების მსურველებს სხვადასხვა საბუთთან ერთად ვთხოვთ 2 დოკუმენტს – ეს არის შუამდგომლობა რაიონის საინფორმაციო-საკონსულტაციო ცენტრიდან, ასევე, ტექნოლოგიების შესაბამისი ცნობა სოფლის მეურნეობის სამინისტროში არსებული ცენტრიდან იმის შესახებ, თუ რამდენად ადეკვატურია იმ ხილის შესანახად. ეს ცნობები როგორი უნდა იყოს, ამ ფორმაზე ვმუშაობთ. ჩვენ ორივე მხარეს გავუგზავნეთ ნიმუში, ვთხოვეთ, მოგვწერონ შენიშვნები, ამ ეტაპზე ველოდებით მათ პასუხს. ამის შემდეგ გამოვაცხადებთ კომპონენტის ამოქმედებას“, – აცხადებს გადამამუშავებელი და შემნახველი საწარმოების თანადაფინანსების პროექტის მენეჯერი რევაზ ასათიანი.

სამაცივრე მეურნეობების მოსაწყობად თანხის გაცემას ითვალისწინებს კიდევ ერთი პროგრამა. შეღავათიანი აგროკრედიტის ფარგლებში ამ მიმართულებით არა ერთი პროექტი განხორციელდა. ამ ეტაპზე სამაცივრე მეურნეობების მშენებლობისთვის ლარში – 14, ხოლო დოლარში 28 სესხია გაცემული. შეკითხვაზე, რატომ არის იანვრიდან მარტამდე ხილის ექსპორტის მაჩვენებელი კვლავ ნულის ტოლი, პროექტის მენეჯერი აცხადებს, რომ მომავალ წლებში გაცილებით მეტი პროდუქტის შენახვა გახდება შესაძლებელი, რადგან სამაცივრე მეურნეობების მშენებლობა ახლახან დასრულდა.

„ყველაზე მეტი სესხი 2014 წელს გაიცა. 2015 წელს ხშირ შემთხვევაში დასრულებულიც არ იყო მშენებლობა, თუმცა ეს მიმართულება განვითარებადია, კიდევ გაიცემა კრედიტები, რაც იმას ნიშნავს, რომ მომავალში კიდევ ახალი სამაცივრე მეურნეობები აშენდება. 2016 წლის სეზონზე უფრო მეტი მაცივარი იქნება მუშა მდგომარეობაში, რაც საშუალებას მოგვცემს, 2016-2017 წლების ზამთრის სეზონისთვის მეტი პროდუქტი შევინახოთ. თუ რუსეთმა და უკრაინამ ვერ აითვისეს, ევროკავშირშიც გავა ხილი. როდესაც ერთხელ შეიტანენ ევროპაში, ნახავენ, რომ ეს ბაზარი უფრო მომგებიანია, ალბათ შემდეგ უფრო გააქტიურდებიან ამ მიმართულებით, ეს გზაც გაიჭრება და უფრო დიდი წილი ევროკავშირზე გადაერთვება, თუმცა ამისთვის დროა საჭირო. თვითონ მეწარმემ უნდა განსაზღვროს რა არის მისთვის უკეთესი. დრო სჭირდება, დაინახოს, რომ ევროკავშირი უფრო მომგებიანია, ვიდრე რუსეთის ბაზარი, რომელიც შესაძლოა, არასტაბილური იყოს თუნდაც რუბლის კურსის ცვალებადობისა ან ნებისმიერი სხვა მიზეზის გამო. ბიზნესმენები ამ ეტაპამდე მივლენ~, _ აცხადებს გიორგი ჯიბლაძე.

შპს „ელენიქსტა~ ერთ-ერთია იმ სამ კომპანიას შორის, რომელმაც სესხი კურკოვანი კულტურის სამეურნეო მაცივრის მოსაწყობად შეღავათიანი აგროკრედიტის ფარგლებში მიიღო. „ელენიქსტა~ ხილის წარმოება-რეალიზაციას ეწევა, ქლიავის ბაღები კი 14 ჰექტარზე გააშენა. მიუხედავად იმისა, რომ გიორგი კვირიკაძეს ხილის შენახვის საშუალება ექნება, ექსპორტზე გასვლას ამ ეტპაზე მაინც ვერ მოახერხებს.

„ადგილობრივი ბაზარიც არ არის დაკმაყოფილებული, იმდენად ცოტაა მოსავალი, ექსპორტზე კი არა, აქაც არ გვყოფნის. ფასიც მაღალია, ქლიავი აქ უფრო ძვირი ღირს, ვიდრე ევროკავშირში. მოსავალი ცოტაა, ასევე, არ არიან ტექნოლოგები, ცოტა მებაღე და აგრონომია, მათი გადამზადებაა საჭირო, ან უნდა ჩამოიყვანონ სპეციალისტები, ვისაც შეუძლია ხარისხიან ხილის წარმოებაში დაგვეხმარონ. ქართველებს გვიჭირს ხარისხიანი და უხვი პროდუქციის მოყვანა’’, – ამბობს შპს „ელენიქსტას“ ერთ-ერთი დამფუძნებელი გიორგი კვირიკაძე.

იმისთვის, რომ განვითარებადი ქვეყნებიდან ევროპაში კურკოვანი კულტურა შევიდეს, იმპორტიორი გარკვეულ სტანდარტებს უნდა აკმყოფილებდეს. მინიმალური მოთხოვნებია: ხილს არ უნდა აღენიშნებოდეს დაზიანება, იყოს სუფთა, საღი, პესტიციდებისგან თავისუფალი, ჰქონდეს ტენიანობის შესაბამისი დონე, იყოს სათანადოდ დამწიფებული, საბოლოო ჯამში ხილი ტრანსპორტირების შედეგად არ უნდა დაზიანდეს.

განვითარებადი ქვეყნებიდან იმპორტის ხელშეწყობის ცენტრმა ევროპაში ატმის, ვაშლატამის, გარგარის, ალუბლისა და ქლიავის შეტანის მსურველებისთვის შესაბამისი რეკომენდაციებიც შეიმუშავა.

უნდა გახდე გრძელვადიანი საცალო გაყიდვების პროგრამის ნაწილი და გააუმჯობესო შენი კომპანიის საქმიანობა გამოცდილ მყიდველებთან ურთიერთობების გაღრმავებით;

უნდა შეეცადო კონკურენცია გაუწიო სხვებს არა მხოლოდ ფასში, არამედ ხარისხსა და მიწოდებაშიც;

ეძებო შესაძლებლობები, რომ ევროკავშირის ბაზარზე პროდუქცია შეიტანო მაშინ, როდესაც იქ ამ პროდუქტის დეფიციტია, შეეცადო, ახალი სახეობებით მოამარაგო ევროპა. მოლაპარაკებების პროცესში ნოვატორებს გაცილებით ძლიერი პოზიციები აქვთ;

მნიშვნელოვანია გამჭვირვალე ინფორმაცია შენი კომპანიისა და პროდუქტის ხარისხის შესახებ. სტაბილური პარტნიორობა დაგეხმარებათ ბაზარზე საკუთარი პოზიციის შენარჩუნებასა და განმტკიცებაში;

გამოიყენეთ კონკრეტული ისტორიები, რაც აჩვენებს ხილის წარმომავლობას – საინტერესო ამბები თქვენს პროდუქტს სხვებისგან განსხვავებულს გახდის.

ფასი ევროკავშირის სუპერმარკეტებში:

გარგარი – 00 – 7,50 ევრო/კგ
ალუბალი – 00-10.00 ევრო/კგ
ატამი და ვაშლატამა – 50-6.00 ევრო/კგ
ქლიავი – 50-7.50 ევრო/კგ

იბეჭდება მცირედი შემოკლებით.

მომზადებულია http://eugeorgia.info – ს მიერ.

სტუდენტური თვითმმართველობის ფინანსური პოლიტიკა

წელს ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობა ბიუჯეტის გაზრდას და 190 997 ლარის დახარჯვას აპირებს. ყველაზე მეტი თანხის, 23 ათასი ლარის დახარჯვას თვითმმართველობა საახალწლო, კურსდამთავრებულთა გაცილებისა და პირველკურსელთა დასახვედრი წვეულებებისთვის გეგმავს.

სპორტული გუნდების სამი მწვრთნელის ხელფასისთვის 18 000 ლარია გათვალისწინებული, ანსამბლ „ტბეთისთვის“ კოსტიუმებისა და აქსესუარების შესაძენად – 12 230 ლარი, სტუდენტური თეატრისთვის – 4 400 ლარი, ხოლო სპორტული ინვენტარისა და ტანსაცმლისათვის – 18 855 ლარი. ანსამბლ „ტბეთისა“ და თეატრალური დასის ფესტივალებში მონაწილეობისათვის 12 000 და 7 500 ლარია გათვლილი.

ეს ბიუჯეტის სამუშაო ვერსიაა და იგი უნივერსიტეტმა უნდა დაამტკიცოს ყოველი აქტივობის განხორციელების წინ, ან შემდგომ წარმოდგენილი ხარჯთაღრიცხვის საფუძველზე.

ბსუ-ს თვითმმართველობის თავმჯდომარე გასული წლის ზაფხულიდან ბექა მაკარაძეა. მის მიერ მოწოდებული, 2016 წლის საბიუჯეტო გეგმით გათვალისწინებული აქტივობები მეტწილად გასული წლის მსგავსია. სიახლეს წარმოადგენს სტუდენტური ინიციატივების პროგრამა და საერთაშორისო სტუდენტური ფორუმი, რისთვისაც 10-10 ათასი ლარია განსაზღვრული. 9 ათასი ლარია გათვალისწინებული უცხოეთში სემინარებსა და კონფერენციებში მონაწილეობისთვის.

თვითმმართველობის თავმჯდომარესთან, ბექა მაკარაძესთან „ბათუმელების“ ინტერვიუს გასულ კვირას თვითმმართველობის სოციალურ და პოლიტიკურ მეცნიერებათა ფაკულტეტის ხელმძღვანელი უჩა აბრამიშვილიც დაესწრო. იგი 2011-2012 წლებში თავადაც გახლდათ ბსუ-ს სტუდენტური თვითმმართველობის თავმჯდომარე. უნივერსიტეტის სტუდენტთა ერთი ჯგუფის თქმით, თვითმმართველობის არაოფიციალური მმართველი სწორედ უჩა აბრამიშვილია. „ბათუმელების“ კითხვების დიდ ნაწილს სწორედ უჩა პასუხობდა.

კითხვაზე, თუ ჰქონიათ ან თუ გეგმავენ საჯარო ლექციების ან სხვა სახის საგანმანათლებლო ღონისძიებებს და შესაბამისი კომპეტენციის მქონე პირების მოწვევას, ბექა მაკარაძე პასუხობს, რომ მსგავსი პრაქტიკა არ ჰქონიათ და არც პროგრამებში აქვთ გაწერილი: „მაგრამ თუ რომელიმე სტუდენტი შემოვა და იტყვის, რომ იდეა აქვს მოიწვიოს პოეტი ან ვინმე, რომელიც ლექციას წაიკითხავს ან რამე მსგავსი, რატომაც არა, ჩვენ პრობლემა არ გვექნება“.

აქვთ თუ არა სტუდენტურ თვითმმართველობაში თემატურად დანაწილებული ფუნქციები და ადგენენ თუ არა პროექტებსა და პროგრამებს თემატურად, ცალ-ცალკე? თვითმმართველობაში ამბობენ, რომ ფაკულტეტებზე მუშაობენ ხელმძღვანელები და წარმოადგენენ თავიანთ საჭიროებებს.

„ყველა ფაკულტეტი ინდივიდუალურად აკეთებს თავისთვის [პროგრამას]. სპორტს მთლიანად ვუყურებთ ჩვენ, ანუ ყველა ფაკულტეტს ჰყავს თავისი წარმომადგენელი სპორტში, მსკ-ში [მხიარულთა და საზრიანთა კლუბი]. მაგალითად, უნივერსიტეტის მსკ-ის გუნდი რომ შევქმენით, ცხრავე ფაკულტეტმა ჩამოაყალიბა ცალკე გუნდი, ესენი შევაჯიბრეთ, საუკეთესოები ავირჩიეთ და გავუშვით თბილისში. მესამე ადგილზე გავიდნენ,“ – განმარტავს თვითმმართველობის მუშაობის სტრატეგიას უჩა აბრამიშვილი.

ბექა მაკარაძის თქმით, მისი პირველი ღონისძიება თვითმმართველობაში მოსვლის შემდეგ იყო საქველმოქმედო აქცია თბილისში, 13 ივნისის სტიქიით დაზარალებულთა დასახმარებლად. იგი იხსენებს რამდენიმე საქველმოქმედო ღონისძიებას, ეკლესიების მშენებლობებზე ჯგუფურ მონაწილეობას და მემორანდუმებს: „გავაფორმეთ რამდენიმე მემორანდუმი და კიდევ ვგეგმავთ „მეტრო ჯორჯიასთან~. სასტუმრო „ლეოგრანდთან~ უკვე შეთანხმებული გვაქვს და მხოლოდ ოფიციალური გაფორმებაა დარჩენილი, იქნება სპა, სალონი, აუზი… 50%-იანი ფასდაკლებებით ისარგებლებენ ჩვენი სტუდენტები და მგონი პროფესორებიც, ასევე „ბრიტანულ ცენტრთან~ ვაპირებთ მემორანდუმის გაფორმებას“.

შეკითხვაზე, რას მიიჩნევს უნივერსიტეტში თვითმმართველობის თავმჯდომარე ყველაზე დიდ პრობლემად, ბექა მაკარაძე ფიქრობს და იმეორებს: „პრობლემა იმდენია რომ…“ აქ უჩა აბრამიშვილი ერთვება:

„პრობლემა ბევრია, მაგრამ ეტაპობრივად მივყვებით და ვაგვარებთ. თვითმმართველობას პრობლემა არ აქვს. უნივერსიტეტში შეიძლება არის რაღაც პრობლემები, მაგრამ ქვეყანამ რომ გაიგოს, ნამდვილად არ გვსიამოვნებს. რაც არის, ადმინისტრაციასთან ერთად ვსხდებით და ვაგვარებთ, როგორც თქვენი ოჯახის საქმეს გარეთ არ გაიტანთ, ისევეა ჩვენთვის უნივერსიტეტი, მაგრამ ისეთი, რომ გადაუჭრელი იყოს, ნამდვილად არაფერი არ არის“.

გასულ წელს ბათუმის შოთა რუსთაველის სახელმწიფო უნივერსიტეტის სტუდენტურმა თვითმმართველობამ 83 538 ლარი დახარჯა.

სახლი სკოლაში კვირაში ხუთი დღე

აქ დღე 07:30 საათზე, დილის ვარჯიშით იწყება. მთელი დღე დაგეგმილია და ხანგრძლივი ზარის ხმაც ამ დღის დაწყებაზე მიანიშნებს. ასე ცხოვრობს 220 ბავშვი კვირაში ხუთი დღე და მიუხედავად იმისა, რომ მშობლებთან ერთად არ არიან, ეს ის ადგილია, სადაც, მათი თქმით, თავს სახლში გრძნობენ.

ავტობუსის გაჩერების წინ ფართო და მაღალი ჭიშკარია. დიდი ასოებით წარწერა გვამცნობს, რომ აქ მდებარეობს სალიბაურის #2 საჯარო სკოლა-პანსიონი. ჭიშკრის მიღმა ვრცელი ხეივანი უნდა გაიარო და სკოლა-პანსიონის ეზოში აღმოჩნდები. ეზოს ერთ მხარეს – სკოლის, მეორე მხარეს კი საცხოვრებელი კორპუსის შენობა დგას. დილის 11 საათზე ეზოში დარაჯისა და რამდენიმე თანამშრომლის გარდა არავინაა, გაკვეთილები მიმდინარეობს და მოსწავლეები კლასებში არიან.

სალიბაურის სკოლა პანსიონი. თორნიკე თავაძის ფოტო

სალიბაურის #2 საჯარო სკოლასთან არსებული პანსიონი აჭარაში მოქმედ ოთხ სკოლა-პანსიონს შორის ყველაზე დიდია. სკოლაში 300 მოსწავლეა, მათგან 220 საპანსიონო მომსახურებით სარგებლობს, რაც სასწავლო მომსახურების გარდა ღამისთევასა და ოთხჯერად კვებას მოიცავს. ერთი მოსწავლის კვება დღეში 4.35 ლარი ჯდება. მოსწავლეები ორშაბათს დილით მოდიან და პარასკევს საღამოს ოჯახებში ბრუნდებიან. მათ პანსიონის ავტობუსები ემსახურება.

პანსიონში 36 ადამიანია დასაქმებული. 2016 წლის ბიუჯეტი კი 357 000 ლარს შეადგენს. სკოლის დირექტორი, სერგო ხოზრევანიძე ამბობს, რომ პანსიონი ძირითადად სოციალურად დაუცველი მოსწავლეებისთვისაა განკუთვნილი.

„70 000 ქულაზე ნაკლები უნდა ჰქონდეს ოჯახს. აქ არიან მარტოხელა დედების შვილები, ასევე ბავშვები, რომელთა ოჯახის წევრებიც გადიან ხანგრძლივ მკურნალობას და დევნილები. შემოსულ განცხადებებს განიხილავს კომისია და იღებს გადაწყვეტილებას. გვაქვს სარეზერვო სიებიც და თუ ადგილი თავისუფლდება, მათ ვუკავშირდებით. გვქონია შემთხვევები, როცა სოცმუშაკებს მოუყვანიათ მოსწავლე“, – ამბობს სერგო ხოზრევანიძე.

სკოლა-პანსიონის რეაბილიტაცია 2008 წელს განხორციელდა, თუმცა სარეაბილიტაციო სამუშაოებზე გამოყოფილი ბიუჯეტის კორექტირების გამო მხოლოდ სკოლისა და საცხოვრებელი კორპუსის გარემონტება მოხერხდა.

ამ ეტაპზე სკოლას სპორტული დარბაზი არ აქვს. კლუბის შენობაში არსებულ თეატრში კი სიძველისა და სხვა მიზეზებით გაფუჭებული სკამები და სცენის იატაკი სარემონტო სამუშაოებს საჭიროებს. თეატრის ჭერს წყლის კვალი ემჩნევა და კედლების საღებავი აქა-იქ ჩამოცვენილია. გასარემონტებელია სკოლის სასადილოც.

დირექტორის თქმით, დაახლოებით 2020 წელს დაიწყებენ სპორტული დარბაზისა და კლუბის გარემონტებას.
„რაც აქ ვმუშაობ, სასადილო არ გარემონტებულა და ინვენტარიც, როგორც ხედავთ, ძველია. არც გათბობა გვაქვს“, – ამბობს სასადილოს უფროსი მზარეული ალეკო ზოიძე.

დირექტორის თქმით, სკოლას ფსიქოლოგი არ ჰყავს. კონკურსიც გამოაცხადეს, თუმცა უშედეგოდ. დირექტორის ვარაუდით, ეს დაბალ ანაზღაურებას უკავშირდება. თუმცა სერგო ხოზრევანიძე დასძენს, რომ შტატში ექვსი აღმზრდელი ჰყავთ, რომლებიც უმაღლესი განათლებით ფსიქოლოგები არიან.

პანსიონის აღსაზრდელებს სხვადასხვა მიზეზით უწევთ აქ ცხოვრება და სწავლა. ყველაზე ხშირად სიდუხჭირის გამო მოდიან. სკოლა-პანსიონის დათვალიერებისას დირექტორი ყვება მძიმე ისტორიებს, რომ ერთ-ერთ მოსწავლეს ხშირად ამჩნევდნენ სისხლჩაქცევებს და ამის გამო დაიწყეს მასწავლებლებისა და აღმზრდელების შემოწმება-დაკვირვება: „ერთხელ მასწავლებელმა ხელი წაიღო თავზე, რომ გადაესვა და ბავშვს ისტერიკა დაემართა. ძალიან შეშინებული იყო. ბოლოს აღმოჩნდა, რომ მას სახლში დედინაცვალი სცემდა, ღუმელის შესაკეთებელი გაცხელებული რკინა დაერტყა ზურგში. ჩვენ და სოცმუშაკები ჩავერიეთ ამ საქმეში და შემდეგ მოგვარდა პრობლემა – ბავშვის მამა დაშორდა ცოლს“.

დირექტორი ასევე ყვება იმ რთულ სოციალურ და ოჯახურ პირობებზე, რომელშიც აქ მცხოვრები მოსწავლეების ოჯახები არიან. იგი ამბობს, რომ ზოგიერთი მოსწავლის მშობელი შშმ პირია, ზოგიერთს მხოლოდ დედა ჰყავს, რომელიც მთელი დღით სამუშაოდ არის გასული, ზოგიერთს კი სახლში არ აქვს ელემენტარული პირობები, რის გამოც შვილების აქ მოყვანას ამჯობინებს. პანსიონის მოსწავლეთა ნაწილი „ოცნების ქალაქში“ ცხოვრობს.

„ახლა, დიდთოვლობაზე, გაკვირვებული ვიყავი, ასპროცენტიანი დასწრება გვქონდა. ბავშვებს რომ ვკითხე, მითხრეს, აქ გვირჩევნია, თბილაო“, – იხსენებს დირექტორი.

იგი დასძენს, რომ მართალია, ოჯახში ცხოვრება კარგია, თუმცა ამ ბავშვებისთვის ეს პანსიონი საუკეთესო გარემოა. დირექტორი პანსიონის დახურვის მცდელობის ფაქტის შესახებაც მოგვიყვა:

„2007 წელს ჩაატარეს ექსპერიმენტი, გამოთვალეს ბიუჯეტი და ყველა ოჯახს დაურიგეს ის თანხა, რაც იხარჯებოდა ერთ ბავშვზე. პროგრამა დაიხურა. მაგრამ ოჯახებმა ეს თანხა არამიზნობრივად დახარჯეს და ბავშვები მაინც მზრუნველობის გარეშე დარჩნენ. მიუხედავად იმისა, რომ ბავშვები სხვა სკოლებში გადაანაწილეს, მაინც ჩვენთან მოდიოდნენ და იყო ერთი ამბავი, რის შემდეგაც გაგრძელდა პანსიონის მუშაობა“.

დირექტორთან ინტერვიუს შემდეგ ბავშვებს ვესაუბრები. კითხვაზე, რის შეცვლას, გაუმჯობესებას ისურვებდა პანსიონში, მეცხრეკლასელი თორნიკე დაჟინებით იმეორებს, რომ აქ ყველაფერი ძალიან კომფორტულია და ვერაფერს იხსენებს, რაც აკლია ან რის შეცვლაც უნდა. თუმცა ამატებს, რომ ორი წლის წინ, როცა აქ მოდიოდა, იგივე შეკითხვა რომ დაესვათ მისთვის, აქედან წასვლას ისურვებდა. თორნიკე ამბობს, რომ ახლა, მის ოჯახს ფინანსურადაც რომ არ უჭირდეს, აქედან მაინც არ წავიდოდა, რადგან აქ ყველა პირობა აქვს მიზნების მისაღწევად. თორნიკეს არქიტექტორობა უნდა.

ნასტია და სერგო და-ძმანი არიან. სერგო ამბობს, რომ ბადმინტონის თამაშში უპირობო ლიდერია. დიმას კი ფეხბურთის თამაში ურჩევნია. მიყვება, რომ ორი დღის წინ ფეხბურთის თამაშისას ფეხსაცმელი გაეხა და თან მაჩვენებს. დახეულ ფეხსაცმელში ტერფის ნახევარი მოუჩანს. სამახსოვრო ფოტოების გადაღებისას შეეცადა დახეული ფეხსაცმელი მეორე ფეხით დაეფარა. დიმა ამბობს, რომ „ოცნების ქალაქში~ ცხოვრობს, თან მეკითხება, თუ გამიგია ამ ადგილის შესახებ. მეუბნება, რომ სახლში წასვლა არ უხარია. „აქ ყოფნა მირჩევნია, აქ უკეთ ვარ. ვსწავლობთ, ვთამაშობთ. ბორში არ მიყვარს, მაგრამ სხვა რამეს ვჭამ… სკოლაში ყველაზე მეტად ხატვა მიყვარს და ბურთი, მასწავლებელი სულ ამბობს – არ გახეთქოთო. ორი ბურთი გავხეთქეთ“, – ყვება ის სიცილით.

იმედი, რომელიც მე-11 კლასშია, უკვე ფიქრობს უნივერსიტეტზე. მისი ინტერესის საგანი ეკონომიკაა, ოღონდ უნივერსიტეტის არჩევისას, ფინანსური მდგომარეობა რომ დიდ როლს თამაშობს, ეს აწუხებს. პანსიონში იმედსაც მოსწონს. თუმცა ამბობს, რომ მამისა და უფროსი ძმის როლი ხშირად უთამაშია მათთვის, ვისაც პირველ დღეებში მასავით უჭირდა შეგუება სისტემასთან, რომელსაც დღეს ოჯახად აღიქვამს.

რეისი: ბათუმი – კირნათი

თამთა კახაბერიძე

ინგლისურის გაკვეთილი საღამოს შვიდის ნახევარზე მიმთავრდება. 2-3 წუთში გამოვდივარ ნატო მასწავლებლის სახლის სადარბაზოდან. აი, ამ წამიდან იწყება ჩემი და ჩემი სოფლის ავტობუსის შეჯიბრი, რომელიც ზუსტად იმ დროს გამოდის ქალაქის მეორე ბოლოს მდებარე ავტოსადგურიდან, როცა მე ინგლისურის გაკვეთილს ვამთავრებ. ჩვენი მარშრუტის გადაკვეთის ადგილამდე აუცილებლად უნდა მივასწრო, თუ სახლში დაბრუნება მინდა, რადგან ეს ბოლო ავტობუსია, რომელიც ჩემს სოფლამდე მიდის. ხვალ სკოლაში ვარ წასასველი და დილით, 9 საათამდე თუ გადავფრინდები, თორემ, ისე ქალაქიდან ვერანაირად ვერ მივაღწევ ჩემი სოფლის სკოლამდე.

კორპუსის ეზოდან გამოსვლამდე ავტობუსზე მისწრების ალბათობას ვთვლი, რაც ბევრ ფაქტორზეა დამოკიდებული: რა დღეა -სამუშაო თუ უქმე, როგორი ამინდია, რომელი მძღოლია დღეს ცვლაში და ა.შ. უკვე ქუჩაში გამოსული ვწყვეტ – სწრაფად ვიარო, თუ თავპირისმტვრევით ვირბინო. უფრო ხშირად მეორე ვარიანტს ვირჩევ და დანიშნულების ადგილას მისული ძლივს ვითქვამ სულს. თუ ავტობუსს, ჩემი გათვლებით, 3-4 წუთით მაინც ვასწრებ, მაშინ შედარებით მშვიდად ვარ და გზაში მომავლის გეგმებსაც ვაწყობ: მომავალში შეიძლება ხვალინდელი დღის გრაფიკიც იგულისხმო, შემდეგი კვირის ან თვის, ან მთელი ცხოვრების. მაგრამ, მე აბიტურიენტი ვარ და ჩემი მომავლის გეგმა მხოლოდ ეროვნულ გამოცდებამდე პერიოდს ეხება. დანარჩენს უკვე გამოცდების შედეგი განსაზღვრავს.

ჰო, აბიტურიენტი ვარ, თუმცა, რომელ ფაკულტეტზე მინდა სწავლის გაგრძელება, ჯერ კიდევ ვერ გადავწყვიტე. რა მაინტერესებს? რისი კეთება მინდა? – მაინტერესებს ადამიანის უფლებები, მაწუხებს ქალებზე ძალადობა და ნაადრევი ქორწინება, შეზღუდული გარემო შშმ პირთათვის, განათლების პრობლემა, ქუჩაში დაყრილი ნაგავი, მაწუხებს უამრავი სტერეოტიპი ჩემ გარშემო და ის უკულტურობა, რომელსაც ბევრი „ქართულ კულტურას~ უწოდებს და კბილებით იცავს არარსებული მტრისგან. მინდა რამე გავაკეთო ამ პრობლემების მოსაგვარებლად, მინდა ბევრი თანამოაზრე მყავდეს, რომ ერთად შევცვალოთ გარემო, რომელიც არ მოგვწონს და მინდა ჩვენი ქვეყანა განვითარებულ ქვეყნად იქცეს. მოკლედ, ბევრი ამბიცია მაქვს. მომავალ პროფესიად იურისპრუდენციას ან ჟურნალისტიკას განვიხილავ.

ამასობაში დანიშნულ ადგილსაც ვუახლოვდები. ავტობუსში ასული თავს უკვე მშობლიურ გარემოში ვგრძნობ. ალბათ იმიტომ, რომ ვიცი, ერთი საათი დამჭირდება თუ საათ-ნახევარი, თუნდაც ორი იყოს, ყოველ შემთხვევაში, დღეს აუცილებლად მივაღწევ სახლამდე. ეს დროც ბევრ ფაქტორზეა დამოკიდებული, რომლებიც უკვე ვახსენე.

ავტობუსში თითქმის ყოველთვის ერთსა და იმავე სახეებს ვხვდები. წინ, ძირითადად, ახალგაზრდა ბიჭები სხედან და სოფელში ასვლამდე ტოტალიზატორის ბილეთებზე, ფეხბურთზე, „გუშინდელ თამაშზე“, მანქანებსა და სიგარეტის გაძვირებაზე საუბრობენ; შუა ნაწილს ბაზრიდან წამოსული ქალები იკავებენ, რომლებსაც დაღლილობის მიუხედავად, ყოველთვის აქვთ იმის ძალა, რომ სოფლის „ყვითელი“ ამბები განიხილონ: ვინ „ახალი რძალი მოიყვანა“, ვინ მანქანა იყიდა და ვისმა ბიჭმა სად დაიწყო მუშაობა.

სულ უკან, კაცები არიან. ისინი, ძირითადად, მშენებლობაზე მუშებად მუშაობენ. იმის იმედი, რომ დასაჯდომი ადგილი მომიწევს, რა თქმა უნდა, არ მაქვს და ავტობუსის შუაში, „ქალების სექციაში“ ვდგები. ზოგჯერ, რომელიმე ახალგაზრდა ბიჭი, „ჯენტლმენობას“ იჩენს და ადგილს მითმობს, ამ დროს ძალიან უხერხულად ვგრძნობ თავს, ბევრს ვუარობ, მაგრამ მთელი ავტობუსის შეგულიანების შემდეგ, „რომ დაგითმეს, დაჯექი“, მაინც მიწევს დაჯდომა და მერე მთელი გზა ეკლებზე ვზივარ. ქალისთვის ადგილის დათმობა და ამით პატივისცემის გამოხატვა იმ საზოგადოებაში, რომელშიც ყოველი მესამე ქალი ძალადობის მსხვერპლია, ცოტა სასაცილოდ მეჩვენება.

განსაკუთრებით ნერვები მეშლება, როცა „ჩემი ჯენტლმენი“ ძმაკაცებთან საუბრით გართული და აზარტში შესული ხმამაღლა წამოიძახებს ხოლმე „ქალმა ეგ როგორ უნდა გამიბედოს, ძმაო“. ან, ენადგაკრეფილ მეგობარს შენიშვნას აძლევს, რომ ძალიან ბევრს ლაპარაკობს და თან „ნამუსზე აგდებს“: „ქალი ხომ არ ხარ, ბიჭო“. ამიტომ, რაც არ უნდა დაღლილი ვიყო, დგომა მიჩევნია, თან უკვე წლებია, თითქმის ყოველდღე, ასე ვმგზავრობ და შევეჩვიე. ამ დროს ქალები მამხნევებენ ხოლმე: „ინვალიდი ხომ არაა, იდგეს მერე, ახალგაზრდაა ჯერ და არ გაუჭირდება“. „ინვალიდი არა, შეზღუდული შესაძლებლობის მქონე“ – ვიმეორებ გულში, თუმცა ხმამაღლა არაფერს ვამბობ. ვიცი, ამ სიტუაციაში ამ თემაზე მსჯელობას აზრი არ აქვს. ბევრჯერ ვცადე და შედეგად მხოლოდ ნერვების დაგლეჯა და „გაუზრდელი და ტლიკინა“ გოგოს სახელი მივიღე.

მახსოვს, პირველად რომ დავიწყე დამოუკიდებლად ქალაქში სიარული, მთელი ავტობუსი და, შესაბამისად, მთელი სოფელი შეშფოთებული იყო: ახალგაზრდა გოგო ასე ხშირ-ხშირად სად დავდიოდი, ან ასე გვიან რატომ ვბრუნდებოდი სახლში. დედაჩემს აფრთხილებდნენ კიდეც, რომ შეიძლება ერთხელაც უკან აღარ დავბრუნებულიყავი. მალე მიხვდნენ, რომ მართლა მეცადინეობაზე დავდივარ, ან ტრენინგზე, ან რომელიმე არასამთავრობოს მიერ ორგანიზებულ კურსებზე და არა პაემანზე. ყოველ შემთხვევაში, გათხოვებას ნამდვილად არ ვაპირებ, ჯერჯერობით. თუმცა, ზოგჯერ ახლაც შენიშნავენ დანანებით: „არ იღლები ამდენი სიარულით ყოველდღე?!“, „რა ქნას, სწავლობს ბავშვი“, ამას დედაშვილური რჩევა მოყვება: „ამდენი სწავლაც არაა საჭირო, ბიჭი ხომ არ ხარ. მამაშენს რამდენი ფული ეხარჯება შენზე, მაინც უნდა გათხოვდე“.

ვცდილობ ბრაზი გადავყლაპო, უხეშად რომ არ გამომივიდეს და ისე ვუპასუხო, მოკლედ, ზრდილობის გულისთვის. ხანდახან, ჩურჩულით ნათქვამი, ეჭვიანი ტონი მესმის: „უნდა გათხოვდეს, მაგრამ, ნეტა სახლის საქმეები ეხერხება?! – სკოლის მერე ქალაქში გამორბის, მაგას საჭმლის გაკეთებაც არ ეცოდინება.“ ადრე ამ ყველაფერზე ძალიან ვბრაზდებოდი და ისე ვნერვიულობდი, სახლში მისული ვტიროდი. ახლა, უკვე აღარც ვეპასუხები. „თავის გამართლების~ რეჟიმით, ისევ იმ სტერეოტიპებს გავამყარებ, რომელიც ასე მიშლის ნერვებს.

უკან სულ ხმაურია. კაცები საქვეყნო საქმეებს განიხილავენ: ლანძღავენ მთავრობას, ჩივიან ლარის კურსის გაუფასურებაზე, რუსეთ-საქართველოს ურთიერთობაზე, დასავლეთის მიერ წართმეულ „ქართველობაზე“, საბჭოთა კავშირისდროინდელ სიკეთეებზე, 37 მანეთად მოსკოვში გადაფრენაზე, იქ 2 მანეთად ნაყიდ არაყზე და რუსულ „პეჩენიაზე“, აკრიტიკებენ ახალგაზრდა თაობას, გადაგვარებულებს და უზრდელებს გვიწოდებენ. ამ ყველაფერს იმდენად განიცდიან, რომ ნერვების დასაწყნარებლად სიგარეტს უკიდებენ და ნამწვავს წინა სკამის საზურგეზე აქრობენ.

ჩემს სახლამდე 40-50 მეტრით ადრე მეზობელი აჩერებს ავტობუსს. ჩვეულებრივ, მეც აქ ჩამოვდივარ და დარჩენილ გზას ფეხით ვაგრძელებ.

ჩემი სოფელი ძალიან ლამაზია. წელიწადის ყველა დროს თავისი ხიბლი აქვს, მაგრამ, მე ყველაზე მეტად ღამით მომწონს: სიმშვიდეში. მარტო, სიბნელეში მივაბიჯებ სოფლის ვიწრო გზაზე და ვფიქრობ: არ ვიცი სამართალმცოდნე ვიქნები თუ ჟურნალისტი, იქნებ სულ სხვა პროფესია ავირჩიო. მაგრამ, ნებისმიერ შემთხვევაში უნდა ვიზრუნო იმ პრობლემების გამოსწორებაზე, რომლებიც ასე მაწუხებს, მეც და ჩემმა თაობამაც უნდა შევძლოთ, რომ ჩვენი ქვეყანა განვითარდეს. ამისთვის კარგი განათლებაა საჭირო, კარგი განათლებისთვის – კარგ უნივერსიტეტში სწავლა, კარგ უნივერსიტეტში ჩარიცხვისთვის – გამოცდების კარგად ჩაბარება, გამოცდების ჩაბარებისთვის საჭიროა ხვალინდელი დავალება კარგად შევასრულო. ამისთვის, ალბათ, შუაღამემდე მუშაობა მომიწევს, მაგრამ არაუშავს. მთავარია, ამ ყველაფერს შედეგი ჰქონდეს.

როგორც იქნა, მოვაღწიე სახლამდე. ვაღებ ჭიშკარს, რომელიც, რაც არ უნდა ფრთხილად გავაღო, მაინც ძალიან ჭრიალებს და სახლში შევდივარ.

გერმანულ-ფრანგული ენების კვირეული სკოლა ევრო-2000-ში

სწავლა ხალისით – გზა ვეროპისაკენ!

,,მე ქართველი ვარ,მაშასადამე – ევროპელი!’’

,,მე ქართველი ვარ ჩემი ტრადიციებით, ენით, კულტურით, წარსულით, აწმყოთი და მომავლით“, ,,მე ქართველი ვარ და ყველაფერს გავაკეთებ იმის დასამტკიცებლად, რომ ჩემი წინაპარი პირველი ევროპელია, შეუძლებელს შევძლებ იმისათვის, რომ ჩემი ქვეყნის საუკეთესო ტრადიციები მსოფლიოს ვაჩვენო. ვაჩვენო ჩემი სწავლით, აღზრდილობით, თავმდაბლობით, ტოლერანტობით, შემწყნარებლობით, ჩემი ქვეყნის ისტორიული წარსულისა და აწმყოს სიყვარულით, დანარჩენი მსოფლიოს კულტურის პატივისცემით.“ მოსწავლეთა ესეებში ამოკითხული ეს ფრაზები იმედისმომცემად ჩაგვესმის, ამით ჩვენი აღსაზრდელები გვასაზრდოებენ და სტიმულს გვაძლევენ, რომ ჩვენ, მასწავლებლებმა და მშობლებმა, შეუძლებელი შევძლოთ, მხარში ამოვუდგეთ ჩვენს მომავალს, გადავცეთ ჩვენი გამოცდილება, ვასწავლოთ ის, რაც ვიცით, მივანიშნოთ იმაზე, რაც არ ვიცით და მათ უნდა აღმოაჩინონ, იმაზე, რაც ერთად უნდა ვისწავლოთ.

სწავლა ხალისით _ გზა ევროპისაკენ! – გერმანულ-ფრანგული ენების კათედრის ეს დევიზი სკოლა „ევრო-2000“-ის სავიზიტო ბარათად იქცა. სწორედ ეს კათედრა ასრულებს „ევრო-2000“-ის მოსწავლეთათვის მედიატორის როლს, რათა საყოველთაო გლობალიზაციის ეპოქაში ჩვენმა ახალგაზრდობამ შეძლოს ეროვნული და ევროპული ფასეულობების სინთეზი; კოსმოპოლიტური აზროვნების ჩამოყალიბება კი , საბოლოოდ ქვეყნის უკეთესი მომავლის მყარი გარანტი გახდება.

კვირეულის ფარგლებში ჩატარებული მრავალფეროვანი აქტივობებიც სწორედ ამ მიზანს ემსახურებოდა; ინტეგრირებული გაკვეთილები, კონკურსები, პროექტები, სპექტაკლები; ხელსაქმითა თუ მხატვრობით, მუსიკითა თუ პოეზიით ,გერმანულ, ფრანგულ, ინგლისურ, რუსულ ენებზე შესრულებული თარგმანებითა და მოსწავლეთა ნაშრომებით გაჯერებული ორი საინტერესო კვირა, სკოლის ცხოვრების წარსულ, მაგრამ ლამაზ ისტორიად იქცა. ამბად, რომლის კიდევ ერთი ნაწილი ვნახეთ; ისტორიად, რომელიც აუცილებლად გაგრძელდება, ჩვეული ხალისითა და წარმატებით, ამბავი, რომელიც ახარებს და მომავალში კიდევ უფრო გაახარებს ჩვენს მშობლებს, ოჯახებს, ქალაქს, საქართველოს და რომელსაც ერთად ქმნიან სკოლის ნიჭიერი მოსწავლეები და პედაგოგები;

ამბავი, რომელსაც ,,ევრო-2000“ ჰქვია.

მის.: ქ. ბათუმი, ზურაბ გორგილაძის ქ. N 91
ტელ.:: 422 27-42-47
ელ. ფოსტა: euro2000batumi@yahoo.com
ვებ გვერდი: https://www.euro-2000.ge/

ძველი ბათუმის ახალი სიმაღლე – როცა მერია გასაჯაროვების შიშით მოქმედებს

ბათუმის ძველ უბანში რამდენიმე შენობას ნახავთ, რომელთა სიმაღლეც დასაშვებზე მეტია. რეგულაცია მარტივია: 2013 წლიდან „ძველ ბათუმში“ მოქმედებს ბათუმის საკრებულოს გადაწყვეტილება, რომლის მიხედვითაც, არც ერთი შენობა 15 მეტრზე მეტი არ უნდა იყოს. მაგალითად, კომპანია „ჩემპიონი-2“-მა კანონდარღვევით შენობაზე სართულის დაშენება ისე დაასრულა, რომ მერიას რეაგირება არ ჰქონია. კომპანიებმა, რომლებმაც შენობები სიმაღლეში გაზარდეს, ზედამხედველობის სამსახურისგან გაფრთხილება ერთდროულად გასულ კვირას მიიღეს. გასულ კვირასვე საზოგადოება „ბათომის“ დამფუძნებელმა შოთა გუჯაბიძემ ამ შენობებს ფოტოები გადაუღო და ინტერნეტით გადაწყვეტილების მიმღებ პირებს გაუგზავნა.

„ჩემპიონი 2“ სახლს ზუბალაშვილის 7 ნომერში აშენებს. სანებართვო მოწმობის მიხედვით, შენობის სიმაღლე 14,85 მეტრი უნდა იყოს. მერიის ზედამხედველობის სამსახურის ცნობით, სახლი უკვე 19.70 მეტრია. „საქმის წარმოება წინა კვირას დავიწყეთ. ამ კომპანიამ მიიღო გაფრთხილება,“ – გვითხრა ირაკლი მოქიამ, ბათუმის მერიის ზედამხედველობის სამსახურის სამშენებლო საქმიანობაზე სახელმწიფო ზედამხედველობის განხორციელების განყოფილების უფროსმა. კითხვაზე, თუ რატომ არ დაჯარიმდა კომპანია, გვიპასუხეს, რომ თავდაპირველად გაფრთხილების უფლება აქვთ და თუ მას არ გაითვალისწინებენ, კომპანიას 1000 ლარით დააჯარიმებენ. მერიის არქიტექტურისა და ურბანული დაგეგმარების სამსახურის უფროსის, ირაკლი ახალაძის განმარტებით, ჯარიმის გადახდა კომპანიას არ ათავისუფლებს ვალდებულებისგან, შენობა პროექტით გათვალისწინებულ პირობებთან შესაბამისობაში მოიყვანოს. „ამ კომპანიას, ისევე როგორც სხვა კომპანიებს, აქვს მანსარდის მოწყობის უფლება, მაგრამ სახურავის დახრილობა არ უნდა იყოს ამ შემთხვევაში 45 გრადუსზე მეტი. ეს ნორმაა დარღვეული,“ – უთხრა „ბათუმელებს“ ირაკლი ახალაძემ. თავად კომპანია „ჩემპიონი 2“-ში ჩვენს სატელეფონო ზარს ფინანსურმა მენეჯერმა გოჩა ჯაფარიძემ უპასუხა. მან გვითხრა, რომ დარღვევები არ აქვთ და ყველაფერი გაირკვევა.

გარკვევის მოლოდინში არიან კომპანიის „სახლი პიაცასთან“ ხელმძღვანელებიც. ეს კომპანია მაზნიაშვილის 35-37 ნომერში აშენებს სახლს. შენობა ხუთსართულიანია. მეექვსე სართულის მშენებლობა, ანუ იმის, რაც 15 მეტრზე მაღალს გახდის შენობას, ჯერ დასრულებული არ არის, მაგრამ უკვე დამონტაჟებული ბოძების ნახვით მარტივად შესაძლებელია იმის დასკვნა, რომ მორიგი სართული ემატება შენობას და არა – მანსარდა 45-გრადუსიანი დახრილობით, რასაც პროექტში შესაბამისი ცვლილება ითვალისწინებს. „ძალიან წაგებაში ვართ. მე მივიღე დაპირება ბათუმის ყოფილი მერისგან – ჯემალ ანანიძისგან, რომ თუკი მოვაწყობდი ავტოსადგომს ამავე შენობაში, მივიღებდი შეღავათს. არ ვაპირებ მშენებლობის გაჩერებას, ვარკვევთ სიტუაციას,“ – უთხრა „ბათუმელებს“ ვლადიმერ შენგელიამ.

რა იგულისხმება „გარკვევაში“ ან ვისთან მიმდინარეობს მოლაპარაკება, კომპანიის ხელმძღვანელმა ამაზე არაფერი გვითხრა. ყოფილი მერი ჯემალ ანანიძე ასეთ შეთანხმებას ვერ იხსენებს და ამბობს, რომ თუ ასეთი არსებობდა, ის წერილობითი ფორმით უნდა გაცემულიყო. მერიის ზედამხედველობის სამსახურის ცნობით კი, კომპანიას „სახლი პიაცასთან“ სამუშაოების იძულებითი შეჩერების მოთხოვნით მიმართეს. „სახლი პიაცასთან“ შემთხვევაში, სანებართვო მოწმობა არ ჰქონდათ აღებული, ისე მიმდინარეობდა მშენებლობა, ანუ პროექტი დამტკიცებულია, მაგრამ მისი შემდგომი ეტაპი არის სანებართვო მოწმობის აღება, რაც მოსაკრებლის გადახდას და დამატებითი დოკუმენტაციის წარმოდგენას მოითხოვს. გარდა ამისა, რაც შენდებოდა, ისიც პროექტით გათვალისწინებულ პირობებს არ შეესაბამებოდა,“ – გვითხრა ბათუმის მერიის არქიტექტურის სამსახურის უფროსმა, ირაკლი ახალაძემ.

რატომ ვერ დააფიქსირა კანონდარღვევა ქალაქის ცენტრში მერიამ აქამდე? – არქიტექტურის სამსახურის უფროსი არ მალავს, რომ შენობებით მას შემდეგ დაინტერესდა, როცა ფოტოები ნახა: „სოციალურ ქსელში ამ შენობების ამსახველი ფოტოები კულტურული მემკვიდრეობის დაცვის საბჭოს წევრმა, ზაურ ახვლედიანმა გამომიგზავნა, მისთვის შოთა გუჯაბიძეს გაუგზავნია. მერე მე ზედამხედველობის სამსახურს შევატყობინე,“ – ამბობს ირაკლი ახალაძე.

იმავე კითხვაზე ზედამხედველობის სამსახურის წარმომადგენელმა, ირაკლი მოქიამ ასე გვიპასუხა: „თითო კაცი ხომ ვერ გააკონტროლებს თითოეულ შენობას? ძალიან ბევრი მშენებლობაა ქალაქში“.

ამ შენობებზე გაცემული ნებართვები, ასევე მათში ცვლილებები შეთანხმებულია აჭარის კულტურული მემკვიდრეობის დაცვის ზონალურ საბჭოსთან. სააგენტოს ხელმძღვანელის, მირანდა ჩარკვიანის განმარტებით, მისი უწყების კომპეტენცია მხოლოდ კონკრეტულ ობიექტებზე ვრცელდება და არა მთლიანად ძველ ბათუმზე: „ძველი ბათუმი არ არის ძეგლი, ძეგლი არის კონკრეტული შენობა. შესაბამისად, ჩვენი მონიტორინგი არ ვრცელდება ყველა შენობაზე, რომლებიც ძველ ბათუმში შენდება“.

ცირა ელისაშვილი, კულტუროლოგი, „ტფილისის ჰამქარის“ წევრი ამბობს, რომ ნებისმიერ შემთხვევაში ხელისუფლებას აქვს პასუხისმგებლობა, რომ რეგულაციები განახორციელოს დროულად ახალ მშენებლობებზე, რომ ახლის შენება არ გახდეს ძველი ქალაქის განადგურების წყარო: „ეს არის ძალიან მნიშვნელოვანი. ისედაც ძველ უბანში ერთსართულიანი „ბელეტაჟების“ ნგრევის ხარჯზე ხდება ეს მშენებლობები, რაც ძალიან დიდი დანაკარგია ბათუმისთვის.“

შსს-ს თანამშრომლებს კიბერდანაშაულის საკითხებზე ტრენინგი ჩაუტარეს

შსს-ს ინფორმაციით: „ცენტრალური კრიმინალური პოლიციის დეპარტამენტის, საექსპერტო-კრიმინალისტიკური დეპარტამენტის, შსს-ს აკადემიის და სახელმწიფო უსაფრთხოების სამსახურის წარმომადგენლებს, პროექტის „აღმოსავლეთ პარტნიორობის ქვეყნების პოლიციის სფეროში თანამშრომლობა“ ფარგლებში, კიბერდანაშაულის წინააღმდეგ ბრძოლის საკითხებზე ლიტველმა ექსპერტებმა შინაგან საქმეთა სამინისტროს აკადემიაში ხუთდღიანი ტრენინგი ჩაუტარეს.

სწავლებაზე ციფრული მტკიცებულების ძებნა-ამოღება-დამუშავების, ბავშვთა პორნოგრაფიის და ონლაინ ფინანსური მაქინაციების გამოძიების, ინტერნეტ პროვაიდერებს შორის თანამშრომლობის, სამართალდამცავ ორგანოებს შორის გამოცდილების გაზიარების და ევროპოლთან ურთიერთობის საკითხები განიხილეს. ტრენინგზე ასევე WEB ტექნოლოგიების დანერგვის და კიბერდანაშაულის გამოძიების დროს მათი ეფექტურად გამოყენების შესახებ იმსჯელეს.

პროექტის „აღმოსავლეთ პარტნიორობის ქვეყნების პოლიციის სფეროში თანამშრომლობა“ მიზანია ევროკავშირსა და აღმოსავლეთ პარტნიორობის ქვეყნებს შორის თანამშრომლობის გაღრმავება და გამოცდილების გაზიარება. ტრენინგის დასასრულს, ყველა მონაწილეს შესაბამისი სერთიფიკატი გადაეცა“.

თავდაცვის მინისტრი აბიტურიენტებს შეხვდა

განათლება თავდაცვის სამინისტროს ერთ-ერთი მთავარი პრიორიტეტია

18 თებერვალს თავდაცვის მინისტრი თინათინ ხიდაშელი საგამოფენო ცენტრ „ექსპო-ჯორჯიაში“ საერთაშორისო საგანმანათლებლო გამოფენას ეწვია და აბიტურიენტებს შეხვდა. მომავალმა სტუდენტებმა გამოფენაზე წარმოდგენილი საქართველოს დავით აღმაშენებლის სახელობის ეროვნული თავდაცვის აკადემიის შესახებ დეტალური ინფორმაცია პირადად მინისტრისგან მიიღეს.

„მნიშვნელოვანია, რომ საქართველოში ასეთი ღონისძიებები იმართება. ახალგაზრდებს ეძლევათ შესაძლებლობა, პირველწყაროს ესაუბრონ, სკოლის დამთავრების ადრეულ ეტაპზე დაგეგმონ საკუთარი მომავალი, იცოდნენ, რა არჩევანი აქვთ და ისე მიიღონ გადაწყვეტილება. ყოველთვის მნიშვნელოვანი და საყურადღებოა ამგვარი საუნივერსიტეტო ბაზრები. ჩვენ ეროვნული თავდაცვის აკადემიით წარვდექით დღევანდელ ღონისძიებაზე და სხვა უნივერსიტეტების მსგავსად ვფიქრობთ, რომ ეროვნული თავდაცვის აკადემია არის საუკეთესო შესაძლებლობა განვითარებისთვის, საუკეთესო ადგილი, სადაც ახალგაზრდები უნდა მივიდნენ მაღალი ენთუზიაზმით და ემსახურონ საკუთარ ქვეყანას კარგი განათლებით“,- განაცხადა თავდაცვის მინისტრმა.

საერთაშორისო საგანმანათლებლო გამოფენა ყოველწლიურად იმართება. ღონისძიებაში წელს 6 ქვეყნის 100-ზე მეტი უნივერსიტეტი მონაწილეობდა. „ექსპო-ჯორჯიას“ საგამოფენო დარბაზში, ეროვნული თავდაცვის აკადემია, სხვა უმაღლეს სასწავლებლებთან ერთად, სპეციალური სტენდით იყო წარმოდგენილი.

სიმბოლურია, რომ თავდაცვის სამინისტრომ წელს 17-24 თებერვალი „ცოდნის კვირეულად“ გამოაცხადა და რეგიონებშიც მრავალი საინტერესო აქტივობა განახორციელა.

ცოდნის კვირეული 17 თებერვალს გორში, დავით აღმაშენებლის სახელობის ეროვნულ თავდაცვის აკადემიაში გაიხსნა. მინისტრმა პანკისელი ახალგაზრდებისთვის ხეობაში სტუმრობის დროს მიცემული პირობა შეასრულა და კვირეულის ფარგლებში, ეროვნულ თავდაცვის აკადემიაში ღია კარის“ დღეზე, სწორედ, ახმეტის მუნიციპალიტეტის საჯარო სკოლის მოსწავლეებს უმასპინძლა. „ცოდნის კვირეულის“ ფარგლებში ღონისძიებები გორის გარდა თბილისში და საქართველოს რეგიონებშიც გაიმართა.

22 თებერვალს ტყიბულის N6 საჯარო სკოლაში დასავლეთ სარდლობის III ქვეითი ბრიგადის სამხედრო მოსამსახურეებმა ტყიბულის მუნიციპალიტეტის სკოლების მოსწავლეებს III ქვეითი ბრიგადის სამხედრო მოსამსახურეები ეწვივნენ.

თავდაცვის სამინისტროს საავიაციო ბაზაზე მარნეულის საჯარო სკოლის მოსწავლეების მოწვევა, წიგნების გამოფენა-პრეზენტაციები, აქტივობა წვრთნებისა და სამხედრო განათლების სარდლობის ეროვნულ სასწავლო ცენტრ `კრწანისში~, სამხედრო პოლიციის სპეციალისტთა და უმცროს ოფიცერთა მომზადების კურსი _ ამ და სხვა მრავალი საინტერესო ღონისძიების შემდეგ „ცოდნის კვირეული“ 24 თებერვალს სტუდენტებისთვის გამართული საჯარო ლექცია _ დისკუსიით დაიხურა, რომელიც 1921 წლის დამოუკიდებლობისთვის ბრძოლას მიეძღვნა.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

რა არის მითი?

გთავაზობთ მითების სერიას, რომელიც საზოგადოებაში ანტიდასავლური პროპაგანდის შედეგად გაჩენილი მითებისა და კითხვების საპასუხოდ მომზადდა

რა არის მითი? მითი პროპაგანდის და სიცრუის გავრცელების ერთ-ერთი ყველაზე ძლიერი იარაღია. მას კონკრეტული ავტორი არ ჰყავს. ის ვრცელდება სწრაფად და რაც უფრო სახალხო ხდება, მით მეტად ძლიერი და გავლენიანია ესა თუ ის მითი. მითი ათასჯერ უნდა გაიმეორო, სანამ ის „სიმართლედ“ იქცევა. მას ასევე აქვს „ექოს“ ეფექტი, ანუ მას შემდეგ, რაც ასმა ადამიანმა მითი მოისმინა და მიიღო, ის თვითონ გახდა გამავრცელებელი. მით უფრო, რომ ფართო საზოგადოებისთვის უბრალო ადამიანისგან მოსმენილი გაცილებით მისაღებია, ვიდრე ცნობილი პოლიტიკოსის ან საზოგადო მოღვაწისაგან მიწოდებული ფაქტი. ასე ერთვება ფართო საზოგადოება პროპაგანდისტულ ომში. თუ ადრე მითების გავრცელებისათვის მნიშვნელოვანი იყო ტრიბუნა და ორატორული უნარები, დღეს ეს აუცილებელი აღარ არის. საინფორმაციო ტექნოლოგიების საშუალებითა და სოციალური მედიის წყალობით უავტორო მითები ადვილად იკიდებს ფეხს განსაკუთრებით იმ საზოგადოებაში, რომელიც თავისი განვითარების ვექტორს მხოლოდ წარსულთან დაკავშირებულ ცრუ ღირებულებებზე აგებს.

მოსაზრება, რომ საქართველოს ნატოში გაწევრიანება შეუძლებელია, სანამ მისი რეგიონები ოკუპირებულია და მისი ტერიტორიული მთლიანობა არ აღდგება, მცდარია.

სინამდვილეში, ნატოში გაწევრიანება, სამართლებრივი თვალსაზრისით, ნიშნავს საქართველოს გაწევრიანებას საერთაშორისოდ აღიარებული საზღვრებით, რა თქმა უნდა, აფხაზეთის და ცხინვალის (ამჟამად ოკუპირებულ) რეგიონებთან ერთად. არსებობს არა ერთი ქვეყნის მაგალითი, რომლებსაც ნატოსა და ევროკავშირში გაწევრიანების დროს ტერიტორიული და საზღვრების დადგენის პრობლემა ჰქონდა. მაგალითად, მეორე მსოფლიო ომის შემდეგ გერმანია ორად გაიყო და აღმოსავლეთ გერმანია ოკუპირებული იყო საბჭოთა კავშირის საოკუპაციო ჯარის მიერ. 1955 წელს დასავლეთ გერმანია გაწევრიანდა ნატოში, რამაც გერმანიის პოლიტიკური და ეკონომიკური სიძლიერე და სტაბილური განვითარება განაპირობა. ცივი ომის დასრულებისა და ბერლინის კედლის დანგრევის შემდეგ, გერმანია გაერთიანდა და დღეს ის ნატოსა და ევროკავშირის ერთ-ერთი ყველაზე ძლიერი წევრია. ნატოში გაწევრიანებამ დასავლეთ გერმანიის უსაფრთხო და სტაბილურ განვითარებას შეუწყო ხელი, ხოლო ბერლინის კედლის დანგრევის შემდეგ გაერთიანებულ გერმანიას გაცილებით ძლიერი და მყარი ხმა აქვს ალიანსში.

ასევე, საინტერესოა ბალტიისპირეთის ქვეყნების მაგალითი, რომლებიც 2004 წელს ნატოში გაწევრიანდნენ. ამ ქვეყნებს საზღვრების დადგენის საკითხები არ ჰქონდათ მოგვარებული მეზობელ სახელმწიფოსთან. მიუხედავად ამისა, მოკავშირეებმა მიიღეს პოლიტიკური გადაწყვეტილება, რომ ესტონეთი, ლიტვა, ლატვია NATO- ში მიეწვიათ. ამ გადაწყვეტილებამ ბალტიის ქვეყნების სტაბილური და მშვიდობიანი განვითარება განაპირობა.

ეს მაგალითები ადასტურებს, რომ ნატოში გაწევრიანება ტერიტორიული მთლიანობის აღდგენისა და მისი უსაფრთხო განვითარების ხელშემწყობ ფაქტორს წარმოადგენს.

დეკორატიული ფილების დაგება ბულვარში [ვიდეო]

ნინოშვილის ქუჩის გასწვრივ ცენტრალური ბულვარის შესასვლელიდან უნივერსიტეტამდე არსებულ ალეაში მოზაიკის ნაცვლად ახალი ბეტონის დეკორატიულ ფილებს აგებენ.

ბულვარის ადმინისტრაციის ინფორმაციით, ბულვარში სარეაბილიტაციო სამუშაოები მარტის თვეში დასრულდება.

საქართველო ნატოში გაწევრიანების გზაზე

1991 წელს, როდესაც საქართველომ დამოუკიდებლობა მოიპოვა, ქვეყანამ თავისი ისტორიული არჩევანი გააკეთა და პროდასავლური კურსი აიღო. გეოპოლიტიკური მდებარეობიდან გამომდინარე, საქართველოს სუვერენიტეტი, ტერიტორიული მთლიანობა, უსაფრთხოება და დემოკრატიული განვითარება ყოველთვის საფრთხის წინაშე იდგა. სწორედ ამიტომ, საბჭოთა კავშირის დაშლის შემდეგ, საქართველომ ქვეყნის უსაფრთხოების გარანტიების ძიება ევროატლანტიკურ სივრცეში დაიწყო.

საქართველოს ჩრდილოატლანტიკურ ალიანსთან 24-წლიანი თანამშრომლობის ისტორია აკავშირებს. ქვეყანამ, როგორც ნატოს პარტნიორმა, 1992 წლიდან დღემდე გრძელი და მნიშვნელოვანი გზა განვლო. 2008 წელს ნატოს ბუქარესტის სამიტზე ალიანსის წევრი ქვეყნების ლიდერები შეთანხმდნენ, რომ საქართველო გახდება ნატოს წევრი. ამ განცხადებით, მოკავშირეებმა საქართველოს ნატოში გაწევრიანებასთან დაკავშირებით პოლიტიკური ნება გამოხატეს, ეს ნატოს მომდევნო სამიტებზეც მრავალჯერ დადასტურდა. ბუქარესტის სამიტიდან დღემდე მნიშვნელოვნად განვითარდა ნატო-საქართველოს ურთიერთობები – დაფუძნდა ნატო-საქართველოს კომისია, რომელიც მნიშვნელოვანი საკონსულტაციო ფორუმია; საქართველომ დაიწყო ყოველწლიური ეროვნული პროგრამის განხორციელება, რომელიც შინაარსით გაწევრიანების სამოქმედო გეგმის პრაქტიკული ნაწილია; საქართველოს მიენიჭა ნატოს ასპირანტი ქვეყნის სტატუსი.

ნატოსა და საქართველოს შორის ურთიერთობებმა ინტენსიური ხასიათი მიიღო და კონკრეტული შედეგებიც გამოიღო.

პირველ რიგში, ალიანსის რეკომენდაციების შესაბამისად, საქართველო ეფექტურად ახორციელებს რეფორმებს, რაც ქვეყანაში დემოკრატიული პროცესების განვითარებას, კანონის უზენაესობასა და ადამიანის უფლებების დაცვას უწყობს ხელს. ამასთან, საქართველოს მიერ ინტეგრაციული მექანიზმების ეფექტურად განხორციელება და ნატოს პროგრამებში მონაწილეობა უზრუნველყოფს ჩვენი ქვეყნის თავდაცვის ტრანსფორმაციას და თანამედროვე, მოქნილი, მუდმივ საბრძოლო მზადყოფნაში მყოფი ჯარის ჩამოყალიბებას.

საქართველოს მიერ პირნათლად და წარმატებით განხორციელებული რეფორმები არაერთგზის აღინიშნა ნატოს და წევრი ქვეყნების წარმომადგენლების მიერ.

ამას გარდა, 2014 წლის ნატოს უელსის სამიტზე ნატო-საქართველოს არსებითი პაკეტის ამოქმედებით საქართველოს ალიანსთან თანამშრომლობა თვისობრივად ახალ ეტაპზე გადავიდა. ნატო-საქართველოს არსებითი პაკეტის ინიციატივების წარმატებით განხორციელება ხელს უწყობს საქართველოს თავდაცვის შესაძლებლობების გაძლიერებას, საქართველოს შეიარაღებული ძალების ნატოსთან თავსებადობის ამაღლებას და რეგიონში სტაბილურობის განმტკიცებას.

ნიშანდობლივია, რომ ნატოს უელსის სამიტზე საქართველოსა და ალიანსს შორის ურთიერთობებში კიდევ ერთი მნიშვნელოვანი ნაბიჯი გადაიდგა და საქართველო, როგორც ნატოს ოპერაციების მნიშვნელოვანი კონტრიბუტორი, „გაძლიერებული შესაძლებლობების პარტნიორთა“ ჯგუფში მიიწვიეს. ეს ფორმატი საქართველოს დამატებითი პოლიტიკური კონსულტაციებისა და ურთიერთთავსებადობის საკითხებზე თანამშრომლობის შესაძლებლობას აძლევს.

საქართველო, როგორც ნატოს ასპირანტი ქვეყანა და საიმედო სტრატეგიული პარტნიორი, საერთაშორისო სტაბილურობისა და უსაფრთხოების განმტკიცებაში საკუთარი წვლილის შეტანას განაგრძობს. საქართველო მეორე ყველაზე მსხვილი კონტრიბუტორი ქვეყანაა ნატოს მტკიცე მხარდაჭერის მისიაში ავღანეთში, სადაც ქართველი სამხედრო მოსამსახურეები ნატოს დროშის ქვეშ ამაყად დგანან მოკავშირეთა ჯარისკაცების გვერდით და წარმატებით ასრულებენ დაკისრებულ ამოცანებს.

დღეს საქართველოს შეიარაღებული ძალები ნატოსთან თავსებადობის უმაღლესი დონის მაჩვენებლით სარგებლობს. 12 ათასზე მეტმა ქართველმა სამხედრო მოსამსახურემ ამერიკელი საზღვაო ქვეითების ინსტრუქტაჟით შესაბამისი წვრთნა გაიარა და ავღანეთში ნატოს ეგიდით წარმოებულ ოპერაციაში მიიღო მონაწილეობა. ამას გარდა, საქართველო ჩართულია მაღალი მზადყოფნის ნატოს სწრაფი რეაგირების ძალებში, რაც ქვეყანას ნატოს მაღალი დონის წვრთნასა და სწავლებაში მონაწილეობის მიღების შესაძლებლობას აძლევს და ქართული ჯარის ნატოს წევრი ქვეყნების შეიარაღებულ ძალებთან თავსებადობის გაძლიერებას უწყობს ხელს.

2015 წლის დეკემბრის ნატოს საგარეო საქმეთა მინისტერიალზე მონტენეგროს მიწვევა ალიანსში გაწევრიანებისთვის ნათელი და მკაფიო გზავნილია საქართველოს, როგორც ასპირანტი სახელმწიფოსთვის, რომ ნატოს „ღია კარის“ პოლიტიკა გრძელდება და საქართველოს ნატოში გაწევრიანება ალიანსის დღის წესრიგის მნიშვნელოვან საკითხად რჩება. მოკავშირეებმა აღნიშნეს, რომ საქართველო-ნატოს ურთიერთობები საქართველოს ალიანსში გაწევრიანებისთვის მოსამზადებლად ყველა პრაქტიკულ ინსტრუმენტს მოიცავს. გაწევრიანების სამოქმედო გეგმა საქართველოს ალიანსის წევრობისთვის ინტეგრაციის კონტექსტში არის ნატოს 28 წევრი სახელმწიფოს პოლიტიკური გადაწყვეტილება, რომელიც საქართველოს გაწევრიანებისთვის და არა გაწევრიანების გზაზე პროგრესის მისაღწევად ესაჭიროება.

ნატო-საქართველოს ურთიერთობებში არსებული მნიშვნელოვანი პროცესები იძლევა იმის მყარ საფუძველს, რომ საქართველოს ნატოში გაწევრიანების გზაზე, 2016 წლის ნატოს ვარშავის სამიტზე, კიდევ უფრო მეტი წარმატება ელის. ვარშავის სამიტის შემდეგ საქართველოს ექნება შესაძლებლობა და საშუალებები, კიდევ უფრო ეფექტურად დაიცვას საკუთარი სახელმწიფოებრიობა.

ახალი ინვესტორი სასტუმრო „ჰილტონის“ მიმდებარედ

კომპანია „ვესტინვესტი“ სასტუმრო „ჰილტონის“ მიმდებარედ სასტუმროს ტიპის აპარტამენტების, საკონფერენციო დარბაზისა და სპორტულ-გასართობი ობიექტების აშენებას გეგმავს. ამ მიზნით ბათუმის საკრებულომ რუსთაველის # 51-ში მდებარე 3508 კვ/მ მიწის ნაკვეთი განსაკარგავად აჭარის მთავრობას გასული წლის დეკემბერში გადასცა, თუმცა აჭარის მთავრობას კომპანიასთან ჯერ ხელშეკრულება არ გაუფორმებია.

პროექტის განმარტებითი ბარათის თანახმად, რომელიც მერიამ საკრებულოს სხდომაზე გამოიტანა, 2016 წლის 22 იანვარს კომპანია „ვესტინვესტმა“ მერიას წერილით მიმართა და საინვესტიციო წინადადების დაზუსტება მოითხოვა. კომპანია მზად იყო ხელშეკრულების გაფორმებიდან 45 დღის განმავლობაში ბათუმის მუნიციპალიტეტის ბიუჯეტში გადაერიცხა 525 000 აშშ დოლარის ექვივალენტური ლარი. გადაცემულ მიწის ნაკვეთზე კი შეთანხმებულ ვადაში უზრუნველყოფდა მრავალფუნქციური შენობა-ნაგებობების აშენებას.

ინვესტორი იღებდა არანაკლებ ასნომრიანი სასტუმროს ტიპის აპარტამენტების, საკონფერენციო დარბაზის, სპორტულ-გამაჯანსაღებელი ცენტრის, საზოგადოებრივი კვების ობიექტის, გასართობი ცენტრის, პარკინგისა და სარეკრეაციო ზოლის მოწყობის ვალდებულებას. ამ ყველაფერში ინვესტორს არანაკლებ 25 მილიონი დოლარის ინვესტიცია უნდა განეხორციელებინა. რა ბედი ეწია პროექტს? – ამ კითხვაზე აჭარის ფინანსთა და ეკონომიკის სამინისტროში „ბათუმელებს“ უპასუხეს, რომ შეკითხვის ადრესატი მერიაა. მერიაში კი განმარტეს, რომ ქონება მთავრობას გადაეცა და პასუხიც მთავრობამ უნდა გაგვცეს.

კომპანია „ვესტინვესტი“ 2011 წელს საქართველოს ორმა მოქალაქემ – ვლადიმერ წულაძემ და სლავა ჟღენტმა და რუსეთის მოქალაქემ, ლუდმილა ბელიაევამ დააფუძნეს. 2015 წელს რეესტრის მონაცემებში ცვლილება შევიდა, რის შემდეგაც კომპანიის სამივე დამფუძნებელი მონაცემებიდან გაქრა. ამ დროიდან კომპანიის წილებს გიორგი გველესიანი – 33,34%, თემურ უსტიაშვილი – 33,33% და გიორგი თავდიშვილი – 33,33% ინაწილებენ. კომპანიის დირექტორად თემურ უსტიაშვილი ფიქსირდება.