ბათუმის ახალ ბულვარში ზღვა კიდევ ერთ პირსს ანგრევს. ამ დროისთვის ნაგებობა ისეა დაზიანებული და დეფორმირებული, რომ მასზე გასვლა უკვე სახიფათოა.
ბოლო პერიოდში ბათუმში ზღვა აზიანებს როგორც სხვადასხვა ნაგებობას სანაპიროზე, ასევე, საქალაქო ინფრასტრუქტურას და უშუალოდ ნაპირს.
ზღვაში მდინარეების მიერ ნატანის შემცირების გამო შტორმის დროს ზღვა ბათუმის სანაპიროს წლების განმავლობაში ანგრევდა, განსაკუთრებით აეროპორტის ასაფრენი ზოლისა და ადლიის მიმდებარედ.
ამ პროცესის შესაჩერებლად გასული საუკუნის ბოლოს დაიწყეს ნატანის ზღვაში ხელოვნური ჩაყრა, რამაც დადებითი შედეგი გამოიღო, თუმცა ეს პროცესი აღარ გაგრძელებულა.
ახალი ბულვარის ბოლოდან მდინარე ჭოროხის შესართავამდე ქვის ლოდებით დამცავი ნაგებობაც კი მოეწყო, თუმცა ზღვამ უკვე ახალი ბულვარის მიმდებარე ნაპირის წარეცხვა დაიწყო. ზიანდება თავად ეს ნაგებობებიც, რომელთა გასწვრივ პლაჟი, ფაქტობრივად, აღარ დარჩა.
ეს პირსი ბათუმის მუნიციპალიტეტის საკუთრებაა და ის იჯარით აქვს აღებული შპს „გთემ ჰოსფითალითი გრუპს“.
—
ახალ ბულვარში მდებარე კიდევ ერთი პირსი ზღვამ 2021 წლის 23 დეკემბერს დაანგრია:
საფრთხე ემუქრება ძველი ბულვარის პლაჟებსაც.
„ახლო მომავალში, აუცილებლად უნდა შემუშავდეს სანაპიროს ექსპლუატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა.“
ამ თემაზე ვრცლად:
ბულვარში მიტაცებული პლაჟის აღდგენას 6 მილიონი სჭირდება – რა ელის სანაპიროს